ankita death

ଝାଡ଼ଖଣ୍ଡ ଡୁମକାର ଝିଅ ଅଙ୍କିତାଙ୍କର ପ୍ରକୃତ ବୟସ କେତେ। ସେ ନାବାଳିକା ନା ସାବାଳିକା। ଏକ ତରଫା ପ୍ରେମ ନିବେଦନ କରି ବିଫଳ ପରେ ଶାହାରୁଖ ହୁସେନ ପେଟ୍ରୋଲ ଢାଳି ଅଙ୍କିତାଙ୍କୁ ଜାଳି ଦେଇଥିଲା। ଅଭିଯୁକ୍ତ ଶାହାରୁଖକୁ ଫାଶୀ ଖୁଣ୍ଟରେ ଝୁଲାଇବାକୁ ବିଭିନ୍ନ ହିନ୍ଦୁ ସଂଗଠନ ଦାବିକୁ ଶାଣିତ କରୁଥିଲା ବେଳେ ଡୁମକା ଡିଏସପି ନୁର ମୁସ୍ତଫାଙ୍କ ଭୂମିକାକୁ ସନ୍ଦେହର ସ୍କାନରରେ ଦେଖାଯାଇଛି। ଆଉ ଏହାକୁ ନେଇ ଝାଡ଼ଖଣ୍ଡ ରାଜନୀତି ବି ତେଜିବାରେ ଲାଗିଛି।

ଏକ ତରଫା ପ୍ରେମର କରୁଣ ପରିଣତି। ଡୁମକାର ଯୁକ୍ତ ଦୁଇ ଛାତ୍ରୀ ଅଙ୍କିତା ସିଂ ଶୋଇଥିଲା ବେଳେ ଝରକା ପଟେ ପେଟ୍ରୋଲ ଢାଳି ନିଆଁ ଲଗାଇଦେଇଥିଲା ଅଭିଯୁକ୍ତ ଶାହାରୁଖ ହୁସେନ୍। ମରଣ ସହ ୫ ଦିନ ଯୁଝିବା ପରେ ସବୁଦିନ ଲାଗି ଆଖି ବୁଜିଦେଇଛନ୍ତି ଅଙ୍କିତା। କାରଣ ନିଆଁରେ ୯୫ ପ୍ରତିଶତ ପୋଡ଼ି ଯାଇଥିଲା। ଶାହାରୁଖକୁ ପୁଲିସ ଗିରଫ କରିଛି। ତେବେ ଏହି ଘଟଣାକୁ ନେଇ ତଦନ୍ତ ଦିଗହରା ହେଉଥିବା କଥା ଜଳଜଳ କରି ଦିଶୁଛି ବୋଲି ମୃତକଙ୍କ ପରିବାର, ବିଭିନ୍ନ ହିନ୍ଦୁ ସଂଗଠନ ସମେତ ବିଜେପି ଦଳ ଆରୋପ ଲଦିଛି। ଅଙ୍କିତାଙ୍କ ବାପାଙ୍କ କହିବା କଥା, ତାଙ୍କ ଝିଅର ବୟସ ୧୬ ବର୍ଷ। ହସ୍ପିଟାଲ ଶଯ୍ୟାରେ ସଙ୍କଟାପନ୍ନ ଅବସ୍ଥାରେ ପୁଲିସକୁ ଦେଇଥିବା ବୟାନ ଓ ବୟସ ବାବଦରେ ହୁଏତ ପୁଲିସ ଠିକରେ ଶୁଣିପାରିନି। ଅଙ୍କିତାକୁ ସାବାଳିକା ଦର୍ଶାଇବାକୁ ଅପପ୍ରୟାସ ହେଉଛି। ପୁଲିସ ଅଙ୍କିତାଙ୍କର ଆଧାର କାର୍ଡ ଓ ଦଶମ ଶ୍ରେଣୀ ସାର୍ଟିଫିକେଟ ନେଇଛି। ବୟସକୁ ନେଇ ଥିବା ତୃଟି ସୁଧାରିବ ପୁଲିସ୍।

ସେପଟେ ଡୁମକା ପବ୍ଲିକ ରିଲେସନ ଅଫିସର ବି ସ୍ପଷ୍ଟ କରିଛନ୍ତି କି, ଅଙ୍କିତାଙ୍କର ବୟସ ୧୯ ନୁହେଁ। ତାଙ୍କର ବୟସ ୧୬ ବର୍ଷ। ପୁଲିସ ରେକର୍ଡରେ ୧୯ ବର୍ଷ ଯାହା ଦର୍ଶାଯାଇଥଲା, ତାହା ଭୁଲ୍‌ ବୋଲି ଝାଡ଼ଖଣ୍ଡ ଶିଶୁ ବିକାଶ କମିଟି ସ୍ପଷ୍ଟ କରିଛି। ଏପରିକି ଚାଇଲଡ ଓ୍ୱେଲଫେୟାର କମିଟି ଏସପିଙ୍କୁ ସୁପାରିଶ କରିଛି କି, ଏହି ମାମଲାରେ ପୋକ୍ସୋ ଆକ୍ଟର ଧାରା ବି ଲାଗୁ। ସିଡବ୍ଲୁସି ଅଧ୍ୟକ୍ଷ ଅମରେନ୍ଦ୍ର କୁମାର କହିଛନ୍ତି କି, ସାର୍ଟିଫିକେଟରୁ ଜଣାପଡ଼ିଛି କି, ଅଙ୍କିତାଙ୍କ ବୟସ ୧୫ ବର୍ଷ ୯ ମାସ। ଗଣମାଧ୍ୟମରୁ ଜାଣିବାକୁ ପାଇଲୁ କି, ଅଙ୍କିତା ନିଜର ବୟସ ୧୯ ବର୍ଷ ବୋଲି ପୁଲିସକୁ ବୟାନ ଦେଇଥିଲା। ତେବେ କେଉଁଠି ଦ୍ୱନ୍ଦ୍ୱ ରହିଲା କହିବା ମୁସ୍କିଲ। କାରଣ ଅଙ୍କିତାଙ୍କର ଜମାନବନ୍ଦୀ ମାଜିଷ୍ଟ୍ରେଟଙ୍କ ଆଗରେ ନିଆଯାଇଥିଲା। ସଂପୃକ୍ତ ମାଜିଷ୍ଟ୍ରେଟ୍ ହିଁ କହିପାରିବେ, ସେତେବେଳେ ପୀଡ଼ିତା କଅଣ କହିଥିଲା।

ସେପଟେ ସୋରେନ ସରକାରଙ୍କୁ ଏହି ମାମଲାରେ ନିରନ୍ତର ଘେରିବାରେ ଲାଗିଛି ବିଜେପି। ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସ କହିଛନ୍ତି କି, ଏହି ଘଟଣା ପରେ ମାନବତା, ସମାଜ ଓ ଝାଡ଼ଖଣ୍ଡ ଲଜ୍ଜିତ ହୋଇଛି। ଲଭ୍‌ ଜିହାଦ୍ ଜରିଆରେ ଡେମୋଗ୍ରାଫି ବଦଳାଇବାକୁ ଚାହୁଁଛନ୍ତି। ସେପଟେ ମୁଖ୍ୟମନ୍ତ୍ରୀ ହେମନ୍ତ ସୋରେନ କହିଛନ୍ତି କି, ଅଙ୍କିତାଙ୍କୁ ଜାଳିଥିବା ଦୁର୍ବୃତ୍ତ କୌଣସିମତେ କ୍ଷମା ପାଇବାର ହକଦାର ନୁହେଁ। ସମାଜରେ ଅନେକ କ୍ରୁରତା ଓ ହିଂସା ଭିତରୁ ଏହା ଅତି ଜଘନ୍ୟ ଥିଲା। ଆଇନ ଅନୁସାରେ ଉଚିତ୍ ପଦକ୍ଷେପ ନିଆଯିବ। ଯେତେ ଜଲଦି ଅଭିଯୁକ୍ତକୁ ସଜା ମିଳିବ, ତା ଉପରେ ସରକାର କାମ କରୁଛନ୍ତି। ଅଙ୍କିତାଙ୍କ ପରିବାରକୁ ୧୦ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ବି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ। ଏହି ମାମଲାର ଶୁଣାଣୀ ଫାଷ୍ଟଟ୍ରାକ୍ କୋର୍ଟରେ ହେବ। ଏଡିଜି ରାଙ୍କର ଅଧିକାରୀଙ୍କୁ ତୁରନ୍ତ ତଦନ୍ତ ରିପୋର୍ଟ ଦେବାକୁ ଡିଜିଙ୍କୁ ସିଏମଓ ନିର୍ଦେଶ ଦେଇଛି।

ଅଙ୍କିତା ହତ୍ୟା ମାମଲାରେ ଅଭିଯୁକ୍ତ ଶାହାରୁଖକୁ ପେଟ୍ରୋଲ ଦେଇଥିବା ଅନ୍ୟତମ ଅଭିଯୁକ୍ତ ନଇମ୍ ଅନସାରୀକୁ ବି ପୁଲିସ ବାନ୍ଧିଛି। ଡିଏସପି ନୁର୍ ମୁସ୍ତଫାଙ୍କୁ ତଦନ୍ତରୁ ହଟାଇ ଦିଆଯାଇଛି।

ରାଞ୍ଚି: ଅଙ୍କିତା ମୃତ୍ୟୁ ମାମଲାକୁ ନେଇ ଝାଡ଼ଖଣ୍ଡରେ ରାଜନୈତିକ ଘମାସାନ ଜାରି ରହିଛି। ପ୍ରେମରେ ବିଫଳ ହେବାରୁ ଶୋଇଥିଲା ବେଳେ ପେଟ୍ରୋଲ ଢାଳି ଅଙ୍କିତାକୁ ଜାଳି ଦେଇଥିବା ଅଭିଯୁକ୍ତ ଶାହାରୁଖ ହୁସେନକୁ ଫାଶୀ ଖୁଣ୍ଟରେ ଝୁଲାଇବାକୁ ଦାବି ଶାଣିତ ହେଉଛି। ସୋରେନ ସରକାରଙ୍କୁ କ୍ରମାଗତ ଟାର୍ଗେଟ ଜାରି ରଖିଛି ବିଜେପି। ଏପରିକି ତଦନ୍ତକୁ ନେଇ ସନ୍ଦେହର ସ୍କାନରରେ ଥିବା ଡିଏସପି ନୁର ମୁସ୍ତଫାଙ୍କୁ ବି ତଦନ୍ତ ଦାୟିତ୍ୱରୁ ହଟାଇ ଦିଆଯାଇଛି।

ବାରମ୍ୱାର ପ୍ରେମ ନିବେଦନ କରି ବିଫଳ ହେବାରୁ ଡୁମକାର ଯୁକ୍ତ ଦୁଇ ଛାତ୍ରୀ ଅଙ୍କିତା ଉପରେ ଶୋଇଥିଲା ବେଳେ ପେଟ୍ରୋଲ ଢାଳି ଜାଳିଦେଇଥିଲା ଅଭିଯୁକ୍ତ ଶାହାରୁଖ ହୁସେନ୍। ଅଙ୍କିତାଙ୍କ ମୃତ୍ୟୁ ପରେ ଶାହାରୁଖକୁ ତୁରନ୍ତ ଫାଷ୍ଟଟ୍ରାକ୍ କୋର୍ଟରେ ବିଚାର କରି ଫାଶୀ ଖୁଣ୍ଟରେ ଝୁଲାଇବାକୁ ଦାବି ଶାଣିତ ହେବାରେ ଲାଗିଛି। ସମାନ୍ତରାଳ ଭାବେ ସୋରେନ ସରକାରଙ୍କୁ ସମାଲୋଚନାର ତୀରରେ ନିରନ୍ତର ଆଘାତ କରିବାରେ ଲାଗିଛି ବିଜେପି। ସୋରେନ ସରକାର ଅମଳରେ ଆଦିବାସୀ ନିର୍ଯ୍ୟାତିତ ଓ ଅବହେଳିତ ବୋଲି ପୂର୍ବତନ ମୁଖ୍ୟମନ୍ତ୍ରୀ ବାବୁଲାଲ ମାରାଣ୍ଡି ଅଭିଯୋଗ ଆଣିଛନ୍ତି। ଡିଏସପି ନୁର ମୁସ୍ତଫା ଯେଭଳି ଘଟଣାର ତଦନ୍ତ କରୁଛନ୍ତି, ସେ ବି ସନ୍ଦେହଜନକ। ମୃତ ପୀଡ଼ିତାଙ୍କୁ ସାବାଳିକା ଦର୍ଶାଇବାକୁ ଚେଷ୍ଟା କରାଯାଇଛି। ଯେବେ କି ସେ ନାବାଳିକା ଥିଲେ। ଡିଏସପି ମୁସ୍ତଫାଙ୍କ ବିରୁଦ୍ଧରେ ଆଇପିସିର ଧାରା ୧୨୦ବିରେ ମାମଲା ହେଉ।

ସେପଟେ ଅଙ୍କିତା ମୃତ୍ୟୁ ମାମଲାର ଏସଆଇଟି ତଦନ୍ତ ଆରମ୍ଭ ହୋଇଛି। ମାମଲାର ଗମ୍ଭୀରତା ଦୃଷ୍ଟିରୁ ଏହାକୁ ଡୁମକା ଏସ୍‌ପି ନିଜେ ତଦାରଖ କରୁଛନ୍ତି। ଏ ଯାଏ ଏହି ମାମଲାରେ ଦୁଇ ଜଣକୁ ଗିରଫ କରାଯାଇଛି। ସବୁ ଦିଗରୁ ତଦନ୍ତ କରାଯାଉଥିବା କହିଛନ୍ତି ଏଡିଜି। ସିଆଇଡି, ଫରେନସିକ୍ ଟିମ୍ ଓ ଫିଙ୍ଗର ପ୍ରିଣ୍ଟ ବ୍ୟୁରୋର ୧୦ ଜଣିଆ ଟିମ୍ ମିଳିତ ଭାବେ ତଦନ୍ତ ଆରମ୍ଭ କରିଛନ୍ତି। ଅଙ୍କିତାଙ୍କ ଘରେ ପହଞ୍ଚି ସବୁ ଦିଗରୁ ପ୍ରମାଣ ସଂଗ୍ରହ କରିଛନ୍ତି।

ସେପଟେ ହିନ୍ଦୁ ସଂଗଠନ ଗୁଡିକ ଏ ଘଟଣାକୁ ଗୁରୁତର ସହ ନେଇ ନ୍ୟାୟ ନ ମିଳିବା ଯାଏ ନୀରବ ବସିବୁନି ବୋଲି ସରକାରଙ୍କୁ ଚେତାଇ ଦେଇଛି। କାରଣ ଏହାକୁ ଲଭ୍ ଜିହାଦର ରୂପ ଦିଆଗଲାଣି। ତା ସାଙ୍ଗକୁ ମୁସଲିମ ଅଫିସରଙ୍କ ତଦନ୍ତକୁ ବି ସନ୍ଦେହ ସ୍କାନରରେ ଦେଖାଯାଇଛି। ସେଥିଲାଗି ଡିଏସପି ନୁର ମୁସ୍ତଫାଙ୍କୁ ତଦନ୍ତରୁ ଦୂରେଇ ରଖାଯାଇଛି। ଝିଅକୁ ଜବରଦସ୍ତ ଧର୍ମ ପରିବର୍ତ୍ତନ କରିବାକୁ ବାଧ୍ୟ କରିବା ଓ ଝିଅକୁ ବିବାହ କରିବାକୁ ଜିଦ୍ କରୁଥିଲା ଅଭିଯୁକ୍ତ ଶାହାରୁଖ ବୋଲି ଅଙ୍କିତାଙ୍କ ବାପା ଅଭିଯୋଗ କରିଛନ୍ତି।

ଆଗକୁ ଏହି ଘଟଣା କି ମୋଡ଼ ନେଉଛି, ତା ଉପରେ ସମସ୍ତଙ୍କ ନଜର। କାରଣ ସୋରେନଙ୍କ ବିଧାନସଭା ସଦସ୍ୟତା ରଦ୍ଦ ହୋଇପାରେ ଚର୍ଚ୍ଚା ଜାରି ରହିଛି। ଏଭଳି ସମୟରେ ଦୁଇଟି ସମ୍ପ୍ରଦାୟ ଏହି ଘଟଣାରେ ଜଡ଼ିତ ଥିବାରୁ ଏହି ମାମଲା ବିସ୍ଫୋରକ ମୋଡ଼ ନେବାର ଆଶଙ୍କାକୁ ଏଡ଼ାଇ ହେଉନି।

ପ୍ରେମଲତା ବାରିକ ଓ ପ୍ରଦୀପ ନାୟକଙ୍କ ରିପୋର୍ଟ

ରାଞ୍ଚି: ୬ ଦିନ ଧରି ମରଣ ସହ ଜୁଝିବା ପରେ ଶେଷରେ ଆଖି ବୁଜିଲା ଅଙ୍କିତା। ଏକତରଫା ପ୍ରେମର କରୁଣ ପରିଣତି ଭୋଗିଲେ ଅଭାଗିନୀ। ନିର୍ଦ୍ଦୟ ଶାହାରୁଖ ତାଙ୍କ ଉପରେ ପେଟ୍ରୋଲ ପକାଇ ନିଆଁ ଲଗାଇଦେଇଥିଲା।

ଝାଡ଼ଖଣ୍ଡର ଡୁମକା ଜିଲ୍ଲାରେ ଏକତରଫା ପ୍ରେମର କରୁଣ ପରିଣତି ଅଗଷ୍ଟ ୨୩ ତାରିଖରେ ଦେଖିବାକୁ ମିଳିଥିଲା। ପ୍ରେମର ବିଫଳ ହେବା ପରେ ପେଟ୍ରୋଲ ଢାଳି ଜାଳିଦେଇଥିଲା ଉନ୍ମତ୍ତ ପ୍ରେମିକ। ଆଉ ୬ ଦିନ ଧରି ଜୀବନ ମରଣ ସହ ସଂଘର୍ଷ ପରେ ଶେଷରେ ଅଗଷ୍ଟ ୨୮ ବିଳମ୍ୱିତ ରାତିରେ ସବୁଦିନ ଲାଗି ଆଖି ବୁଜି ଦେଇଛନ୍ତି ଅଙ୍କିତା।

ଅଭିଯୁକ୍ତ ଶାହାରୁଖ ଅଗଷ୍ଟ ୨୩ରେ ଝରକା ପାଖରେ ଅଙ୍କିତା ଶୋଇଥିଲା ବେଳେ ପ୍ରତିଶୋଧ ପରାୟଣ ସାଜି ପେଟ୍ରୋଲ ତାଙ୍କ ଦେହରେ ଛାଟିଦେଇଥିଲା। ଆଉ ପରେ ନିଆଁ ଲଗାଇ ଫେରାର୍ ହୋଇଯାଇଥିଲା। ପୁଲିସ ସେହି ଦିନ ହିଁ ଶାହାରୁଖକୁ ଗିରଫ କରିଥିଲା।

ବିଡ଼ମ୍ୱନାର କଥା ଥିଲା କି, ଏଭଳି ନାରକୀୟକାଣ୍ଡ ଭିଆଇବା ପରେ ବି ସାମାନ୍ୟ ଅନୁଶୋଚନା ନଥିଲା ତା ମନରେ। ଗିରଫ ବେଳେ ହସୁଥିବାର ଭିଡ଼ିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଆଉ ଏହି ଭିଡିଓକୁ ଦେଖି ଲୋକଙ୍କ ଭିତରେ ନିଆଁ ଲାଗିଥିଲା ଯେମିତି। ଜଷ୍ଟିସ୍ ଫର୍ ଅଙ୍କିତା ନାଁରେ ଅଭିଯାନକୁ ଜୋରଦାର କରିଛନ୍ତି ଲୋକେ।

ନିଆଁରେ ୯୫ ପ୍ରତିଶତ ପୋଡ଼ି ଅଙ୍କିତାଙ୍କର ସ୍ୱାସ୍ଥ୍ୟବସ୍ଥା ସଂକଟାପନ୍ନ ଥିଲା। ମୃତ୍ୟୁ ପୂର୍ବରୁ ଅଙ୍କିତାଙ୍କର ଜମାନବନ୍ଦୀ ପ୍ରମାଣ ଦେଉଥିଲା, କେତେ ନୃଶଂସ ଥିଲା ଶାହାରୁଖ ହୁସେନ୍। ତାହାର ଏକତରଫା ପ୍ରେମ ଭିକ୍ଷା, ବାଟରେ ଘାଟରେ ହଇରାଣ ହରକତ କରିବା ନେଇ ଅତିଷ୍ଠ ହୋଇପଡ଼ିଥିଲେ ଅଙ୍କିତା।

ଅଙ୍କିତାଙ୍କ ଏଭଳି ଅବସ୍ଥା କରିଥିବା ଅଭିଯୁକ୍ତ ବିରୁଦ୍ଧରେ ଅନେକ ହିନ୍ଦୁ ସଂଗଠନ ପ୍ରତିବାଦ ରାଲି, ବିକ୍ଷୋଭ କରିଛନ୍ତି। ହତ୍ୟାକାରୀକୁ ଫାଶୀ ଦେବାକୁ ଦାବି ହୋଇଛି। ଫାଷ୍ଟଟ୍ରାକ୍ କୋର୍ଟରେ ତ୍ୱରିତ ଶୁଣାଣୀ କରି ଏଭଳି ନରପିଶାଚକୁ ଫାଶୀ ଖୁଣ୍ଟରେ ଝୁଲାଇଦେବାକୁ ଦାବି ତେଜିଛି। ସୋମବାର ସକାଳେ ଅଙ୍କିତାଙ୍କର ଅନ୍ତିମ ସଂସ୍କାର କରାଯାଇଛି। ଅଙ୍କିତାଙ୍କ ମୃତ୍ୟୁ ପରେ  କୌଣସି ଅପ୍ରୀତିକର କି ସାମ୍ପ୍ରଦାୟିକ ଉତ୍ତେଜନାମୂଳକ ସ୍ଥିତି କାଳେ ଉପୁଜିବ, ତାକୁ ଲକ୍ଷ୍ୟ ରଖି ପ୍ରଶାସନ ୧୪୪ ଧାରା ଲଗାଇଥିଲା।

ପ୍ରେମଲତା ବାରିକଙ୍କ ରିପୋର୍ଟ