ମୟୁରଭଞ୍ଜ: ସାମାନ୍ୟ ଜାଗା ପାଇଁ ଭାଇ ସାଜିଲା ସଇତାନ । ଭାଇ ଓ ଭାଉଜ ମିଶି ପିଟି ପଟି ମାରିଦେଲେ ବଡ ଭଉଣୀକୁ । ମୟୁରଭଞ୍ଜର ବାଙ୍ଗିରିପୋଷି ଥାନା ଅଧୀନ ବେଗୁନିଆ ବନ୍ଧ ଗ୍ରାମରେ ଘଟିଛି ଏ ଅଭାବନୀୟ ଘଟଣା । ପୋଲିସ ଘଟଣାକୁ ଆଧାର କରି ଆରମ୍ଭ କରିଛି ତଦନ୍ତ ।
ସୂଚନା ଅନୁଯାୟୀ ଜାଗା ପ୍ରସଙ୍ଗକୁ ନେଇ ମୃତକ ଜବା ଏବଂ ତାଙ୍କ ଭାଇ ବୁଢାନଙ୍କ ସମ୍ପର୍କ ଭଲ ନଥିଲା । ଜବା କିଛି ଜାଗା ମାଡିବସିଥିବା ବେଳେ ବୁଢାନ ତାକୁ ଛାଡିବାକୁ ରାଜି ନଥିଲେ । କିଛିଦିନ ପୂର୍ବରୁ ଜବା ନିଜ ଜାଗାରେ ଥିବା ଏକ ଗଛକୁ ବିକ୍ରି କରିଥିଲେ ଏବଂ ଗଛକାଟ ବେଳେ ବୁଢାନ ଏହାକୁ ବିରୋଧ କରିଥିଲେ ଫଳରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏହାର ସମାଧାନ ପାଇଁ ଗତ ରାତିରେ ଗ୍ରାମରେ ବୈଠକ ବସିଥିଲା କିନ୍ତୁ ବୈଠକରେ କିଛି ସମାଧାନ ହୋଇପାରିନଥିଲା । ଫଳରେ ଜବା ସେଠାରେ ଗାଳି ଗୁଲଜ କରି ଘରକୁ ଫେରି ଆସିଥିଲେ ।
ଗାଳି ଗୁଲଜ କରି ଫେରିଯିବା ପରେ ଭାଇ ବୁଢାନ ଓ ତାଙ୍କ ପତ୍ନୀ ମାଳତୀ ରାଗରେ ଜର୍ଜରିତ ହୋଇ ପରଦିନ ସକାଳେ ଜବାଙ୍କ ଘରେ ପହଞ୍ଚଥିଲେ । ସେଠାରେ ତାଙ୍କୁ ଠେଙ୍ଗାରେ ନିସ୍ତୁକ ମାଡ ମାରିବା ପରେ ତାଙ୍କୁ ଗାଁ ମଝିରେ ଘୋଷାଡି ଘୋଷାଡି ନେଲେ । ଫଳରେ ରକ୍ତାକ୍ତ ଅବସ୍ଥାରେ ଛଟପଟ ହେଉଥିବା ଜବା ଗାଁ ରାସ୍ତାରେ ହିଁ ଅଖି ବୁଜିଥିଲେ ।
ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଉଭୟଙ୍କୁ ଗିରଫ କରିଥିଲା ଏବଂ ଶବକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠେଇଥିଲା । ଏବେ ଘଟଣାର ତଦନ୍ତ ଜାରି ରଖିଛି ପୋଲିସ ।
