ODISHA CONGRESS

ଭୁବନେଶ୍ବର: କମିଟି କରିନାହାନ୍ତି ପିସିସି ସଭାପତି ଶରତ ପଟ୍ଟନାୟକ। କିନ୍ତୁ ଦଳରୁ ନିଲମ୍ୱିତ ନେତା ପିସିସିର ବିଭିନ୍ନ ପଦପଦବୀରେ ଅଛନ୍ତି କହି ଫାଏଦା ଉଠାଇ ଚାଲିଛନ୍ତି। ପିସିସିର ସମ୍ପାଦକ ଓ କ୍ୟାସିଅର କହି ଓଡ଼ିଶା ନିବାସରେ ରୁମ୍ ବୁକିଂ କରିଥିବା କରିତକର୍ମା ନେତା ପ୍ରଦୀପ୍ତ ଦାସଙ୍କ ଏଭଳି କାରନାମାରେ ଯେଭଳି ଶରତଙ୍କୁ କିଛି ଫରକ ପଡ଼ୁନି। ବାସ୍ତବରେ ଦଳ ନାଁରେ ଏଭଳି ମଉକା ଗୋଟାଉଥିବା ନେତାଙ୍କୁ ସାବାଡ଼ କରିବେ ନା ସେମାନଙ୍କର ସୁରକ୍ଷା କବଚ ସାଜିବେ ମୁଖିଆ, ତାକୁ ନେଇ ସବୁଠି ଚର୍ଚ୍ଚା।

ଅସହାୟ ହୋଇପଡ଼ିଲେଣି କି ପିସିସି ସଭାପତି ଶରତ ପଟ୍ଟନାୟକ? ବିରୋଧୀଙ୍କୁ ମୁକାବିଲା କରିବାକୁ ଅଣ୍ଟା ଭିଡ଼ିଥିବା ଶରତଙ୍କୁ ତ ନିଜ ଦଳର ନେତା ଚୂନ ଲଗାଇବାରେ ବ୍ୟସ୍ତ। ଦଳ ବିରୋଧୀ କାର୍ଯ୍ୟକଳାପ ପାଇଁ ଦଳରୁ ନିଲମ୍ୱିତ ନେତା ପ୍ରଦୀପ୍ତ ଦାସ କିଭଳି ଓଡ଼ିଶା ନିବାସରେ ପିସିସିର ସେକ୍ରେଟାରୀ ଓ କ୍ୟାସିଅର କହି ଗୃହ ବିଭାଗରୁ ରୁମ୍ ବୁକ୍ ପାଇଁ ଅନୁମତି ପାଇଲେ, ତାକୁ ନେଇ ହଇଚଇ ଖେଳିଥିଲା। ନକ୍ଷତ୍ର ନ୍ୟୁଜରେ ଖବର ପ୍ରସାରଣ ପରେ ଉଣା ଅଧିକେ ତୁଙ୍ଗ ନେତାଙ୍କ ଭିତରେ ହଇଚଇ ଖେଳିଥିଲା। ଏପରିକି ଦିଲ୍ଲୀରେ ସେଇ ଓଡ଼ିଶା ନିବାସରେ ଥିବା ଶରତ ପଟ୍ଟନାୟକଙ୍କୁ ପଚାରିଲା ବେଳେ, ସେତେବେଳେ କିଏ କେଉଁବାଟେ ଏମିତି କାରସାଦି କରିଥିଲେ , ସେ କେମିତି ଜାଣିବେ ବୋଲି କହିଥିଲେ। କିନ୍ତୁ ଓଡ଼ିଶା ନିବାସରେ ଶରତଙ୍କୁ ସମ୍ୱର୍ଦ୍ଧନା ବେଳେ ପ୍ରଦୀପ୍ତ ତାଙ୍କ ରୁମ୍‌ରେ ବସିଥିବାର ଫଟୋ ବି ଭାଇରାଲ ହେଉଛି। ଶୁଣନ୍ତୁ କଅଣ କହିଥିଲେ ଶରତ। ଆଉ କଅଣ କହିଥିଲେ ପିସିସି ଅଫିସ ସେକ୍ରେଟାରୀ।

ଆଉ ଦିଲ୍ଲୀରୁ ଫେରିବା ପରେ ସତ କଅଣ ଓ ପ୍ରଦୀପ୍ତଙ୍କ ଏଭଳି କାରସାଦି ପଛରେ କିଏ ବୋଲି ପଚାରିବାରୁ ଶରତ ସମାନ କଥାକୁ ଦୋହରାଇଛନ୍ତି। କାରଣ ସେତେବେଳକୁ ତୃଣମୂଳସ୍ତରରୁ ନେଇ ଏଆଇସିସି ଯାଏ ଏହାକୁ ନେଇ ଘଣ୍ଟା ଚକଟା ଆରମ୍ଭ ହୋଇସାରିଛି। ନିଲମ୍ୱିତ ନେତାଙ୍କ ଉପରୁ ନିଲମ୍ୱନ ଉଠାଇବାକୁ ଆପାତତଃ ସକରାତ୍ମକ ସଙ୍କେତ ବି ମିଳିସାରିଥିଲା। କିନ୍ତୁ ଏହାରି ଭିତରେ ଅଚାନକ ଦିଲ୍ଲୀରେ ଡେରା ପକାଇ ତୁଙ୍ଗ ନେତାଙ୍କ ପାଖାପାଖି ରହିବା ଓ ପତିଆରା ଦେଖାଇଥିବା ପ୍ରଦୀପ୍ତଙ୍କୁ ଏହା ମହଙ୍ଗା ପଡ଼ିପାରେ। ଶୁଣନ୍ତୁ କଅଣ କହୁଛନ୍ତି ପିସିସି ସଭାପତି।

ପ୍ରଦୀପ୍ତଙ୍କ ଭଳି ନେତା ଦଳରୁ ନିଲମ୍ୱିତ ହୋଇଛନ୍ତି। କିନ୍ତୁ ଦଳରେ ନାହାନ୍ତି ବୋଲି କହିବା ଭୁଲ୍ ହେବ। ଦିଲ୍ଲୀ ଯିବା, ଦଳୀୟ କାର୍ଯ୍ୟକ୍ରମରେ ସାମିଲ ହେବା ବି ବିଚିତ୍ର କଥା ନୁହେଁ। କାରଣ ଅଧିକାଂଶ ତୁଙ୍ଗ ନେତାଙ୍କ ଜାଣତରେ ଏୟା ହୋଇଥିବ! ଓଡ଼ିଶା ନିବାସରେ ଏକାଠି ରହିବା ଏ କଥାକୁ ସୂଚାଉଛି। କିନ୍ତୁ ପଦପଦବୀରେ ନ ଥାଇ ଏହାର ଦୁରୁପଯୋଗ କରିବା କେତେଦୂର ଯୁକ୍ତିଯୁକ୍ତ, ଏହାକୁ ହାଲୁକା ଭାବେ ନେଲେ କାହାର କ୍ଷତି ହେଉଛି, କିଏ ଘଣ୍ଟ ଘୋଡ଼ାଉଛି, ଭାବିବାର କଥା।

ସିମ୍ପୁଲ ନାୟକଙ୍କ ସହ ପ୍ରଦୀପ ନାୟକଙ୍କ ରିପୋର୍ଟ

ଅଗଷ୍ଟ ୨୮ରେ ସିଡବ୍ଲୁସି ବୈଠକ। ଏଥିରେ ରାଜ୍ୟସ୍ତରୀୟ କମିଟିକୁ ଲାଗିବ ମୋହର। ୨୪କୁ ଲକ୍ଷ୍ୟ ରଖି ସେପ୍ଟେମ୍ୱରରେ ନୂଆ କମିଟିକୁ ନେଇ ୯ରୁ ୯୦ ଆସନକୁ ଉଠିବା ଦଳର ହେବ ମୁଖ୍ୟ ଲକ୍ଷ୍ୟ। କଂଗ୍ରେସ ଏକାକୀ ନିଜ ଦମରେ ଓଡ଼ିଶାକୁ ଦୀର୍ଘ ବର୍ଷ ପରେ କ୍ଷମତାକୁ ଫେରିବ ବୋଲି କହିଛନ୍ତି ପିସିସି ସଭାପତି। ସଂଗଠନ ସରଞ୍ଚନା ସହ କିଭଳି ଆଭ୍ୟନ୍ତରୀଣ ବିବାଦକୁ ପଛକୁ ଠେଲି ସମସ୍ତେ ଆଗେଇଆସିବେ, ତାକୁ ଫୋକସ କରିବା ଦରକାର ବୋଲି ଅନେକ ତୁଙ୍ଗ ନେତା ମତପୋଷଣ କରିଛନ୍ତି।

ସବୁବେଳେ ବିବାଦ, କନ୍ଦଳ ଲାଗି ଯେତିକି ଚର୍ଚ୍ଚାରେ ରହୁଛି କଂଗ୍ରେସ। ସେତିକି ରହୁନି କ୍ଷମତାକୁ ଫେରିବା ଲାଗି ଆବଶ୍ୟକୀୟ ରଣନୀତି, ସମନ୍ୱୟ ଓ ସହଯୋଗକୁ ନେଇ। ସେଥିଲାଗି ତ ପ୍ରମୁଖ ଓ ପୁରୁଣା ଦଳ ହୋଇଥିଲେ ବି ଓଡ଼ିଶା ଜନମାନସର ଆସ୍ଥାଭାଜନ ହୋଇପାରୁନି। ୧୯ ପରେ ବିରୋଧୀ ଦଳର ମାନ୍ୟତା ଟିକକ ବି ହରାଇଦେଲା ବିଧାନସଭାରେ। ପଦ୍ମ କ୍ୟାମ୍ପ ଛଡ଼ାଇନେଲା। ଏତିକିବେଳେ ପିସିସି ସଭାପତି ଶରତ ପଟ୍ଟନାୟକଙ୍କ ନୂଆ ଟିମ୍ କୁ ନେଇ ସମସ୍ତଙ୍କ ନଜର। ୯ ରୁ ୯୦ ଟାର୍ଗେଟ କେବଳ ବାହାସ୍ପୋଟ ନା ହାସଲ କରିବାକୁ ସେମିତି କିଛି ହାତରେ ଅଛି ଜାଦୁକରୀ। ସଭାପତି କହିଲେଣି, କଂଗ୍ରେସ ସବୁବେଳେ ଲୋକଙ୍କ ଭିତରେ ଅଛି।

ଗାନ୍ଧୀ ପରିବାର ନାଁରେ ଥିବା ସ୍ୱତନ୍ତ୍ର ଭୋଟ ବ୍ୟାଙ୍କକୁ କିଭଳି ଏନକ୍ୟାସ୍ କରାଯିବ, ତା ଉପରେ ଗୁରୁତ୍ୱ ଦେବାକୁ ହେବ ବୋଲି କହିଛନ୍ତି ସଭାପତି। ଆଉ ତୁଙ୍ଗ ନେତା ସୁରଙ୍କ ମତରେ, ବିଶୃଙ୍ଖଳା ଲାଗି ବାଟବଣା ନ ହେଉ ଆଉ ଦଳ। ଗାନ୍ଧୀ ପରିବାରକୁ ଛାଡ଼ି ଆଉ କିଏ ବି ସଭାପତି ହେଲେ ସମର୍ଥନ କରିବୁ। ଶରତଙ୍କ କାନ୍ଧ ସହ କାନ୍ଧ ମିଳାଇ ଆଗକୁ ଚାଲିବାକୁ ହେବ। ନଚେତ୍ ଏକତା ଅଭାବରୁ ଜନମତର ଆସ୍ଥାଭାଜନ ହେବା ସମ୍ଭବ ହେବନି।

ଅଗଷ୍ଟ ୨୮ରେ ସିଡବ୍ଲୁସି ବୈଠକ। ଦଳର ନୀତି ନିର୍ଦ୍ଧାରଣର ସର୍ବୋଚ୍ଚ କମିଟି ଉପରେ ସମସ୍ତଙ୍କ ନଜର।  ଓଡ଼ିଶା କଂଗ୍ରେସର ବ୍ଲକ୍‌, ଜିଲ୍ଲା ଓ ରାଜ୍ୟସ୍ତରୀୟ କମିଟିକୁ ନୂଆ ରୂପ ଦିଆଯିବ। ନୂଆ ଟିମ୍‌କୁ ନେଇ ୨୪ ସ୍ୱପ୍ନକୁ ସାକାର କରିବାକୁ ପଡ଼ିବ ବୋଲି ପଣ ସିନା କରିଛନ୍ତି ସଭାପତି। କିନ୍ତୁ ସାଥୀ ସହଯୋଗ କଲେ ତ।

ସିମ୍ପୁଲ ନାୟକଙ୍କ ସହ ପ୍ରଦୀପ ନାୟକଙ୍କ ରିପୋର୍ଟ

ଭୁବନେଶ୍ୱର: କଟକ ନଗର କଂଗ୍ରେସ କଳି ବଢ଼ୁଛି। ମୋକିମଙ୍କ ପକ୍ଷଛେଦନ ସକାଶେ ଧୀରେ ଧୀରେ ତାଙ୍କ ଅନୁଗତଙ୍କ ପାଇଁ କଂଗ୍ରେସ ନେତୃତ୍ୱ କବାଟ କିଳିବାକୁ ବସିଲାଣି। ଶରତଙ୍କ ନେତୃତ୍ୱକୁ ବିରୋଧ କରି ଯେଭଳି ନେତା ଓ କର୍ମୀଙ୍କ ଇସ୍ତଫାର ସୁଅ ଛୁଟାଇ ମୋକିମ୍ ପିସିସିକୁ ଅକଳରେ ପକାଇଲେଣି। ଅନୁରୂପ ଭାବରେ ମୋକିମଙ୍କ ଚେର କାଟିବାକୁ ଶରତ ବି ଅନୁରୂପ ଅଭିଯାନ ଆରମ୍ଭ କରିଛନ୍ତି।

ପିସିସି ସଭାପତି ଶରତ ପଟ୍ଟନାୟକ ଓ ବାରବାଟୀ-କଟକ ବିଧାୟକ ମହମ୍ମଦ ମୋକିମଙ୍କ ଭିତରେ ଜାରି ବିବାଦ ସିଧାସଳଖ ସଂଗଠନକୁ ବିପଦରେ ପକାଇଲାଣି। କଟକ ନଗର କଂଗ୍ରେସ ସଭାପତି ପଦରୁ ଅଚାନକ ଗିରିବାଳା ବେହେରାଙ୍କୁ ବାହାର କରି ନିଜର ଖାସ୍ ଅନୁଗତ ସୁରେଶ ମହାପାତ୍ରଙ୍କୁ ଦାୟିତ୍ୱ ଦେଇଛନ୍ତି ଶରତ ପଟ୍ଟନାୟକ। ଆଉ ଏହା ପଛର ରହସ୍ୟ ବି ଜଳଜଳ କରି ଦିଶୁଛି। ତିନି ଦିନ ଭିତରେ କଟକରୁ ନେଇ ଭୁବନେଶ୍ୱର ଯାଏ। ଅନେକ ମୋକିମଙ୍କ ଦୃଢ଼ ସମର୍ଥକ ଦଳ ଛାଡ଼ିଥିବାରୁ ଏହାର କଡ଼ା କାଉଣ୍ଟର ଏଭଳି ବାଗରେ କରିଛନ୍ତି ଶରତ। ଗିରିବାଳା କହିଛନ୍ତି, ଏହା ତାଙ୍କ ବିରୁଦ୍ଧରେ ଆକ୍ରୋଶମୂଳକ ଆକ୍ସନ। ଅଗଣତାନ୍ତ୍ରିକ ଭାବରେ ବିଦା କରାଯାଇଛି। କିଛି ଦଲାଲଙ୍କ ପାଇଁ ଦଳ ଦୁର୍ବଳ ହେବାକୁ ବସିଛି। କଟକ ମେୟର ପ୍ରାର୍ଥୀ ଥିଲେ ସେ। ଭୁବନେଶ୍ୱର ଓ ବ୍ରହ୍ମପୁର ମେୟର ପ୍ରାର୍ଥୀଙ୍କ ତୁଳନାରେ ଅଧିକ ଭୋଟ ପାଇଥିଲେ।

ସେପଟେ ନବନିଯୁକ୍ତ ନଗର କଂଗ୍ରେସ ସଭାପତି ସୁରେଶଙ୍କ କହିବା କଥା, ତାଙ୍କର କାହା ସହ ବିବାଦ ନାହିଁ। ମୋକିମ୍ କି ଗିରିବାଳା। କାହା ସାଙ୍ଗରେ ତାଙ୍କର କାମ କରିବାରେ କୌଣସି ସମସ୍ୟା ନାହିଁ। ଆଉ ବିଧାୟକ ମୋକିମ କହିବା ଛଳରେ କଟାକ୍ଷ କରିଛନ୍ତି କି, ଦଳ ବୋଧହୁଏ ଅଧିକ ମଝଭୁତ ସକାଶେ ଏଭଳି ନିଷ୍ପତ୍ତି ନିଆଯାଇଥାଇପାରେ। ସେ କଂଗ୍ରେସରେ ଅଛନ୍ତି ଓ ରହିବେ।

ସେପଟେ ପିସିସି ସଭାପତିଙ୍କ କହିବା କଥା, ଦଳକୁ ମଜଭୁତ କରିବାକୁ ସମସ୍ତେ ଆଗେଇ ଆସନ୍ତୁ। ପଦରେ ରହିଲେ କଅଣ କାମ କରିହେବ ନଚେତ ନୁହେଁ କି ବୋଲି ପାଲଟା ପଚାରିଛନ୍ତି। ଏହା କାହା ବିରୁଦ୍ଧରେ କୌଣସି ଆକ୍ରୋଶମୂଳକ ପଦକ୍ଷେପ ନୁହେଁ। ଏମିତିରେ ସୁରେଶ ଓ ମୋକିମଙ୍କ ଶିବିର ଭିତରେ ଶୀତଳଯୁଦ୍ଧ ଲାଗିରହିଛି। ଶରତ ସଭାପତି ହେବା ଦିନଠୁ ଅନେକ କାର୍ଯ୍ୟକ୍ରମରେ ମୋକିମଙ୍କୁ ଦେଖିବାକୁ ମିଳୁନଥିଲା। ଆଉ ରାଷ୍ଟ୍ରପତି ନିର୍ବାଚନରେ ଦଳୀୟ ନିଷ୍ପତ୍ତି ବିରୁଦ୍ଧରେ ଯାଇ ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ଭୋଟ୍ ଦେଇଥିଲେ ମୋକିମ୍। ମୋକିମ୍ ଆଗକୁ କଂଗ୍ରେସରେ ରହିବେ କି ନା, ତାକୁ ନେଇ ସସପେନ୍ସ ଜାରି ଭିତରେ ଉଭୟ ପକ୍ଷ ପରସ୍ପରର ପକ୍ଷଛେଦନ ଲାଗି ଯେମିତି କଟକକୁ ହବ୍ କରିଦେଲେଣି।

ପ୍ରଦୀପ ନାୟକଙ୍କ ରିପୋର୍ଟ

ଟପ୍‌ରେ ପ୍ରଥମ ପାଳି । କିନ୍ତୁ ଦ୍ୱିତୀୟ ପାଳିରେ ଶୂନ୍‌ । ଏହା କ୍ରିକେଟ ସ୍କୋର ନୁହେଁ ଏହା ହେଉଛି ପିସିସି ସଭାପତିଙ୍କ ସ୍କୋର । ଦ୍ୱିତୀୟ ଥର ପିସିସି ମଙ୍ଗୁଆଳ ପଦ ଭାର ନେଉଥିବା ନେତାଙ୍କ ପାଇଁ ଏହା ଆଶୀର୍ବାଦ ନାଁ ଅଭିଶାପ। ଏହା ପଛରେ କଅଣ ରହିଛି କାରଣ। ଦେଖନ୍ତୁ ସେକେଣ୍ଡ ଇନିଂସରେ ସ୍କୋରକୁ ନେଇ କାହିଁକି ସ୍କାନରରେ ପିସିସି ମଙ୍ଗୁଆଳ ଏହି ରିପୋର୍ଟରେ।

ପ୍ରଥମ ପାଳିରେ ହିରୋ। କିନ୍ତୁ କଅଣ ହେଉଛି କେଜାଣି, ଦ୍ୱିତୀୟ ପାଳି ବେଳକୁ ନା ରହୁଛି ସେ ଜୋସ୍ ନା ରହୁଛି ସେ ନମ୍ୱରର କରିସ୍ମା। କାହିଁକି ଦାଉ ସାଧୁଛି ସେକେଣ୍ଡ ଇନିଂସ। ରାଜ୍ୟ କଂଗ୍ରେସର ମଙ୍ଗୁଆଳ ଆସନର ଇତିହାସକୁ ଦେଖିଲେ ଦ୍ୱିତୀୟ ଥର ସଭାପତି ହେବାରେ ଶରତ ପଟ୍ଟନାୟକ ହେଉଛନ୍ତି ଚତୁର୍ଥ ବ୍ୟକ୍ତି। ଜାନକୀ ବଲ୍ଲଭ ପଟ୍ଟନାୟକ, ନିରଞ୍ଜନ ପଟ୍ଟନାୟକ, ଜୟଦେବ ଜେନାଙ୍କ ପରେ ଶରତ ଆରମ୍ଭ କରିଛନ୍ତି ନିଜର ସେକେଣ୍ଡ ଇନିଂସ। ତେବେ ଏ ସବୁ ସଭାପତିଙ୍କ ପ୍ରଥମ ପାଳି ଯେମିତି ଚମକଦାର ଥିଲା। କିନ୍ତୁ ଦ୍ୱିତୀୟ ପାଳି ବେଳକୁ ସେ ଚମକ ରହିଲାନି।

ପୂର୍ବରୁ ଜାନକୀ ବଲ୍ଲଭ ପଟ୍ଟନାୟକ ୧୯୯୫ରେ ପିସିସି ସଭାପତି ଦାୟିତ୍ୱ ନେବା ସମୟରେ କଂଗ୍ରେସ କ୍ଷମତାକୁ ଆସିଥିଲା। ବ୍ୟାକଡୋର୍ ଏଣ୍ଟ୍ରି କରି ମୁଖ୍ୟମନ୍ତ୍ରୀ ବି ହୋଇଥିଲେ ଜାନକୀ। ୨୦୦୧ ରେ ଶରତ ପଟ୍ଟନାୟକ ସଭାପତି ହେଲେ । ପରିସ୍ଥିତି ଏପରି ହେଲା ଶରତଙ୍କ ପାଇଁ ଘରୁ ବାହାରିବା ମୁସ୍କିଲ ହୋଇଗଲା । ଖାଲି ବିରୋଧ ନୁହେଁ ଉପକୂଳ ଅଞ୍ଚଳରେ ଟମାଟ ଅଣ୍ଡା ମାଡ଼ ମଧ୍ୟ୍ୟ ହେଲା । ଏହି ଅଣ୍ଡା ମାଡ ଥିଓରି ର ମାଷ୍ଟର ମାଇଣ୍ଡ ଥିଲେ କୁଆଡ଼େ ଲୁଲୁ ମହାପାତ୍ର ।

୨୦୦୪ ନିର୍ବାଚନର ମାତ୍ର କେଇ ମାସ ଆଗରୁ ଶରତ ପଟ୍ଟନାୟକଙ୍କୁ ପିସିସି ରୁ ହଟାଇ ଦାୟିତ୍ୱ ନେଇଥିଲେ ସତ ଜାନକୀ। କିନ୍ତୁ ସଫଳ ହେଲେନି। ଦଳ ତ ହାରିଲା ନିଜେ ମଧ୍ୟ୍ୟ ଆଠଗଡ ଆସନରୁ ଶୋଚନୀୟ ଭାବରେ ପରାଜିତ ହେଲେ। ନିର୍ବାଚନ ର ବିଫଳଥା ପାଇଁ ଜାନାକୀ ବଲ୍ଲଭ ପଟ୍ଟନାୟକଙ୍କୁ ଗାଦିଚ୍ୟୁତ କରି ଜୟଦେବ ଜେନା ପିସିସି ମଙ୍ଗ ଧରିଲେ । ତାଙ୍କ ସମୟରେ କଳିଙ୍ଗନଗର ଗୁଳିକାଣ୍ଡ ହେଲା । ଘଟଣା ସ୍ଥଳ ପରିଦର୍ଶନ କରିବା ସହ ବିରୋଧୀ ଦଳର ଭୁମିକା ଠିକ ଭାବରେ ନିର୍ବାହ କରି ଉଭୟ ରାଜନୈତିକ ଓ ବ୍ୟବସାୟିକ ସଫଳତା ମଧ୍ୟ୍ୟ ହାସଲ କଲେ ।

ଖାଲି ସେତିକି ନୁହେଁ ତଳସରା ଓ ଲକ୍ଷ୍ମୀପୁର ଉପ ନିର୍ବାଚନରେ ସଫଳତା କଂଗ୍ରେସ ମନରେ ନୁଆ ଆଶା ସଞ୍ଚାର କରିଥିଲା। କିନ୍ତୁ ଠିକ୍‌ ୨୦୦୯ ନିର୍ବାଚନ ପୁର୍ବରୁ ହଟିଲେ ଜୟଦେବ। ଆଉ ଆସନରେ ବସିଲେ କାମାକ୍ଷା ପ୍ରସାଦ ସିଂହଦେଓ। ଓଡିଶା କଂଗ୍ରେସ ରୁ ଶେଷ ହେଲା ଜାନକୀ ରାଜ ବୋଲି କୁହାଗଲା । କଂଗ୍ରେସ ଦଳରେ ଯିବା ଆସିବା କିଛି ନୁଆ ନୁହେଁ ।

କାମାକ୍ଷାଙ୍କୁ ଦାୟିତ୍ୱରୁ ହଟାଇ ନିରଞ୍ଜନ ପଟ୍ଟନାୟକ ହେଲେ କଂଗ୍ରେସ ମୁଖିଆ । ସରକାର ବିରୋଧରେ ୨୦୧୨ ସେପ୍ଟେମ୍ବର ୬ ପରିବର୍ତ୍ତନ ସମାବେଶ ଓ ସେପ୍ଟେମ୍ୱର ୧୦ ଓଡିଶା ବନ୍ଦ ଡାକରା ଦେଇ ଚର୍ଚ୍ଚା କୁ ଆସିଲେ । ନବଗଠିତ ନୂଆପଡା , ଅତାବିରା, ହିନ୍ଦୋଳ ଏନଏସି ନିର୍ବାଚନରେ କଂଗ୍ରେସ ବିଜୟ ଲାଭ କରି ବିଜେଡି କୁ ଟକ୍କର ଦେଲା । କିନ୍ତୁ ୨୦୧୪ ନିର୍ବାଚନ ପୁର୍ବରୁ ନିଜେ ପରିବର୍ତ୍ତନ ହୋଇଗଲେ ନିରଞ୍ଜନ। ଦ୍ୱିତୀୟ ଥର ଆସିଲେ ଜୟଦେବ ଜେନା। ବାଣ୍ଟିଲେ ଟିକେଟ। ନାମାଙ୍କନ ଦାଖଲର ଶେଷ ଦିନ କାହାକୁ ରାସ୍ତା କଡ଼ରେ ତ ଆଉ କାହାକୁ ହୋଟେଲକୁ ଡାକି ରାତି ଅଧିଆ ଟିକେଟ ଦେଇଥିବାର ଅପବାଦ ବି ଲାଗିଲା।

ଟିକେଟ ବିକ୍ରି ଅଭିଯୋଗର କଳଙ୍କ ଲାଗିଥିଲା ଜୟଦେବଙ୍କ ନାଁ ରେ। ।ନୁଆ ଚେହେରା ଭାବରେ ପ୍ରସାଦ ହରିଚନ୍ଦନ ୨୦୧୫ ଡିସେମ୍ୱରରେ ସଭାପତି ହେଲେ। ପାନ୍ଥନିବାସରେ ନବଚିନ୍ତନ ଶିବିର କରି ସମସ୍ତଙ୍କୁ ଯୋଡ଼ିବାର ପ୍ରୟାସ, ୨୦ ବର୍ଷ ବ୍ୟବଧାନରେ ପ୍ରଥମ କରି ବ୍ଲକ୍ କଂଗ୍ରେସ ସଭାପତି ଗଠନ ଆଦି ଅନେକ ପ୍ରୟାସ କରିଥିଲେ। କିନ୍ତୁ ପରବର୍ତ୍ତୀ ପର୍ଯ୍ୟାୟରେ ପ୍ରସାଦଙ୍କ ବିରୋଧରେ ମେଳିର ପରିଣାମସ୍ୱରୂପ ପୁଣି ଥରେ ଗାଦିକୁ ଫେରିଲେ ନିରଞ୍ଜନ ପଟ୍ଟନାୟକ। ୨୦୧୯ ନିର୍ବାଚନ ପରିଚାଳନାର ଭାର କାନ୍ଧରେ ପଡ଼ିଥିଲା।

କଂଗ୍ରେସ ବିଧାୟକ ସଂଖ୍ୟା ନବ ଗ୍ରହ ରେ ପରିଣତ ହେଲା। ବିଧାନସଭାରେ ଦଳ ବିରୋଧୀ ଦଳ ମାନ୍ୟତା ହରାଇଦେଲା। ପଞ୍ଚାୟତ ଓ ପୌର ନିର୍ବାଚନରେ ଶୋଚନୀୟ ପରାଜୟ ନିରଞ୍ଜନଙ୍କ ଦକ୍ଷତାକୁ ଅଙ୍ଗୁଳି ଉଠାଇଥିଲା। ବ୍ରଜରାଜନଗର ଉପ-ନିର୍ବାଚନର ମାତ୍ର କେଇଟା ଦିନ ଆଗରୁ ଦାୟିତ୍ୱରୁ ଅବ୍ୟାହତି ଦେଇ ଶରତ ପଟ୍ଟନାୟକଙ୍କୁ ପୁଣି ୨୪କୁ ଲକ୍ଷ୍ୟ ରଖି ହାଇକମାଣ୍ଡ ଦାୟିତ୍ୱ ଦେଇଛନ୍ତି। ବ୍ରଜରାଜନଗରରେ ଅବଶ୍ୟ ଦଳ ହାରିଲା। କିନ୍ତୁ ବିଜେପିକୁ ତୃତୀୟ ସ୍ଥାନକୁ ଠେଲି ଦେଇଥିବାରୁ ଶରତଙ୍କ ଆଗମନ ହୁଏତ ଦଳ ଲାଗି ଶୁଭଙ୍କର ବୋଲି ଅନେକ ବିବେଚନା କରୁଛନ୍ତି। ଆଗକୁ ୨୪ ଲଢେଇ।

ଏହାରି ଭିତରେ ନବସଂକଳ୍ପ ଶିବିର କରି ବିରୋଧୀ ଓ ବିଦ୍ରୋହୀଙ୍କୁ ଚେତାବନୀ ଦେଇସାରିଛନ୍ତି। ଜୁନ୍ ୧୦ରେ ବିଧିବଦ୍ଧ ଦାୟିତ୍ୱ ଗ୍ରହଣ ସହ ମୁଖିଆ ଭାବେ ଗୃହପ୍ରବେଶ ହେବ କଂଗ୍ରେସ ଭବନରେ। କିନ୍ତୁ ଶରତଙ୍କ ସେକେଣ୍ଡ ଇନିଂସ ସତରେ ସୁରୁଖୁରୁରେ ସମ୍ପନ୍ନ ହେବ ତ। କାରଣ ଗୋଡ଼ଟଣା ନୀତି କଂଗ୍ରେସର ପୁରୁଣା ରୋଗ। ଦେଖିବାକୁ ଗଲେ ୨୪ରେ କର ବା ମର ସ୍ଥିତି ଏବେ କଂଗ୍ରେସ ଆଗରେ। ଅନ୍ୟ ମଙ୍ଗୁଆଳଙ୍କ ଭଳି ଶରତଙ୍କ ଦ୍ୱିତୀୟ ଇନିଂସ ସମଦଶା ଭୋଗିବନି ତ। ନା ଶରତ ଏହି ଟ୍ରେଣ୍ଡକୁ ଭାଙ୍ଗି ଦଳକୁ ଆଶାତୀତ ସଫଳତା ଦେବେ, ତା ଉପରେ ସମସ୍ତଙ୍କ ନଜର।

ଅନେକ ବାର ଅପବାଦରେ ସନ୍ତୁଳିତ ହେଉଥିଲେ ସେକେଣ୍ଡ ଇନିଂସ ଖେଳିଥିବା ପିସିସି ମଙ୍ଗୁଆଳମାନେ। କେତେବେଳେ ମ୍ୟାଚ୍ ଫିକ୍ସିଂର ଆରୋପ ତ କେତେବେଳେ ସରକାରୀ ଦଳ ସହ ସଲାସୁତୁରାର ଇମେଜ୍। ହେଲେ ଶରତଙ୍କ ସେକେଣ୍ଡ ଇନିଂସ ସ୍କାନରରେ। ଯାହାର ରେଜଲ୍ଟ ଦେଖିବ ଦଳ ୨୪ରେ। ପିସିସି ସଭାପତି ଙ୍କ କାର୍ଯ୍ୟକାଳ କୁ ଦେଖିଲେ ଦ୍ୱିତୀୟ ପାଳିରେ କୌଣସି ପିସିସି ମୁଖିଆ ସଫଳତା ପାଇନାହାଁନ୍ତି । ପରାଜୟ, ବିରୋଧ, ଅପମାନ ଓ ପ୍ରତିବାଦର ସମ୍ମୁଖୀନ ହେବା ସହ ବିବାଦୀୟ ହୋଇଛନ୍ତି । ଏବେ ଶରତ ଙ୍କ ପାଳି ।

ଶରତ ସଫଳ ହେବେ ନା ଅନ୍ୟ ମାନଙ୍କ ଭଳି ବିବାଦରେ ଛନ୍ଦି ହେବା ସହ ଇତିହାସର ପୁନରାବୃତ୍ତି ହେବ । କଂଗ୍ରେସ ର ଦୁର୍ଦ୍ଦିନରେ ଶରତ ଙ୍କୁ ବିଧାୟକ ମାନେ ସମର୍ଥନ କରିବେ ତ । ଘରେ ନ ପଶୁଣୁ ଚାଳ ବାଜିବା ଭଳି ଅବସ୍ଥା ହେବନିତ। ସନ୍ତୁଷ୍ଟ ଅସନ୍ଥୁଷ୍ଟ ଙ୍କୁ ସାଙ୍ଗରେ ଧରି କେମତି ଚାଲିବେ ତାଙ୍କ ପାଇଁ ଯେତିକି ବଡ଼ ଚ୍ୟାଲଞ୍ଜ । ତାଙ୍କରି ଦ୍ୱିତୀୟ ପାଳିର ଅବଗଣନା ଯେବେ ଇତିହାସ କରିବ, ଆଗାମୀ ଦୁଇ ବର୍ଷର ଅଧ୍ୟାୟକୁ ଅନୁଶୀଳନ କରିବ ହିଁ କରିବ।

• ସ୍ମରଜିତ ଆର୍ଯ୍ୟଙ୍କ ରିପୋର୍ଟ