ଅପରାଧଓଡ଼ିଶା

ଧନେଶ୍ବର ମୃତ୍ୟୁ ଘଟଣା: ପରିବାରର ଜଣଙ୍କୁ ଚାକିରି ଦେବାକୁ ପ୍ରତିଶ୍ରୁତି

କଟକ: ବଡ଼ମ୍ବାରେ ବନ ବିଭାଗ ହେପାଜତରେ ଅଭିଯୁକ୍ତଙ୍କ ମୃତ୍ୟୁ ପରେ ଦେଖାଦେଇଛି ଉତ୍ତେଜନା। ଉତ୍ତ୍ୟକ୍ତ ଲୋକେ ବାଣପୁର ବିଟ୍‌ ହାଉସରେ ଭଙ୍ଗାରୁଜା ସହ ନିଆଁ ଲଗାଇ ଦେଇଛନ୍ତି। ଆଠଗଡ଼ ପୁଲିସ ଓ ପ୍ରଶାସନ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବାକୁ ଚେଷ୍ଟା କରିଛନ୍ତି। ସେପଟେ ବଡ଼ବାରସିଂ ଛକରେ ମୃତ ଦେହକୁ ରଖି  ଗ୍ରାମବାସୀ ରାସ୍ତାରୋକ କରିଥିଲେ।  ଦୁଇ ଏସିଏଫ୍ ଓ ରେଞ୍ଜର ଅଭିଯୁକ୍ତ ଧନେଶ୍ୱରଙ୍କୁ ପିଟି ପିଟି ମାରି ଦେଇଥିବା ଅଭିଯୋଗ କରି ଗ୍ରାମବାସୀ ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ ଦାବି କରିଥିଲେ। ଲୋକଙ୍‌କ ଭିତରେ ଦେଖାଦେଇଥିବା କ୍ରୋଧକୁ ଦେଖି ପ୍ରଶାସନ ୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ପ୍ରତିଶ୍ରୁତି ଦେବା ସହ ଧନେଶ୍ୱରଙ୍କ ପରିବାରରୁ ଜଣଙ୍କୁ ଚାକିରି ଦେବାକୁ ପ୍ରତିଶ୍ରୁତି ଦିଆଯିବା ପରେ ରାସ୍ତାରୋକ ହଟିଛି। 

ଧନେଶ୍ୱରଙ୍କ ମୃତ୍ୟୁ ଘଟଣାରେ ପୁଲିସ୍ ଆଠଗଡ଼ ବନଖଣ୍ଡର ଦୁଇ ଏସିଏଫ୍- ଘନଶ୍ୟାମ ମୁଦୁଲି ଓ ହରେକୃଷ୍ଣ ମଲ୍ଲିକ, ରେଞ୍ଜର ସୁବ୍ରତ ବେହେରା ଏବଂ ଅନ୍ୟ ୭ ବନ କର୍ମଚାରୀଙ୍କୁ ଅଟକ ରଖି ପଚରାଉଚରା କରୁଛି। କଟକ ଗ୍ରାମାଞ୍ଚଳ ଅତିରିକ୍ତ ଏସ୍‌ପି ସେମାନଙ୍କୁ ଆଠଗଡ଼ ଥାନାରେ ପଚରାଉଚରା କରୁଛନ୍ତି।

ପ୍ରଧାନ ମୁଖ୍ୟ ବନ ସଂରକ୍ଷକ (ପିସିସିଏଫ୍‌) ଦେବୀଦତ୍ତ ବିଶ୍ୱାଳ କହିଛନ୍ତି, ବନ ବିଭାଗ କଷ୍ଟଡିରେ ଜଣେ ଅଭିଯୁକ୍ତଙ୍କ ମୃତ୍ୟୁ ଘଟଣା ଦୁଃଖଦାୟକ ଓ ଦୁର୍ଭାଗ୍ୟଜନକ। ଏହି ଘଟଣାର ତଦନ୍ତ ପାଇଁ କଞ୍ଜରଭେଟର ସ୍ତରୀୟ ଜଣେ ଅଫିସରଙ୍କୁ ଆଠଗଡ଼ ପଠାଯାଇଛି । ସଂପୂର୍ଣ୍ଣ ନିରପେକ୍ଷ ଭାବେ ଘଟଣାର ତଦନ୍ତ କରାଯିବ ଓ ଯିଏ ଦୋଷୀ ମିଳିବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ପିସିସିଏଫ କହିଛନ୍ତି।

ସୂଚନାଯୋଗ୍ୟ, ଗତ ୩୦ ତାରିଖରେ ମାଣିଆବନ୍ଧ ବିଟ୍‌ର ହିପିଣ୍ଡା ସଂରକ୍ଷିତ ଜଙ୍ଗଲରୁ ଏକ ଗୁଳିବିଦ୍ଧ ଦନ୍ତା ହାତୀର ମୃତଦେହ ମିଳିଥିଲା। ହାତୀର ଦାନ୍ତ କିନ୍ତୁ ମିଳି ନ ଥିଲା। ଘଟଣାରେ ସାତଗୋଛିଆର ୫୯ ବର୍ଷୀୟ ଧନେଶ୍ୱର ବେହେରାଙ୍କ ସଂପୃକ୍ତି ସନ୍ଦେହ କରି ବନ ବିଭାଗ କର୍ମଚାରୀମାନେ ତାଙ୍କୁ ଗତକାଲି ଘରୁ ଉଠାଇ ନେଇଥିଲେ। ବଡ଼ମ୍ବା ରେଞ୍ଜର ସୁବ୍ରତ ବେହେରାଙ୍କ ହେପାଜତରେ ଥିବା ବେଳେ ଆଜି ଭୋରରେ ଧନେଶ୍ୱରଙ୍କର ମୃତ୍ୟୁ ଘଟିଥିଲା।

Leave a Reply

Your email address will not be published.

Back to top button