ଭୁବନେଶ୍ୱର: ସିନେମା ପ୍ରଯୋଜକ ଅକ୍ଷୟ ପରିଜାଙ୍କୁ ୩ କୋଟି ଟଙ୍କା ମାଗିଥିଲେ ଅର୍ଚ୍ଚନା। ଟଙ୍କା ନ ଦେଲେ ତାଙ୍କୁ ଜୀବନରୁ ମାରି ଦେବାକୁ ଧମକ ଦେଇଥିଲେ ବ୍ଲାକମେଲ କୁଇନ। ପରିଜାଙ୍କୁ ଧମକ ଦେଇ କହିଥିଲେ, ଜଣେ ଯୁବତୀଙ୍କ ସହ ତୁମର ଆପତ୍ତିଜନକ ଭିଡିଓ ମୋ ହାତରେ ଅଛି। ମୋତେ ୩ କୋଟି ନ ଦେଲେ ତୁମକୁ ବରବାଦ କରିଦେବି। କାଟି ପିସ ପିସ କରି କାଟିଦେବି। ଏହାକୁ ନେଇ ଏବେ ଅର୍ଚ୍ଚନା ବନ୍ଧା ହୋଇଛନ୍ତି।
ଅର୍ଚ୍ଚନାଙ୍କ ବିରୋଧରେ ଭୁବନେଶ୍ବରରେ ଦୁଇଟି ମାମଲା ହୋଇଥିଲା। ଗୋଟିଏ ଅକ୍ଟୋବର ୨ରେ ଜଣେ ଯୁବତୀ ଖଣ୍ଡଗିରି ଥାନାରେ ଅଭିଯୋଗ କରିଥିବା ବେଳେ ଅନ୍ୟ ଅଭିଯୋଗ କରିଥିଲେ ଅକ୍ଷୟ ପରିଜା ସେପ୍ଟେମ୍ବର ୩୦ ତାରିଖରେ। ପରିଜା ଅଭିଯୋଗ କରିଥିଲେ କି, ଅର୍ଚ୍ଚନା ନାଗ ଜଣେ ଯୁବତୀଙ୍କ ଜରିଆରେ ତାଙ୍କୁ ବ୍ଲାକ ମେଲ କରୁଛି। ଏକ ହୋଟେଲକୁ ଡକାଇ ନିଜକୁ ଜଣେ ଓକିଲ କହିବା ସହ ତାଙ୍କଠାରୁ ୩ କୋଟି ମାଗିଛନ୍ତି। ଟଙ୍କା ନ ଦେଲେ ତାଙ୍କୁ ହାଣି ଖଣ୍ଡ ଖଣ୍ଡ କରିବାକୁ ପରିଜା ତାଙ୍କ ଅଭିଯୋଗରେ ଦର୍ଶାଇଥିଲେ।
ସେହିପରି ମହିଳା ଜଣଙ୍କ ଅଭିଯୋଗ କରିଥିଲେ କି, ଅର୍ଚ୍ଚନା ତାଙ୍କ ସହ ବନ୍ଧୁତ୍ବ କରିଥିଲେ। ପରେ କୌଣସି ଉପାୟରେ ତାଙ୍କ କିଛି ଆପତ୍ତିଜନକ ଫଟୋ ଉଠାଇ ତାଙ୍କୁ ବ୍ଲାକମେଲ କରୁଥିଲେ। ସେସବୁ ଦେଖାଇ ସେ ଅନ୍ୟ ବ୍ୟକ୍ତିମାନଙ୍କ ସହ ତାଙ୍କୁ ସମ୍ପର୍କ ବଢାଇବାକୁ ବାଧ୍ୟ କରୁଛନ୍ତି। ଅନେକ ବଡ ବଡ ଲୋକ, ଫିଲ୍ମ ଜଗତର ହସ୍ତିଙ୍କୁ ଫସାଇ ଅନ୍ତରଙ୍ଗ ସମୟର ଫଟୋ ଓ ଭିଡିଓ ତାଙ୍କୁ ଦେବାକୁ କହୁଥିଲେ। ସେସବୁ ପାଇବା ପରେ ସେ ସେମାନଙ୍କୁ ବ୍ଲାକମେଲ କରୁଥିବା ଅଭିଯୋଗ ହୋଇଥିଲା।
ଅଭିଯୋଗ ଆଧାରରେ ପୁଲିସ ଅର୍ଚ୍ଚନାଙ୍କୁ ଗିରଫ କରିଛି। ଆବଶ୍ୟକ ହେଲେ ଅର୍ଚ୍ଚନାଙ୍କୁ ରିମାଣ୍ଡରେ ନେବେ ବୋଲି କହିଛନ୍ତି ଡିସିପି। ଏଥିସହ ଅର୍ଚ୍ଚନାଙ୍କ ଘରୁ ପୁଲିସ ତାଙ୍କ ମୋବାଇଲ, ଟାବଲେଟ, ପେନ୍ଡ୍ରାଇଭ, ଲ୍ୟାପଟପ ଆଦିକୁ ଜବତ କରି ଯାଞ୍ଚ କରୁଛି। ଅର୍ଚ୍ଚନାଙ୍କ ଆର୍ଥିକ ସ୍ଥିତିକୁ ନେଇ ଖୋଳତାଡ ଆରମ୍ଭ ହୋଇଛି।