crime

  • ଛାତ୍ରୀଙ୍କୁ ଅଶ୍ଳୀଳ ମେସେଜ ଦେଇଥିବା ପ୍ରଫେସର ଗିରଫ

    ହରିଦ୍ବାର: ଛାତ୍ରୀଙ୍କୁ ଅଶ୍ଳୀଳ ମେସେଜ ଦେଉଥିବା ଫେରାର ପ୍ରଫେସରଙ୍କୁ ଗିରଫ କରିଛି ହରିଦ୍ବାର ପୁଲିସ। ହରିଦ୍ବାରର ଭଲ୍ଲା ଇଣ୍ଟର କଲେଜର ପ୍ରିନ୍ସିପାଲଙ୍କ ପକ୍ଷରୁ ପ୍ରଫେସରଙ୍କ ବିରୋଧରେ ଥାନାରେ ଅଭିଯୋଗ ହୋଇଥିଲା।

    ଗତ ନଭେମ୍ବର ୧୭ ତାରିଖରେ ଭଲ୍ଲା ଇଣ୍ଟର କଲେଜର ପ୍ରନସିପାଲଙ୍କ ପକ୍ଷରୁ ହରିଦ୍ବାରର ନଗର ଥାନାରେ ପ୍ରଫେସର ସୁନିଲ କୁମାରଙ୍କ ବିରୋଧରେ ଅଭିଯୋଗ ହୋଇଥିଲା। ପ୍ରଫେସର ଛାତ୍ରୀଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଉଥିବା ନେଇ ଅଭିଯୋଗରେ ଉଲ୍ଲେଖ ଥିଲା।

    ଅଭିଯୋଗକୁ ଗୁରୁତର ସହ ନେଇ ମୁନସିପାଲ କମିଶନର ଘଟଣାର ତଦନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ। ଏସମ୍ପର୍କରେ ପୁଲିସ ସୂତ୍ରରୁ ସୂଚନା ଦିଆଯାଇଥିଲା କି, ଅପରାଧ ସତ୍ୟ ମିଳିବା ପରେ ଅଭିଯୁକ୍ତ ପ୍ରଫେସରଙ୍କୁ  ନିଲମ୍ବନ କରାଯାଇଥିଲା ଓ ପୁଲିସ ଏହା ଉପରେ ମାମଲା ରୁଜୁ କରିଥିଲା।

    ଏସମ୍ପର୍କରେ ହରିଦ୍ବାର ଏସପି, ରେଖା ଯାଦବ କହିଛନ୍ତି କି, ଅଭିଯୋଗ ପରେ ଫେରାର ହୋଇଯାଇଥିବା ପ୍ରଫେସରଙ୍କୁ ସାହାରନପୁରରୁ ତାଙ୍କ ଭଉଣୀଙ୍କ ଘରୁ ଗିରଫ କରାଯାଇଛି।

  • କୁଆଡ଼େ ଗଲା ଗ୍ୟାଙ୍ଗଷ୍ଟର ବିକାଶ ଦୁବେ ଫାଇଲ୍ ?

    କୁଆଡ଼େ ଗଲା ଗ୍ୟାଙ୍ଗଷ୍ଟର ବିକାଶ ଦୁବେ ଫାଇଲ୍। ପୁଲିସ ଏନକାଉଣ୍ଟରରେ ନିହତ ବିକାଶ ଦୁବେର ଫାଇଲ୍ କେମିତି ହଜିଗଲା। କିଏ ହଜାଇଲା। ଏହା ଇଛାକୃତ ନୁହେଁ ତ। ୨୦୨୦ରେ ୟୁପି ପୁଲିସର ଏନକାଉଣ୍ଟରରେ ମୃତ୍ୟୁବରଣ କରିଥିବା କୁଖ୍ୟାତ ଗ୍ୟାଙ୍ଗଷ୍ଟର୍ ବିକାଶ ଦୁବେର ରେକର୍ଡ ହଜାଇଦେଇଥିବା ସରକାରୀ ଅଧିକାରୀଙ୍କ ବିରୁଦ୍ଧରେ ଶୃଙ୍ଖଳାଗତ ଆକ୍ସନ ନେବାକୁ ସୁପାରିଶ କରିଛନ୍ତି ତଦନ୍ତ କମିଶନ। ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ବି.ଏସ. ଚୌହ୍ୱାନଙ୍କ ନେତୃତ୍ୱରେ ଗଠିତ ତଦନ୍ତ କମିଶନ ଏହି ସୁପାରିଶ କରିଛନ୍ତି। ସୁପାରିଶ ପଛରେ ଆଧାରକୁ ଦେଖିଲେ ଏଥିରେ ପୁଲିସ ସଂସ୍କାର, ବଦଳି, ପୋଷ୍ଟିଂ, ସିଆରପିସି, ଅନ୍ୟାନ୍ୟ ଆଇନଗତ ସଂସ୍କାର, ସରକାରୀ ଓକିଲ, ପବ୍ଲିକ ପ୍ରସିକ୍ୟୁଟର, ସର୍ଭିସ ଅଫ ସମନ୍, ହ୍ୟାଣ୍ଡକଫ୍, ବିକାଶ ଦୁବେର ଅପରାଧିକ ରେକର୍ଡ ସମ୍ପର୍କିତ ନିଖୋଜ ଫାଇଲ ଅଛି। ଜୁଲାଇ ୨୨, ୨୦୨୦ରେ ସୁପ୍ରିମକୋର୍ଟ ୟୁପି ସରକାରଙ୍କ ଡ୍ରାଫ୍ଟ ନୋଟିଫିକେସନକୁ ଅନୁମତି ଦେଇଥିଲେ। ଯେଉଁଠି ୩ ଜଣିଆ ତଦନ୍ତ କମିଶନର ନେତୃତ୍ୱ ନେବାକୁ ଅବସରପ୍ରାପ୍ତ ବିଚାରପତି ଚୌହ୍ୱାନଙ୍କୁ ଦାୟିତ୍ୱ ଦିଆଯାଇଥିଲା।

    ଏପ୍ରିଲ ୨୦୨୨ରେ ତଦନ୍ତ କମିଶନ ୟୁପି ପୁଲିସକୁ କ୍ଲିନଚିଟ୍ ଦେଇଥିଲେ। ବିକାଶ ଦୁବେ ଓ ତାହାର ୫ ଜଣ ସହଯୋଗୀଙ୍କୁ ୟୁପି ପୁଲିସ କରିଥିବା ଏନକାଉଣ୍ଟରରେ କୌଣସି ତୃଟି ପାଇନଥିଲେ ତଦନ୍ତ କମିଶନ। ଯୁପି ପୁଲିସର ଭୁଲ୍‌ଭଟକାକୁ ନେଇ କୌଣସି ପ୍ରମାଣ ବି ପାଇନଥିଲେ ତଦନ୍ତ କମିଶନ। ବିକାଶ ଦୁବେ ଓ ତାହାର ୫ ସହଯୋଗୀଙ୍କୁ ୨୦୨୧ ଜୁଲାଇରେ ପୁଲିସ ଏନକାଉଣ୍ଟର କରିଥିଲା। ସୁପ୍ରିମକୋର୍ଟ ୟୁପି ସରକାରଙ୍କୁ ନିର୍ଦେଶ ଦେଇଥିଲେ କି, ଗ୍ୟାଙ୍ଗଷ୍ଟର ବିକାଶ ଦୁବେ ଏନକାଉଣ୍ଟର ପରେ ଏହାକୁ ନେଇ ତଦନ୍ତ କମିଶନ କରିଥିବା ସୁପାରିଶକୁ ତୁରନ୍ତ କାର୍ଯ୍ୟକ୍ଷମ କର। ଏପରିକି ତଦନ୍ତ କମିଶନଙ୍କ ରିପୋର୍ଟକୁ ସାର୍ବଜନୀନ କରିବାକୁ ସୁପ୍ରିମକୋର୍ଟ ଓ୍ୱେବସାଇଟରେ ଅପଲୋଡ୍ କରିବାକୁ ନିର୍ଦେଶ ଦେଇଥିଲେ ସର୍ବୋଚ୍ଚ ଅଦାଲତ। ପ୍ରଧାନ ବିଚାରପତି ଜଷ୍ଟିସ ଏନ.ଭି.ରମଣା, ଜଷ୍ଟିସ କ୍ରିଷ୍ଣା ମୁରାରୀ ଓ ହିମା କୋହଲୀଙ୍କ ଖଣ୍ଡପୀଠ ଏହି ନିର୍ଦେଶ ଦେଇଥିଲେ। ସୁପ୍ରିମକୋର୍ଟଙ୍କ ନିର୍ଦେଶକୁ ବି ଅନୁପାଳନ କରାଯାଇଥିଲା। କମିଶନଙ୍କ ସୁପାରିଶ ଭିତରେ ରହିଛି ପୁଲିସ ଆଧୁନିକୀକରଣ, ପୁଲିସ ଉପରେ କାମର ଚାପ କମାଇବା, ମହିଳା, ଦୁର୍ବଳ ବର୍ଗ, ଦିବ୍ୟାଙ୍ଗଙ୍କ ପ୍ରତି ମାନବୀୟ ସମ୍ୱେଦଶୀଳତା ମନୋଭାବ ଆପଣାଇବା ଆଦି ଥିଲା।

    ଏହା ସହ ପ୍ରୟାଗରାଜ, ଆଗ୍ରା ଓ ମିରଟ୍ ସହରରେ ଅନ୍ୟ ବଡ଼ ସହର ଭଳି କମିଶନରେଟ୍ ସିଷ୍ଟମ ଲାଗୁ କରିବା, ସଂଗଠିତ ଅପରାଧ ନିୟନ୍ତ୍ରଣରେ ସ୍ପେଶିଆଲ ଆକ୍ଟକୁ କାର୍ଯ୍ୟକ୍ଷମ ସହ ସ୍ପେଶିଆଲ ସେଲ୍ ଖୋଲାଯାଉ। ସ୍ଥାନୀୟ ଗୁଇନ୍ଦା ସୂଚନାକୁ ସୁଦୃଢୀକରଣ କରିବା, କୁଖ୍ୟାତ ଅପରାଧୀଙ୍କୁ ଚିହ୍ନଟ ସହ ସେମାନଙ୍କ ଗତିବିଧି ଉପରେ ନିରନ୍ତର ନଜର ରଖିବା, ଅପରାଧକୁ ଚିହ୍ନଟ ଲାଗି ଭିଡିଓଗ୍ରାଫି, ତଦନ୍ତକାରୀ ଅଫିସରଙ୍କ କାର୍ଯ୍ୟାଳୟରେ ପର୍ଯ୍ୟାପ୍ତ ସିସିଟିଭି କ୍ୟାମେରା ଖଞ୍ଜାଯାଉ। ଗୋଟିଏ ଜିଲ୍ଲା କି ଗୋଟିଏ ଜାଗାରେ ଯେମିତି ଅଧିକ ଦିନ କୌଣସି ପୁଲିସ କି ରାଜସ୍ୱ ଅଫିସର ପ୍ରଶାସନିକ କଳକୁ ପ୍ରଭାବିତ କରି ରହିପାରିବେନି, ସେ ନେଇ ସ୍ୱତନ୍ତ୍ର ନୀତି କରନ୍ତୁ ସରକାର। ବିଶେଷ କରି ଆର୍ମ ଲାଇସେନ୍ସ, ଖଣିକୁ ଲାଇସେନ୍ସ ଦେଉଥିବା ଅଧିକାରୀ, ବାଲି ଓ ପଥର ଖଣିକୁ ଲାଇସେନ୍ସ ଦେଉଥିବା ଅଧିକାରୀଙ୍କ କ୍ଷେତ୍ରରେ ଏହାକୁ ଦୃଢ ଭାବରେ ଅନୁପାଳନ ହେଉ। ପୁଲିସ ହେପାଜତରୁ ଅନେକ ସମୟରେ ଅପରାଧୀ ଚମ୍ପଟ ମାରୁଥିବା ଓ ଏହା ପରେ ତାକୁ ଧରିବାକୁ ଯାଇ ଏନକାଉଣ୍ଟର କରିବାକୁ ପଡ଼ୁଥିବା ସ୍ଥିତି ବାବଦରେ ବି କମିଶନ ସୁପାରିଶ କରିଛନ୍ତି। କୋର୍ଟର ଅନୁମତି ନେଇ ହିଁ ଏଭଳି ଅପରାଧୀଙ୍କୁ ହ୍ୟାଣ୍ଡକପ୍ ପକାଇପାରିବେ ପୁଲିସ।

    ଟ୍ରାଞ୍ଜିଟ୍ କି ରିମାଣ୍ଡରେ ନେଉଥିଲା ବେଳେ ଅପରାଧୀ ପୁଲିସକୁ ଚକମା ଦେଇ ଖସିଯିବାର ଅନେକ ନଜିର ରହିଛି। ତେବେ ତଦନ୍ତ କମିଶନର ପୁନର୍ଗଠନ କରିବାକୁ ସୁପ୍ରିମକୋର୍ଟରେ ଆଇନଜୀବି ଘନଶ୍ୟାମ ଉପାଧ୍ୟାୟ ପିଆଇଏଲ ଫାଇଲ୍ କରିଥିଲେ। ଏହାକୁ କୋଲ୍ଡ-ବ୍ଲଡେଡ୍ ମର୍ଡର ବୋଲି ଅଭିହିତ କରିଥିଲେ। ତଦନ୍ତ କମିଶନ ପ୍ୟାନେଲ ବିନା ତଦନ୍ତରେ ପୁଲିସକୁ କ୍ଲିନଚିଟ୍ ଦେଇ ଏଭଳି ରିପୋର୍ଟ ତିଆରି କରିଛନ୍ତି। କିନ୍ତୁ ସଲିସିଟର ଜେନେରାଲ ତୁଷାର ମେହେଟ୍ଟା ଓ ବରିଷ୍ଠ ଆଇନଜୀବି ହରିଶ ସାଲଭେ ଏହାକୁ ବିରୋଧ କରିଥିଲେ। ଯିଏ ୟୁପି ସରକାରଙ୍କ ପକ୍ଷରୁ କୋର୍ଟରେ ପ୍ରତିନିଧିତ୍ୱ କରୁଥିଲେ। ତଦନ୍ତ କମିଶନଙ୍କ ରିପୋର୍ଟ ଗୃହରେ ଉପସ୍ଥାପିତ ହୋଇସାରିଛି। ସେଥିଲାଗି ଏହି ମାମଲାକୁ ଏଇଠି ବନ୍ଦ କରିଦେବା ଉଚିତ୍। ଅଭିଯୋଗ ଓ ପ୍ରତି ଅଭିଯୋଗ ଚାଲିବ। ତିନି ଜଣିଆ ତଦନ୍ତ କମିଶନ ରିପୋର୍ଟ ଦେଇସାରିଛି।

    ସମସ୍ତଙ୍କୁ ଏହି ରିପୋର୍ଟରେ ଖୁସି କରାଯିବ ବୋଲି କିଛି ଅର୍ଥ ନାହିଁ। କମିଶନ ରିପୋର୍ଟକୁ ଚ୍ୟାଲେଞ୍ଜ କରିବାର ପ୍ରଶ୍ନ ଉଠୁନି। ଏହା କୌଣସି ରାୟ ନୁହେଁ ଯେ, ଏହା ବିରୁଦ୍ଧରେ ଅପିଲ୍ କରାଯାଇପାରିବ। ତେବେ ଉଭୟ ପକ୍ଷର ଯୁକ୍ତି ଶୁଣିବା ପରେ ସୁପ୍ରିମକୋର୍ଟ ଏହି ମାମଲାକୁ ବନ୍ଦ କରିଦେଇଥିଲେ। ତଦନ୍ତ କମିଶନରେ ପୂର୍ବତନ ହାଇକୋର୍ଟ ବିଚାରପତି ଜଷ୍ଟିସ୍ ଶଶୀକାନ୍ତ ଅଗ୍ରଓ୍ୱାଲ ଓ ଅବସରପ୍ରାପ୍ତ ୟୁପିର ଡିଜିପି କେ.ଏଲ.ଗୁପ୍ତା ସଦସ୍ୟ ଥିଲେ। ଜୁଲାଇ ୩, ୨୦୨୦ ମଧ୍ୟରାତ୍ରିରେ ୮ ଜଣ ପୁଲିସ କର୍ମଚାରୀଙ୍କୁ ଆମ୍ୱୁସ୍ କରି ବିକାଶ ଦୁବେ ଓ ତାହାର ସହଯୋଗୀ ଗୁଳି କରି ହତ୍ୟା କରିଥିଲେ। ବିକାଶ ଦୁବେକୁ ଗିରଫ କରିବାକୁ ଡିଏସପି ଦେବେନ୍ଦ୍ର ମିଶ୍ରଙ୍କ ନେତୃତ୍ୱରେ ଯାଇଥିବା ଟିମ୍ ଆମ୍ୱୁସର ଶୀକାର ହୋଇଥିଲା। ଛାତ ଉପରୁ ପୁଲିସ କର୍ମୀଙ୍କ ଉପରକୁ ଗୁଳି କରିଥିଲେ ବିକାଶ ଓ ତାହାର ସହଯୋଗୀ। ଘର ଆଗରେ ବୁଲଡୋଜର ରଖି ଭୁଲ୍ ଗୁଇନ୍ଦା ସୂଚନା ବଳରେ ପୁଲିସକୁ ଚକମା ଦେବାରେ ସଫଳ ହୋଇଥିଲା ଦୁବେ ଗ୍ୟାଙ୍ଗ। ପରେ ଜୁଲାଇ ୧୦ରେ ଦୁବେକୁ ଏନକାଉଣ୍ଟର କରାଯାଇଥିଲା।

    ଦୁବେକୁ ଗିରଫ କରି ଉଜ୍ଜୟିନୀରୁ କାନପୁର ନେଉଥିଲା ବେଳେ ପୁଲିସ କବଳରୁ ଖସିବାକୁ ଚେଷ୍ଟା କରିବାରୁ ପୁଲିସ ଗୁଳି କରିଥିଲା। ଆଉ ଏଭଳି ଏନକାଉଣ୍ଟର ପୁଲିସ ଜାଣିଶୁଣି କରିଥିବାର ଅଭିଯୋଗ ହେବାରୁ ଏହାକୁ ନେଇ ତଦନ୍ତ କମିଶନ ଗଠନ କରିଥିଲେ ସୁପ୍ରିମକୋର୍ଟ। ବିକାଶ ଦୁବେକୁ ଏନକାଉଣ୍ଟର ଆଗରୁ ତାହାର ୫ ସହଯୋଗୀଙ୍କୁ ଏନକାଉଣ୍ଟର କରିସାରିଥିଲା ପୁଲିସ।

    • ପ୍ରଦୀପ ନାୟକଙ୍କ ରିପୋର୍ଟ
  • ଆଶିଷ ମିଶ୍ରାଙ୍କ ଜାମିନ ଆବେଦନ ପ୍ରତ୍ୟାଖ୍ୟାନ

    ବହୁଚର୍ଚ୍ଚିତ ଲକ୍ଷ୍ମୀପୁର ଖେରି ହିଂସା ମାମଲା । ମୁଖ୍ୟ ଅଭିଯୁକ୍ତ ଆଶିଷ ମିଶ୍ରାଙ୍କ ଜାମିନ ଆବେଦନ ପ୍ରତ୍ୟାଖ୍ୟାନ ହୋଇଛି । ଜାମିନ ଆବେଦନକୁ ଖାରଜ କରିଛନ୍ତି ଆହ୍ଲାବାଦ ହାଇକୋର୍ଟ । ଜଷ୍ଟିସ କୃଷ୍ଣ ପହଲଙ୍କ ବେଞ୍ଚ ଶୁଣାଣି ଶେଷ କରିବା ପରେ ଜୁଲାଇ ୧୫ରୁ ଏହାର ଆଦେଶ ସଂରକ୍ଷିତ ରଖିଥିଲେ କୋର୍ଟ ।କେନ୍ଦ୍ର ଗୃହ ମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ ମିଶ୍ରାଙ୍କୁ ଅଦାଲତି ଝଟକା। ଆବେଦନ ଖାରଜ କଲେ ଆହ୍ଲାବାଦ ହାଇକୋର୍ଟ । ଏହି ହିଂସାକାଣ୍ଡରେ ଆଶିଷ ମିଶ୍ରା ଆନ୍ଦୋଳନରତ ଥିବା ଚାଷୀଙ୍କ ଉପରେ ଗାଡି ଚଢାଇ ଦେଇଥିଲେ। ଫଳରେ ୪ ଜଣ ଚାଷୀଙ୍କ ମୃତ୍ୟୁ ହୋଇଥିବା ବେଳେ ଏହାକୁ ନେଇ ଉପୁଜିଥିବା ହିଂସାରେ ୩ ଜଣ ମୃତ୍ୟୁବରଣ କରିଥିଲେ  । ଏହି ଭଳି ଏକ ସମ୍ବେଦନଶୀଳ ଘଟଣାରେ ତାଙ୍କୁ ଜାମିନ ମିଳିବ ନାହିଁ ବୋଲି କହିଥିଲେ ଉଚ୍ଚତମ ନ୍ୟାୟାଳୟ । ଜାମିନ ନିବେଦନର ଶୁଣାଣି କରିଥିବା ବିଚାରପତି ଜଷ୍ଟିସ୍ କୃଷ୍ଣ ପହଲଙ୍କ ଖଣ୍ଡପୀଠ ସାକ୍ଷ ପ୍ରମାଣକୁ ପ୍ରଭାବିତ କରିପାରନ୍ତି ବୋଲି କହି ଜାମିନ ଖାରଜ କରିଥିଲେ  । ଚଳିତ ବର୍ଷ ଫେବୃୟାରୀରେ ହାଇକୋର୍ଟ ଆଶିଷଙ୍କୁ ଜାମିନ ପ୍ରଦାନ କରିଥିଲେ ମଧ୍ୟ ପରବର୍ତ୍ତୀ ସମୟରେ ଏପ୍ରିଲରେ ସୁପ୍ରିମକୋର୍ଟ ଆଶିଷଙ୍କୁ ହାଇକୋର୍ଟରୁ ଦିଆଯାଇଥିବା ଜାମିନଙ୍କୁ ରଦ୍ଦ କରି ଏକ ସପ୍ତାହ ମଧ୍ୟରେ ଆତ୍ମସମର୍ପଣ କରିବାକୁ କହିଥିଲେ। ଘଟଣାରେ ପୀଡିତଙ୍କ ପକ୍ଷକୁ ଭଲଭାବରେ ଶୁଣି ଅଭିଯୁକ୍ତଙ୍କ ଜାମିନ ଉପରେ ରାୟ ଦେବା ପାଇଁ ହାଇକୋର୍ଟକୁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ। ଏହାପରେ ହାଇକୋର୍ଟ ଆଶିଷ ମିଶ୍ରାଙ୍କ ଜାମିନ ଆବେଦନର ପୁର୍ନବାର ଶୁଣାଣି କରିବା ପାଇଁ ଜୁଲାଇ ୧୫ କୁ ରାୟ ସଂରକ୍ଷିତ ରଖାଯାଇଥିବା ବେଳେ ଆଜି ଏହାର ପୂର୍ନର୍ବାର ବିଚାର କରି ଜାମିନକୁ ପ୍ରତ୍ୟାହାର କରିଛନ୍ତି  ।

    ସୂଚନା ଅନୁଯାୟୀ, ୨୦୨୧ ଅକ୍ଟୋବର ୩ ରେ ଉତ୍ତରପ୍ରଦେଶ ଲଖିମପୁର ଖେରିରେ କୃଷି ଆଇନ ପ୍ରତିବାଦରେ ଚାଷୀମାନେ ଆନ୍ଦୋଳନ କରୁଥିଲେ। ଏହି ସମୟରେ ଦୃତ ଗତିରେ ୨ଟି ଗାଡି ଆସି ଚାଷୀଙ୍କ ଉପରେ ଚଢାଇଥିଲା ଯାହାଦ୍ବାରା ୭ ଜଣ ଙ୍କ ଜୀବନ ଯାଇଥିଲା ।  ଗାଡି ଚଢାଇବା ଘଟଣାକୁ କେନ୍ଦ୍ରକରି ଆଶିଷ ମିଶ୍ରାଙ୍କ ନାମରେ ଅଭିଯୋଗ ହୋଇଥିଲା  । ପୋଲିସ ଆଶିଷଙ୍କ ସମେତ ଏକାଧିକ ଲୋକଙ୍କୁ ଗିରଫ କରିଥିଲା।

    ଶୁଭଲକ୍ଷ୍ମୀ ସାହୁଙ୍କ ରିପୋର୍ଟ

  • ଦିଲ୍ଲୀ ରେଳୱେ ଷ୍ଟେସନରେ ଜଣେ ମହିଳାଙ୍କୁ ଗଣଦୁଷ୍କର୍ମ ଅଭିଯୋଗ

    ଦିଲ୍ଲୀ ରେଳୱେ ଷ୍ଟେସନରେ ଜଣେ ମହିଳାଙ୍କୁ ଗଣଦୁଷ୍କର୍ମ ଅଭିଯୋଗ। ଏହି ଘଟଣାରେ ୪ ଅଭିଯୁକ୍ତ ରେଳ କର୍ମଚାରୀଙ୍କୁ ଗିରଫ କରାଯାଇଛି। ଏନେଇ ସୂଚନା ଦେଇଛନ୍ତି ରେଳୱେ ଡିସିପି ହରେନ୍ଦ୍ର ସିଂହ। ଜୁଲାଇ ୨୧ ବିଳମ୍ୱିତ ରାତିରେ ଦିଲ୍ଲୀ ରେଳ ଷ୍ଟେସନର ଇଲେକ୍ଟ୍ରିକ ମେଣ୍ଟେନାନ୍ସ ଷ୍ଟାଫ୍ କ୍ବାର୍ଟର ଭିତରେ ଅଭିଯୁକ୍ତମାନେ ମହିଳାଙ୍କୁ ଗଣଦୁଷ୍କର୍ମ କରିଥିଲେ। ଦିଲ୍ଲୀ ରେଳୱେ ଷ୍ଟେସନରେ ଲଜ୍ଜା। ଜଣେ ମହିଳାଙ୍କୁ ଗଣଦୁଷ୍କର୍ମ ଅଭିଯୋଗ। ପୀଡିତା ଜଣଙ୍କ ସ୍ବାମୀଙ୍କଠାରୁ ଅଲଗା ରହୁଥିବା ବେଳେ ପ୍ରାୟ ଦୁଇ ବର୍ଷ ପୂର୍ବରୁ ଜଣେ ଅଭଯୁକ୍ତଙ୍କ ସହ ପରିଚିତ ହୋଇଥିଲା।

    ଏବଂ ସେ ଜଣେ ରେଳ ବିଭାଗରେ କାର୍ଯ୍ୟରତ ଥିବା କହି ମହିଳା ଜଣଙ୍କୁ ରେଳ ବିଭାଗରେ ଚାକିରୀ କରାଇଦେବାର ପ୍ରତିଶ୍ରୁତି ମଧ୍ୟ ଦେଇଥିଲେ। ହେଲେ ଜୁଲାଇ ୨୧ ରାତିରେ ଅଭିଯୁକ୍ତ ଜଣଙ୍କ ଉକ୍ତ ମହିଳାଙ୍କୁ ଫୋନ କରି ଜନ୍ମଦିନ ଭୋଜି ସହ ନୂଆ ଘର କିଣିଥିବାରୁ ଭୋଜିକୁ ନିମନ୍ତ୍ରଣ କରିଥିବା ଜଣାପଡିଛି। ସେପଟେ ମହିଳା ଜଣଙ୍କ ଦିଲ୍ଲୀର କିର୍ତ୍ତୀ ନଗର ମେଟ୍ରୋ ଷ୍ଟେସନରେ ରାତି ପ୍ରାୟ ୧୦.୩୦ ମିନିଟ ସମୟରେ ପହଞ୍ଚିଥିଲେ। ଅଭିଯୁକ୍ତ ତାଙ୍କୁ ନୂଆଦିଲ୍ଲୀ ରେଳଷ୍ଟେସନର ୮,୯ ପ୍ଲାଟଫର୍ମକୁ ଆଣିଥିଲେ। ସେଠାରେ ଥିବା ଇଲେକ୍ଟ୍ରିକ ମେଣ୍ଟେନାନ୍ସ ଷ୍ଟାଫ୍ କ୍ବାର୍ଟରରେ ବସିବାକୁ କହିଥିଲେ। ଏହାପରେ ୩ ସାଙ୍ଗଙ୍କ ସହ ଅଭିଯୁକ୍ତ ଜଣଙ୍କ ମହିଳାଙ୍କୁ ଦୁଷ୍କର୍ମ କରିଥିଲେ। ପୋଲିସ ସେହି ଘଟଣାର ତଦନ୍ତ କରି ୪ ଅଭିଯୁକ୍ତଙ୍କୁ ଗିରଫ କରିଛି।

    • ସୌନ୍ଦର୍ଯ୍ୟା ମହାନ୍ତିଙ୍କ ରିପୋର୍ଟ
  • ମିଆମାର ସେନାର ବର୍ବରତା

    ନାପ୍ୟିଡ: ମିଆମାର ସେନାର ବର୍ବରତା। ନିଜ ଲୋକଙ୍କ ହତ୍ୟା କରିବାକୁ ବିଛାଉଛି ବାରୁଦ। ଗତ ବର୍ଷ ଦେଶରେ ସରକାର ବଦଳିବା ପରେ ସେଠାରେ ଦେଖାଦେଇଛି ଅସ୍ଥିରତା। ଲୋକଙ୍କ ଉପରେ ସେନା ଚଳାଇଛି ଆତଙ୍କ। ଏକ ନୂତନ ରିପୋର୍ଟ ଅନୁଯାୟୀ ଥାଇଲାଣ୍ଡ ସୀମା ନିକଟରେ କାୟା ଅଞ୍ଚଳରେ ସଂଘର୍ଷ ଜାରି ରହିଥିବା ବେଳେ ସେଠାରେ ଓ ନିକଟ ବର୍ତ୍ତୀ ଅଞ୍ଚଳରେ ବାରୁଦ ସୁଡଙ୍ଗ ବିଛାଇଦେଇଥିଲା। ଏହି ବାରୁଦ ସୁଡଙ୍ଗରେ ବିସ୍ଫୋରଣ ଘଟି ବହୁ ଲୋକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି l ଏମନେଷ୍ଟି ଇଣ୍ଟରନାସନାଲ ମୁତାବକ, ଏହି ଅଞ୍ଚଳର ଗସ୍ତ କରିଥିବା ରସର୍ଚ୍ଚ ଟିମ ପାଇଥିଲେ କି, ଲୋକଙ୍କ ଘର ଓ ଚର୍ଚ୍ଚ ନିକଟରେ ବାରୁଦ ସୁଡଙ୍ଗ ବିଛା ଯାଇଥିଲା। ଏହି ସୁଡଙ୍ଗ ସଂସ୍ପର୍ଶରେ ଆସିବାରୁ ୨୦ ଜଣଙ୍କ ମୃତ୍ୟୁ ହୋଇଯାଇଛି ବହୁ ଲୋକ ମଧ୍ୟ ଦିବ୍ୟାଙ୍ଗ ହୋଇଯାଇଛନ୍ତି। ରିସର୍ଚ୍ଚର ୨୦୨୧ ଫେବୃଆରୀରୁ ସେନା ନିୟନ୍ତ୍ରଣକୁ ଆସିଥିବା ଗାଁକୁ ଯାଇଥିଲେ। ସେନା ସେତେବେଳେ ମିୟାମାରର ଲୋକତାନ୍ତ୍ରିକ ଶୈଳୀରେ ନିର୍ବାଚିତ ସରକାରକୁ ବାହାର କରି ଦେଶର ଶାସନ ଭାର ସେନା ହାତକୁ ନେଇଥିଲା।

    • ଶିଳା ରାୟଙ୍କ ରିପୋର୍ଟ
  • ଏନଆଇଏକୁ ବଡ ସଫଳତା

    ରାଜସ୍ଥାନ  ଉଦୟପୁର ନିକଟରେ ହୋଇଥିବା ହତ୍ୟାକାଣ୍ଡ ଘଟଣାରେ ଜାତୀୟ ତଦନ୍ତକାରୀ ସଂସ୍ଥା ଏନଆଇଏକୁ ବଡ ସଫଳତା । ହତ୍ୟାକାଣ୍ଡରେ ସାମିଲ ୭ ମ ଅପରାଧୀକୁ ଏନଆଇଏ ଗିରଫ କରିଛି । ଗିରଫ ଅଭିଯୁକ୍ତ ହେଲେ ୩୧ ବର୍ଷୀୟ ଫରହଦ ମହମ୍ମଦ । ଫରହଦ ମୁଖ୍ୟ ଅଭିଯୁକ୍ତ ରିଆଜ ଅଟାରୀ ସହ ମିଶି ଷଡଯନ୍ତ୍ର କରିଥିବା ଅଭିଯୋଗ ହୋଇଥିଲା। ଶନିବାର ଫରହଦକୁ ଗିରଫ କରିଛି ତଦନ୍ତକାରୀ  ସଂସ୍ଥା ।

    ପୂର୍ବରୁ ହତ୍ୟା ମାମଲାରେ ୬ ଜଣ ଗିରଫ ହୋଇସାରିଛନ୍ତି । ସମସ୍ତ ଅଭିଯୁକ୍ତଙ୍କୁ ଏନଆଇଏ ପଚରା ଉଚୁରା କରୁଛି । ସନ୍ଦେହ କରାଯାଉଛି ଏମାନଙ୍କର ତାଲିବାନୀ ଓ ପାକିସ୍ତାନ ସହ ଲିଙ୍କ ରହିଛି । ନିକଟରେ ଉଦୟପୁର କହ୍ନେୟାଲାଲ ନାମକ ଜଣେ ଦରଜୀଙ୍କୁ ହତ୍ୟା କରାଯାଇଥିଲା । ବିଜେପିର ପୂର୍ବତନ ମୁଖପାତ୍ର ନୁପୁର ଶର୍ମାଙ୍କ ସମର୍ଥନରେ ଲେଖିଥିବାରୁ ମୁସଲିମ୍ ସମ୍ପ୍ର୍ଦାୟର ଦୁଇ ଯିବକ ତାଙ୍କ ଦୋକାନ ଭିତରେ ପଶି ଦିନ ଦ୍ବିପହରରେ ବେକ କାଟିଦେଇଥିଲେ । ତାଲିବାନୀ ଶୈଳୀରେ ଏହି ହତ୍ୟା କରାଯାଇଥିଲା । ହତ୍ୟା ପରେ ସାରା ଦେଶରେ ଆନ୍ଦୋଳନ ଏବଂ ଆକ୍ରୋଶ ଦେଖାଦେଇଥିଲା ।

     ସ୍ମରଜିତ୍ ଆର୍ଯ୍ୟଙ୍କ ରିପୋର୍ଟ

  • ଚଳନ୍ତା କାର୍ ରେ ଦୁଷ୍କର୍ମ

    ଦିନକୁ ଦିନ ଅପରାଧ ବଢିବାରେ ଲାଗିଛି। କେନ୍ଦ୍ର ବା ରାଜ୍ୟ ସରକାରଙ୍କ ମିଳିତ ଉଦ୍ୟମରେ ମଧ୍ୟ ଦୁଷ୍କର୍ମ ଉପରେ ବ୍ରେକ୍ ଲାଗି ପାରୁନାହିଁ । ପୁଣି ଏକ ଲଜ୍ଜାଜନକ ଦୁଷ୍କର୍ମ ଘଟଣା ସାମ୍ନାକୁ ଆସିଛି ଉତ୍ତରାଖଣ୍ଡ ହରିଦ୍ୱାରରୁ । ମାଆ ଓ ୬ ବର୍ଷର ଝିଅକୁ ଚଳାନ୍ତା କାରରେ ଗଣଦୁଷ୍କର୍ମ କରାଯାଇଥିବା ଘଟଣା। ଏହି ଘଟଣାକୁ ପ୍ରାୟ ୪୮ ଘଣ୍ଟା ବିତି ଯାଇଥିଲେ ମଧ୍ୟ ପୋଲିସର ହାତ ଖାଲି । କାର ଭିତରେ ୪ଜଣ ଦୁର୍ବୃତ୍ତ ମିଶି ଏହି ଗଣଦୁଷ୍କର୍ମ କରିଥିବା ଅଭିଯୋଗ ହୋଇଛି। ଘଟଣାରେ ସମ୍ପୃକ୍ତ ଥିବା ମୁଖ୍ୟ ଅଭିଯୁକ୍ତ ସୋନୁ ଓ ତାର ସାଙ୍ଗମାନେ ଫେରାର୍ ଥିବା ସୂଚନା ଦେଇଛି ପୋଲିସ।

    ପୋଲିସ କହିବା ଅନୁସାରେ, ଶୁକ୍ରବାର ବିଳମ୍ୱିତ ରାତିରେ ମହିଳା ଓ ତାଙ୍କର ୬ ବର୍ଷର ଝିଅ ମିଶି ନିଜ ଘରକୁ ଫେରୁଥିବା ସମୟରେ କଲିୟାର ଅଞ୍ଚଳରେ ଏକ କାର୍ ଲିଫ୍ଟ ଦେବାକୁ କହି ମା ଓ ଶିଶୁ କନ୍ୟାକୁ ବଳତ୍କାର କରିଥିଲେ। ଅଭିଯୁକ୍ତମାନେ ଉଭୟଙ୍କୁ ଗଙ୍ଗାକେନାଲ କୂଳରେ ଫିଙ୍ଗିଦେଇ ଚାଲିଯାଇଥିଲେ।ଏହାପରେ ମହିଳା ଜଣକ ଯେକୌଣସି ପ୍ରକାରରେ ଥାନାରେ ପହଞ୍ଚି ଥାନାରେ ଏତଲା ଦେଇଥିଲେ। ଶିଶୁ କନ୍ୟାର ଅବସ୍ଥା ଗୁରୁତ୍ବପୂର୍ଣ୍ଣ ଥିବାରୁ ସ୍ଥାନୀୟ ସିଭିଲ ହସ୍ପିଟାଲରେ ଭର୍ତ୍ତି କରାଯାଇଥିଲା। ହସ୍ପିଟାଲରେ ପହଞ୍ଚିବା ସମୟରେ ଶିଶୁଟିର ଅବସ୍ଥା ଅତ୍ୟନ୍ତ ଗମ୍ଭୀର ଥିଲା। ଡାକ୍ତର ଓ ସେଠାରେ ଥିବା ପୁଲିସ କର୍ମଚାରୀ ଶିଶୁଟିର ଅବସ୍ଥା ଦେଖି ଶିହରୀ ଉଠିଥିଲେ, ଅନେକଙ୍କ ଆଖିରେ ମଧ୍ୟ ଆସିଯାଇଥିଲା ଲୁହ। ତେବେ ୩ ଘଣ୍ଟାର ଅପରେସନ କରାଯାଇଥିଲା। ବର୍ତ୍ତମାନ ତାର ଅବସ୍ଥା ଭଲ ଥିବା ଡାକ୍ତର କହିଛନ୍ତି। ଏହି ମାମଲାରେ ପୋଲିସ ଶନିବାର ଦିନ ପୀଡିତା ମହିଳାଙ୍କ ବୟାନ ରେକର୍ଡ କରିଥିଲା। ଏନେଇ ପୋଲିସ ତଦନ୍ତ ଜାରି ରଖିଛି।

    ପୋଲିସ ଅଧିକ୍ଷକ ପ୍ରେମନ୍ଦ୍ର ଡୋଭାଲ କହିଛନ୍ତି ଯେ, ତଦନ୍ତରେ ପୋଲିସ ସକ୍ରୀୟ ଭାବେ ଜଡିତ ଅଛି। ଅନେକ ସନ୍ଦିଗ୍ଧଙ୍କୁ ପଚରାଉଚରା କରାଯାଉଛି। ଏହି ଘଟଣାରେ କିଛି ଗୁକୁତ୍ୱପୂର୍ଣ୍ଣ ସୂଚନା ମଧ୍ୟ ମିଳିଛି। ଅଭିଯୁକ୍ତ ସୋନୁକୁ ଧରିବାପାଇଁ ଅଞ୍ଚଳରେ ପୁରସ୍କାର ଘୋଷଣା କରାଯିବା ନେଇ ପ୍ରସ୍ତୁତି ଚାଲିଛି। ସୂଚନା ଦେବା ବ୍ୟକ୍ତିଙ୍କର ପରିଚୟ ଗୋପନୀୟ ରଖାଯିବ ବୋଲି ପୁଲିସ ଅଧିକ୍ଷକ କହିଛନ୍ତି।

    ଶୁଭଲକ୍ଷ୍ମୀ ସାହୁଙ୍କ ରିପୋର୍ଟ

  • ମିଳିବନି ମୃତ୍ୟୁଦଣ୍ଡ…

    ଫାଶୀ କୁ ନାଁ ବା ଫାଶୀ ଦଣ୍ଡ ମନା ।ଅପରାଧୀ ଙ୍କୁ ସଜାଡିବା ପାଇଁ ସୁଯୋଗ । ଅପରାଧ ଯେତେ ସାଂଙ୍ଘତିକ ହେଉ କି ଅପରାଧୀ ଯେତେ ଦୁର୍ଦ୍ଦାନ୍ତ ଫାଶୀ ଦଣ୍ଡ ମନା । ଏ ନିଷ୍ପତ୍ତି ଆମ ଦେଶରେ ନୁହଁ । ମୃତ୍ୟୁ ଦଣ୍ଡ ବାଧ୍ୟ୍ୟତାମୁଳକ ନୁହେଁ ବୋଲି କହିଛନ୍ତି ମ୍ୟାଲେସିଆ ସରକାର । ମୃତ୍ୟୁ ଦଣ୍ଡ ପରିବର୍ତ୍ତେ ରହିବ ବିକଳ୍ପ ଦଣ୍ଡ ବ୍ୟବସ୍ଥା । ଅପରାଧୀ କୁ ସୁଧାରିବା ପାଇଁ ଦିଆଯିବ ସୁଯୋଗ । ୨୦୧୮ ରେ ମ୍ୟାଲେସିଆ ସରକାର ଏହି ପ୍ରସ୍ତାବ ଆଗତ କରିଥିଲେ । ବର୍ତ୍ତମାନ ଏହା ଆଇନ ରେ ପରିଣତ ହେବାକୁ ଯାଉଛି ।

    ଅପରାଧୀ କୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ମୃତ୍ୟୁ ଦଣ୍ଡ ନୁହେଁ ବିକଳ୍ପ ଦଣ୍ଡବିଧାନ ରହିବ ତାହା ପୁଣି କୋର୍ଟ ଙ୍କ ଇଛାରେ । ଏହି ଘୋଷଣା କରିଛନ୍ତି ମ୍ୟାଲେସିଆ ସରକାର ର ଆଇନ ମନ୍ତ୍ରୀ ୱାନ ଜୁନାଇଦ ୟୁଆଙ୍କୁ ଜାଫର । ଏହାକୁ ଆଇନରେ ପରିଣତ କରିବା ପୁର୍ବରୁ ଏକ ବିଶେଷଜ୍ଞ କମିଟି ଗଠନ କରାଯାଇଛି । ବିଶେଷଜ୍ଞ କମିଟି ରିପୋର୍ଟ ଆଧାର ରେ ଦଣ୍ଡ ବିଧାନ ବ୍ୟବସ୍ଥା କରାଯିବ । ୧୧ ଟି ଅପରାଧରେ ମୃତ୍ୟଦଣ୍ଡ ବ୍ୟବସ୍ଥା କୁ ବିକଳ୍ପ ଦଣ୍ଡାଦେଶକୁ ପରିଣତ କରାଯାଇଛି । ଆଗକୁ ୨୨ ଟି ଅପରାଧକୁ ଏହି ପ୍ରକିୟାରେ ସାମିଲ କରାଯିବ । ଖାଲି ବିକଳ୍ପ ଦଣ୍ଡ ବିଧାନ ନୁହେଁ ଉଭୟ ପକ୍ଷକୁ ସୁହାଇବା ଭଳି ବିକଳ୍ପ ଦଣ୍ଡ ବ୍ୟବସ୍ଥା ହେବ ।

    ଅଭିଯୁକ୍ତ କୁ ଦଣ୍ଡ ମିଳିବା ସହ ଅପର ପକ୍ଷ ନ୍ୟାୟ ପାଇବ । ବର୍ତ୍ତମାନ ମ୍ୟାଲେସିଆ ରେ ଏହି ବ୍ୟବସ୍ଥା ଲାଗୁ ହୋଇ ନାହିଁ । କେବେ କାର୍ଯ୍ୟକାରୀ ହେବା ମ୍ୟାଲେସିଆ ସରକାର କୌଣସି ସଠିକ ସୁଚନା ଦେଇନାହାଁନ୍ତି । ଦକ୍ଷିଣ ପୁର୍ବ ଏସିଆରେ ଡ୍ରଗ ଆଇନ କଡାକଡି ଭାବରେ କାର୍ଯ୍ୟକାରୀ ହୁଏ । ଦେଶ ଦ୍ରୋହ, ଡ୍ରଗ୍ସ ଜନିତ ଅପରାଧ , ହତ୍ୟା ଓ ଧର୍ଷଣ ଭଳି ଘଟଣାରେ ମୃତ୍ୟୁଦଣ୍ଡା ଦେଶ ବ୍ୟବସ୍ଥା ରହିଛି ମ୍ୟାଲେସିଆ ରେ ।

    ଆଣ୍ଟି ଡେଥ୍‌ ପେନାଲିଟି ଏସିଆ ନେଟୱାର୍କ ମ୍ୟାଲେସିଆ ସରକାରଙ୍କ ଏହି ନିଷ୍ପତ୍ତି କୁ ପ୍ରଶଂସା କରିଛି । ଏହି ବ୍ୟବସ୍ଥା କ୍ରିମିନାଲ ଜୁଡିସିଆଲ ବ୍ୟବସ୍ଥାରେ ସୁଧାର ଆଣିବ ।
    ମ୍ୟାଲେସିଆ ସରକାର ଅନେକ କଥା ପୁର୍ବରୁ କହିଛନ୍ତି ଅନକେ ଘୋଷଣା କରିଛନ୍ତି କିନ୍ତୁ ବାସ୍ତବ କ୍ଷେତ୍ରରେ କାର୍ଯ୍ୟକାରୀ ହୋଇପାରିନାହିଁ । ବର୍ତ୍ତମାନ ଏହା ଉପରେ ସମସ୍ତ ଙ୍କ ନଜର ।

    • ସ୍ମରଜିତ ଆର୍ଯ୍ୟଙ୍କ ରିପୋର୍ଟ
Back to top button