COURT

  • рмЙрмдрнНрмдрнЗрмЬрмХ рмкрнЛрм╖рм╛рмХ рмкрм┐рмирнНрмзрм┐рм▓рнЗ рм╣рнЗрммрмирм┐ рмпрнМрми рмЙрмдрнНрмкрнАрмбрмирм░ рмХрнЗрм╕рнН : рмХрнЛрм░рнНрмЯ

    рмХрнЗрм░рм│рм░ рмХрнЛрмЭрм┐рмХрнЛрмб рмЬрм┐рм▓рнНрм▓рм╛ рмЕрмжрм╛рм▓рмдрмЩрнНрмХ рмПрмХ рмпрнМрми рмЙрмдрнНрмкрнАрмбрми рморм╛рморм▓рм╛рм░рнЗ рмжрнЗрмЗрмерм┐рммрм╛ рмЯрм┐рмкрнНрмкрмгрнАрмХрнБ рмирнЗрмЗ рмЖрм░рморнНрмн рм╣рнЛрмЗрмЫрм┐ рммрм┐рммрм╛рмж ред рмЕрмнрм┐рмпрнБрмХрнНрмдрмХрнБ рмХрнЛрм░рнНрмЯ рмЖрмЧрнБрмЖ рмЬрм╛рморм┐рми рмкрнНрм░рмжрм╛рми рмХрм░рм┐рмерм┐рммрм╛рм░рнБ рм╕рм╛рмзрм╛рм░рмгрм░рнЗ рмкрнНрм░рмХрм╛рм╢ рмкрм╛рмЗрмЫрм┐ рмЕрм╕рмирнНрмдрнЛрм╖ ред рмЕрмжрм╛рм▓рмд рмХрм╣рм┐рмЫрмирнНрмдрм┐, тАШрмпрмжрм┐ рморм╣рм┐рм│рм╛ рмХрм┐рморнНрммрм╛ рмпрнБрммрмдрнА рмЙрмдрнНрмдрнЗрмЬрмХ рмкрнЛрм╖рм╛рмХ рмкрм┐рмирнНрмзрмирнНрмдрм┐ рмдрнЗрммрнЗ рмЕрмнрм┐рмпрнБрмХрнНрмд рммрм┐рм░рнБрмжрнНрмзрм░рнЗ рмЖрмЗрмкрм┐рм╕рм┐рм░ рмзрм╛рм░рм╛ рнйрнлрнк рмЖрмзрм╛рм░рм░рнЗ рмпрнМрми рмЙрмдрнНрмкрнАрмбрми рморм╛рморм▓рм╛ рм╣рнЛрмЗрмкрм╛рм░рм┐рмм рмирм╛рм╣рм┐рмБтАЩред

    рмдрнЗрммрнЗ рмХрнЛрм░рнНрмЯрмЩрнНрмХ рмПрм╣рм┐ рм░рм╛рнЯрмХрнБ рмирнЗрмЗ рмЖрм░рморнНрмн рм╣рнЛрмЗрмпрм╛рмЗрмЫрм┐ рммрм┐рммрм╛рмж ред рмЬрм╖рнНрмЯрм┐рм╕рнНтАМ рмПрм╕. рмХрнГрм╖рнНрмгрмХрнБрморм╛рм░, рм▓рнЗрмЦрмХ рм╕рм┐рммрм┐рмХрнНтАМ рмЪрмирнНрмжрнНрм░рмирмЩрнНрмХрнБ рмЕрмЧрнНрм░рнАрмо рмЬрм╛рморм┐рми рмкрнНрм░рмжрм╛рми рмХрм░рм┐рммрм╛ рм╕рм╣рм┐рмд рмПрмнрм│рм┐ рмЯрм┐рмкрнНрмкрмгрнА рмжрнЗрмЗрмЫрмирнНрмдрм┐ ред рмЪрмирнНрмжрнНрм░рми рммрм┐рм░рнБрмжрнНрмзрм░рнЗ рмжрнБрмЗ рммрм░рнНрм╖ рмкрнВрм░рнНрммрм░рнБ рмЬрмгрнЗ рм▓рнЗрмЦрм┐рмХрм╛ рмжрнБрм░рнНрммрнНрнЯрммрм╣рм╛рм░ рмХрм░рм┐рмерм┐рммрм╛рм░ рмЕрмнрм┐рмпрнЛрмЧ рмХрм░рм┐рмерм┐рм▓рнЗ ред

    рмЕрмжрм╛рм▓рмдрмЩрнНрмХ рм░рм╛рнЯрмХрнБ рмирнЗрмЗ рморм╣рм┐рм│рм╛ рм╕рм╛рморм╛рмЬрм┐рмХ рмХрм░рнНрморнА рмПрммрмВ рмкрнВрм░рнНрммрмдрми рммрм┐рмЪрм╛рм░рмкрмдрм┐ рмЖрмкрмдрнНрмдрм┐ рмЙрмарм╛рмЗрмЫрмирнНрмдрм┐ ред рмХрнЗрммрм│ рм╕рнЗрмдрм┐рмХрм┐ рмирнБрм╣рнЗрмБ рмПрм╣рм┐ рморм╛рморм▓рм╛рм░рнЗ рмПрммрнЗ рм╣рм╛рмЗрмХрнЛрм░рнНрмЯ рм╣рм╕рнНрмдрмХрнНрм╖рнЗрмк рмХрм░рм┐рммрм╛ рмЙрмЪрм┐рмд рммрнЛрм▓рм┐ рмЬрмгрнЗ рмкрнВрм░рнНрммрмдрми рммрм┐рмЪрм╛рм░рмкрмдрм┐ рмХрм╣рм┐рмЫрмирнНрмдрм┐ ред рмЕрмирнНрнЯрмкрмЯрнЗ рмкрнАрмбрм┐рмдрм╛ рмХрм╣рм┐рмЫрмирнНрмдрм┐, рммрм┐рмЪрм╛рм░рмкрмдрм┐рмЩрнНрмХ рм░рм╛рнЯрмХрнБ рмирнЗрмЗ рм╕рнЗ рмЦрнБрммрм╢рнАрмШрнНрм░ рм╣рм╛рмЗрмХрнЛрм░рнНрмЯ рмпрм┐рммрнЗ ред

    рморм╛рморм▓рм╛рм░ рм╢рнБрмгрм╛рмгрм┐ рммрнЗрм│рнЗ рммрм┐рмЪрм╛рм░рмкрмдрм┐ рмХрм╣рм┐рмерм┐рм▓рнЗ, рмЕрмнрм┐рмпрнБрмХрнНрмд рмирм┐рмЬ рмкрмХрнНрм╖ рм░рмЦрм┐рммрм╛ рм╕рм╣рм┐рмд рмкрнНрм░рморм╛рмг рмЖрмХрм╛рм░рм░рнЗ рмпрнЗрмЙрмБ рмлрмЯрнЛ рмХрнЛрм░рнНрмЯрмЩрнНрмХ рмирм┐рмХрмЯрм░рнЗ рмЙрмкрм╕рнНрмерм╛рмкрми рмХрм░рм┐рмерм┐рм▓рнЗ рм╕рнЗрмерм┐рм░рнЗ рм╕рнНрмкрм╖рнНрмЯ рмЬрмгрм╛рмкрмбрнБрмерм┐рм▓рм╛ рмпрнЗ, рмЕрмнрм┐рмпрнЛрмЧрмХрм╛рм░рнА рмПрмнрм│рм┐ рмбрнНрм░рнЗрм╕ рмкрм┐рмирнНрмзрм┐рмерм┐рм▓рнЗ рмпрм╛рм╣рм╛рмХрм┐ рмЙрм╕рмХрм╛рмЗрммрм╛ рмнрм│рм┐ рмерм┐рм▓рм╛ ред рмП рмХрнНрм╖рнЗрмдрнНрм░рм░рнЗ рмЖрмЗрмкрм┐рм╕рм┐рм░ рмзрм╛рм░рм╛ рнйрнлрнкрмХрнЗ рмЕрмирнБрмпрм╛рнЯрнА рмЕрмнрм┐рмпрнБрмХрнНрмд рммрм┐рм░рнБрмжрнНрмзрм░рнЗ рморм╛рморм▓рм╛ рм╣рнЛрмЗрмкрм╛рм░рм┐рмм рмирм╛рм╣рм┐рмБтАЩред рмЕрмирнНрнЯрмкрмЯрнЗ рм╕рнЛрм╕рм┐рмЖрм▓ рморм┐рмбрм┐рмЖрм░ рмХрм┐рмЫрм┐ рмлрмЯрнЛрмХрнБ рмирнЗрмЗ рмЕрмжрм╛рм▓рмдрмЩрнНрмХ рмирм┐рмХрмЯрм░рнЗ рмЙрмкрм╕рнНрмерм╛рмкрмирм╛ рмХрм░рм╛рмпрм╛рмЗрмерм┐рммрм╛ рмкрнАрмбрм┐рмдрм╛рмЩрнНрмХ рмкрм░рм┐рммрм╛рм░ рм▓рнЛрмХрнЗ рмЕрмнрм┐рмпрнЛрмЧ рмХрм░рм┐рмЫрмирнНрмдрм┐ ред

    рмЕрмжрм╛рм▓рмд рмПрм╣рм╛ рмормзрнНрнЯ рмХрм╣рм┐рмЫрмирнНрмдрм┐, тАШрмШрмЯрмгрм╛рм░ рни рммрм░рнНрм╖ рмкрм░рнЗ рмХрм╛рм╣рм┐рмБрмХрм┐ рморм╛рморм▓рм╛ рм░рнБрмЬрнБ рмХрм▓рнЗ рмкрнАрмбрм┐рмдрм╛ ред рмХрм╛рм╣рм┐рмБрмХрм┐ рмдрнБрм░рмирнНрмд рмерм╛рмирм╛рм░рнЗ рмЕрмнрм┐рмпрнЛрмЧ рмХрм░рм┐рмирмерм┐рм▓рнЗ ред рморм╛рморм▓рм╛ рнирнжрнирнж рмлрнЗрммрнГрмЖрм░рнАрм░рнЗ рмШрмЯрм┐рмерм┐рм▓рнЗ рм╕рнБрмжрнНрмзрм╛ рни рммрм░рнНрм╖ рмкрм░рнЗ рмкрнАрмбрм┐рмдрм╛ рмПрмлрмЖрмЗрмЖрм░рнНтАМ рмжрнЗрмЗрмЫрмирнНрмдрм┐ ред рмкрнАрмбрм┐рмдрм╛ рморм╣рм┐рм│рм╛рмЩрнНрмХ рмХрм╣рм┐рммрм╛ рмХрмерм╛ рмпрнЗ, рм▓рнЗрмЦрмХрмЩрнНрмХ рмПрмХ рм╕рморнНрморнАрм│рмирнА рмЪрм╛рм▓рм┐рмерм┐рммрм╛ рммрнЗрм│рнЗ рмПрмнрм│рм┐ рмШрмЯрмгрм╛ рмШрмЯрм┐рмерм┐рм▓рм╛ ред рмЕрмнрм┐рмпрнЛрмЧрм░рнЗ рморм╣рм┐рм│рм╛ рмХрм╣рм┐рмерм┐рм▓рнЗ рмпрнЗ, рмЕрмнрм┐рмпрнБрмХрнНрмд рмЪрмирнНрмжрнНрм░рми рммрм╛рм░рморнНрммрм╛рм░ рмдрм╛рмЩрнНрмХрнБ рмлрнЛрми рмХрм░рнБрмерм┐рм▓рнЗ рмПрммрмВ рм╣рмЗрм░рм╛рмг рмХрм░рнБрмерм┐рм▓рнЗ ред рмПрмнрм│рм┐ рм╣рм░рмХрмдрнН рмЕрм╕рм╣рнНрнЯ рм╣рнЗрммрм╛рм░рнБ рммрм╛рмзрнНрнЯ рм╣рнЛрмЗ рм╕рнЗ рморм╛рморм▓рм╛ рм░рнБрмЬрнБ рмХрм░рм┐рмерм┐рм▓рнЗ ред

    рм╕рммрнБрмарм╛рм░рнБ рмЧрнБрм░рнБрмдрнНрммрмкрнВрм░рнНрмгрнНрмг рмХрмерм╛ рм╣рнЗрмЙрмЫрм┐, рмЕрмнрм┐рмпрнБрмХрнНрмд рм╕рм┐рммрм┐рмХрнНтАМ рмЪрмирнНрмжрнНрм░рмирмЩрнНрмХ рммрнЯрм╕ рм╣рнЗрмЙрмЫрм┐ рннрнк рммрм░рнНрм╖ ред рмдрнЗрмгрнБ рмкрм░рм┐рмгрмд рммрнЯрм╕рм░рнЗ рмЬрмгрнЗ рмХрм┐рмнрм│рм┐ рмнрм╛рммрнЗ рмпрнМрми рмЙрмдрнНрмкрнАрмбрми рмХрм░рм┐рммрнЗ рмПрммрмВ рмжрнБрм░рнНрммрнНрнЯрммрм╣рм╛рм░ рмХрм░рм┐рммрнЗ рммрнЛрм▓рм┐ рмХрнЛрм░рнНрмЯ рмкрнНрм░рм╢рнНрми рмХрм╣рм┐рмЫрмирнНрмдрм┐ l рмПрм╣рм┐ рм░рм╛рнЯ рмкрм░рнЗ рмПрммрнЗ рммрм┐рммрм╛рмж рмжрнЗрмЦрм┐рммрм╛рмХрнБ рморм┐рм│рм┐рмЫрм┐ l

  • рммрм┐рмЪрм╛рм░рм╛рмзрнАрми рммрмирнНрмжрнАрмЩрнНрмХрнБ рморнБрмХрнНрмд рмХрм░рм┐рммрм╛рмХрнБ рмдрнНрн▒рм░рм┐рмд рмкрмжрмХрнНрм╖рнЗрмк рмирм┐рмЕ : рмкрнНрм░рмзрм╛рмирмормирнНрмдрнНрм░рнА

    рммрм┐рмЪрм╛рм░рм╛рмзрнАрми рммрмирнНрмжрнАрмЩрнНрмХрнБ рморнБрмХрнНрмд рмХрм░рм┐рммрм╛рмХрнБ рмдрнНрн▒рм░рм┐рмд рмкрмжрмХрнНрм╖рнЗрмк рмирм┐рмЕред рм╕рнЗрморм╛рмирмЩрнНрмХрнБ рмЖрмЗрмирмЧрмд рм╕рм╣рм╛рнЯрмдрм╛ рмпрнЛрмЧрм╛рмЗрмжрм┐рмЕред рмЬрм┐рм▓рнНрм▓рм╛ рм▓рм┐рмЧрм╛рм▓рнН рм╕рм░рнНрмнрм┐рм╕ рмЕрмернЛрм░рм┐рмЯрм┐рмЩрнНрмХрнБ рмПрмнрм│рм┐ рммрм╛рмЧрм░рнЗ рмЕрмкрм┐рм▓рнН рмХрм░рм┐рмЫрмирнНрмдрм┐ рмкрнНрм░рмзрм╛рмирмормирнНрмдрнНрм░рнА рморнЛрмжрм┐ред рм╕рм░рнНрммрмнрм╛рм░рмдрнАрнЯ рмЬрм┐рм▓рнНрм▓рм╛ рм▓рм┐рмЧрм╛рм▓рнН рм╕рм░рнНрмнрм┐рм╕ рмЕрмернЛрм░рм┐рмЯрм┐рм░ рмкрнНрм░рмермо рммрнИрмармХрм░рнЗ рмПрм╣рм╛рмХрнБ рмирнЗрмЗ рмЧрнБрм░рнБрмдрнНрн▒рм╛рм░рнЛрмк рмХрм░рм┐рмЫрмирнНрмдрм┐ рмкрнНрм░рмзрм╛рмирмормирнНрмдрнНрм░рнАред рм▓рнЛрмХрмЩрнНрмХ рммрм┐рм╢рнНрн▒рм╛рм╕ рмирнНрнЯрм╛рнЯрм┐рмХ рммрнНрнЯрммрм╕рнНрмерм╛ рмЙрмкрм░рнЗ рмЕрмдрнБрмЯ рм░рм╣рм┐рмЫрм┐ред рмПрмерм┐рм▓рм╛рмЧрм┐ рмпрнЗ, рмирнНрнЯрм╛рнЯрм╛рм│рнЯрм░ рмжрнНрн▒рм╛рм░ рмдрм╛рмЩрнНрмХ рм▓рм╛рмЧрм┐ рм╕рммрнБрммрнЗрм│рнЗ рмЦрнЛрм▓рм╛ред рмХрнЗрм╣рм┐ рм╕рнЗрморм╛рмирмЩрнНрмХ рмЕрм╕рнБрммрм┐рмзрм╛ рми рм╢рнБрмгрм┐рм▓рнЗ рммрм┐ рмЕрмжрм╛рм▓рмд рмЕрмЫрм┐ рммрнЛрм▓рм┐ рмП рммрм┐рм╢рнНрн▒рм╛рм╕ рмормирм░рнЗ рм░рм╣рм┐рмЫрм┐ред рмЧрм▓рм╛ рно рммрм░рнНрм╖ рмнрм┐рмдрм░рнЗ рм╕рм░рмХрм╛рм░ рмирнНрнЯрм╛рнЯрм╛рм│рнЯрм░ рмнрм┐рмдрнНрмдрм┐рмнрнВрморм┐рмХрнБ рм╕рнБрмжрнГрнЭ рмХрм░рм┐рммрм╛рмХрнБ рмирм┐рм░рмирнНрмдрм░ рмкрнНрм░рнЯрм╛рм╕ рмЬрм╛рм░рм┐ рм░рмЦрм┐рмЫрмирнНрмдрм┐ред рмПрмерм┐рм▓рм╛рмЧрм┐ рнп рм╣рмЬрм╛рм░ рмХрнЛрмЯрм┐ рмЯрмЩрнНрмХрм╛ рммрм┐ рмормЮрнНрмЬрнБрм░рнА рмкрм╛рмЗрмЫрм┐ред рмЬрм┐рм▓рнНрм▓рм╛ рмХрнЛрм░рнНрмЯрм░рнЗ рнз рмХрнЛрмЯрм┐, рм╕рнБрмкрнНрм░рм┐рмормХрнЛрм░рнНрмЯ рмУ рммрм┐рмнрм┐рмирнНрми рм╣рм╛рмЗрмХрнЛрм░рнНрмЯрм░рнЗ рнмрнж рм▓рмХрнНрм╖ рморм╛рморм▓рм╛ рмнрм░рнНрмЪрнНрмЪрнБрмЖрм▓рм░рнЗ рм╢рнБрмгрм╛рмгрнА рм╣рнЛрмЗрмЫрм┐ред рммрм┐рм╢рнЗрм╖ рмХрм░рм┐ рмХрнЛрмнрм┐рмбрнН рм╕рморнЯрм░рнЗ рмнрм░рнНрмЪрнНрмЪрнБрмЖрм▓ рм╢рнБрмгрм╛рмгрнАрм░рнЗ рмЧрнБрм░рнБрмдрнНрн▒ рммрм╛рм░рм┐ рм╣рнЛрмЗрмкрнЬрм┐рмерм┐рм▓рм╛ред рм╕рморнНрн▒рм┐рмзрм╛рмирм╕рморнНрмормд рмирм┐рмЬрм░ рмЕрмзрм┐рмХрм╛рм░ рмУ рмХрм░рнНрмдрнНрмдрммрнНрнЯ рммрм╛рммрмжрм░рнЗ рм▓рнЛрмХрмЩрнНрмХрнБ рм╕рмЪрнЗрмдрми рмХрм░рм┐рммрм╛ рмЕрмзрм┐рмХ рмЬрм░рнБрм░рнА рммрнЛрм▓рм┐ рмормдрммрнНрнЯрмХрнНрмд рмХрм░рм┐рмЫрмирнНрмдрм┐ рмкрнНрм░рмзрм╛рмирмормирнНрмдрнНрм░рнАред

    рм▓рнЛрмХрмЩрнНрмХ рммрм┐рмХрм╛рм╢ рмкрм╛рмЗрмБ рмкрм░рммрм░рнНрмдрнНрмдрнА рмкрнАрмврм┐рмХрнБ рмЯрнЗрмХрнНрмирнЛрм▓рнЛрмЬрм┐ рмЙрмкрм░рнЗ рмЕрмзрм┐рмХ рмлрнЛрмХрм╕рнН рмХрм░рм┐рммрм╛рмХрнБ рм╣рнЗрмм рммрнЛрм▓рм┐ рмкрм░рм╛рморм░рнНрм╢ рмжрнЗрмЗрмЫрмирнНрмдрм┐ рморнЛрмжрм┐ред рм╕рнЗрмкрмЯрнЗ рм╕рнБрмкрнНрм░рм┐рмормХрнЛрм░рнНрмЯрм░ рмкрнНрм░рмзрм╛рми рммрм┐рмЪрм╛рм░рмкрмдрм┐ рмЬрм╖рнНрмЯрм┐рм╕ рмПрми.рмнрм┐.рм░рмормгрм╛ рмХрм╣рм┐рмЫрмирнНрмдрм┐ рмХрм┐, рмЬрм┐рм▓рнНрм▓рм╛ рмирнНрнЯрм╛рнЯрм┐рмХ рммрнНрнЯрммрм╕рнНрмерм╛ рмПрммрнЗрмХрм╛рм░ рм╕рморнЯ рмкрм╛рмЗрмБ рмЕрмдрм┐ рмЕрмкрм░рм┐рм╣рм╛рм░рнНрмпрнНрнЯ рм╣рнЛрмЗрмкрнЬрм┐рмЫрм┐ред рммрм┐рм╢рнЗрм╖ рмХрм░рм┐ рмдрм│рмХрнЛрм░рнНрмЯрмХрнБ рм╕рнБрмжрнГрнЭ рмХрм░рм┐рммрм╛ рмЕрмзрм┐рмХ рмЖрммрм╢рнНрнЯрмХред рмХрм╛рм░рмг рмЬрм┐рм▓рнНрм▓рм╛ рмХрнЛрм░рнНрмЯ рм╣рм┐рмБ рм▓рнЛрмХрмЩрнНрмХрнБ рмирнНрнЯрм╛рнЯ рмжрнЗрммрм╛рм░ рмкрнНрм░рмермо рмХрмгрнНрмЯрм╛рмХрнНрмЯ рмкрмПрмгрнНрмЯред рмкрнНрм░рмдрм┐ рмкрнНрм░рмЧрмдрм┐рм╢рнАрм│ рмирнАрмдрм┐ рмПрмХ рм╕рнБрмжрнГрнЭ рморнВрм│рмжрнБрмЖ рмЖрммрм╢рнНрнЯрмХ рмХрм░рнЗред рмЖрмЙ рмПрм╣рм┐ рм╕рморм╛рми рмХрмерм╛ рмЬрнБрмбрм┐рм╕рм┐рмЖрм░рнАрм░рнЗ рммрм┐ рмжрм░рмХрм╛рм░ред рм▓рнЛрмХрмормдрм░рнЗ рмЬрм┐рм▓рнНрм▓рм╛ рмХрнЛрм░рнНрмЯрм░рнБ рм╣рм┐рмБ рмирнНрнЯрм╛рнЯрм╛рм│рнЯрм░ рмжрнНрн▒рм╛рм░рм╕рнНрме рм╣рнЛрмЗ рмХрм┐ рмЕрмирнБрмнрнВрмдрм┐ рм╕рм╛рмЙрмБрмЯрм┐рмЫрмирнНрмдрм┐, рмПрмЗрмарнБ рм╣рм┐рмБ рм▓рнЛрмХрнЗ рмЕрмнрм┐рмЬрнНрмЮрмдрм╛ рм╣рм╛рм╕рм▓ рмХрм░рм┐рмирм┐рмЕрмирнНрмдрм┐ред рм╕рнЗрмерм┐рм▓рм╛рмЧрм┐ рмд рмдрм│рмХрнЛрм░рнНрмЯрм░ рмХрм╛рмирнНрмзрм░рнЗ рммрнЬ рмЧрнБрм░рмнрм╛рм░ рм░рм╣рм┐рмЫрм┐ред рмХрм╛рм░рмг рмдрм│рмХрнЛрм░рнНрмЯ рм╣рм┐рмБ рм▓рнЛрмХрмЩрнНрмХ рмЕрм╕рнБрммрм┐рмзрм╛ рмУ рм╕рм╛рморм╛рмЬрм┐рмХ рмкрнНрм░рм╕рмЩрнНрмЧрмХрнБ рмарм┐рмХрнН рмнрм╛рммрм░рнЗ рммрнБрмЭрм┐рмкрм╛рм░рм┐рммрм╛рм░ рмкрнНрм░рмХрнГрм╖рнНрма рмХрнНрм╖рнЗрмдрнНрм░ рмЕрмЯрнЗред рмЖрмЙ рмПрмерм┐рмкрм╛рмЗрмБ рморм▓рмЯрм┐рмлрнЗрм╕рнЗрмЯрнН рмЯрм╛рм╕рнНрмХ рмУ рм░рнЛрм▓рнН рмирм┐рм░рнНрммрм╛рм╣ рмХрм░рм┐рммрм╛рмХрнБ рмкрнЬрм┐рмм рмЬрм┐рм▓рнНрм▓рм╛ рмХрнЛрм░рнНрмЯрмЧрнБрмбрм┐рмХрнБ рммрнЛрм▓рм┐ рмкрм░рм╛рморм░рнНрм╢ рмжрнЗрмЗрмЫрмирнНрмдрм┐ рмкрнНрм░рмзрм╛рми рммрм┐рмЪрм╛рм░рмкрмдрм┐ред

    рмпрмжрм┐ рмХрнЛрм░рнНрмЯ рм╕рморнНрморнБрмЦрнАрми рм╣рнЗрмЙрмерм┐рммрм╛ рм╕рморм╕рнНрнЯрм╛рмХрнБ рм▓рнБрмЪрм╛рмЗрмм, рмЪрм╛рмкрм░рнЗ рм░рм╣рм┐рмм рмУ рмарм┐рмХрмгрм╛ рмнрм╛рммрм░рнЗ рмЬрмгрм╛рмЗрммрмирм┐, рмдрнЗрммрнЗ рм╕рм┐рм╖рнНрмЯрмо рм╣рм▓рм┐рмпрм┐рммред рмПрмкрм░рм┐рмХрм┐ рмкрнНрм░рмзрм╛рми рммрм┐рмЪрм╛рм░рмкрмдрм┐ рмЖрм╢рмЩрнНрмХрм╛ рммрм┐ рмХрм░рм┐рмЫрмирнНрмдрм┐ рмХрм┐, рмПрмнрм│рм┐ рмормирнЛрмнрм╛рмм рм░рм╣рм┐рм▓рнЗ, рм╕рм╛рморм╛рмЬрм┐рмХ рмирнНрнЯрм╛рнЯ рмжрнЗрммрм╛рм░рнЗ рмЕрмжрм╛рм▓рмд рмирм┐рмЬрм░ рм╕рм╛рморнНрн▒рм┐рмзрм╛рмирм┐рмХ рмжрм╛рнЯрм┐рмдрнНрн▒ рмирм┐рм░рнНрммрм╛рм╣ рмХрм░рм┐рмкрм╛рм░рм┐рммрмирм┐ред рм╕рнЗрмерм┐рм▓рм╛рмЧрм┐ рмбрм┐рммрнЗрмЯрнН рмУ рмбрм┐рм╕рм╛рмЗрмбрнН рмерм┐рмУрм░рнАрмХрнБ рмЕрмирнБрм╕рм░рмг рмХрм░рм┐рммрм╛рмХрнБ рмЖрм╣рнНрн▒рм╛рми рмжрнЗрмЗрмЫрмирнНрмдрм┐ рмкрнНрм░рмзрм╛рми рммрм┐рмЪрм╛рм░рмкрмдрм┐ рмЬрм╖рнНрмЯрм┐рм╕ рм░рмормгрм╛ред рмЪрм╛рмХрм┐рм░рнАрм░ рм╕рм░рнНрмдрнНрмд, рмкрм╛рм░рм┐рм╢рнНрм░рморм┐рмХ рмУ рмнрм┐рмдрнНрмдрм┐рмнрнВрморм┐рм░ рмЖрм╣рнНрн▒рм╛рми рмпрнЗрморм┐рмдрм┐ рмЪрм╛рмкрм░ рмЧрнЛрмЯрм┐рмП рмЧрнЛрмЯрм┐рмП рмЖрмзрм╛рм░ рммрнЛрм▓рм┐ рмжрм░рнНрм╢рм╛рмЗрмЫрмирнНрмдрм┐ рмЬрм╖рнНрмЯрм┐рм╕ рм░рмормгрм╛ред рммрм┐рмЪрм╛рм░рм╛рмзрнАрми рммрмирнНрмжрнАрмЩрнНрмХ рммрм╛рммрмжрм░рнЗ рмдрнНрн▒рм░рм┐рмд рм╢рнБрмгрм╛рмгрнА рмУ рммрм┐рмЪрм╛рм░рмХрнБ рмирнЗрмЗ рмЧрнБрм░рнБрмдрнНрн▒рм╛рм░рнЛрмк рмХрм░рм┐рмЫрмирнНрмдрм┐ рмкрнНрм░рмзрм╛рми рммрм┐рмЪрм╛рм░рмкрмдрм┐ред рмУрмХрм┐рм▓рмЩрнНрмХ рмкрнНрм░рмнрм╛рммрм╢рм╛рм│рнА рмпрнБрмХрнНрмдрм┐ рмУ рмдрм░рнНрмХ рмпрнЗрмдрм┐рмХрм┐ рмЬрм░рнБрм░рнАред рм╕рнЗрмнрм│рм┐ рмнрм╛рммрм░рнЗ рмУрмХрм┐рм▓ рммрм┐ рм╕рморм░рнНрмкрм┐рмд рм╣рнЗрммрм╛ рмжрм░рмХрм╛рм░ред

    рмХрм╛рм░рмг рммрм┐рмЪрм╛рм░рм╛рмзрнАрми рммрмирнНрмжрнА рмдрмерм╛ рм╕рнЗрморм╛рмирмЩрнНрмХ рморм╣рмХрм┐рм▓рм░ рм╕рнНрмерм┐рмдрм┐ рмУ рмЖрммрм╢рнНрнЯрмХрмдрм╛рмХрнБ рм╣рнГрмжрнЯрмЩрнНрмЧрмо рмХрм░рм┐рммрм╛ рмжрм░рмХрм╛рм░ рмУрмХрм┐рм▓ред рм╕рнЗрмерм┐рм▓рм╛рмЧрм┐ рмЬрнЗрм▓рмХрнБ рмнрм┐рмЬрм┐рмЯрнН рмХрм░рм┐ рморм╣рмХрм┐рм▓рмЩрнНрмХ рммрм╛рм╕рнНрмдрммрмдрм╛рмХрнБ рммрнБрмЭрм┐рммрм╛ рмжрм░рмХрм╛рм░ред рмПрмбрм┐рмЖрм░ рмУ рм▓рнЛрмХрмЕрмжрм╛рм▓рмдрмХрнБ рм╕рнБрмжрнГрмв рмХрм▓рнЗ рмЕрмжрм╛рм▓рмдрм░рнЗ рмЧрнЬрнБрмерм┐рммрм╛ рморм╛рморм▓рм╛рм░ рммрнЛрмЭ рмУ рммрнНрнЯрм╛рмХрм▓рмЧрнН рмжрнВрм░ рм╣рнЛрмЗрмкрм╛рм░рм┐рмм рммрнЛрм▓рм┐ рмормдрмкрнЛрм╖рмг рмХрм░рм┐рмЫрмирнНрмдрм┐ рмкрнНрм░рмзрм╛рми рммрм┐рмЪрм╛рм░рмкрмдрм┐ред рмХрм╛рм░рмг рмПрм╣рм┐ рмжрнБрмЗрмЯрм┐ рмкрнНрм▓рм╛рмЯрмлрм░рнНрморм░рнЗ рм▓рмХрнНрм╖ рм▓рмХрнНрм╖ рм▓рнЛрмХ рмирм┐рмЬрм░ рмЕрмнрм┐рмпрнЛрмЧрм░ рм╕рморм╛рмзрм╛рми рмкрм╛рмЗрмкрм╛рм░рнБрмЫрмирнНрмдрм┐ред рмжрнЗрм╢рм░ рм╢рмХрнНрмдрм┐ рм╣рнЗрмЙрмЫрмирнНрмдрм┐ рмпрнБрммрммрм░рнНрмЧред рмпрмжрм┐ рм╕рнЗрморм╛рмирмЩрнНрмХрнБ рмЙрмкрмпрнБрмХрнНрмд рмдрм╛рм▓рм┐рмо рмжрм┐рмЖрмпрм╛рмП, рмдрнЗрммрнЗ рм╕рнЗрморм╛рмирмЩрнНрмХрм░ рмжрмХрнНрм╖рмдрм╛рмХрнБ рм╕рм╛рморм╛рмЬрм┐рмХ рмУ рмЕрм░рнНрмермирнИрмдрм┐рмХ рмкрнНрм░рмЧрмдрм┐рм░рнЗ рм▓рмЧрм╛рмпрм╛рмЗрмкрм╛рм░рм┐рммред рмЬрмирм╕рмВрмЦрнНрнЯрм╛рм░ рннрнж рмкрнНрм░рмдрм┐рм╢рмд рм▓рнЛрмХрмЩрнНрмХрнБ рморм╛рмЧрмгрм╛ рмЖрмЗрмирмЧрмд рм╕рм╣рм╛рнЯрмдрм╛ рмпрнЛрмЧрм╛рмЗрмжрнЗрммрм╛рм░ рм▓рмХрнНрм╖рнНрнЯ рм░рм╣рм┐рмЫрм┐ред рм╕рнЗрмкрмЯрнЗ рмХрнЗрмирнНрмжрнНрм░ рмЖрмЗрмирмормирнНрмдрнНрм░рнА рмХрм┐рм░рмг рм░рм┐рмЬрнНрмЬрнБ рмХрм╣рм┐рмЫрмирнНрмдрм┐ рмХрм┐, рмлрнНрнЯрм╛рморм┐рм▓рм┐ рмХрнЛрм░рнНрмЯрм░рнЗ рмЧрнЬрнБрмерм┐рммрм╛ рморм╛рморм▓рм╛рмХрнБ рмдрнНрн▒рм░рм┐рмд рм╕рморм╛рмзрм╛рми рм▓рм╛рмЧрм┐ рм╕рнБрмирм┐рм╢рнНрмЪрм┐рмд рмХрм░рм╛рмпрм╛рмЙрмЫрм┐ред рмПрммрнЗ рнзрнз рм▓рмХрнНрм╖рм░рнБ рммрнЗрм╢рнА рморм╛рморм▓рм╛ рмкрнЗрмгрнНрмбрм┐рмВ рмЕрмЫрм┐ред рмкрм░рм┐рммрм╛рм░рм░рнЗ рммрнЬрмЩрнНрмХ рмнрм┐рмдрм░рнЗ рммрм┐рммрм╛рмжрм░рнБ рмХрм╛рм╣рм┐рмБрмХрм┐ рмЫрнЛрмЯ рмкрм┐рм▓рм╛ рмнрнЛрмЧрм┐рммрнЗред

    рм╕рнЗрмерм┐рм▓рм╛рмЧрм┐ рмкрм░рм┐рммрм╛рм░ рмЕрмжрм╛рм▓рмдрм░рнЗ рмЧрнЬрнБрмерм┐рммрм╛ рморм╛рморм▓рм╛рм░ рмдрнНрн▒рм░рм┐рмд рммрм┐рмЪрм╛рм░ рм▓рм╛рмЧрм┐ рмЬрм┐рм▓рнНрм▓рм╛ рмЬрмЬрнН рмЩрнНрмХрнБ рмЕрмкрм┐рм▓рнН рмХрм░рм┐рмЫрмирнНрмдрм┐ рмормирнНрмдрнНрм░рнА рм░рм┐рмЬрнНрмЬрнБред рм▓рнЛрмХрм╕рмнрм╛рм░рнЗ рмлрнНрнЯрм╛рморм┐рм▓рм┐ рмХрнЛрм░рнНрмЯ рмЖрморнЗрмгрнНрмбрморнЗрмгрнНрмЯрнН рммрм┐рм▓рнН рнирнжрнзрнз рмкрм╛рм░рм┐рмд рм╣рнЛрмЗрм╕рм╛рм░рм┐рмЫрм┐ред рмЖрм╕рмирнНрмдрм╛ рм╕рмкрнНрмдрм╛рм╣рм░рнЗ рм░рм╛рмЬрнНрнЯрм╕рмнрм╛рм░рнЗ рмЙрмкрм╕рнНрмерм╛рмкрм┐рмд рм╣рнЗрммред рмЯрнЗрм▓рм┐- рм▓ рмкрнНрм░рнЛрмЧрнНрм░рм╛рмо рмкрм╛рмЗрмБ рмкрнНрм░рмдрм┐ рмЬрм┐рм▓рнНрм▓рм╛рм░рнЗ рмирм╛рм▓рм╕рм╛ рннрм╢рм╣ рмЖрмЗрмирмЬрнАрммрм┐рмЩрнНрмХрнБ рмирм┐рмпрнБрмХрнНрмдрм┐ рмжрнЗрммрм╛рмХрнБ рмпрм╛рмЙрмЫрм┐ред рмПрм╣рм┐ рмПрмормкрнНрнЯрм╛рмирнЗрм▓рнН рм▓рнЯрм░ рм░рнЗрмлрнЗрм░рм╛рм▓ рм▓рнЯрм░ рмнрм╛рммрм░рнЗ рмкрм░рм┐рмЧрмгрм┐рмд рм╣рнЗрммрнЗ рмУ рм╕рморм╕рнНрнЯрм╛рмХрнБ рмПрнЬрм╛рмЗрммрм╛ рм╕рм╣ рмкрнНрм░рм┐-рм▓рм┐рмЯрм┐рмЧрнЗрм╕рми рм╖рнНрмЯрнЗрмЬрнНтАМрм░рнБ рм╕рморм╕рнНрнЯрм╛ рмдрнБрмЯрм╛рмЗрммрм╛рмХрнБ рмкрнНрм░рнЯрм╛рм╕ рмХрм░рм┐рммрнЗред рмирнНрнЯрм╛рнЯрммрмирнНрмзрнБ рмпрнЛрмЬрмирм╛рм░рнЗ рнзрнзрни рмЖрмХрм╛рмЩрнНрмХрнНрм╖рнА рмЬрм┐рм▓рнНрм▓рм╛рм░рнЗ рм▓рнЛрмХрмЩрнНрмХрнБ рмЖрмЗрмирмЧрмд рм╢рм┐рмХрнНрм╖рм╛, рм╕рмЪрнЗрмдрми рмХрм░рм╛рмЗрммрм╛рмХрнБ рмкрнНрм░рнЯрм╛рм╕ рмЬрм╛рм░рм┐ рм░рм╣рм┐рмЫрм┐ред рмЕрмЧрм╖рнНрмЯ рнзрнл рмирмЪрнЗрмдрнН рмдрм╛ рмЖрмЧрм░рнБ рмЕрмзрм┐рмХрм░рнБ рмЕрмзрм┐рмХ рммрм┐рмЪрм╛рм░рм╛рмзрнАрми рмХрмПрмжрнАрмЩрнНрмХрнБ рморнБрмХрнНрмд рмХрм░рм┐рммрм╛рмХрнБ рмЯрм╛рм░рнНрмЧрнЗрмЯ рм░рм╣рм┐рмЫрм┐ред рмЖрмЬрм╛рмжрм┐ рмХрм┐ рмЕрморнГрмд рморм╣рнЛрмдрнНрм╕рмм рмкрм╛рм│рми рмХрм░рнБрмерм┐рммрм╛рм░рнБ рмПрм╣рм┐ рмЯрм╛рм░рнНрмЧрнЗрмЯ рм░рм╣рм┐рмЫрм┐ рммрнЛрм▓рм┐ рмХрм╣рм┐рмЫрмирнНрмдрм┐ рмХрнЗрмирнНрмжрнНрм░ рмЖрмЗрми рмормирнНрмдрнНрм░рнАред

    • рмкрнНрм░рмжрнАрмк рмирм╛рнЯрмХрмЩрнНрмХ рм░рм┐рмкрнЛрм░рнНрмЯ
  • рм╕рмдрнЗрмирнНрмжрнНрм░ рмЬрнИрми рморм╛рморм▓рм╛: рмЗрмбрм┐рмХрнБ рмХрнЛрм░рнНрмЯрмЩрнНрмХ рмнрм░рнНрмдрнНрм╕рмирм╛

    рмирнВрмЖрмжрм┐рм▓рнНрм▓рнА: рм╕рмдрнЗрмирнНрмжрнНрм░ рмЬрнИрми рморм╛рморм▓рм╛рм░рнЗ рмЗрмбрм┐рмХрнБ рмжрм┐рм▓рнНрм▓рнА рм░рм╛рмЙрмЬ рмПрмнрнЗрмирнНрнЯрнБ рмХрнЛрм░рнНрмЯрмЩрнНрмХ рмнрм░рнНрмдрнНрм╕рмирм╛ред рмЗрмбрм┐рм░ рмЪрм╛рм░рнНрмЬрм╕рм┐рмЯ рмЙрмкрм░рнЗ рмХрнЛрм░рнНрмЯ рм╢рнБрмгрм╛рмгрм┐ рмХрм╛рм│рм░рнЗ рмХрм╣рм┐рмЫрмирнНрмдрм┐, рмпрнЗрмЙрмБ рмХрморнНрмкрм╛рмирнА рм╕рм╣ рм╕рмдрнЗрмирнНрмжрнНрм░рмЩрнНрмХрнБ рмжрнЛрм╖рнА рмХрм░рм╛рмпрм╛рмЗрмЫрм┐, рм╕рнЗрм╣рм┐ рмХрморнНрмкрм╛рмирнА рм╕рм╣ рм╕рмдрнЗрмирнНрмжрнНрм░рмЩрнНрмХрм░ рмХрнМрмгрм╕рм┐ рм╕рморнНрмкрм░рнНрмХ рммрм╛ рмнрм╛рмЧрм┐рмжрм╛рм░рнА рмирм╛рм╣рм┐рмБред рмд рмХрмг рмдрнБрмо рм▓рнЗрмЦрм┐рммрм╛ рмжрнНрммрм╛рм░рм╛ рмХрморнНрмкрм╛рмирнА рм╕рмдрнЗрмирнНрмжрнНрм░рмЩрнНрмХрм░ рм╣рнЛрмЗрмпрм┐рмм рммрнЛрм▓рм┐ рмХрнЛрм░рнНрмЯ рмкрнНрм░рм╢рнНрмирмХрм░рм┐рмЫрмирнНрмдрм┐ред

    рмормирм┐рм▓рмгрнНрмбрм░рм┐рмВ рморм╛рморм▓рм╛рм░рнЗ рмЗрмбрм┐ рмжрм┐рм▓рнНрм▓рнАрм░ рм╕рнНрммрм╛рм╕рнНрмернНрнЯрмормирнНрмдрнНрм░рнА рм╕рмдрнЗрмирнНрмжрнНрм░ рмЬрнИрми, рмдрм╛рмЩрнНрмХ рмкрмдрнНрмирнА, рно рмЕрмирнНрнЯрмЩрнНрмХ рммрм┐рм░рнЛрмзрм░рнЗ рмЪрм╛рм░рнНрмЬрм╕рм┐рмЯ рмжрм╛рмЦрм▓ рмХрм░рм┐рмЫрм┐ред рм╢рнБрмгрм╛рмгрм┐ рмХрм╛рм│рм░рнЗ рмЗрмбрм┐рм░ рмЪрм╛рм░рнНрмЬрм╕рм┐рмЯ рмЙрмкрм░рнЗ рмХрнЛрм░рнНрмЯ рмПрмХрм╛рмзрм┐рмХ рмкрнНрм░рм╢рнНрми рмХрм░рм┐рммрм╛ рм╕рм╣ рм╕рмВрм╕рнНрмерм╛рмХрнБ рмнрм░рнНрмдрнНрм╕рмирм╛ рмХрм░рм┐рмЫрмирнНрмдрм┐ред рмЬрм╖рнНрмЯрм┐рм╕ рмЧрнАрмдрм╛рмЮрнНрмЬрм│рм┐ рмЧрнЛрмПрм▓рмЩрнНрмХ рмЦрмгрнНрмбрмкрнАрма рмПрм╣рм┐ рморм╛рморм▓рм╛рм░рнЗ рм╕рморм╕рнНрмд рмЕрмнрм┐рмпрнБрмХрнНрмдрмЩрнНрмХрнБ рм╕рморми рмХрм░рм┐рмЫрмирнНрмдрм┐, рмпрнЗрмЙрмБрморм╛рмирмЩрнНрмХрнБ рмПрмпрм╛рммрмдрнН рмЧрм┐рм░рмл рмХрм░рм╛рмпрм╛рмЗ рмирм╛рм╣рм┐рмБред рмПрмерм┐рм░рнЗ рнк рмХрморнНрмкрм╛рмирнАрмЩрнНрмХрнБ рмормзрнНрнЯ рм╕рм╛рморм┐рм▓ рмХрм░рм╛рмпрм╛рмЗрмЫрм┐ред рмПрм╣рм┐ рморм╛рморм▓рм╛рм░ рмкрм░рммрм░рнНрмдрнНрмдрнА рм╢рнБрмгрм╛рмгрм┐ рмЕрмЧрм╖рнНрмЯ рнмрм░рнЗ рм╣рнЗрммред рмПрмерм┐рм╕рм╣ рмХрнЛрм░рнНрмЯ рмЕрмнрм┐рмпрнБрмХрнНрмд рмЕрмЬрнАрмд рмХрнБрморм╛рм░ рмУ рм╕рнБрмирм┐рм▓ рмХрнБрморм╛рм░ рмЬрнИрмирмЩрнНрмХрнБ рмПрмХ рм▓рмХрнНрм╖ рммрнНрнЯрмХрнНрмдрм┐рмЧрмд рморнБрмЪрм╛рм▓рм┐рмХрм╛рм░рнЗ рмЬрм╛рморм┐рми рмкрнНрм░рмжрм╛рми рмХрм░рм┐рмЫрмирнНрмдрм┐ред

    • рм╢рм┐рм│рм╛ рм░рм╛рнЯрмЩрнНрмХ рм░рм┐рмкрнЛрм░рнНрмЯ
  • рммрм│рм╛рмдрнНрмХрм╛рм░рнАрмХрнБ рмЬрм╛рморм┐рми рмжрнЗрммрм╛рмХрнБ рмормирм╛

    рмЖрм╣рнНрм▓рм╛рммрм╛рмж рм╣рм╛рмЗрмХрнЛрм░рнНрмЯрм░ рммрмб рм╢рнБрмгрм╛рмгрнАред рмпрнБрммрмдрнАрмЩрнНрмХрнБ рмирм┐рм╢рм╛ рм╕рнЗрммрми рмХрм░рм┐ рмЕрмЪрнЗрмд рмЕрммрм╕рнНрмерм╛рм░рнЗ рммрм│рм╛рмдрнНрмХрм╛рм░ рмХрм░рм┐рмерм┐рммрм╛ рни рмЕрмнрм┐рмпрнБрмХрнНрмдрмЩрнНрмХ рмЬрм╛рморм┐рми рмЦрм╛рм░рмЬ рмХрм░рм┐рммрм╛ рм╕рм╣ рм╕рнНрн▒рмдрмирнНрмдрнНрм░ рмЕрмжрм╛рм▓рмд рмжрнНрн▒рм╛рм░рм╛ рмжрм┐рмЖрмпрм╛рмЗрмерм┐рммрм╛ рмирм┐рм░рнНрмжрнНрмжрнЗрм╢рмХрнБ рм╕рм░рнНрмормерми рмХрм░рм┐рмЫрмирнНрмдрм┐ред рмЕрмнрм┐рмпрнБрмХрнНрмд рм╣рнЗрм▓рнЗ рмЖрнЯрм╛рми, рмУрнМрм░рм┐рнЯрм╛рм░ рмЕрнЯрнБрмм рмЦрм╛рмирнН рмУрм░рмл рмЧрнБрмбрнБред рм╕рнНрн▒рмдрмирнНрмдрнНрм░ рмХрнЛрм░рнНрмЯ рмЖрмжрнЗрм╢рмХрнБ рмЪрнНрнЯрм╛рм▓рнЗрмЮрнНрмЬ рмХрм░рм┐ рмжрм╛рмЦрм▓ рм╣рнЛрмЗрмерм┐рммрм╛ рмЖрммрнЗрмжрми рм╢рнБрмгрм╛рмгрм┐ рмХрм░рм┐рмерм┐рм▓рнЗ рмЬрм╖рнНрмЯрм┐рм╕ рм╕рмЮрнНрмЬрнЯ рмХрнБрморм╛рм░ рм╕рм┐рмВред рм╕рнВрмЪрмирм╛ рмЕрмирнБрмпрм╛рнЯрнА, рмпрнБрммрмдрнА рмЬрмгрмЩрнНрмХ рм░рм╛рм╕рнНрмдрм╛рм░рнЗ рмХрм╛рм╣рм╛рмХрнБ рмЕрмкрнЗрмХрнНрм╖рм╛ рмХрм░рм┐рмерм┐рм▓рнЗред

    рмЧрм╛рмБрм░ рмпрнБрммрмХрморм╛рмирнЗ рмЖрм╕рм┐ рмПрмХ рмЯрнНрм░рмХ рмЕрмЯрмХрм╛рмЗ рмпрнБрммрмдрнАрмЩрнНрмХрнБ рм▓рм┐рмкрнНрмЯ рмжрнЗрмЗрмерм┐рм▓рнЗред рм╕рнЗрм╣рм┐ рмЯрнНрм░рмХрм░рнЗ рмпрнБрммрмХ рни рмЬрмг рмормзрнНрнЯ рмпрм╛рмЗрмерм┐рм▓рнЗред рмкрм░рнЗ рмпрнБрммрмдрнАрмЩрнНрмХрнБ рмермгрнНрмбрм╛рм░рнЗ рмирм┐рм╢рм╛ рморм┐рм╢рм╛рмЗ рмкрм┐рмЖрмЗ рмерм┐рм▓рнЗред рмпрнБрммрмдрнА рмЬрмгрмЩрнНрмХ рмЪрнЗрмдрм╛рм╢рнВрмирнНрнЯ рм╣рнЛрмЗрмкрмбрм┐рммрм╛ рмкрм░рнЗ рмдрм╛рмЩрнНрмХрнБ рмПрмХ рмирм┐рм░рнНрмЬрми рм╕рнНрмерм╛рмирмХрнБ рмирнЗрмЗ рммрм│рмдрнНрмХрм╛рм░ рмХрм░рм╛рмпрм╛рмЗрмерм┐рм▓рм╛ред рмпрнБрммрмдрнА рмЬрмгрмЩрнНрмХ рм╕рнНрмерм╛рмирнАрнЯ рмерм╛рмирм╛рм░рнЗ рмПрмирнЗрмЗ рмПрмХ рмПрмлрнЗрнЯрм╛рм░ рм░рнБрмЬрнБ рмХрм░рм┐рмерм┐рм▓рнЗред рмЕрмнрм┐рмпрнБрмХрнНрмдрморм╛рмирнЗ рмХрм╣рм┐рмЫрмирнНрмдрм┐ рмпрнЗ, рмдрм╛рмЩрнНрмХрмарм╛рм░рнБ рмЯрмЩрнНрмХрм╛ рмирнЗрммрм╛ рмкрм╛рмЗрмБ рмдрм╛рмЩрнНрмХ рмЙрмкрм░рнЗ рморм┐рмернНрнЯрм╛ рмЕрмнрм┐рмпрнЛрмЧ рм▓рмЧрм╛рмпрм╛рмЗрмЫрм┐ред

    рм╕рм░рмХрм╛рм░рнА рмУрмХрм┐рм▓ рмХрм╣рм┐рмЫрмирнНрмдрм┐ рмпрнЗ, рммрм│рмдрнНрмХрм╛рм░ рмХрм░рм╛рмпрм╛рмЗрмерм┐рммрм╛ рм╕рморнЯрм░рнЗ рмЕрмнрм┐рмпрнБрмХрнНрмдрморм╛рмирнЗ рмнрм┐рмбрм┐рмУ рмХрм░рм┐рмерм┐рм▓рнЗред рм╕рнЛрм╕рм┐рмЖрм▓ рморм┐рмбрм┐рмЖрм░рнЗ рмПрм╣рм┐ рммрм┐рмбрм┐рмУ рмнрм╛рмЗрм░рм╛рм▓ рм╣рнЗрмЙрмЫрм┐ред рм╕рнЗрмкрнНрмЯрморнНрн▒рм░ рнирнзрм░рнБ рмжрнБрмЗрмЬрмг рмЬрнЗрм▓рм░рнЗ рмЕрмЫрмирнНрмдрм┐ред рмЕрмкрм░рм╛рмз рмУ рмжрмгрнНрмбрм░ рм╕рморнНрмнрм╛рммрмирм╛рмХрнБ рмжрнГрм╖рнНрмЯрм┐рм░рнЗ рм░рмЦрм┐ рмХрнЛрм░рнНрмЯ рмЬрм╛рморм┐рми рмЖрммрнЗрмжрмирмХрнБ рмкрнНрм░рмдрнНрнЯрм╛рмЦрнНрнЯрм╛рми рмХрм░рм┐рмЫрмирнНрмдрм┐ред

    • рм╢рнБрмнрм▓рмХрнНрм╖рнНрморнА рм╕рм╛рм╣рнБрмЩрнНрмХ рм░рм┐рмкрнЛрм░рнНрмЯ
  • рнирнл рм╣рмЬрм╛рм░ рмирнНрнЯрм╛рнЯрм┐рмХ рмЕрмзрм┐рмХрм╛рм░рнАрмЩрнНрмХрнБ рмЕрм╢рнНрм╡рм╕рнНрмдрм┐

    рмирнВрмЖрмжрм┐рм▓рнНрм▓рнА: рмжрнЗрм╢рм░ рмкрнНрм░рм╛рнЯ рнирнл рм╣рмЬрм╛рм░ рмирнНрнЯрм╛рнЯрм┐рмХ рмЕрмзрм┐рмХрм╛рм░рнАрмЩрнНрмХрнБ рмЕрм╢рнНрм╡рм╕рнНрмдрм┐ ред рмЦрнБрмм рм╢рнНрм░рнАрмШрнНрм░ рморм┐рм│рм┐рмм рммрм░рнНрмзрм┐рмд рммрнЗрмдрми ред рнз рмЬрм╛рмирнБрмЖрм░рнА рнирнжрнзрнм рм░рнБ рммрмврм┐рмерм┐рммрм╛ рммрнЗрмдрми рм▓рм╛рмЧрнБ рмХрм░рм┐рммрм╛ рмкрм╛рмЗрмБ рмирм┐рм░рнНрмжрнНрмжрнЗрм╢ рмжрнЗрмЗрмЫрмирнНрмдрм┐ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ ред рмПрм╣рм╛ рм╕рм╣ рмдрм┐рмирнЛрмЯрм┐ рмХрм┐рм╕рнНрмдрм┐рм░рнЗ рм▓рм╛рмЧрнБ рммрмХрнЗрнЯрм╛ рмПрм░рм┐рмЕрм░ рмжрнЗрммрм╛ рмкрм╛рмЗрмБ рм░рм╛рмЬрнНрнЯ рмдрмерм╛ рмХрнЗрмирнНрмжрнНрм░ рм╕рм░рмХрм╛рм░рмЩрнНрмХрнБ рм╕рнБрмкрнНрм░рм┐рмормХрнЛрм░рнНрмЯ рмХрм╣рм┐рмЫрмирнНрмдрм┐ ред рмкрнНрм░рмермо рмдрм┐рмирм┐ рморм╛рм╕ рмормзрнНрнЯрм░рнЗ рнирнл рмкрнНрм░рмдрм┐рм╢рмд рммрмХрнЗрнЯрм╛ рмжрм┐рмЖрмпрм┐рмм ред рмПрм╣рм╛рм░ рмдрм┐рмирм┐ рморм╛рм╕ рмормзрнНрнЯрм░рнЗ рнирнл рмкрнНрм░рмдрм┐рм╢рмд рммрмХрнЗрнЯрм╛ рмжрм░рморм╛ рнйрнж рмЬрнБрмирнН рнирнжрнирнй рм╕рнБрмжрнНрмзрм╛ рморм┐рм│рм┐рмкрм╛рм░рм┐рмм ред

    рмПрм╣рм╛ рмкрнВрм░рнНрммрм░рнБ рмдрнЗрм▓рнЗрмЩрнНрмЧрм╛рмирм╛рм░рнЗ рмЖрнЯрнЛрмЬрм┐рмд рмПрмХ рмХрм╛рм░рнНрмпрнНрнЯрмХрнНрм░рморм░рнЗ рмпрнЛрмЧ рмжрнЗрмЗ рморнБрмЦрнНрнЯ рммрм┐рмЪрм╛рм░рмкрмдрм┐ рмПрмирмнрм┐ рм░рмормгрм╛ рмХрм╣рм┐рмерм┐рм▓рнЗ рмпрнЗ рморм╛рмирм╕рм┐рмХ рм╢рм╛рм░рнАрм░рм┐рмХ рм╕рнБрм╕рнНрмермдрм╛ рмкрм╛рмЗрмБ рммрм┐рмдрнНрмдрнАрнЯ рмХрм▓рнНрнЯрм╛рмг рмПрмХ рморм╣рмдрнНрммрмкрнВрм░рнНрмгрнНрмг рмкрнНрм░рм╕рмЩрнНрмЧ рмЕрмЯрнЗ ред рмЦрнБрммрм╢рнАрмШрнНрм░ рммрнЗрмдрми рмЖрнЯрнЛрмЧ рм╕рморнНрммрм░рнНрмжрнНрмзрм┐рмд рмкрнНрм░рм╕рмЩрнНрмЧрм░рнЗ рмирнНрнЯрм╛рнЯрм┐рмХ рмЕрмзрм┐рмХрм╛рм░рнАрмЩрнНрмХрнБ рмЦрнБрм╕рм┐ рмЦрммрм░ рморм┐рм│рм┐рмм ред рм╕рмкрнНрмдрмо рммрнЗрмдрми рмЖрнЯрнЛрмЧрмЩрнНрмХ рм╕рнБрмкрм╛рм░рм┐рм╢ рмХрнНрм░рморнЗ рмХрнЗрмирнНрмжрнНрм░ рм╕рм░рмХрм╛рм░рмЩрнНрмХ рмХрм░рнНрмормЪрм╛рм░рнА ( рнз рмЬрм╛рмирнБрмЖрм░рнА рнирнжрнзрнм ) рммрм░рнНрмжрнНрмзрм┐рмд рммрнЗрмдрми рм▓рм╛рмЧрнБ рм╣рнЗрмм ред

    рмЧрмд рнирнжрнжрнм рм░рнЗ рмЬрм┐рм▓рнНрм▓рм╛ рмирнНрнЯрм╛рнЯрмкрм╛рм│рм┐рмХрм╛рмЩрнНрмХ рмирнНрнЯрм╛рнЯрм╛рмзрнАрм╢рмЩрнНрмХ рммрнЗрмдрми рм╕рмВрм╢рнЛрмзрми рмХрм░рм╛рмпрм╛рмЗрмерм┐рм▓рм╛ ред рмПрм╣рм╛ рмкрм░рнЗ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ рмирнНрнЯрм╛рнЯрмкрм╛рм│рм┐рмХрм╛рмЩрнНрмХ рммрнЗрмдрми, рм╕рнЗрммрм╛, рм╕рм░рнНрмдрнНрмд рмЖрмжрм┐рм░ рм╕рморнАрмХрнНрм╖рм╛ рмХрм░рм┐ рнирнжрнзрнн рм░рнЗ рмжрнНрммрм┐рмдрнАрнЯ рм░рм╛рм╖рнНрмЯрнНрм░рнАрнЯ рмирнНрнЯрм╛рнЯрм┐рмХ рммрнЗрмдрми рмЖрнЯрнЛрмЧрм░ рмЧрмарми рмХрм░рм┐рмерм┐рм▓рнЗ ред рмПрм╣рм╛ рммрм┐рм░рнЛрмзрм░рнЗ рмХрнЗрмдрнЗрмХ рм░рм╛рмЬрнНрнЯ рмЖрмкрмдрнНрмдрм┐ рмЙрмарм╛рмЗрмерм┐рм▓рнЗ ред рмирнНрнЯрм╛рнЯрмкрм╛рм│рм┐рмХрм╛ рммрм░рнНрмЧ рмЕрм▓рмЧрм╛ рм╣рнЛрмЗрмерм┐рммрм╛ рм╕рнЗрморм╛рмирнЗ рмжрм╛рммрм┐ рмХрм░рм┐рмерм┐рм▓рнЗ ред рм╕рмВрм╢рнЛрмзрм┐рмд рмирм┐рнЯрмо рм▓рм╛рмЧрнБ рм╣рнЛрмЗрмерм┐рм▓рнЗ рмХрм┐рмЫрм┐ рм╕рнНрмдрм░рм░ рмирнНрнЯрм╛рнЯрм┐рмХ рмЕрмзрм┐рмХрм╛рм░рнАрмЩрнНрмХрнБ рм╕рм┐рмнрм┐рм▓ рм╕рм░рнНрмнрм┐рм╕рм░рнЗ рмЙрмдрнНрмдрнАрм░рнНрмгрнНрмг рмЕрмзрм┐рмХрм╛рм░рнАрмЩрнНрмХ рммрнЗрмдрми рмарм╛рм░рнБ рмЕрмзрм┐рмХ рмкрнНрм░рм╛рмкрнНрнЯ рморм┐рм│рм┐рмерм╛рмирнНрмдрм╛ ред

    • рм╕рнНрморм░рмЬрм┐рмд рмЖрм░рнНрмпрнНрнЯрмЩрнНрмХ рм░рм┐рмкрнЛрм░рнНрмЯ
  • рмЕрмХрнНрмЯрнЛрммрм░ рмпрм╛рмП рм╕рнНрмермЧрм┐рмд рм░рм╣рм┐рм▓рм╛ рмЬрнНрмЮрм╛рмирммрм╛рмкрм┐ рм╢рнБрмгрм╛рмгрм┐

    рмирнВрмЖрмжрм┐рм▓рнНрм▓рнА:  рмЧрнБрм░рнБрммрм╛рм░ рмжрм┐рми рм╕рнБрмкрнНрм░рм┐рмормХрнЛрм░рнНрмЯ рмЬрнНрмЮрм╛рмирммрм╛рмкрм┐ рморм╕рмЬрм┐рмж рморм╛рморм▓рм╛рм░рнЗ рмЕрмЮрнНрмЬрнБрморми рмЗрмирнНрмдрнЗрмЬрнЗрморм┐рмЖ рморм╕рмЬрм┐рмжрм░ рмпрм╛рмЪрм┐рмХрм╛рмХрнБ рмЕрмЧрм╖рнНрмЯ рмкрнНрм░рмермо рм╕рмкрнНрмдрм╛рм╣ рмкрм░рнНрмпрнНрнЯрмирнНрмд рм╕рнНрмермЧрм┐рмд рм░рмЦрм┐рмЫрмирнНрмдрм┐ред рмХрнЛрм░рнНрмЯ рмХрм╣рм┐рмЫрмирнНрмдрм┐ рморм╛рморм▓рм╛рм░рнЗ рммрм╛рм░рм╛рмгрм╕рм┐ рмЬрм┐рм▓рнНрм▓рм╛ рмХрнЛрм░рнНрмЯрм░рнБ рм░рм╛рнЯ рмкрнНрм░рмХрм╛рм╢ рмкрм╛рмЗрмирм╛рм╣рм┐рмБред рм░рм╛рнЯ рмкрм╛рмЗрмБ рмЕрмкрнЗрмХрнНрм╖рм╛ рмХрм░рм╛рмпрм╛рмЙрмЫрм┐ред рмдрнЗрмгрнБ рмПрм╣рм┐ рморм╛рморм▓рм╛рмХрнБ рмЕрмХрнНрмЯрнЛрммрм░ рмкрнНрм░рмермо рм╕рмкрнНрмдрм╛рм╣рм░рнЗ рм╢рнБрмгрм╛рмгрм┐ рмХрм░рм┐рммрм╛рмХрнБ рм╕рнБрмкрнНрм░рм┐рмормХрнЛрм░рнНрмЯ рмЬрмгрм╛рмЗрмЫрмирнНрмдрм┐ред

    рм╕рнВрмЪрмирм╛ рмЕрмирнБрмпрм╛рнЯрнА,  рморм╕рмЬрм┐рмж рмХрморм┐рмЯрм┐рм░ рм╕рнНрммрмдрмирнНрмдрнНрм░ рм▓рм┐рмн рмкрм┐рмЯрм┐рм╕рмирмХрнБ рммрм░рнНрмдрнНрмдрморм╛рми рмкрм╛рмЗрмБ рм╕рнНрмермЧрм┐рмд рм░рмЦрм╛рмпрм┐рммрм╛ рм╕рм╣ рмЕрмХрнНрмЯрнЛрммрм░ рмкрнНрм░рмермо рм╕рмкрнНрмдрм╛рм╣рм░рнЗ рм╢рнБрмгрм╛рмгрм┐ рмХрм░рм╛рмпрм┐рммред рмПрмерм┐рм╕рм╣ рм╕рм░рнНрмнрнЗ рмХрм╛рм│рм░рнЗ рм╢рм┐рмм рм▓рм┐рмЩрнНрмХрмХрнБ рмкрнВрмЬрм╛ рмХрм░рм┐рммрм╛рмХрнБ рмжрнЗрмЗрмерм┐рммрм╛ рмЕрмзрм┐рмХрм╛рм░ рмЙрмкрм░рнЗ рм╣рнЛрмЗрмерм┐рммрм╛ рмпрм╛рмЪрм┐рмХрм╛рм░ рм╢рнБрмгрм╛рмгрм┐ рмХрм░рм┐рммрм╛рмХрнБ рмХрм┐рмирнНрмдрнБ рмормирм╛ рмХрм░рм┐ рмжрнЗрмЗрмЫрмирнНрмдрм┐ рм╕рм░рнНрммрнЛрмЪрнНрмЪ рмХрнЛрм░рнНрмЯред рм╢рнБрмгрм╛рмгрм┐ рмХрм╛рм│рм░рнЗ рммрм┐рмЪрм╛рм░рмкрмдрм┐ рмЬрм╖рнНрмЯрм┐рм╕ рмЪрмирнНрмжрнНрм░рмЪрнВрмбрмЩрнНрмХ рмХрнЛрм░рнНрмЯрм░рнЗ рмУрмХрм┐рм▓ рм╣рнБрмЬрнЗрмлрм╛ рмЕрм╣рморнНрмормжрм┐ рмХрм╣рм┐рмерм┐рм▓рнЗ рмирм┐рнЯрмо рммрм┐рм░рнЛрмзрм░рнЗ рморм╕рмЬрм┐рмж рмнрм┐рмдрм░рнЗ рм╕рм░рнНрмнрнЗ рмХрм╛рм░рнНрмпрнНрнЯ рм╣рнЛрмЗрмерм┐рм▓рм╛ред

  • рмХрнЛрмнрм┐рмб рморнГрмдрнНрнЯрнБ: рмХрнНрм╖рмдрм┐рмкрнВрм░рмгрмХрнБ рмирнЗрмЗ рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рмХрмбрм╛ рмирм┐рм░рнНрмжрнНрмжрнЗрм╢

    рмирнВрмЖрмжрм┐рм▓рнНрм▓рнА: рмХрнЛрмнрм┐рмбрм░рнЗ рморнГрмдрнНрнЯрнБрмХрнБ рмирнЗрмЗ рнзрно рмЬрнБрм▓рм╛рмЗрм░рнЗ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ рм╕рморм╕рнНрмд рм░рм╛рмЬрнНрнЯ рмУ рмХрнЗрмирнНрмжрнНрм░ рм╢рм╛рм╕рм┐рмд рмкрнНрм░рмжрнЗрм╢рмХрнБ рмжрнЗрмЗрмЫрмирнНрмдрм┐ рмХрмбрм╛ рмирм┐рм░рнНрмжрнНрмжрнЗрм╢ред рмХрнЛрмнрм┐рмбрм░рнЗ рмкрнНрм░рм╛рмг рм╣рм░рм╛рмЗрмерм┐рммрм╛ рммрнНрнЯрмХрнНрмдрм┐рмЩрнНрмХ рмкрм░рм┐рммрм╛рм░рмХрнБ рмдрнБрм░рмирнНрмд рмХрнНрм╖рмдрм┐рмкрнВрм░рмг рмжрнЗрммрм╛ рм╕рнБрмирм┐рм╢рнНрмЪрм┐рмд рмХрм░рм┐рммрм╛рмХрнБ рмирм┐рм░рнНрмжрнНрмжрнЗрм╢ рмжрнЗрмЗрмЫрмирнНрмдрм┐ рм╕рнБрмкрнНрм░рм┐рмо рмХрнЛрм░рнНрмЯред рммрм┐рм░рмЪрмкрмдрм┐ рмПрмо рмЖрм░ рм╕рм╛рм╣рм╛ рмУ рммрм┐рмЪрм╛рм░рмкрмдрм┐ рммрм┐рммрм┐ рмирм╛рмЧрм░рмдрнНрмирмЩрнНрмХ рмЦрмгрнНрмбрмкрнАрма рмХрм╣рм┐рмЫрмирнНрмдрм┐, рмпрмжрм┐ рмХрнМрмгрм╕рм┐ рмжрм╛рммрм┐рмжрм╛рм░рмЩрнНрмХрнБ рмХрнНрм╖рмдрм┐рмкрнВрм░рмг рми рмжрнЗрммрм╛рм░ рмЕрмЫрм┐ рмХрм┐ рмдрм╛рмЩрнНрмХ рмжрм╛рммрм┐рмХрнБ рмЦрм╛рм░рмЬ рмХрм░рм┐рммрм╛рм░ рмЕрмЫрм┐ рмдрнЗрммрнЗ рмПрмирнЗрмЗ рмЕрмнрм┐рмпрнЛрмЧ рмирм┐рммрм╛рм░рмг рм╕рморм┐рмдрм┐рмХрнБ рмпрм╛рмЖрмирнНрмдрнБред


    рмЕрмнрм┐рмпрнЛрмЧ рмирм┐рммрм╛рм░рмг рм╕рморм┐рмдрм┐рмХрнБ рмХрнНрм╖рмдрм┐рмкрнВрм░рмг рмжрм╛рммрм┐рмжрм╛рм░рмЩрнНрмХ рмЖрммрнЗрмжрми рмЙрмкрм░рнЗ рмЬрмгрм╛рмЗрммрм╛рмХрнБ рнк рм╕рмкрнНрмдрм╛рм╣ рм╕рморнЯ рмжрм┐рмЖрмпрм╛рмЗрмЫрм┐ред рм╕рнЗрмкрмЯрнЗ рмЖрмирнНрмзрнНрм░ рм╕рм░рмХрм╛рм░ рмЙрмкрм░рнЗ рмПрм╕рмбрм┐рмЖрм░рмПрмл рмЦрм╛рмдрм╛рм░рнБ рммрнНрнЯрмХрнНрмдрм┐рмЧрмд рмЬрморм╛ рмЦрм╛рмдрм╛рмХрнБ рм╣рм╕рнНрмдрм╛рмирнНрмдрм░ рмЕрмнрм┐рмпрнЛрмЧрм░рнЗ рм╣рнЛрмЗрмерм┐рммрм╛ рмпрм╛рмЪрм┐рмХрм╛ рмЙрмкрм░рнЗ рмЦрмгрнНрмбрмкрнАрма рмХрмбрм╛ рмЖрмнрм┐рморнБрмЦрнНрнЯ рмкрнЛрм╖рмг рмкрнВрм░рнНрммрмХ рмдрнБрм░рмирнНрмд рмПрм╣рм┐ рморм╛рморм▓рм╛рм░рнЗ рмдрнБрм░рмирнНрмд рмЙрмдрнНрмдрм░ рм░рмЦрм┐рммрм╛рмХрнБ рм╢рнЗрм╖ рморнМрмХрм╛ рмжрнЗрмЗрмЫрмирнНрмдрм┐ред рмЖрмирнНрмзрнНрм░ рмПрм╕рмбрм┐рмЖрм░рмПрмл рморм╛рморм▓рм╛рм░рнЗ рмпрм╛рмЪрм┐рмХрм╛ рмХрм░рнНрмдрнНрмдрм╛рмЩрнНрмХ рмкрмХрнНрм╖рм░рнБ рмдрм╛рмЩрнНрмХ рмУрмХрм┐рм▓ рмХрнЛрм░рнНрмЯрмЩрнНрмХрнБ рмЬрмгрм╛рмЗрмерм┐рм▓рнЗ рмХрм┐, рмПрм╕рмбрм┐рмЖрм░рмПрмлрм░рнБ рмзрмирм░рм╛рм╢рм┐рмХрнБ рм╕рм░рмХрм╛рм░ рмЕрмирнНрнЯ рмХрм╛рм░рнНрмпрнНрнЯрм░рнЗ рмирм┐рнЯрнЛрмЬрм┐рмд рмХрм░рнБрмЫрмирнНрмдрм┐ред

    • рм╢рм┐рм│рм╛ рм░рм╛рнЯрмЩрнНрмХ рм░рм┐рмкрнЛрм░рнНрмЯ
  • рморнБрм╕рм▓рм┐рмо рмЫрм╛рмбрмкрмдрнНрм░рмХрнБ рмирнЗрмЗ рмЬрнБрм▓рм╛рмЗ рнирнирм░рнЗ рм╢рнБрмгрм╛рмгрм┐ рмкрм╛рмЗрмБ рмдрм╛рм░рм┐рмЦ рмзрм╛рм░рнНрмпрнНрнЯ

    рмирнВрмЖрмжрм┐рм▓рнНрм▓рнА: рм╕рнБрмкрнНрм░рм┐рмо рмХрнЛрм░рнНрмЯ рм╕рнЛрморммрм╛рм░ рмжрм┐рми рморнБрм╕рм▓рм┐рмо рмЫрм╛рмбрмкрмдрнНрм░ рморм╛рморм▓рм╛рмХрнБ рмирнЗрмЗ рмЖрм╕рмирнНрмдрм╛ рмЬрнБрм▓рм╛рмЗ рнирнирм░рнЗ рмПрмХ рм░рм┐рмЯ рмкрм┐рмЯрм┐рм╕рмирм░ рм╢рнБрмгрм╛рмгрм┐ рмХрм░рм┐рммрм╛рмХрнБ рмдрм╛рм▓рм┐рмХрм╛рмнрнБрмХрнНрмд рмХрм░рм┐рмЫрмирнНрмдрм┐ред рм░рм┐рмЯ рмпрм╛рмЪрм┐рмХрм╛ рмдрм▓рм╛рмХ рмП рм╣рм╛рм╕рм╛рмирм░ рморнБрм╕рм▓рм┐рмо рмкрм░рнНрм╕рмирм╛рм▓ рм▓ рмкрнНрм░рм╛рмХрнНрмЯрм┐рм╕ рмкрмХрнНрм╖рм░рнБ рмжрм╛рнЯрм░ рм╣рнЛрмЗрмЫрм┐ рмпрм╛рмЪрм┐рмХрм╛ред рмпрнЗрмЙрмБрмерм┐рм░рнЗ рмХрнБрм╣рм╛рмпрм╛рмЗрмерм┐рм▓рм╛ рмХрм┐, рмЬрмгрнЗ рммрнНрнЯрмХрнНрмдрм┐ рмдрм╛рм░ рм╕рнНрмдрнНрм░рнАрмХрнБ рморм╛рм╕рм░рнЗ рмерм░рнЗ рмХрм░рм┐ рмдрм┐рмирм┐ рморм╛рм╕ рмзрм░рм┐ рмдрм▓рм╛рмХ рмХрм╣рм┐рм▓рнЗ рмЫрм╛рмбрмкрмдрнНрм░ рмжрнЗрмЗ рмкрм╛рм░рм┐рммрнЗред рмУрмХрм┐рм▓ рмкрм┐рмЩрнНрмХрм┐ рмЖрмирмирнНрмжрмЩрнНрмХ рмжрнНрммрм╛рм░рм╛ рмжрм╛рнЯрм░ рмПрм╣рм┐ рмпрм╛рмЪрм┐рмХрм╛ рморнБрмЦрнНрнЯ рммрм┐рмЪрм╛рм░рмкрмдрм┐ рмПрми рмнрм┐ рм░рмормгрм╛, рмЬрм╖рнНрмЯрм┐рм╕ рмХрнНрм░рм┐рм╖рнНрмгрм╛ рморнБрм░рм╛рм░рнА рмУ рмЬрм╖рнНрмЯрм┐рм╕ рм╣рм┐рморм╛ рмХрнЛрм╣рм▓рм┐рмЩрнНрмХ рмЦрмгрнНрмбрмкрнАрмармЩрнНрмХ рм╕рморнНрморнБрмЦрм░рнЗ рмЙрмкрм╕рнНрмерм╛рмкрми рмХрм░рм┐рмерм┐рм▓рнЗред рм╕рнЗ рммрнЗрмЮрнНрмЪрмЩрнНрмХ рм╕рморнНрморнБрмЦрм░рнЗ рморм╛рморм▓рм╛рм░ рм╢рнБрмгрм╛рмгрм┐ рмкрм╛рмЗрмБ рмЕрмкрм┐рм▓ рмХрм░рм┐рммрм╛ рм╕рм╣ рмЬрмгрм╛рмЗрмерм┐рм▓рнЗ рмХрм┐, рм╕рнЗ рнй рмЯрм┐ рмдрм▓рм╛рмХ рмирнЛрмЯрм┐рм╕ рмкрм╛рмЗрмЫрмирнНрмдрм┐, рмпрм╛рм╣рм╛ рммрм░рнНрмдрнНрмдрморм╛рми рмкрм░рм┐рммрм░рнНрмдрнНрмдрми рмХрм░рм╛рмпрм╛рмЗ рмкрм╛рм░рм┐рмм рмирм╛рм╣рм┐рмБред рмПрм╣рм╛ рмкрм░рнЗ рмЦрмгрнНрмбрмкрнАрма рнк рмжрм┐рми рмкрм░рнЗ рморм╛рморм▓рм╛рм░ рм╢рнБрмгрм╛рмгрм┐ рмХрм░рм┐рммрм╛рмХрнБ рмХрм╣рм┐рмЫрмирнНрмдрм┐ред

    рмпрм╛рмЪрм┐рмХрм╛ рмХрм░рнНрмдрнНрмдрм╛ рмЕрмнрм┐рмпрнЛрмЧ рмЖрмгрм┐рмерм┐рм▓рнЗ рмХрм┐, рмдрм╛рмЩрнНрмХ рм╕рнНрм╕рм╛рморнА рмПрмкрнНрм░рм┐рм▓ рнзрнпрм░рнЗ рм╕рнНрмкрм┐рмб рмкрнЛрм╖рнНрмЯрм░рнЗ рмкрнНрм░рмермо рмдрм▓рм╛рмХ рмирнЛрмЯрм┐рм╕ рмХрм░рм┐рмерм┐рм▓рнЗред рмПрм╣рм╛ рмкрм░рнЗ рмкрм░рммрм░рнНрмдрнНрмдрнА рни рморм╛рм╕рм░рнЗ рм╕рнЗ рмжрнБрмЗрмЯрм┐ рмдрм▓рм╛рмХ рмирнЛрмЯрм┐рм╕ рмкрм╛рмЗрмерм┐рм▓рнЗред рмПрм╣рм╛рмХрнБ рмпрм╛рмЪрм┐рмХрм╛ рмХрм░рнНрмдрнНрмдрм╛ рмкрмХрнНрм╖рмкрм╛рмдрм┐рмдрм╛ рмХрм╣рм┐рмЫрмирнНрмдрм┐ред рмХрм╛рм╣рм┐рмБрмХрм┐ рмдрм▓рм╛рмХ рмХрнЗрммрм│ рмкрнБрм░рнБрм╖рмЩрнНрмХ рмжрнНрммрм╛рм░рм╛ рмжрм┐рмЖрмпрм┐рммред рмПрм╣рм┐ рмкрнНрм░рмерм╛рмХрнБ рм╕рнЗ рмкрмХрнНрм╖рмкрм╛рмдрм┐рмдрм╛ рмУ рмЕрм╕рморнНрммрм┐рмзрм╛рмирм┐рмХ рммрнЛрм▓рм┐ рмЕрмнрм┐рмпрнЛрмЧ рмормзрнНрнЯ рмХрм░рм┐рмЫрмирнНрмдрм┐ред рмПрм╣рм╛ рмзрм╛рм░рм╛ рнзрнк, рнзрнл, рнирнз рмУ рнирнл рм░ рмЙрм▓рнНрм▓рмЩрнНрмШрми рммрнЛрм▓рм┐ рмЕрмнрм┐рмпрнЛрмЧ рмХрм░рм┐рмЫрмирнНрмдрм┐ред

    рм╢рм┐рм│рм╛ рм░рм╛рнЯрмЩрнНрмХ рм░рм┐рмкрнЛрм░рнНрмЯ

  • рмкрнВрм░рнНрммрмдрми рммрм┐рмЪрм╛рм░рмкрмдрм┐рмЩрнНрмХ рммрм┐рм░рнЛрмзрм░рнЗ рмХрнЛрм░рнНрмЯ рмЕрммрморм╛рмирмирм╛ рморм╛рморм▓рм╛тАж

    рмирнВрмЖрмжрм┐рм▓рнНрм▓рнА: рмкрнВрм░рнНрммрмдрми рмжрм┐рм▓рнНрм▓рнА рм╣рм╛рмЗрмХрнЛрм░рнНрмЯрмЩрнНрмХ рммрм┐рмЪрм╛рм░рмкрмдрм┐ рмЬрм╖рнНрмЯрм┐рм╕ рмПрми рмПрми рмбрм┐рмЩрнНрмЧрнЗ, рмкрнВрм░рнНрммрмдрми рмЕрмдрм┐рм░рм┐рмХрнНрмд рм╕рм▓рм┐рм╕рм┐рмЯрм░ рмЬрнЗрмирнЗрм░рм╛рм▓ рмЕрморми рм▓рнЗрмЦрм┐ рмУ рмУрмХрм┐рм▓ рмХрнЗ рмЖрм░ рмХрнБрморм╛рм░рмЩрнНрмХ рммрм┐рм░рнЛрмзрм░рнЗ рмХрнЛрм░рнНрмЯ рмЕрммрморм╛рмирмирм╛ рморм╛рморм▓рм╛рм░рнЗ рмирм┐рмЬ рм╕рморнНрмормдрм┐ рмжрнЗрммрм╛рмХрнБ рмнрм╛рм░рмдрм░ рмЖрмЯрм░рнНрмгрнНрмгрм┐ рмЬрнЗрмирнЗрм░рм╛рм▓ рмХрнЗ рмХрнЗ рммрнЗрмгрнБ рмЧрнЛрмкрм╛рм│ рмормирм╛ рмХрм░рм┐рмжрнЗрмЗрмЫрмирнНрмдрм┐ред рмПрморм╛рмирнЗ рмирнВрмкрнБрм░ рм╢рм░рнНрморм╛ рморм╛рморм▓рм╛рм░рнЗ рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рмжрнНрммрм╛рм░рм╛ рморнМрмЦрм┐рмХ рмЯрм┐рмкрнНрмкрмгрнАрмХрнБ рммрм┐рм░рнЛрмз рмХрм░рм┐рммрм╛ рм╕рм╣ рм╕рморм╛рм▓рнЛрмЪрмирм╛ рмХрм░рм┐рмерм┐рм▓рнЗред рмПрм╣рм╛рмХрнБ рмирнЗрмЗ рмПрморм╛рмирмЩрнНрмХ рммрм┐рм░рнЛрмзрм░рнЗ рм╕рнБрмкрнНрм░рм┐рмормХрнЛрм░рнНрмЯ рмЕрммрморм╛рмирмирм╛ рморм╛рморм▓рм╛ рмжрм╛рнЯрм░рмХрнБ рм╕рморнНрмормдрм┐ рмжрнЗрмЗ рмирм╛рм╣рм╛рмирнНрмдрм┐ рмЖрмЯрм░рнНрмгрнНрмгрм┐ рмЬрнЗрмирнЗрм░рм╛рм▓ред

    рмкрнНрм░рмлрнЗрмЯ рморм╣рморнНрмормжрмЩрнНрмХ рммрм┐рм░рнЛрмзрм░рнЗ рммрм┐рммрм╛рмжрнАрнЯ рммрнЯрм╛рми рмжрнЗрммрм╛ рмкрм░рнЗ рмирнВрмкрнБрм░ рм╢рм░рнНрморм╛рмЩрнНрмХ рммрм┐рм░рнЛрмзрм░рнЗ рмжрнЗрм╢рммрнНрнЯрм╛рмкрнА рммрм┐рмнрм┐рмирнНрми рм╕рнНрмерм╛рмирм░рнЗ рморм╛рморм▓рм╛ рм╣рнЛрмЗрмерм┐рммрм╛рм░рнБ рм╢рм░рнНрморм╛ рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рмирм┐рмХрмЯрм░рнЗ рм╕рморм╕рнНрмд рморм╛рморм▓рм╛рмХрнБ рмжрм┐рм▓рнНрм▓рнА рм╕рнНрмерм╛рмирм╛рмирнНрмдрм░ рмХрм░рм┐рммрм╛рмХрнБ рмЕрмкрм┐рм▓ рмХрм░рм┐рмерм┐рм▓рнЗред рмПрм╣рм╛рм░ рм╢рнБрмгрм╛рмгрм┐ рмХрм╛рм│рм░рнЗ рмжрнБрмЗ рмЬрмгрм┐рмЖ рмЦрмгрнНрмбрмкрнАрма рмирнВрмкрнБрм░рмЩрнНрмХрнБ рмирм╛рмирм╛рмнрм╛рммрнЗ рмнрм░рнНрмдрнНрм╕рмирм╛ рмХрм░рм┐рммрм╛ рм╕рм╣ рмирнВрмкрнБрм░рмЩрнНрмХ рмкрм╛рмЗрмБ рмжрнЗрм╢ рмЬрм│рнБрмЫрм┐ рмУ рмЙрмжрнЯрмкрнБрм░ рмЯрнЗрм▓рм░рмЩрнНрмХ рм╣рмдрнНрнЯрм╛ рмдрм╛рмЩрнНрмХ рмкрм╛рмЗрмБ рм╣рнЛрмЗрмерм┐рммрм╛ рмХрм╣рм┐рмерм┐рм▓рнЗред рмПрм╣рм╛рмХрнБ рмирнЗрмЗ рм╕рнЗрмдрнЗрммрнЗрм│рнЗ рм╕рморм╕рнНрмд рмЧрмгрморм╛рмзрнНрнЯрморм░рнЗ рмЦрммрм░ рмкрнНрм░рм╕рм╛рм░рмг рм╣рнЛрмЗрмерм┐рм▓рм╛ред рмЬрм╖рнНрмЯрм┐рм╕ рмПрми рмПрми рмбрм┐рмЩрнНрмЧрнЗ, рмкрнВрм░рнНрммрмдрми рмЕрмдрм┐рм░рм┐рмХрнНрмд рм╕рм▓рм┐рм╕рм┐рмЯрм░ рмЬрнЗрмирнЗрм░рм╛рм▓ рмЕрморми рм▓рнЗрмЦрм┐ рмУ рмУрмХрм┐рм▓ рмХрнЗ рмЖрм░ рмХрнБрморм╛рм░ рм╕рнБрмкрнНрм░рм┐рмо рмХрнЛрм░рнНрмЯрмЩрнНрмХ рморнМрмЦрм┐рмХ рмЯрм┐рмкрнНтАМрмкрмгрнАрм░ рм╕рморм╛рм▓рнЛрмЪрмирм╛ рмХрм░рм┐рмерм┐рм▓рнЗред

    рм╢рм┐рм│рм╛ рм░рм╛рнЯрмЩрнНрмХ рм░рм┐рмкрнЛрм░рнНрмЯ

  • рмирнВрмкрнБрм░ рм╢рм░рнНрморм╛ рммрм┐рммрм╛рмж- рмЯрм╛рм░рнНрмЧрнЗрмЯрм░рнЗ рмХрнЛрм░рнНрмЯ

    рмирнВрмкрнБрм░ рм╢рм░рнНрморм╛ рммрм┐рммрм╛рмжрм░рнЗ рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рмЯрм┐рмкрнНрмкрмгрнА рмкрм░рнЗ рмжрнЗрм╢рм░рнЗ рмХрнЛрм░рнНрмЯрмЩрнНрмХрнБ рморм┐рм╢рнНрм░ рмкрнНрм░рмдрм┐рмХрнНрм░рм┐рнЯрм╛рм░ рм╕рморнНрморнБрмЦрнАрми рм╣рнЗрммрм╛рмХрнБ рм╣рнЛрмЗрмЫрм┐ред рмХрнЛрм░рнНрмЯрмЩрнНрмХ рмирм┐рм░рнНрмжрнНрмжрнЗрм╢ рмЖрм╕рм┐рммрм╛ рмкрм░рнЗ рмЕрмирнЗрмХ рмПрм╣рм╛рмХрнБ рм╕рнНрммрм╛рмЧрмд рмХрм░рм┐рмерм┐рммрм╛ рммрнЗрм│рнЗ рмжрнЗрм╢рмарм╛рм░рнБ рммрм┐рмжрнЗрм╢ рмкрм░рнНрмпрнНрнЯрмирнНрмд рмЕрмирнЗрмХ рмирнВрмкрнБрм░рмЩрнНрмХ рмкрмХрнНрм╖рм░рнЗ рмарм┐рмЖ рм╣рнЛрмЗрмЫрмирнНрмдрм┐ред рмПрмкрм░рм┐ рмХрм┐, рмЦрмгрнНрмбрмкрнАрма рмжрнЗрмЗрмерм┐рммрм╛ рммрнЯрм╛рми рмлрнЗрм░рм╛рмЗ рмирнЗрммрм╛рмХрнБ рмормзрнНрнЯ рморнБрмЦрнНрнЯ рмирнНрнЯрм╛рнЯрм╛рмзрнАрм╢рмЩрнНрмХрнБ рмПрмХ рм▓рнЗрмЯрм░ рмкрм┐рмЯрм┐рм╢рми рм╣рнЛрмЗрмЫрм┐ред

    рмирнВрмкрнБрм░ рм╢рм░рнНрморм╛ рммрм┐рммрм╛рмжрм░рнЗ рмЯрм╛рм░рнНрмЧрнЗрмЯрм░рнЗ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯред рмЦрмгрнНрмбрмкрнАрмармЩрнНрмХ рммрнЯрм╛рми рмЕрмпрнБрмХрнНрмдрм┐рмХрм░ред рмХрнЛрм░рнНрмЯ рммрнЯрм╛рми рмлрнЗрм░рм╛рмЗ рмирнЗрммрм╛рмХрнБ рмЕрмкрм┐рм▓ред рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯрмЩрнНрмХ рмжрнНрн▒рм╛рм░рм╛ рмжрм┐рмЖрмпрм╛рмЗрмерм┐рммрм╛ рммрнЯрм╛рмирмХрнБ рммрм┐рм░рнЛрмзред рмХрнЛрм░рнНрмЯрмЩрнНрмХ рммрнЯрм╛рми рммрм┐рм░рнЛрмзрм░рнЗ рм╕рнЛрм╕рм┐рмЖрм▓ рморм┐рмбрм┐рмЖрм░рнЗ рмЯрнНрм░рнЗрмгрнНрмбрм┐рмВред рмжрнЗрм╢рм░рнБ рммрм┐рмжрнЗрм╢, рмирнВрмкрнБрм░рмЩрнНрмХ рм╕рмкрмХрнНрм╖рм░рнЗ рмарм┐рмЖ рм╣рнЗрмЙрмЫрмирнНрмдрм┐ рмЕрмирнЗрмХред рм╢рнБрмХрнНрм░рммрм╛рм░ рмирнВрмкрнБрм░ рм╢рм░рнНрморм╛ рммрм┐рммрм╛рмжрм░рнЗ рм╕рнБрмкрнНрм░рм┐рмормХрнЛрм░рнНрмЯ рмХрмбрм╛ рмЖрмнрм┐рморнБрмЦрнНрнЯ рмкрнЛрм╖рмг рмХрм░рм┐рмерм┐рм▓рнЗред рмжрнЗрм╢рм░ рм╕рм╛рморнНрмкрнНрм░рмдрм┐рмХ рм╕рм╛рморнНрмкрнНрм░рмжрм╛рнЯрм┐рмХ рм╕рнНрмерм┐рмдрм┐ рмУ рмЙрмжрнЯрмкрнБрм░ рм╣рмдрнНрнЯрм╛ рмкрм╛рмЗрмБ рм╕рм░рнНрммрнЛрмЪрнНрмЪ рмХрнЛрм░рнНрмЯрмЩрнНрмХ рмЦрмгрнНрмбрмкрнАрма рмирнВрмкрнБрм░рмЩрнНрмХрнБ рмжрм╛рнЯрнА рмХрм░рм┐рммрм╛ рм╕рм╣ рмЯрнЗрм▓рм┐рмнрм┐рмЬрми рморм╛рмзрнНрнЯрморм░рнЗ рмирм┐рм╕рм░рнНрмдрнНрмд рмУ рм╕рм╛рм░рнНрммрмЬрмирнАрми рмХрнНрм╖рмормкрнНрм░рм╛рм░рнНрмермирм╛ рмХрм░рм┐рммрм╛рмХрнБ рмжрнЗрмЗрмЫрмирнНрмдрм┐ рмирм┐рм░рнНрмжрнНрмжрнЗрм╢ред рмПрм╣рм╛ рмкрм░рнЗ рмирнВрмкрнБрм░рмЩрнНрмХ рм╕рмкрмХрнНрм╖рм░рнЗ рммрм╛рм╣рм╛рм░рм┐рмЫрмирнНрмдрм┐ рмЕрмирнЗрмХред рмХрнЗрм╣рм┐ рмПрм╣рм╛рмХрнБ рммрм╛рмХ рм╕рнНрммрм╛рмзрнАрмирмдрм╛рм░ рм╣рмдрнНрнЯрм╛ рмХрм╣рм┐рммрм╛ рм╕рм╣ рмХрнЗрм╣рм┐ рм╢рнБрмгрм╛рмгрм┐рмХрм╛рм░рнА рммрм┐рмЪрм╛рм░рмкрмдрм┐рмЩрнНрмХрнБ рмормзрнНрнЯ рмЖрмХрнНрм░рмормг рмХрм░рм┐рммрм╛рмХрнБ рмкрмЫрм╛рмЗ рмирм╛рм╣рм╛рмирнНрмдрм┐ред рмПрмкрм░рм┐рмХрм┐, рмЦрмгрнНрмбрмкрнАрмармЩрнНрмХ рмжрнНрммрм╛рм░рм╛ рмЬрм╛рм░рм┐ рмЯрм┐рмкрнНтАМрмкрмгрнАрмХрнБ рмлрнЗрм░рм╛рмЗ рмирнЗрммрм╛рмХрнБ рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рмЬрмгрнЗ рмУрмХрм┐рм▓ рморнБрмЦрнНрнЯ рммрм┐рмЪрм╛рм░рмкрмдрм┐рмЩрнНрмХрнБ рмкрмдрнНрм░ рм▓рнЗрмЦрм┐рмЫрмирнНрмдрм┐ред

    рм╢рнБрмХрнНрм░рммрм╛рм░ рм╕рнБрмкрнНрм░рм┐рмормХрнЛрм░рнНрмЯ рмжрнЗрмЗрмерм┐рммрм╛ рмирм┐рм░рнНрмжрнНрмжрнЗрм╢ рмкрнНрм░рмХрм╛рм╢ рмкрм╛рмЗрммрм╛ рмкрм░рнЗ рмУрмХрм┐рм▓ рмЕрмЬрнЯ рмЧрнМрмдрмо, рморнБрмЦрнНрнЯрммрм┐рмЪрм╛рм░рмкрмдрм┐ рмЬрм╖рнНрмЯрм┐рм╕ рмПрмирмнрм┐ рм░рмормгрм╛рмЩрнНрмХрнБ рмПрмХ рм▓рнЗрмЯрм░ рмкрм┐рмЯрм┐рм╢рми рмжрнЗрмЗрмЫрмирнНрмдрм┐ред рм╕рнЗ рмдрм╛рмЩрнНрмХ рмкрм┐рмЯрм┐рм╕рмирм░рнЗ рмЬрм╖рнНрмЯрм┐рм╕ рм╕рнВрм░рнНрмпрнНрнЯрмХрм╛рмирнНрмд рмУ рмЬрм╖рнНрмЯрм┐рм╕ рмкрм╛рм░рмжрм┐рммрм╛рм▓рм╛рмЩрнНрмХ рмЦрмгрнНрмбрмкрнАрма рмжрнЗрмЗрмерм┐рммрм╛ рмЯрм┐рмкрнНрмкрмгрнАрмХрнБ рмлрнЗрм░рм╛рмЗ рмирнЗрммрм╛рмХрнБ рмирм┐рм░рнНрмжрнНрмжрнЗрм╢ рмжрнЗрммрм╛рмХрнБ рмЕрмкрм┐рм▓ рмХрм░рм┐рмЫрмирнНрмдрм┐ред рм╕рнЗрм╣рм┐рмкрм░рм┐ рммрм┐рм╢рнНрмм рм╣рм┐рмирнНрмжрнБ рмкрм░рм┐рм╖рмж рммрм╛ рмнрм┐рмПрмЪрмкрм┐ рм╕рм░рнНрммрнЛрмЪрнНрмЪ рмХрнЛрм░рнНрмЯрмЩрнНрмХ рммрнЯрм╛рмирмХрнБ рмЕрмирнМрмкрмЪрм╛рм░рм┐рмХ рмХрм╣рм┐рммрм╛рмХрнБ рмкрмЫрм╛рмЗрмирм┐ред рм╕рмВрмЧрмармирм░ рм╕рмнрм╛рмкрмдрм┐ рмЖрм▓рнЛрмХ рмХрнБрморм╛рм░ рмкрнНрм░рмдрм┐рмХрнНрм░рм┐рнЯрм╛рм╢рнАрм│ рм╣рнЛрмЗ рмХрм╣рм┐рмЫрмирнНрмдрм┐, рмирнВрмкрнБрм░ рмЕрмкрм░рм╛рмз рмХрм░рм┐рмЫрмирнНрмдрм┐ рмХрм┐ рмирм╛рм╣рм┐рмБ рмдрм╛рм╣рм╛ рмирм┐рм░рнНрмжрнНрмзрм╛рм░рмг рмХрнЛрм░рнНрмЯрмЩрнНрмХ рмХрм╛рмо рми рмерм┐рм▓рм╛ред рмжрнЗрм╢рммрнНрнЯрм╛рмкрнА рмирнВрмкрнБрм░рмЩрнНрмХ рмирм╛рморм░рнЗ рморм╛рморм▓рм╛ рм░рм╣рм┐рмерм┐рммрм╛рм░рнБ рм╕рнЗрм╕рммрнБ рм╕рнНрмерм╛рмирмХрнБ рмпрм╛рмдрнНрм░рм╛ рмдрм╛рмЩрнНрмХ рмЬрнАрммрми рмкрнНрм░рмдрм┐ рммрм┐рмкрмж рм╕рнГрм╖рнНрмЯрм┐ рмХрм░рнБрмерм┐рммрм╛рм░рнБ рмжрм┐рм▓рнНрм▓рнАрмХрнБ рморм╛рморм▓рм╛ рм╕рнНрмерм╛рмирм╛рмирнНрмдрм░ рмкрм╛рмЗрмБ рмЖрммрнЗрмжрми рм╣рнЛрмЗрмерм┐рм▓рм╛ред рм╢рнБрмгрм╛рмгрм┐ рмХрм╛рм│рм░рнЗ рмХрнЛрм░рнНрмЯ рмжрнЗрмЗрмерм┐рммрм╛ рмЯрм┐рмкрнНрмкрмгрнА рмЕрмирнМрмкрмЪрм╛рм░рм┐рмХ рм╣рнЛрмЗрмерм┐рммрм╛рм░рнБ рмПрм╣рм╛рмХрнБ рмХрнЛрм░рнНрмЯрмЩрнНрмХ рмирм┐рм╖рнНрмкрмдрнНрмдрм┐ рмнрм╛рммрнЗ рмЧрнНрм░рм╣рмг рмХрм░рм╛ рми рмпрм╛рмЙред

    рмПрм╣рм┐ рмкрнНрм░рм╕рмЩрнНрмЧрм░рнЗ рмирнВрмкрнБрм░рмЩрнНрмХрнБ рмЬрмгрнЗ рм╣рм┐рм░рнЛ рмХрм╣рм┐рмЫрмирнНрмдрм┐ рмирнЗрмжрм░рм▓рнНрнЯрм╛рмгрнНрмбрм░ рмкрм╛рм░рнНрмЯрм┐ рмлрм░ рмлрнНрм░рм┐рмбрморм░ рм╕рмнрм╛рмкрмдрм┐ рмЧрнЛрм░рнНрмЯ рммрм╛рмЗрм▓рнНрмбрм░рнНрм╕ред рммрм╛рмЗрм▓рнНрмбрм░рнНрм╕ рмХрм╣рм┐рмЫрмирнНрмдрм┐ рмирнВрмкрнБрм░ рмХрмжрм╛рмкрм┐ рмХрнНрм╖рморм╛ рморм╛рмЧрм┐рммрм╛ рмЖрммрм╢рнНрнЯрмХ рмирнБрм╣рнЗрмБ ред рм╕рнЗ рмирнВрмкрнБрм░рмЩрнНрмХ рммрнЯрм╛рмирмХрнБ рм╕рмдрнНрнЯ рмХрм╣рм┐рммрм╛ рм╕рм╣ рм╕рмдрнНрнЯ рмХрм╣рм┐ рмХрнНрм╖рморм╛ рмкрнНрм░рм╛рм░рнНрмермирм╛ рмЕрмирм╛рммрм╢рнНрнЯрмХ рмХрм╣рм┐рмЫрмирнНрмдрм┐ред рмЙрмжрнЯрмкрнБрм░ рмШрмЯрмгрм╛ рмкрм╛рмЗрмБ рмирнВрмкрнБрм░ рмжрм╛рнЯрнА рми рмерм┐рммрм╛ рмХрм╣рм┐рмЫрмирнНрмдрм┐ред рммрм╛рмЗрм▓рнНрмбрм░рнНрм╕ рмкрнВрм░рнНрммрм░рнБ рмормзрнНрнЯ рмкрнНрм░рмлрнЗрмЯ рморм╣рморнНрмормж рммрм┐рммрм╛рмжрм░рнЗ рмирнВрмкрнБрм░рмЩрнНрмХрнБ рм╕рморм░рнНрмерми рмХрм░рм┐ рмЖрм╕рм┐рмЫрмирнНрмдрм┐ред рм╕рнЗ рмХрм╣рм┐рмЫрмирнНрмдрм┐, рмдрнБрм╖рнНрмарнАрмХрм░рмг рмХрмжрм╛рмкрм┐ рмХрм╛рмо рмХрм░рм┐рмирмерм╛рмПред рмПрм╣рм╛ рм╕рнНрмерм┐рмдрм┐рмХрнБ рмЖрм╣рнБрм░рм┐ рмЦрм░рм╛рмк рмХрм░рм┐рмерм╛рмПред рм╕рнЗ рмЖрм╣рнБрм░рм┐ рмХрм╣рм┐рмЫрмирнНрмдрм┐, рмнрм╛рм░рмдрм░рнЗ рмерм┐рммрм╛ рморнЛрм░ рмкрнНрм░рм┐рнЯ рммрмирнНрмзрнБрморм╛рмирнЗтАж рмЗрм╕рм▓рм╛рморм┐рмХ рмжрнЗрм╢рморм╛рмирмЩрнНрмХ рмкрнНрм░рнЛрмдрнНрм╕рм╛рм╣рмирм╛рм░рнЗ рми рмкрмбрмирнНрмдрнБред рмирм┐рмЬ рм╕рнНрн▒рм╛рмзрнАрмирмдрм╛ рмкрм╛рмЗрмБ рмарм┐рмЖ рм╣рнЛрмЗ рмЧрм░рнНрмм рмХрм░рмирнНрмдрнБ ред рмирнВрмкрнБрм░ рмЬрмгрнЗ рмкрнНрм░рмХрнГрмд рм╣рм┐рм░рнЛ рммрнЛрм▓рм┐ рмормзрнНрнЯ рмХрм╣рм┐рмЫрмирнНрмдрм┐ рммрм╛рмЗрм▓рнНрмбрм░рнНрм╕ред

    рмЬрм╖рнНрмЯрм┐рм╕ рм╕рнВрм░рнНрмпрнНрнЯрмХрм╛рмирнНрмдрмЩрнНрмХ рмЦрмгрнНрмбрмкрнАрмармЩрнНрмХ рмнрм░рнНрмдрнНрм╕рмирм╛ рмкрм░рнЗ рмкрм░рнЗ рммрм▓рм┐рмЙрмб рмормзрнНрнЯ рмирнВрмкрнБрм░рмЩрнНрмХ рм╕рморм░рнНрмермирм░рнЗ рммрм╛рм╣рм╛рм░рм┐рмЫрмирнНрмдрм┐ред рмлрм┐рм▓рнНрмо рмирм┐рм░рнНрмжрнНрмжрнЗрм╢рмХ рммрм┐рммрнЗрмХ рмЕрмЧрнНрмирм┐рм╣рнЛрмдрнНрм░рнА, рмЕрмирнБрмкрмо рмЦрнЗрм░ рмирнВрмкрнБрм░рмЩрнНрмХ рм╕рмкрмХрнНрм╖рм░рнЗ рммрм╛рм╣рм╛рм░рм┐рмЫрмирнНрмдрм┐ред рммрм┐рммрнЗрмХ рмЯрнНрммрм┐рмЯ рмХрм░рм┐ рмЙрм▓рнНрм▓рнЗрмЦ рмХрм░рм┐рмЫрмирнНрмдрм┐ рмХрм┐, рмЖрмЬрм┐ рмирнНрнЯрм╛рнЯрмкрм╛рм│рм┐рмХрм╛ рмЖрмо рмЬрнАрммрми рмЬрнАрмЗрмБрммрм╛рм░ рмЕрмзрм┐рмХрм╛рм░ рмЫрмбрм╛рмЗ рмирнЗрмЗрмЫрм┐ред рмпрмжрм┐ рмдрм╛рмЩрнНрмХ рм╕рм╣ рмХрм┐рмЫрм┐ рм╣рнЛрмЗрмпрм╛рмП, рмХрм╛рм╣рм╛ рммрнЯрм╛рми рмжрм╛рнЯрнА рм╣рнЗрмм? рм╕рнЗрм╣рм┐рмкрм░рм┐ рмкрнНрм░рм╕рм┐рмжрнНрмз рмЕрмнрм┐рмирнЗрмдрм╛ рмЕрмирнБрмкрмо рмЦрнЗрм░ рм╕рм┐рмзрм╛рм╕рм│рмЦ рммрм┐рмЪрм╛рм░рмкрмдрм┐рмЩрнНрмХрнБ рмЕрмЩрнНрмЧрнБрм│рм┐ рмирм┐рм░рнНрмжрнНрмжрнЗрм╢ рмХрм░рм┐рмЫрмирнНрмдрм┐ред рм╕рнЗ рмЯрнНрммрм┐рмЯрм░ рм╣рнНрнЯрм╛рмгрнНрмбрнЗрм▓рм░рнЗ рммрм┐рмЪрм╛рм░рмкрмдрм┐рмЩрнНрмХ рмЙрмжрнНрмжрнЗрм╢рнНрнЯрм░рнЗ рм▓рнЗрмЦрм┐рмЫрмирнНрмдрм┐, рмЬрмЬрнНтАМ рм╕рм╛рм╣рм╛рмм рмирм┐рмЬ рм╕рморнНрморм╛рми рмкрм╛рмЗрмБ рмХрм┐рмЫрм┐ рм╕рморнНрморм╛рмирмЬрмирмХ рмХрм╛рм░рнНрмпрнНрнЯ рмХрм░рмирнНрмдрнБред рм╕рнЗрмкрмЯрнЗ рмкрнБрмгрм┐ рмХрмВрмЧрнНрм░рнЗрм╕рм░ рмкрнВрм░рнНрммрмдрми рмЕрмзрнНрнЯрмХрнНрм╖ рм░рм╛рм╣рнБрм▓ рмЧрм╛рмирнНрмзрнА рм╕рм╛рморнНрмирм╛рмХрнБ рмЖрм╕рм┐рмЫрмирнНрмдрм┐ред рмирнВрмкрнБрм░ рммрм┐рммрм╛рмжрм░рнЗ рм░рм╛рм╣рнБрм▓ рмЧрм╛рмирнНрмзрнА рммрм┐рмЬрнЗрмкрм┐рмХрнБ рмкрнБрмгрм┐ рмЯрм╛рм░рнНрмЧрнЗрмЯ рмХрм░рм┐рмЫрмирнНрмдрм┐ред рмШрнГрмгрм╛ рмирнВрмкрнБрм░ рмирнБрм╣рмБрмирнНрмдрм┐, рммрм┐рмЬрнЗрмкрм┐ рмкрнНрм░рм╕рм╛рм░ рмХрм░рнБрмЫрм┐ред рмдрнЗрммрнЗ рмирнВрмкрнБрм░ рмкрнНрм░рм╕рмЩрнНрмЧрм░рнЗ рмХрнЛрм░рнНрмЯрмЩрнНрмХ рмХрмбрм╛ рмЯрм┐рмкрнНрмкрмгрнА рмУрм▓рмЯрм╛ рмХрнЛрм░рнНрмЯрмЩрнНрмХрнБ рммрм┐рммрм╛рмж рмШрнЗрм░рмХрнБ рмЯрм╛рмгрм┐ рмЖрмгрм┐рмЫрм┐ред  

    рм╢рм┐рм│рм╛рм╕рнНрморм┐рмдрм╛ рм░рм╛рнЯрмЩрнНрмХ рм░рм┐рмкрнЛрм░рнНрмЯ рмирмХрнНрм╖рмдрнНрм░ рмирнНрнЯрнБрмЬрнН

Back to top button