lack of awareness

  • рмЬрм░рм╛рнЯрнБ рмХрм░рнНрмХрмЯ: рмЯрм┐рмХрм╛ рмЕрмЫрм┐ рмЯрм┐рмХрм╛рмХрм░рмг рмХрнЗрммрнЗ?

    рм╕рнНрн▒рмдрмирнНрмдрнНрм░ рм░рм┐рмкрнЛрм░рнНрмЯ:рм╕рнБрмкрнНрм░рм┐рнЯрм╛ рмжрм╛рм╢

    () рмжрм┐рми рмХрнЗрмЗрмЯрм╛ рмкрнВрм░рнНрммрм░рнБ рмПрмХ рммрмб рмЦрммрм░ рмЖрм╕рм┐рм▓рм╛ ред рмпрм╛рм╣рм╛ рмЕрмдрм┐ рмХрморнН рм╕рморнЯ рмормзрнНрнЯрм░рнЗ рморнБрмЦрнНрнЯ рмЦрммрм░ рмкрм╛рм▓рмЯрм┐рмЧрм▓рм╛ ред рмдрм╛рм╣рм╛ рмерм┐рм▓рм╛ рмбрм┐рм╕рм┐рмЬрм┐рмЖрмЗ рм╕рнЗрм░рморнН рмЗрмВрм╖рнНрмЯрм┐рмЪрнНрнЯрнБрмЯ рмжрнНрммрм╛рм░рм╛ рмкрнНрм░рм╕рнНрмдрнБрмд рм╕рнНрн▒рмжрнЗрм╢рнА HPV рмнрнНрнЯрм╛рмХрнНрм╕рм┐рми рм╕рм░рнНрмнрм╛рмнрм╛рмХрнН рмХрнБ рмЕрмирнБрмормдрм┐ рмжрнЗрмЗрмЫрм┐ ред рмдрнЗрммрнЗ рм╣рнНрнЯрнБрморм╛рмирнН рмкрм╛рмкрм┐рм▓рнЛрморм╛ рмнрм╛рмЗрм░рм╕рнН(HPV) рм╕рмВрмХрнНрм░рмормг рм╣рнЗрмЙрмЫрм┐ рмЕрмдрм┐ рм╕рм╛рмзрм╛рм░рмг рмнрм╛рммрнЗ рмжрнЗрмЦрм╛ рмпрм╛рмЙрмерм┐рммрм╛ рмПрмХ рм░рнЛрмЧ ред рмпрм╛рм╣рм╛ рмпрнМрми рм╕рморнНрмкрм░рнНрмХ рмжрнНрммрм╛рм░рм╛ рм╣рнЛрмЗрмерм╛рмП ред рмПрммрмВ рм╕рмХрнНрм░рнАрнЯ рмпрнМрми рм╕рморнНрмкрм░рнНрмХрм░рнЗ рмерм┐рммрм╛ рморм╣рм┐рм│рм╛ рмХрнЗрммрнЗ рмирм╛ рмХрнЗрммрнЗ рмПрмнрм│рм┐ рмнрм╛рмЗрм░рм╕рнН рмжрнНрн▒рм╛рм░рм╛ рм╕рмВрмХрнНрм░рморм┐рмд рм╣рнЗрммрм╛рм░ рмЖрм╢рмЩрнНрмХрм╛ рмерм╛рмП ред рмЕрммрм╢рнНрнЯ рнпрнж%рмЩрнНрмХ рмХрнНрм╖рнЗрмдрнНрм░рм░рнЗ рмдрм╛рм╣рм╛ рмЬрмЯрм┐рм│ рм╕рнНрн▒рм╛рм╕рнНрмернНрнЯ рм╕рморм╕рнНрнЯрм╛ рм╕рнГрм╖рнНрмЯрм┐ рмХрм░рнЗ рмирм╛рм╣рм┐рмБ рмПрммрмВ рмЕрмирнЗрмХ рмХрнНрм╖рнЗрмдрнНрм░рм░рнЗ рм╕рнНрн▒рмдрмГрмкрнНрм░рммрнГрмд рмнрм╛рммрнЗ рм╕рнЗрмерм┐рм░рнБ рмирм┐рм╕рнНрмдрм╛рм░ рморм┐рм│рм┐рмпрм╛рмП ред рмХрм┐рмирнНрмдрнБ рм▓рморнНрн▒рм╛ рм╕рморнЯ рмзрм░рм┐ рмнрм╛рмЗрм░рм╕рм░ рмкрнНрм░рмнрм╛рмм рм░рм╣рм┐рм▓рнЗ рмдрм╛рм╣рм╛ рмХрнНрм░рнЛрмирм┐рмХ рммрнНрнЯрм╛рмзрм┐рм░рнЗ рмкрм░рм┐рмгрмд рм╣рнБрмП рмПрммрмВ рмкрм░рнЗ рмХрнНрнЯрм╛рмирнНрм╕рм░ рмкрнВрм░рнНрмм рм╖рнНрмЯрнЗрмЬрмХрнБ рмпрм╛рмП рмПрммрмВ рмЕрм│рнНрмк рмжрм┐рми рмормзрнНрнЯрм░рнЗ рм╕рмарм┐рмХрнН рмЙрмкрмЪрм╛рм░ рмирм╣рнЗрм▓рнЗ рм╕рм░рнНрмнрм╛рмЗрмХрм╛рм▓рнН рмХрнНрнЯрм╛рмирм╕рм░ рмнрм│рм┐ рморм╛рм░рм╛рмдрнНрмормХ рмкрм░рм┐рмгрмдрм┐ рмормзрнНрнЯ рмжрнЗрмЦрм┐рммрм╛рмХрнБ рморм┐рм│рнЗ ред

    () рмдрнЗрммрнЗ HPV рмнрнНрнЯрм╛рмХрнНрм╕рм┐рми рм╕рнЗрм╣рм┐ рм╕рмВрмХрнНрм░рмормгрмХрнБ рм░рнЛрмХрм┐рммрм╛рм░рнЗ рммрмбрм╝ рмнрнВрморм┐рмХрм╛ рмдрнБрм▓рм╛рмЗрмерм╛рмПред рмХрм┐рмирнНрмдрнБ рмжрнБрм░рнНрмнрм╛рмЧрнНрнЯрм░ рмХрмерм╛ рмЖрмо рмжрнЗрм╢рм░рнЗ рмирм╛ HPV рм╕рморнНрмкрм░рнНрмХрм░рнЗ рмирм╛ AHPV рмнрнНрнЯрм╛рмХрнНрм╕рм┐рми рм╕рморнНрмкрм░рнНрмХрм░рнЗ рм╕рмЪрнЗрмдрмирмдрм╛ рмХрм╛рм░рнНрмпрнНрнЯрмХрнНрм░рмо рмПрмпрм╛рмПрмБ рмЖрмЦрм┐рмжрнГрм╢рм┐рмЖ рм╣рнЛрмЗрмЫрм┐ ред рм╕рм░рнНрмнрм╛рмЗрмХрм╛рм▓рнН рмХрнНрнЯрм╛рмирм╕рм░рм░рнЗ рм╣рнНрнЯрнБрморм╛рми рмкрм╛рмкрм┐рм▓рнЛрморм╛ рмнрм╛рмЗрм░рм╕ рм╣рм┐рмБ рмкрнНрм░рморнБрмЦ рмХрм╛рм░рмг рм╣рнЛрмЗрмерм┐рммрм╛ рм╕рмдрнНрмдрнНрммрнЗ рм╕рнЗ рмХрнНрм╖рнЗрмдрнНрм░ рмЧрнБрм░рнБрмдрнНрн▒ рмкрм╛рмЗрмирм┐ ред рмПрмкрм░рм┐рмХрм┐ рмЕрмирнЗрмХ рм╕рнНрмдрнНрм░рнАрм░рнЛрмЧ рммрм┐рм╢рнЗрм╖рмЬрнНрмЮ рмормзрнНрнЯ рмП рм╕рморнНрмкрм░рнНрмХрм░рнЗ рмЬрм╛рмгрм┐рммрм╛ рм╕рмдрнНрмдрнНрн▒рнЗ рмирм┐рмЬрнЗ рмЯрм┐рмХрм╛ рмирнЗрмЗ рмирмерм┐рммрм╛ рммрм┐рмнрм┐рмирнНрми рм╕рм░рнНрмнрнЗрм░рнБ рмЬрмгрм╛рмкрмбрм╝рнЗ ред рмЯрм┐рмХрм╛ рмирнЗрммрм╛рм░ рммрнЯрм╕ рмкрм╛рм░ рмХрм░рм┐рммрм╛ рм╣рм┐рмБ рмдрм╛рм░ рморнВрм│ рмХрм╛рм░рмг редрнирнм рммрм░рнНрм╖ рмормзрнНрнЯрм░рнЗ рмПрм╣рм┐ рмЯрм┐рмХрм╛ рмирм┐рмЖрмпрм╛рмЗ рмкрм╛рм░рм┐рмм ред рмХрм┐рмирнНрмдрнБ рнпрм░рнБ рнзрнк рммрм░рнНрм╖ рмормзрнНрнЯрм░рнЗ рмПрм╣рм┐ рмЯрм┐рмХрм╛ рмирнЗрммрм╛ рммрм┐рм╢рнЗрм╖ рмлрм│рмкрнНрм░рмж ред рмдрм╛ рмкрм░рнЗ рмкрнНрм░рмдрм┐рмХрм╛рм░ рм╣рм╛рм░ рмХрморм┐ рмХрморм┐ рмпрм╛рмП ред рм╕рм╣рмЬрм░рнЗ рммрнБрмЭрм┐рммрм╛рмХрнБ рм╣рнЗрм▓рнЗ рм╕рмХрнНрм░рнАрнЯ рмпрнМрми рм╕рморнНрмкрм░рнНрмХ рмкрнНрм░рмдрм┐рм╖рнНрмарм╛ рмкрнВрм░рнНрммрм░рнБ рмЕрм░рнНрмерм╛рмд рмЫрнЛрмЯ рмЭрм┐рмЕрмЩрнНрмХ рмХрнНрм╖рнЗрмдрнНрм░рм░рнЗ рмПрм╣рм╛ рмЕрмдрм┐ рмЧрнБрм░рнБрмдрнНрммрмкрнБрм░рнНрмгрнНрмг ред

    () рмжрнЗрм╢рм░рнЗ рнирнЯ рм╕рм░рнНрммрм╛рмзрм┐рмХ рм╣рнЗрмЙрмерм┐рммрм╛ рмХрнНрнЯрм╛рмирм╕рм░ рм╣рнЗрмЙрмЫрм┐ рм╕рм░рнНрмнрм╛рмЗрмХрм╛рм▓рнН рмХрнНрнЯрм╛рмирм╕рм░ред рммрм┐рм╢рнНрн▒рм░ рмПрмХ рмдрнГрмдрнАрнЯрм╛рмВрм╢ рмПрм╣рм┐ рмХрнНрнЯрм╛рмирм╕рм░ рмнрм╛рм░рмдрм░рнЗ рмжрнЗрмЦрм╛рмпрм╛рмП ред рмдрм╛ рм╕рмдрнНрмдрнНрн▒рнЗ рмормзрнНрнЯ рм╕рм░рнНрмнрм╛рмЗрмХрм╛рм▓ рмХрнНрнЯрм╛рмирм╕рм░ рм╕рнНрмХрнНрм░рм┐рмирм┐рмВ рмкрм╛рмЗрмБ рмЙрмкрм▓рммрнНрмз рмкрм╛рмкрм╕рнНрморм┐рмЕрм░рнН рм░ рммрнНрнЯрммрм╣рм╛рм░ рни% рмарм╛рм░рнБ рмХрморнН рмХрм░рм╛рмпрм╛рмЗрмЫрм┐ред рмпрнЗрм╣рнЗрмдрнБ рмПрм╣рм┐ рмХрнНрнЯрм╛рмирм╕рм░рм░рнЗ рмкрнНрм░рмерморм░рнБ рмХрнМрмгрм╕рм┐ рм▓рмХрнНрм╖рмг рмжрнЗрмЦрм╛ рмпрм╛рмП рмирм╛рм╣рм┐рмБ рмдрнЗрмгрнБ рммрм╣рнБ рммрм┐рм│рморнНрммрм░рнЗ рм░рнЛрмЧ рмЪрм┐рм╣рнНрмирмЯ рм╣рм┐рмБ рм░рнЛрмЧрнАрм░ рмЬрмЯрм┐рм│рмдрм╛ рммрмврм╛рмП ред рм╕рнЗ рмХрнНрм╖рнЗрмдрнНрм░рм░рнЗ рмнрнНрнЯрм╛рмХрм╕рм┐рмирнН рммрнЗрм╢ рмкрнНрм░рмнрм╛рммрнА рмнрнВрморм┐рмХрм╛ рмирнЗрмЗрмкрм╛рм░рм┐рмм рммрнЛрм▓рм┐ рмЖрм╢рм╛ рмХрм░рм╛рмпрм╛рмП ред рмЖрм░рнНрмерм┐рмХ рмжрнГрм╖рнНрмЯрм┐рм░рнБ рмормзрнНрнЯ рмХрнНрнЯрм╛рмирм╕рм░ рмнрм│рм┐ рмЧрнБрм░рнБрмдрнНрмдрм░ рм╕рнНрн▒рм╛рм╕рнНрмернНрнЯ рм╕рморм╕рнНрнЯрм╛рм░ рмЦрм░рнНрмЪрнНрмЪ рмдрнБрм│рмирм╛рм░рнЗ рмЕрмдрм┐ рмЕрм│рнНрмк рмЕрм░рнНрмерм░рнЗ рмЯрм┐рмХрм╛ рмирнЗрмЗ рмирм┐рмЬрмХрнБ рм╕рнБрм░рмХрнНрм╖рм┐рмд рм░рмЦрм┐рммрм╛ ред рмкрнНрм░рм╛рнЯ рннрнж% рмХрнНрнЯрм╛рмирм╕рм░ рмкрнНрм░рмдрм┐рм░рнЛрмз рмХрнНрм╖рмормдрм╛ рмУ рнорнл% HPV рм╕рмВрмХрнНрм░рмормг рмирм┐рнЯрмирнНрмдрнНрм░рмгрм░рнЗ рмПрм╣рм╛ рм╕рморм░рнНрме рм╣рнЛрмЗрмерм┐рммрм╛ рммрнЗрм│рнЗ рмПрм╣рм┐ рмЯрм┐рмХрм╛рмХрм░рмг рм╢рм╣рнЗ рмкрнНрм░рмдрм┐рм╢рмд рмЬрмирмирм╛рмЩрнНрмЧрм░ рм╕рморм╕рнНрнЯрм╛ рмжрнВрм░ рмХрм░рм┐рммрм╛рм░рнЗ рмормзрнНрнЯ рмкрнНрм░рмнрм╛рммрнА рм╣рнЛрмЗрмерм┐рммрм╛рм░рнБ рммрм┐рм╢рнЗрм╖рмЬрнНрмЮ рмПрмнрм│рм┐ рмЯрм┐рмХрм╛рмХрм░рмг рм╕рмкрмХрнНрм╖рм░рнЗ рмормд рмжрнЗрмЗ рмЖрм╕рм┐рмЫрмирнНрмдрм┐ ред

    () рмЬрм░рм╛рнЯрнБ рмерм┐рммрм╛ рмкрнНрм░рмдрм┐ рмнрм╛рм░рмдрнАрнЯрмЩрнНрмХ рмХрнНрм╖рнЗрмдрнНрм░рм░рнЗ рмЬрм░рм╛рнЯрнБ рмХрнНрнЯрм╛рмирм╕рм░ рм╣рнЗрммрм╛ рмЖрм╢рмЩрнНрмХрм╛ рмерм╛рмП ред рмЖрмкрм╛рмдрмдрмГ рнзрнл рммрм░рнНрм╖рм░рнБ рмЙрм░рнНрмжрнНрмз рнкрнорнй.рнл рморм┐рм▓рм┐рнЯрмирнН рмнрм╛рм░рмдрнАрнЯ рмЬрм░рм╛рнЯрнБ рмХрнНрнЯрм╛рмирм╕рм░рм░ рммрм┐рмкрмж рммрм│рнЯрм░рнЗ рмЕрмЫрмирнНрмдрм┐ред рм╕рмжрнНрнЯ рмкрнНрм░рмХрм╛рм╢рм┐рмд рм░рм┐рмкрнЛрм░рнНрмЯ рморнБрмдрм╛рммрмХ, рмжрнЗрм╢рм░рнЗ рммрм╛рм░рнНрм╖рм┐рмХ рнзрм▓рмХрнНрм╖ рнирнй рм╣рмЬрм╛рм░рнпрнжрнн рмирнВрмЖ рмЬрм░рм╛рнЯрнБ рмХрм░рнНрмХрмЯ рм░рнЛрмЧрнА рмЪрм┐рм╣рнНрмирмЯ рм╣рнЗрмЙрмЫрмирнНрмдрм┐ ред рмПрммрмВ рннрннрм╣рмЬрм╛рм░рнйрнкрно рмЬрмгрмЩрнНрмХрм░ рм╕рнЗрмерм┐рм░рнЗ рморнГрмдрнНрнЯрнБ рм╣рнЛрмЗрмЫрм┐ ред рмЬрм░рм╛рнЯрнБ рмХрм░рнНрмХрмЯ рм░рнЛрмЧрм░ рмирнАрм░рм╛рмХрм░рмг рм╕рморнНрмнрмм рмерм╛рмЗ, рмкрнНрм░рм╛рмерморм┐рмХ рмнрм╛рммрнЗ рм░рнЛрмЧ рмЪрм┐рм╣рнНрмирмЯ рм╣рнЗрм▓рнЗ рм╕рморнНрмкрнВрм░рнНрмгрнНрмг рм╕рнБрм╕рнНрме рм╣рнЗрммрм╛рм░ рм╕рморнНрмнрм╛рммрмирм╛ рмерм┐рммрм╛ рм╕рмдрнНрмдрнНрн▒рнЗ рмПрмдрнЗ рмкрм░рм┐рморм╛рмгрм░ рморм╣рм┐рм│рм╛рмЩрнНрмХ рмЬрнАрммрми рмпрм╛рмЙрмЫрм┐ ред рмдрнЗрммрнЗ HPV рмнрнНрнЯрм╛рмХрм╕рм┐рми рмЧрм╛рм░рнНрмбрм╛рм╕рм┐рм▓рнН рмПрммрмВ рм╕рм░рнНрмнрм╛рм░рм┐рмХрнНрм╕рм░ рммрнНрнЯрммрм╣рм╛рм░ рмкрм╛рмЗрмБ рм▓рм╛рмЗрм╕рнЗрмирнНрм╕ рнирнжрнжрнорм░рнБ рморм┐рм│рм┐рм╕рм╛рм░рм┐рмЫрм┐ ред рмпрм╛рм╣рм╛рмХрнБ рнпрм░рнБ рнкрнл рммрм░рнНрм╖ рмормзрнНрнЯрм░рнЗ рмжрм┐рмЖрмпрм╛рмЗ рмкрм╛рм░рм┐рмм ред рмирнНрнЯрм╛рм╕рмирм╛рм▓ рмЯрнЗрмХрмирм┐рмХрм╛рм▓рнН рмЖрмбрмнрм╛рмЗрм╕рм░рнА рмЧрнНрм░рнБрмкрнН рмормзрнНрнЯ рмПрм╣рм╛рмХрнБ рм╕рнНрн▒рнАрмХрнГрмдрм┐ рмжрнЗрмЗрмерм┐рм▓рм╛ ред рмХрм┐рмирнНрмдрнБ рммрм┐рмбрморнНрн▒рмирм╛рм░ рмХрмерм╛ рмпрнЗ, рммрм╣рнБ рмнрм╛рм░рмдрнАрнЯ рмЬрм╛рмгрмирнНрмдрм┐ рмирм╛рм╣рм┐рмБ┬а HPV рммрм╛ рм╣рнНрнЯрнБрморм╛рмирнН рмкрм╛рмкрм┐рм▓рнЛрморм╛ рмнрм╛рмЗрм░рм╕рнН рм╕рм░рнНрмнрм╛рмЗрмХрм╛рм▓рнН рмХрнНрнЯрм╛рмирм╕рм░рм░ рмХрм╛рм░рмг ред рмХрнНрнЯрм╛рмирм╕рм░ рм╕рмЪрнЗрмдрмирмдрм╛ рм╕рморнНрмкрм░рнНрмХрм░рнЗ рмХрм╛рмо рмХрм░рнБрмерм┐рммрм╛ рм╕рмВрм╕рнНрмерм╛ CAPED рм░ рм╕рм░рнНрмнрнЗ рмХрм╣рнБрмЫрм┐, рнлрнй% рмнрм╛рм░рмдрнАрнЯ рм╕рм░рнНрмнрм╛рмЗрмХрм╛рм▓рнН рмХрнНрнЯрм╛рмирм╕рм░ рммрм╛ рмЬрм░рм╛рнЯрнБ рмХрм░рнНрмХрмЯ рммрм┐рм╖рнЯрм░рнЗ рмХрнЗрммрнЗ рмХрм┐рмЫрм┐ рм╢рнБрмгрм┐ рмирм╛рм╣рм╛рмБрмирнНрмдрм┐ ред рнкрнн% рм╢рнБрмгрм┐рмЫрмирнНрмдрм┐ рмХрм┐рмирнНрмдрнБ рм╕рнЗ рмормзрнНрнЯрм░рнБ рнирнй% рмПрм╣рм╛рмХрнБ рмЧрм│рм╛рм░рнЗ рм╣рнЗрмЙрмерм┐рммрм╛ рмХрнНрнЯрм╛рмирм╕рм░ рмнрм╛рммрм┐рмЫрмирнНрмдрм┐ ред рмдрм╛рм░ рмЕрм░рнНрме рмЬрм░рм╛рнЯрнБ рмЖрмо рм╢рм░рнАрм░рм░рнЗ рмХрнЗрмЙрмБрмарм┐ рмерм╛рмП рмдрм╛рм╣рм╛ рмЬрм╛рмгрм┐ рмирм╛рм╣рм╛рмБрмирнНрмдрм┐ ред рморм╛рмдрнНрм░ рнирнл% рм╣рм┐рмБ рмП рммрм┐рм╖рнЯрм░рнЗ рмЬрм╛рмгрм┐рмЫрмирнНрмдрм┐ ред рмдрнЗрммрнЗ рмкрнНрм░рмЬрмирми рмЕрмЩрнНрмЧрм░ рм╕рнБрм╕рнНрмермдрм╛, рмпрнМрмирм╛рмЩрнНрмЧрм░ рмкрм░рм┐рмЪрнНрмЫрмирнНрмирмдрм╛ рм╕рм╣ рм╕рнНрммрм╛рм╕рнНрмернНрнЯ рм╕рмЪрнЗрмдрмирмдрм╛ рмП рмжрм┐рмЧрм░рнЗ рмЕрмдрнНрнЯрмирнНрмд рмЧрнБрм░рнБрмдрнНрн▒рмкрнБрм░рнНрмгрнНрмг ред рморм╣рм┐рм│рм╛рмЩрнНрмХ рмнрм┐рмдрм░рнЗ рмХрнБрмгрнНрмарм╛ рмУ рмкрм░рм┐рммрм╛рм░рм░ рмкрнБрм░рнБрм╖ рм╕рмжрм╕рнНрнЯрмЩрнНрмХ рм╕рм╣рмпрнЛрмЧрм░ рмЕрмнрм╛рмм рмормзрнНрнЯ рмП рм╕рморм╕рнНрнЯрм╛ рммрмврм╛рмЗрммрм╛ рмкрмЫрм░ рммрмб рмХрм╛рм░рмг ред рмХрм┐рм╢рнЛрм░ рмХрм┐рм╢рнЛрм░рнАрмЩрнНрмХрнБ рмпрнМрмирм╢рм┐рмХрнНрм╖рм╛рм░ рмЖрммрм╢рнНрнЯрмХрмдрм╛рмХрнБ рмЖрмЬрм┐ рмормзрнНрнЯ рм╕рморм╛рмЬ рм╕рм╛рмВрм╕рнНрмХрнГрмдрм┐рмХ рмжрнГрм╖рнНрмЯрм┐рмнрмЩрнНрмЧрнАрм░рнБ рммрм┐рмЪрм╛рм░ рмХрм░рм┐ рмЕрмирм╛рммрм╢рнНрнЯрмХ рммрнЛрм▓рм┐ рмнрм╛рммрнБрмЫрм┐ ред рм╕рнЗрмерм┐рмкрм╛рмЗрмБ рмирм╛ рмЦрнЛрм▓рм╛ рмЖрм▓рнЛрмЪрмирм╛ рм╣рнЗрмЙрмЫрм┐ рмирм╛ рм╕рморнЯ рмерм╛рмЙ рмерм╛рмЙ рмЬрмирмирм╛рмЩрнНрмЧрм░ рм╕рморм╕рнНрнЯрм╛рмХрнБ рмирнЗрмЗ рмбрм╛рмХрнНрмдрм░рмЩрнНрмХрнБ рмкрм░рм╛рморм░рнНрм╢ рмХрм░рнБрмЫрмирнНрмдрм┐ рморм╣рм┐рм│рм╛ ред

    () рмдрнЗрммрнЗ рмжрнАрм░рнНрмШ рммрм░рнНрм╖рм░рнБ HPV рмнрнНрнЯрм╛рмХрнНрм╕рм┐рмирм░ рмЙрмкрм▓рммрнНрмзрмдрм╛ рм╕рмдрнНрмдрнНрммрнЗ рмЬрм╛рмдрнАрнЯ рмЯрнАрмХрм╛рмХрм░рмг рмХрм╛рм░рнНрмпрнНрнЯрмХрнНрм░рморм░рнЗ рмЖрмЬрм┐ рмпрм╛рмПрмБ рмдрм╛рмХрнБ рм╕рм╛рморм┐рм▓ рмХрм░рм╛рмпрм╛рмЗрмирм┐ ред рмирнАрмдрм┐ рмирнИрмдрм┐рмХрмдрм╛рм░ рмХрмерм╛ рмЙрмарм╛рмпрм╛рмЗ рмЕрмирнЗрмХ рм╕рморнЯрм░рнЗ рм╕рмВрмпрмд рмУ рм╢рнГрмЩрнНрмЦрм│рм┐рмд рмЬрнАрммрми рмпрнМрмирм╕рмВрмХрнНрм░рмормг рмарм╛рм░рнБ рмжрнВрм░рнЗрмЗ рм░рмЦрм┐рмкрм╛рм░рм┐рмм рммрнЛрм▓рм┐ рмпрнБрмХрнНрмдрм┐ рмжрм┐рмЖрмпрм╛рмП ред рмПрморм┐рмдрм┐ рмормзрнНрнЯ рмпрнБрмХрнНрмдрм┐ рмЖрм╕рм┐рмЫрм┐ рмпрнЗ рмпрмжрм┐ рмнрнНрнЯрм╛рмХрм╕рм┐рми рмжрм┐рмЖрмпрм┐рмм рмдрнЗрммрнЗ рммрм┐рммрм╛рм╣ рммрнЯрм╕ рмкрнВрм░рнНрммрм░рнБ рмормзрнНрнЯ рмХрм┐рм╢рнЛрм░рнАрморм╛рмирнЗ рмЕрмирнИрмдрм┐рмХ рмпрнМрми рм╕рморнНрмкрм░рнНрмХ рм░рмЦрм┐рммрм╛ рмкрм╛рмЗрмБ рмЪрнЗрм╖рнНрмЯрм╛ рмХрм░рм┐рммрнЗ ред рмЬрм░рм╛рнЯрнБ рмХрнНрнЯрм╛рмирм╕рм░ рмЪрм┐рм╣рнНрмирмЯ рм╣рнЗрм▓рнЗ рмбрм╛рмХрнНрмдрм░ рмормзрнНрнЯ рмЕрмирнЗрмХ рм╕рморнЯрм░рнЗ рм░рнЛрмЧрнАрмХрнБ рмнрм┐рмирнНрми рмжрнГрм╖рнНрмЯрм┐рм░рнЗ рмжрнЗрмЦрм┐рммрм╛рм░ рм░рм┐рмкрнЛрм░рнНрмЯ рмЖрм╕рнЗ ред рмдрм╛рмЩрнНрмХрнБ рмЪрм┐рмХрм┐рмдрнНрм╕рм╛ рммрм┐рм╖рнЯрм░рнЗ рмХрм╣рм┐рммрм╛ рмкрнВрм░рнНрммрм░рнБ рмЪрм░рм┐рмдрнНрм░ рмУ рм╕рмВрм╕рнНрмХрм╛рм░ рмкрм╛рма рмкрмврм╛рмирнНрмдрм┐ рмЕрмирнЗрмХ рм╢рм┐рмХрнНрм╖рм┐рмд рм▓рнЛрмХ ред рморм╣рм┐рм│рм╛рм░ рм╕рмдрнАрмдрнНрн▒ рмЙрмкрм░рнЗ рмкрнНрм░рм╢рнНрми рмЙрмарм╛рмирнНрмдрм┐ ред рмПрмХрм╛рмзрм┐рмХ рмкрнБрм░рнБрм╖рмЩрнНрмХ рм╕рм╣ рм╕рморнНрмкрм░рнНрмХ рм░рмЦрм┐ рмПрмнрм│рм┐ рм░рнЛрмЧ рм╣рнЛрмЗрмЫрм┐ рммрнЛрм▓рм┐ рм╕рморм╛рмЬ рммрм┐рмЪрм╛рм░ рмХрм░рнЗ ред рмЕрммрм╢рнНрнЯ рмПрм╣рм╛ рм╕рмд рмпрнЗ рм╕рнБрм░рмХрнНрм╖рм┐рмд рмпрнМрми рм╕рморнНрмкрм░рнНрмХ рмирм░рм╣рм┐рммрм╛ рм╕рморм╕рнНрнЯрм╛ рмХрм░рнЗ ред рмХрм┐рмирнНрмдрнБ рм╕рнЗрмерм┐рмкрм╛рмЗрмБ рм╕рмдрм░рнНрмХ рмХрм░рм╛рмЗрммрм╛ рм▓рм╛рмЧрм┐ рмпрнЗрмЙрмБ рмЙрмкрм╛рнЯ рмЖрмкрмгрм╛рмЗрммрм╛ рмЙрмЪрм┐рмд, рмпрнЗрмЙрмБ рм╕рм╛рмзрми рм╕рморм╕рнНрмдрмЩрнНрмХ рмкрм╛рмЦрнЗ рмкрм╣рмЮрнНрмЪрм┐рммрм╛ рмжрм░рмХрм╛рм░ рмдрм╛рм╣рм╛ рморм┐рм│рнБрмирм╛рм╣рм┐рмБ ред

    рм╕рм╛рмирм┐рмЯрм╛рм░рнА рмкрнНрнЯрм╛рмбрнН рммрнНрнЯрммрм╣рм╛рм░ рммрм╛ рм╕рнНрммрмЪрнНрмЫ рм╢рнЛрм╖рмХрм░ рммрнНрнЯрммрм╣рм╛рм░ рм╢рмдрмкрнНрм░рмдрм┐рм╢рмд рм╣рнЛрмЗ рмирм╛рм╣рм┐рмБ ред рмпрм╛рм╣рм╛ рморнВрм│ рм╕рморм╕рнНрнЯрм╛ рм╣рнЛрмЗ рмЧрм╛рмБ рмЧрмгрнНрмбрм╛рм░рнБ рм╕рм╣рм░ рмдрм│рм┐ рмпрм╛рмПрмБ рм░рм╣рм┐рмЫрм┐ ред рмЕрм╕рнБрм░рмХрнНрм╖рм┐рмд рмпрнМрми рм╕рморнНрмкрм░рнНрмХ рмкрм╛рмЗрмБ рмкрнБрм░рнБрм╖рмЩрнНрмХ рмнрнВрморм┐рмХрм╛ рмврнЗрм░ рмЕрмзрм┐рмХ рмерм┐рммрм╛ рм╕рмдрнНрмдрнНрн▒рнЗ рм╕рнЗрмХрмерм╛ рмкрнНрм░рмдрм┐ рм╕рмарм┐рмХрнН рмзрнНрнЯрм╛рми рмЖрмЬрм┐ рмпрм╛рмПрмБ рмжрм┐рмЖрмпрм╛рмЗрмирм┐ ред рм╕рмВрмХрнНрм░рморм┐рмд рммрнНрнЯрмХрнНрмдрм┐ рммрм┐рмирм╛ рмХрмгрнНрмбрморм░рнЗ рм╕рморнНрмкрм░рнНрмХ рм░рмЦрм┐ рморм╣рм┐рм│рм╛рмЩрнНрмХрнБ рмХрнНрнЯрм╛рмирм╕рм░ рмнрм│рм┐ рмЧрнБрм░рнБрмдрнНрмдрм░ рм░рнЛрмЧ рмжрнЗрмЙрмЫрмирнНрмдрм┐ ред рмкрнБрм░рнБрм╖ рм╕рмВрмХрнНрм░рмормгрм░ рммрм╛рм╣рмХ рмЖрмЙ рморм╣рм┐рм│рм╛ рмдрм╛рм░ рмЧрнНрм░рм╣рм┐рмдрм╛ рм╣рнЛрмЗ рмП рммрм┐рмкрмж рморнБрмгрнНрмбрм╛рмЙрмЫрмирнНрмдрм┐ ред рмкрм░рм┐рммрм╛рм░ рмарм╛рм░рнБ рмпрнЗрмХрнМрмгрм╕рм┐ рмХрм╛рм░рмгрм░рнБ рмжрнВрм░рнЗрмЗ рм░рм╣рнБрмерм┐рммрм╛ рмкрнБрм░рнБрм╖ рмПрмХрм╛рмзрм┐рмХ рморм╣рм┐рм│рм╛рмЩрнНрмХ рм╕рм╣ рм╕рморнНрмкрм░рнНрмХ рм░рмЦрм┐рммрм╛ рм╕рморм╕рнНрнЯрм╛ рммрмврм╛рмЙрмЫрм┐ ред рм╕рнЗрмХрнНрм╕ рмУрнНрн▒рм╛рм░рнНрмХрм░ рморнВрм│рмдрмГ рмПрмерм┐рм░рнЗ рмШрм╛рмгрнНрмЯрм┐ рм╣рнЗрмЙрмЫрмирнНрмдрм┐ ред рм╢рм┐рмХрнНрм╖рм╛ рмУ рм╕рмЪрнЗрмдрмирмдрм╛рм░ рмЕрмнрм╛рмм,рморм╣рм┐рм│рм╛рмЩрнНрмХ рм╕рнНрн▒рм╛рм╕рнНрмернНрнЯ рмкрнНрм░рмдрм┐ рм╕рморм╛рмЬрм░ рмЕрммрм╣рнЗрм│рм╛, рм╕рм╛рмЩрнНрмЧрмХрнБ рмжрнЗрм╢рм░ рмирнАрмдрм┐ рмирм┐рм╖рнНрмкрмдрнНрмдрм┐рм░рнЗ рмЧрморнНрмнрнАрм░рмдрм╛рм░ рмЕрмнрм╛рмм рмЬрм░рм╛рнЯрнБ рмХрм░рнНрмХрмЯ рм░рнЛрмЧрнАрмЩрнНрмХ рм╕рмВрмЦрнНрнЯрм╛ рмжрнЗрм╢рм░рнЗ рммрмврм╛рмЙрмЫрм┐ ред рмдрнГрмдрнАрнЯ рм▓рм┐рмЩрнНрмЧрм┐рмЩрнНрмХ рм╕рнНрн▒рм╛рм╕рнНрмернНрнЯ рм╕рнБрм░рмХрнНрм╖рм╛рмХрнБ рмормзрнНрнЯ рмЧрнБрм░рнБрмдрнНрн▒ рмжрм┐рмЖрмпрм╛рмЙ рмирмерм┐рммрм╛ рмЕрмнрм┐рмпрнЛрмЧ рм╣рнБрмП ред рмЧрм░рм┐рмм рмкрм░рм┐рммрм╛рм░ рмЖрм░рнНрмерм┐рмХ рмжрнБрмГрм╕рнНрмерм┐рмдрм┐ рмормзрнНрнЯрм░рнЗ рмЪрм│рнБрмерм┐рммрм╛ рммрнЗрм│рнЗ рм╕рнНрн▒рмЪрнНрмЫрмдрм╛ рмУ рмкрм░рм┐рмЪрнНрмЫрмирнНрмирмдрм╛ рмдрм╛рмЩрнНрмХ рмкрм╛рмЗрмБ рм╕рнНрн▒рмкрнНрми рм╣рнЛрмЗрмЫрм┐ред рмдрнЗрмгрнБ рмЯрм┐рмХрм╛ рм╕рнНрн▒рмжрнЗрм╢рнА рмХрм┐ рммрм┐рмжрнЗрм╢рнА рмдрм╛рм░ рмЪрм░рнНрмЪрнНрмЪрм╛ рмарм╛рм░рнБ рмЯрм┐рмХрм╛рмХрм░рмг рмХрм╛рм╣рм┐рмБрмХрм┐ рмП рмпрм╛рмПрмБ рм╣рнЛрмЗрмирм┐? рм╕рнНрмХрнНрм░рм┐рмирм┐рмВ рммрм╛ рмкрм░рнАрмХрнНрм╖рмг рмЙрмкрм░рнЗ рмЧрнБрм░рнБрмдрнНрмм рмХрм╛рм╣рм┐рмБрмХрм┐ рмжрм┐рмЖрмпрм╛рмЙрмирм┐? рмХрм╛рм╣рм┐рмБрмХрм┐ рмЯрм┐рмХрм╛рм░ рмЙрмкрм▓рммрнНрмзрмдрм╛ рм╕рмдрнНрмдрнНрн▒рнЗ рм▓рнЛрмХ рмПрмпрм╛рмПрмБ рмЬрм╛рмгрм┐ рмирм╛рм╣рм┐рмБрмирнНрмдрм┐ ? рмХрм╛рм╣рм┐рмБрмХрм┐ рмЬрм╛рмдрнАрнЯ рмЯрм┐рмХрм╛рмХрм░рмг рмкрнНрм░рнЛрмЧрнНрм░рм╛рморм░рнЗ рмПрм╣рм╛рмХрнБ рм╕рм╛рморм┐рм▓ рмХрм░рм╛рмпрм╛рмЗрмирм┐? рмдрм╛рм╣рм╛ рмЪрм░рнНрмЪрнНрмЪрм╛рм░ рморнБрмЦрнНрнЯ рмкрнНрм░рм╕рмЩрнНрмЧ рм╣рнЗрммрм╛ рмХрмерм╛ред рмпрм╛рм╣рм╛ рмПрмпрм╛рмПрмБ рм╣рнЗрмЙрмирм╛рм╣рм┐рмБ рммрнЛрм▓рм┐ рм╕рнНрмкрм╖рнНрмЯ рмжрнЗрмЦрм╛рмпрм╛рмЙрмЫрм┐ ред

Back to top button