ଆପୋଲୋ ହସ୍ପିଟାଲ କର୍ତୃପକ୍ଷଙ୍କ ମନମୁଖୀ କାର୍ଯ୍ୟକୁ ବିରୋଧ, ମୁଖ୍ୟମନ୍ତ୍ରୀଙ୍କୁ ଦାବିପତ୍ର ଦେଲା ବିଏମ୍ଏସ୍

ଭଦ୍ରକ : ଆପୋଲୋ ହସ୍ପିଟାଲ କର୍ତ୍ତୃପକ୍ଷଙ୍କ ଦ୍ୱାରା ସରକାରୀ ଅର୍ଥ ହଡ଼ପ, ଜନସାଧାରଣଙ୍କୁ ହଇରାଣ ଓ ଶ୍ରମିକ ମାରଣ ନୀତିକୁ ବିରୋଧ କରି ଭାରତୀୟ ମଜଦୁର ସଂଘ ପକ୍ଷରୁ ଆଜି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଭଦ୍ରକ ଜିଲ୍ଲାପାଳଙ୍କ ଜରିଆରେ ଏକ ଦାବିପତ୍ର ପ୍ରଦାନ କରାଯାଇଛି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ହେଉଥିବା ସରକାରୀ ଅର୍ଥ ହଡ଼ପର ସିବିଆଇ ତଦନ୍ତ କରାଯିବା, ଆପୋଲୋ ହସ୍ପିଟାଲରେ ଶ୍ରମିକ ଶୋଷଣ ବନ୍ଦ କରିବା, ବହିଷ୍କୃତ କର୍ମଚାରୀଙ୍କୁ ପୁନଃ ନିଯୁକ୍ତି ପ୍ରଦାନ କରିବା, ମହିଳା କର୍ମଚାରୀଙ୍କୁ ଯୌନ ନିର୍ଯାତନା ଦେଇଥିବା ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା, କମର୍ଚାରୀଙ୍କ ସ୍ୱରକୁ ଚାପି ଦେବା ପାଇଁ ଅତୀତରେ ଅନ୍ୟତ୍ର ବଦଳି କରାଯାଇଥିବା ଭାରତୀୟ ମଜଦୁର ସଂଘର ଖୋର୍ଦ୍ଧା ଜିଲ୍ଳା ସଭାପତି ତଥା ଆପୋଲୋ ହସ୍ପିଟାଲ୍ସ୍ ମଜଦୁର ସଂଘର ସାଧାରଣ ସମ୍ପାଦକ ପାର୍ଥ ସାରଥୀ ମହାନ୍ତିଙ୍କୁ ପୁନଃ ଭୁବନେଶ୍ୱର ୟୁନିଟରେ ନିୟୋଜିତ କରାଯିବା ଭଳି ଦାବି ନେଇ ଦାବିପତ୍ର ଦିଆ ଯାଇଛି । ଏଥି ସହିତ ଉକ୍ତ ସମସ୍ୟାର ଆଶୁ ସମାଧାନ କରା ନଗଲେ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବାକୁ ସଂଘ ବାଧ୍ୟ ହେବ ବୋଲି ମଧ୍ୟ ଭାରତୀୟ ମଜଦୁର ସଂଘର ରାଜ୍ୟ ଉପସାଧାରଣ ସମ୍ପାଦକ ଶାନ୍ତନୁ ମହାପାତ୍ର ଚେତବନୀ ଦେଇଛନ୍ତି । ଶ୍ରୀ ମହାପାତ୍ରଙ୍କ ସହିତ ଭାରତୀୟ ମଜଦୁର ସଂଘର ଭଦ୍ରକ ଜିଲ୍ଳା ସଭାପତି ମନୋଜ ବସନ୍ତରାୟ, ସମ୍ପାଦକ ପରେଶ ନାଥ ଧଳ, ଓଡ଼ିଶା ରାଜ୍ୟ ଆଶାକର୍ମୀ ସଂଘର ରାଜ୍ୟ ସହପ୍ରଭାରୀ ମୁକ୍ତିକାନ୍ତ ସାହୁ, କମଳାକାନ୍ତ ସାହୁ, ବିଶ୍ୱନାଥ ଜେନା ଦାବିପତ୍ର ନେଇ ଅତିରିକ୍ତ ଜିଲ୍ଳାପାଳ ଶାନ୍ତନୁ ମହାନ୍ତିଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରିଥିଲେ ।