INDIA

ନୂଆଦିଲ୍ଲୀ: ବିଶ୍ବରେ ମହାମାରୀ କରୋନା ସଂକ୍ରମଣ ଭୟ ସୃଷ୍ଟି କରିଛି। ତେଣୁ ସ୍ବାସ୍ଥ୍ୟ ମନ୍ତ୍ରୀ ମନସୁଖ ମାଣ୍ଡଭିୟଙ୍କ ନିର୍ଦ୍ଦେଶକ୍ରମେ କରୋନା ମୁକାବିଲା ପାଇଁ ଦେଶବ୍ୟାପୀ ବିଭିନ୍ନ ହସ୍ପିଟାଲରେ ମକ ଡ୍ରିଲ ଅନୁଷ୍ଠିତ ହୋଇଯାଇଛି। ସେପଟେ ଗୋଟିଏ ଦିନରେ ଦିଲ୍ଲୀ ଏୟାର ପୋର୍ଟରେ ମିଆମାର ଫେରନ୍ତା ୪ ଜଣ ସଂକ୍ରମିତ ଚିହ୍ନଟ ହୋଇଛନ୍ତି।

ଏସମ୍ପର୍କରେ ସ୍ବାସ୍ଥ୍ୟ ମନ୍ତ୍ରୀ କହିଛନ୍ତି, ଦେଶରେ କୋଭିଡ ମୁକାବିଲା ପାଇଁ ସରକାର ପ୍ରସ୍ତୁତି ଆରମ୍ଭ କରିଛି। ଆଜି ଦେଶବ୍ୟାପୀ ସମସ୍ତ କୋଭିଡ ହସ୍ପିଟାଲରେ ମକଡ୍ରିଲ କରାଯାଇଛି। ପ୍ରଧାନମନ୍ତ୍ରୀ ମଧ୍ୟ ସଂକ୍ରମଣକୁ ମାତ ଦେବାକୁ ଦେଶବାସୀଙ୍କୁ ସତର୍କ ରହିବାକୁ ଅପିଲ କରିଛନ୍ତି।

ବିଶ୍ବର ବିଭିନ୍ନ ରାଷ୍ଟ୍ରରେ ଏବେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି। ଦେଶରେ ଆଉ ଏକ ଲହର ଆଶଙ୍କାରେ ଦେଶର ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ପ୍ରସ୍ତୁତି ଓ ସୁବିଧା ଉପରେ ସମୀକ୍ଷା କରାଯାଇଛି।

ସେପଟେ ରାଜ୍ୟ ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି କି, ଆମେ କରୋନା ମୁକାବିଲା ପାଇଁ କେତେ ପ୍ରସ୍ତୁତ ତାହା ଜାଣିବାକୁ ଆଜି ମଡ ଡ୍ରିଲ କରିଛୁ। ଦେଶରେ ଆବଶ୍ୟକତାଠୁ ଅଧିକ ଅକ୍ସିଜେନ ମହଜୁଦ ହୋଇ ରହିଛି। ଆମକୁ ସମସ୍ତ ବିଷୟ ପ୍ରତି ଧ୍ୟାନ ରଖିବା ସହ ସମସ୍ତ ଉପକରଣକୁ ପ୍ରସ୍ତୁତ ରଖିବାକୁ ହେବ ବୋଲି କହିଛନ୍ତି ମହାପାତ୍ର।

ସେହିପରି ଜମ୍ମୁର  ଗାନ୍ଧୀ ନଗର ହସ୍ପିଟାଲ ଓ ହାଇଦ୍ରାବାଦର ଗାନ୍ଧୀ ହସ୍ପିଟାଲରେ ମକଡି୍ରଲ କରାଯାଇଛି। ଆଜିର ମକଡି୍ରଲର ଯାଞ୍ଚ କରିବାକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ନିଜେ ସଫଦରଜଂ ହସ୍ପିଟାଲରେ ପହଞ୍ଚିଥିବା ବେଳେ ତାମିଲ ନାଡୁ ସ୍ବାସ୍ଥ୍ୟ ମନ୍ତ୍ରୀ ସୁବ୍ରମଣ୍ୟନ ରାଜୀବ ଗାନ୍ଧୀ ସରକାରୀ ହସ୍ପିଟାଲରେ ଡି୍ରଲ ସମୀକ୍ଷା କରିଛନ୍ତି।

ସୂଚନା ଯୋଗ୍ୟ, ସୋମବାର ଦିନ ମିଆମାରରୁ ଆସୁଥିବା ୪ ଜଣ ଅନ୍ତର୍ଜାତୀୟ ପର୍ଯ୍ୟଟକ ଦିଲ୍ଲୀ ଏୟାର ପୋର୍ଟରେ ଟେଷ୍ଟିଂରୁ ସଂକ୍ରମିତ ଥିବା ଜଣାପଡିଥିଲା। ସେମାନଙ୍‌କୁ ଦିଲ୍ଲୀ ରାମ ମନୋହର ଲୋହିଆ ହସ୍ପିଟାଲରେ ଭର୍ତ୍ତି କରାଯିବା ସହ ସେମାନଙ୍କ ନମୁନାର ଜେନମ ସିକ୍ୟୁନ୍ସିଂ ପାଇଁ ପଠା ଯାଇଥିବା ସୂତ୍ର ପକ୍ଷରୁ ସୂଚନା ରହିଛି।

ନୂଆଦିଲ୍ଲୀ: ତୱାଙ୍ଗ ସୀମାରେ ଭାରତ-ଚାଇନା  ସେନା ସଂଘର୍ଷ ପରେ ଉପଗ୍ରହ ମାଧ୍ୟମରେ ଆଶ୍ଚର୍ଯ୍ୟଜନକ ଚିତ୍ର ସବୁ ଆସିଛି। ଭାରତ ବିରୋଧରେ ସୀମାରେ ଚୀନ ସେନା ପିଏଲଏର ବ୍ୟାପକ ପ୍ରସ୍ତୁତି ଚିତ୍ର ଉପଗ୍ରହରୁ ହାସଲ ହୋଇଛି। ତୱାଙ୍ଗ ସୀମାରେ ଚାଇନା ସେନା ଅସ୍ତ୍ରସସ୍ତ୍ର ଠୁଳ କରିବା, ଡ୍ରୋନ୍‌, ଫାଇଟର ଜେଟ୍‌ ମୁତୟନ କରିବାର ଦୃଶ୍ୟ ଉପଗ୍ରହରେ କଏଦ ହୋଇଛି।  ଏହି ଫାଇଟର ଜେଟ୍‌ ଗୁଡ଼ିକୁ ଚାଇନା ତିବ୍ଦତ ଏୟାର ବେସ୍‌ରେ ଠୁଳ କରିଛି।

କେବଳ ଚୀନ ନୁହେଁ ଭାରତୀୟ ସେନା ପକ୍ଷରୁ ମଧ୍ୟ ସୀମାରେ ଘନଘନ ଏୟାର ପାଟ୍ରୋଲିଂ ହେଉଛି। ଡିସେମ୍ବର ୯ ତାରିଖରେ ତୱାଙ୍ଗରେ ଚୀନ ସେନା ସୀମା ଭିତରକୁ ପସିବାକୁ ଅପଚେଷ୍ଟା କରିବା ପରଠାରୁ ଭାରତୀୟ ସେନା ପକ୍ଷରୁ ବ୍ୟାପକ ସତର୍କତା ଅବଲମ୍ବନ କରାଯାଇଛି। ଶତ୍ରୁ ରାଷ୍ଟ୍ରର ସାମରିକ ଉଡ଼ାଣ ଉପରେ ଟିକନିକ୍ ନିଘା ରଖିଛି ସେନା।  ଅରୁଣାଚଳ ପ୍ରଦେଶର ସୀମାରୁ ୧୫୦ କିଲୋମିଟର ଉତ୍ତର-ପୂର୍ବର ଚାଇନାର ବାଙ୍ଗଡା ଏୟାରବେସର ଚିତ୍ର ସାଟେଲାଇଟ୍‌ରେ  କଏଦ ହୋଇଛି।

ଏହି ବେସ୍‌ରେ ଚାଇନା ତାର ଅତ୍ୟାଧୁନିକ WZ-7 ‘ସୋରିଙ୍ଗ ଡ୍ରାଗନ୍‘ ଡ୍ରୋନ୍‌ ଉଡାଉଛି। ୨୦୨୧ ମସିହାରେ ପ୍ରଥମ ଥର ପାଇଁ ଏହି ଡ୍ରୋନ୍‌ ଉନ୍ମୋଚିତ ହୋଇଥିଲା। ଏହି  ଡ୍ରୋନ୍‌ ୧୦ ଘଣ୍ଟା ପର୍ଯ୍ୟନ୍ତ ଉଡିପାରିବାର କ୍ଷମତା ରଖିଛି। ଭାରତର ଗୁଇନ୍ଦାଗିରି କରିବାକୁ ଚୀନ ଏହି ଡ୍ରୋନ ମୁତୟନ କରି ସୀମାରେ ଭାରତର ପ୍ରତି ପଦକ୍ଷେପ ଉପରେ ରଖୁଛି ନଜର। ସେପଟେ ଆସାମ, ମିସାମାରି, ଜୋରହାଟ, ତେଜପୁର,  ହାସିମାରା ପଶ୍ଚିମ ବଙ୍ଗ, ଏବଂ ବାଗଡୋଗ୍ରା ସମେତ ଅନ୍ୟ ପ୍ରମୁଖ ସୀମାବର୍ତ୍ତୀ ଏୟାରବେସ୍‌କୁ ଆଲର୍ଟ କରାଯାଇଛି।   

ନୂଆଦିଲ୍ଲୀ: ବେକାରୀ ସମସ୍ୟାରେ ଯୁଝୁଛି ଯୁବଶକ୍ତି। ଆଉ ଏତିକିବେଳେ ବର୍ଷକ ଭିତରେ ୧୦ ଲକ୍ଷ ଯୁବକ ଯୁବତୀଙ୍କୁ ସରକାରୀ ନିଯୁକ୍ତି ଦେବାକୁ ଆଗେଇ ଆସିଛନ୍ତି ପ୍ରଧାନମନ୍ତ୍ରୀ ମୋଦି। ପ୍ରଥମ ପର୍ଯ୍ୟାୟରେ ୭୫ ହଜାର ଯୁବକ ଯୁବତୀଙ୍କୁ ନିଯୁକ୍ତି ପତ୍ର ଦିଆଯାଇଛି। ସମଗ୍ର ଦେଶରେ ୫୦ଟି ସ୍ଥାନରେ ନିଯୁକ୍ତି ମେଳାର ଆୟୋଜନ କରାଯାଇଥିଲା। ଏହି ଅବସରରେ ପ୍ରଧାନମନ୍ତ୍ରୀ କହିଛନ୍ତି, ସ୍ୱାଧୀନତାର ଅମୃତ ମହୋତ୍ସବ ଅବସରରେ ବିକଶିତ ଭାରତ ନିର୍ମାଣର ସାରଥୀ ଅଟନ୍ତି ଯୁବଶକ୍ତି। ଏକବିଂଶ ଶତାବ୍ଦୀରେ ମେକ୍ ଇନ ଇଣ୍ଡିଆ ଓ ଆତ୍ମନିର୍ଭର ଭାରତ ଦେଶର ବଡ଼ ମହତ୍ତ୍ୱାକାଙ୍କ୍ଷୀ ମିଶନ ରହିଛି। ପିଏମ ମୁଦ୍ରା ଯୋଜନାରେ ୭୦ ପ୍ରତିଶତ ମହିଳା ହିତାଧିକାରୀ ସାଜିଛନ୍ତି। ଚଳିତ ବର୍ଷ ୮ କୋଟି ମହିଳା ଏସଏଚଜି ଗ୍ରୁପ ସାମିଲ୍ ହୋଇଛନ୍ତି। ଗଲା ୮ ବର୍ଷରେ ଭାରତ ସବୁଠୁ ବୃହତ୍ ଅର୍ଥନୀତି ରାଷ୍ଟ୍ରରେ ପରିଣତ ହୋଇଛି। ମୁଦ୍ରାସ୍ଫୀତି, ବେରୋଜଗାରୀ ଅନେକ ବଡ଼ ରାଷ୍ଟ୍ରର ଅର୍ଥନୀତିକୁ ଦୋହଲାଇଦେଇଛି। ସେଥିଲାଗି ଶହେ ବର୍ଷର ସଙ୍କଟ ଶହେ ଦିନରେ ଦୂର ହୋଇପାରିବନି। ଗଲା ୮ ବର୍ଷ ଭିତରେ ୮୦ ହଜାର ଷ୍ଟାର୍ଡଅପ ଛିଡ଼ା ହୋଇଛି। ୮ ବର୍ଷ ଭିତରେ ରୋଜଗାର ସୃଷ୍ଟି ଲାଗି ଅନେକ ପଦକ୍ଷେପ ନେଇଛୁ। ଆଉ ରୋଜଗାର ମେଳା ତାହାର ଏକ ଅଂଶବିଶେଷ ବୋଲି କହିଛନ୍ତି ମୋଦି।

ସେପଟେ ନିଯୁକ୍ତି ପତ୍ର ପାଇଥିବା ଅନେକ ଆଶାୟୀ ଏହାକୁ ନେଇ ଖୁସି ଜାହିର କରିଛନ୍ତି। ସରକାରୀ ଚାକିରୀ ପାଇବା ସୁବର୍ଣ୍ଣ ସୁଯୋଗ ବୋଲି କହିଛନ୍ତି। ସମସ୍ତ ନିଯୁକ୍ତି ୟୁପିଏସସି, ଏସଏସସି, ରେଲଓ୍ୱେ ରିକ୍ର୍ୟୁଇଟମେଣ୍ଟ ବୋର୍ଡ ଭଳି ଏଜେନ୍ସି ଜରିଆରେ ହୋଇଥିବାରୁ ଏଥରେ ସ୍ୱଛତା ଅବଲମ୍ୱନ ହୋଇଥିବା କହିଛନ୍ତି।

ସେପଟେ ମୋଦିଙ୍କ ଏଭଳି ନିଯୁକ୍ତି ମେଳାକୁ ନେଇ ଭାରତ ଯୋଡ଼ଯାତ୍ରାର ପ୍ରଭାବ ବୋଲି କହିଛି କଂଗ୍ରେସ। ଏହା ସହ ମୋଦିଙ୍କୁ ଜୁମଲା କିଙ୍ଗ୍ କହିବା ସହ ୮ ବର୍ଷ ଭିତରେ ୧୬ କୋଟି ଚାକିରୀ କେବେ ଦେବ, ତାହାର ଦିନ, ତାରିଖ ଓ ମାସର ହିସାବ ମାଗିଛି। ୩୦ ଲକ୍ଷ ସରକାରୀ ଚାକିରୀ କେବେ ଦେବ ବୋଲି ପଚାରିଛି।

ବର୍ଷକ ଭିତରେ ସରକାରୀ ଚାକିରୀରେ ୧୦ ଲକ୍ଷ ନିଯୁକ୍ତି ଦେବାକୁ କଥା ଦେଇଛନ୍ତି ପ୍ରଧାନମନ୍ତ୍ରୀ। ଆଉ ଏପଟେ ବର୍ଷକୁ ଦୁଇ କୋଟି ନିଯୁକ୍ତିର ହିସାବ ମାଗିବା ସହ ରାହୁଲଙ୍କ ଭାରତ ଯୋଡ଼ ଯାତ୍ରାରେ ଭୟଭୀତ ମୋଦି ଏଭଳି ଚାକିରୀ ଦେବାକୁ ଆଗେଇ ଆସିଥିବା କହି ଶ୍ରେୟ ନେବାକୁ ଆଗେଇଆସିଛି କଂଗ୍ରେସ।

ପ୍ରଦୀପ ନାୟକଙ୍କ ରିପୋର୍ଟ

ନୂଆଦିଲ୍ଲୀ: ଆଜି ଶପଥ ନେବେ ଦେଶର ନୂଆ ଚିଫ ଅଫ ଡିଫେନ୍ସ ଷ୍ଟାଫ ବା ସିଡିଏସ ଭାବେ ନିଯୁକ୍ତ ଲେପ୍ଟେନାଣ୍ଟ ଜେନେରାଲ ଅନିଲ ଚୌହାନ। ଦିଲ୍ଲୀ ସାଉଥ ବ୍ଲକଠାରେ ତାଙ୍କୁ ଗାର୍ଡ ଅଫ ଅନର ଦିଆଯାଇଛି। ଦେଶର ଆର୍ମ ଫୋର୍ସଡର ସର୍ବୋଚ୍ଚ ଆସନରେ ରହିଥିବାରୁ ମୁଁ ନିଜକୁ ଗର୍ବିତ ମନେ କରୁଛି ବୋଲି କହିଛନ୍ତି ନୂତନ ସିଡିଏସ । ଦେଶ ପ୍ରତି ଆସୁଥିବା ସମସ୍ତ ଚାଲେଞ୍ଜ ଓ ବିପଦର ମୁକାବିଲା ପାଇଁ ପ୍ରସ୍ତୁତ ବୋଲି କହିଛନ୍ତି ସିଡିଏସ । ତେବେ ବିପିନ ରାୱନ୍ତଙ୍କ ହେଲିକାପ୍ଟର ଦୁର୍ଘଟଣାରେ ମୃତ୍ୟୁ ହେବା ପରେ ଏହି ପଦ ଖାଲି ପଡିଥିଲା। ପ୍ରାୟ ୯ ମାସର ଧରି ସିଡିଏସ ପଦ ଖାଲି ପଡିବା ପରେ ଚୌହାନଙ୍କୁ ତିନି ସେନା ମୁଖ୍ୟ ଭାବେ ନିଯୁକ୍ତ କରାଯାଇଛି। ଚୌହାନ ୨୦୨୧ ମେ ମାସରେ ପୂର୍ବାଞ୍ଚଳ କମାଣ୍ଡରୁ ଅବସର ନେଇଥିଲେ।

ପାକିସ୍ତାନ ପୁଣି ଭାରତ ଉପରେ ଲୁଚିଛପି ଆକ୍ରମଣ କରୁଛି। ଏଥିପାଇଁ ପାକିସ୍ତାନ ନୂଆ ନୂଆ ପନ୍ଥା ଆପଣାଇବା ସହ ଭାରତୀୟ ସୈନ୍ୟମାନଙ୍କୁ ଫସେଇବାକୁ ଚାହୁଁଛି। କିନ୍ତୁ ପାକିସ୍ତାନର ଯୋଜନା ପଣ୍ଡ ହେଉଛି। ଯାହାକୁ ନେଇ ଉତକ୍ଷିପ୍ତ  ହୋଇଛି ପାକିସ୍ତାନ। ଦୁଇଟି ପାକିସ୍ଥାନୀ ଡ୍ରୋନ୍ ବିଭିନ୍ନ ସମୟରେ ଭାରତ-ପାକିସ୍ତାନ ସୀମାବର୍ତ୍ତୀ ଜିଲ୍ଲା ତରନତାରନରେ ଦେଖା ଦେଇଛି। ଏହି ଡ୍ରୋନ୍ ପ୍ରାୟ ୮୨ ରାଉଣ୍ଡ ଗୁଳି ଚଳାଇବା ସହ ୧୦ ରାଉଣ୍ଡ ଆଲୋକୀକରଣ ବୋମା ମଧ୍ୟ ଫିଙ୍ଗିଛି।

ଶୁକ୍ରବାର ବିଳମ୍ୱିତ ରାତିରେ ଏହି ଘଟଣା ଘଟିଥିବା ସୂଚନା ମିଳିଛି। ଏହାକୁ ନେଇ  ଅଞ୍ଚଳରେ ଭୟର ବାତାବରଣ ଖେଳିଯାଇଛି। ପୋଲିସ୍ ଏବଂ ସୁରକ୍ଷା କର୍ମୀଙ୍କର ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଶନିବାର ସକାଳୁ ସର୍ଚ୍ଚ ଅପରେସନ୍ ଜାରି ରହିଛି। ବର୍ତ୍ତମାନ ସୁଦ୍ଧା କୌଣସି ସନ୍ଦିଗ୍ଦ ବସ୍ତୁ ମିଳିନଥିବା ବିଏସଏଫ ମୁଖ୍ୟପ୍ରବକ୍ତା ସୂଚନା ଦେଇଛନ୍ତି।

ଶୁକ୍ରବାର ବିଳମ୍ୱିତ ରାତିରେ ବିଓପି ବାନ୍‌ ତାରା, ପିଏସ ଖାଲରା ୧୦୩ ବାଟାଲିୟନର ସୀମା ସୁରକ୍ଷା କର୍ମୀ ଅଞ୍ଚଳରେ କଡା ନଜର ରଖିବା ସହ କଡା ପଇଁତରା ମାରୁଥିଲେ। ସେହି ସମୟରେ ପାକିସ୍ତାନ ପକ୍ଷରୁ ଏକ ସନ୍ଦେହଜନକ ବସ୍ତୁ ଭାରତୀୟ ବାୟୁ ସୀମା ଅଞ୍ଚଳରେ ପ୍ରବେଶ କରିଥିଲା। ଏହା ଦେଖିବା ମାତ୍ରେ ସୁରକ୍ଷା କର୍ମୀ ସତର୍କ ହୋଇ ଯାଇଥିଲେ। ସୁରକ୍ଷା କର୍ମୀ ଅତ୍ୟାଧୁନୀକ ଯନ୍ତ୍ରପାତି ମାଧ୍ୟମରେ ଅନୁସନ୍ଧାନ କରି ଜାଣିବାକୁ ପାଇଥିଲେ କି, ପାକିସ୍ତାନର ଚିନ୍ ନିର୍ମିତ ଡ୍ରୋନ୍ ଭାରତୀୟ ସୀମା ଅଞ୍ଚଳକୁ ପ୍ରବେଶ କରିଛି। ଡ୍ରୋନକୁ ଘଉଡାଇବାକୁ ସୁରକ୍ଷା ବଳ ପକ୍ଷରୁ ୯ ରାଉଣ୍ଡ ଏବଂ ୪ ରାଉଣ୍ଡ ଆଲୋକୀକରଣ ବୋମା ଫିଙ୍ଗାଯାଇଥିଲା। ଏହାପରେ ଡ୍ରୋନ ଦୁଇଟି ପାକିସ୍ତାନ ଆଡକୁ  ଫେରିଯାଇଥିଲା।  

ଶୁଭଲକ୍ଷ୍ମୀ ସାହୁଙ୍କ ରିପୋର୍ଟ

() ପାକିସ୍ତାନ ବିପକ୍ଷରେ ରୋମାଞ୍ଚକର ବିଜୟକୁ ନେଇ ଭାରତରେ ଉଲ୍ଲାସ। ହେଲେ ଏହି ବିଜୟ ଉଲ୍ଲାସ ବେଳେ ଜାତୀୟ ପତାକାକୁ ଅସମ୍ମାନ କରିଛନ୍ତି ବିସିସିଆଇ ସେକ୍ରେଟାରୀ ଜୟ ଶାହା। ଯାହାର ଭିଡିଓ ଭାଇରାଲ ପରେ ଏହାକୁ ନେଇ ସତ କଅଣ, ତାକୁ ନେଇ ସୋସିଆଲ ମିଡିଆରେ ୟୁଜର୍ସଙ୍କ ଭିତରେ ବ୍ଲେମ୍ ଗେମ୍ ଆରମ୍ଭ ହୋଇଛି।

ଏସିଆ କପ୍ ଟ୍ୱେଣ୍ଟି- ଟ୍ୱେଣ୍ଟି କ୍ରିକେଟରେ ବିଶ୍ୱକପ୍ ପରାଜୟର ପ୍ରତିଶୋଧ ନେତା ଭାରତ। ପାକିସ୍ତାନକୁ ୫ ଓ୍ୱିକେଟରେ ହରାଇଲା ପରେ ସବୁଠି ଆନନ୍ଦ ଉଲ୍ଲାସର ମାହୋଲ। ଆଉ ଏହି ବିଜୟ ସମୟରେ ବିସିସିଆଇ ସେକ୍ରେଟାରୀ ଜୟ ଶାହା କରତାଳି ମାରି ଖେଳାଳୀଙ୍କୁ ଅଭିନନ୍ଦନ ଜ୍ଞାପନ କରୁଥିଲା ବେଳେ ଜଣେ ତାଙ୍କୁ ଜାତୀୟ ପତାକା ଆଣି ଦେଇଥିଲେ। କିନ୍ତୁ ତ୍ରିରଙ୍ଗା ଧରିବାକୁ ମନା କରିଦେଇଥିଲେ ଜୟ ଶାହା। ବାସ୍ ଏହି ଭିଡ଼ିଓ ଭାଇରାଲ ପରେ ଏବେ ଶାହା ତ୍ରିରଙ୍ଗାକୁ ଅସମ୍ମାନ କରିଥିବା ନେଇ ଜବରଦସ୍ତ ଟ୍ରୋଲିଂ ଜାରି ରହିଛି। କିଏ କହିଛି ମୋଦି ସରକାର ହର ଘର୍ ତ୍ରିରଙ୍ଗା ପାଇଁ ଲୋକଙ୍କ ପକେଟରୁ ଟଙ୍କା ନେଇଛନ୍ତି। କିନ୍ତୁ ଗୃହ ମନ୍ତ୍ରୀଙ୍କ ପୁଅ ତ୍ରିରଙ୍ଗା ଧରିବାକୁ ମନା କରିଦେଇଥିବାରୁ ବିଜେପି ତାଙ୍କୁ ଆଣ୍ଟି-ନାସନାଲ ସାର୍ଟିଫିକେଟ୍ ଦେବ କି ନା ଏହା ଶାହା ହୋଇଥିବାରୁ ସେ ଏଥିରୁ ବାଦ୍ ପଡ଼ିବେ ବୋଲି ସକେତ ଗୋଖଲେ କମେଣ୍ଟ୍ କରିଛନ୍ତି। ତେବେ ଆଉ କିଏ ଏହାକୁ ଉଚିତ୍ ବୋଲି ଦର୍ଶାଇଛି। ଜୟ ଶାହା ଏସିଆନ କ୍ରିକେଟ୍ କାଉନସିଲର ସଭାପତି ଅଛନ୍ତି। ଭାରତ ଜିତିଗଲା ବୋଲି ସେ ଜାତୀୟ ପତାକା କେମିତି ଧରିବେ। କାରଣ ଏହା ଏସିସି ଇଭେଣ୍ଟ୍।

ଆଉ କିଏ ପାଟନା ଏଡିଏମ କିଭଳି ଆନ୍ଦୋଳନତରତ ଶିକ୍ଷକ ଆଶାୟୀଙ୍କୁ ଅତି ନିର୍ଦ୍ଦୟ ଭାବେ ମାଡ଼ ମାରିଥିଲେ। ଏପରିକି ଲହୁଲୁହାଣ ହୋଇଥିବା ବ୍ୟକ୍ତି ତ୍ରିରଙ୍ଗାକୁ ନିଜ ମୁଣ୍ଡରେ ଘୋଡ଼ାଇଥିଲେ ବି ତ୍ରିରଙ୍ଗାକୁ ପିଟିବାକୁ ବି ପଛାଇନଥିଲେ ଅଧିକାରୀ। ଏ  ଭିଡିଓ ପୋଷ୍ଟ କରି ଶାହାଙ୍କ ଭଳି କ୍ଷମତାଶାଳୀ ବା କାହିଁକି ଏଥିରୁ ବାଦ୍ ପଡ଼ିଥାଆନ୍ତେ ବୋଲି କଟାକ୍ଷ କରିଛନ୍ତି। ଆଉ କିଏ କହିଛି, କୁଆଡ଼େ ଗଲା ବିଜେପି ଆଇଟି ଓ୍ୱିଙ୍ଗ୍ ଓ ଗୋଦି ମିଡ଼ିଆ। ଯଦି କୌଣସି ଅଣବିଜେପି ନେତା ତ୍ରିରଙ୍ଗାକୁ ଜୟ ଶାହାଙ୍କ ଭଳି ଅପମାନ କରିଥାଆନ୍ତେ, ତେବେ ଏମାନେ ସହିଥାଆନ୍ତେ କି ବୋଲି ପଚାରିଛନ୍ତି। ଏହା ଆମ ମାଟିକୁ ଅପମାନ ବୋଲି କହିଛନ୍ତି ଅନେକ। ଶେହେନ୍ସାଙ୍କ ପୁଅ ବୋଲି ସୌଭାଗ୍ୟବଶତଃ ଏହା ବିଜେପିକୁ ଦେଶର ଅପମାନ ବୋଲି ଲାଗୁନି। କଂଗ୍ରେସ କହିଛି, ଜୟ କଅଣ ତ୍ରିରଙ୍ଗା ବଦଳରେ ଗେରୁଆ ପତାକା ଧରିବାକୁ ଚାହୁଁଥିଲେ କି। ଶିବସେନା କହିଛି, ଏସିଆନ କ୍ରିକେଟ କାଉନସିଲ ଅଧ୍ୟକ୍ଷ ହୋଇଗଲେ ଜାତୀୟ ପତାକାକୁ ଅପମାନିତ କରିବାକୁ କେଉଁଠି ନିୟମ ଅଛି। ଟିଏମସି କହିଛି, ରଜା ଛୁଆ ଜାତୀୟ ଗର୍ବ ଓ ଗୌରବ ବୁଝେନା।

ପ୍ରଦୀପ ନାୟକଙ୍କ ରିପୋର୍ଟ

ଭାରତ ଓ ମାଲେସିଆ ମଧ୍ୟରେ ଚାରି ଦିନିଆ ଯୁଦ୍ଧାଭ୍ୟାସ ଅନୁଷ୍ଠିତ ହୋଇଯାଇଛି l ଭାରତୀୟ ବାୟୁସେନା ଓ ରୋୟାଲ ମାଲେସିଆ ବାୟୁସେନା ମଧ୍ୟରେ ଯୁଦ୍ଧାଭ୍ୟାସ “ଉଦାରଶକ୍ତି” ସଫଳ ଭାବରେ ଅନୁଷ୍ଠିତ ହୋଇଛି l ରୟାଲ ମାଲେସିଆ ବାୟୁସେନା ଦ୍ୱାରା ଆୟୋଜିତ ପାରମ୍ପାରିକ ସମାରୋହଦ୍ୱାରା ଏହା ଶେଷ ହୋଇଛି | ଯୁଦ୍ଧାଭ୍ୟାସ ଦ୍ୱାରା ଉଭୟ ବାୟୁସେନାର କୌଶଳ ର ଆଦାନ ପ୍ରଦାନ ହେବା ସହ ଦୁଇ ଦେଶ ମଧ୍ୟରେ ଥିବା ବନ୍ଧୁତା ଅଧିକ ନିବିଡ ହୋଇଛି l

ଭାରତୀୟ ଫୁଟବଲକୁ ଲାଗିଛି ବଡ ଝଟ୍‌କା । ବିଶ୍ୱ ଫୁଟବଲର ତୃତୀୟ ପକ୍ଷର ଅଯଥା ହସ୍ତକ୍ଷେପ କାରଣରୁ ଭାରତୀୟ ଫୁଟବଲ ମହାସଂଘ କୁ ତତ୍କାଳ ପ୍ରଭାବ ଅନୁଯାୟୀ ନିଲମ୍ବିତ କରିଛି। ତେବେ ଫିଫା ନିୟମର ଘୋର ଉଲ୍ଲଙ୍ଘନ କାରଣରୁ ନିଷ୍ପତ୍ତି ନିଆଯାଇଛି । ଗଣତାନ୍ତ୍ରିକ ପଦ୍ଧତିରେ ଏଆଇଏଫଏଫର ବିଭିନ୍ନ ପଦ ଲାଗି ନିର୍ବାଚନ ନହେବା ଯାଏଁ ନିଲମ୍ବନ ଆଦେଶ ବଳବତ୍ତର ରହିବ ବୋଲି ଫିଫା ପକ୍ଷରୁ କୁହାଯାଇଛି। ଏଥିସହ ଭାରତରେ ଆସନ୍ତା ଅକ୍ଟୋବର ୧୧ରୁ ୩୦ ପର୍ଯ୍ୟନ୍ତ ଖେଳାଯିବାକୁ ଥିବା ୧୭ ବର୍ଷରୁ କମ୍‌ ମହିଳା ଫୁଟବଲ ବିଶ୍ୱକପକୁ ମଧ୍ୟ ସ୍ଥଗିତ ରଖାଯାଇଛି । ଏଆଇଏଫଏଫର ସଭାପତି ପ୍ରଫୁଲ୍ଲ ପଟେଲଙ୍କ କାର୍ଯ୍ୟକାଳ ଶେଷ ହୋଇଯାଇଥିଲେ ମଧ୍ୟ ସଂଗଠନର ବିଭିନ୍ନ କାର୍ଯ୍ୟକଳାପରେ ହସ୍ତକ୍ଷେପ କରୁଛନ୍ତି। ପ୍ରଫୁଲ୍ଲଙ୍କ ବିରୋଧରେ ଏଆଇଏଫଏଫ ପ୍ରଶାସନିକ କମିଟି ପକ୍ଷରୁ ସୁପ୍ରିମକୋର୍ଟରେ ଅଭିଯୋଗ କରାଯାଇଥିଲା।

ସୁପ୍ରିମକୋର୍ଟ ପ୍ରଫୁଲ୍ଲଙ୍କ ହସ୍ତକ୍ଷେପକୁ ଅବୈଧ ଘୋଷଣା କରିଥିଲେ। ଏହା ପରେ ମଧ୍ୟ ପଟେଲ ଏଆଇଏଫଏଫ ସମସ୍ତ କାର୍ଯ୍ୟରେ ହସ୍ତକ୍ଷେପ କରିଥିଲେ। ଏହା ଜଣାପଡିବା ପରେ ଫିଫା ଏଭଳି ନିଷ୍ପତ୍ତି ନେଇଛି। ଏଆଇଏଫଏଫ କାର୍ଯ୍ୟନିର୍ବାହୀ କମିଟି ଏବଂ ଏଆଇଏଫଏଫ ପ୍ରଶାସନର କ୍ଷମତା ଗ୍ରହଣ କରିବାକୁ ପ୍ରଶାସକଙ୍କ ଏକ କମିଟି ଗଠନ ଆଦେଶ ପରେ ଏହି ନିଲମ୍ବନ ହଟାଯିବ ବୋଲି ଫିଫା ପକ୍ଷରୁ କୁହାଯାଇଛି। ଦେଶର କ୍ରୀଡ଼ା ନୀତି ଅନୁଯାୟୀ, କେହି ବି ୩ ବର୍ଷରୁ ଅଧିକ ସମୟ ଧରି ଭାରତୀୟ ଫୁଟବଲ ମହାସଂଘର ଅଧ୍ୟକ୍ଷ ରହିପାରିବେ ନାହିଁ। କିନ୍ତୁ ପ୍ରଫୁଲ୍ଲ ପଟେଲ ୧୩ ବର୍ଷ ଧରି ଏଆଇଏଫଏଫର ଅଧ୍ୟକ୍ଷ ରହିଥିଲେ।

ପୁଣି ମୁକେଶ ଅମ୍ୱାନୀଙ୍କ ପରିବାରକୁ ଧମକ। ଦେଶର ବିଶିଷ୍ଟ ଶିଳ୍ପପତି ତଥା ରିଲାଏନ୍ସ ଇଣ୍ଡଷ୍ଟ୍ରିଜ୍ ର ଚେୟାରମ୍ୟାନ ମୁକେଶ ଅମ୍ୱାନୀ ଏବଂ ତାଙ୍କ ପରିବାରକୁ ୩ ଘଣ୍ଟାରେ ଶେଷ କରିଦେବୁ ବୋଲି ଧମକ ଦିଆଯାଇଛି। ରିଲାଏନ୍ସ ଫାଉଣ୍ଡସେନର ଡାକ୍ତରଖାନାକୁ ଏହି ଫୋନ କଲ ଆସିଥିବା ସୂଚନା ମିଳିଛି। ଥରେ କି ଦୁଇ ଥର ନୁହେଁ ୩ ଥର କଲ ଆସିଥିବା ଜଣାପଡିଛି। ଏହି ଘଟଣାକୁ ନେଇ ଡିବି ମାର୍ଗ ପୋଲିସ ଯାଞ୍ଚ ଆରମ୍ଭ କରିଛି। ଏହାସହ ହସପିଟାଲରେ ସୁରକ୍ଷା ମଧ୍ୟ ବୃଦ୍ଧି କରାଯାଇଛି। ଏହାପୂର୍ବରୁ ମଧ୍ୟ ଗତବର୍ଷ ଫେବ୍ରୁଆରୀରେ ଦେଶର ସବୁଠାରୁ ଧନୀ ଶିଳ୍ପପତି ମୁକେଶ ଅମ୍ୱାନୀଙ୍କ ଘର ବାହାରେ ଏକ ସନ୍ଦେହଜନକ କାର ମିଳିଥିଲା। ସେହି କାରରୁ ୨୦ଟି ବିସ୍ଫୋରକ ସାମଗ୍ରୀ ଜବତ କରାଯାଇଥିଲା। ୨୦୧୩ ମସିହାରେ ମୁକେଶ ହିଜବୁଲ ମୁଜାହିଦ୍ଦିନଙ୍କଠାରୁ ଧମକ ପାଇଥିଲେ। ଏହାପରେ ତାଙ୍କୁ ଜେଡ ପ୍ଲସ ସୁରକ୍ଷା ଯୋଗାଇ ଦିଆଯାଇଥିଲା।

• ସୌନ୍ଦର୍ଯ୍ୟା ମହାନ୍ତିଙ୍କ ରିପୋର୍ଟ

ନୂଆଦିଲ୍ଲୀ: ଆଜି ଦେଶ ପାଳୁଛି ୭୬ ତମ ସ୍ୱାଧୀନତା ଦିବସ। ଏହି ଅବସରରେ ସାରା ବିଶ୍ୱରୁ ଭାରତକୁ ଛୁଟିଛି ଶୁଭେଚ୍ଛାର ସୁଅ। ବିଭିନ୍ନ ଦେଶର ଅଗ୍ରଣୀ ନେତା ଭାରତକୁ ତାର ସ୍ୱାଧୀନତାର ୭୫ ବର୍ଷ ପୂର୍ତ୍ତି ଅବସରରେ ଦେଉଛନ୍ତି ଶୁଭ କାମନା। ଏହି ନେତାମାନଙ୍କ ମଧ୍ୟରେ ରହିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ, ଫ୍ରାନ୍ସ ରାଷ୍ଟ୍ରପତି ଇମେନୁଏଲ ମୌକ୍ରୋ ଓ ରୁଷ ରାଷ୍ଟ୍ରପତି ବ୍ଲାଦିମିର ପୁତିନ, ନେପାଳ ପ୍ରଧାନମନ୍ତ୍ରୀ ସେର ବାହାଦୂର ଦେଉବା।

ଭାରତକୁ ୭୬ ତମ ସ୍ୱତନ୍ତ୍ରତା ଦିବସ ପାଳନ ଅବସରରେ ଫ୍ରାନ୍ସ ରାଷ୍ଟ୍ରପତି ଇମେନୁଏଲ ମୈକ୍ରୌ ଶୁଭେଚ୍ଛା ଜଣାଇବା ସହ ଭାରତ ସହ ଦ୍ୱିପାକ୍ଷୀୟ ସମ୍ପର୍କକୁ ଆହୁରି ମଜବୁତ କରିବାକୁ କହିଛନ୍ତି। ସେତାଙ୍କ ଟ୍ୱିଟରେ ବିଗତ ୭୫ ବର୍ଷ ମଧ୍ୟରେ ଭାରତର ଆଶ୍ଚର୍ଯ୍ୟଜନକ ଉପଲବ୍ଧିର ପ୍ରଶଂସା କରିଛନ୍ତି। ସେ ଉଲ୍ଲେଖ କରିଛନ୍ତି କି, ପ୍ରିୟ ନରେନ୍ଦ୍ର ମୋଦ. ପ୍ରିୟ ଭାରତବାସୀ, ଆପଣମାନଙ୍କୁ ସ୍ୱାଧୀନତା ଦିବସରେ ଶୁଭେଚ୍ଛା। ଆପଣମାନେ ଫ୍ରାନ୍ସ ଉପରେ ଭରସା କରି ପାରନ୍ତି କି, ସେ ସର୍ବଦା ଆପଣଙ୍କ ସାଥିରେ ରହିବ।

ସେହିପରି ଆମେରିକା ରାଷ୍ଟ୍ରପତି ଜୋ ବାଇଡେନ ଭାରତକୁ ଶୁଭେଚ୍ଛା ଦେଇଛନ୍ତି। ବାଇଡେନ କହିଛନ୍ତି, ଭାରତୀୟ ଆମେରିକୀୟ ସମୁଦାୟ ଆମେରିକାକୁ ଏକ ଅଧିକ ସମାବେଶୀ ଓ ମଜବୁତ ରାଷ୍ଟ୍ର ରୂପେ ଠିଆ କରିଛି ଓ ଆଗାମୀ ବର୍ଷରେ ବୈଶ୍ୱିକ ଚ୍ୟାଲେଞ୍ଜର ସାମ୍ନା କରିବାକୁ ମିଳିତଭାବେ କାମ କରିବେ। ସେହିପରି ଆମେରିକାର ବିଦେଶ ମନ୍ତ୍ର ଏଣ୍ଟନି ବ୍ଲିଙ୍କେନ ମଧ୍ୟ ଭାରତବାସୀଙ୍କୁ ସ୍ୱତନ୍ତ୍ରତା ଦିବସର ଶୁଭ କାମନା ଜଣାଇଛନ୍ତି।

ଅନ୍ୟପଟେ ଋଷ ରାଷ୍ଟ୍ରପତି ବ୍ଲାଦିମିର ପୁତିନ ସୋମବାର ଦିତ ସ୍ୱାଧୀନତାର ୭୬ ବର୍ଷ ପୂରଣ ଅବସରରେ ଭାରତୀୟ ନେତୃତ୍ୱ ଓ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି। ସେ ତାଙ୍କ ଟ୍ୱିଟରେ ଭାରତର ବିକାଶ ଯାତ୍ରାର ବି ଉଲ୍ଲେଖ କରିଛନ୍ତି କି, ଭାରତ ଆର୍ଥିକ, ସାମାଜିକ, ବୈଜ୍ଞାନିକ, ବୈଷୟିକ ଜ୍ଞାନ ଓ ଅନ୍ୟ କ୍ଷେତ୍ରରେ ସାର୍ବଭୌମିକ ରୂପରେ ସଫଳତା ହାସଲ କରିଛି।

ନେପାଳର ପ୍ରଧାନମନ୍ତ୍ରୀ ସେର ବାହଦୂର ସ୍ୱାଧୀନତା ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଦେଶର ସମସ୍ତ ନାଗରିକଙ୍କୁ ହାର୍ଦ୍ଧିକ ଅଭିନନ୍ଦନ ଜଣାଇଛନ୍ତି।