କଟକ: ଏଥର ଅନ୍ତର୍ଜାତୀୟ ସ୍ତରର ହେବ କଟକ ବାଲିଯାତ୍ରା। ବିଭିନ୍ନ କାର୍ଯ୍ୟକ୍ରମ ଜରିଆରେ ବାଲିଯାତ୍ରାକୁ କରାଯିବ ଆକର୍ଷଣୀୟ। ସ୍ୱଚ୍ଛ ସବୁଜ ମେଳା ଲକ୍ଷ୍ୟ ନେଇ ପ୍ରଥମଥର ପାଇଁ ପଡ଼ିଆରେ ଆରମ୍ଭ ହେଉଛି ଗ୍ରୀନ କଭର ପ୍ରକଳ୍ପ। ଯେଉଁଠି ବସିବା ପାଇଁ କରାଯାଇଛି ସୁବ୍ୟବସ୍ଥା। ସେପଟେ ବାଲିଯାତ୍ରା ପଡିଆରେ ଲକ୍ଷାଧିକ ଲୋକଙ୍କ ସମାଗମ ପରେ ବଢିପାରେ ପ୍ରଦୂଷଣ ମାତ୍ରା। ଯାହାକୁ ନେଇ ଚିନ୍ତାପ୍ରକଟ କରିଛନ୍ତି ପରିବେଶବିତ।
ରାଜ୍ୟସ୍ତରୀୟ ମାନ୍ୟତା ପରେ ଏବେ ଜାତୀୟ ତଥା ଅନ୍ତର୍ଜାତୀୟ ସ୍ତରର ବାଲିଯାତ୍ରା ଆୟୋଜନ ନେଇ ଲାଗିଛି ଜିଲ୍ଲା ପ୍ରଶାସନ। ଉତ୍କଳୀୟ ନୌବାଣିଜ୍ୟ ପରମ୍ପରା ଓ ତାହାର ଗୌରବମୟ ଇତିହାସ ସହ ସ୍ୱଚ୍ଛ ସବୁଜ ବାଲିଯାତ୍ରା ପ୍ରସ୍ତୁତିରେ ଦିନରାତି ଚାଲିଛି କାମ। ପ୍ରଥମଥର ପାଇଁ ଗ୍ରୀନ କଭର ପ୍ରକଳ୍ପର କାର୍ଯ୍ୟ ଏବେ ଚାଲିଛି ଦ୍ରୁତଗତିରେ। ଏହି ଗ୍ରୀନ କଭର ଭିତରେ ସଜେଇ ହେଉଛି ୪୦୦ରୁ ଉର୍ଦ୍ଧ୍ବ ଗଛ। ଗଛ ଗୁଡିକୁ ରଙ୍ଗବେରଙ୍ଗ କରାଯିବା ସହ ରଙ୍ଗୀନ ଆଲୋକମାଳାରେ ସଜାଯିବ। ଚତୁଃପାର୍ଶ୍ୱରେ ବସିବା ପାଇଁ ନିର୍ମାଣ ହେଉଛି ପିଣ୍ଡି। ଯେଉଁଠି ମେଳା ବୁଲିବା ସହ ଥକା ମେଣ୍ଟାଇବେ ପର୍ଯ୍ୟଟକ। ମହାନଦୀର ସୌନ୍ଦର୍ଯ୍ୟକୁ ଉପଭୋଗ କରିବା ସହ ଏଥର ଗହଳି ମୁକ୍ତ ବାଲିଯାତ୍ରାଳ ଆୟୋଜନ ହେବାକୁ ଯାଉଥିବା କହିଛନ୍ତି କଟକ ଜିଲ୍ଲାପାଳ।
ସେପଟେ କରୋନା କଟକଣା ହଟିବା ପରେ ଏଥର ବାଲିଯାତ୍ରାରେ ଲକ୍ଷାଧିକ ଲୋକଙ୍କ ଭିଡ ହୋଇପାରେ। ଲୋକଙ୍କ ଚାଲିବା ଦ୍ୱାରା ପ୍ରଚୁର ଧୂଳି ଉଡିବା ଏକ ମୁଖ୍ୟ ସମସ୍ୟା ଦେଖାଦେଇପାରେ ମେଳାରେ। ବିଗତ ଦିନରେ ଏହି ସମସ୍ୟା ପ୍ରଶାସନର ମୁଣ୍ଡ ବିନ୍ଧାର କାରଣ ପାଲଟିଥିଲା। ରାସ୍ତାରେ ଥରେ ଦୁଇଥର ପାଣି ଛିଞ୍ଚି ନିଜର ଦାଇତ୍ୱ ସାରିଦେଉଥିବା ପ୍ରଶାସନକୁ ଏଥର କିନ୍ତୁ କରିବାକୁ ପଡିବ ଠୋସ ବ୍ୟବସ୍ଥା। ସେପଟେ ପର୍ଯ୍ୟାପ୍ତ ପରିମାଣର ଜଳ ସିଞ୍ଚନ ବ୍ୟବସ୍ଥା କରିବାକୁ କହିଛନ୍ତି ପରିବେଶବିତ। ଏଥିସହିତ ବ୍ୟବସାୟୀ ମାନେ ମଧ୍ୟ ନିଜ ପ୍ରଚେଷ୍ଟାରେ ନିଜ ଷ୍ଟଲ ସାମ୍ନାକୁ ସ୍ୱଚ୍ଛ ସବୁଜ ରଖିବାକୁ ପରାମର୍ଶ ଦେଇଛନ୍ତି ପରିବେଶବିତ।
ଚଳିତଥର ଭିଡ ମୁକ୍ତ ବାଲିଯାତ୍ରା ପାଇଁ ଜିଲ୍ଲା ପ୍ରଶାସନ ରାସ୍ତା ପ୍ରଶାସ୍ତିକରଣ କରିବା ସହ ୧୦ଟି ପ୍ରବେଶ ଓ ପ୍ରସ୍ଥାନ ପଥ ନିର୍ମାଣ କରିଛନ୍ତି। ଯାହା ମେଳା ବୁଲାକୁ ସୁଗମ କରିବ।
ଦୀପ୍ତିରଞ୍ଜନ ଶତପଥୀଙ୍କ ରିପୋର୍ଟ