() ବିଆରଏସରେ ସାମିଲ ହୋଇ ଓଡ଼ିଶା ପରିପ୍ରେକ୍ଷୀରେ ରୋଡମ୍ୟାପ୍ ପ୍ରସ୍ତୁତ କରି ଓଡ଼ିଶା ଫେରିଛନ୍ତି ନେତାଏ। ଓଡ଼ିଶାର ସମସ୍ତ ବିଧାନସଭା ଓ ଲୋକସଭା ଆସନରେ ଦଳ ପ୍ରାର୍ଥୀ ଦେବ। ତେଲେଙ୍ଗାନାର ବିକାଶ ମଡେଲକୁ ଆପଣାଇ ଦଳ ଏଠାରେ ବିଜେଡିକୁ ମୁଖ୍ୟ ପ୍ରତିଦ୍ୱନ୍ଦୀ ଭାବି ଲଢ଼ିବାକୁ ଯାଉଛି। ସମାନ ସମୟରେ ହାଇଦ୍ରାବାଦରୁ ଫେରିଥିବା ବିଜେଡି ନେତା ଦେବାଶିଷ ନାୟକ କହିଛନ୍ତି, ସେ ବିଆରଏସ କଥା ଜାଣନ୍ତନି। କିନ୍ତୁ ୨୪ରେ ବରୀରୁ ନିଶ୍ଚିତ ଲଢ଼ିବି ବୋଲି ଦମ୍ଭୋକ୍ତି ଦେଖାଇଛନ୍ତି। ୨୪ ନିର୍ବାଚନ ସହଜ ହେବନି ବୋଲି ତୀର୍ଯ୍ୟକ ତୀର ମାରିଛନ୍ତି।
ତେଲେଙ୍ଗାନା ମଡେଲ୍ ଓଡ଼ିଶାରେ। ଏଥିଲାଗି ଅଣ୍ଟା ଭିଡ଼ିଛନ୍ତି ଓଡ଼ିଶାରୁ ବିଆରଏସରେ ସାମିଲ ହୋଇଥିବା ନେତାଏ। ତେଲେଙ୍ଗାନା ଭବନରେ ଗଲା ୨୭ରେ ଦଳରେ ବିଧିବଦ୍ଧ ଭାବେ ମିଶିବା ପରେ ଆଗାମୀ ରୋଡମ୍ୟାପ୍ ନେଇ ହାଇଦ୍ରାବାଦରେ ମାନସମନ୍ଥନ କରିଛନ୍ତି। ଦଳୀୟ ସଂଗଠନର ସଂରଚନା କରିଛନ୍ତି। କେସିଆର ବି ଗୁରୁମନ୍ତ୍ର ଦେଇ ଆହ୍ୱାନ ଦେଇଛନ୍ତି, ଅବ୍ କି ବାର୍ କିଷାନ ସରକାର। ଆଉ କେସିଆରଙ୍କ ଗୁରୁମନ୍ତ୍ର ପାଇ ଓଡ଼ିଶାକୁ ଫେରିଛନ୍ତି ବିଆରଏସ ନେତାଏ। ବିଜେଡି ସହ ଲଢ଼େଇ କରିବ ଓ ରାଜ୍ୟର ସମସ୍ତ ୧୪୭ ବିଧାନସଭା ଓ ୨୧ ଲୋକସଭା ଆସନରେ ପ୍ରାର୍ଥୀ ଦେବ ବୋଲି କହିଛନ୍ତି ନେତାଏ।
ତେବେ ବିଆରଏସର ମଙ୍ଗ ଯଦିଓ ଗିରିଧର ଗମାଙ୍ଗ ଧରିଥିବା କୁହାଯାଉଛି। କିନ୍ତୁ ଓଡ଼ିଶା ପରିପ୍ରେକ୍ଷୀରେ ଆବାହକ କମିଟି ଗଠନ ହୋଇଛି। ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ସରିଛି। ଓଡ଼ିଶାରେ ଦଳ ନିଶ୍ଚିତ ସଫଳ ପାଇବ ବୋଲି ଆଶାବାଦୀ ବିଆରଏସ ନେତାଏ।
ସେପଟେ ବିଜେଡିର ପୂର୍ବତନ ବିଧାୟକ ଦେବାଶିଷ ନାୟକ ବିଆରଏସରେ ସାମିଲ୍ ହେଉଥିବା ଖବରକୁ ଖଣ୍ଡନ କରିଛନ୍ତି। ହାଇଦ୍ରାବାଦରୁ ଫେରି କିନ୍ତୁ ତୀର୍ଯ୍ୟକ ତୀର ମାରିଛନ୍ତି ଦେବାଶିଷ। ବିଆରଏସ କଥା ସିନା ଜାଣିନାହାନ୍ତି ବୋଲି କହିଲେ। କିନ୍ତୁ ତା ସହ ଯୋଡ଼ିଛନ୍ତି, ୨୪ ନିର୍ବାଚନ ଏଥର ସହଜ ହେବନି। ଆପ୍ ଓ ବିଆରଏସର ଏଣ୍ଟ୍ରିକୁ ହାଲୁକା ଭାବେ ନେଇହେବନି। ୨୪ରେ ବରୀରୁ ଲଢିବି ବୋଲି ଦମ୍ଭୋକ୍ତି ଦେଖାଇବା ସହ ବିଜେଡିରେ ସୁଯୋଗ ଓ ସଂସ୍କାର କଥା ଉଠାଇଛନ୍ତି ଦେବାଶିଷ। ରାଜ୍ୟସଭା ପଠାଇବା ପ୍ରତିଶୃତିକୁ ମନେ ପକାଇଦେଇଥିଲେ ମୁଖ୍ୟମନ୍ତ୍ରୀଙ୍କୁ। ଅନ୍ୟ ଦଳରେ ସୁଯୋଗ ଥିବା କଥା ବି ସ୍ମରଣ କରାଇବାକୁ ଭୁଲିନାହାନ୍ତି।
ବିଆରଏସ ଏଣ୍ଟ୍ରିକୁ ବିଜେଡି ହାଲୁକା ଭାବେ ନେଉଛି। କିନ୍ତୁ ଦେବାଶୀଷ ଭିନ୍ନ ମନ୍ତବ୍ୟ ଦେଲେଣି। ସୁଯୋଗ ନ ଦେଲେ ବିଜେଡିକୁ ବିପଦ ବୋଲି ପରୋକ୍ଷରେ ଚେତାଇଦେଲେଣି।
ସିମ୍ପୁଲ ନାୟକଙ୍କ ରିପୋର୍ଟ