() рмХрмВрмЧрнНрм░рнЗрм╕ рмЕрмзрнНрнЯрмХрнНрм╖ рмирм┐рм░рнНрммрм╛рмЪрми рмкрм╛рмЗрмБ рмирм╛рморм╛рмЩрнНрмХрми рмкрнНрм░рмХрнНрм░рм┐рнЯрм╛ рмЖрм░рморнНрмн рм╣рнЛрмЗрмпрм╛рмЗрмЫрм┐ред рмирм╛рморм╛рмЩрнНрмХрмирм░ рмкрнНрм░рмермо рмжрм┐рмирм░рнЗ рмжрм│рм░ рммрм░рм┐рм╖рнНрма рмирнЗрмдрм╛ рмдрмерм╛ рмЬрм┐-рнирнй рм╕рмжрм╕рнНрнЯ рм╢рм╢рм┐ рмерм░рнБрм░ рмирм╛рморм╛рмЩрнНрмХрми рмкрм╛рмЗрмБ рмлрм░рнНрмо рм╕рмВрмЧрнНрм░рм╣ рмХрм░рм┐рмерм┐рммрм╛ рммрнЗрм│рнЗ рм╕рнЛрмирм┐рмЖрмЩрнНрмХ рмкрнНрм░рм┐рнЯ рм░рм╛рмЬрм╕рнНрмерм╛рми рморнБрмЦрнНрнЯрмормирнНрмдрнНрм░рнА рмЕрм╢рнЛрмХ рмЧрнЗрм╣рм▓рмЯ рмжрм│рм░ рм╕рм░рнНрммрнЛрмЪрнНрмЪ рмкрмжрм░рнЗ рмЖрм╕рм┐рмирнНрми рм╣рнЗрммрм╛ рмПрмХ рмкрнНрм░рмХрм╛рм░ рм╕рнНрмкрм╖рнНрмЯ рм╣рнЛрмЗрмЫрм┐ред рм╕рммрнБ рм░рм╛рмЬрнНрнЯрм░ рмХрмВрмЧрнНрм░рнЗрм╕ рмХрморм┐рмЯрм┐ рмирм┐рм░рнНрммрм╛рмЪрмирм░рнЗ рмнрм╛рмЧ рмирнЗрммрм╛рмХрнБ рмирм┐рмЬрмХрнБ рмкрнНрм░рм╕рнНрмдрнБрмд рмХрм░рнБрмерм┐рммрм╛ рммрнЗрм│рнЗ рм░рм╛рмЬрм╕рнНрмерм╛рми рмХрмВрмЧрнНрм░рнЗрм╕рм░рнЗ рмЙрм╖рнНрмгрмдрм╛ рммрмврм┐ рмпрм╛рмЗрмЫрм┐ред рм░рм╛рмЬрм╕рнНрмерм╛рми рм╕рнНрмерм┐рмдрм┐рмХрнБ рмжрнЗрмЦрм┐рм▓рнЗ рмормирнЗ рм╣рнЗрмЙрмЫрм┐ рмЕрмзрнНрнЯрмХрнНрм╖ рмкрмжрмарм╛рм░рнБ рмпрнЗрморм┐рмдрм┐ рмЕрмзрм┐рмХ рмЬрм░рнБрм░рнА рморнБрмЦрнНрнЯрмормирнНрмдрнНрм░рнА рмЪрнМрмХрм┐ред рмПрм╣рм┐ рмЪрнМрмХрм┐ рммрмЮрнНрмЪрм╛рмЗрммрм╛рмХрнБ рмЧрнЗрм╣рм▓рмЯ рм╕рммрнБ рмХрм│ рмХрнМрм╢рм│ рм▓рмЧрм╛рмЗ рмПрм╣рм┐ рмкрм╕рм╛рмкрм╛рм▓рм┐рм░рнЗ рмпрнЗрморм┐рмдрм┐ рм╕рмлрм│ рм╣рнЛрмЗрмЫрмирнНрмдрм┐ред
рмЖрм░рморнНрмн рм╣рнЛрмЗрмЫрм┐ рмХрмВрмЧрнНрм░рнЗрм╕ рмЕрмзрнНрнЯрмХрнНрм╖ рмирм┐рм░рнНрммрм╛рмЪрми рмкрнНрм░рмХрнНрм░рм┐рнЯрм╛ред рммрм┐рмЬрнНрмЮрмкрнНрмдрм┐ рмЕрмирнБрмпрм╛рнЯрнА рнирнкрм░рнБ рмирм╛рморм╛рмЩрнНрмХрми рмжрм╛рмЦрм▓ рм╣рнЛрмЗ рнйрнж рм╕рнЗрмкрнНрмЯрнЗрморнНрммрм░ рмкрм░рнНрмпрнНрнЯрмирнНрмд рмЪрм╛рм▓рм┐рммред рмПрм╣рм┐ рмкрмж рмжрнМрмбрм░рнЗ рмерм┐рммрм╛ рмкрнНрм░рморнБрмЦ рмжрм╛рммрм┐рмжрм╛рм░, рм░рм╛рмЬрм╕рнНрмерм╛рми рморнБрмЦрнНрнЯрмормирнНрмдрнНрм░рнА рмЕрм╢рнЛрмХ рмЧрнЗрм╣рм▓рмЯрмЩрнНрмХ рмкрм╛рмЗрмБ рмпрнЗрморм┐рмдрм┐ рмЕрмзрнНрнЯрмХрнНрм╖ рмкрмжрмарм╛рм░рнБ рмЧрнБрм░рнБрмдрнНрммрмкрнВрм░рнНрмгрнНрмг рм╣рнЛрмЗрмЫрм┐ рморнБрмЦрнНрнЯрмормирнНрмдрнНрм░рнА рмкрмжред рмдрнЗрмгрнБ рм╕рнЗ рмирм┐рм░рнНрммрм╛рмЪрми рм▓рмврм┐рммрм╛ рм╕рнНрмерм┐рм░ рм╣рнЛрмЗрм╕рм╛рм░рм┐рмерм┐рм▓рнЗ рмормзрнНрнЯ рмирм╛рморм╛рмЩрнНрмХрми рмжрм╛рмЦрм▓ рмХрм░рм┐рммрм╛рмХрнБ рм╢рнЗрм╖ рмдрм╛рм░рм┐рмЦ рмзрм╛рм░рнНрмпрнНрнЯ рмирнЗрмЗ рмЪрм░рнНрмЪрнНрмЪрм╛ рм╣рнЗрмЙрмЫрм┐ред ┬арм░рм╛рм╣рнБрм▓рмЩрнНрмХ рн▒рм╛рми рморнНрнЯрм╛рми рн▒рм╛рми рмкрнЛрм╖рнНрмЯ рм░рм┐рморм╛рмЗрмгрнНрмбрм░ рмкрм░рнЗ рмЧрнЗрм╣рм▓рмЯрмЩрнНрмХ рмкрм╛рмЗрмБ рммрмврм┐рмерм┐рм▓рм╛ рм╕рморм╕рнНрнЯрм╛ред
рморнБрмЦрнНрнЯрмормирнНрмдрнНрм░рнА рмкрмж рмирм┐рмЬ рмХрммрмЬрм╛рм░рнЗ рм░рмЦрм┐рммрм╛рмХрнБ рм▓рм╛рмЧрм┐ рмкрмбрм┐рмЫрмирнНрмдрм┐ред рмЧрнЗрм╣рм▓рмЯрмЩрнНрмХрм░ рмПрмХрморм╛рмдрнНрм░ рм▓рмХрнНрм╖рнНрнЯ рмХрнМрмгрм╕рм┐ рмкрнНрм░рмХрм╛рм░рнЗ рм╕рмЪрм┐рми рмкрм╛рмЗрм▓рмЯрмЩрнНрмХ рм╣рм╛рмдрмХрнБ рмЪрм╛рм▓рм┐ рми рмпрм╛рмЙ рморнБрмЦрнНрнЯрмормирнНрмдрнНрм░рнА рмкрмж ред рмдрнЗрмгрнБ рмЬрм╛рмдрнАрнЯ рм░рм╛рмЬрмзрм╛рмирнАрм░рнЗ рмХрмВрмЧрнНрм░рнЗрм╕ рмнрм┐рмдрм░рнЗ рмпрнЗрмдрм┐рмХрм┐ рм░рм╛рмЬрмирнИрмдрм┐рмХ рмЙрм╖рнНрмгрмдрм╛ рмжрнЗрмЦрм╛ рмпрм╛рмЙрмирм┐, рмдрм╛рмарнБ рмЕрмзрм┐рмХ рмЙрм╖рнНрмг рм╣рнЛрмЗрмЙрмарм┐рмЫрм┐ рм░рм╛рмЬрм╕рнНрмерм╛рмиред рм░рм╛рмЬрм╕рнНрмерм╛рмирм░ рмирнВрмЖ рморнБрмЦрнНрнЯрмормирнНрмдрнНрм░рнА рмХрм┐рмП рм╣рнЗрмм рмПрм╣рм╛рмХрнБ рмирнЗрмЗ рмЖрмЬрм┐ рм╕рмВрмзрнНрнЯрм╛рм░рнЗ рммрм┐рмзрм╛рнЯрмХ рмжрм│рм░ рммрнИрмармХ рм╣рнЗрммрм╛рмХрнБ рмпрм╛рмЙрмЫрм┐ред рмПрм╣рм┐ рммрнИрмармХрм░рнЗ рм░рм╛рмЬрнНрнЯ рмХрмВрмЧрнНрм░рнЗрм╕ рмжрм╛рнЯрм┐рмдрнНрммрм░рнЗ рмерм┐рммрм╛ рмЕрмЬрнЯ рморм╛рмХрмирмЩрнНрмХ рм╕рм╣ рм╕рм╛рморм┐рм▓ рм╣рнЗрммрнЗ рморм▓рм┐рмХрм╛рм░рнНрмЬрнБрми рмЦрмбрмЧрнЗред рм░рм╛рмЬрнНрнЯ рмХрмВрмЧрнНрм░рнЗрм╕рм░ рмжрнБрмЗ рмЧрнЛрм╖рнНрмарнАрмХрнБ рмормирнЗрмЗ рм╕рнБрм░рнБрмЦрнБрм░рнБрм░рнЗ рморнБрмЦрнНрнЯрмормирнНрмдрнНрм░рнА рмХрм░рм┐рммрм╛ рм╣рнЗрмЙрмЫрм┐ рмПрм╣рм┐ рмжрнБрмЗ рмирнЗрмдрм╛рмЩрнНрмХ рмжрм╛рнЯрм┐рмдрнНрммред
рмдрнЗрммрнЗ рмПрм╣рм╛ рмкрнВрм░рнНрммрм░рнБ рмжрм┐рм▓рнНрм▓рнАрм░рнЗ рм░рм╛рмЬрм╕рнНрмерм╛рми рморнБрмЦрнНрнЯрмормирнНрмдрнНрм░рнАрмХрнБ рмирнЗрмЗ рм░рммрм┐рммрм╛рм░ рм╕рмХрм╛рм│рнБ рм╕рмХрм╛рм│рнБ рммрм╕рм┐рмЫрм┐ рммрнИрмармХред рммрнИрмармХрм░рнЗ рммрм╣рнБ рморм╛рмирм╕ рмормирнНрмерми рмкрм░рнЗ рм╕рм┐рмкрм┐ рмпрнЛрм╢рнАрмЩрнНрмХрнБ рморнБрмЦрнНрнЯрмормирнНрмдрнНрм░рнА, рмЧрнЛрммрм┐рмирнНрмж рм╕рм┐рмВрм╣ рмбрнЛрмЯрм╛рм╕рм╛рм░рм╛рмЩрнНрмХрнБ рмЙрмкрморнБрмЦрнНрнЯрмормирнНрмдрнНрм░рнА рмУ рмкрнНрм░рмжрнЗрм╢ рмЕрмзрнНрнЯрмХрнНрм╖ рмнрм╛рммрнЗ рм╕рмЪрм┐рми рмкрм╛рмЗрм▓рмЯрмЩрнНрмХрнБ рммрмЫрм╛рмпрм╛рмЗрмЫрм┐ред рмЖрмЧрм╛рморнА рмирм┐рм░рнНрммрм╛рмЪрмирм░ рмХрморм╛рмг рм╕рморнНрмнрм╛рм│рм┐рммрнЗ рм╕рмЪрм┐рмиред рмпрмжрм┐ рмЖрмЧрм╛рморнА рмирм┐рм░рнНрммрм╛рмЪрмирм░рнЗ рмжрм│ рм░рм╛рмЬрм╕рнНрмерм╛рмирм░рнЗ рммрм┐рмЬрнЯ рм╣рм╛рм╕рм▓ рмХрм░рнЗ рмдрнЗрммрнЗ рм╕рмЪрм┐рми рм╣рнЗрммрнЗ рморнБрмЦрнНрнЯрмормирнНрмдрнНрм░рнАред рмПрмХ рмирнВрмЖ рмлрм░рнНрморнБрм▓рм╛рмХрнБ рмирнЗрмЗ рмжрм┐рм▓рнНрм▓рнАрм░рнЗ рм╣рм╛рмЗрмХрморм╛рмгрнНрмбрмЩрнНрмХ рмирнЗрмдрнГрмдрнНрммрм░рнЗ рммрнИрмармХ рмЕрмирнБрм╖рнНрмарм┐рмд рм╣рнЛрмЗрмерм┐рммрм╛ рмЬрм╛рмдрнАрнЯ рмЧрмгрморм╛рмзрнНрнЯрмо рм░рм┐рмкрнЛрм░рнНрмЯрм░рнБ рмЬрмгрм╛рмкрмбрм┐рмЫрм┐ред рмПрм╣рм┐ рмирм┐рм╖рнНрмкрмдрнНрмдрм┐ рмЕрмирнБрмпрм╛рнЯрнА рм╕рмВрмзрнНрнЯрм╛рм░рнЗ рмФрмкрмЪрм╛рм░рм┐рмХ рмШрнЛрм╖рмгрм╛ рм╣рнЗрмм рммрм┐рмзрм╛рнЯрмХрмжрм│ рммрнИрмармХрм░рнЗред
рмЕрм░рнНрмерм╛рмдрнН рмирм┐рмЬ рмЪрм╛рм▓рм░рнЗ рм╕рмлрм│ рм╣рнЛрмЗрмЫрмирнНрмдрм┐ рмЧрнЗрм╣рм▓рмЯред рмирм╛ рмкрм╛рмЗрм▓рмЯрмЩрнНрмХрнБ рморм┐рм│рм┐рмм рморнБрмЦрнНрнЯрмормирнНрмдрнНрм░рнА рмкрмж, рмирм╛рм╣рм┐рмБ рмЖрмЙ рнирнжрнирнж рмкрм░рм┐ рмжрм│рм░рнЗ рм╕рнГрм╖рнНрмЯрм┐ рм╣рнЗрмм рмЕрм╕рнНрмерм┐рм░рмдрм╛ред рнирнжрнирнжрм░рнЗ рмкрм╛рмЗрм▓рмЯрмЩрнНрмХ рммрм┐рмжрнНрм░рнЛрм╣ рм░рм╛рмЬрнНрнЯрм░рнЗ рмХрмВрмЧрнНрм░рнЗрм╕ рм╕рм░рмХрм╛рм░рмХрнБ рмнрм╛рмЩрнНрмЧрм┐рммрм╛ рм╕рнНрмерм┐рмдрм┐рмХрнБ рмирнЗрмЗ рмЖрм╕рм┐рмерм┐рм▓рм╛ред рмПрм╣рм┐ рм╕рморм╕рнНрнЯрм╛рм░ рм╕рморм╛рмзрм╛рми рмкрм╛рмЗрмБ рм╣рнБрмПрмдрм░ рмЬрм╛рмдрнАрнЯ рмирнЗрмдрнГрмдрнНрмм рмкрм╛рмЗрм▓рмЯрмЩрнНрмХрнБ рмЖрм╕рмирнНрмдрм╛ рмерм░рмХрнБ рморнБрмЦрнНрнЯрмормирнНрмдрнНрм░рнА рмкрмжрм░ рм▓рм▓рм┐рмкрмкрнН рмжрнЗрмЦрм╛рмЗрмЫрмирнНрмдрм┐ред рмпрмжрм┐ рмПрм╣рм┐ рм▓рм▓рм┐рмкрмкрнНтАМ рм░рнЗ рмкрм╛рмЗрм▓рмЯ рмнрм│рм┐рмЧрм▓рнЗ рмнрм▓, рмирнЛрм╣рм┐рм▓рнЗ рмХрмВрмЧрнНрм░рнЗрм╕рм░ рмЖрмнрнНрнЯрмирнНрмдрм░рм┐рмг рмХрмирнНрмжрм│рм░ рмлрм╛рмЗрмжрм╛ рмирнЗрммрм╛рмХрнБ рмЪрм╛рм╣рм┐рмБ рммрм╕рм┐рмерм┐рммрм╛ рммрм┐рмЬрнЗрмкрм┐ рммрм╛рмЬрм┐рморм╛рмд рмХрм░рм┐рммрм╛ рмкрм╛рмЗрмБ рм╣рнБрмПрмд рмЦрнЛрм▓рм┐рмпрм┐рмм рммрм╛рмЯ рммрнЛрм▓рм┐ рмкрнВрм░рнНрммрм░рнБ рмЖрм╢рмЩрнНрмХрм╛ рмкрнНрм░рмХрм╛рм╢ рмХрм░рм┐ рм╕рм╛рм░рм┐рмЫрмирнНрмдрм┐ рмПрмирм╕рм┐рммрм┐ рмкрнНрм░рморнБрмЦ рм╕рм░рмж рмкрм╛рн▒рм╛рм░ред
рмкрм╛рн▒рм╛рм░рмЩрнНрмХ рмЖрм╢рмЩрнНрмХрм╛рмХрнБ рмПрмбрм╛рмЗ рмжрм┐рмЖрмпрм╛рмЗ рми рмкрм╛рм░рнЗред рмХрм╛рм░рмг рмХрмВрмЧрнНрм░рнЗрм╕рм░ рмнрм┐рмдрм┐рм░рм┐ рмХрм│рм┐ рмЙрмкрм░рнЗ рммрм┐рмЬрнЗрмкрм┐рм░ рмЖрмЦрм┐ред рммрм┐рмнрм┐рмирнНрми рм░рм╛рмЬрнНрнЯрм░рнБ рммрм╣рнБ рмХрмВрмЧрнНрм░рнЗрм╕ рмирнЗрмдрм╛рмЩрнНрмХрнБ рмормзрнНрнЯ рмкрмжрнНрмо рмкрнЛрмЦрм░рнАрм░рнЗ рм╕рнНрмирм╛рми рмХрм░рм╛рмЗ рм╕рм╛рм░рм┐рмЫрмирнНрмдрм┐ рм╕рм╛рм╣рм╛ рмУ рморнЛрмжрм┐рмЩрнНрмХ рмпрнЛрмбрм┐ред рмПрм╣рм╛рмХрнБ рмирнЗрмЗ рм░рм╛рмЬрм╕рнНрмерм╛рми рммрм┐рмЬрнЗрмкрм┐рм░ рмирнЗрмдрм╛ рмХрм╣рм┐рм╕рм╛рм░рм┐рм▓рнЗрмгрм┐ рмХрм┐, рмпрмжрм┐ рмХрмВрмЧрнНрм░рнЗрм╕ рмЫрм╛рмбрм┐ рмХрнЗрм╣рм┐ рмдрм╛рмЩрнНрмХ рмжрм│рм░рнЗ рм╕рм╛рморм┐рм▓ рм╣рнЗрммрм╛рмХрнБ рмЪрм╛рм╣рмБрмирнНрмдрм┐, рм╕рнЗрморм╛рмирмЩрнНрмХрнБ рм╕рнНрммрм╛рмЧрмд рмХрм░рм╛рмпрм┐рммред рм╕рнЗрмкрнЗрмЯ
рм╣рм╛рмЗрмХрморм╛рмгрнНрмбрмЩрнНрмХ рмирм┐рм╖рнНрмкрмдрнНрмдрм┐ рм╕рм░рнНрммрнЛрмкрм░рнЗ рмХрм╣рм┐рммрм╛ рм╕рм╣ рмкрм╛рмЗрм▓рмЯ рммрм┐рмЬрнЗрмкрм┐рм░ рмЧрнБрмзрнНрм░рнБ рмжрнГрм╖рнНрмЯрм┐ рмкрнНрм░рмдрм┐ рмХрмВрмЧрнНрм░рнЗрм╕ рмирнЗрмдрм╛ рмормзрнНрнЯ рм╕рмЪрнЗрмдрми рмерм┐рммрм╛ рмкрм░рм┐ рмормирнЗ рм╣рнЗрмЙрмЫрм┐ред рмжрнБрмЗ рммрм░рнНрм╖ рмкрнВрм░рнНрммрм░рнБ рмжрм│рм░рнЗ рмирм┐рнЯрмо рмнрмЩрнНрмЧ рмХрм░рм┐рмерм┐рммрм╛ рмХрм┐рмЫрм┐ рм▓рнЛрмХ рмпрмжрм┐ рмПрм╣рм┐ рмкрмж рмкрм╛рмЗрмБ рммрм┐рммрнЗрмЪрм┐рмд рм╣рнБрмЕрмирнНрмдрм┐, рмдрнЗрммрнЗ рмПрм╣рм╛ рмЕрмдрнНрнЯрмирнНрмд рмжрнБрмГрмЦрмжрм╛рнЯрмХ рм╣рнЗрмм рммрнЛрм▓рм┐ рмХрм╣рм┐рмЫрмирнНрмдрм┐ рмормирнНрмдрнНрм░рнА рмб рм╕рнБрммрм╛рм╢ рмЧрм░рнНрмЧ
рмдрнЗрммрнЗ рморнБрмЦрнНрнЯрмормирнНрмдрнНрм░рнА рмкрмж рмкрм╛рмЗрмБ рмЬрм╛рмдрнАрнЯ рмирнЗрмдрнГрмдрнНрммрмЩрнНрмХ рмжрнНрммрм╛рм░рм╛ рмЪрнЯрми рмкрнНрм░рмХрнНрм░рм┐рнЯрм╛ рм╢рнЗрм╖ рм╣рнЛрмЗрмерм┐рммрм╛ рммрнЗрм│рнЗ рмХрм┐рмирнНрмдрнБ рмПрм╣рм╛ рмжрм│ рмкрм╛рмЗрмБ рм╕рм╣рмЬ рмормирнЗ рм╣рнЗрмЙрмирм╛рм╣рм┐рмБред рмкрм╛рмЗрм▓рмЯ рмПрм╣рм┐ рмирм┐рм╖рнНрмкрмдрнНрмдрм┐рмХрнБ рмХрм┐рмкрм░рм┐ рмЧрнНрм░рм╣рмг рмХрм░рм┐рммрнЗ рмдрм╛рм╣рм╛ рмкрм░рммрм░рнНрмдрнНрмдрнА рм╕рморнЯрм░рнЗ рм╣рм┐рмБ рм╕рнНрмкрм╖рнНрмЯ рм╣рнЗрммред