death

  • ଭୁଲ ଇଞ୍ଜେକସନ ପାଇ ଯୁବକ ମୃତ୍ୟୁ

    ରାୟଗଡା: ଭୁଲ ଇଞ୍ଜେକସନ ଯୋଗୁଁ ଯୁବକଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଏଭଳି ଅଭାବନୀୟ ଘଟଣା ଘଟିଛି ରାୟଗଡା ଜିଲ୍ଲାର ଚାନ୍ଦିଲି ଥାନା ଅନ୍ତର୍ଗତ ସାନ ଚାନ୍ଦିଲି ଗ୍ରାମରେ। ମୃତ ଯୁବକ ଜଣଙ୍କ ହେଲେ ପ୍ରଶାନ୍ତ କୌଶଲ୍ୟା। ପ୍ରଶାନ୍ତଙ୍କର ପ୍ରଥମେ ମୁଣ୍ଡ ବ୍ୟଥା ସହ ପେଟ ଯନ୍ତ୍ରଣା ହୋଇଥିଲା। ସେ ପରିବାର ଲୋକଙ୍କୁ ଜଣାଇଥିଲେ ଏହାପରେ ତାଙ୍କୁ ଜେକେପୁର ସ୍ଥିତ ବି.ଏ ରାଓ ନନ୍ଦୁବାବୁ କ୍ଲିନିକକୁ ନିଆଯାଇଥିଲା। ସେଠାରେ ତାଙ୍କୁ ଦୁଇଟି ଇଂଜେକସନ ଦିଆଯାଇଥିଲା। କିନ୍ତୁ ଘରକୁ ଯିବା ପରେ ତାଙ୍କର ବାନ୍ତି ହେବ ସହ ଛାତିରେ ଯନ୍ତ୍ରଣା ଅନୁଭବ ହୋଇଥିଲା। ଏହାପରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ତେବେ  ପରିବାର ପକ୍ଷରୁ ଭୁଲ ଇଂଜେକସନ ଯୋଗୁଁ ମୃତ୍ୟୁ ହୋଇଥିବା ଅଭିଯୋଗ ସହ ସେହି କ୍ଲିନିକ ଉପରେ ତଦନ୍ତ କରି କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।

  • ବାଇକ ଧକ୍କାରେ ଶିକ୍ଷୟତ୍ରୀ ମୃତ୍ୟୁ

    କନ୍ଧମାଳ: ବାଇକ ସହ ସ୍କୁଟି ମୁହାଁମୁହିଁ ଧକ୍କା। ଘଟଣାରେ ୨ଜଣ ମହିଳାଙ୍କ ମୃତ୍ୟୁ। କନ୍ଧମାଳ ଜିଲ୍ଲା ବାଲିଗୁଡା ନିଲୁଙ୍ଗିଆ ଗାଁରେ ଅଭାବନୀୟ ଘଟଣା। ଜଣେ ଶିକ୍ଷୟତ୍ରୀ ଓ ଜଣେ ମହିଳା କ୍ଲର୍କ ସ୍କୁଲକୁ ଯାଉଥିବା ବେଳେ ସାମ୍ନା ପଟୁ ଜୋରରେ ଧକ୍କା ଦେଇଥିଲା ବାଇକ। ତେବେ ଆହତମାନଙ୍କୁ ସ୍ଥାନୀୟ ସରକାରୀ ଡ଼ାକ୍ତରଖାନାରେ ଭର୍ତି କରାଯାଇଥିଲା। ତେବେ ଉଭୟଙ୍କ ଚିକିତ୍ସା ସମୟରେ ମୃତ୍ୟୁ ହୋଇଥିବା ଜଣାପଡିଛି। ତେବେ ବାଇକ ଚାଳକ ସାମାନ୍ୟ ଆହତ ଥିବା ଜଣାପଡିଛି। ଦୁର୍ଘଟଣାରେ ମୃତ ମହିଳାମାନେ ଲିଙ୍ଗାଗଡ କନ୍ୟାଶ୍ରମ ସ୍କୁଲର ଶିକ୍ଷୟତ୍ରୀ ପ୍ରଦିପ୍ତା ସାହୁ, ଅନ୍ୟଜଣେ ସ୍ଥାନୀୟ ମାଲିକାପଡ଼ି ପଞ୍ଚାୟତ କୁପାଗୁଡ଼ା ଗାଁର ବିମଳା ପ୍ରଧାନ। ସ୍ଥାନୀୟ ପୋଲିସ ପହଞ୍ଚି ଗାଡିକୁ ଜବତ କରବା ସହ ମୃତଙ୍କ ଶବ ବ୍ୟବଚ୍ଛେଦ ପାଇଁ ପଠାଇଛନ୍ତି। ଏନେଇ ପୋଲିସ ତଦନ୍ତ କରୁଛି।  

  • ଆରପାରିରେ ମୁଲାୟମ ସିଂ ଯାଦବ

    ନୂଆଦିଲ୍ଲୀ: ଚାଲିଗଲେ ନେତାଜୀ। ସମାଜବାଦୀ ଦଳର ପ୍ରତିଷ୍ଠାତା ମୁଖ୍ୟ, ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମୁଲାୟମ ସିଂ ଯାଦବଙ୍କ ପରଲୋକ। ଦୀର୍ଘ ଦିନ ଧରି ଅସୁସ୍ଥତା କାରଣରୁ ଗୁରୁଗ୍ରାମର ମେଦାନ୍ତ ହସ୍ପିଟାଲରେ ଚିକିତ୍ସାଧୀନ ଥିଲା ବେଳେ ସୋମବାର ସକାଳ ୮ଟା ୧୬ ମିନିଟରେ ଆଇସିୟୁରେ ତାଙ୍କର ପରଲୋକ ଘଟିଛି। ୮୨ ବର୍ଷ ବୟସରେ ଆଖି ବୁଜିଛନ୍ତି ମୁଲାୟମ୍। ମେଦାନ୍ତ ହସ୍ପିଟାଲର ଏକ ସ୍ୱତନ୍ତ୍ର ଡାକ୍ତରୀ ଦଳ ତାଙ୍କ ଚିକିତ୍ସା କରୁଥିଲେ। ଅଗଷ୍ଟ ୨୨ରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଅକ୍ଟୋବର ୨ରୁ ତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଲାଗି ଆଇସିୟୁକୁ ନିଆଯାଇଥିଲା। ଆଉ ଡାକ୍ତରଙ୍କ ସକଳ ଚେଷ୍ଟା ଶେଷରେ ଫେଲ୍ ମାରିଲା। ପିତାଙ୍କ ପରଲୋକ ଖବର ପାଇ ତାଙ୍କ ପୁତ୍ର ତଥା ୟୁପିର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଟ୍ୱିଟରେ ଅବଗତ କରାଇଛନ୍ତି। ସମସ୍ତଙ୍କର ଆଦରଣୀୟ ନେତାଜୀ ଆଉ ନାହାନ୍ତି ବୋଲି କହିଛନ୍ତି। ମୁଲାୟମଙ୍କ ବିୟୋଗ ଖବର ପାଇ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତିବିଶେଷ ଗଭୀର ଶୋକବ୍ୟକ୍ତ କରିଛନ୍ତି। ରାଷ୍ଟ୍ରପତି ମୁଲାୟମଙ୍କୁ ମାଟିର ପୁଅ କହି କିଭଳି ସାଧାରଣ ପରିବାରରୁ ଆସି ଅସାଧାରଣ ବ୍ୟକ୍ତିତ୍ୱର ଅଧିକାରୀ ଥିଲେ, ତାହାର ଅବତାରଣା କରିଛନ୍ତି ନିଜର ଶୋକବାର୍ତ୍ତାରେ। ସେହିଭଳି ପ୍ରଧାନମନ୍ତ୍ରୀ କହିଛନ୍ତି, ଲୋକଙ୍କର ସମସ୍ୟା ପ୍ରତି ସମ୍ୱେଦନଶୀଳ ଥିଲେ ମୁଲାୟମ। ଲୋକନାୟକ ଜୟପ୍ରକାଶ ଓ ଡକ୍ଟର ଲୋହିଆଙ୍କ ଆଦର୍ଶରେ ଅନୁପ୍ରାଣିତ ମୁଲାୟମ ଜନସେବା ଲାଗି ନିଜ ଜୀବନକୁ ସମର୍ପିତ କରିଥିଲେ। ଗୃହମନ୍ତ୍ରୀ ଅମିତ ଶାହା କହିଛନ୍ତି, ମୁଲାୟମଙ୍କ ଅଦ୍ୱିତୀୟ ରାଜନୈତିକ ରଣନୀତି ଥିଲା। ଜରୁରୀକାଳୀନ ପରିସ୍ଥିତିରେ ଲୋକତନ୍ତ୍ରର ପୁନଃସ୍ଥାପନା ଲାଗି ସ୍ୱରକୁ ଶାଣିତ କରିଥିଲେ। ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବି ମୁଲାୟମଙ୍କ ଦେହାନ୍ତରେ ଶୋକବ୍ୟକ୍ତ କରିଛନ୍ତି। ସର୍ବଦା ଦୁର୍ବଳବର୍ଗଙ୍କ ଉତଥାନ ଲାଗି ଚିନ୍ତା କରୁଥିବା ଯାଦବଙ୍କ ସମର୍ପିତ କାର୍ଯ୍ୟ ସ୍ମରଣୀୟ ହୋଇରହିବ। ସ୍ୱର୍ଗତ ଯାଦବଙ୍କର ଦୀର୍ଘ ୫ ଦଶନ୍ଧିରୁ ଉର୍ଦ୍ଧ୍ୱ ସମୟ ଧରି ୟୁପି ରାଜନୀତିକୁ ପ୍ରଭାବିତ ତଥା କବଳିତ କରି ରଖିଥିଲେ ମୁଲାୟମ। ୟୁପିର ତିନି ଥର ମୁଖ୍ୟମନ୍ତ୍ରୀ ଭାର ସମ୍ଭାଳିଥିଲେ ସ୍ୱର୍ଗତ ମୁଲାୟମ ସିଂ ଯାଦବ। ସମର୍ଥକଙ୍କ ପାଇଁ ସେ ନେତାଜୀ ନାଁରେ ଘରେ ଘରେ ପରିଚିତ ଥିଲେ। ୧୯୯୬ରୁ କ୍ରମାଗତ ୭ ଥର ସଂସଦକୁ ନିର୍ବାଚିତ ହୋଇଥିଲେ ମୁଲାୟମ। ସେହିଭଳି ୧୦ ଥର ୟୁପି ବିଧାନସଭାକୁ ନିର୍ବାଚିତ ହୋଇଥିଲେ ନେତାଜୀ। କେନ୍ଦ୍ର ପ୍ରତିରକ୍ଷା ମନ୍ତ୍ରୀ ଭାବେ ଦାୟିତ୍ୱ ବି ନିର୍ବାହ କରିଥିଲେ ନେତାଜୀ। ପିଏମ୍ ମ୍ୟାଟେରିଆଲ ଭାବେ ଚର୍ଚ୍ଚାର ପରିଧିକୁ ଆସିଥିଲେ ମୁଲାୟମ। ଦେଶର ପ୍ରଧାନମନ୍ତ୍ରୀ ଦୌଡ଼ରେ ବି ଏକଦା ଥିଲେ। ୧୯୯୬ରେ ଯେତେବେଳେ ୟୁନାଇଟେଡ ଫ୍ରଣ୍ଟ କେନ୍ଦ୍ରରେ ସରକାର କରିବାକୁ ପ୍ରସ୍ତୁତ ହେଉଥିଲା, ସେତେବେଳେ ମୁଲାୟମଙ୍କ ନାଁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ସବା ଆଗରେ ଥିଲା। କିନ୍ତୁ ଲାଲୁ ଯାଦବଙ୍କ ସମେତ କିଛି ତୁଙ୍ଗ ନେତା ଏହାକୁ ବିରୋଧ କରିଥିଲେ। ୨୦୧୪ରେ ବି ସମାନ ସମ୍ଭାବନା ଆସିଥିଲା। ସେଥର ବି ତାହା ଫେଲ୍ ମାରିଥିଲା। ମୁଲାୟମଙ୍କ ବିୟୋଗ ଖବର ପାଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ତାଙ୍କର ଶେଷଦର୍ଶନ କରିବାକୁ ମେଦାନ୍ତ ହସ୍ପିଟାଲରେ ପହଞ୍ଚିଥିଲେ। ୧୯୩୯ ନଭେମ୍ୱର ୨୨ରେ ସୈଫାଲ ଗାଁରେ ଜନ୍ମଗ୍ରହଣ କରିଥିଲେ ମୁଲାୟମ।

    ପ୍ରଦୀପ ନାୟକଙ୍କ ରିପୋର୍ଟ

  • ସଡକ ଦୁର୍ଘଟଣା ଜଣେ ମୃତ, ଦୁଇ ଗୁରୁତର

    ଭୁବନେଶ୍ୱର: ଭୁବନେଶ୍ୱର କଳ୍ପନା ଛକ ନିକଟରେ ମର୍ମନ୍ତୁଦ ସଡକ ଦୁର୍ଘଟଣା। ଦୁର୍ଘଟଣାରେ ଜଣେ ମୃତ, ଦୁଇ ଜଣ ଗୁରୁତର। ଗୁରୁତରମାନଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି। ଦୁର୍ଘଟଣା ପରେ ଘଟଣା ସ୍ଥଳରେ ଉତ୍ତେଜନା ଦେଖିବାକୁ ମିଳିଥିଲା। ତେବେ ପୋଲିସ ସେଠାକାର ସ୍ଥାନୀୟ ଲୋକଙ୍କୁ ବୁଝାସୁଝା କରି ଉତ୍ତେଜନାକୁ ଆୟତ୍ତକୁ ଆଣିଥିଲା। ସୂଚନା ଅନଯାୟୀ, ରାଜମହଲ ଛକ ପଟୁ କଳ୍ପନା ଆଡ଼କୁ ଦ୍ରୁତ ଗତିରେ ଆସୁଥିବା ଏକ ଗ୍ରାଣ୍ଡ ଆଇଟେନ ଗାଡି ରାସ୍ତା କଡ଼ରେ ବିକ୍ରି କରୁଥିବା ଏକ କଦଳୀ ଦୋକାନୀକୁ ଧକ୍କା ଦେଇଥିଲା। ଘଟଣା ସ୍ଥଳରେ ହିଁ କଦଳୀ ଦୋକାନୀର ମୃତ୍ୟୁ ହୋଇଥିବା ଜଣାପଡିଛି। ଏନେଇ ପୋଲିସ ତଦନ୍ତ ଜାରି ରଖିଛି। 

  • ଆରପାରିରେ ଅଭିନେତା ଅରୁଣ ବାଲି

    ମୁମ୍ୱାଇ: ଭେଟେରାନ ଅଭିନେତା ଅରୁଣ ବାଲିଙ୍କ ଦେହାନ୍ତ। ବଲିଉଡର ଅନେକ ଚଳଚିତ୍ରରେ ତାଙ୍କ ଅଭିନୟ ଦ୍ୱରା ସମସ୍ତଙ୍କୁ ପ୍ରଭାବିତ କରିଥିବା ଭେଟେରାନ ଅଭିନେତା ଅରୁଣ ବାଲି ଆଉ ନାହାଁନ୍ତି। ଅରୁଣ ବାଲି ନ୍ୟୁରୋମସ୍କୁଲାର ରୋଗ ମାଇଷ୍ଟୋନିଆ ଗ୍ରାଭିସରେ ପୀଡିତ ଥିଲେ। ଏବଂ ତାଙ୍କୁ ମୁମ୍ୱାଇର ହିରାନ୍ଦାନୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା ବେଳେ ତାଙ୍କର ୭୯ ବର୍ଷ ବୟସରେ ମୁମ୍ୱାଇରେ ତାଙ୍କର ଦେହାନ୍ତ ହୋଇଛି।

  • ବିଚାରାଧୀନ କଏଦୀଙ୍କ ସନ୍ଦେହଜନକ ମୃତ୍ୟୁ

    ବୌଦ୍ଧ: ପୁଣି ଚର୍ଚ୍ଚାରେ ବୌଦ୍ଧ ଜିଲ୍ଲା ସ୍ଵତନ୍ତ୍ର ଉପ-କାରାଗାର। ଜଣେ ବିଚାରାଧୀନ କଏଦୀଙ୍କ ସନ୍ଦେହଜନକ ମୃତ୍ୟୁ ହୋଇଛି। ମୃତ୍ୟୁର କାରଣ ଅସ୍ପଷ୍ଟ। ମୃତ କଏଦୀ ଜଣକ କଣ୍ଟାମାଳ ଥାନା କଳରକୋଠା ଗ୍ରାମର ଅରକ୍ଷିତ ସାହୁ। ଏହା ଏକ ସ୍ଵାଭାବିକ ମୃତ୍ୟୁ ନା କେହି ତାଙ୍କୁ ହତ୍ୟା କରିଛି ତାହା ଏବେ ସ୍ପଷ୍ଟ ହୋଇନାହିଁ। ସେପଟେ ଏ ସଂପର୍କରେ ଜେଲ କର୍ତ୍ତୁପକ୍ଷଙ୍କ ନୀରବତା ମୃତ୍ୟୁକୁ ସନ୍ଦେହ ଘନୀଭୂତ କରୁଛି। କଏଦିଙ୍କ ପରିବାର ଲୋକେ ହତ୍ୟା ଅଭିଯୋଗ ଆଣିଛନ୍ତି।

  • ଫରେନସିକ୍ ଲ୍ୟାବକୁ ଗଲା ମୋବାଇଲ

    ଭୁବନେଶ୍ୱର: ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ସନ୍ଦେହଜନକ ମୃତ୍ୟୁ ଘଟଣା। ଜବତ ଦୁଇଟି ମୋବାଇଲକୁ ରାଜ୍ୟ ଫରେନସିକ୍ ଲ୍ୟାବକୁ ପଠାଇଲା ପୋଲିସ। ଏବେ ପୋଲିସ ସ୍କାନରରେ ଧର୍ମେନ୍ଦ୍ରଙ୍କ ଉପର ଘରେ ରହୁଥିବା ରୋଷେୟାଙ୍କ ପରିବାର।

  • ଆରପାରିରେ ବ୍ରିଟେନ ମହାରାଣୀ ଏଲିଜାବେଥ୍

    ଲଂଣ୍ଡନ: ବ୍ରିଟେନରେ ସର୍ବାଧିକ କାଳ ଶାସନ କରିଥିବା ମହାରାଣୀ ଏଲିଜାବେଥ୍-ଦ୍ୱିତୀୟଙ୍କ ପରଲୋକ ହୋଇଛି। ଦୀର୍ଘ ଦିନ ହେଲା ବାର୍ଦ୍ଧକ୍ୟଜନିତ ବ୍ୟାଧିରେ ପୀଡ଼ିତ ଥିଲେ ମହାରାଣୀ। ମହାରାଣୀଙ୍କ ସମ୍ମାନାର୍ଥେ ବ୍ରିଟେନଓ୍ୱେର ପ୍ରାସାଦରେ ପତାକାକୁ ୧୦ ଦିନ ଅର୍ଦ୍ଧନିର୍ମିତ ରଖାଯିବା ଲାଗି ସରକାରୀ ଭାବେ ଘୋଷଣା କରାଯାଇଛି। ବିଶ୍ୱ ନେତାମାନେ ବି ତାଙ୍କ ମୃତ୍ୟୁରେ ଶୋକପ୍ରକାଶ କରିଛନ୍ତି।

    ବିଗତ ୭ ଦଶନ୍ଧି ଧରି ବ୍ରିଟେନର ମହାରାଣୀ ଥିଲେ ଏଲିଜାବେଥ୍ ଦ୍ୱିତୀୟ। ଯେତେବେଳେ ବିଶ୍ୱ ଅନେକ ଆହ୍ୱାନର ସାମ୍ନା କରୁଥିଲା, ଏଲିଜାବେଥ୍ ସେତେବେଳେ ବ୍ରିଟେନର ଶାସନ ଭାର ସମ୍ଭାଳିଥିଲେ। ଦ୍ୱିତୀୟ ବିଶ୍ୱଯୁଦ୍ଧ ପରେ ବ୍ରିଟେନ ଘୋର ଆର୍ଥିକ ଓ ରାଜନୈତିକ ସଙ୍କଟର ସମ୍ମୁଖୀନ ହୋଇଥିଲା। ବ୍ରିଟେନର ଆଧିପତ୍ୟ ହ୍ରାସ ପାଇବାରେ ଲାଗିଥିଲା। ଭାରତ ସମେତ ଅନେକ ଦେଶରେ ବ୍ରିଟିଶ୍ ଶାସନ ଶେଷ ହୋଇସାରିଥିଲା। ଲୋକେ ରାଜତନ୍ତ୍ର ଅନ୍ତ ଚାହୁଁଥିଲେ। ଆଉ ଏ ସବୁ ଆହ୍ୱାନର ମୁକାବିଲା କରି ବ୍ରିଟେନରେ ରାଜତନ୍ତ୍ରର ରକ୍ଷା ଲାଗି ସମସ୍ତଙ୍କ ଆଖିରେ ଏଲିଜାବେଥ୍ ହିଁ ଉପଯୁକ୍ତ ବ୍ୟକ୍ତି ଥିଲେ। ଏଲିଜାବେଥ୍ ଦ୍ୱିତୀୟ ଲୋକଙ୍କ ଉପରେ ରାଜପରିବାରର ଶାସନ ନ ଲଦି ଜନସାଧାରଣଙ୍କ ବିଶ୍ୱାସ ଓ ଭରସା ଜିତିବାକୁ ଉଦ୍ୟମ କରିଥିଲେ। ଆଉ ଏଥିରେ ସଫଳ ହୋଇ ୭୦ ବର୍ଷ ଯାଏ ଲୋକଙ୍କ ନିକଟରେ ମହାରାଣୀ ହୋଇ ରହିପାରିଥିଲେ। ଏଲିଜାବେଥଙ୍କ ରାଜାଭିଷେକ ବିଶ୍ୱର ଅନେକ ଦେଶରେ ସିଧା ପ୍ରସାରଣ ହୋଇଥିଲା।  ୧୯୫୨ ମସିହାରେ ମହାରାଣୀ ହେବା ପରେ ଏଲିଜାବେଥ୍ କମନଓ୍ୱେଲଥ ରାଷ୍ଟ୍ର ଭ୍ରମଣ କରିବା ଆରମ୍ଭ କରିଥିଲେ। ଫଳରେ ବ୍ରିଟିଶ୍ ଶାସନରୁ ମୁକ୍ତ ହୋଇଥିବା ଦେଶଗୁଡ଼ିକରେ ପୁଣିଥରେ ମହାରାଣୀଙ୍କୁ ଆଦର ମିଳିଥିଲା। ଫେବୃଆରୀ ୬, ୨୦୨୨ରେ ମହାରାଣୀ ଏଲିଜାବେଥ୍ ତାଙ୍କ ଶାସନର ୭୦ତମ ବାର୍ଷିକୀ ତଥା ପ୍ଲାଟିନମ୍ ଜୁବୁଲି ପାଳନ କରିଥିଲେ। ଗୁରୁବାର ଅପରାହ୍ନରେ ବାଲମୋରାଇ ପ୍ରାସାଦରେ ରାଶୀ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ୯୬ ବର୍ଷ ବୟସରେ ରାଣୀଙ୍କ ବିୟୋଗ ଖବର ପାଇ କୃତଜ୍ଞ ରାଷ୍ଟ୍ର ଶୋକାଛନ୍ନ ହୋଇପଡ଼ିଛି। ରାଣୀ ଆଉ ନାହାନ୍ତି ବୋଲି ଘୋଷଣା ପରେ ବଙ୍କିଂହାମ୍ ପ୍ୟାଲେସ, ଲଣ୍ଡନ ଗେଟ୍ ବାହାରେ ଲୋକଙ୍କ କାନ୍ଦୁଥିବାର ଦୃଶ୍ୟ ବୟାନ କରୁଥିଲା, ସତରେ ରାଣୀ ସେମାନଙ୍କର କେତେ ପ୍ରିୟ ଥିଲେ। ବ୍ରିଟେନ୍ ଓ ଅନ୍ୟ ୧୪ଟି ରାଜତନ୍ତ୍ର ଓ ୫୪ ସଦସ୍ୟ ବିଶିଷ୍ଟ ରାଜ୍ୟଗୋଷ୍ଠୀ ଦେଶର ମୁଖ୍ୟ ରହିଆସିଥିବା ଏଲିଜାବେଥ୍ ବିଶ୍ୱର ସର୍ବାଧିକ ସମ୍ମାନସ୍ପଦ ବ୍ୟକ୍ତିର ମାନ୍ୟତା ପାଇଥିଲେ।

    ଏଲିଜାବେଥଙ୍କ ମୃତ୍ୟୁ ପରେ ପ୍ରିନ୍ସ ହ୍ୟାରି ତାଙ୍କ ଜେଜେ ମାଆଙ୍କ ଶେଷଦର୍ଶନ କରିବାକୁ ସ୍କଟଲ୍ୟାଣ୍ଡରେ ପହଞ୍ଚିଛନ୍ତି। ମହାରାଣୀଙ୍କ ମହାପ୍ରୟାଣ ପରେ ବିଶ୍ୱ ନେତା ଶୋକ ପ୍ରକାଶ କରିଛନ୍ତି। ୨୦୧୫ ଓ ୨୦୧୮ରେ ବ୍ରିଟେନ ଗସ୍ତ ବେଳେ ମହାରାଣୀଙ୍କ ସହ ସାକ୍ଷାତ ସ୍ମରଣୀୟ ହୋଇ ରହିବ ବୋଲି ଭାରତର ପ୍ରଧାନମନ୍ତ୍ରୀ ମୋଦି ଟୁଇଟ୍ କରିଛନ୍ତି। ସାକ୍ଷାତ ସମୟରେ ମହାରାଣୀ ମୋଦିଙ୍କୁ ଏକ ରୁମାଲ୍ ଦେଖାଇଥିଲେ। ତାଙ୍କ ବିବାହ ସମୟରେ ମହାତ୍ମା ଗାନ୍ଧୀ ସେହି ରୁମାଲ୍ ତାଙ୍କୁ ଉପହାର ଦେଇଥିଲେ ବୋଲି ଏଲିଜାବେଥ୍ କହିଥିଲେ। ଆମେରିକା ରାଷ୍ଟ୍ରପତି ଜୋ ବାଇଡେନ୍ ୧୯୮୨ରେ ମହାରାଣୀଙ୍କୁ ସାକ୍ଷାତ ସମୟକୁ ସ୍ମରଣ କରିଛନ୍ତି। ୯/୧୧ ଆକ୍ରମଣ ପରେ ଆମେରିକାର ଦୁଃଖଦ ମୂହୂର୍ତ୍ତରେ ମହାରାଣୀ ସମର୍ଥନ ଜଣାଇଥିଲେ ବୋଲି ବାଇଡେନ୍ କହିଛନ୍ତି। କାନାଡା ପ୍ରଧାନମନ୍ତ୍ରୀ ଶୋକବାର୍ତ୍ତାରେ ମହାରାଣୀ ଏଲିଜାବେଥଙ୍କୁ ବିଶ୍ୱର ସବୁଠୁ ପ୍ରିୟ ବ୍ୟକ୍ତି ବୋଲି କହିଛନ୍ତି। କାନାଡ଼ା ଜନସାଧାରଣଙ୍କ ପାଇଁ ତାଙ୍କ ସେବା ସବୁଦିନେ ମନେ ରହିବ ବୋଲି ଜଷ୍ଟିନ ଟ୍ରୁଡୋ କହିଛନ୍ତି। ଫ୍ରାନ୍ସ ରାଷ୍ଟ୍ରପତି ଏଲିଜାବେଥଙ୍କୁ ଜଣେ ଦୟାଳୁ ମହାରାଣୀ ବୋଲି କହିଛନ୍ତି। ଜର୍ମାନୀ ଚାନସେଲର ମହାରାଣୀଙ୍କୁ ଜଣେ ରୋଲ୍ ମଡେଲ୍ ଓ କୋଟି କୋଟି ଲୋକଙ୍କର ପ୍ରେରଣାଦାତ୍ରୀ ବୋଲି ଅଭିହିତ କରିଛନ୍ତି।

    ମହାରାଣୀ ତାଙ୍କର ଦୀର୍ଘ ୭୦ ବର୍ଷ ଶାସନ କାଳରେ ବ୍ରିଟେନ ରାଜତନ୍ତ୍ରର ଅନେକ ଉତଥାନ-ପତ୍ତନ ଦେଖିଛନ୍ତି। ଦ୍ୱିତୀୟ ବିଶ୍ୱଯୁଦ୍ଧରୁ ବ୍ରେକ୍ସିଟ୍, ଶୀତଳଯୁଦ୍ଧରୁ ୟୁକ୍ରେନ ଯୁଦ୍ଧ ଯାଏ ସବୁ କିଛି ରାଣୀଙ୍କ ଶାସନ ସମୟରେ ଘଟିଥିଲା। ଆଉ ରାଣୀଙ୍କ ପରଲୋକ ପରେ ଏବେ ସବୁଠି ଶୋକର ଛାୟା। ରାଣୀଙ୍କ ଅନ୍ତ୍ୱେଷ୍ଟିକ୍ରିୟା ଲାଗି ଅପରେସନ ୟୁନିକର୍ଣ୍ଣ ଆରମ୍ଭ ହୋଇଛି। ଏଥିଲାଗି ସ୍କଟଲ୍ୟାଣ୍ଡ ସଂସଦର ସମସ୍ତ ଅଧିବେଶନକୁ ବାତିଲ୍ କରାଯାଇଛି। ମୃତ୍ୟୁର ୧୦ ଦିନ ପରେ ଅନ୍ତ୍ୱେଷ୍ଟିକ୍ରିୟା ସମ୍ପନ୍ନ ହେବ। ରାଣୀ ଯଦି ବ୍ରିଟେନରେ ପ୍ରାଣତ୍ୟାଗ କରିଥାଆନ୍ତେ, ତେବେ ଅପରେସନ ଲଣ୍ଡନ ବ୍ରିଜ୍ କରାଯାଇଥାଆନ୍ତା।

    • ପ୍ରଦୀପ ନାୟକଙ୍କ ରିପୋର୍ଟ
  • ନନ୍ଦିଗାଁରେ ଉତ୍ତେଜନା, ପୋଲିସ ମୁତୟନ

    କୋରାପୁଟ: କୋରାପୁଟ ଜିଲ୍ଲା ନନ୍ଦପୁର ଥାନା ନନ୍ଦୀଗାଁ ରେ ଜଣେ ବ୍ୟକ୍ତିଙ୍କ ଅପମୃତ୍ୟୁକୁ ନେଇ ଉତ୍ତେଜନା। ଭଗବାନ ଚମ୍ପି ନାମକ ବ୍ୟକ୍ତି ଗୁରୁବାର ଦିନ ଚାଷୀ ଜମିକୁ ଯାଇ ଏକ ଗଛରେ ଆତ୍ମହତ୍ୟା କରିଥିବା ବେଳେ, ଏହି ଘଟଣାକୁ ନେଇ ଗାଁରେ ରାତିସାରା ଉତ୍ତେଜନା ଦେଖା ଦେଇଥିଲା। ଏନେଇ ନନ୍ଦପୁର ଆଇଆଇସିଙ୍କ ସମେତ ଉପଖଣ୍ଡ ଅଧିକାରୀ ଏବଂ ଏକ ପ୍ଲାଟୁନ ପୋଲିସ ଫୋର୍ସ ଗାଁରେ ମୁତୟନ ହୋଇଛନ୍ତି। ଏହି ଘଟଣାକୁ ନେଇ ଗାଁ ସରପଞ୍ଚଙ୍କ ସହ ଏକ ଶାନ୍ତି ଆଲୋଚନା କରାଯାଇଥିଲା। ତେବେ ଗାଁରେ ଗୁଣିଗାରେଡି କରି ମାରିଥିବା ନେଇ ଉର୍ଦ୍ଧବ ଚମ୍ପି, ଭଗବତୀ ଚମ୍ପିଙ୍କ ଉପରେ ସନ୍ଦେହ କରି ଉତ୍ତେଜନା ଲାଗିରହିଥିଲା। ନନ୍ଦପୁର ପୋଲିସ ପହଞ୍ଚି ଉର୍ଦ୍ଧବ ଚମ୍ପି, ଭଗବତୀ ଚମ୍ପି, ଓ ଡ଼ମ୍ବୁରୁ ଚମ୍ପିଙ୍କୁ ଥାନାରେ ଅଟକ ରଖି ପଚରାଉଚୁରା କରୁଛି। ସେପେଟେ ମୃତକଙ୍କ ପରିବାର ପକ୍ଷରୁ ପୂର୍ବରୁ ଗୁଣି ଗାରେଡି ସନ୍ଦେହରେ ନନ୍ଦପୁର ଥାନାରେ ଅଭିଯୋଗ ହୋଇଥିଲା। ଗାଁରେ ଏହି ଦୁଇ ପରିବାର ମଧ୍ୟରେ ଗତ କିଛି ମାସ ହେବ ତିକ୍ତତା ଲାଗି ରହିଥିଲା। ତେବେ କାହିଁକି ଓ କେଉଁ ପରିସ୍ଥିତିରେ ଭଗବାନ ଆତ୍ମହତ୍ୟା କଲେ ତାହାର ତଦନ୍ତ ଚାଲିଥିବା କହିଛନ୍ତି ନନ୍ଦପୁର ଉପଖଣ୍ଡ ଅଧିକାରୀ ସଞ୍ଜୟ କୁମାର ମହାପାତ୍ର।

  • କାରଖାନାରେ ଶ୍ରମିକ ମୃତ

    ଭିସା କାରଖାନାରେ ଦୁର୍ଘଟଣା ଘଟି ଜଣେ ଶ୍ରମିକଙ୍କ ମୃତ୍ୟୁ। ମୃତକ କୋରାଇ ଥାନା ଅନ୍ତର୍ଗତ ଖମି ଗାଁର ଜିତେନ୍ଦ୍ର କୁମାର କର। କାରଖାନା ମଧ୍ୟରେ କାର୍ଯ୍ୟ କରୁଥିବା ସମୟରେ ଠିକା ଶ୍ରମିକ ଜଣଙ୍କ ଏକ ମେସିନରେ ଚାପି ହୋଇଯାଇଥିଲେ। ତେବେ ସଙ୍ଗେସଙ୍ଗେ ତାଙ୍କୁ ଉଦ୍ଧାର କରାଯାଇ ଗୁରୁତର ଅବସ୍ଥାରେ ଟାଟା ମେଡିକା ହସ୍ପିଟାଲରେ ଭର୍ତ୍ତି କରାଯାଇଥିଲା। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ତେବେ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି ଯଖପୁରା ପୋଲିସ।

Back to top button