ଜୟପୁର : ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ପରିସଂଖ୍ୟାନ ବିଭାଗ ଆନୁକୁଲ୍ୟରେ ଏକବିଂଶ ଶତାବ୍ଦୀର ପରିସଂଖ୍ୟାନ: ନୂତନ ଆହ୍ୱାନ ଓ ସୁଯୋଗ ଶୀର୍ଷକ ଏକ ସ୍ୱତନ୍ତ୍ର ବକ୍ତୃତା ଗତ ମଇ ୧୨ ତାରିଖରେ ବିଶ୍ୱବିଦ୍ୟାଳୟର ସୁନାବେଡ଼ାସ୍ଥିତ କ୍ୟାମ୍ପସରେ ଅନୁଷ୍ଠିତ ହୋଇଯାଇଛି । ବିଧାନ ଚନ୍ଦ୍ର କୃଷି ବିଶ୍ୱବିଦ୍ୟାଳୟର ପ୍ରଫେସର ପ୍ର. ଅନୁପ ମଜୁମଦାର ଓ କଟକ ସ୍ଥିତ ରେଭେନ୍ସା ବିଶ୍ୱବିଦ୍ୟାଳୟର ଆସୋସିଏଟ୍ ପ୍ରଫେସର ଡ. ମହେଶ କୁମାର ପଣ୍ଡା ମୁଖ୍ୟବକ୍ତା ଓ ଅତିଥି ବକ୍ତା ଭାବେ ଯୋଗ ଦେଇଥିଲେ । ବିଶ୍ୱବିଦ୍ୟାଳୟର କୁଳପତି ପ୍ରଫେସର ଚକ୍ରଧର ତ୍ରିପାଠୀ ଶୁଭେଚ୍ଛା ଜଣାଇବା ସହ ଏକବିଂଶ ଶତାବ୍ଦୀର ପରିସଂଖ୍ୟାନରେ ନୂତନ ଆହ୍ୱାନ ଓ ସୁଯୋଗର ଅନେକ ବୈଶିଷ୍ଟ୍ୟ ଛାତ୍ର-ଛାତ୍ରୀମାନେ ଶିଖିବେ ବୋଲି ଆଶା ବ୍ୟକ୍ତ କରିଥିଲେ । ଏହି ଅବସରରେ ବିଶ୍ୱବିଦ୍ୟାଳୟର ଉପଦେଷ୍ଟା (ଏକାଡେମିକ୍ ଆଣ୍ଡ ଆଡ୍ମିନିଷ୍ଟ୍ରେସନ୍) ପ୍ରଫେସର ଶୁଧେନ୍ଦୁ ମଣ୍ଡଳ ସମ୍ମାନିତ ଅତିଥି ଭାବେ ଯୋଗଦେଇ ଭାରତର ପରିସଂଖ୍ୟନର ଇତିହାସ ସମ୍ପର୍କରେ ବର୍ଣନା କରିଥିଲେ । ଅର୍ଥନୀତିର ସହକାରୀ ପ୍ରଫେସର ତଥା ପରିସଂଖ୍ୟନ ବିଭାଗର ବିଭାଗୀୟ ମୁଖ୍ୟ ଶ୍ରୀ ବିଶ୍ୱଜିତ ଭୋଇ ସ୍ୱାଗତ ଭାଷଣ ପ୍ରଦାନ କରିଥିଲେ ।
ପ୍ରଫେସର ମଜୁମଦାର ବିଭିନ୍ନ ବିକଳ୍ପର ମାନ୍ୟତା ପାଇଁ ଏକାଧିକ ମାନଦଣ୍ଡ ନିଷ୍ପତି ଗ୍ରହଣ (ଏମ୍ସିଡିଏମ୍) ଆଭିମୁଖ୍ୟର ପ୍ରୟୋଗ\’ ଉପରେ ବକ୍ତବ୍ୟ ରଖିଥିଲେ । ପରିସଂଖ୍ୟାନରେ ଆପ୍ଲିକେସନ୍ ବ୍ୟବହାର କରିବାର ବିଭିନ୍ନ ପଦ୍ଧତି ଏବଂ ପଦ୍ଧତି ଉପରେ ସେ ଆଲୋକପାତ କରିଥିଲେ । ତାଙ୍କର ବକ୍ତବ୍ୟ ଉଭୟ ଛାତ୍ର ଏବଂ ଗବେଷଣା ବିଦ୍ୟାର୍ଥୀଙ୍କ ପାଇଁ ଅତ୍ୟନ୍ତ ସୂଚନାପ୍ରଦ ଥିଲା ।
ଡ. ପଣ୍ଡା ‘ମେସିନ୍ ଲର୍ଣ୍ଣିଂର ପରିଚୟ’ ଶୀର୍ଷକ ଏକ ମୌଳିକ ଓ ସୂଚନାପୂର୍ଣ୍ଣ ବକ୍ତବ୍ୟ ରଖିଥିଲେ । ଆଜିର ଜଗତୀକରଣ ଦୁନିଆରେ ଚିକିତ୍ସା ବିଜ୍ଞାନ, ବ୍ୟବସାୟ, ଶିଳ୍ପ ଇତ୍ୟାଦି ବିଭିନ୍ନ କ୍ଷେତ୍ରରେ ମେସିନ୍ ଲର୍ଣ୍ଣିଂ କିପରି ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ ସେ ସମ୍ପର୍କରେ ସେ ତାଙ୍କ ବକ୍ତବ୍ୟରେ ଆଲୋକପାତ କରିଥିଲେ ।
ଏହି ଅବସରରେ ଭାଷା ସମୂହ ବିଦ୍ୟାପୀଠର ଡିନ୍ ପ୍ରଫେସର ଏନ୍ ସି ପଣ୍ଡା, ଅଧ୍ୟାପକ ଡ. ସୁମନ ଦାଶ, ଡ. ବିଦ୍ୟାଧର ବିଶି, ଡ. ସୁବାସ ପଟ୍ଟନାୟକ, ଡ. ବୀରେନ୍ଦ୍ର ଷଡ଼ଙ୍ଗୀ ଓ ଜନସମ୍ପର୍କ ଅଧିକାରୀ ଡ. ଫଗୁନାଥ ଭୋଇଙ୍କ ସମେତ ବିଭିନ୍ନ ବିଭାଗର ଅଧ୍ୟାପକ, ଗବେଷକ ଓ ଛାତ୍ରଛାତ୍ରୀ ମାନେ ଉପସ୍ଥିତ ଥିଲେ । ଏହି କାର୍ଯ୍ୟକ୍ରମକୁ ପରିସଂଖ୍ୟନ ବିଭାଗର ଛାତ୍ରୀ ସୁଶ୍ରୀ ସମିଧା ବିଶ୍ୱାଳ ପରିଚାଳନା କରିଥିବା ବେଳେ ସମ୍ମାନିତ ଅତିଥିମାନଙ୍କୁ ବିଭାଗର ଛାତ୍ରଛାତ୍ରୀମାନେ ସ୍ୱାଗତ କରିଥିଲେ । ପରିସଂଖ୍ୟନ ବିଭାଗର ଅଧ୍ୟାପିକା ଡ. କଲ୍ୟାଣୀ ସୁନାନୀ ଏହି ସ୍ୱତନ୍ତ୍ର ବକ୍ତୃତାରେ ଉପସ୍ଥିତ ସମସ୍ତ ସମ୍ମାନିତ ଅତିଥିମାନଙ୍କୁ ଧନ୍ୟବାଦ ଅର୍ପଣ କରିଥିବା ଡ. ଫଗୁନାଥ ଭୋଇ, ଜନସମ୍ପର୍କ ଅଧିକାରୀ ସୂଚନା ଦେଇଛନ୍ତି ।
