ଧର୍ମଶାଳା : ସନ୍ଦେହଜନକ ଅବସ୍ଥାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ଗତକାଲି ବିଳମ୍ବିତ ରାତି ଏଭଳି ଘଟଣା ଘଟିଛି ଯାଜପୁର ଜିଲା ବ୍ରହ୍ମବରଦା ଥାନା ଅନ୍ତର୍ଗତ ରୁଦ୍ରପୁର ଗ୍ରାମରେ । ମୃତ ଯୁବକ ଜଣକ ହେଲେ ରୁଦ୍ରପୁର ଗ୍ରାମର ଅଶୋକ ସାହୁଙ୍କ ପୁଅ ଅରବିନ୍ଦ (୨୪) ବୋଲି ଜଣାପଡିଛି । ଏହି ଘଟଣା ଜଣାପଡିବା ପରେ ପରିବାର ଲୋକ ଓ ଗ୍ରାମବାସୀ ଘଟଣାସ୍ଥଳରେ ପହଞ୍ଚିଥିଲେ । ନିକଟରେ ଥିବା ଏକ ଘର ଭିତରେ ଜୋତା, କଟା ହୋଇଥିବା କିଛି ରଶି, ବ୍ଲେଡ ଆଦି ପଡିଥିବା ବେଳେ ଅରବିନ୍ଦଙ୍କ ବାମ ହାତରେ ୨ଟି ସ୍ଥାନରେ କଟା ହୋଇଥିବା ଦେଖିବାକୁ ପାଇଥିଲେ । ସନ୍ଦେହଜନକ ଭାବେ ତାଙ୍କର ମୃତ୍ୟୁ ହୋଇଥିବା ବେଳେ ଘଟଣାର ନିରପେକ୍ଷ ତଦନ୍ତ ଦାବି କରିଛନ୍ତି ପରିବାର ଲୋକେ । ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ କଳ୍ପନା ଜଳ୍ପନା ଲାଗି ରହିଛି । ପରିବାର ପକ୍ଷରୁ ଏନେଇ ଥାନାରେ ଅଭିଯୋଗ ହେବା ପରେ ରୁଦ୍ରପୁର ଖେଳପଡିଆ ଓସ୍ତ ଗଛରୁ ଝୁଲନ୍ତା ଅବସ୍ଥାରେ ତାଙ୍କ ମୃତଦେହକୁ ଉଦ୍ଧାର କରିଛି ପୁଲିସ। ରଶି, ବ୍ଲେଡ ସହ ମୋବାଇଲକୁ ଜବତ ମଧ୍ୟ କରିଛି ପୋଲିସ । ମୋବାଇଲ ନମ୍ବର ଯାଞ୍ଚ କଲେ ପ୍ରକୃତ କାରଣ ଜଣାପଡିବ ବୋଲି ଗ୍ରାମବାସୀ ଓ ମୃତକଙ୍କ ପରିବାର ଲୋକେ ଦାବି କରିଛନ୍ତି । ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି ପୋଲିସ । ଶବକୁ ଜବତ କରି ଏହାର ଚତୃପାର୍ଶ୍ଵ ଛାନଭିନ କରିବା ପରେ ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇ ଦେଇଛି । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରକୃତ କାରଣ ଜଣାପଡିବ ବୋଲି ପୋଲିସ କହିଛି । ସ୍ଵର୍ଗତ ଅରବିନ୍ଦ ଚଣ୍ଡିଖୋଲସ୍ଥିତ ମଣିପୁରମ ଗୋଲଡ ଲୋନ କାର୍ଯ୍ୟାଳୟରେ କାର୍ଯ୍ୟରତ ଥିଲେ । ଅନ୍ୟପକ୍ଷରେ ପୋଲିସ ଜବତ ହୋଇଥିବା ମୋବାଇଲରେ ଥିବା ଡାଏଲ ନମ୍ବରକୁ ଯାଞ୍ଚ କରିଛି । ଶେଷ ଡାଏଲ ନମ୍ବରକୁ ସଂଗ୍ରହ କରି ତଦନ୍ତ ଆରମ୍ଭ କରିବା ସହ ଏହି ନମ୍ବର ସ୍ଥାନୀୟ ଅଂଚଳର ଜଣେ ଯୁବତୀଙ୍କର ହୋଇଥିବା ଜଣାପଡିଛି । ତେବେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିବା ଜଣାପଡିଛି । କେଉଁ କାରଣରୁ କେଉଁ ପରିସ୍ଥିତିରେ ଅରବିନ୍ଦଙ୍କର ଏଭଳି ସନ୍ଦେହଜବକ ମୃତ୍ୟୁ ଘଟିଲା ତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।
Naxatra News is now on Whatsapp
Join and get latest news update delivered to you via whatsapp
Join Now
