odisha

  • ମାଇନିଂ ସ୍କାମକୁ ନେଇ ରାଜ୍ୟ ସରକାରଙ୍କୁ ଅପରାଜିତାଙ୍କ ଟାର୍ଗେଟ

    ଭୁବନେଶ୍ବର: ଓଡିଶାର ସବୁଠୁ ବଡ଼ ଦୁର୍ନୀତି ହେଉଛି ମାଇନିଂ ସ୍କାମ୍ । ରାଜ୍ୟରେ ହେଉଥିବା ବ୍ୟାପକ ଖଣି ଦୁର୍ନୀତି ପ୍ରସଙ୍ଗରେ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ଶାହା କମିଶନର ସୁପାରିଶ ପରେ ବି ଚୁପ ରହିଛନ୍ତି ସରକାର ।

    ପ୍ରାଇଭେଟ ଖଣି ମାଲିକ ଓ ସରକାରଙ୍କ ମଧ୍ୟରେ କେଉଁ ପ୍ରକାର ଅନୈତିକ ବୁଝାମଣା ହୋଇଛି କି ୩୧ ମାର୍ଚ୍ଚ ୨୦୨୦ରେ ନିଲାମ ହୋଇଥିବା ୨୦ଟି ଖଣିରେ ବ୍ୟାପକ ଦୁର୍ନୀତି ହୋଇଛି । ବର୍ଷ ୧୯ ଓ ୨୦ ମଧ୍ୟରେ ଯେଉଁମାନର ଲୁହା ପଥର ଉତ୍ପାଦନ ହେଉଥିଲା ନିଲାମ ହେବା ପରେ  ୨୧-୨୨ରେ ଲୁହା ପଥର ମାନ ଜାଣିଶୁଣି ଖସାଇ ଦିଆଗଲା ସେ ନେଇ ଅଭିଯୋଗ କରିଛନ୍ତି ସାଂସଦ ।

    ଉଚ୍ଚମାନର ଲୁହା ପଥରକୁ ନିମ୍ନମାନର ଲୁହା ପଥରରେ ପରିଣତ କରି ରପ୍ତାନୀ କରାଗଲା । ୬ଟି ଖଣିରେ ଏହିପରି ହେରଫେରକୁ ନେଇ ସରକାରଙ୍କୁ ଟାର୍ଗେଟ କରିଛନ୍ତି ସାଂସଦ ଅପରାଜିତା । ଏହି ଦୁର୍ନୀତି ପାଇଁ ସରକାରକୁ ବ୍ୟାପକ କ୍ଷତି ହୋଇଥିବା  ଅଭିଯୋଗ ଆଣିଛନ୍ତି ସାଂସଦ । 

  • ଅଶାନ୍ତ ହୋଇଛି ସମୁଦ୍ର

    ବାଲେଶ୍ୱର: ଓଡିଶା ପଶ୍ଚିମବଙ୍ଗ ସୀମାନ୍ତ ଦିଘା ନିକଟରେ ସମୁଦ୍ର ଅଶାନ୍ତ ହୋଇ ୧୫ ଫୁଟର ଉଚ୍ଚର ଜୁଆର ଉଠୁଛି। ଏହି ଜୁଆରରେ ପର୍ଯ୍ୟଟକମାନେ ସମୁଦ୍ରରେ ଖେଳୁଥିବାର ଦେଖିବାକୁ ମିଳିଛି। ଗତକାଲି ପୁର୍ଣ୍ଣିମା ଥିବାରୁ ସମୁଦ୍ର ଅଶାନ୍ତ ହେବା ଫଳରେ ମେରାଇନ ଡ୍ରାଇଭ ରାସ୍ତା ଉପରକୁ ପାଣି ଉଠିଛି। ଯାହାକୁ ଦେଖିବା ପାଇଁ ବହୁ ପଶ୍ଚିମବଙ୍ଗ ଓ ଓଡିଶାର ପର୍ଯ୍ୟଟକମାନେ ଭିଡ ଜମାଇଛନ୍ତି। ସମୁଦ୍ର କୂଳରେ ମଜା ନେଉଥିବା ପର୍ଯ୍ୟଟକମାନଙ୍କୁ ପଶ୍ଚିମବଙ୍ଗ ପୋଲିସ ଡାକ ବାଜି ଯନ୍ତ୍ର ସାହାଯ୍ୟରେ ସମୁଦ୍ର କୁଳରୁ ହଟିବା ପାଇଁ ପ୍ରଚାର କରୁଛି।

  • ଅସହାୟ ହୋଇପଡ଼ିଲେଣି କି ପିସିସି ସଭାପତି?

    ଭୁବନେଶ୍ବର: କମିଟି କରିନାହାନ୍ତି ପିସିସି ସଭାପତି ଶରତ ପଟ୍ଟନାୟକ। କିନ୍ତୁ ଦଳରୁ ନିଲମ୍ୱିତ ନେତା ପିସିସିର ବିଭିନ୍ନ ପଦପଦବୀରେ ଅଛନ୍ତି କହି ଫାଏଦା ଉଠାଇ ଚାଲିଛନ୍ତି। ପିସିସିର ସମ୍ପାଦକ ଓ କ୍ୟାସିଅର କହି ଓଡ଼ିଶା ନିବାସରେ ରୁମ୍ ବୁକିଂ କରିଥିବା କରିତକର୍ମା ନେତା ପ୍ରଦୀପ୍ତ ଦାସଙ୍କ ଏଭଳି କାରନାମାରେ ଯେଭଳି ଶରତଙ୍କୁ କିଛି ଫରକ ପଡ଼ୁନି। ବାସ୍ତବରେ ଦଳ ନାଁରେ ଏଭଳି ମଉକା ଗୋଟାଉଥିବା ନେତାଙ୍କୁ ସାବାଡ଼ କରିବେ ନା ସେମାନଙ୍କର ସୁରକ୍ଷା କବଚ ସାଜିବେ ମୁଖିଆ, ତାକୁ ନେଇ ସବୁଠି ଚର୍ଚ୍ଚା।

    ଅସହାୟ ହୋଇପଡ଼ିଲେଣି କି ପିସିସି ସଭାପତି ଶରତ ପଟ୍ଟନାୟକ? ବିରୋଧୀଙ୍କୁ ମୁକାବିଲା କରିବାକୁ ଅଣ୍ଟା ଭିଡ଼ିଥିବା ଶରତଙ୍କୁ ତ ନିଜ ଦଳର ନେତା ଚୂନ ଲଗାଇବାରେ ବ୍ୟସ୍ତ। ଦଳ ବିରୋଧୀ କାର୍ଯ୍ୟକଳାପ ପାଇଁ ଦଳରୁ ନିଲମ୍ୱିତ ନେତା ପ୍ରଦୀପ୍ତ ଦାସ କିଭଳି ଓଡ଼ିଶା ନିବାସରେ ପିସିସିର ସେକ୍ରେଟାରୀ ଓ କ୍ୟାସିଅର କହି ଗୃହ ବିଭାଗରୁ ରୁମ୍ ବୁକ୍ ପାଇଁ ଅନୁମତି ପାଇଲେ, ତାକୁ ନେଇ ହଇଚଇ ଖେଳିଥିଲା। ନକ୍ଷତ୍ର ନ୍ୟୁଜରେ ଖବର ପ୍ରସାରଣ ପରେ ଉଣା ଅଧିକେ ତୁଙ୍ଗ ନେତାଙ୍କ ଭିତରେ ହଇଚଇ ଖେଳିଥିଲା। ଏପରିକି ଦିଲ୍ଲୀରେ ସେଇ ଓଡ଼ିଶା ନିବାସରେ ଥିବା ଶରତ ପଟ୍ଟନାୟକଙ୍କୁ ପଚାରିଲା ବେଳେ, ସେତେବେଳେ କିଏ କେଉଁବାଟେ ଏମିତି କାରସାଦି କରିଥିଲେ , ସେ କେମିତି ଜାଣିବେ ବୋଲି କହିଥିଲେ। କିନ୍ତୁ ଓଡ଼ିଶା ନିବାସରେ ଶରତଙ୍କୁ ସମ୍ୱର୍ଦ୍ଧନା ବେଳେ ପ୍ରଦୀପ୍ତ ତାଙ୍କ ରୁମ୍‌ରେ ବସିଥିବାର ଫଟୋ ବି ଭାଇରାଲ ହେଉଛି। ଶୁଣନ୍ତୁ କଅଣ କହିଥିଲେ ଶରତ। ଆଉ କଅଣ କହିଥିଲେ ପିସିସି ଅଫିସ ସେକ୍ରେଟାରୀ।

    ଆଉ ଦିଲ୍ଲୀରୁ ଫେରିବା ପରେ ସତ କଅଣ ଓ ପ୍ରଦୀପ୍ତଙ୍କ ଏଭଳି କାରସାଦି ପଛରେ କିଏ ବୋଲି ପଚାରିବାରୁ ଶରତ ସମାନ କଥାକୁ ଦୋହରାଇଛନ୍ତି। କାରଣ ସେତେବେଳକୁ ତୃଣମୂଳସ୍ତରରୁ ନେଇ ଏଆଇସିସି ଯାଏ ଏହାକୁ ନେଇ ଘଣ୍ଟା ଚକଟା ଆରମ୍ଭ ହୋଇସାରିଛି। ନିଲମ୍ୱିତ ନେତାଙ୍କ ଉପରୁ ନିଲମ୍ୱନ ଉଠାଇବାକୁ ଆପାତତଃ ସକରାତ୍ମକ ସଙ୍କେତ ବି ମିଳିସାରିଥିଲା। କିନ୍ତୁ ଏହାରି ଭିତରେ ଅଚାନକ ଦିଲ୍ଲୀରେ ଡେରା ପକାଇ ତୁଙ୍ଗ ନେତାଙ୍କ ପାଖାପାଖି ରହିବା ଓ ପତିଆରା ଦେଖାଇଥିବା ପ୍ରଦୀପ୍ତଙ୍କୁ ଏହା ମହଙ୍ଗା ପଡ଼ିପାରେ। ଶୁଣନ୍ତୁ କଅଣ କହୁଛନ୍ତି ପିସିସି ସଭାପତି।

    ପ୍ରଦୀପ୍ତଙ୍କ ଭଳି ନେତା ଦଳରୁ ନିଲମ୍ୱିତ ହୋଇଛନ୍ତି। କିନ୍ତୁ ଦଳରେ ନାହାନ୍ତି ବୋଲି କହିବା ଭୁଲ୍ ହେବ। ଦିଲ୍ଲୀ ଯିବା, ଦଳୀୟ କାର୍ଯ୍ୟକ୍ରମରେ ସାମିଲ ହେବା ବି ବିଚିତ୍ର କଥା ନୁହେଁ। କାରଣ ଅଧିକାଂଶ ତୁଙ୍ଗ ନେତାଙ୍କ ଜାଣତରେ ଏୟା ହୋଇଥିବ! ଓଡ଼ିଶା ନିବାସରେ ଏକାଠି ରହିବା ଏ କଥାକୁ ସୂଚାଉଛି। କିନ୍ତୁ ପଦପଦବୀରେ ନ ଥାଇ ଏହାର ଦୁରୁପଯୋଗ କରିବା କେତେଦୂର ଯୁକ୍ତିଯୁକ୍ତ, ଏହାକୁ ହାଲୁକା ଭାବେ ନେଲେ କାହାର କ୍ଷତି ହେଉଛି, କିଏ ଘଣ୍ଟ ଘୋଡ଼ାଉଛି, ଭାବିବାର କଥା।

    ସିମ୍ପୁଲ ନାୟକଙ୍କ ସହ ପ୍ରଦୀପ ନାୟକଙ୍କ ରିପୋର୍ଟ

  • କେବେ ହେବ ବନ୍ୟା କ୍ଷୟକ୍ଷତି ଆକଳନ

    ଭୁବନେଶ୍ବର: ବନ୍ୟାକୁ ବିତିଲାଣି ୧୫ ଦିନରୁ ଅଧିକ । ହେଲେ ଏଯାଏଁ ସରିଲାଣି କ୍ଷୟକ୍ଷତି ଆକଳନ । ଯାହାକୁ ନେଇ ସରକାରକୁ ସମାଲୋଚନା କରିଛନ୍ତି ବିରୋଧି । ଆକଳନ ପାଇଁ ଲୋକଙ୍କ ପାଖକୁ ଅଧିକାରି ଯାଉ ନଥିବାର ଅଭିଯୋଗ ଆଣିଛି ବିଜେପି । ସେହିପରି କଂଗ୍ରେସ କହିଛି ମୁଖ୍ୟମନ୍ତ୍ରୀ ଲୋକଙ୍କ ପାଇଁ କାମ ନ କରି ଦିଲ୍ଲୀରେ ନିଜର ଆତ୍ମ ପ୍ରଚାର କରୁଛନ୍ତି । ସେପଟେ ଆଉ ୨ରୁ ୩ ଦିନ ଭିତରେ ରିପୋର୍ଟ ଆସିବ ବୋଲି କହିଛନ୍ତି ରାଜସ୍ୱ ମନ୍ତ୍ରୀ।

    ଅଗଷ୍ଟ ୧୮ ମୁଖ୍ୟମନ୍ତ୍ରୀଙ୍କ ଟ୍ବିଟ ଅନୁଯାୟୀ, ୭ ଦିନ ଭିତରେ ବନ୍ୟା କ୍ଷୟକ୍ଷତି ରିପୋର୍ଟ ଦିଆଯିବା ସହ ୧୫ ଦିନ ଭିତରେ ସହାୟତା ଦେବାକୁ ନିର୍ଦେଶ ହୋଇଥିଲା  । ହେଲେ ୧୫ ଦିନରୁ ଅଧିକ ବିତିଯାଇଥିଲେ ମଧ୍ୟ କ୍ଷୟକ୍ଷତିର ଆକଳନ ସରିନାହିଁ । ବନ୍ୟାରେ କାହାର ଘର ଭୁଷୁଡ଼ି ପଡିଥିବା ବେଳେ ଚାଷୀର ଫସଲ ଧୋଇ ନେଇଛି । ଯାହାକୁ ନେଇ ସରକାରକୁ ଟାର୍ଗେଟ କରିଛନ୍ତି ବିରୋଧି ।

    ହେଲିକେପ୍ଟରରେ ଆକାଶମାର୍ଗରୁ ବୁଲିଲେ ଲୋକଙ୍କ ଦୁର୍ଦଶା ଦୂର ହେବ ନାହିଁ । ଲୋକଙ୍କୁ ସହାୟତା ଆବଶ୍ୟକ ବୋଲି ବିଜେପି କହିଛି । ଏହାସହ କ୍ଷୟକ୍ଷତି ପାଇଁ ଅଧିକାରୀମାନେ ଲୋକଙ୍କ ପାଖକୁ ଯାଉନଥିବା ଅଭିଯୋଗ କରୁଛି ଦଳ । ବନ୍ୟା ମନୁଷ୍ୟକୃତ ବୋଲି ବନ୍ୟାଞ୍ଚଳକୁ ଯାଇଥିବା ବିଜେପି ଅନୁସନ୍ଧାନକାରୀ ଟିମ୍ ଗୁରୁବାର ସରକାରଙ୍କ ବିରୁଦ୍ଧରେ ଅଭିଯୋଗ ଫର୍ଦ୍ଦ ବି ଦାଖଲ କରିଛି। ଏପଟେ ମୁଖ୍ୟମନ୍ତ୍ରୀ ଚାଷୀଙ୍କ ପାଖକୁ ନଯାଇ ଦିଲ୍ଲୀରେ ନିଜର ଆତ୍ମ ପ୍ରଚାର କରୁଛନ୍ତି ବୋଲି ଅଭିଯାଗ ଆଣିଛି କଂଗ୍ରେସ।

    ସେପଟେ ୨୪ ଜିଲ୍ଲା ବନ୍ୟା ଦ୍ୱାରା ପ୍ରଭାବିତ ହୋଇଛି । ସେଥିମଧ୍ୟରୁ ୧୦ ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଛି । ତେଣୁ ବ୍ୟାପକ କ୍ଷୟକ୍ଷତି ହୋଇଥିବା ଜିଲ୍ଲାରୁ ରିପୋର୍ଟ ଆସିବାରେ ଡେରି ହେଉଛି । ବିଶେଷ କରି ଆଉ ୨ରୁ ୩ ଜିଲ୍ଲାରୁ ରିପୋର୍ଟ ଆସିବ । ସେହି ଜିଲ୍ଲାଗୁଡ଼ିକରୁ ରିପୋର୍ଟ ଆସିଲା ପରେ କ୍ଷୟକ୍ଷତିର ସଂପୁର୍ଣ୍ଣ ତାଲିକା ଜଣା ପଡ଼ିବ ବୋଲି ରାଜସ୍ୱ ମନ୍ତ୍ରୀ କହିଛନ୍ତି । ଏହାସହ ଯୁଦ୍ଧକାଳୀନ ଭିତ୍ତିରେ ବିଭିନ୍ନ ସ୍ଥାନରେ ମରାମତି ଚାଲିଥିବା ପଞ୍ଚାୟତିରାଜ ମନ୍ତ୍ରୀ କହିଛନ୍ତି ।

    ତେବେ ଅନେକ ସମୟରେ ଏଯାଏଁ  ଫନି ସହାୟତା ମିଳି ନଥିବା ଅଭିଯୋଗ ହେଉଥିବା ବେଳେ କ୍ଷୟକ୍ଷତି ରିପୋର୍ଟ କେବେ ଆସିବ ଓ ସହାୟତା କେବେ ମିଳିବ ତାକୁ ନେଇ ଚିନ୍ତାରେ ଲୋକେ ….

    ସିମ୍ପୁଲ ନାୟକଙ୍କ ସହ ନବ କିଶୋର ସାହୁଙ୍କ ରିପୋର୍ଟ

  • ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ

    ଭୁବନେଶ୍ୱର: ମେକ୍ ଇନ୍ ଓଡିଶାର ତୃତୀୟ ସଂସ୍କରଣକୁ ସଫଳ କରିବା ସହ ରାଜ୍ୟକୁ କିପରି ଅଧିକ ପୁଞ୍ଜି ଆସିବ ସେନେଇ ଅଣ୍ଟା ଭିଡିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏନେଇ ଆଜି ଦିଲ୍ଲୀ ଗସ୍ତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବିଭିନ୍ନ ଦେଶର ରାଷ୍ଟ୍ରଦୂତ ଓ ଶିଳ୍ପପତି ମାନଙ୍କ ସହ କଥା ହେବେ ନବୀନ। ଏଥିପାଇଁ ୧୬ ରାଷ୍ଟ୍ରର ରାଷ୍ଟ୍ରଦୂତଙ୍କୁ ନିମନ୍ତ୍ରଣ କରାଯାଇଛି। ମେକ୍ ଇନ୍ ଓଡିଶାର ତୃତୀୟ ସଂସ୍କରଣ ପୂର୍ବରୁ ଅଗଷ୍ଟ ୩୧ରେ ବିଭିନ୍ନ ଦେଶର ରାଷ୍ଟ୍ରଦୂତ ଓ ଶିଳ୍ପପତିମାନଙ୍କ ସହ ଦିଲ୍ଲୀରେ କଥା ହେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏଥିପାଇଁ ଦିଲ୍ଲୀରେ ସ୍ୱତନ୍ତ୍ର କାର୍ଯ୍ୟକ୍ରମ ଆୟୋଜନ ହୋଇଛି। କାର୍ଯ୍ୟକ୍ରମକୁ ଆମେରିକା, ବ୍ରିଟେନ, ଜର୍ମାନୀ, ଫ୍ରାନ୍ସ, ଇଟାଲି, ବେଲିଜିୟମ, ସିଙ୍ଗାପୁର, ଜାପାନ ଭଳି ୧୬ ଦେଶରରାଷ୍ଟ୍ରଦୂତଙ୍କୁ ନିମନ୍ତ୍ରଣ କରାଯାଇଛି। ଓଡିଶାରେ ଶିଳ୍ପ ପ୍ରତିଷ୍ଠାର ସୁଯୋଗ ଓ ରାଜ୍ୟ ସରକାରଙ୍କ ଶିଳ୍ପନୀତି ଏବଂ ଇଜ ଅଫ ଡୁଇଙ୍ଗ ବିଜିନେସ ସଂପର୍କରେ କଥା ହେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜ୍ୟରେ କିପରି ଷ୍ଟିଲ, କେମିକାଲ, ପେଟ୍ରୋକେମିକାଲ, ଟେକ୍ସଟାଇଲ, ସି ଫୁଡ ପ୍ରୋସେସିଙ୍ଗ ଭଳି ସେକ୍ଟରରେ ଅଧିକ ବିଦେଶୀ ନିବେଶ ହେବ ତାହାରି ଉପରେ ଫୋକସ କରାଯାଉଥିବା ଶିଳ୍ପ ମନ୍ତ୍ରୀ କହିଛନ୍ତି।

  • ମୁଖ୍ୟମନ୍ତ୍ରୀଙ୍କ ଦ୍ୱାରା କୃତୀ ଛାତ୍ରଛାତ୍ରୀଙ୍କୁ ସମ୍ୱର୍ଦ୍ଧିତ

    ଭୁବନେଶ୍ୱର: ଓଡିଶା ଆଦର୍ଶ ବିଦ୍ୟାଳୟର ଦ୍ୱାଦଶ, ଦଶମ ତଥା ଜେଇଇ ମେନ ପରୀକ୍ଷାର କୃତୀ ଛାତ୍ରଛାତ୍ରୀ ମାନଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକସେବା ଭବନର କନ୍‌ଭେନ୍‌ସନ ସେଣ୍ଟରଠାରେ ଅନୁଷ୍ଟିତ ସ୍ୱତନ୍ତ୍ର ଉତ୍ସବରେ ସମ୍ୱର୍ଦ୍ଧିତ କରିଥିଲେ।

    ଓଡିଶାର ପିଲାମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନ ପାଇଁ ରାଜ୍ୟର ପ୍ରତି ବ୍ଲକ୍‌ରେ ତଥା ଭୁବନେଶ୍ୱରରେ ଗୋଟିଏ ଆଇକନିକ୍ ଆଦର୍ଶ ସ୍କୁଲ ରହିଛି। ସିବିଏସଇ ଢାଞ୍ଚାରେ ଏହି ସ୍କୁଲ ମାନଙ୍କରେ ହଷ୍ଟେଲ ସୁବିଧା ରହିବା ସହିତ ପାଠ ପାଢାଯାଉଛି।

    ଆଜି ସମ୍ୱର୍ଦ୍ଧିତ ହୋଇଥିବା କୃତୀ ଛାତ୍ରଛାତ୍ରୀ ମାନେ ହେଲେ ମୟୁରଭଞ୍ଜ ଜିଲ୍ଲାର ଝରଗାଁ ଆଦର୍ଶ ବିଦ୍ୟାଳୟର ଆଦର୍ଶ ସାହୁ, କୋରାପୁଟ ଜିଲ୍ଲାର କୋଟପାଡ ଆଦର୍ଶ ବିଦ୍ୟାଳୟର ଓମ୍‌ ଆର୍‌ୟାନ ବିଶ୍ୱାଳ, ଗଞ୍ଜାମ ଜିଲ୍ଲାର ପିତାପଲ୍ଲୀ ଆଦର୍ଶ ବିଦ୍ୟାଳୟର ଉତ୍କଳ ପଟ୍ଟନାୟକ, କଳାହାଣ୍ଡି ଜିଲ୍ଲାର ମଶାଣିମୁଣ୍ଡା ଆଦର୍ଶ ବିଦ୍ୟାଳୟର ଦିବେନ୍ଦୁ ସାହାନାଇ, କେନ୍ଦୁଜର ଜିଲ୍ଲାର ସାଳପଡା ଆଦର୍ଶ ବିଦ୍ୟାଳୟର ହେମନ୍ତ ବେହେରା, ଗଞ୍ଜାମ ଜିଲ୍ଲାର ସୋରଡା ଆଦର୍ଶ ବିଦ୍ୟାଳୟର ଶୁଭମ ପ୍ରସାହ ଗୌଡ, ଗଞ୍ଜାମ ଜିଲ୍ଲାର ଶାସନମା ଗାଁ ଆଦର୍ଶ ବିଦ୍ୟାଳୟର ସୁମନ କୁମାରୀ ମହାରଣା, ମୟୁରଭଞ୍ଜ ଜିଲ୍ଲାର ଝରଗାଁ ଆଦର୍ଶ ବିଦ୍ୟାଳୟର ସରିତା ମାର୍ଡି, ମୟୁରଭଞ୍ଜ ଜିଲ୍ଲାର ରାଣିଭୋଳ ଆଦର୍ଶ ବିଦ୍ୟାଳୟର ମାନସ ମହୋଦଧି ପୁର୍ତ୍ତି, କୋରାପୁଟ ଜିଲ୍ଲାର ମାଛରା ଆଦର୍ଶ ବିଦ୍ୟାଳୟର ସ୍ବସ୍ତିକ ଆଦିତ୍ୟ ରଞ୍ଜନ। ଏମାନେ ସମସ୍ତେ ଜେଇଇ ମେନ୍‌ ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି । ସେହିପରି ସିବିଏସଇ ଯୁକ୍ତ ୨ ପରୀକ୍ଷାରେ ଉଲ୍ଲେଖନୀୟ କୃତୀତ୍ୱ ହାସଲ କରିଥିବା ସମ୍ୱର୍ଦ୍ଧିତ ଛାତ୍ରଛାତ୍ରୀମାନେ ହେଲେ, କେନ୍ଦୁଝର ଜିଲ୍ଲାର ସାଳପଡା ଆଦର୍ଶ ବିଦ୍ୟାଳୟର ଇଶାନୀ ବିଶୋଇ, ଗଞ୍ଜାମ ଜିଲ୍ଲାର ସିଦ୍ଧେଶ୍ୱର ଆଦର୍ଶ ବିଦ୍ୟାଳୟର ଏସ୍‌.ଅନୁଭବ ଦୋରା, ଗଞ୍ଜାମ ଜିଲ୍ଲାର କରାପଲ୍ଲୀ ଆଦର୍ଶ ବିଦ୍ୟାଳୟର ଏମ୍‌ ମୋହିତ ରେଡ୍ଡୀ, କୋରାପୁଟ ଜିଲ୍ଲାର କୋଟପାଡ ଆଦର୍ଶ ବିଦ୍ୟାଳୟର ଓମ୍‌ ଆର୍‌ୟାନ ବିଶ୍ୱାଳ, ଗଞ୍ଜାମ ଜିଲ୍ଲାର ସିଦ୍ଧେଶ୍ୱର ଆଦର୍ଶ ବିଦ୍ୟାଳୟର ସିପଦ ଯଜ୍ଞ ପ୍ରସାଦ ଆଚାରୀ। ସେହିପରି ସିବିଏସଇ ଦଶମ ଶ୍ରେଣୀ ପରୀକ୍ଷାରେ ଉଲ୍ଲେଖନୀୟ ସଫଳତା ହାସଲ କରିଥିବା ପିଲାମାନେ ହେଲେ, କଳାହାଣ୍ଡି ଜିଲ୍ଲାର ମୁଷିଗୁଡା ଆଦର୍ଶ ବିଦ୍ୟାଳୟର ସୁଧନ୍ୟା ପତି, ମୟୁରଭଞ୍ଜ ଜିଲ୍ଲାର ଗରୁଡବସା ଆଦର୍ଶ ବିଦ୍ୟାଳୟର ବୈବଶ୍ୱେତା ଆଚାର୍ଯ୍ୟ। ତେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଦର୍ଶ ବିଦ୍ୟାଳୟରେ ସେମାନଙ୍କ ଅନୁଭୂତି ସଂପର୍କରେ ପିଲାମାନଙ୍କୁ ପଚାରି ବୁଝିଥିଲେ ଏବଂ ସେମାନଙ୍କର ଉଜ୍ଜଳ ଭବିଷ୍ୟତ କାମନା କରିଥିଲେ।

    ପିଲାମାନଙ୍କ ସହ ମତ ବିନିୟମ କରି ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଶ୍ରୀ ଭି.କେ. ପାଣ୍ଡିଆନ ଆଦର୍ଶ ବିଦ୍ୟାଳୟରେ କିପରି ଆହୁରି ପ୍ରଭାବଶାଳୀ ଶିକ୍ଷାଦାନ କରାଯାଇପାରିବ ସେ ସମ୍ପର୍କରେ ଛାତ୍ରଛାତ୍ରୀମାନଙ୍କ ମତାମତ ଲୋଡିଥିଲେ। ଅନ୍ୟମାନଙ୍କ ମଧ୍ୟରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ, ଆଦର୍ଶ ବିଦ୍ୟାଳୟ ସଂଗଠନର ଅଧ୍ୟକ୍ଷ ଉପେନ୍ଦ୍ର ତ୍ରିପାଠୀ ପ୍ରମୁଖ ଉଦ୍‌ବୋଧନ ଦେଇଥିଲେ। ବିଭାଗୀୟ ସଚିବ ଶ୍ରୀମତୀ ଅଶ୍ୱଥି ଏସ୍‌ ସ୍ୱାଗତ ଭାଷଣ ଦେଇଥିଲେ।

    ଏହି କାର୍ଯ୍ୟକ୍ରମରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଉନ୍ନୟନ କମିଶନର ଶ୍ରୀ ପ୍ରଦୀପ ଜେନା, ବରିଷ୍ଠ ଅଧିକାରୀ ଏବଂ ସମ୍ୱର୍ଦ୍ଧିତ ଛାତ୍ରଛାତ୍ରୀଙ୍କ ଅଭିଭାବକ ମାନେ ଉପସ୍ଥିତ ଥିଲେ ।

  • ରାଜ୍ୟରେ ଖୋଲିବ ୩୬ ନୂଆ ଥାନା

    ଭୁବନେଶ୍ୱର: ବର୍ଦ୍ଧିତ ଜନସଂଖ୍ୟା ଓ ପ୍ରଶାସନିକ ଆବଶ୍ୟକତାକୁ ଦୃଷ୍ଟିରେ ରଖି ରାଜ୍ୟରେ ଆଉ ୩୬ଟି ନୂଆ ପୋଲିସ ଥାନା ଖୋଲିବା ପ୍ରସ୍ତାବକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି । ଏହି ଥାନା ଗୁଡିକୁ ଶୀଘ୍ର କାର୍ଯ୍ୟକ୍ଷମ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।

    ନୂତନ ଭାବରେ ଖୋଲୁଥିବା ଏହି ନୂଆ ଥାନା ଗୁଡିକ ହେଲା – ଅନୁଗୁଳର ବଗେଡିଆ ଓ ଗୋପାଳପ୍ରସାଦ, ବାଲେଶ୍ବରର ଗୋପଳପୁର ଓ ଅନନ୍ତପୁର, ବରଗଡର ବରଗଡ ଗ୍ରାମାଞ୍ଚଳ, ବ୍ରହ୍ମପୁରର ନିମଖଣ୍ଡି, ବଲାଙ୍ଗୀରର ଲକ୍ଷ୍ମୀଜୋର ଓ ଆଗଲପୁର, ବଉଦର ଘଣ୍ଟାପଡା, ଭୁବନେଶ୍ବର କମିଶନରେଟର ମୈତ୍ରୀ ବିହାର, କଟକ ଗ୍ରାମାଞ୍ଚଳର ମାଣିଆବନ୍ଧ, ଜୋଡୁମ ଓ ଭଦ୍ରେଶ୍ବର, ଦେବଗଡର ଲାଇମୁରା, ଢେଙ୍କାନାଳର ମହାବୀର ରୋଡ, ଗଞ୍ଜାମର ବେଗୁନିଆପଡା ଓ କୋଟିନଡା, ଜଗତସିଂପୁରର କୃଷ୍ଣନନ୍ଦପୁର, ଯାଜପୁରର ଅଳକୁଣ୍ଡ, ବ୍ରହ୍ମବରଦା ଓ ଦଶରଥପୁର, ଝାରସୁଗୁଡାର ଏୟାରପୋର୍ଟ ପୋଲିସ ଷ୍ଟେସନ, କଳାହାଣ୍ଡିର କରଲାପାଟ, କଲାମପୁର, କେନ୍ଦ୍ରାପଡାର ପଟାମୁଣ୍ଡାଇ ଗ୍ରାମାଞ୍ଚଳ, କୁଦାନଗରୀ କୋରୁଆ, କେନ୍ଦୁଝରର ମନୋହରପୁର, ଖୋର୍ଦ୍ଧାର ନାଚୁଣୀ, କୋରାପୁଟର ସୁଙ୍କି, ମାଲକାନଗିରିର ମାଲକାନଗିରି ସଦର କୋରକୁଣ୍ଡା, ମୟୁରଭଞ୍ଜର ଭଞ୍ଜପୁର, ନଗରଂଗପୁର ମଇଦଲପୁର, ପୁରୀର ଚାରିଛକ, ରାୟଗଡାର ରାମନାଗୁଡା, ସମ୍ବଲପୁରର ବରେଇପାଲି ଏବଂ ସୁବର୍ଣ୍ଣପୁରର ଲଚ୍ଛିପୁର ଥାନା ।

    ଏ ସମସ୍ତ ନୂଆ ଥାନାଗୁଡିକ ବର୍ତ୍ତମାନ ଥିବା ଥାନାର ବିଭକ୍ତୀକରଣ ତଥା ଫାଣ୍ଡିଗୁଡିକର up-gradation କରାଯାଇ ସୃଷ୍ଟି କରାଯାଇଛି । ଏହି ନୂତନ ଥାନା ଗୁଡିକ ନିମନ୍ତେ inspector ଠାରୁ ଆରମ୍ଭ କରି କନଷ୍ଟେବଳ ପର୍ଯ୍ୟନ୍ତ ବିଭିନ୍ନ ପାହ୍ୟା ରେ ୫୬୩ଟି ନୁଆ ପଦବୀ ସୃଷ୍ଟି କରାଯାଇଛି. ଏହି ନୁଆ ୩୬ଟି ଥାନା ପ୍ରତିଷ୍ଠା ହେଵା ଦ୍ବାରା ଜନସାଧାରଣଙ୍କୁ ଉତ୍ତମ ପୋଲିସ ସେବା ଯୋଗାଇ ଦେବା ଦିଗରେ ଓଡିଶା ପୋଲିସର ଉଦ୍ୟମ ଆହୁରି ଶକ୍ତିଶାଳୀ ହେବ ବୋଲି ମୁଖ୍ୟମନ୍ତ୍ରୀ ଆଶାବ୍ୟକ୍ତ କରିଛନ୍ତି ।

    
    
         

  • ଆନ୍ଧ୍ରରେ ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପ!

    କୋରାପୁଟ: ରାଜ୍ୟ ସରକାରର ଅବହେଳା, ପାଠ୍ୟ ପୁସ୍ତକରେ ଛପାଯାଇଛି ଭୁଲ ତଥ୍ୟ, କିନ୍ତୁ ନଜର ନାହିଁ ସରକାରଙ୍କର। ଏହାକୁ ନେଇ ଦେଖାଦେଇଛି ବିବାଦ। କୋରାପୁଟ ଜିଲ୍ଲାର ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପକୁ ନେଇ ଉଠିଛି ବିଭାଦ। କେଉଁଠି ଅଛ ମାଛକୁଣ୍ଡ ଜଳ ବିଦ୍ୟୁତ୍ ପ୍ରକଳ୍ପର ଉତ୍ତର ପାଠ୍ୟ ପୁସ୍ତକରେ ଛପା ଯାଇଛି ଆନ୍ଧ୍ର ପ୍ରଦେଶ।

    କୋରାପୁଟର ମାଛକୁଣ୍ଡ ଜଳ ବିଦ୍ୟୁତ୍ ପ୍ରକଳ୍ପ ଆନ୍ଧ୍ରରେ ଥିବା ଦଶମ ଶ୍ରେଣୀର ଭୂଗୋଳ ଓ ଅର୍ଥନୀତି  ବହିରେ ଛପା ଯାଇଛି । ବହିର ମୁଖ୍ୟ ପୃଷ୍ଠା ଓ ୬୯ ପୃଷ୍ଠାରେ ଭାରତର ମୁଖ୍ୟ ଜଳ ବିଦ୍ୟୁତ ଶକ୍ତି କେନ୍ଦ୍ର ତାଲିକା ରହିଛି । ଏହି ତାଲିକାରେ ରାଜ୍ୟ ଅନୁସାରେ ଜଳ ବିଦ୍ୟୁତ କେନ୍ଦ୍ର ଗୁଡିକର ନାମ ଲେଖାଯାଇଥିବା ବେଳେ କ୍ରମିକ ନମ୍ବର 1ରେ ରହିଥିବା ଆନ୍ଧ୍ରପ୍ରଦେଶରେ  ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପ ରହିଥିବା ଉଲ୍ଲେଖ ରହିଛି ।

    ଏଭଳି ଏକ ସଂଗୀନ ତ୍ରୁଟି ପ୍ରତି ନାହିଁ ଗଣଶିକ୍ଷା ବିଭାଗର ନିଘା। ଏହା ଜଣାପଡିବା ପରେ ବୁଦ୍ଧିଜୀବୀ ମହଲରେ ଅସନ୍ତୋଷ ଦେଖାଦେଇଛି। ବହି ଛପାଯିବା ପରେ ଏହାର ପ୍ରୁଫ ରିଡିଂ ହେଉଛି କି ନାହିଁ ତାକୁ ନେଇ ପ୍ରଶ୍ନ ଉଠିଛି। ସରକାର ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳ ଖେଳୁଥିବା ଅଭିଯୋଗ ଉଠିଲାଣି।

  • ବନ୍ୟା ଟଳିଛି। ହେଲେ ବିପନ୍ନଙ୍କ ଦୁର୍ଦ୍ଦଶା ଯାଇନି

    ବନ୍ୟା ଟଳିଛି। ହେଲେ ବିପନ୍ନଙ୍କ ଦୁର୍ଦ୍ଦଶା ଯାଇନି। ଏବେ ବି ବିପନ୍ନ ଦହଗଞ୍ଜ ହେଉଛନ୍ତି। ତେବେ ବିପନ୍ନଙ୍କ ପାଖକୁ ନେତାଙ୍କ ସୁଅ ଛୁଟିଛି। ବାଲେଶ୍ୱର ଜିଲ୍ଲାରେ ବନ୍ୟା ପରିସ୍ଥିତି ଲାଗି ମନ୍ତ୍ରୀ ପ୍ରତାପ ଦେବ ସେଠାରେ ଡେରା ପକାଇ ବସିଛନ୍ତି। ବୈତରଣୀରେ ଦ୍ୱିତୀୟ ବନ୍ୟା ଲାଗି ଗାଁ ଦାଣ୍ଡରେ ଏବେ ବି ଆଣ୍ଠୁଏ ପାଣି ଚାଲୁଛି। ସେପଟେ ପ୍ରଭାବିତ ଅଞ୍ଚଳକୁ ବିଭିନ୍ନ ଦଳର ନେତା ଗସ୍ତ କରୁଛନ୍ତି। ଏବେ ବି ଘର ଭିତରେ ଆଣ୍ଠୁଏ ପାଣି। ଗାଁ ଦାଣ୍ଡରେ ଲହଡ଼ି ମାରୁଛି। ପାଣି ମୁନ୍ଦେ ପାଇଁ ଲୋକେ ଡହଳବିକଳ। ରିଲିଫ ଖାଦ୍ୟକୁ ଭରସା କରି ଭୋକ ମେଣ୍ଟାଉଛନ୍ତି। ପାଣି ଘେରରେ ଥିବା କଣାସ ବ୍ଲକର ଦୋକନ୍ଦା ଗ୍ରାମବାସୀଙ୍କ ଏ ଦୁର୍ଦ୍ଦଶା। ବିଜିପୁର ପଞ୍ଚାୟତ ବୁଲି ସ୍ଥିତି ପରଖିଛନ୍ତି ପ୍ରଶାସନିକ ଅଧିକାରୀ ଓ ସ୍ଥାନୀୟ ସରପଞ୍ଚ।

    ସେପଟେ ବିଜେପି ନେତା ସମ୍ୱିତ ପାତ୍ର ଅନ୍ୟ ବରିଷ୍ଠ ନେତାଙ୍କ ସହ କଣାସର ବନ୍ୟା ପ୍ରଭାବିତ ଗାଁକୁ ଯାଇ ସ୍ଥିତି ଦେଖିବା ସହ ବିପନ୍ନଙ୍କୁ ରନ୍ଧା ଖାଦ୍ୟ ବାଣ୍ଟିଛନ୍ତି। ଅପରାହ୍ନରେ ଏସଆରସିଙ୍କୁ ଭେଟି ଗ୍ରାଉଣ୍ଡର ବାସ୍ତବତା ଓ ପ୍ରଶାସନିକ ବିଫଳତାକୁ ନେଇ ଦୃଷ୍ଟି ଆକର୍ଷଣ କରିଛନ୍ତି। ବୈତରଣୀର ଜଳସ୍ତର କମିବା ପରେ ଭଣ୍ଡାରିପୋଖରୀ ବ୍ଲକର ମମାଦୁଲା ଓ ପଙ୍ଗଟା ଉପର ସାହିରେ ହୋଇଥିବା ଘଳିଆକୁ ମରାମତି କରାଯାଇଛି। ବାଲି ବସ୍ତା ପକାଇ ଅଟକାଯାଇଛି। ଧାମନଗର, ତିହିଡି ଓ ଚାନ୍ଦବାଲି ବ୍ଲକର ଅନେକ ଗାଁ ଏବେ ବି ଜଳବନ୍ଦୀ। ଅର୍ଜୁନପୁର ପଞ୍ଚାୟତ ପକ୍ଷରୁ ଶୁଖିଲା ଖାଦ୍ୟର ବ୍ୟବସ୍ଥା ହୋଇଛି। ବାଙ୍କି ରତାଗଡ଼ ପଞ୍ଚାୟତରେ ବନ୍ୟା ବିପନ୍ନଙ୍କ ଦୁର୍ଦ୍ଦଶା ବଢିଛି। ହୁଳୁହୁଳା ପୋଲ ଦେଇ ମହାନଦୀର ପଛୁଆ ପାଣି ପଶିଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।

    ଯାଜପୁର ଜିଲ୍ଲା ଦଶରଥପୁର ବନ୍ୟାଞ୍ଚଳ ବୁଲିଛନ୍ତି କଂଗ୍ରେସ ନେତା ପଞ୍ଚାନନ କାନୁନଗୋ। କାଣୀ ନଦୀରେ ଘାଇକୁ ସରକାରୀ ଘାଇ ବୋଲି କହିଛନ୍ତି ପଞ୍ଚାନନ। ସେପଟେ ସୁବର୍ଣ୍ଣରେଖାରେ ବନ୍ୟା ଆସିଥିବାରୁ ବାଲେଶ୍ୱର ଜିଲ୍ଲାରେ ଡେରା ପକାଇଛନ୍ତି ମନ୍ତ୍ରୀ ପ୍ରତାପ ଦେବ। ବାଲିଆପାଳ ବ୍ଲକର ୧୯ଟି ପଞ୍ଚାୟତ କ୍ଷୟକ୍ଷତି ହୋଇଛି। ୪୦ଟି ବୋଟ୍ ମହଜୁଦ ରଖିବା ସହ ୫୦ଟି ସେଣ୍ଟରରେ ଲୋକଙ୍କୁ ରଖି ରନ୍ଧାଖାଦ୍ୟ ଦିଆଯାଉଛି। ବନ୍ୟାପାଣି କମିଲେ କ୍ଷୟକ୍ଷତିର ଆକଳନ ହେବ ବୋଲି କହିଛନ୍ତି ମନ୍ତ୍ରୀ। ଜରୁରୀକାଳୀନ ସ୍ଥିତିର ମୁକାବିଲା ପାଇଁ ବାଲେଶ୍ୱର ଜିଲ୍ଲାପାଳଙ୍କୁ ଏସଆରସି କ୍ଷମତା ଦେଇଛନ୍ତି ରାଜ୍ୟ ସରକାର। ବନ୍ୟା ସ୍ଥିତି ଆହୁରି ୩ ଦିନ ଲାଗି ରହିବ ବୋଲି କୁହାଯାଉଛି। ତା ପଛକୁ ମଙ୍ଗଳବାରରୁ ପୁଣି ବର୍ଷା ବିପନ୍ନଙ୍କ ବିପତ୍ତି ବଢ଼ାଇଦେବ ବୋଲି କୁହାଯାଉଛି।

    • ଭଣ୍ଡାରିପୋଖରୀରୁ ସତ୍ୟବ୍ରତ, ବାଙ୍କିରୁ ମନୋଜ, ପିପିଲିରୁ ସନ୍ତୋଷ, ଭୁବନେଶ୍ୱରରୁ ସ୍ୱରୂପା ଓ ପ୍ରଦୀପ ନାୟକଙ୍କ ରିପୋର୍ଟ
  • କମୁନି ବନ୍ୟା ବିପନ୍ନଙ୍କ ଦୁର୍ଦ୍ଦଶା

    ଭୁବନେଶ୍ବର: ବନ୍ୟା ବିପନ୍ନଙ୍କ ଦୁର୍ଦ୍ଦଶା କମୁନି। ପାଣି ଘେରରେ ଆଜି ବି ଅନେକ ଗାଁ। ବାହ୍ୟ ଜଗତରୁ ବିଛିନ୍ନ ଅନେକ ପଞ୍ଚାୟତ। ଡଙ୍ଗା ନଥିବାରୁ ଲୋକଙ୍କ ପାଖରେ ରିଲିଫ ସାମଗ୍ରୀ ବି ପହଞ୍ଚିପାରୁନି ଅନେକ ଜାଗାରେ। ଭୋକ ଓପାସରେ ଦିନ କାଟୁଛନ୍ତି ବିପନ୍ନ। ପିଲାଛୁଆଙ୍କୁ ଧରି ଅତି ଦୟନୀୟ ଅବସ୍ଥାରେ ଅଛନ୍ତି ବିପନ୍ନ।

    ଗଲା ୫ ଦିନ ଧରି ରିଲିଫକୁ ଚାତକ ଭଳି ଚାହିଁ ବସିଛନ୍ତି ବନ୍ୟା ବିପନ୍ନ। କାରଣ ଏବେ ବି ଲୋକେ ଜଳବନ୍ଦୀ। ପାଣି ଛାଡ଼ିନି ଗାଁରୁ। ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକର ପୋରଗଦେଇ ପଞ୍ଚାୟତରେ ବିପନ୍ନଙ୍କ ଦୁର୍ଦ୍ଦଶା ଦେଖିଲେ ଏହା ଜଳ ଜଳ କରି ଦିଶୁଛି। ଘରର ଛାତ ଉପରେ ଆଶ୍ରୟ ନେଇଛି ପିଲାଛୁଆଙ୍କୁ ଧରି ବିପନ୍ନ। ଘର ଭିତରେ ଆଣ୍ଠୁଏ ପାଣି। ରୋଷେଇ କରି ଖାଇବା ବି ସମ୍ଭବ ନୁହେଁ। ଏଭଳି ସ୍ଥଳେ ସରପଞ୍ଚ କହୁଛନ୍ତି, ଲୋକଙ୍କୁ ରିଲିଫ ଦିଆଯାଇଛି। ଆଉ ବିପନ୍ନ କହୁଛନ୍ତି କିଛି ମିଳିନି। ପିଲା ଛୁଆଙ୍କୁ ଧରି ଆଉ କେତେଦିନ ଭୋକ ଓପାସରେ ରହିବୁ ବୋଲି ଭାବବିହ୍ୱଳ ହୋଇଛନ୍ତି ବିଲକୋଲର  ବିପନ୍ନ।

    କେନ୍ଦ୍ରାପଡ଼ା ଜିଲ୍ଲାର ମହାକାଳପଡ଼ା ସମେତ ପାଟକୁରାରେ ଜଳବନ୍ଦୀ ଥିବା ବିପନ୍ନଙ୍କ ପାଖରେ ସରକାରୀ ସହାୟତା ପହଞ୍ଚି ପାରିନଥିବାରୁ ପ୍ରଶାସନର ଅବହେଳାକୁ ନେଇ ଅସନ୍ତୋଷ ବଢ଼ୁଛି। ମାର୍ଶାଘାଇର ଆଇତପୁର, ଗରଦପୁରର ବଙ୍ଗାଳପୁର ଓ ପାଟକୁରାର ପଦ୍ମପୁରରେ ବନ୍ୟା ପ୍ରକୋପରେ ପୀଡ଼ିତ ବିପନ୍ନଙ୍କୁ ଯଦିଓ ସୁରକ୍ଷିତ ସ୍ଥାନକୁ ନିଆଯାଇଛି। କିନ୍ତୁ ଆଶ୍ରୟସ୍ଥଳୀରେ ବି ପାଣି ପଶିଛି। ଶୁଖିଲା କି ରନ୍ଧା ଖାଦ୍ୟ ବି ମିଳୁନଥିବାର ଅଭିଯୋଗ ହେଉଛି। ଗୃହପାଳିତ ପଶୁଙ୍କ ଅବସ୍ଥା ନ କହିବା ଭଲ। ଏବେକାର ଲଗାଣ ବର୍ଷା ପୁଣି ଜଳବନ୍ଦୀଙ୍କ ଚିନ୍ତା ବଢାଇଦେଇଛି।

    ପୁରୀ ଜିଲ୍ଲାରେ ବିପନ୍ନଙ୍କ ଦୁର୍ଦ୍ଦଶା ତ ବଳି ପଡ଼ିଲାଣି। ଗାଁଗଣ୍ଡାରୁ ବଳିଗଲାଣି ପୁରୀ ପୌରପାଳିକା ଜଳବନ୍ଦୀଙ୍କ ଦୁର୍ଦ୍ଦଶା। ସୁଜାତାନଗର ବାସିନ୍ଦା ୩ ଦିନ ହେଲା ଜଳବନ୍ଦୀ। କୌଣସି ବୋଟ୍‌ର ବ୍ୟବସ୍ଥା ହୋଇନଥିଲା ବେଳେ ଲୋକଙ୍କ ଚଳପ୍ରଚଳ ଲାଗି ମାତ୍ର ଗୋଟିଏ ଡଙ୍ଗା ହିଁ ସାହାରା ସାଜିଛି। ଆଉ ପିପିଲି, ନିମାପଡ଼ା, ଗୋପ୍ ବ୍ଲକରେ ବିପନ୍ନଙ୍କ ଦୁର୍ଦ୍ଦଶା ବି ବଢିଛି। କୁଶଭଦ୍ରା ଓ ଧନୁଆ ନଦୀ ବନ୍ୟା ଜଳରେ ଗୋପ ବ୍ଲକ୍ ର ଶତାଧିକ ଗାଁ ଜଳବନ୍ଦୀରେ। ନିମାପଡା ବଳଙ୍ଗା ରାସ୍ତାର ଧନୁଆ ଉପରେ ୩ ଫୁଟରୁ ଅଧିକ ପାଣି ଚାଲୁଥିଲା। ଏପଟେ ସରକାରୀ ରିଲଫ୍ ନ ପାଇ କ୍ଷତିଗ୍ରସ୍ତଙ୍କ ଆଖିରୁ ଲୁହ ଶୁଖୁନି। ଗୋପ ବ୍ଲକ୍ ଅଣ୍ଡରା- ଇଛାପୁର ପଞ୍ଚାୟତର ଗବଶିଙ୍ଗା ଗାଁରେ ବିପନ୍ନଙ୍କ ଉପରେ ବି ସମଦଶା ପଡ଼ିଛି। ପ୍ରଶାସନର ସାହାଯ୍ୟ ଓ ସହଯୋଗକୁ ଅନାଇ ବସିଛନ୍ତି।

    ବଢ଼ି ବିପତ୍ତି ଯେମିତି ବିପନ୍ନଙ୍କ ପାଇଁ କାଳ ସାଜିଛି। ଏବେ ବି ଅନେକ ଗାଁ ବାହ୍ୟ ଜଗତରୁ ବିଛିନ୍ନ। ପ୍ରଶାସନର ସହାୟତା ପହଞ୍ଚିପାରୁନି। ଯାହାକି ବିଡ଼ମ୍ୱନା।

Back to top button