ଗୁଲପୁର ସେକ୍ଟରରେ ଆତଙ୍କବାଦୀ – ଯବାନ ଗୁଳି ବିନିମୟ : ଜଣେ ଯବାନ ଆହତ

ପୁଞ୍ଛ : ଜମ୍ମୁ-କାଶ୍ମୀରର ପୁଞ୍ଛ ଜିଲ୍ଲା ଅନ୍ତର୍ଗତ ଗୁଲପୁର ସେକ୍ଟରରେ ନିୟନ୍ତ୍ରଣ ରେଖା ଅତିକ୍ରମ କରିବାକୁ ଉଦ୍ୟମ କରୁଥିବା ଆତଙ୍କବାଦୀଙ୍କ ସହିତ ସଂଘର୍ଷ ବେଳେ ଭାରତୀୟ ସେନାର ଜଣେ ଯବାନ ଆହତ ହୋଇଛନ୍ତି । ଆହତ ଯବାନଙ୍କୁ ତୁରନ୍ତ ନିକଟସ୍ଥ ସେନା ହସ୍ପିଟାଲରେ ଭର୍ତି କରାଯାଇଛି ।

ବିଭାଗୀୟ ସୂତ୍ରରୁ ମିଳିଥିବା ସୂଚନା ପ୍ରକାରେ, ଶୁକ୍ରବାର ବିଳମ୍ବିତ ରାତିରେ ଏହି ସଂଘର୍ଷ ଫରୱାର୍ଡ଼ ରେଞ୍ଜ୍ ର ନାଳ ନିକଟରେ ଘଟିଥିଲା । ଭାରତୀୟ ଯବାନ ମାନେ ଘନ ଜଙ୍ଗଲ ରାସ୍ତାରେ ଅନ୍ଧକାର ମଧ୍ୟରେ ତିନି ଜଣ ସଶସ୍ତ୍ର ଆତଙ୍କବାଦୀ ଭାରତୀୟ ସୀମା ମଧ୍ୟକୁ ଅନୁପ୍ରବେଶ ଉଦ୍ୟମ କରୁଥିବା ଦେଖିବାକୁ ପାଇଥିଲେ । ସେମାନେ ଆତଙ୍କବାଦୀଙ୍କୁ ଏଥିରୁ ନିବୃତ ରହିବାକୁ ଚେତାବନୀ ଦେଇଥିଲେ । ହେଲେ ଏହାପରେ ଆତଙ୍କବାଦୀ ମାନେ ଯବାନଙ୍କୁ ଟାର୍ଗେଟ୍ କରି ଗୁଳିମାଡ କରିଥିଲେ । ଉଭୟଙ୍କ ମଧ୍ୟରେ କିଛି ସମୟ ଧରି ଚାଲିଥିବା ଏହି ସଂଘର୍ଷରେ ଜଣେ ଭାରତୀୟ ଯବାନ ଆହତ ହୋଇଥିଲେ । ତେବେ ଆତଙ୍କବାଦୀ ମାନେ ଘଂଚ ଜଙ୍ଗଲର ସୁଯୋଗ ନେଇ ସେଠାରୁ ଖସି ପଳାଇବାରେ ସକ୍ଷମ ହୋଇଥିଲେ । ଏହାପରେ ଘଟଣାସ୍ଥଳକୁ ଅତିରିକ୍ତ ସୁରକ୍ଷା ବଳକୁ ପଠାଯାଇଛି । ଆତଙ୍କବାଦୀ ମାନଙ୍କୁ ଶେଷ କରିବା ପାଇଁ ବଡ ଧରଣର ଅଭିଯାନ ଆରମ୍ଭ ହୋଇଥିବା ସୂଚନା ମିଳିଛି ।