gulam nabi azad

  • ବିଜେପି ତାଙ୍କର ଗୁରୁ ବୋଲି କହିଛନ୍ତି ରାହୁଲ

    () କଂଗ୍ରେସକୁ ଲେଉଟାଣି ଖବର ଉପରେ ପୂର୍ଣ୍ଣଛେଦ ପକାଇଲେ ଆଜାଦ୍। ସେପଟେ ଭାରତ ଯୋଡ଼ ଯାତ୍ରାରେ ସାମିଲ ହେବାକୁ ସମସ୍ତଙ୍କ ଲାଗି ଦ୍ୱାର ଖୋଲା କହି ବିଜେପିକୁ ନିଜର ଗୁରୁ ବୋଲି କହି କଟାକ୍ଷ ଫିଙ୍ଗିଛନ୍ତି ରାହୁଲ। ଭାରତ ଯୋଡ଼ଯାତ୍ରା ଆରମ୍ଭରୁ ସାଧାରଣ ଲାଗୁଥିଲେ ବି ଏହାର ଗୁରୁତ୍ୱ ବଢ଼ାଇଦେଇଛି ବିଜେପି ଓ ଆରଏସଏସ। ସେପଟେ ବିଜେପି ବି ଏହାର କଡ଼ା ଜବାବ ଦେବାକୁ ଭୁଲିନି।

    କଂଗ୍ରେସ ସହ ୫୨ ବର୍ଷର ସମ୍ପର୍କ ଛିନ୍ନ କରି ଡେମୋକ୍ରାଟିକ ପ୍ରୋଗ୍ରେସିଭ ଆଜାଦ ପାର୍ଟି ଗଠନ କରିଥିବା ଗୁଲାମନବୀ ଆଜାଦ ନିଜର ଘର ବାହୁଡ଼ା ଖବରକୁ ଭିତ୍ତିହୀନ ଓ ଗୁଜବ ବୋଲି କହିଛନ୍ତି। ନୂଆ କରି ଗଠନ କରିଥିବା ଦଳର ନେତା ଓ କର୍ମୀଙ୍କୁ ମାନସିକ ସ୍ତରରେ ଦୁର୍ବଳ କରିବା ପାଇଁ ଏସବୁ ମିଛ ଖବରକୁ ପ୍ରକାଶ କରାଯାଉଛି ବୋଲି କହିଛନ୍ତି ଆଜାଦ୍। ରାହୁଲଙ୍କ ଭାରତ ଯୋଡ଼ଯାତ୍ରାରେ ସାମିଲ ହେବାକୁ ଆମନ୍ତ୍ରଣ ସହ ହାଇକମାଣ୍ଡ ଓ ଆଜାଦଙ୍କ ଭିତରେ ଦୂରତା ହଟାଇବାକୁ ଅମ୍ୱିକା ସୋନୀଙ୍କୁ ଦାୟିତ୍ୱ ଦିଆଯାଇଥିବା ଖବର ଚର୍ଚ୍ଚା ହୋଇଥିଲା।

    ସେପଟେ ରାହୁଲ କହିଛନ୍ତି, ଭାରତ ଯୋଡ଼ ଯାତ୍ରାର ଦ୍ୱାର ସମସ୍ତଙ୍କ ଲାଗି ଖୋଲା। ଯିଏ ପ୍ରେମର ହିନ୍ଦୁସ୍ତାନ ଚାହୁଁଛି, ସେ ସମସ୍ତଙ୍କୁ ନିମନ୍ତ୍ରଣ କହି ଅଖିଳେଶ ଓ ମାୟାବତୀଙ୍କ ସମଭାବକୁ ଦର୍ଶାଇଛନ୍ତି ରାହୁଲ। ଏହା ସହ ବିଜେପି ଆରଏସଏସ କିଭଳି ତାଙ୍କର ଭାରତ ଯୋଡ଼ ଯାତ୍ରାର ଗୁରୁତ୍ୱ ବଢାଇଦେଲେ, ସେ କଥାର ବି ଅବତାରଣା କରିଛନ୍ତି। ଏପରିକି ବିଜେପି ତାଙ୍କର ଗୁରୁ ବୋଲି କହିଛନ୍ତି ରାହୁଲ। କାରଣ ଯାତ୍ରା ବେଳେ କଅଣ କରିବାକୁ ହେବ, କଅଣ ନୁହେଁ, ଏ ଦିଗରେ କ୍ରମାଗତ ପରାମର୍ଶ ଦେଇଆସୁଛି ବିଜେପି। କେତେବେଳେ ଟି-ସାର୍ଟ ତ କେତେବେଳେ ଦାଢ଼ି ପୁଣି କେତେବେଳେ ଆଉ କିଛି। ଏହା ସହ ବିରୋଧୀଙ୍କ ଭିତରେ ସମନ୍ୱୟର ଅଭାବକୁ ଦୂର କରିବା ସହ ବିକଳ୍ପ ଭିଜନ ନେଇ ଲୋକଙ୍କ ପାଖକୁ ଯିବାକୁ ହେବ ବୋଲି କହିଛନ୍ତି ରାହୁଲ।

    ସେପଟେ ୨୪ ନିର୍ବାଚନରେ ବିରୋଧୀ ଦଳ ପକ୍ଷରୁ ରାହୁଲ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ହେବେ ବୋଲି ନିଆଁ ଚେଙ୍କିଛନ୍ତି କମଲନାଥ। ଏହାକୁ ନେଇ ବିଜେପି କଟାକ୍ଷ କରିଛି। ରାହୁଲଙ୍କ ପ୍ରଧାନମନ୍ତ୍ରୀ ପ୍ରାର୍ଥୀତ୍ୱକୁ ମମତା, ଅଖିଳେଶ, କେସିଆର, ନୀତିଶ, ମାୟାବତୀ ଓ କେଜରିଓ୍ୱାଲ ରାଜି ହେବେ ତ ବୋଲି ପଚାରିଛି ବିଜେପି। କଂଗ୍ରେସର ଭାରତ ଯୋଡ଼ ଯାତ୍ରାର ଅସଲ ଉଦେଶ୍ୟ ସତ୍ତା ସହ ଯୋଡ଼ ଯାତ୍ରା ଅଟେ। ସେଥିଲାଗି ତ ଏହି ଯାତ୍ରା କେବଳ ରାହୁଲଙ୍କୁ ରି-ଲଞ୍ଚ୍ ଓ ରି-ପ୍ୟାକେଜିଂ ଲାଗି ଉଦ୍ଦିଷ୍ଟ।

    ଭାରତ ଯୋଡ଼ ଯାତ୍ରାକୁ ନେଇ ବିବାଦ କି ରାଜନୀତି ଥମୁନି। ଏହି ଯାତ୍ରା ଆଳରେ ଦଳ ବାହୁଡ଼ା ଫର୍ମୁଲାର ଖବର କେବେ ଆସୁଛି ତ ପୁଣି କେବେ ରାହୁଲଙ୍କୁ ରି-ଲଞ୍ଚର ଆରୋପ ଲଦୁଛନ୍ତି ବିରୋଧୀ। କିନ୍ତୁ ଏହା ବି ସତ, ଏହି ଯାତ୍ରାର ପ୍ରଭାବ କେଉଁଠି ନା କେଉଁଠି ଅନୁଭୂତ ହୋଇଛି ଜନମାନସରେ। ଅବଶ୍ୟ ଜନମତରେ ପ୍ରତିଫଳିତ ହେବ କି ନାହଁ, ତାହା ଅଲଗା କଥା।

    ପ୍ରଦୀପ ନାୟକ

  • ମୋ ଦଳର ନାମ ଲୋକ ଠିକ କରିବେ: ଆଜାଦ

    ଶ୍ରୀନଗର: ଜମ୍ମୁର ପୂର୍ବତନ ମୁଖ୍ୟମନ୍ତ୍ରୀ ତଥା ନିକଟରେ କଂଗ୍ରେସର ଇସ୍ତଫା ଦେଇଥିବା ବରିଷ୍ଠ ରାଜନେତା ଗୁଲାମ ନବୀ ଆଜାଦ ଜମ୍ମୁର ସୈନିକ କଲୋନୀରେ ଏକ ଜନସଭାକୁ ସମ୍ବୋଧିତ କରିଛନ୍ତି। ସେ ଜମ୍ମୁ ବାସୀଙ୍କ ସହ ସବୁବେଳେ ଠିଆ ହୋଇଥିବା କହିଛନ୍ତି। ତେବେ ଆଜିର ଏହି କାର୍ଯ୍ୟକ୍ରମରେ ସେ ନିଜ ଦଳର ନାମ ଘୋଷଣାକୁ ନେଇ ଚର୍ଚ୍ଚା ଚାଲିଥିବା ବେଳେ କିନ୍ତୁ ସେ ନାମ ଘୋଷଣା କରି ନାହାନ୍ତି। କିନ୍ତୁ ନିଜର ଏକ ଅଲଗା ଦଳ ଗଠନ କରିବେ ବୋଲି କହିଛନ୍ତି।

    ଆଜାଦ କହିଛନ୍ତି କି, ମୁଁ ଏପର୍ଯ୍ୟନ୍ତ ନିଜ ଦଳ ପାଇଁ କୌଣସି ନାମ ଠିକ କରି ନାହିଁ। ଜମ୍ମୁ କାଶ୍ମୀର ଲୋକ ଦଳର ନାମ ଓ ପତାକା ଚୟନ କରିବେ। ମୁଁ ନିଜ ଦଳକୁ ଏକ ହିନ୍ଦୁସ୍ତାନୀ ନାମ ଦେବି ଯାହାକୁ କେହି ବି ବୁଝିପାରୁଥିବ। ମୋର ଦଳ ପୂର୍ଣ୍ଣ ରାଜ୍ୟ ଗଠନ, ଭୂମି ଅଧିକାର ଓ ମୂଳ ନିବାସୀଙ୍କୁ ରୋଜଗାର ଦେବା ଉପରେ କାମ କରିବ।

    ଆଜାଦ ଗତ ସପ୍ତାହରେ କହିଥିଲେ କି, ସେ ଜଲ୍ଦି ଏକ ନୂଆ ଦଳ ଆରମ୍ଭ କରିବେ। ସେ ଆହୁରି କହିଛନ୍ତି, କଂଗ୍ରେସ ଆମ ରକ୍ତରୁ ସୃଷ୍ଟି ହୋଇଥିଲା, କମ୍ପ୍ୟୁଟରରୁ ନୁହେଁ। ଲୋକେ ଆମକୁ ବଦନାମ କରିବାକୁ ଚେଷ୍ଟା କରୁଛନ୍ତି, କିନ୍ତୁ ସେମାନଙ୍କ ପହଁଚ କମ୍ପ୍ୟୁଟର ଓ ଟ୍ବିଟର ମଧ୍ୟରେ ସୀମିତ ରହିଛି। ଏହି କାରଣରୁ କଂଗ୍ରେସ ଜମିରେ ନଜର ଆସୁନାହିଁ।

  • ଘର ଛାଡିବାକୁ ବାଧ୍ୟ କରାଯାଇଥିଲା: ଆଜାଦ

    ନୂଆଦିଲ୍ଲୀ: କଂଗ୍ରେସରୁ ଇସ୍ତଫା ଦେବା ପରେ ପ୍ରଥମ ଥର ପାଇଁ ଗୁଲାମ ନବୀ ଆଜାଦ ମିଡିଆ ସମ୍ମୁଖକୁ ଆସିଛନ୍ତି। ଏହି ସମୟରେ ପୁଣି ଆଜାଦ ବର୍ଷିଛନ୍ତି ରାହୁଲ ଗାନ୍ଧୀଙ୍କ ଉପରେ। ସେ କହିଛନ୍ତି ଘର ଛାଡିବାକୁ ତାଙ୍କୁ ବାଧ୍ୟ କରାଯାଇଛି। ଯେତେବେଳେ ଘର ଲୋକଙ୍କୁ ଅନୁଭୂତ ହେବ ଏ ଲୋକ ଆଉ ଆବଶ୍ୟକ ନୁହେଁ, ସେତେବେଳେ ବୁଦ୍ଧିମତାର କାମ ଚୁପଚାପ ଘର ଛାଡିଦେବା।

    ଆପଣଙ୍କ ରିମୋଟ ବିଜେପି ହାତରେ- ଏହି ପ୍ରଶ୍ନର ଉତ୍ତରରେ ଗୁଲାମ ନବୀ କହିଛନ୍ତି କି, ଯେଉଁ ବ୍ୟକ୍ତି ନିଜ ଭାଷଣ ଶେଷ କରି ପୂରା ସଦନରେ ପ୍ରଧାନମନ୍ତ୍ରୀଙ୍କୁ ଆଲିଙ୍ଗନ କରେ ସେ ବିଜେପି ସହ ମିଶିଛି ନାଁ ମୁଁ? ସେ ଆହୁରି କହିଛନ୍ତି, ମୁଁ ମୋଦିଜୀଙ୍କୁ ଜଣେ କ୍ରୁର ବ୍ୟକ୍ତି ଭାବୁଥିଲା। ବିବାହ କରି ନାହିଁ, ପିଲା ନାହିଁ, ସ୍ତ୍ରୀ ନାହିଁ, ତେଣୁ ତାଙ୍କୁ କୌଣସି ଫରକ ନାହିଁ। କିନ୍ତୁ ଅନ୍ୟୁନ ଲୋକଟିର ମାନବିକତା ଅଛି ବୋଲି ପ୍ରଧାନମନ୍ତ୍ରୀ ମୋଦିଙ୍କ ସମ୍ପର୍କରେ କହିଛନ୍ତି ଆଜାଦ।

    ଡିଏନଏ ପ୍ରଶ୍ନରେ ଗୁଲାମ ନବୀ କହିଛନ୍ତି, ପୂର୍ବରୁ ଜୟରାମ ରମେଶ ନିଜ ଡିଏନଏ ଚେକ କରିନିଅନ୍ତୁ କି ସେ କେଉଁ କେଉଁ ଦଳର ରହିଛନ୍ତି। ବାହାରର ଲୋକମାନଙ୍କୁ କଂଗ୍ରେସ ବିଷୟରେ ଜଣାନାହିଁ। ଚାପଲୁସୀ ଓ ଟ୍ବିଟ କରି ଯାହାକୁ ପଦ ହାତେଇ ଅଭିଯୋଗ ଲଗାଉଛନ୍ତି ଆମକୁ ଦୁଃଖ ଲାଗୁଛି।

    ବିଜେପିରେ ସାମିଲ ସମ୍ପର୍କରେ ଗୁଲାମ କହିଛନ୍ତି, ସେ ବିଜେପିରେ ସାମିଲ ହେଉ ନାହାନ୍ତି। ତେବେ ତାଙ୍କୁ ବିଜେପିରେ ସାମିଲ ହେବାର କୌଣସି ମାନସିକତା ନାହିଁ। ଜଣେ କାଶ୍ମୀର କିପରି ବିଜେପିରେ ସାମିଲ ହୋଇପାରେ? ମୋତେ ଏପରି ଆଲୋଚନାରେ ଘୃଣା ଆସୁଛି। ମୁଁ କେବେ ବିଜେପିରେ ସାମିଲ ହେବି ନାହିଁ। ତେବେ ସେ ନିଜର ଏକ ଦଳ ଗଠନ କରି ଜମ୍ମୁ ବିଧାନସଭା ନିର୍ବାଚନ ଲଢିବେ ବୋଲି କହିଛନ୍ତି।

  • ଜି୨୩ ପରାମର୍ଶ ମାନିଥିଲେ ସ୍ଥିତି ଭିନ୍ନ ଥାଆନ୍ତା: ତିୱାରୀ

    ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ଗୁଲାମ ନବୀ  ଆଜାଦ ଦଳ ଛାଡିବା ପରେ କଂଗ୍ରେସରେ ଦେଖାଦେଇଛି ହଲଚଲ। ଏହାକୁ ନେଇ କଂଗ୍ରେସ ନେତା ମନୀଷ ତିୱାରୀଙ୍କ ବଡ ବୟାନ ସାମ୍ନାକୁ ଆସିଛି। ସେ କହିଛନ୍ତି ଆମେ ଦଳରେ ଭଡାଟିଆ ନୋହୁଁ, ବରଂ ଭାଗୀଦାର। ଆମକୁ କୌଣସି ସାର୍ଟିଫିକେଟର ଆବଶ୍ୟକତା ନାହିଁ।

    କଂଗ୍ରେସ ସାଂସଦ ମନୀଷ ତିୱାରୀ ଗୁଲାମ ନବୀଙ୍କ ଇସ୍ତଫା ପରେ କହିଛନ୍ତି, ଆମକୁ କୌଣସି ସାର୍ଟିଫିକେଟର ଆବଶ୍ୟକତା ନାହିଁ। ମୁଁ ଏହି ପାର୍ଟିକୁ ୪୨ ବର୍ଷ ଦେଇଛି। ଆଗରୁ ମଧ୍ୟ ମୁଁ କହିଛି କି, ଆମେ କଂଗ୍ରେସର ଭଡାଟିଆ ନୁହଁ, ତାର ଭାଗିଦାର। ଯଦି ଏବେ ଆପଣ ଆମକୁ ବାହାର କରିବାକୁ ଚେଷ୍ଟା କରିବେ ତେବେ ଅନ୍ୟ କଥା, ଓ ଏହାକୁ ଦେଖିବୁ।

    ସେ ଆହୁରି କହିଛନ୍ତି, ଦୁଇ ବର୍ଷ ପୂର୍ବରୁ ଆମେ ୨୩ ଜଣ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ପତ୍ର ଲେଖି କହିଥିଲୁ କି, କଂଗ୍ରେସର ସ୍ଥିତି ଚିନ୍ତାଜନକ ରହିଛି,ଯାହା ଉପରେ ବିଚାର ବିମର୍ଷ କରିବାର ଆବଶ୍ୟକତା ରହିଛି। କଂଗ୍ରେସକୁ ଅନେକ ଲୋକ, ପରିବାର ନିଜ ରକ୍ତରେ ସିଞ୍ଚନ କରିଛନ୍ତି। ଯଦିବି କାହାକୁ କିଛି ମିଳୁଛି ତେବେ ମାଗଣାରେ ମିଳିନାହିଁ।

    ତିୱାରୀ ଆହୁରି ଆଗକୁ କହିଛନ୍ତି କି, ଲାଗୁଛି ୧୮୮୫ରୁ ବର୍ତ୍ତମାନର ଭାରତ ଓ କଂଗ୍ରେସ ମଧ୍ୟରେ ସମନ୍ବୟରେ ଦୂରତା ଆସିଯାଇଛି। ବର୍ତ୍ତମାନ ଆତ୍ମନିରୀକ୍ଷଣର ଆବଶ୍ୟକତା ରହିଛି। ୨୦୨୦ ଡିସେମ୍ବର ୨୦ରେ ସୋନିଆ ଗାନ୍ଧୀଙ୍କ ଆବାସରେ ଅନୁଷ୍ଠିତ ବୈଠକରେ ଯଦି ସହମତି ହୋଇଥାନ୍ତା ତେବେ ସ୍ଥିତି ଏମିତି ହୋଇ ନ ଥାନ୍ତା।

    ଆଜାଦଙ୍କ ସମ୍ପର୍କରେ କହିବାକୁ ଯାଇ ସେ କହିଛନ୍ତି କି, ଉତ୍ତର ଭାରତର ଲୋକମାନେ ଅତ୍ୟନ୍ତ ଭାବପ୍ରବଣ, ସ୍ବାଭିମାନୀ ହୋଇଥାନ୍ତି। ୧୦୦୦ ବର୍ଷ ଧରି ଏମାନେ ବାହ୍ୟ ଆକ୍ରମଣ ବିରୋଧରେ ଲଢିଛନ୍ତି। କିନ୍ତୁ ଯେତେବେଳେ କଂଗ୍ରେସର ଚପରାସୀ ନେତାଙ୍କୁ ପରାମର୍ଶ ଦେବେ ତାକୁ ସହ୍ୟ କରିବା ସହଜ ନୁହେଁ। ଏମାନଙ୍କ ଧୈର୍ଯ୍ୟର ପରୀକ୍ଷା ନିଆଯିବା ଉଚିତ ନୁହେଁ।  

  • ନିଜର ଦଳ ଗଢିବେ ଆଜାଦ!

    ଶ୍ରୀନଗର: ଜମ୍ମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଗୁଲାମ ନବୀ ଆଜାଦ କଂଗ୍ରେସର ସମସ୍ତ ପଦ ପଦବୀ ଓ ସଦସ୍ୟତାରୁ ଇସ୍ତଫା ଦେବା ପରେ କରିଛନ୍ତି ବଡ ଘୋଷଣା। ସେ କହିଛନ୍ତି, ଜମ୍ମୁ କାଶ୍ମୀର ଫେରିବି ଓ ନିଜର ଏକ ଦଳ ଗଠନ କରିବି। ବିଜେପିରେ ସାମିଲ ହେବା ଖବରକୁ ଖଣ୍ଡନ କରିଛନ୍ତି ଗୁଲାମ।

    କଂଗ୍ରେସରୁ ଗୁଲାମ ନବୀ ଆଜାଦ ଇସ୍ତଫା ଦେବା ପରେ କହିଛନ୍ତି କି, ଜାତୀୟ ରାଜନୀତିରୁ ଆଞ୍ଚଳିକ ରାଜନୀତିକୁ ଫେରିବା ନେଇ ଘୋଷଣା କରିଛନ୍ତି। ଆଜାଦ କହିଛନ୍ତି, ଜମ୍ମୁ କାଶ୍ମୀର ଯିବି ଓ ସେଠାରେ ନିଜର ଏକ ଦଳ ଗଠନ କରିବି। ପରେ ଜାତୀୟସ୍ତରରେ ମଧ୍ୟ ଭାଗ୍ୟ ପରୀକ୍ଷା କରିବି।

    ତେବେ ବିଜେପିରେ ସାମିଲ ହେବା ସମ୍ବନ୍ଧରେ ଗଣମାଧ୍ୟମର ପ୍ରଶ୍ନର ଉତ୍ତରରେ ଆଜାଦ କହିଛନ୍ତିକି, ମୋର ବିରୋଧୀମାନେ ତିନି ବର୍ଷ ହେଲା ଏହି କଥା କହିଆସୁଛନ୍ତି। ସେମାନେ ମୋତେ ରାଷ୍ଟ୍ରପତି ଓ ଉପରାଷ୍ଟ୍ରପତି ମଧ୍ୟ କରିଦେଇଥିଲେ। ହେଲେ ଯେତେବେଳେ ପଚରାଗଲା କେଉଁ ବିଜେପି ନେତା ସମ୍ପର୍କ କରିଥିଲେ, ସେ କହିଥିଲେ, ମୁଁ କଣ ବିଜେପିରେ ଅଛି କି, ମୋତେ ବିଜେପି ନେତା ଫୋନ କରିବେ?

    ତେବେ  ମୋର ସବୁ ଦଳ ସହ ସୁସମ୍ପର୍କ ରହିଛି, ତେଣୁ ସମସ୍ତେ ମୋତେ ସମ୍ମାନ ଦେଇଥାନ୍ତି। ଗାନ୍ଧୀ ପରିବାର ସହ ମଧ୍ୟ ସମ୍ବନ୍ଧ ରହିଛି। ଏହା ଦଳୀୟ ସମ୍ବନ୍ଧ, ବ୍ୟକ୍ତିଗତ ନୁହେଁ।  ତେବେ ଦଳ ଛାଡିବା ବେଳେ ଆଜାଦ ରାହୁଲଙ୍କୁ ନେଇ ବହୁ କଟୁ ମନ୍ତବ୍ୟ ଦେବାକୁ ପଛାଇ ନାହାନ୍ତି। ସେ କହିଛନ୍ତି, ରାହୁଲ କଂଗ୍ରେସରେ ସାମିଲ ହେବା ପରଠାରୁ  ଦଳର କାର୍ଯ୍ୟଧାରାରେ ପରିବର୍ତ୍ତନ ଆସିଛି। ସେ ବରିଷ୍ଠଙ୍କୁ ସମ୍ମାନ ଦେଇ ଜାଣନ୍ତି ନାହିଁ।  

    ସେ କଂଗ୍ରେସର କାର୍ଯ୍ୟ ପ୍ରଣାଳିକୁ ନଷ୍ଟ କରିଦେଇଛନ୍ତି। ସର୍ବଦା ଅନୁଭୂତିହୀନ ଲୋକଙ୍କ ଗହଣରେ ରହୁଛନ୍ତି। ଦଳର ସମସ୍ତ ନିଷ୍ପତ୍ତି ସୁରକ୍ଷା କର୍ମୀ ବ୍ୟକ୍ତିଗତ କର୍ମଚାରୀ ନେଉଛନ୍ତି। ପ୍ରଧାନମନ୍ତ୍ରୀଙ୍କ ଦ୍ବାରା ଜାରି ଅଧ୍ୟାଦେଶ ଚିରି ସେ ଦଳକୁ ଲଜ୍ଜିତ କରିଥିଲେ ବୋଲି ଆଜାଦ କହିଛନ୍ତି।

  • କଂଗ୍ରେସ ଛାଡିଲେ ଗୁଲାମ ନବୀ ଆଜାଦ

    ଶେଷରେ କଂଗ୍ରେସ ସହ ସମ୍ପର୍କ ଛିନ୍ନ କଲେ ଗୁଲାମ ନବୀ ଆଜାଦ। କଂଗ୍ରେସର ହାତ ଛାଡ଼ିଦେଇଛନ୍ତି ସବୁଦିନ ଲାଗି ଆଜାଦ୍। ସମସ୍ତ ପଦପଦବୀ ସହ ଦଳର ପ୍ରାଥମିକ ସଦସ୍ୟତା ପଦରୁ ଇସ୍ତଫା ଦେଇଛନ୍ତି ବରିଷ୍ଠ ନେତା ଆଜାଦ୍। ସପ୍ତାହକ ତଳେ ଜମ୍ମୁକଶ୍ମୀର କଂଗ୍ରେସର ପ୍ରଚାର ଓ ରାଜନୈତିକ ବ୍ୟାପାର କମିଟିରୁ ଇସ୍ତଫା ଦେଇଥିଲେ ଆଜାଦ୍। ତେବେ ଇସ୍ତଫା ପତ୍ରରେ ବିଶେଷ କରି ରାହୁଲଙ୍କ ପାଇଁ ଦଳ ବୁଡ଼ୁଛି ବୋଲି ସାଙ୍ଘାତିକ କଥା ଲେଖିଛନ୍ତି ଆଜାଦ୍।

    କଂଗ୍ରେସକୁ ବାଏ ବାଏ କଲେ ଆଜାଦ୍। କଂଗ୍ରେସର ବରିଷ୍ଠ ନେତା ଗୁଲାମ ନବୀ ଆଜାଦ୍ ସବୁଦିନ ଲାଗି କଂଗ୍ରେସ ସହ ସମ୍ପର୍କ ଛିନ୍ନ କରିଦେଇଛନ୍ତି। ସମସ୍ତ ପଦପଦବୀ ସହ ଦଳର ପ୍ରାଥମିକ ସଦସ୍ୟତା ପଦରୁ ଇସ୍ତଫା ଦେଇଛନ୍ତି ଆଜାଦ୍। ସୋନିଆଙ୍କୁ ଲେଖିଥିବା ୫ ପୃଷ୍ଠାର ଇସ୍ତଫା ପତ୍ରରେ କିଭଳି ଦଳର ଅଧୋଗତି ଓ ତାଙ୍କ ଭଳି ନେତାଙ୍କୁ ଅପମାନିତ କରିବା ପଛରେ ରାହୁଲ ହିଁ ଦାୟୀ। ସେ କଥାର ଅବତାରଣା କରିଛନ୍ତି ଆଜାଦ୍। ଏବେ ଦଳ ରିମୋଟ୍ କଣ୍ଟ୍ରୋଲ୍ ମଡେଲ ହୋଇଗଲାଣି। ଉପା ସରକାର ଅମଳରେ ଥିବା ଦଳର ଗାରିମା ଏବେ ଧ୍ୱଂସ ହୋଇଗଲାଣି। ସୋନିଆ କେବଳ ନାମକୁ ମାତ୍ର ଦଳର ମୁଖ୍ୟ। କିନ୍ତୁ ସବୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ରାହୁଲ ନେଉଛନ୍ତି। ନିର୍ଦ୍ଦିଷ୍ଟ କୋଟରୀ ଗ୍ରୁପରେ ବାନ୍ଧି ହୋଇଗଲାଣି ଦଳ। ଆଗ ଭିଆଇପି କଲଚର ଚାଲୁଥିଲା ଆଉ ଏବେ କୋଟରି କଲଚର।

    ଉପା ସରକାରରେ ସୋନିଆଙ୍କ ବଳିଷ୍ଠ ନେତୃତ୍ୱରେ ଦଳ ଓ ସରକାର ଯେତିକି ଆଗେଇ ଚାଲିଥିଲା। ସେହି ଅନୁପାତରେ ପଛେଇଲା, ଯେତେବେଳେ ରାହୁଲ ଜାନୁଆରୀ ୨୦୧୩ରୁ ରାଜନୀତିରେ ଏଣ୍ଟ୍ରି କରିଥିଲେ। ଏଣ୍ଟ୍ରି କରୁ କରୁ ଦଳର ଉପାଧ୍ୟକ୍ଷ ହେଲେ ଆଉ ଦଳର ପୁରା ପରାମର୍ଶ ମେକାନିଜିମ୍ କୁ ଧୀରେ ଧୀରେ ଧ୍ୱଂସ କରିବାକୁ ଲାଗିଲେ ରାହୁଲ। ସମସ୍ତ ବରିଷ୍ଠ ଓ ଅଭିଜ୍ଞ ନେତାଙ୍କୁ ସାଇଡଲାଇନ କରାଗଲା। ଅନେକ ଅନଭିଜ୍ଞ ଓ କ୍ଷମତା ଲୋଭୀଙ୍କୁ ଦଳର ରାଜନୀତିକ ବ୍ୟାପାର କମିଟିରେ ମୁଣ୍ଡ ପୁରାଇବାକୁ ବାଟ ଛାଡ଼ିଦେଲେ ରାହୁଲ। ରାହୁଲଙ୍କ ପିଲାଳିଆମୀ ବ୍ୟବହାର ଲାଗି କିଭଳି ଉପା-୨ ସରକାର ଓ ପ୍ରଧାନମନ୍ତ୍ରୀ ପଦର ଗାରିମା କ୍ଷୁର୍ଣ୍ଣ ହୋଇଥିଲା, ତାହାର ନଜିର୍ ବି ଦେଇଛନ୍ତି ଆଜାଦ୍। ଏକ ଅର୍ଡିନାନ୍ସ୍ କଂଗ୍ରେସ କୋର୍ ଗ୍ରୁପ ଦ୍ୱାରା ପ୍ରସ୍ତୁତ ହୋଇଥିଲା। ଏହାକୁ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ୍ ପାରିତ କଲା ଓ ପରେ ଏହାକୁ ରାଷ୍ଟ୍ରପତି ବି ଅନୁମୋଦନ ଦେଇଥିଲେ। କିନ୍ତୁ ଏହାକୁ ନେଇ ରାହୁଲ ମିଡିଆ ଆଗରେ ଯେଭଳି ଅଭିନୟ କରି କାନ୍ଦିଲେ, ଏହା ହିଁ ତାଙ୍କର ଅପିରପକ୍ୱତାକୁ ବୟାନ କରିବା ଯଥେଷ୍ଟ ଥିଲା। ଆଉ ଏହି ଗୋଟିଏ ଆକ୍ସନ ଲାଗି ୨୦୧୪ରେ ପରାଜୟର ମୁହଁ ଦେଖିଲା ଉପା।

    ୨୦୧୪ ଲୋକସଭା ନିର୍ବାଚନକୁ ଆଖି ଆଗରେ ଦେଖି ଦଳକୁ ପୁନର୍ଗଠିତ, ସଂଗଠିତ, ମଝଭୁତ କରିବାକୁ ସେ ଆକ୍ସନ ପ୍ଲାନ ତିଆରି କରିଥିଲେ। ଯାହାକୁ ସିଡବ୍ଲୁସି ବି ମଞ୍ଜୁରୀ ଦେଇଥିଲା। ୨୦୧୪ ନିର୍ବାଚନ ଆଗରୁ ଏହାକୁ କାର୍ଯ୍ୟକାରୀ ହୋଇଥାଆନ୍ତା। କିନ୍ତୁ ଦୁର୍ଭାଗ୍ୟବଶତଃ ଦୀର୍ଘ ୯ ବର୍ଷ ଧରି ଏଆଇସିସିର ଶୀତଳଭଣ୍ଡାରରେ ଏହା ପଡ଼ିରହିଛି।  ବାରମ୍ୱାର ସୋନିଆ ଓ ରାହୁଲଙ୍କୁ ମନେ ପକାଇଦେବା ସତ୍ତ୍ୱେ କେହି କର୍ଣ୍ଣପାତ କଲେନି। ଜି-୨୩ ଗ୍ରୁପର ନେତାଙ୍କ ଅପରାଧ କଅଣ ଥିଲା। ସେମାନେ ଦଳର ଉତଥାନ ଲାଗି ପଦକ୍ଷେପ ନେଲେ। କିନ୍ତୁ ପରିବର୍ଦ୍ଧିତ ସିଡବ୍ଲୁସି ବୈଠକରେ ସୋନିଆଙ୍କୁ ଚିଠି ଲେଖିଥିବା ଏ ନେତାମାନଙ୍କ ଉପରେ ଦୋଷ ଲଦିଲେ ରାହୁଲ। ସେମାନଙ୍କୁ ସମନ କରାଗଲା। ବିଜେପି-ଆରଏସଏସ ସହ ହାତ ମିଳାଇଥିବାର ଗମ୍ଭୀର ଆରୋପ ଲଦିଲେ ରାହୁଲ।

    ୨୦୧୯ ପରଠୁ ଦଳର ସ୍ଥିତି ଶୋଚନୀୟ ହେବାକୁ ଲାଗିଛି। ଏବେ ଦଳ ନୋ-ରିଟର୍ଣ୍ଣ ସ୍ଥିତିରେ ପହଞ୍ଚିଯାଇଛି। କେବଳ ପ୍ରକ୍ସି ଲିଡରସିପରେ ଚାଲିଛି। କାରଣ ଯାହାର ନେତୃତ୍ୱ କଥା କୁହାଯାଉଛି, ସେ କେବଳ ଏକ ସଖୀ କଣ୍ଢେଇ ସାଜିଛନ୍ତି। ଏଭଳି ନେତୃତ୍ୱରେ ଦୁଇଟି ଲୋକସଭା ନିର୍ବାଚନ ହାରିଲାଣି କଂଗ୍ରେସ। ୨୦୧୪ରୁ ୨୦୨୨ ଭିତରେ ୪୯ ବିଧାନସଭା ନିର୍ବାଚନରୁ ୩୯ ହାରିଛି କଂଗ୍ରେସ। କେବଳ ୪ଟି ରାଜ୍ୟରେ ଜିତିଥିଲା। ଏବେ କେବଳ ଦୁଇଟି ରାଜ୍ୟରେ ହାମୁଡେଇପଡିଛି। ଆଉ ଦୁଇଟି ରାଜ୍ୟରେ ମେଣ୍ଟ କରି ନିଜର ସ୍ଥିତିକୁ ଯେନତେନ ପ୍ରକାରେ ବଜାୟ ରଖିବାକୁ ସଂଘର୍ଷ ଜାରି ରଖିଛି।

    ଦଳକୁ ଏଭଳି ସ୍ଥିତିରେ ପହଞ୍ଚାଇଥିବା ଦଳୀୟ ନେତୃତ୍ୱ ଏବେ ନିଜକୁ ପଚାରନ୍ତୁ। ବୁଥ୍, ବ୍ଲକ୍, ଜିଲ୍ଲା ଓ ରାଜ୍ୟରେ ଦଳର ଇଲେକ୍ଟୋରାଲ ସ୍ଥିତି ଆଜିକା ଦିନରେ କଅଣ, ଆତ୍ମନିରୀକ୍ଷଣ କରନ୍ତୁ। ଏବେ କଂଗ୍ରେସ ଉଭୟ ଇଛାଶକ୍ତି ଓ ଦକ୍ଷତାକୁ ହରାଇସାରିଲାଣି। ଭାରତ ଯୋଡ଼ ଯାତ୍ରା ବଦଳରେ ଦଳୀୟ ନେତୃତ୍ୱ ଏବେ କଂଗ୍ରେସ ଯୋଡ଼ ଏକ୍ସସରସାଇଜ୍ କରୁ ବୋଲି ପରାମର୍ଶ ବି ଦେଇଛନ୍ତି ଆଜାଦ୍। ଜୀବନର ୫୦ ବର୍ଷ କଂଗ୍ରେସ ପାଇଁ ନିଃସ୍ୱାର୍ଥପର ଭାବେ ସମର୍ପଣ ମନୋଭାବରେ କାମ କରିଥିବା ଆଜାଦ୍ ଦଳର ଦୁର୍ଦ୍ଦଶା ଲାଗି ରାହୁଲଙ୍କୁ ଦାୟୀ କରିଛନ୍ତି।

    ପ୍ରଦୀପ ନାୟକଙ୍କ ରିପୋର୍ଟ

Back to top button