ଶୀଘ୍ର ପଡ଼ିଆକୁ ଫେରିବେ ଜସପ୍ରୀତ ବୁମରା, ଆୟର ଏବଂ କେ.ଏଲ୍ ରାହୁଲ, ପନ୍ତ ମଧ୍ୟ ହେଲେଣି ଫିଟ୍

ନୂଆଦିଲ୍ଲୀ : ଦୀର୍ଘ ଦିନ ଧରି କ୍ରିକେଟ୍ ଠାରୁ ଦୂରେଇ ରହିଥିବା ଦ୍ରୁତ ବୋଲର ଜସପ୍ରୀତ ବୁମରା ଶୀଘ୍ର ପଡ଼ିଆକୁ ଫେରିବେ ବୋଲି ଆଶା କରାଯାଉଛି । ବୋର୍ଡ ଅଫ୍ କଣ୍ଟ୍ରୋଲ୍ ଫର କ୍ରିକେଟ୍ ଇନ୍ ଇଣ୍ଡିଆ (ବିସିସିଆଇ) ଶୁକ୍ରବାର ଦିନ ଜସପ୍ରୀତ ବୁମରାଙ୍କ ସହ ପାଞ୍ଚ ଜଣ କ୍ରିକେଟର କେ.ଏଲ୍ ରାହୁଲ, ଶ୍ରେୟସ୍ ଆୟର, ପ୍ରସିଦ୍ଧ କୃଷ୍ଣା ଏବଂ ଋଷଭ ପନ୍ତଙ୍କ ମେଡିକାଲ ବୁଲେଟିନ୍ ପ୍ରକାଶ କରିଛି ।

ବିସିସିଆଇ ଅନୁଯାୟୀ ସମସ୍ତ କ୍ରିକେଟରଙ୍କ ସ୍ୱାସ୍ଥ୍ୟରେ ଉନ୍ନତି ଆସୁଛି । ବୁମରା ଏବଂ ପ୍ରସିଦ୍ଧ କୃଷ୍ଣା ଅଭ୍ୟାସ ଆରମ୍ଭ କରିସାରିଛନ୍ତି ।

ଏକ ବିବୃତ୍ତିରେ ବିସିସିଆଇ କହିଛି ଯେ, ଜସପ୍ରୀତ ବୁମରା ଏବଂ ପ୍ରସିଦ୍ଧ କୃଷ୍ଣ ଉଭୟ ଦ୍ରୁତ ବୋଲର ରିକଭରିର ଶେଷ ପର୍ଯ୍ୟାୟରେ ଅଛନ୍ତି ଏବଂ ନେଟ୍ସ୍ ରେ ସମ୍ପୂର୍ଣ୍ଣ ତୀବ୍ରତାର ସହ ବୋଲିଂ କରୁଛନ୍ତି । ଏହି ଯୋଡି ବର୍ତ୍ତମାନ କିଛି ଅଭ୍ୟାସ ମ୍ୟାଚ୍ ଖେଳିବେ, ଯାହା ଏନସିଏ ଦ୍ୱାରା ଆୟୋଜିତ ହେବ । ବିସିସିଆଇ ମେଡିକାଲ ଦଳ ତାଙ୍କ ଅଗ୍ରଗତିରେ ଖୁସି ଅଛନ୍ତି ଏବଂ ୱାର୍ମ ଅପ୍ ଖେଳ ପରେ ତାଙ୍କୁ ମୂଲ୍ୟାଙ୍କନ କରିବା ପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ।

ବିସିସିଆଇ ଆହୁରି ମଧ୍ୟ କହିଛି ଯେ, ଉଭୟ କେ.ଏଲ୍ ରାହୁଲ ଏବଂ ଶ୍ରେୟସ୍ ଆୟର ନେଟ୍ସ୍ ରେ ବ୍ୟାଟିଂ ଆରମ୍ଭ କରିଛନ୍ତି ଏବଂ ବର୍ତ୍ତମାନ ପାୱାର ଏବଂ ଫିଟନେସ୍ ବ୍ୟାୟାମ କରୁଛନ୍ତି । ବିସିସିଆଇ ଡାକ୍ତରୀ ଦଳ ତାଙ୍କ ଅଗ୍ରଗତିରେ ସନ୍ତୁଷ୍ଟ ଥିବାବେଳେ ଆଗାମୀ ଦିନରେ ଉଭୟ କୌଶଳ, ଶକ୍ତି ଏବଂ କଣ୍ଡିସନ ଉପରେ କାର୍ଯ୍ୟ କରିବେ । ଋଷଭ ପନ୍ତ ତାଙ୍କ ପ୍ରତ୍ୟାବର୍ତ୍ତନକୁ ନେଇ ମଧ୍ୟ ଉଲ୍ଲେଖନୀୟ ଅଗ୍ରଗତି କରିଛନ୍ତି ଏବଂ ନେଟ୍ସ୍ ରେ ବ୍ୟାଟିଂ କରିବା ସହିତ କିପିଙ୍ଗ ଅଭ୍ୟାସ ମଧ୍ୟ ଆରମ୍ଭ କରିଛନ୍ତି । ସେ ବର୍ତ୍ତମାନ ତାଙ୍କ ପାଇଁ ଡିଜାଇନ୍ ହୋଇଥିବା ଏକ ଫିଟନେସ୍ ପ୍ରୋଗ୍ରାମ୍ ଅନୁସରଣ କରୁଛନ୍ତି ଯେଉଁଥିରେ ଶକ୍ତି, ନମନୀୟତା ଏବଂ ଦୌଡିବା ଅନ୍ତର୍ଭୁକ୍ତ ।