ୱାଶିଂଟନ୍ : ଭାରତ-ଆମେରିକୀୟ ସମ୍ପର୍କର ଶକ୍ତି ବର୍ତ୍ତମାନ ସ୍ପଷ୍ଟ ଦେଖାଯାଉଛି । ଏହି ଶକ୍ତି ମୁମ୍ବାଇ ଆକ୍ରମଣ ଅଭିଯୁକ୍ତ ତାହୱୁର ରାଣାକୁ ଭାରତକୁ ପଠାଇବା ମାମଲାରେ ମଧ୍ୟ ଦେଖିବାକୁ ମିଳିଛି । ଆମେରିକା ସରକାର ଶୀଘ୍ର ରାଣାକୁ ଭାରତ ପଠାଇବାକୁ ଚାହୁଁଛନ୍ତି ଏବଂ ଏଥିପାଇଁ ସରକାରଙ୍କ ତରଫରୁ ଆମେରିକୀୟ କୋର୍ଟରେ ମଧ୍ୟ ଏକ ପିଟିସନ ଦାଖଲ କରାଯାଇଛି ।
ଭାରତରେ ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣରେ ଅଭିଯୁକ୍ତ ତାହୱୁର ରାଣାକୁ ଚଳିତ ବର୍ଷ ମେ ମାସରେ ଭାରତକୁ ପ୍ରତ୍ୟର୍ପଣ କରିବାକୁ ଆମେରିକାର କୋର୍ଟ ଅନୁମୋଦନ କରିଛନ୍ତି । ଏହା ପରେ ରାଣା କାଲିଫର୍ଣ୍ଣିଆର ସେଣ୍ଟ୍ରାଲ୍ ଜିଲ୍ଲା କୋର୍ଟରେ ବନ୍ଦି ପ୍ରତୀରକ୍ଷୀକରଣ ପିଟିସନ ଆବେଦନ କରିଥିଲା । ଏହି ଆବେଦନରେ ରାଣା ଦାବି କରିଥିଲା ଯେ, ତାକୁ ଭାରତକୁ ପଠାଇବା ଆଦେଶ ଭାରତ-ଆମେରିକା ପ୍ରତ୍ୟର୍ପଣ ଚୁକ୍ତିର ଦୁଇଟି ଧାରାକୁ ଖଣ୍ଡନ କରୁଛି । ବର୍ତ୍ତମାନ ଆମେରିକାର ଜୋ ବାଇଡେନ ସରକାର ତାହୱୁର ରାଣାର ପ୍ରତ୍ୟର୍ପଣ ବିରୋଧରେ ଦାଖଲ ହୋଇଥିବା ହାବିସ୍ କର୍ପସ ଆବେଦନକୁ ବିରୋଧ କରିଛନ୍ତି । ଏହା ସହିତ ବାଇଡେନ ସରକାର ଆମେରିକାର କୋର୍ଟରେ ଆବେଦନ କରି ଖୁବ ଶୀଘ୍ର ତାହଭୁର ରାଣାକୁ ଭାରତକୁ ହସ୍ତାନ୍ତର କରିବାକୁ ଆବେଦନ କରିଛନ୍ତି ।
ଆମେରିକାର ଆଟର୍ଣ୍ଣି ଇ ମାର୍ଟିନ ଏଷ୍ଟ୍ରାଡା ବାଇଡେନ ସରକାରଙ୍କ ତରଫରୁ କାଲିଫର୍ନିଆର ସେଣ୍ଟ୍ରାଲ ଜିଲ୍ଲା କୋର୍ଟରେ ଏକ ପିଟିସନ ଦାଖଲ କରିଛନ୍ତି । ଏହି ଆବେଦନରେ ଦର୍ଶାଯାଇଛି ଯେ, ଆମେରିକା ସମ୍ମାନର ସହ ଅନୁରୋଧ କରିଛି ଯେ, କୋର୍ଟ ତାହୱୁର ରାଣାର ହାବିସ୍ ବନ୍ଦି ପ୍ରତୀରକ୍ଷୀକରଣ ଆବେଦନକୁ ଖାରଜ କରନ୍ତୁ । ଆମେରିକାର ଓକିଲ କହିଛନ୍ତି ଯେ, ଭାରତର ପ୍ରତ୍ୟର୍ପଣ ଆବେଦନରେ ପର୍ଯ୍ୟାପ୍ତ ପ୍ରମାଣ ନାହିଁ ବୋଲି ଆବେଦନକାରୀ ସ୍ଥିର କରିବାରେ ବିଫଳ ହୋଇଛନ୍ତି ।
