GOP

  • ଛାଡିଛି ବନ୍ୟା, ସରିନି ଦୁର୍ଦ୍ଦଶା

    ଗୋପ: ବନ୍ୟା ଛାଡିଯାଇଛି ହେଲେ ଛାଡିନି ଲୋକଙ୍କ ଦୁର୍ଦ୍ଦଶା। ଏବେ ବି ବନ୍ୟା ବିପନ୍ନମାନଙ୍କୁ ମିଳିନାହିଁ ରିଲିଫ ସହାୟତା। ପୁରୀ ଜିଲ୍ଳା ଗୋପ ବ୍ଲକର ନଅଟି ପଞ୍ଚାୟତ ସମ୍ପୂର୍ଣ୍ଣ ଜଳମଗ୍ନ ହୋଇଥିବା ବେଳେ, ହଜାର ହଜାର ହେକ୍ଟର ଚାଷ ଜମି ଉଜୁଡି ଯାଇ ଚାଷୀଙ୍କ ମେରୁଦଣ୍ଡ ଭାଙ୍ଗିଦେଇଛି l ଫଳରେ ମୁଣ୍ଡରେ ହାତ ଦେଇ  ସରକାରୀ ସହାୟତାକୁ ଅନାଇ ବସିଛନ୍ତି ଚାଷୀକୂଳ ।  

    ଦୀର୍ଘ ୧୫ ଦିନ କାଳ ବନ୍ୟାରେ ଶହ ଶହ ହେକ୍ଟର ଚାଷ ଜମି ବନ୍ୟାଜଳରେ ବୁଡି ରହିବା ପରେ ଚାଷ ଜମିରେ ସବୁ ତଳି ପଚି ସଂପୂର୍ଣ୍ଣ ନଷ୍ଟ ହୋଇଯାଇଛି। କିନ୍ତୁ ଏବେ ବନ୍ୟା ଜଳ ଛାଡ଼ି ଯିବା ପରେ ଚାଷୀ ନିଜ ଅଣ୍ଟା ସଳଖିବାକୁ ଚେଷ୍ଟା କରି ଅଧିକ ଦାମ୍ ରେ ତଳି କିଣି ଚାଷୀ ପୁଣି ତଳି ରୋଉଥିବା ଦେଖିବାକୁ ମିଳିଛି। ଏ ଦୃଶ୍ୟ ହେଉଛି ଗୋପ ବ୍ଲକର ୧୧ଟି ପଞ୍ଚାୟତର ୫୨ ଖଣ୍ଡ ଗାଁ। ଯେଉଁଠି ଅଗଷ୍ଟ ମାସର କୁଶଭଦ୍ରା ଓ ଧନୁଆ ନଦୀର ବନ୍ୟାଜଳରେ ହଜାର ହଜାର ହେକ୍ଟର ଚାଷଜମିରେ ପାଣି ଜମି ରହିଥିଲା। ଫଳରେ ଚାଷୀ ରୋଇ ଥିବା ତଳି ଷଢି ପଚି ଯାଇଥିଲା। ବନ୍ୟା ଜଳ ଛାଡ଼ିବା ପରେ ଚାଷୀ ଏବେ ମୁଣ୍ଡରେ ହାତ ଦେଇ ଚିନ୍ତାରେ ବସିଛନ୍ତି।

    ଗୋପ ବ୍ଲକର ବିଭିନ୍ନ ପଞ୍ଚାୟତରେ ଧାନ ଚାଷ କ୍ଷତିଗ୍ରସ୍ତ ହୋଇଥିବା ବେଳେ ସରକାରଙ୍କ ନିର୍ଦ୍ଦେଶରେ ଜଳସେଚିତ ଧାନ ଚାଷ ଏକର ପ୍ରତି ୧୩,୫୦୦ ଟଙ୍କା ଅଣଜଳସେଚିତ ଚାଷ ଜମି ଏକର ପିଛା ୬,୫୦୦ ଟଙ୍କା ଚାଷୀଙ୍କୁ କ୍ଷତିପୂରଣ ଯୋଗାଇ ଦିଆଯିବ ବୋଲି ସୂଚନା ମିଳିଛି। ସେପଟେ ଗୋପ ବ୍ଲକର ୧୧ ଗୋଟି ପଞ୍ଚାୟତର ଚାଷ ନଷ୍ଟ ହୋଇଥିବା ଆନୁମାନିକ ୨୦ କୋଟି ଟଙ୍କାରୁ ଉର୍ଦ୍ଧ୍ବ ହେବ। ଏନେଇ ଗୋପ ତହସିଲ, କୃଷି ବିଭାଗ, ଗୋପ ବ୍ଲକ ଓ ଉଦ୍ୟାନ ବିଭାଗ ପକ୍ଷରୁ ଏକ ଟିମ୍ କରାଯାଇ ତଦନ୍ତ ଚାଲିଛି। ତଦନ୍ତ ଶେଷ ହେବା ପରେ ସରକାରୀ ସହାୟତା ଯୋଗାଇ ଦିଆଯିବ ବୋଲି କୃଷି ଅଧିକାରୀ କହିଛନ୍ତି।

    ତେବେ ଗୋପ ବ୍ଲକର ବନ୍ୟା ପୀଡିତାଙ୍କୁ କେବେ ମିଳୁଛି ସରକାରୀ ସହାୟତା ତାକୁ ହିଁ ଅପେକ୍ଷା।  

    ଭାରତୀ ଭୂଷଣଙ୍କ ରିପୋର୍ଟ

  • ସ୍କୁଲରେ ଟଙ୍କା ଆଦାୟ, ମନ୍ତ୍ରୀ କହିଲେ ହେବ କାର୍ଯ୍ୟାନୁଷ୍ଠାନ

    ଗୋପ: ସରକାରୀ ନିୟମକୁ ଉଲ୍ଲଙ୍ଘନ କରି ଛାତ୍ରଛାତ୍ରୀଙ୍କ ଠାରୁ ଟଙ୍କା ଆଦାୟ । ଏଭଳି ଗୁରୁତର ଅଭିଯୋଗ ଆସିଛି  ଗୋପ ବ୍ଲକ ଅନ୍ତର୍ଗତ ଅଣ୍ତରା-ଇଛାପୁର ପଞ୍ଚାୟତରୁ। ଅଭିଯୋଗ ପରେ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ମନ୍ତ୍ରୀ ସମୀର ଦାଶ।

    ଗୋପ ବ୍ଲକ ଅନ୍ତର୍ଗତ ଅଣ୍ଡରା-ଇଛାପୁର ପଞ୍ଚାୟତରେ  ଥିବା ନୀଳକଣ୍ଠେଶ୍ଵର ନୋଡାଲ ସ୍କୁଲରେ ପ୍ରଧାନ ଶିକ୍ଷକ ଛାତ୍ରଛାତ୍ରୀଙ୍କଠାରୁ ଅର୍ଥ ଆଦାୟ କରିବା ପରି ଅଭିଯୋଗ ଆସିଛି।  ଗତକାଲି ସ୍କୁଲର ପ୍ରଧାନଶିକ୍ଷକ ବାସୁଦେବ ସାହୁ ମାଟ୍ରିକ ପାସ କରିଥିବା ଛାତ୍ରଛାତ୍ରୀ ମାନଙ୍କ ଠାରୁ ୧୦୦ ଟଙ୍କା ଏବଂ ନବମ ଶ୍ରେଣୀ ପିଲାଙ୍କ ଠାରୁ ୧୬୦ ଟଙ୍କା ବଦଳରେ ୧୨୦ ଅଧିକ ଟଙ୍କା ନେଇଥିଲେ। ଏହାକୁ ନେଇ  ବିଭିନ୍ନ ଗଣମାଧ୍ୟମରେ ଖବର ପ୍ରସାରିତ ହୋଇଥିଲା। ସରକାରୀ ନିୟମକୁ ଉଲ୍ଲଙ୍ଘନ କରି ପ୍ରଧାନ ଶିକ୍ଷକ ପିଲାଙ୍କ ଠାରୁ ଟଙ୍କା ଆଦାୟ କରିଥିବାରୁ ପୁରୀ ଜିଲ୍ଲା ଶିକ୍ଷା ଅଧିକାରୀଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି । ୪ ଶ୍ରେଣୀ କର୍ମଚାରୀ ମଧ୍ୟ ନିଜ ଭୁଲ ମାନି ନେଇଛନ୍ତି।  

    ତେବେ ବନ୍ୟା ସତ୍ତ୍ବେ ଛାତ୍ରଛାତ୍ରୀମାନଙ୍କୁ କିପରି ସ୍କୁଲ କର୍ତ୍ତୃପକ୍ଷ ସ୍କୁଲକୁ ଡାକିଲେ ଏବଂ ପିଲାମାନେ ବିପଦ ସଙ୍କୁଳ ଅବସ୍ଥାରେ ସାର୍ଟିଫିକେଟ ନେଲେ ଏସଂପର୍କରେ ମଧ୍ୟ କାର୍ଯାନୁଷ୍ଠାନ ନିଆଯିବ  ବୋଲି ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ସୂଚନା ଦେଇଛନ୍ତି। ଏପରି ଏକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ପ୍ରଧାନଶିକ୍ଷକ ବାସୁଦେବ ସାହୁ ଓ ୪ ଶ୍ରେଣୀ କର୍ମଚାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି ।

Back to top button