ବଲାଙ୍ଗିର : ବଲାଙ୍ଗିର ଜିଲାର ବିଭିନ୍ନ ଅଂଚଳରେ ଚୋର ମାନଙ୍କ ଉତ୍ପାତ ଦିନକୁ ଦିନ ବଢିବାରେ ଲାଗିଛି । ଗତକାଲି ରାତିରେ ଲାଲ୍ଟିକ୍ରା ଇରିଗେସନ୍ କଲୋନୀ ପଛପଟେ ଥିବା ରଘୁନାଥ ନଗରରେ ଚୋରି ହେଇଥିବା ଜଣାପଡ଼ିଛି । ଏଠାରେ ରହୁଥିବା ବାସିନ୍ଦା ତ୍ରିବିକ୍ରମ ଶବରଙ୍କ ଘରୁ ଚୋରମାନେ ଏଲ୍ଇଡ଼ି ଟିଭି, ସୁନା, ରୂପା ଓ ନଗଦ ଟଙ୍କା ଚୋରି କରି ନେଇଯିବା ସହ ଘରେ ଲାଗିଥିବା ସିସିଟିଭି କ୍ଯାମେରାକୁ ଭାଙ୍ଗି ହାର୍ଡଡିସ୍କ ବି ନେଇ ଯାଇଛନ୍ତି ବୋଲି ଆଜି ବଲାଙ୍ଗିର ଟାଉନ୍ ଥାନାରେ ଅଭିଯୋଗ ହୋଇଛି । ଅଭିଯୋଗକୁ ଭିତ୍ତିକରି ବଲାଙ୍ଗିର ଟାଉନ ପୁଲିସ ଘଟଣାସ୍ଥଳରେ ପହଁଚି ତଦନ୍ତ ଆରମ୍ଭ କରିଛି ।
ସୂଚନା ଅନୁସାରେ, ତ୍ରିବିକ୍ରମ ଶବର ନିଜ ପରିବାର ସହ ତାଙ୍କ ଗାଁକୁ ଯାଇଛନ୍ତି । ତାଙ୍କ ଶଳା ମହେଶ ଗହୀର ତାଙ୍କ ଘରକୁ ସବୁଦିନେ ରାତିରେ ଶେଇବାକୁ ଆସୁଥିବା ବେଳେ ଗତକାଲି ସନ୍ଧ୍ୟା ସମୟରେ ଘରେ ଏକ ସାପ ବାହାରିବାରୁ ଗତ ରାତିରେ ସେ ଜାଗାକୁ ଶୋଇବାକୁ ଯାଇ ନଥିଲେ । ଏହାର ସୁଯୋଗ ନେଇ ଚୋର ମାନେ ତାଙ୍କ ଉତ୍ପାତ ଦେଖେଇଛନ୍ତି ଓ ଘରର ତାଲା ଭାଙ୍ଗି ଘରୁ ଗୋଟିଏ ଏଲଇଡ଼ି ଟିଭି, ସୁନା, ରୂପା ଓ ନଗଦ ୫ ହଜାର ଟଙ୍କା ନେଇ ଫେରାର୍ ହୋଇଯାଇଛନ୍ତି । ଖାଲି ଏତିକି ନୁହେଁ, ସେ ଜାଗାରେ ଲାଗିଥିବା ସିସିଟିଭି କ୍ଯାମେରାକୁ ଭାଙ୍ଗି ଦେଇ ହାର୍ଡଡିସ୍କ ବି ନେଇ ଯାଇଛନ୍ତି ଚୋରମାନେ ।
Naxatra News is now on Whatsapp
Join and get latest news update delivered to you via whatsapp
Join Now