ବ୍ରିଟିସ୍ ଦ୍ୱୀପକୁ ଧକ୍କା ଦେଇପାରେ ବିଶ୍ୱର ବୃହତ୍ତମ ହିମଶୈଳ । ବିଶ୍ୱର ସର୍ବବୃହତ୍ ହିମଶୈଳ ଆଣ୍ଟାର୍କଟିକାରୁ ବିଚ୍ଛିନ୍ନ ହେବା ପରେ ଆଟଲାଣ୍ଟିକ ମହାସାଗରରେ ପ୍ରବାହିତ ହୋଇ ବ୍ରିଟିସ ଅଞ୍ଚଳ ଦକ୍ଷିଣ ଜର୍ଜିଆ ଦ୍ବୀପ ସହ ଧକ୍କା ହେବା ଅବସ୍ଥାରେ ରହିଛି। ବର୍ତମାନ ୨୮୦ କିଲୋମିଟର ଦୂରରେ ଥିବା ହିମଶୈଳରେ ପ୍ରବଳ ପବନ ଓ ସମୁଦ୍ର ସ୍ରୋତ ଦ୍ୱାରା ପରିଚାଳିତ ହେଉଛି। ଏହାର ଗତିଶୀଳତା ଦୀର୍ଘ ଦିନ ଧରି ବୈଜ୍ଞାନିକ ସମୁଦାୟର ଦୃଷ୍ଟି ଆକର୍ଷଣ କରିଛି। ପାଖାପାଖି ୪,୦୦୦ ବର୍ଗ କିଲୋମିଟର ପରିବ୍ୟାପ୍ତ ଏହି ବିଶାଳ ଭାସମାନ ବରଫ ପାହାଡ଼ ମୁମ୍ବାଇଠାରୁ ଛଅଗୁଣ ବଡ଼ ହେବ। ଏହା ପଶ୍ଚିମ ଆଣ୍ଟାର୍କଟିକାର ଫିଲ୍ଚନର-ରୋନେ ଆଇସ୍ ସେଲ୍ଫରୁ ଖସିବା ପରେ ୩୭ ବର୍ଷରୁ ଅଧିକ ସମୟ ଧରି ସ୍ଥିର ରହିଥିଲା।
ବୈଜ୍ଞାନିକମାନେ କହିଛନ୍ତି ଯେ, ପ୍ରତି ୩ରୁ ୭ ସେକେଣ୍ଡରେ ଏକ ମିଟର ବେଗରେ ଏହି ହିମଖଣ୍ଡ ଗତି କରୁଛି, ଯାହା କି ଘଣ୍ଟାପ୍ରତି ଏକ ମାଇଲରୁ କମ୍। ଯଦି ଏହା ଦକ୍ଷିଣ ଜର୍ଜିଆ ଦ୍ବୀପରେ ଅଟକିଯାଏ, ତେବେ ପରିବେଶ ଉପରେ ଏହାର ପ୍ରତିକୂଳ ପ୍ରଭାବ ପଡ଼ିବ। ଏହି ଦ୍ୱୀପ ଲକ୍ଷ ଲକ୍ଷ ସିଲ୍, ପେଙ୍ଗୁଇନ୍ ଓ ସାମୁଦ୍ରିକ ପକ୍ଷୀଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଆବାସସ୍ଥଳୀ। ଏ୨୩ଏ ହିମଶୈଳର ଉପସ୍ଥିତି ସେମାନଙ୍କର ଖାଦ୍ୟସଂଗ୍ରହ ପଥରେ ବାଧା ସୃଷ୍ଟି କରିପାରେ। ବ୍ରିଟିସ ଆଣ୍ଟାର୍କଟିକା ସର୍ଭେର ବୈଜ୍ଞାନିକମାନେ ସାଟେଲାଇଟ୍ ଫଟୋ ବ୍ୟବହାର କରି ବିଶାଳ ବରଫଖଣ୍ଡର ଦୈନିକ ଗତିବିଧି ଉପରେ ନଜର ରଖିଛନ୍ତି।
Naxatra News is now on Whatsapp
Join and get latest news update delivered to you via whatsapp
Join Now
