ମହାରାଷ୍ଟ୍ର ଭୂଷ୍ଖଳନ : ତୃତୀୟ ଦିନରେ ମିଳିଛି ତିନୋଟି ମୃତଦେହ, ମୃତକଙ୍କ ସଂଖ୍ୟା ୨୬କୁ ବୃଦ୍ଧି

ମୁମ୍ବାଇ : ଆଜି ମହାରାଷ୍ଟ୍ରର ରାୟଗଡ ଜିଲ୍ଲାର ବିପର୍ଯ୍ୟୟ ପ୍ରଭାବିତ ଇରଶାଲୱାଡି ଗ୍ରାମରେ ତୃତୀୟ ଦିନରେ ଆବର୍ଜନା ତଳେ ପୋତି ହୋଇଥିବା ୩ଟି ଶବ ଉଦ୍ଧାର ହୋଇଛି । ସେଥିମଧ୍ୟରୁ ଜଣେ ପୁରୁଷ ଏବଂ ଦୁଇ ମହିଳାଙ୍କ ଶବ ରହିଛି । ଏଥ୍ ସହ ଏହି ଦୁର୍ଘଟଣାରେ ଏପର୍ଯ୍ୟନ୍ତ ୨୬ ଜଣଙ୍କର ମୃତ୍ୟୁ ହୋଇଛି । ୧୪୩ ଜଣଙ୍କୁ ଏୟାବତ୍ ମାଟି ତଳୁ ଉଦ୍ଧାର କରା ସରିଥିବାବେଳେ ୮୭ ଜଣଙ୍କ ସନ୍ଧାନ କାର୍ଯ୍ୟ ଏବେ ମଧ୍ୟ ଜାରି ରହିଛି ।

କୋଙ୍କଣ ଡିଭିଜନାଲ କମିଶନର ଡକ୍ଟର ମହେନ୍ଦ୍ର କଲ୍ୟାଣକରଙ୍କ ଅନୁଯାୟୀ, ପ୍ରବଳ ବର୍ଷା ହେତୁ ବୁଧବାର ରାତିରେ ରାୟଗଡ ଜିଲ୍ଲାର ଇରସାଲୱାଡି ଗାଁର ଏକ ପାହାଡର କିଛି ଅଂଶ କିଛି ଘର ଉପରେ ପଡ଼ିଯାଇଛି । ଏହା ପରେ ଗୁରୁବାରଠାରୁ ସେହି ଅଞ୍ଚଳରୁ ମାଟି ତଳୁ ଲୋକଙ୍କର ଉଦ୍ଧାର କାର୍ଯ୍ୟ ଚାଲିଛି। ଘଟଣାସ୍ଥଳରେ ପହଞ୍ଚିବାର ଉପାୟ ଅଭାବରୁ ଜେସିବି କିମ୍ବା ପୋକଲେନ୍ ଏଠାକୁ ଯାଇପାରିବେ ନାହିଁ। ଏହି କାରଣରୁ, କୋଦାଳ ଓ ପାଓଡା ସାହାଯ୍ୟରେ ମାଟି ଅତଡା ସହ ଆବର୍ଜନାକୁ ଅତି ଯତ୍ନର ସହିତ ସେହି ସ୍ଥାନରୁ ବାହାର କରାଯାଉଛି।

NDRF ଏବଂ CIDCO ସମେତ ପ୍ରାୟ ଏକ ହଜାର ସ୍ବେଚ୍ଛାସେବୀ ସଂଗଠନ ଘଟଣାସ୍ଥଳରେ ରିଲିଫ ଏବଂ ଉଦ୍ଧାର କାର୍ଯ୍ୟ କରୁଛନ୍ତି । ପ୍ରବଳ ବର୍ଷା ହେତୁ ରିଲିଫ କାର୍ଯ୍ୟରେ ମଧ୍ୟ ବାଧା ଉପୁଜିଛି । ଇରଶାଲୱାଡି ଗାଁରେ ୪୮ଟି ପରିବାରର ୨୮୮ ଲୋକ ରହୁଥିଲେ । ଏହି ଘଟଣାରେ ଉଦ୍ଧାର ହୋଇଥିବା ଲୋକଙ୍କ ପାଇଁ ୬୦ଟି କଣ୍ଟେନର ଉପଲବ୍ଧ କରାଯାଇଛି । ଘଟଣାସ୍ଥଳରେ ଉଦ୍ଧାର ହୋଇଥିବା ଲୋକଙ୍କ ପାଇଁ ଖାଦ୍ୟ ଏବଂ ଅନ୍ୟାନ୍ୟ ସୁବିଧା ଉପଲବ୍ଧ କରାଯାଉଛି । ଘଟଣାସ୍ଥଳରେ ମେଡିକାଲ ଟିମ୍ ମଧ୍ୟ ନିୟୋଜିତ କରାଯାଇଛି ।