ଜନପ୍ରତିନିଧି ମାନଙ୍କ ଉଦାସୀନତା ଓ ଇଚ୍ଛା ଶକ୍ତି ର ଅଭାବ ରୁ କେନ୍ଦ୍ରାପଡ଼ା ର ପନିପରିବା ଚାଷୀ ଏବେ ଅଭାବୀ ବିକ୍ରି ମୁହାଁ ହୋଇଛନ୍ତି। ସରକାର ବଦଳିଛି ଜନ ପ୍ରତିନିଧି ମଧ୍ୟ ବଦଳି ଛନ୍ତି ହେଲେ ବଦଳି ପାରୁନି ଚାଷୀ ସମସ୍ୟା । କେନ୍ଦ୍ରାପଡା ଜିଲ୍ଲାରେ କୋଟି କୋଟି ଟଙ୍କା ବ୍ୟୟରେ ନିର୍ମିତ ସୌର ଶୀତଳଭଣ୍ଡାର ଏବେ ଅଚଳ ହୋଇ ପଡିରହିଛି । ନିର୍ମାଣ ହେବାର ମାସେ କି ଦୁଇ ମାସ କାମ କରିଛି ଏହି ଶୀତଳଭଣ୍ଡାର। କିନ୍ତୁ ତା ପରଠାରୁ ବନ୍ଦ୍ ହୋଇ ପଡି ରହିଛି। ଏହାଦ୍ଵାରା ଉପକୃତ ହେବାକୁ ଆଶା ରଖିଥିବା ସ୍ଥାନୀୟ ଚାଷୀ ଏବେ ହତାସ। ଅନ୍ୟପକ୍ଷରେ ଦାୟିତ୍ଵରେ ଥିବା ସଂୟସହାୟକ ଗୋଷ୍ଠୀର ସଦସ୍ୟମାନେ ଶୀତଳ ଭଣ୍ଡାର ପରିଚାଳନା କରି ନପାରି କ୍ଷତି ସହିବାକୁ ବାଧ୍ୟ ହେଉଛନ୍ତି ।
କେନ୍ଦ୍ରାପଡା ଜିଲ୍ଲାରେ ଅଚଳ ହୋଇ ପଡିଛି ସୌର ଚାଳିତ ଶୀତଳ ଭଣ୍ଡାର। ଶୀତଳ ଭଣ୍ଡାର ନିର୍ମାଣ ହେବା ୟା ଭିତରେ ମାତ୍ର ୨ବର୍ଷ ହୋଇଛି, କିନ୍ତୁ କାମ କରୁନି । କେଉଁଠି ମେସିନ୍ ସବୁ ପଡିପଡି କଳଙ୍କି ଲାଗିଗଲାଣି ତ ଆଉ କେଉଁଠି ଶୀତଳଭଣ୍ଡାରରେ ତାଲା ଝୁଲୁଛି । ନିର୍ମାଣ ହେବା ପରେ ମାସେ କି ଦୁଇ ମାସ ଠିକ୍ ଢଙ୍ଗରେ କାମ କରିଛି କି ନାହିଁ ସନ୍ଦେହ। ବାସ୍, ତା ପରେ ଅଚଳ ହୋଇ ପଡି ରହିଛି ସମ୍ପୂର୍ଣ୍ଣ ପ୍ରକଳ୍ପ। ତେବେ ଏହା ପଛରେ କଣ କାରଣ ରହିଛି ଏହାର ଉତ୍ତର କାହା ପାଖରେ ନାହିଁ। ପୂର୍ବ ସରକାର ଏହି ସବୁ ସୋଲାର କୋଲ୍ଡ ଷ୍ଟୋର ଗୁଡିକର ନିର୍ମାଣ ଏବଂ ପରିଚାଳନା ଦାୟିତ୍ଵ ସ୍ୱୟଂସହାୟକଗୋଷ୍ଠୀଙ୍କ ଉପରେ ନ୍ୟସ୍ତ କରିଥିଲେ । ସ୍ୱୟଂସହାୟକଗୋଷ୍ଠୀ ରୁଣ କରି ଏହାର ନିର୍ମାଣ ଖର୍ଚ ବହନ କରିଥିଲେ । ସ୍ଥାନୀୟ ଚାଷୀଙ୍କୁ ସେବା ଯୋଗାଇ ଦେଇ ସେଥିରୁ କିଛି ରୋଜଗାର କରିବାର ଲକ୍ଷ୍ୟ ରଖା ଯାଇଥିଲା। କିନ୍ତୁ ଏବେ ଉଭୟ ଚାଷୀ ଏବଂ ସ୍ୱୟଂସହାୟକଗୋଷ୍ଠୀର ସଦସ୍ୟମାନେ ନିରାଶ ହୋଇଛନ୍ତି । ସେହିପରି ଜିଲ୍ଲା ନିୟନ୍ତ୍ରିତ ବଜାର କମିଟି ମଧ୍ୟରେ ଏକ କୋଟି ଏକାଅସି ଲକ୍ଷରେ ନିର୍ମାଣ ହୋଇଥିବା ବୃହତ ଶୀତଳ ଭଣ୍ଡାର ଉଦଘାଟନ ହେବା ପରଠୁଁ ତାଲା ପଡିଛି। ଯେଉଁଥିପାଇଁ ଚାଷୀ ଙ୍କ ମନରେ କ୍ଷୋଭ।
କେନ୍ଦ୍ରାପଡା ଜିଲ୍ଲା ଏକ କୃଷିପ୍ରଧାନ ଜିଲ୍ଲା ଭାବେ ପରିଚିତ । ଧାନ ଏବଂ ରବି ଫସଲ ପରେ ଆଳୁ ଚାଷ ଜିଲ୍ଲାର ତୃତୀୟ ସର୍ବାଧିକ ଚାଷ କରାଯାଉଥିବା ଫସଲ । ଜିଲ୍ଲାର ପ୍ରାୟ 20 ହଜାରରୁ ଅଧିକ ଚାଷୀ ପ୍ରତିବର୍ଷ ଆଳୁ ଚାଷ କରିଥାଆନ୍ତି । କିନ୍ତୁ ଶୀତଳଭଣ୍ଡାର ନଥିବାରୁ ଆଳୁ ମାସେ କି ଦୁଇ ମାସ ମଧ୍ୟରେ କମ୍ ଦରରେ ବିକ୍ରି କରିବାକୁ ବାଧ୍ୟ ହୋଇ ଥାନ୍ତି । ସେହିପରି ଜିଲ୍ଲାରେ ହେଉଥିବା ପରିବା ଚାଷ ମଧ୍ୟ ସଂରକ୍ଷଣ ପାଇଁ ଶୀତଳଭଣ୍ଡାରର ଆବଶ୍ୟକତା କରୁଛି । କିନ୍ତୁ ଏ ଯାଏ ସ୍ଥାନୀୟ ଚାଷୀ ଏହାର ସୁଯୋଗ ପାଇ ପାରିଲେ ନାହିଁ । 80 ଦଶକରେ ଜିଲ୍ଲାରେ ପ୍ରଥମ କରି ଏକ ଶୀତଳ ଭଣ୍ଡାର ସ୍ଥାନୀୟ ସଦର ଥାନା ଅନ୍ତର୍ଗତ ଶ୍ୟାମସୁନ୍ଦରପୁରଠାରେ ନିର୍ମାଣ ହୋଇଥିଲା । ସ୍ଥାନୀୟ ଶିଳ୍ପତିଙ୍କ ଉଦ୍ୟମରେ ନିର୍ମାଣ ହୋଇଥିବା ଏହି ଶୀତଳଭଣ୍ଡାର ଟି 1999ମସିହା ମହାବାତ୍ୟରେ ସମ୍ପୂର୍ଣ ଭାଙ୍ଗିରୁଜି ଗଲା । ସେବେଠାରୁ ଜିଲ୍ଲାର ଚାଷୀ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛି । ନିଜ ଉତ୍ପାଦ ଶାଗମାଛ ଦରରେ ବିକ୍ରି କରିବାକୁ ବାଧ୍ୟ ହେଉଛି। କେନ୍ଦ୍ରାପଡା ଜିଲ୍ଲାର 9 ଗୋଟି ବ୍ଲକ୍ ରେ 8 ଟି ସୌର ଶୀତଳଭଣ୍ଡାର ନିର୍ମାଣ କରାଯାଇଥିଲା। ସେଥି ମଧ୍ୟରୁ କେନ୍ଦ୍ରାପଡା ବ୍ଲକ୍ରେ 3 ଗୋଟି ମିନି ଶତଳଭଣ୍ଡାର ନିର୍ମାଣ ହୋଇଥିଲା। କିନ୍ତୁ ଏବେ ଅଧିକାଂଶ ଅଚଳ ହୋଇ ପଡି ରହିଛି। ତେବେ ଅଚଳ ହୋଇ ରହିଥିବା ଶୀତଳ ଭଣ୍ଡାର ଗୁଡ଼ିକୁ ପୁନରୁଦ୍ଧାର ସହ ସରକାର ଙ୍କ ତରଫରୁ ବୃହତ ଶୀତଳ ଭଣ୍ଡାର କେବେ ନିର୍ମାଣ ହେଉଛି ତାହା ଦେଖିବା ସମୟ ସାପେଖ୍ୟ।
Naxatra News is now on Whatsapp
Join and get latest news update delivered to you via whatsapp
Join Now
