ପାକିସ୍ତାନର ବାଲୋଚିସ୍ତାନ ପ୍ରଦେଶ ଅନ୍ତର୍ଗତ ମୁସାଖାଇଲ ଜିଲ୍ଲା ରେ ପୃଥକ ଆତଙ୍କବାଦୀ ଆକ୍ରମଣ ଘଟଣାରେ ୬୦ ଜଣ ପ୍ରାଣ ହରାଇଛନ୍ତି। ଆହତ ୧୫ ଜଣଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ଆକ୍ରମଣ ପାଇଁ ‘ବାଲୋଚିସ୍ତାନ ଲିବରେସନ ଆର୍ମି’ ନିଜକୁ ଦାୟୀ କରିଛି। ସୂଚନା ମୁତାବକ ଆତଙ୍କବାଦୀମାନେ ରବିବାର ରାତିରେ ପଞ୍ଜାବ-ବାଲୋଚିସ୍ତାନ ଜାତୀୟ ରାଜପଥରେ ଏକାଧିକ ବସ୍, ଟ୍ରକ ଏବଂ ଅନ୍ୟ ଯାନଗୁଡିକୁ ଅଟକାଇ ସେଥିରେ ଥିବା ଯାତ୍ରୀଙ୍କୁ ଓହ୍ଲାଇବାକୁ ନିର୍ଦ୍ଦେଶ ଦେଇଥିଲେ। ସେମାନଙ୍କର ଜାତିଗତ ପରିଚୟ ଯାଞ୍ଚ କରିବା ପରେ ଆତଙ୍କବାଦୀମାନେ ପଞ୍ଜାବରୁ ଆସିଥିବା ଲୋକଙ୍କୁ ମୁଖ୍ୟତଃ ଟାର୍ଗେଟ କରି ଗୁଳି କରିବାରୁ ୨୩ ଜଣଙ୍କର ମୃତ୍ୟୁ ଘଟିଥିଲା। ଆତଙ୍କବାଦୀମାନେ ବସ୍ଯାତ୍ରୀଙ୍କ ବ୍ୟତୀତ କୋଇଲା ବୋଝେଇ ଟ୍ରକ୍ଗୁଡିକର ଡ୍ରାଇଭରଙ୍କୁ ମଧ୍ୟ ଗୁଳିକରି ହତ୍ୟା କରିଥିବା କୁହାଯାଇଛି। ଆତଙ୍କବାଦୀମାନେ ଅତି କମରେ ୧୦ଟି ଟ୍ରକ୍ ପୋଡିଦେଇଛନ୍ତି। ରବିବାର ରାତିରେ ଆତଙ୍କବାଦୀମାନେ ସେଠାରେ ଥିବା କେତେକ ଥାନା, ସେନା ଶିବିର ଉପରେ ମଧ୍ୟ ଆକ୍ରମଣ କରିଥିଲେ। ଏଥିଯୋଗୁଁ ୨୦ ଜଣଙ୍କର ପ୍ରାଣହାନି ଘଟିଛି। ଆତଙ୍କବାଦୀମାନେ ପାକିସ୍ତାନ-ଇରାନକୁ ସଂଯୋଗ କରୁଥିବା ଏକ ଟ୍ରେନ ଲାଇନ ଏବଂ ବାଲୋଚିସ୍ତାନର ରାଜଧାନୀ କ୍ବେଟାରେ ଥିବା ଏକ ପୋଲକୁ ବିସ୍ଫୋରଣ ଜରିଆରେ ଉଡାଇ ଦେଇଛନ୍ତି। ଅପରପକ୍ଷରେ ପାକ୍ ସୈନ୍ୟଙ୍କ ପାଲଟା କାର୍ଯ୍ୟାନୁଷ୍ଠାନରେ ୧୨ ଜଣ ଆତଙ୍କବାଦୀ ପ୍ରାଣ ହରାଇଛନ୍ତି ବୋଲି ଗୃହମନ୍ତ୍ରୀ ମୋହସିନ ନକ୍ଭୀ ସୂଚନା ଦେଇଛନ୍ତି। ବାଲୋଚିସ୍ତାନ ମୁଖ୍ୟମନ୍ତ୍ରୀ ସର୍ଫରାଜ ବୁଗ୍ତି ଏହି ଘଟଣାରେ ମୃତକଙ୍କ ପରିବାର ପ୍ରତି ଗଭୀର ସମବେଦନା ଜଣାଇଛନ୍ତି।
Naxatra News is now on Whatsapp
Join and get latest news update delivered to you via whatsapp
Join Now
