ଚମ୍ୱଲ ନଦୀ କୂଳରେ ଗାଧୋଇବାକୁ ଯାଇଥିବା ବେଳେ ୧୦ ବର୍ଷର ଛୁଆକୁ ଗିଳିଦେଲା କୁମ୍ଭୀର। ଗ୍ରାମବାସୀ ଉକ୍ତ କୁମ୍ଭୀରକୁ ଜାଲ ପକାଇ ଧରିଥିଲେ। ଧରାପଡିବା ପରେ କୁମ୍ଭୀର ପେଟ ଭିତରୁ ପୁଅକୁ ଜୀବିତ ବାହାର କରିବାକୁ ଗ୍ରାମବାସୀ ଜିଦ୍ ଧରିଥିଲେ। ଏଭଳି ଏକ ଅଭାବନୀୟ ଘଟଣା ଘଟିଛି ମଧ୍ୟପ୍ରଦେଶରେ। କୁମ୍ଭୀରଟି ବାଳକଟିକୁ ଗିଳିଦେବା ପରେ ସମ୍ପୃକ୍ତ ଅଞ୍ଚଳରେ ଚାଞ୍ଚଲ୍ୟଖେଳି ଯାଇଛି। ଏକଠାର ସୈପୁରସ୍ଥିତ ଚମ୍ୱଲ ନଦୀରେ ସୋମବାର ସକାଳେ ଜଣେ ୧୦ ବର୍ଷର ନାବାଳକ ଗାଧୋଉଥିବା ବେଳେ କୁମ୍ଭୀରଟି ଛକି ହୋଇ କୂଳରେ ରହିଥିଲା। ଏହାପରେ କୁମ୍ଭରଟି ବାଳକକୁ ନଦୀ ମଝିକୁ ଟାଣି ନେଇଯାଇଥିଲା। ସେଠାରେ ଉପସ୍ଥିତ ଥିବା ସ୍ଥାନୀୟ ଲୋକ ଏହାକୁ ଦେଖି ଘର ଲୋକଙ୍କୁ ଖବର ଦେଇଥିଲେ। ଘଟଣା ସ୍ଥଳରେ ପରିବାର ଲୋକ ଏବଂ ସ୍ଥାନୀୟ ଲୋକେ ମିଶି ଜାଲ ବିଛେଇ କୁମ୍ଭୀରଟିକୁ ଧରିବାରେ ସଫଳ ହୋଇଥିଲେ।
ଖବର ପାଇ ଘଟଣା ସ୍ଥଳରେ ବନ ବିଭାଗ ଅଧିକାରୀ ଓ ପୁଲିସ ବିଭାଗ ପହଞ୍ଚି ଥିଲେ। ବନ ବିଭାଗ ଅଧିକାରୀ ଗ୍ରାମବାସୀଙ୍କୁ କୁମ୍ଭୀରଟିକୁ ଛାଡିବା ପାଇଁ କହିଥିଲେ କିନ୍ତୁ ସେମାନେ ରାଜି ହୋଇନଥିଲେ। ପରିବାର ଲୋକ କୁମ୍ଭୀର ପାଟି ଭିତରୁ ବାଳକଟିକୁ ବାହର କରିବା ପରେ ଯାଇ ସେମାନେ କୁମ୍ଭୀରଟିକୁ ଛାଡିବେ ବୋଲି ଅଡି ବସିଥିଲେ। ଗ୍ରାମବାସୀ କହିଛନ୍ତି ଯେ, ପିଲାଟି କୁମ୍ଭୀର ପେଟରେ ଅଛି। । କୁମ୍ଭୀର ପାଟିରେ ଗ୍ରାମବାସୀ ଏକ ବଡ ବାଉଁସ ଦେଇଥିଲେ। ଗ୍ରାମବାସୀ ବିଳମ୍ୱିତ ରାତି ପର୍ଯ୍ୟନ୍ତ କୁମ୍ଭୀରକୁ ବାନ୍ଧି ଚମ୍ୱଲ ନଦୀ କୂଳରେ ପିଲାଟି କୁମ୍ଭୀର ପେଟରୁ ବାହାରିବା ଅପେକ୍ଷାରେ ବସି ରହିଥିଲେ। ରଘୁନାଥପୁର ପୋଲିସ ଷ୍ଟେସନ ଦାୟୀତ୍ୱରେ ଥିବା ଶ୍ୟାମବୀର ସିଂ ତୋମାରଙ୍କ ଠାରୁ ମିଳିଥିବା ସୂଚନା ଅନୁଯାୟୀ, ପିଲାଟି ନଦୀକୁ ଗାଧୋଇବାକୁ ଯାଇଥିବା ବେଳେ କୁମ୍ଭୀରଟି ପାଣି ଭିତରକୁ ଟାଣି ନେଇଥିବା କଥା ଗ୍ରାମବାସୀ କହିଛନ୍ତି।
ଏହାର ତଦନ୍ତ ଜାରି ଅଛି ବୋଲି ପୋଲିସ ଅଧିକାରୀ କହିଛନ୍ତି। ସେପଟେ ଘଟଣାର କିଛି ସମୟ ପରେ ପରିବାର ଲୋକେ ଏବଂ ସର୍ମ୍ପକୀୟ ମିଶି ବାଳକକୁ ଖୋଜାଖୋଜି କରିଥିଲେ। କିନ୍ତୁ ପିଲାଟି କେଉଁଠି ମିଳିନଥିଲା। ଏହାସହ SDRF ଟିମ୍ ମଧ୍ୟ ବାଳକର ସନ୍ଧାନରେ ନିୟୋଜିତ ଅଛନ୍ତି। କିନ୍ତୁ ଏପର୍ଯ୍ୟନ୍ତ କୌଣସି ସନ୍ଧାନ ମିଳିନାହିଁ। ଅଧିକାରୀ କହିଛନ୍ତି ଯେ, ଯଦି କୁମ୍ଭୀରଟି ବାଳକ ଉପରେ ଆକ୍ରମଣ କରିଛି, ତେବେ ସେ ଟିକେ ଖାଇବା ପରେ ତାଙ୍କୁ ଛାଡି ଦେଇଥାଏ।
- ଶୁଭଲକ୍ଷ୍ମୀ ସାହୁଙ୍କ ରିପୋର୍ଟ