SUPREME COURT

  • ଫେବୃଆରୀ ୩ରେ ଦିଲ୍ଲୀ ମେୟର ନିର୍ବାଚନ ଉପରେ ଶୁଣାଣି

    ନୂଆଦିଲ୍ଲୀ: ଆମ ଆଦମୀ ପାର୍ଟିର ମେୟର ପ୍ରାର୍ଥୀ ସେଲି ଓବେରଏଙ୍କ ଦ୍ବାରା ମେୟର ନିର୍ବାଚନ ସମୟ ମଧ୍ୟରେ କରିବା ଦାବି ନେଇ ହୋଇଥିବା ଆବେଦନକୁ ଗ୍ରହଣ କରିବା ସହ ଏହାର ଶୁଣାଣି ଫେବୃଆରୀ ୩ ତାରିଖରେ କରିବାକୁ ସ୍ଥିର କରିଛନ୍ତି ସୁପ୍ରିମ କୋର୍ଟ। ମୁଖ୍ୟ ବିଚାର ପତି ଡି ୱାଇ ଚନ୍ଦ୍ରଚୂଡ ଓ ଜଷ୍ଟିସ ଦିପଙ୍କର ଦତ୍ତାଙ୍କ ଖଣ୍ଡପୀଠ ମାମଲାର ଶୁଣାଣି କରିବେ। ଆବେଦନକାରୀଙ୍କ ପକ୍ଷରୁ ଓକିଲ ମନୁ ସିଂଘବି ମାମଲାର ତୁରନ୍ତ ସୁଣାଣି କରିବାକୁ କୋର୍ଟଙ୍କୁ ଅନୁରୋଧ କରିଥିଲେ।

    ଦିଲ୍ଲୀ ମେୟର ନିର୍ବାଚନ ପାଇଁ ଦୁଇ ଦୁଇ ଥର ଦିନ ଧାର୍ଯ୍ୟ ହୋଇଥିଲେ ମଧ୍ୟ ବିଜେପି ଓ ଆପ କାଉନସିଲରଙ୍କ ଭିତରେ ଦେଖାଦେଉଥିବା ଗଣ୍ଡଗୋଳ ପାଇଁ ଏହାକୁ ବନ୍ଦ କରିବାକୁ ହୋଇଛି। ଗତ ଜାନୁଆରୀ ୨୪ ତାରିଖରେ ଦିଲ୍ଲୀ ଏଲଜିଙ୍କ ଅଧ୍ୟକ୍ଷତାରେ ନିର୍ବାଚନ ହେଉଥିବା ବେଳେ କିଛି କାଉନସିଲରଙ୍କ ହଟଗୋଳ ପାଇଁ ଏଲଜି ଏହି ପ୍ରକ୍ରିୟାକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରି  ଦେଇଥିଲେ।

    ଏହାକୁ ନେଇ ଆପ ମେୟର ପ୍ରାର୍ଥୀ ସେଲି ଓବେରଏ ଓ ଗୃହର ନେତା ମୁକେଶ ଗୋଏଲ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ ଗୁରୁବାର। ମେୟର ନିର୍ବାଚନ ଏକ ସମୟ ସୀମା ଭିତରେ କରିବାକୁ ଆପ ନେତା କୋର୍ଟଙ୍କୁ ନିର୍ଦ୍ଦେଶ ଦେବାକୁ ଆବେଦନ କରିଥିଲେ।

    ସୂଚନାଯୋଗ୍ୟ ଗତ ସେପ୍ଟେମ୍ବର ମାସରେ ଏମସିଡି ନିର୍ବାଚନରେ ଆପ ମୋଟ ୨୫୦ ୱାର୍ଡରୁ ୧୩୪ ୱାର୍ଡକୁ କବଜା କରିଥିବା ବେଳେ ବିଜେପି ୧୦୪ଟି ୱାର୍ଡ ହାତେଇଥିଲା।

  • ପୀଡିତଙ୍କୁ ମିଳୁନି କ୍ଷତିପୂରଣ

    () ପୀଡିତଙ୍କୁ କ୍ଷତିପୂରଣ ମିଳୁନି। ବିଶେଷ କରି ମଧ୍ୟପ୍ରଦେଶ, ଉତ୍ତରପ୍ରଦେଶ, ବିହାର ଓ ଦିଲ୍ଲୀ ସରକାରଙ୍କ ସମେତ କେନ୍ଦ୍ର ସରକାରଙ୍କଠୁ ଏ ନେଇ ରିପୋର୍ଟ ତଲବ କରିଛନ୍ତି ସୁପ୍ରିମକୋର୍ଟ। ଯୌନ ଅପରାଧରେ ପୀଡ଼ିତାଙ୍କୁ ନାଲସା ୨୦୧୮ ପୀଡ଼ିତ କ୍ଷତିପୂରଣ ସ୍କିମରୁ ବଞ୍ଚିତ କରାଯାଉଥିବା ନେଇ ଏକ ଏନଜିଓ ସୋସିଆଲ ଆକ୍ସନ ଫୋରମ ଫର୍ ମାନବ ଅଧିକାର ସଂଗଠନ କୋର୍ଟର ଦ୍ୱାରସ୍ଥ ହୋଇଛି।

    ପୀଡ଼ିତ ଯିଏ କି କୌଣସି ଅପରାଧର ଶୀକାର ହୋଇ କ୍ଷତି ସହିଥିବେ ବା ଆଘାତପ୍ରାପ୍ତ ହୋଇଥିବେ। ସେମାନଙ୍କ ଲାଗି ପୂର୍ଣ୍ଣ ଥଇଥାନ ବ୍ୟବସ୍ଥା କରାଯାଇଛି। ହତ୍ୟାର ଶୀକାର ହୋଇଥିବା ପୀଡ଼ିତର ପରିବାରବର୍ଗକୁ ବି ନିର୍ଭରଶୀଳ ବର୍ଗରେ ରଖି ସରକାର କ୍ଷତିପୂରଣ ଦେବାର ବ୍ୟବସ୍ଥା କରିଛନ୍ତି। ଏହି ପାଣ୍ଠିରୁ ପୀଡ଼ିତଙ୍କୁ ଆର୍ଥିକ ସହାୟତା, ଆବଶ୍ୟକୀୟ ସେବା ଯଥା ଆଶ୍ରୟ, ପରାମର୍ଶ, ସ୍ୱାସ୍ଥ୍ୟ ସହାୟତା, ଆଇନଗତ ପରାମର୍ଶ, ଶିକ୍ଷା ଓ ବୃତ୍ତିଗତ ତାଲିମ ଦେବାର ବ୍ୟବସ୍ଥା କରାଯାଇଥାଏ।

    କିନ୍ତୁ ନାସନାଲ ଲିଗାଲ ସର୍ଭିସ ଅଥୋରିଟିଙ୍କର ପୀଡ଼ିତ କ୍ଷତିପୂରଣ ଯୋଜନାରୁ ଅନେକ ବଞ୍ଚିତ। ମଧ୍ୟପ୍ରଦେଶ, ୟୁପି, ବିହାର ଓ ଦିଲ୍ଲୀରେ ଯୌନ ଅପରାଧର ଶୀକାର ପୀଡ଼ିତାଙ୍କୁ ଏ ଯାଏ କ୍ଷତିପୂରଣ ମିଳିନି କହି ସୁପ୍ରିମକୋର୍ଟର ଦ୍ୱାରସ୍ଥ ହୋଇଛି ସୋସିଆଲ ଆକ୍ସନ ଫୋରମ ଫର୍ ମାନବ ଅଧିକାର ନାମକ ଏନଜିଓ। ନାସନାଲ କ୍ରାଇମ ରେକର୍ଡ ବ୍ୟୁରୋ ତଥ୍ୟ ଅନୁସାରେ ଦୁଷ୍କର୍ମ ସମ୍ୱନ୍ଧିତ ଅପରାଧ ଗଲା ଦୁଇ ଦଶନ୍ଧିରେ ୭୦.୭ ପ୍ରତିଶତକୁ ବୃଦ୍ଧି ପାଇଛି। ଅନେକ ରାଜ୍ୟ ତ ପୀଡ଼ିତ କ୍ଷତିପୂରଣ ଯୋଜନାକୁ ଏ ଯାଏ ସଂଶୋଧନ ବି କରିନାହାନ୍ତି। ବିଭିନ୍ନ ରାଜ୍ୟର ଲିଗାଲ ସର୍ଭିସ ଅଥୋରିଟି ଠିକ୍ ଭାବେ କାର୍ଯ୍ୟ କରୁନି।

    ବିଶେଷ କରି ଯୌନ ଅପରାଧର ଶୀକାର ହେଉଥିବା ପୀଡ଼ିତା ଜରୁରୀକାଳୀନ ଚିକିତ୍ସା, ତ୍ୱରିତ ଆର୍ଥିକ ସହାୟତା ଆଶା କରୁଥିଲା ବେଳେ ଏହା ମିଳୁନି ବୋଲି କୋର୍ଟରେ କହିଛି ଏନଜିଓ। ନାଲସା ସ୍କିମ ୨୦୧୮ର ରୁଲ୍ସ ୯ ଅନୁସାରେ ତଦନ୍ତ ବି ତ୍ୱରିତ ହେବା ଦରକାର। ତଦନ୍ତର ଅବଧି କୌଣସିମତେ ୬୦ ଦିନ ଅତିକ୍ରମ କରିବନି। କିନ୍ତୁ ଏହି ଅବଧି ପାର୍ ହୋଇଗଲେ ବି ତଦନ୍ତ ସରୁନି। ସେଥିଲାଗି ପୀଡ଼ିତ କି ପୀଡ଼ିତା ସରକାରୀ କ୍ଷତିପୂରଣରୁ ବଞ୍ଚିତ ହେଉଛି। ଦାରିଦ୍ର୍ୟ ସାଙ୍ଗକୁ ସଚେତନତାର ଅଭାବ ଲାଗି କମ୍ପ୍ରାମାଇଜ୍ ଓ ସେଟଲ କରିବାକୁ ବାଧ୍ୟ ହେଉଛି ପୀଡ଼ିତା। ଏଭଳି ମାମଲା ମଧ୍ୟପ୍ରଦେଶ ଓ ବିହାରରୁ ଅଧିକ ଆସୁଛି। ଆଉ ଏହାର ପ୍ରତିଫଳନ ହେଉଛି କି, ପୀଡ଼ିତା ନିଜର ସୁରକ୍ଷା ସହ ସଲାସୁତୁରା କରୁ ବୋଲି କିଛି ତତ୍ତ୍ୱ ଚାପ ପକାଇବାକୁ ମଉକା ପାଉଛନ୍ତି।

    ଆଉ ରାଜ୍ୟ ଲିଗାଲ ସର୍ଭିସ ଅଥୋରିଟି ସହ ଯୋଗାଯୋଗ କରିବାକୁ ବି ବାଟ ଛାଡ଼ୁନାହାନ୍ତି। ଆଉ ଯିଏ ବି ପହଞ୍ଚୁଛି, ପ୍ରକ୍ରିୟାକୁ ଏତେ ଜଟିଳ ଓ ଲମ୍ୱା କରିଦେଉଛନ୍ତି ଓକିଲ। ଯାହାଫଳରେ ପୀଡ଼ିତା କ୍ଷତିପୂରଣ ପାଇବା ଆଶା ଛାଡ଼ିଦେଉଛି। ବିହାର ଓ ଦିଲ୍ଲୀର ଉଦାହରଣ ଦେଇ ଏନଜିଓ ଦର୍ଶାଇଛି କି, ଗୋଟିଏ ଫର୍ମ ପୂରଣ କରିବାକୁ ଗରିବ ଓ ଅଶିକ୍ଷିତ ପୀଡ଼ିତଙ୍କୁ ଦିଆଯାଉଛି। ଯାହାକୁ ପୂରଣ କରିବାରେ ସେମାନେ ଅସମର୍ଥ ଆଉ ସେଥିଲାଗି ନ୍ୟାୟ ପାଉନାହାନ୍ତି।

    କିନ୍ତୁ ମଧ୍ୟପ୍ରଦେଶ ଓ ୟୁପିରେ ପୀଡ଼ିତଙ୍କ ପାଇଁ ଆଉ କେହି ଫର୍ମ ପୂରଣ କରିବାର ପ୍ରାବଧାନ ରହିଛି। ନାଲସା ସ୍କିମ ୨୦୧୮ ଓ ଫୌଜଦାରୀ କାର୍ଯ୍ୟବିଧି ସଂହିତାର ଧାରା ୩୫୭ କ ଅନୁସାରେ ପୁଲିସକୁ ଉପଯୁକ୍ତ ତାଲିମ ଅଭାବରୁ ଏତଲା କପିରେ ବି ଗୁରୁତ୍ୱପୂର୍ଣ୍ଣ ଧାରାକୁ ସାମିଲ୍ କରାଯାଉନି। ଯାହା ଫଳରେ ପୀଡ଼ିତ କ୍ଷତିପୂରଣ ପାଇବାକୁ ଯୋଗ୍ୟ ହେଉନି। ସେଥିଲାଗି କୋର୍ଟର ହସ୍ତକ୍ଷେପ ଲୋଡ଼ିଛି ଏନଜିଓ। ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ପୀଡ଼ିତ କ୍ଷତିପୂରଣ ବାବଦରେ ଲେଟର ଓ ସ୍ପିରିଟ ଭିତ୍ତିରେ କାମ କରିବା ଦରକାର ବୋଲି ଅପିଲ୍ ହୋଇଛି। ଆଉ ସୁପ୍ରିମକୋର୍ଟ ଏ ନେଇ କେନ୍ଦ୍ର ସରକାରଙ୍କ ସମେତ ଏହି ୪ ରାଜ୍ୟର ଲିଗାଲ ସର୍ଭିସ ଅଥୋରିଟିଙ୍କୁ ରିପୋର୍ଟ ତଲବ କରିଛନ୍ତି।

    ସେଥିଲାଗି ତ କଥା ଛଳରେ ଜଷ୍ଟିସ ସଞ୍ଜୀବ ଖାନ୍ନା କହିଥିଲେ କି, ଅନ୍ୟ ଦେଶ ତୁଳନାରେ ଭାରତରେ ପ୍ରତି ଲୋକ ଅନୁପାତରେ ଓକିଲଙ୍କ ସଂଖ୍ୟା ସବୁଠୁ ଭଲ ଅଛି। କିନ୍ତୁ ଆଇନ ସହାୟତା ଅଧିକାଂଶ ବଞ୍ଚିତ ବର୍ଗ ପାଖରେ ପହଞ୍ଚିପାରୁନି। ବାରାଣାସୀରେ ନାଲସାର ପ୍ରଥମ ଆଞ୍ଚଳିକ କନଫରେନ୍ସ-୨୩ରେ ଏଭଳି ଉଦବେଗ ଝାଡ଼ିଛନ୍ତି ଜଷ୍ଟିସ ଖାନ୍ନା। ପୀଡ଼ିତ କ୍ଷତିପୂରଣ ଓ ସାକ୍ଷୀ ସୁରକ୍ଷା ସ୍କିମକୁ କାର୍ଯ୍ୟକାରୀ କରିବା ଦିଗରେ ଠୋସ୍ ପଦକ୍ଷେପ ନେବାକୁ ହେବ।

    ଗଲା ବର୍ଷ ସର୍ବଭାରତୀୟ ଜିଲ୍ଲା ଲିଗାଲ ସର୍ଭିସ ଅଥୋରିଟି ସମ୍ମିଳନୀରେ ପ୍ରଧାନମନ୍ତ୍ରୀ ବି କହିଥିଲେ, କିଭଳି ଜଷ୍ଟିସ ଲୋକଙ୍କ ପାଖରେ ପହଞ୍ଚିବ, ସେ ଦିଗରେ ଠୋସ୍ ପଦକ୍ଷେପ ନେବାକୁ ହେବ। ସାଧାରଣ ଲୋକ ନିଜର ଅଧିକାର ବାବଦରେ ଅଧିକ ସଚେତନ ହେବାକୁ ପଡ଼ିବ। ନଚେତ୍ ଆଇନ ଉପରୁ ଲୋକଙ୍କ ବିଶ୍ୱାସ ତୁଟିଯିବ।

    କ୍ଷତିପୂରଣ ରାଶି ପହଞ୍ଚିପାରୁନି ପୀଡ଼ିତଙ୍କ ପାଖରେ। କାରଣ ଏଥିରେ ଭାଗ ବସାଉଛନ୍ତି କିଛି ପୁଲିସ, ଆଇନଜୀବି ଓ ଜନପ୍ରତିନିଧି। ସେଥିଲାଗି ସଚେତନତା ସହ ନିଜ ହକ୍ ପାଇବାର ମାର୍ଗ ବାବଦରେ ପୀଡ଼ିତ ଜାଣିବା ଜରୁରୀ।

    ପ୍ରଦୀପ ନାୟକଙ୍କ ରିପୋର୍ଟ

  • ଅନୀଲ ଦେଶମୁଖଙ୍କ ଜାମିନ ମାମଲା: ସିବିଆଇ ନିରାଜ

    ନୂଆଦିଲ୍ଲୀ: ସୁପ୍ରିମକୋର୍ଟରୁ ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନୀଲ ଦେଶମୁଖଙ୍କୁ ଆଶ୍ବସ୍ତି। ବମ୍ବେ ହାଇକୋର୍ଟଙ୍କ ଦ୍ବାରା ଦିଆଯାଇଥିବା ଜାମିନକୁ ବଳବତ୍ତର ରଖି ସୁପ୍ରିମକୋର୍ଟ ସିବିଆଇ ଯାଚିକାକୁ ଖାରଜ କରି ଦେଇଛନ୍ତି। ଦେଶମୁଖଙ୍କୁ ୧୦୦ କୋଟି ଟଙ୍କା ବଟି ଆଦାୟ ଅଭିଯୋଗରେ ଗିରଫ କରି ଜେଲ ପଠାଇଥିଲା ସିବିଆଇ।

    ୧୦୦ କୋଟି ବଟି ଆଦାୟ ଅଭିଯୋଗରେ ଜେଲରେ ଥିବା ଦେଶମୁଖଙ୍କୁ ବମ୍ବେ ହାଇକୋର୍ଟ ଜାମିନ ଦେଇଥିଲେ। କିନ୍ତୁ ଏହି ଜାମିନକୁ ବିରୋଧ କରି ସିବିଆଇ ସୁପ୍ରିମକୋର୍ଟରେ ଡିସେମ୍ବରରେ ଏକ ଯାଚିକା ଦାୟର କରି ଜାମିନକୁ ଖାରଜ କରିବାକୁ ଅପିଲ କରିଥିଲା। ମାମଲାରେ ୧୨ ଡିସେମ୍ବରକୁ ବମ୍ବେ ହାଇକୋର୍ଟ ଅନିଲ ଦେଶମୁଖଙ୍କୁ ୧ ଲକ୍ଷ ଟଙ୍କା ମୁଚାଲିକାରେ ଜାମିନ ପ୍ରଦାନ କରିଥିଲେ ଓ ସିବିଆଇକୁ ଜାମିନ ଆଦେଶ ବିରୋଧରେ ୧୦ ଦିନ ଭିତରେ ଅପିଲ କରିବାକୁ ମଧ୍ୟ କହିଥିଲେ।

    ସୂଚନା ଯୋଗ୍ୟ, ମହାରାଷ୍ଟ୍ରର ଗୃହମନ୍ତ୍ରୀ ଭାବେ କାର୍ଯ୍ୟଭାର ତୁଲାଉଥିବା ବେଳେ ଦେଶମୁଖ ମହାରାଷ୍ଟ୍ର ପୁଲିସକୁ ଲଗାଇ ବିଭିନ୍ନ ବ୍ୟବସାୟିକ ପ୍ରତିଷ୍ଠାନଠାରୁ ବଟି ଆଦାୟ କରୁଥିବା ଅଭିଯୋଗ ହୋଇଥିଲା। ସିବିଆଇ ଏହାର ତଦନ୍ତ କରି ଅନୀଲ ଦେଶମୁଖ ୧୦୦ କୋଟି ଟଙ୍କା ବଟି ଆଦାୟ କରିଥିବାର ପ୍ରମାଣ ହାସଲ କରିଥିଲା ଓ ଦେଶମୁଖଙ୍କୁ ଗିରଫ କରିଥିଲା।

    ସିବିଆଇର ବିଶେଷ କୋର୍ଟ ଦେଶମୁଖଙ୍କୁ ଜେଲ ପଠାଇଦେଇଥିଲା। ସେ ବାରମ୍ବାର ଜାମିନ ଆବେଦନ କରିଥିଲେ ମଧ୍ୟ ମୁମ୍ବାଇର ବିଶେଷ ଅଦାଲତ ତାଙ୍କ ଜାମିନ ଖାରଜ କରିଆସୁଥିବା ବେଳେ ହାଇକୋର୍ଟରୁ ଗତ ୧୨ ଡିସେମ୍ବରରେ ଜାମିନ ମିଳିଥିଲା।

  • ବଦଳି, ପୋଷ୍ଟିଂ ଉପରେ କେନ୍ଦ୍ର ଜାହିରକଲା  ନିଜ ହକ

    ନୂଆଦିଲ୍ଲୀ: ଅଫିସରଙ୍କ ବଦଳି ଓ ପୋଷ୍ଟିଂର ଅଧିକାରକୁ ନେଇ ଦିଲ୍ଲୀ ସରକାର ଓ ଉପରାଜ୍ୟପାଳଙ୍କୁ ନେଇ ଚାଲିଥିବା ବିବାଦର ଆଜି ତୃତୀୟ ଦିନ ଶୁଣାଣି ସମ୍ବିଧାନିକ ପୀଠରେ ହୋଇଛି। କେନ୍ଦ୍ର ଏହାକୁ ନିଜ ଅଧିକାର କହିଛି। ସଲିସିଟର ଜେନେରାଲ ତୁଷାର ମେହତା କୋର୍ଟଙ୍କୁ ଜଣାଇଛନ୍ତି କି, ୟୁନିୟନ ସର୍ଭିସ, ୟୁନିୟନ ପବ୍ଲିକ ସର୍ଭିସ ଓ ୟୁନିୟନ ପବ୍ଲିକ ସର୍ଭିସ କମିଶନ ଅଲ ଇଣ୍ଡିଆ ସର୍ଭିସ ନିୟମ ଅନ୍ତର୍ଗତ ଆସୁଛି। ଏଠି ପ୍ରଶ୍ନ ରାଷ୍ଟ୍ରର ରାଜଧାନୀକୁ ନେଇ ଓ ଏହାର ପ୍ରଭାବ ଦୂର ପର୍ଯ୍ୟନ୍ତ ରହିବ। ଦିଲ୍ଲୀ ଏକ ଭିନ୍ନ ଉଦ୍ଦେଶ୍ୟକୁ ନେଇ ତିଆରି କରାଯାଇଥିଲା।

    ସଲିସିଟର ଜେନେରାଲ ଆହୁରି କହିଥିଲେ କି, ଦିଲ୍ଲୀ ଏକ ଏମିତି ମହାନରୀୟ ଲଘୁ ଭାରତ, ଯାହା ଭାରତ ଭିତରେ ରହିଛି। ଐତିହାସିକ ପୃଷ୍ଠଭୂମିକୁ ଦେଖିଲେ ଦିଲ୍ଲୀରେ ଚିଫ କମିଶନର ବ୍ୟବସ୍ଥା ରହିଛି, ସଂଘୀୟ ରାଜ୍ୟ ନାହିଁ। ସମ୍ବିଧାନ ଲାଗୁ ହେବା ପୂର୍ବରୁ ସ୍ବାଧୀନତା ପୂର୍ବରୁ ସମ୍ବିଧାନ ସଭାରେ ଅନୁରୋଧ କରାଯାଇଥିଲା କି, ଦିଲ୍ଲୀର ବିଶେଷ ଭୂମିକା ରହିବା ଦରକାର। କାରଣ ଏହା ଦେଶର ରାଜଧାନୀ। ଦିଲ୍ଲୀ ପାର୍ଟ ସି ରାଜ୍ୟ ଅନ୍ତର୍ଗତ ଆସୁଛି। ଏହା ଏକ ସମ୍ପୂର୍ଣ୍ଣ ରାଜ୍ୟ ନୁହେଁ। ଏହା କେନ୍ଦ୍ର ଶାସିତ ଅଞ୍ଚଳର ବିସ୍ତାର। କିଛି ନିକଟରେ ବିଧାନମଣ୍ଡଳ ହୋଇପାରେ। କିଛିରେ ନାହିଁ। ହେଲେ ଅନ୍ତତଃ କେନ୍ଦ୍ରୀୟ ଶାସନର ପ୍ରଭୁତ୍ବ ଓ ନିୟନ୍ତ୍ରଣ ଆବଶ୍ୟକତା ରହିଛି। ସେହିପରି ଦିଲ୍ଲୀର ଏକ ବିଶିଷ୍ଠ ସ୍ଥିତି ରହିଛି,  ଯାହାକୁ ସବୁ ରାଜ୍ୟକୁ ଆନ୍ତରିକତା ଭାବନା ସୁନିଶ୍ଚିତ କରିବାକୁ ଅଛି।

    ସୂଚନା ଯୋଗ୍ୟ, ଗୃହମନ୍ତ୍ରୀ ଦିଲ୍ଲୀ ପ୍ରସଙ୍ଗରେ କହିଥିଲେ କି, ଜାତୀୟ ରାଜଧାନୀ ଉପରେ କେନ୍ଦ୍ର ସରକାରର ପୂର୍ଣ୍ଣ ନିୟନ୍ତ୍ରଣ ହେବା ଦରକାର, ଏହା ୨୩୯ଏଏ ପୂର୍ବରୁ ଆସୁଛି। ଯଦି ଦିଲ୍ଲୀକୁ ଏକ ପୂର୍ଣ୍ଣ ରାଜ୍ୟ କରାଯାଏ ତେବେ କେନ୍ଦ୍ର ପାଇଁ ଲୋକ ବ୍ୟବସ୍ଥା, ଜନ ସ୍ବାସ୍ଥ୍ୟ, ବାଧ୍ୟତାମୂଳକ ସେବା ଆଦି ଉପରେ ନିୟନ୍ତ୍ରଣ ରକ୍ଷାକରିବା ଅସମ୍ଭବ ହବ। ଏହା ନିୟନ୍ତ୍ରଣର ପ୍ରସଙ୍ଗ ନୁହେଁ, ବରଂ ଭାରତର ସମ୍ବିଧାନିକ ବ୍ୟବସ୍ଥାର ପ୍ରସଙ୍ଗ ବୋଲି ଗୃହମନ୍ତ୍ରୀ କହିଥିଲେ।

  • ନିର୍ବାଚନୀ ଖର୍ଚ୍ଚ ଉପରେ ଇସିଆଇର ବଡ ବୟାନ

    ନୂଆଦିଲ୍ଲୀ: ରାଜନୈତିକ ଦଳମାନଙ୍କ ଦ୍ବାରା ନିର୍ବାଚନରେ ହେଉଥିବା ଖର୍ଚ୍ଚ ସମ୍ପର୍କରେ ନିର୍ବାଚନ ଆୟୋଗ ସୁପ୍ରିମକୋର୍ଟଙ୍କରେ ଏକ ବଡ ଦାବି କରିଛି। ନିର୍ବାଚନ ଆୟୋଗକୁ ନିର୍ବାଚନ ବେଳେ ଅତିରିକ୍ତ ଖର୍ଚ୍ଚ ଉପରେ ଲଗାମ ଲଗାଇବାରେ ସଫଳତା ମିଳିଛି। ଏହାର ପ୍ରମାଣ, ନିର୍ବାଚନ କାଳରେ ବହୁ ମାତ୍ରାରେ ଅର୍ଥ ଜବତ କରାଯିବା। ଖର୍ଚ୍ଚ ପର୍ଯ୍ୟବେକ୍ଷକ ଦଳ ଏହା ଉପରେ ବେଶ ଭଲ କାମ କରୁଛନ୍ତି ବୋଲି କୋର୍ଟଙ୍କୁ ଇସିଆଇ ନିଜ ସତ୍ୟପାଠରେ ଏହି ସୂଚନା ଦେଇଛି।

    ସୁପ୍ରିମକୋର୍ଟରେ ଦାଖିଲ ଜନହିତ ଯାଚିକା ଉପରେ ନିର୍ବାଚନ ଆୟୋଗ ଦାଖଲ କରିଛି ସତ୍ୟପାଠ । ଯାଚିକାରେ ରାଜନୈତିକ ଦଳଗୁଡିକ ଓ ପ୍ରାର୍ଥୀଙ୍କ ଦ୍ବାରା ହେଉଥିବା ଅତ୍ୟଧିକ ନିର୍ବାଚନ ଖର୍ଚ୍ଚ ବନ୍ଦ କରିବାକୁ ଏକ ବ୍ୟାପକ ଯୋଜନା ସହ ନିର୍ଦ୍ଦେଶ ଦେବାକୁ ଓ ଦୋଷୀ ପ୍ରାର୍ଥୀମାନଙ୍କ ଓ ଦଳଗୁଡିକ ବିରୋଧରେ କାର୍ଯ୍ୟାନୁଷ୍ଠାନର ପାଇଁ ଦାବି ହୋଇଥିଲା।

    ଏହା ଉପରେ ଇସିଆଇ କହିଛନ୍ତି କି, ନିର୍ବାଚନ ସମୟରେ ଅଧିକ ଅର୍ଥ ଜବତ କରାଯିବା ଦର୍ଶାଉଛି କି, ଆୟୋଗ ଦ୍ବାରା ନିଆଯାଉଥିବା ସତର୍କତା  ଓ ପଦକ୍ଷେପର ଫଳ। ନିର୍ବାଚନରେ ଧନ ବଳର ବିପଦକୁ ରୋକିବାକୁ ନିର୍ବାଚନ ଆୟୋଗ ସମୟ ସମୟରେ ବିଭିନ୍ନ ଉପାୟ ଆପଣାଉଛି ଓ ଭବିଷ୍ୟତରେ ମଧ୍ୟ ଏହା ଜାରି ରହିବ ବୋଲି ଇସିଆଇ କହିଛି।

    ଇସିଆଇ ଆହୁରି କହିଛି କି, ନିର୍ବାଚନରେ ଧନ ବଳର ବୃଦ୍ଧି ପାଉଥିବା ଉପଯୋଗକୁ ନେଇ ଇସିଆଇ ଚିନ୍ତିତ। ଏହି ବିପଦ ଉପରେ ନିୟନ୍ତ୍ରଣ ପାଇବାକୁ ଇସିଆଇ ୨୦୧୦ରେ ବିହାର ବିଧାନସଭା ନିର୍ବାଚନାଗୁଡିକ ପରଠାରୁ ନିର୍ବାଚନରେ ଖର୍ଚ୍ଚ ଉପରେ ତୀକ୍ଷ୍ନ ଦୃଷ୍ଟି ରହିଛି ଓ ସଫଳତାପୂର୍ବକ ପଦକ୍ଷେପ ନେଇଛି। ରାଜନୈତିକ ଦଳଗୁଡିକର ଖର୍ଚ୍ଚକୁ ନିର୍ଦ୍ଧାରିତ ସୀମା ଭିତରେ ରଖିବାକୁ ଇସିଆଇ ଏକ ମଜବୁତ ବ୍ୟବସ୍ଥାର ଆରମ୍ଭ କରିଛି। ଏଥିରେ ବ୍ୟୟ ପର୍ଯବେକ୍ଷକ, ଭିଡିଓ ନିରୀକ୍ଷଣ ଟିମ, ଭିଡିଓକାରୀ ଟିମ, ଅଭିଯୋଗର ପରୀକ୍ଷା ପାଇଁ ଟିମ, ମିଡିଆ ପ୍ରମାଣ ଓ ନିରୀକ୍ଷଣ ସମିତି ପ୍ରସ୍ତୁତ କରିଛି।

  • ଆସନ୍ତା ୨୦ ଯାଏଁ ଆଶିଷ ମିଶ୍ରାଙ୍କ ମାମଲା ସ୍ଥଗିତ

    ନୂଆଦିଲ୍ଲୀ:  ଲକ୍ଷ୍ମୀପୁର ଖେରୀ ଘଟଣାରେ ଆଜି ସୁପ୍ରିମକୋର୍ଟରୁ ଆଶିଷ ମିଶ୍ରାଙ୍କୁ ମିଳିଲାନି ଆଶ୍ବସ୍ତି।  ଇଲାହାବାଦ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ବରସ୍ଥ ହୋଇଥିଲେ। କିନ୍ତୁ ତାଙ୍କ ମାମଲାର ଶୁଣାଣି ଜାନୁଆରୀ ୨୦କୁ ସ୍ଥଗିତ ରଖିଛନ୍ତି ସର୍ବୋଚ୍ଚ ନ୍ୟାୟାଳୟ।

    ସୁପ୍ରିମକୋର୍ଟ ଅତିରିକ୍ତ କ୍ଷେତ୍ରର ବିଚାରପତି ଲକ୍ଷ୍ମୀପୁର ଖେରୀର ରିପୋର୍ଟ ପଢିଛନ୍ତି। ରିପୋର୍ଟରେ ଉଲ୍ଲେଖ ହୋଇଛି କି,  ମାମଲା ପୂରା ହେବାକୁ ୫ ବର୍ଷ ସମୟ ଲାଗିଯିବ। କାରଣ ମାମଲାରେ ୨୦୮ ସାକ୍ଷୀ ରହିଛନ୍ତି।  ଗତ ଶୁଣାଣି କାଳରେ ସର୍ବୋଚ୍ଚ ଅଦାଲତ ହାଇକୋର୍ଟଙ୍କୁ ନିର୍ଦ୍ଦେଶ ଦେଇଥିଲେ କି, ବିନା ଅନ୍ୟ ମାମଲାକୁ ପ୍ରଭାବିତ କରି ଏହି ମାମଲା ଉପରେ ନିଷ୍ପତ୍ତି  ନିଆଯାଉ। ଅନ୍ୟପଟେ ରାଜ୍ୟ ସରକାର ପକ୍ଷରୁ କୁହାଯାଇଛି କି, ହିଂସା ମାମଲାରେ ସମସ୍ତ ଅପରାଧିଙ୍କ ବିରୋଧରେ ଅଭିଯୋଗ ଦାୟର ହୋଇଛି।

    ୨୦୨୧ ଅକ୍ଟୋବର ୩ରେ ୟୁପିର ଲକ୍ଷ୍ମୀପୁର ଖେରୀଠାରେ ଉତ୍ତର ପ୍ରଦେଶର ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କ ଗସ୍ତ କାଳରେ  କୃଷକମାନେ ବିରୋଧ ପ୍ରଦର୍ଶନ କରିଥିଲେ। ଏହି ପ୍ରଦର୍ଶନ ବେଳେ କେନ୍ଦ୍ର ମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ ମିଶ୍ରାଙ୍କ ଏସୟୁବି କାର  ଆନ୍ଦୋଳନକାରୀଙ୍କ ଉପରେ ମାଡି ଯାଇଥିଲା। ଫଳରେ  ୮ ଜଣଙ୍କ ମୃତ୍ୟୁ ହୋଇଥିଲା।  ଏମାନଙ୍କ ମଧ୍ୟରେ ଜଣେ ସାମ୍ବାଦିକ ମଧ୍ୟ ଥିଲେ। ଗାଡିରେ ଆଶିଷ ଥିଲେ ମଧ୍ୟ ଡ୍ରାଇଭର ଚଳାଉଥିଲା। ତେବେ ଏହି ମାମଲାରେ  ଆଶିଷ ଜେଲରେ ଅଛନ୍ତି।

  • ଜୋଶୀମଠ: ତତ୍କାଳ ଶୁଣାଣି ପାଇଁ ସର୍ବୋଚ୍ଚ ନ୍ୟାୟାଳୟ ଅରାଜି

    ନୂଆଦିଲ୍ଲୀ: ସୁପ୍ରିମକୋର୍ଟ ଜୋଶୀମଠ ମାମଲାରେ ତତ୍କାଳ ଶୁଣାଣି କରିବାକୁ ମନା କରିଦେଇଛନ୍ତି। ଜାନୁଆରୀ ୧୬ରେ ମାମଲାର ଶୁଣାଣି ପାଇଁ ଦିନ ଧାର୍ଯ୍ୟ କରାଯାଇଛି। ଏଥିସହ କୋର୍ଟ ଆହୁରି କହିଛନ୍ତି କି, ପ୍ରତ୍ୟେକ ମାମଲାରେ ସୁପ୍ରିମକୋର୍ଟକୁ ଆସିବାର ଆବଶ୍ୟକତା ନାହିଁ। ଏଥିପାଇଁ ଲୋକତାନ୍ତ୍ରିକ ରୂପେ ନିର୍ବାଚିତ ସଂସ୍ଥା ସବୁ କାମ କରୁଛନ୍ତି। ମାମଲାର ଶୁଣାଣି ମୁଖ୍ୟ ବିଚାରପତି ଜଷ୍ଟିସ ଡି ୱାଇ ଚନ୍ଦ୍ରଚୂଡ ଓ ଜଷ୍ଟିସ ପି ଏସ ନରସିମ୍ହାଙ୍କ ଖଣ୍ଡପୀଠ କରୁଛନ୍ତି।

    ଜୋଶୀମଠରେ ମାଟି ଧସିବା ଓ ଘରମାନଙ୍କରେ ଫାଟ ସୃଷ୍ଟି କରିବାକୁ ନେଇ ଜୋଶୀମଠାର ମଠାଧୀଶ ସ୍ବାମୀ ଅଭିମୁକ୍ତେଶ୍ବରାନନ୍ଦ ସରସ୍ବତୀ ସୁପ୍ରିମ କୋର୍ଟଙ୍କ ଦ୍ବାରସ୍ଥ ହୋଇ ମାମଲାର ତତ୍କାଳ ଶୁଣାଣିର ଆବକତା ଥିବା ଦର୍ଶାଇଥିଲେ ତଥା ଏହି ସଂକଟକୁ ରାଷ୍ଟ୍ରୀୟ ବିପର୍ଯ୍ୟୟ ଘୋଷଣା କରିବାକୁ ଅପିଲ କରିଥିଲେ। ଏହା ଉପରେ ମୁଖ୍ୟ ନ୍ୟାୟାଧୀଶ ଚନ୍ଦ୍ରଚୂଡ ଓ ନରସିମ୍ହାଙ୍କ ଖଣ୍ଡପୀଠ ମଙ୍ଗଳବାରକୁ ପୂର୍ବରୁ ଦିନ ଧାର୍ଯ୍ୟ କରିଥିବା ବେଳେ ଆଜି ଏହାର ଶୁଣାଣିକୁ ୧୬କୁ ଘୁଞ୍ଚାଇ ଦେଇଛନ୍ତି।

    ଯାଚିକାରେ ମଠାଧୀଶ କହିଥିଲେ କି, ଜୋଶୀମଠରେ ଯାହା କିଛି ଏବେ ହେଉଛି ତାହା ଏଠାରେ ହୋଇଥିବା ବିଭିନ୍ନ ଯୋଜନା ଓ ଏଥିପାଇଁ ହୋଇଥିବା ପାହାଡ ବ୍ଲାଷ୍ଟର ପରିଣାମ। ଏହା ଏକ ବଡ ବିପର୍ଯୟର ସଙ୍କେତ। ଏହାକୁ ନେଇ ଲୋକେ କେବେଠାରୁ ସ୍ବରଉତ୍ତୋଳନ କରୁଥିଲେ ମଧ୍ୟ ଏହାକୁ ସରକାର ଅଣଦେଖା କରି ଆସୁଛି। ତେଣୁ ଏହାର ପରିଣାମ ବର୍ତ୍ତମାନ ଏଠାକାର ଧାର୍ମିକ, ସଂସ୍କୃତିକ, ଐତିହାସିକ ନଗର ଓ ଏଠାକାର ଲୋକଙ୍କୁ ଭୋଗିବାକୁ ହେଉଛି।

    ଯୋଶୀମଠ ସହରରେ ଅସୁରକ୍ଷିତ ଘରର ସଂଖ୍ୟା ବୃଦ୍ଧି ପାଇବାରେ ଲାଗିଛି। ବର୍ତ୍ତମାନ ପର୍ଯ୍ୟନ୍ତ ୬୭୮ ଘରକୁ ବିପଦଶଙ୍କୁଳ ଚିହ୍ନଟ କରାଯାଇଛି। ହଜାର ହଜାର ସଂଖ୍ୟାରେ ଲୋକଙ୍କୁ ସେମାନଙ୍କ କଷ୍ଟ ଅର୍ଜିତ ଧନରେ ନିର୍ମିତ ଘର ଛାଡିବାକୁ ବାଧ୍ୟ କରାଯାଉଛି। ଜୀବନ ଭୟରେ ଲୋକେ ଘରଦ୍ବାର ଛାଡି ଥଇଥାନ କେନ୍ଦ୍ରକୁ ଚାଲିଯାଉଛନ୍ତି।

  • ୩ ଦିନରେ ୪୪ ବିଚାରପତିଙ୍କ ନାମ ତାଲିକା ପଠାଯିବ: କେନ୍ଦ୍ର

    ନୂଆଦିଲ୍ଲୀ: ଆସନ୍ତା ତିନି ଦିନରେ ବିଭିନ୍ନ ହାଇକୋର୍ଟରେ ନିଯୁକ୍ତ ହେବାକୁ ଥିବା ୪୪ ବିଚାରପତିଙ୍କ ନାମ ସ୍ପଷ୍ଟ କରାଯିବ ବୋଲି ଶୁକ୍ରବାର ସୁପ୍ରିମକୋର୍ଟଙ୍କୁ ଅବଗତ କରିଛି କେନ୍ଦ୍ର। ଆଇନ ଭିତ୍ତିଭୂମି ପାଳନ ଓ ବିଳମ୍ବିତ ବ୍ୟବସ୍ଥାକୁ ନେଇ ସର୍ବୋଚ୍ଚ କୋର୍ଟ କେନ୍ଦ୍ରକୁ ଜବାବ ତଲବ କରିଥିଲେ। ବିଚାରପତି ନିଯୁକ୍ତିରେ ବିଳମ୍ବକୁ ନେଇ ଦାଖଲ ଏକ ଯାଚିକାରେ ଶୁଣାଣି କରି ସୁପ୍ରିମକୋର୍ଟ ସରକାରକୁ ଯଥାଶୀଘ୍ର ସମସ୍ତ ସ୍ଥଗିତ ନାମ ସ୍ପଷ୍ଟ କରିବାକୁ ନିର୍ଦ୍ଦେଶ ଦେଇଥିଲେ।

    କୋର୍ଟଙ୍କ ସମ୍ମୁଖରେ ସଲିସିଟର ଜେନେରାଲ ଆର ଭେଙ୍କଟରମାଣୀ ଆଶ୍ବାସନା ଦେଇଥିଲେ କି, କେନ୍ଦ୍ର ନିକଟରେ  ବିଭିନ୍ନ ହାଇକୋର୍ଟର କଲେଜିୟମ ଦ୍ବାରା ୧୦୪ ନାମର ସୁପାରିଶ ପଡିରହିଥିବା ବେଳେ ୪୪ ଜଣଙ୍କ ନାମ ତାଲିକା ଚଳିତ ସପ୍ତାହ ମଧ୍ୟରେ  ସୁପ୍ରିମକୋର୍ଟଙ୍କୁ ପ୍ରଦାନ କରାଯିବ।  

    ତେବେ ଯେତେବେଳେ ଜଷ୍ଟିସ ଏସ କେ କାଉଲ ଓ ଏଏସ ଓକା ସଲିସିଟର ଜେନେରାଲଙ୍କୁ ସୁପ୍ରିମ କୋର୍ଟକୁ ପଦୋନ୍ନତି ପାଇଁ କଲେଜିୟମ ଦ୍ବାରା ସୁପାରିଶ ହୋଇଥିବା ୫ ବିଚାରପତିଙ୍କ ସମ୍ବନ୍ଧରେ ପ୍ରଶ୍ନ କରିଥିଲେ, ଏହା ଉପରେ ନ୍ୟାୟିକ ଅଧିକାରୀ କହିଥିଲେ କି, ଏଥିରେ ମତପାର୍ଥକ୍ୟ ରହିଛି।

    ସେ ଆହୁରି କହିଥିଲେ କି, ଏ ପ୍ରସଙ୍ଗରେ ମୋତେ କିଛି କାଳ ଦିଆଯାଇ ପାରେ କି? ମୋତେ କିଛି ସୂଚନା ଦିଆଯାଇଛି, କିନ୍ତୁ ମୋର ଏହା ଉପରେ ଭିନ୍ନ ମତ ରହିଛି। ଆସନ୍ତା ଫେବୃଆରୀ ୩ରେ ମାମଲା ଉପରେ ପୁନଃ ଶୁଣାଣି ହେବ।

    ସୂଚନାଯୋଗ୍ୟ, ମୁଖ୍ୟ ବିଚାରପତି ଜଷ୍ଟିସ ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ଗଠିତ ବିଚାରପତିଙ୍କ ଏକ କମିଟି ଗତ ମାସରେ ସୁପ୍ରିମ କୋର୍ଟକୁ ରାଜସ୍ଥାନ ଓ ପାଟନା ହାଇକୋର୍ଟର ବିଚାରପତି ପଙ୍କଜ ମିଥଲ ଓ ସଞ୍ଜୟ କାରୋଲଙ୍କ ସମେତ ୫ ଜଣଙ୍କ ନାମ ପଦୋନ୍ନତି ପାଇଁ ସୁପାରିଶ କରିଥିଲେ। କିନ୍ତୁ ଏହାକୁ ନେଇ କେନ୍ଦ୍ର ଓ ସୁପ୍ରିମ କୋର୍ଟ ମଧ୍ୟରେ ବିବାଦ ଠିଆହୋଇଥିଲା।

    କେନ୍ଦ୍ର ଆଇନ ମନ୍ତ୍ରୀ କହିଥିଲେ, ବିଚାରପତି ନିଯୁକ୍ତି ବିଚାର ପତି କରିବା ଏକ ଆଦର୍ଶ ବ୍ୟବସ୍ଥା ନୁହେଁ। ଏହା ଉପରେ ଗତ ମାସରେ ସର୍ବୋଚ୍ଚ ନ୍ୟାୟାଳୟ କହିଥିଲେ କଲେଜିୟମ ବ୍ୟବସ୍ଥା ମାଧ୍ୟମରେ ବିଚାରପତି ନିଯୁକ୍ତି ଦେଶର ଆଇନ ଓ ଏହା ବିରୋଧରେ ମତ ଦେବା ଠିକ ନୁହେଁ।

    ଶୁକ୍ରବାର ସୁପ୍ରିମକୋର୍ଟ କହିଛନ୍ତି କି, ପ୍ରତି ବ୍ୟବସ୍ଥାରେ ଏହାର ନିଜସ୍ବ ବିଧାନ ରହିଛି,  ଏହାର ଅନୁପାଳନ ହେବା ଦରକାର।  ଯଦି ଏଥିରେ ନୂତନତ୍ବ ଆଣିବାକୁ ଚାହୁଁଛନ୍ତି, ତେବେ ବିଧାନସଭା ଏହା କରିପାରେ।

    ଏସମ୍ପର୍କରେ ୨୦୨୧ ଏପ୍ରିଲରେ ସର୍ବୋଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶରେ କୁହାଯାଇଥିଲା କି, , ଯଦି କଲେଜିୟମର ସୁପାରିଶ ସହ ସର୍ବସମ୍ମତି ରହିଥିବ ତେବେ କେନ୍ଦ୍ର ବିଚାରପତିଙ୍କ ନିଯୁକ୍ତି ୩-୪ ସପ୍ତାହ ମଧ୍ୟରେ କରିପାରେ।

  • ସମଲିଙ୍ଗି ବିବାହକୁ ମାନ୍ୟତା: ଫେବୃଆରୀ ୧୫ ସୁଦ୍ଧା କେନ୍ଦ୍ରକୁ ଜବାବ ତଲବ

    ନୂଆଦିଲ୍ଲୀ: ଶୁକ୍ରବାର ସମଲିଙ୍ଗି ବିବାହକୁ ଆଇନଗତ ମାନ୍ୟତା ଦେବା ଉପରେ ଦେଶବ୍ୟାପୀ ଥିବା ସମସ୍ତ ହାଇକୋର୍ଟରେ ପଡିରହିଥିବା ମାମଲାଗୁଡିକୁ ଏକାଠି ଯୋଡିବା ସହ ନିଜ ଅଧୀନକୁ ନେଇଛନ୍ତି ସୁପ୍ରିମ କୋର୍ଟ। ମୁଖ୍ୟ ବିଚାରପତି ଜଷ୍ଟିସ ଡି ୱାଇ ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ଜଷ୍ଟିସ ପି ଏସ ନରସିଂହା  ଓ ଜଷ୍ଟିସ ଜେ ବି ପର୍ଦିୱାଲାଙ୍କ ଖଣ୍ଡପୀଠ  ଆସନ୍ତା ମାର୍ଚ୍ଚରେ ମାମଲାର ଶୁଣାଣି କରିବାକୁ ସୂଚିବଦ୍ଧ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ କେନ୍ଦ୍ରକୁ ସମସ୍ତ ଯାଚିକା ଉପରେ ମିଶ୍ରିତ ଜବାବ ଫେବୃଆରୀ ୧୫ ସୁଦ୍ଧା ଦାଖଲ କରିବାକୁ କହିଛନ୍ତି।

    ଯଦି କୌଣସି ଯାଚିକାକର୍ତ୍ତା କୋର୍ଟ ସମ୍ମୁଖରେ ବ୍ୟକ୍ତିଗତ ଭାବେ ଉପସ୍ଥିତ ହୋଇ ଯୁକ୍ତି କରି ନ ପାରନ୍ତି, ତେବେ ଭର୍ଚୁଆଲ ମୋଡରେ ସାମିଲ ହୋଇ ପାରିବେ ବୋଲି ଯାଚିକାକର୍ତ୍ତାଙ୍କୁ ଛୁଟ ଦେଇଛନ୍ତି କୋର୍ଟ। କୋର୍ଟ ଉଭୟ କେନ୍ଦ୍ର ଓ ଯାଚିକାକର୍ତ୍ତାଙ୍କ ଓକିଲଙ୍କୁ ମାମଲା, ଆଇନ ଓ ପ୍ରଥମିକତା ବା  ଏମଧ୍ୟରୁ କୌଣସି ବ୍ୟାପାରରେ ଲିଖିତ ଦସ୍ତାବିଜ କୋର୍ଟଙ୍କ ସମ୍ମୁଖରେ ରଖିବାକୁ କହିଛନ୍ତି।

    ଖଣ୍ଡପୀଠ କେନ୍ଦ୍ରର ଓକିଲଙ୍କୁ ମାମଲାରେ ଯେମିତି କୌଣସି ଜଣେ ବି ଯାଚିକାକର୍ତ୍ତା ଛାଡ ନ ପାଆନ୍ତି ଓ ସମସ୍ତ ଯାଚିକାକର୍ତ୍ତାଙ୍କ ବିବରଣୀ ପ୍ରସ୍ତୁତ ହୋଇଥିବା ସଂକଳନରେ ସାମିଲ ହୋଇଥିବା ସୁନିଶ୍ଚିତ କରନ୍ତୁ।

    ସଲିସିଟର ଜେନେରାଲ ତୁଷାର ମେହତା ଖଣ୍ଡପୀଠଙ୍କ ସମ୍ମୁଖରେ କହିଥିଲେ କି, ସର୍ବୋଚ୍ଚ ନ୍ୟାୟାଳୟଙ୍କ ସମ୍ମୁଖରେ ଦୁଇଟି ବିକଳ୍ପ ରହିଛି, ଗୋଟିଏ ଯାଚିକାର ଶୁଣାଣି ହାଇକୋର୍ଟରେ ହେବାକୁ ଅଛି, ଏହାର ନିଷ୍ପତ୍ତି ପର୍ଯ୍ୟନ୍ତ ଅପେକ୍ଷା କରିପାରନ୍ତି ବା ସମସ୍ତ ଯାଚିକାକୁ ଏକତ୍ରୀତ କରି ନିଜ ପାଖକୁ ଆଣିପାରନ୍ତି।ତେବେ ବହୁ ଯାଚିକାକର୍ତ୍ତାଙ୍କ ପକ୍ଷରୁ ସେମାନଙ୍କ ଓକିଲ ଜଣାଇଥିଲେ କି, ସମସ୍ତ ମାମଲାକୁ ସର୍ବୋଚ୍ଚ ନ୍ୟାୟାଳୟକୁ ସ୍ଥାନାନ୍ତର କରାଯାଇ ଶୁଣାଣି ହେଉ।  

    ଜାନୁଆରୀ ୩ରେ ସୁପ୍ରିମକୋର୍ଟ  ଏହି ମାମଲାର ଶୁଣାଣି ଜାନୁଆରୀ ୬ରେ କରିବାକୁ କହିବା ସହ ବିଭିନ୍ନ ହାଇକୋର୍ଟରେ ପଡିରହିଥିବା ମାମଲାଗୁଡିକୁ ସର୍ବୋଚ୍ଚ ନ୍ୟାୟାଳୟକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଥିଲେ। 

  • ଚିଟଫଣ୍ଡକୁ ନେଇ ସିବିଆଇକୁ ସର୍ବୋଚ୍ଚ କୋର୍ଟଙ୍କ ଜବାବ ତଲବ

    ନୂଆଦିଲ୍ଲୀ:  ଚିଟଫଣ୍ଡ ମାମଲାରେ ସିବିଆଇକୁ ଜବାବ ତଲବ କରିଛନ୍ତି ସୁପ୍ରିମକୋର୍ଟ । ମାମଲାର ଅଗ୍ରଗତି ସଂପର୍କରେ ଜଣାଇବାକୁ କହିଛନ୍ତି ସର୍ବୋଚ୍ଚ ନ୍ୟାୟାଳୟ। ସୋମବାର ସୁଦ୍ଧା ଜଣାଇବାକୁ ନିର୍ଦ୍ଦେଶ ରହିଥିବା ବେଳେ ପରବର୍ତ୍ତୀ ଶୁଣାଣି ମଧ୍ୟ ହେବ  ।

    ମାମଲାର ଅଗ୍ରଗତି ସଂପର୍କରେ ସୋମବାର ସୁଦ୍ଧା ଜଣାଇବାକୁ ସୁପ୍ରିମକୋର୍ଟ  ନିର୍ଦ୍ଦେଶ ଦେଇଛନ୍ତି। ସୋମବାର ମାମଲାର ହେବ ପରବର୍ତ୍ତୀ ଶୁଣାଣୀ । ସର୍ବୋଚ୍ଚ ନ୍ୟାୟାଳୟଙ୍କ ଜବାବ ତଲବ ପରେ ଏବେତଦନ୍ତକୁ ବିଳମ୍ବିତ କରିବାର କୈାଣସି ଯଥାର୍ଥତା ନାହିଁ ବୋଲି କହିଛନ୍ତି ବିଜେଡି ବିଧାୟକ ଅମର ଶତପଥୀ। ପ୍ରକୃତ ହିତାଧିକାରୀଙ୍କୁ ଟଙ୍କା ଫେରସ୍ତ ପାଇଁ ରାଜ୍ୟ ସରକାର କର୍ପସ ଫଣ୍ଡ କରିଛନ୍ତି।  ସିବିଆଇ ନିଜ ବିଶ୍ୱସନୀୟତା କୁ ଠିକ ରଖିବା ପାଇଁ ଠିକଣା ସମୟରେ ତଦନ୍ତ କରନ୍ତୁ ବୋଲି ଅମର କହିଛନ୍ତି ।

    ସେପଟେ ରାଜ୍ୟ ସରକାର ନିର୍ବାଚନୀ ବୈତରଣୀ ପା଼ରି ହେବା ପାଇଁ କର୍ପସ ପାଣ୍ଠି କରିଥିଲେ ବୋଲି ଅଭିଯୋଗ କରିଛନ୍ତି ବିରୋଧୀ । ଚିଟଫଣ୍ଡ ଜମାକାରୀ ଟଙ୍କା ଫେରସ୍ତ ପାଆନ୍ତୁ ବୋଲି ସରକାରଙ୍କ ଉଦ୍ଦେଶ୍ୟ ନାହିଁ ବୋଲି କହିଛନ୍ତି ବିଜେପି ନେତା ଗୋଲକ ମହାପାତ୍ର ।

    ତେବେଓଡିଶାରେ ୧୨ଶହରୁ ବେଶୀ ଚିଟଫଣ୍ଡ ସଂସ୍ଥା ପ୍ରାୟ ୫୦ ଲକ୍ଷରୁ ବେଶୀ ଜମାକାରୀଙ୍କୁ ଠକି ଲୁଟିଥିଲେ ଅର୍ଥ। କର୍ପସ ଫଣ୍ଡ କରି  କିଛି ହାତ ଗଣତି କ୍ଷୁଦ୍ର ଜମାକାରୀଙ୍କୁ ବାଦ ଦେଇ ଆଉ କେହି କିଛି ପାଇଲେ ନାହିଁ। ସେପଟେ ଠକ ସଂସ୍ଥା ଠାରୁ ବହୁ କୋଟି ଅର୍ଥ ଆଦାୟ କରାଯାଇଛି । କିନ୍ତୁ ଆଦାୟ ଅର୍ଥ କ୍ଷତିଗ୍ରସ୍ତକାରୀଙ୍କୁ କେବେ ମିଳିବ ତାହା କୁ ସଭିଏଁ ଅପେକ୍ଷା କରି ରହିଛନ୍ତି ।

    ଜ୍ୟୋତିମଞ୍ଜରୀ ସାହୁ ଓ ନବକିଶୋର ସାହୁ

Back to top button