ଚୋରି କାମରେ ଲାଗିଥିଲା ପାରା

ଚୋରୀ କାମରେ ଲଗାଯାଇଥିଲା ପାରା। କେଉଁ ଘରେ ତାଲା ପଡ଼ିଛି, ତାକୁ ଠାବ କରିବାକୁ ଟ୍ରେନିଂ ଦେଇ ଏମିତି ଅଭିନବ କାମରେ ଲଗାଇଥିଲା ଜଣେ ଯୁବକ। କିନ୍ତୁ ଶେଷରେ ବନ୍ଧା ହେଲା। ବେଙ୍ଗାଲୁରୁ ପୁଲିସ ପାରାକୁ ଜବତ କରିବା ସହ ଅଭିଯୁକ୍ତ ୩୮ ବର୍ଷୀୟ ମଞ୍ଜୁନାଥଙ୍କୁ ଗିରଫ କରିଛି। ପାରାକୁ ଲଗାଇ ଆଜିଯାଏଁ ପ୍ରାୟ ୫୦ରୁ ଅଧିକ ଫ୍ଲାଟରେ କଳାକନା ବୁଲାଇଦେଇଥିଲା। ଯେଉଁ ଘରେ ଅଧିକାଂଶ ଦିନ ତାଲା ପଡ଼ୁଥିଲା, କେବଳ ସେହି ଘରକୁ ଟାର୍ଗେଟ କରୁଥିଲା ମଞ୍ଜୁନାଥ। ଆଗ ଗୋଟିଏ କି ଦୁଇଟି ପାରାକୁ ବିଲଡିଂ ଆଖପାଖରେ ଛାଡ଼ିଦେଉଥିଲା। କାହାର ବାଲକୋନୀରେ ପାରା ବସିପଡ଼ୁଥିଲେ ଆଉ ଲୋକ ଘଉଡ଼ାଇବାକୁ ଆସୁଥିଲେ, ମଞ୍ଜୁନାଥ ଜାଣୁଥିଲା ଯେ ଘରେ ଲୋକ ଅଛନ୍ତି। ଆଉ ନିଜ ପାରାକୁ ଧରିବାକୁ ଆସିଛି କହି ଚତୁରତାର ସହ ଲୋକଙ୍କ ଧ୍ୟାନ ହଟାଇ କ୍ୟାମ୍ପସରେ ପଶିଯାଉଥିଲା। ଆଉ କେଉଁ ଘର ବନ୍ଦ ପଡ଼ିଛି, ମଉକା ଦେଖି ହାତ ସଫେଇ କରୁଥିଲା। ଲୁହାର ରଡ୍‌ରେ ଘରର କବାଟ ତାଡ଼ି ଚୋରି କାମ ଚଲାଉଥିଲା।