islam

  • ହିଜାବ ମାମଲାରେ ଶୁଣାଣି କରିବେ ସର୍ବୋଚ୍ଚ ଅଦାଲତ

    ଆସନ୍ତା ସପ୍ତାହରେ ହିଜାବ ବିବାଦର ହେବ ଶୁଣାଣି। କର୍ଣ୍ଣାଟକ ଶିକ୍ଷାନୁଷ୍ଠାନରେ ହିଜାବ ପିନ୍ଧିବାକୁ ମାମଲାର ଶୁଣାଣି ଆସନ୍ତା ସପ୍ତାହରେ କରିବେ ବୋଲି କହିଛନ୍ତି ସୁପ୍ରିମକୋର୍ଟ। ବହୁଚର୍ଚ୍ଚିତ ହିଜାବ ମାମଲା । ହିଜାବ ନିଷିଦ୍ଧ ନେଇ କର୍ଣାଟକ ହାଇକୋର୍ଟଙ୍କ ରାୟ ବିରୋଧରେ ଦାୟର ପିଟସନ ଶୁଣାଣି ଲାଗି ସହମତି ପ୍ରକାଶ କରିଛନ୍ତି ସୁପ୍ରିମକୋର୍ଟ । ଆସନ୍ତା ସପ୍ତାହରେ ମାମଲା ର ଶୁଣାଣୀ ସର୍ବୋଚ୍ଚ ଅଦାଲତରେ ହେବ। ଗତ ମାର୍ଚ୍ଚ ୧୫ ରେ କର୍ଣାଟକ ହୋଇକୋର୍ଟ ଦର୍ଶାଇଥିଲେ ଇସଲାମ ଧର୍ମରେ ହିଜାବ ଅନିବାର୍ଯ୍ୟ୍ ନୁହେଁ ।

    ପ୍ରଧାନ ବିଚାରପତି ଏନଭି ରମଣାଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣୀ ଲାଗି ସହମତି ପ୍ରକାଶ କରିଛନ୍ତି lବୁଧବାର ଦିନ ବିଚାରପତି ଏନଭି ରମନା ଏବଂ କୃଷ୍ଣ ମୁରାରୀଙ୍କ ଖଣ୍ଡପୀଠ ଓକିଲ ଦେଇଥିବା ଦସ୍ତାବିଜ ଉପରେ କହିଛନ୍ତି। ତେବେ ଏହାକୁ ନେଇ ଛାତ୍ରଛାତ୍ରୀଙ୍କ ପାଠପଢା ନଷ୍ଟ ହେଉଥିବା ଦର୍ଶାଇ ତୁରନ୍ତ ବିଚାର କରିବାକୁ କୋର୍ଟଙ୍କୁ ନିବେଦନ କରିଛନ୍ତି ଆବେଦନକାରୀଙ୍କ ଓକିଲ ପ୍ରଶାନ୍ତ ଭୂଷଣ। ମାମଲାର ଯାଚିକା ଗତ ମାର୍ଚ୍ଚ ୧୫ରେ ଦାଖଲ ହୋଇଥିଲା ବେଳେ କିନ୍ତୁ ବହୁ ସମୟ ବିତି ଯାଇଥିଲେ ମଧ୍ୟ ଶୁଣାଣି ହୋଇନାହିଁ। ଏନେଇ ଆସନ୍ତା ସପ୍ତାହରେ ଶୁଣାଣି କରିବା ପାଇଁ ଅନୁରୋଧ କରାଯାଇଛି।

    • ସ୍ମରଜିତ୍ ଆର୍ଯ୍ୟ ଏବଂ ସୌନ୍ଦର୍ଯ୍ୟା ମହାନ୍ତିଙ୍କ ରିପୋର୍ଟ
  • ଯାହା ଇଛା ତାହା କହିବାକୁ ତୁମକୁ ଲାଇସେନ୍ସ ଦେଲା କିଏ ?

    ପ୍ରଫେଟ ମହମ୍ମଦଙ୍କ ଉପରେ ଦେଇଥିବା ଆପତ୍ତିଜନକ ମନ୍ତବ୍ୟକୁ ନେଇ ନୁପୁର ଶର୍ମାଙ୍କ ଉପରେ ବର୍ଷିଛନ୍ତି ସର୍ବୋଚ୍ଚ ଅଦାଲତ। ଗୋଟିଏ ଦଳର ମୁଖପାତ୍ର ଅଛ। କିନ୍ତୁ ଯାହା ଇଛା ତାହା କହିବାକୁ ତୁମକୁ ଲାଇସେନ୍ସ ଦେଲା କିଏ ବୋଲି କଡ଼ା ଭର୍ତ୍ସନା କରିଛନ୍ତି ସୁପ୍ରିମକୋର୍ଟ। ନୁପୁର ଦେଶର ନିରାପତ୍ତା ପାଇଁ ବିପଦ। ସେଥିଲାଗି ସାରା ଦେଶକୁ କ୍ଷମା ମାଗନ୍ତୁ ବୋଲି ନିର୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ। ମହଙ୍ଗା ପଡ଼ିଲା ବିବାଦୀୟ ମନ୍ତବ୍ୟ। ମହମ୍ମଦ ପ୍ରଫେଟଙ୍କ ଉପରେ ଦେଇଥିବା ଆପତ୍ତିଜନକ ମନ୍ତବ୍ୟ ଲାଗି ବିଜେପି ନେତ୍ରୀ ନୁପୁର ଶର୍ମାଙ୍କୁ କଡ଼ା ଭାଷାରେ ଭର୍ତ୍ସନା କରିଛନ୍ତି ସର୍ବୋଚ୍ଚ ଅଦାଲତ। ନୁପୁର ଦେଶର ନିରାପତ୍ତା ଲାଗି ବିପଦ। ନୁପୁରଙ୍କ ଟିପ୍ପଣୀ ଉତ୍ତେଜକ ଥିଲା। ଏହି ଟିପ୍ପଣୀ ପାଇଁ ଆଜି ସାରା ଦେଶ ଜଳୁଛି। ଉଦୟପୁର ଘଟଣା ପାଇଁ ବି ନୁପୁର ଦାୟୀ। ସେଥିଲାଗି ଦେଶବାସୀଙ୍କୁ କ୍ଷମା ମାଗ ବୋଲି ନିର୍ଦେଶ ଦେଇଛନ୍ତି ସୁପ୍ରିମକୋର୍ଟ। ଗୋଟିଏ ଦଳର ମୁଖପାତ୍ର ଅଛ। କିନ୍ତୁ ଯାହା ଇଛା ତାହା କହିବାକୁ କଅଣ ମୁଖପାତ୍ର ଭାବରେ ଦଳ ଲାଇସେନ୍ସ ଦେଇଛି କି ବୋଲି ପଚାରିଥିଲେ ଅଦାଲତ।

    ମାମଲା ବିଚାରାଧୀନ ଥିଲା ବେଳେ ଟେଲିଭିଜନ ବିତର୍କରେ ବସି ଆଲୋଚନା କରିବା କଅଣ ଦରକାର ଥିଲା। ବୋଧହୁଏ କେବଳ ଏକ ଏଜେଣ୍ଡାକୁ ପ୍ରମୋଟ କରିବା ଉଦେଶ୍ୟ ଥିଲା। ଟେଲିଭିଜନ ମାଧ୍ୟମରେ ହିଁ କ୍ଷମା ମାଗନ୍ତୁ ନୁପୁର। ଯଦିଓ ବିତର୍କରେ କୌଣସି ପ୍ରତିପକ୍ଷର ଦୁର୍ବ୍ୟବହାର, ଅପବ୍ୟବହାର କି ଅଶାଳୀନ ମନ୍ତବ୍ୟ ଦେଖିଥିଲେ, ତେବେ ସେ ସର୍ବପ୍ରଥମେ ଆଙ୍କର ବିରୁଦ୍ଧରେ ଏତଲା ଦେବାର ଥିଲା। ପ୍ରଫେଟଙ୍କ ବିରୁଦ୍ଧରେ ଦେଇଥିବା ମନ୍ତବ୍ୟ ଲାଗି ତାଙ୍କ ନାଁରେ ହୋଇଥିବା ଏକାଧିକ ଏତଲାକୁ ଗୋଟିଏରେ କ୍ଲବ୍ କରିବାକୁ କରିଥିବା ଆବେଦନର ଶୁଣାଣୀ କରି ଏଭଳି କଡ଼ା ଭାଷାରେ ନୁପୁରଙ୍କ ଉପରେ ବର୍ଷିଛନ୍ତି ଅଦାଲତ। ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଜେବି ପର୍ଦ୍ଦିଓ୍ୱାଲାଙ୍କ ଖଣ୍ଡପୀଠ ଏହା ବି ହୃଦବୋଧ କରିଛନ୍ତି କି, ନାମକୁ ମାତ୍ର ସର୍ତ୍ତ ରଖି କ୍ଷମା ମାଗିଥିବାରୁ ଏହା ଲୋକଙ୍କ ରୋଷ ଅଧିକ ବଢାଇ ଦେଇଥିଲା। ମନ୍ତବ୍ୟକୁ ନେଇ ଯେଉଁ ନିଆଁ ଜଳୁଛି, ଆଜି ଦେଶରେ ଯାହା ବି ଘଟୁଛି, ନୁପୁର ଏକା ହିଁ ଦାୟୀ। ତେବେ ନୁପୁରଙ୍କ ଓକିଲ ମନିନ୍ଦର ସିଂ କୋର୍ଟକୁ କହିଥିଲେ କି, ନୁପୁର ଲିଖିତ ଭାବରେ କ୍ଷମାପ୍ରାର୍ଥନା କରିବାକୁ ରାଜି। କିନ୍ତୁ ଖଣ୍ଡପୀଠ କହିଥିଲେ କି, ସେ ଟିଭି ମାଧ୍ୟମରେ ପୁରା ଦେଶକୁ କ୍ଷମା ମାଗନ୍ତୁ। ବହୁତ ବିଳମ୍ୱ ହୋଇଗଲାଣି। ଭାବାବେଗ ସହ ଖେଳି ଏଭଳି ମନ୍ତବ୍ୟକୁ ପ୍ରତ୍ୟାହାର କି କ୍ଷମା ମାଗିଲା ବେଳକୁ ସର୍ତ୍ତ ଖଞ୍ଜିବା ବିଲକୁଲ ଗ୍ରହଣୀୟ ନଥିଲା। କେବଳ ଏତିକି ନୁହେଁ। ତଳ କୋର୍ଟକୁ ଏଡାଇ ସିଧା ସର୍ବୋଚ୍ଚ ଅଦାଲତର ଦ୍ୱାରସ୍ଥ ହେବାକୁ ବି ନାପସନ୍ଦ କରିଛନ୍ତି ଖଣ୍ଡପୀଠ।

    ବୋଧହୁଏ ଆବେଦନକାରୀ ନୁପୁର ନିଜର ଉଦ୍ଧତପଣିଆ ଲାଗି ତଳ କୋର୍ଟର ମାଜିଷ୍ଟ୍ରେଟଙ୍କୁ ଛୋଟ ବୋଲି ମଣୁଛନ୍ତି। ମେ ୨୭ରେ ଏକ ଟିଭି ଡିବେଟରେ ଜ୍ଞାନବାପି ମସଜିଦ୍ ପ୍ରସଙ୍ଗରେ ପ୍ରଫେଟ ମହମ୍ମଦଙ୍କ ବିରୁଦ୍ଧରେ ଆପତ୍ତିଜନକ ମନ୍ତବ୍ୟ ଦେଇଥିଲେ ନୁପୁର। ଏହାକୁ ନେଇ ନୁପୁରଙ୍କ ବିରୁଦ୍ଧରେ ଏକାଧିକ ଏତଲା ରୁଜୁ ହୋଇଥିଲା। ଆଉ ଆଜି ସୁପ୍ରିମକୋର୍ଟ ହୃଦବୋଧ କରିଛନ୍ତି କି, ମାମଲା ବିଚାରାଧୀନ ଥିଲା ବେଳେ ସଂପୃକ୍ତ ଚ୍ୟାନେଲ କାହିଁକି ଏଭଳି ଆଲୋଚନା କରିଥିଲା। କେବଳ ନିର୍ଦ୍ଦିଷ୍ଟ ଏଜେଣ୍ଡାକୁ ପ୍ରୋମୋଟ କରିବା ଅଭିପ୍ରାୟ ଥିଲା। ତେବେ ନୁପୁରଙ୍କ ଓକିଲ ଦର୍ଶାଇଥିଲେ କି, ଅର୍ଣ୍ଣବ ଗୋସ୍ୱାମୀ ମାମଲାରେ ଏକାଧିକ ଏତଲାକୁ କ୍ଲବ୍ କରି ଶୁଣାଣୀ ହୋଇଥିଲା। କିନ୍ତୁ ଜଷ୍ଟିସ କାନ୍ତ କହିଥିଲେ କି, ଜଣେ ସାମ୍ୱାଦିକ ଓ ମୁଖପାତ୍ର ଭିତରେ ଫରକ ଅଛି। ନିର୍ଦିଷ୍ଟ ପ୍ରସଙ୍ଗରେ ଜଣେ ସାମ୍ୱାଦିକ କହିବାର ଅଧିକାର ରଖିଥାଏ। କିନ୍ତୁ ବିତର୍କରେ ଜଣେ ମୁଖପାତ୍ର କାହାକୁ ଆକ୍ଷେପ କରି ନିଜର ଦାୟିତ୍ୱହୀନ ମନ୍ତବ୍ୟ ଦେବା କେତେଦୂର ସମୀଚିନ। ଆଉ ଶେଷରେ ନୁପୁରଙ୍କ ଆବେଦନର ଶୁଣାଣୀ ହାଇକୋର୍ଟରେ ହେବ କହି ହାଇକୋର୍ଟର ଦ୍ୱାରସ୍ଥ ହେବାକୁ ନିର୍ଦେଶ ଦେଇଛନ୍ତି ସୁପ୍ରିମକୋର୍ଟ। ମୁମ୍ୱାଇ, ହାଇଦ୍ରାବାଦ ଓ ଶ୍ରୀନଗରରେ ନୁପୁରଙ୍କ ବିରୁଦ୍ଧରେ ଏତଲା ହୋଇଛି। କୋଲକାତା ହାଇକୋର୍ଟ ବି ନୁପୁରଙ୍କ ବିରୁଦ୍ଧରେ ଅପରାଧିକ ମାମଲା ରୁଜୁ ଆବେଦନ ଉପରେ ରାଜ୍ୟ ସରକାରଙ୍କଠୁ ଜବାବ ଲୋଡିଛନ୍ତି।

    • ପ୍ରଦୀପ ନାୟକଙ୍କ ରିପୋର୍ଟ
  • ବାହାରେନରେ ନିର୍ମିତ ହେବ ହିନ୍ଦୁ ମନ୍ଦିର

    ଭାରତ ପାଇଁ ଖୁସି ଖବର। ୟୁଏଇ ପରେ ମୁସଲିମ ଦେଶରେ ନିର୍ମାଣ ହେବ ବିଶାଳ ହିନ୍ଦୁ ମନ୍ଦିର। ଏନେଇ ରାଜ ପରିବାର ମନ୍ଦିର ନିର୍ମାଣ ପାଇଁ ଜମି ପ୍ରଦାନ କରିଛନ୍ତି। ବାହାରିନରେ ନିର୍ମିତ ହେବ ହିନ୍ଦୁ ମନ୍ଦିର। ୟୁଏଇ ପରେ ମୁସଲମାନ ଦେଶ ବାହାରିନରେ ଖୁବଶୀଘ୍ର ଏକ ହିନ୍ଦୁ ମନ୍ଦିର ନିର୍ମାଣ ହେବ। ଏଥିପାଇଁ ପ୍ରସ୍ତୁତି ଜୋରଦାର ଚାଲିଛି। ତେବେ ନିର୍ମାଣ ହେବାକୁ ଥିବା ମନ୍ଦିରଟି ଅତିକମରେ ଏକ ହଜାର ବର୍ଷ ପୁରୁଣା ପରି ମନେ ହେବ ବୋଲି ଇଞ୍ଜିନିୟରମାନେ ଦାବି କରିଛନ୍ତି। ବାହାରିନ ରାଜଧାନୀ ମାନାମାରେ ବହରିନର କ୍ରାଉନପ୍ରିନ୍ସ ତଥା ପ୍ରଧାନମନ୍ତ୍ରୀ ସଲମାନ ବିନ ହମାଦ ଅଲ ଖଲ୍ଲିଫା ସ୍ବାମୀ ବ୍ରହ୍ମାବିହାରି ଦାସ ଏବଂ ସ୍ବାମୀ ନାରାୟଣ ସନ୍ଥର ଏକ ପ୍ରତିନିଧିମଣ୍ଡଳ ସହ ଭେଟିଥିଲେ। ସ୍ୱାମୀ ନାରାୟଣଙ୍କ ସହ ହିନ୍ଦୁ ମନ୍ଦିର ନିର୍ମାଣକୁ ନେଇ ଆଲୋଚନା କରାଯାଇଛି। ଭାରତୀୟ ରାଷ୍ଟ୍ରଦୂତ ପୀୟୁଷ ଶ୍ରୀବାସ୍ତବ ମଧ୍ୟ ଏଥିରେ ଭାଗ ନେଇଥିଲେ। ବାହାରିନର କ୍ରାଉନପ୍ରିନ୍ସ ଫେବ୍ରୁଆରୀ ୧ରେ ମନ୍ଦିର ପାଇଁ ଜମି ଦାନ କରିଥିଲେ। ବାହାରିନରେ ମନ୍ଦିର ନିର୍ମାଣକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ହୃଦୟରୁ ସ୍ବାଗତ କରିବା ସହ ବିଶ୍ୱ ଆଧ୍ୟାତ୍ମିକ ନେତା ମହନ୍ତ ସ୍ବାମୀ ମହାରାଜଙ୍କୁ ଶୁଭେଚ୍ଛା ଜଣାଇଛନ୍ତି।

    ତେବେ ମନ୍ଦିର ନିର୍ମାଣ ପାଇଁ ସେମାନଙ୍କ ଆଲୋଚନା ପରେ ସ୍ୱାମୀ ବ୍ରହ୍ମବିହାରୀ ଦାସ କହିଛନ୍ତି ଯେ, ବାହାରିନରେ ଏହି ମନ୍ଦିର ସବୁ ଧର୍ମର ଲୋକଙ୍କ ପାଇଁ ନିର୍ମିତ ହେବ । ଯେଉଁମାନେ ଭାରତୀୟ ସଂସ୍କୃତି, ପରମ୍ପରାକୁ ଜାଣିବାକୁ ଏବଂ ବୁଝବାକୁ ଚାହିଁବେ , ସେମାନେ ମନ୍ଦିରରେ ବିଭିନ୍ନ ସାଂସ୍କୃତିକ ଏବଂ ଆଧ୍ୟାତ୍ମିକ କାର୍ଯ୍ୟକଳାପ ଅନୁଧ୍ୟାନ କରିପାରିବେ। ଏହାସହ ବାହାରିନ କ୍ରାଉନପ୍ରିନ୍ସ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଜ୍ଞାପନ କରିଛନ୍ତି। ସେପଟେ ମନ୍ଦିର ନିର୍ମାଣ ହେଲେ ଦୁଇ ଦେଶ ମଧ୍ୟରେ ଉତ୍ତମ ସମ୍ପର୍କ ସ୍ଥାପନ ହେବା ସହ ଭାବର ଆଦାନ ପ୍ରଦାନ କ୍ଷେତ୍ରରେ ଅଧିକ ସହାୟକ ହେବ ବୋଲି ଆଶା କରାଯାଉଛି। ସେପଟେ ସଂଯୁକ୍ତ ଆରବ ଏମିରାଟରେ ଏକ ରାମ ମନ୍ଦିର ମଧ୍ୟ ନିର୍ମାଣ କରାଯାଉଛି। ଏହାସହ ଏହି ମନ୍ଦିରରେ ଅତିକମରେ ୧ ହଜାର ବର୍ଷରୁ ଅଧିକ ପରି ମନେ ହେବ ବୋଲି ଗତବର୍ଷ ଦାବି କରାଯାଇଥିଲା। ବହୁ ସଂଖ୍ୟାରେ ଇଞ୍ଜିନିୟର ଏହି ମନ୍ଦିର ତିଆରିରେ ଲାଗି ପଡିଛନ୍ତି। ଏହାସହ ମନ୍ଦିରର କାମ ଶେଷ ହୋଇଥିବା ବେଳେ, ଯେତବେଳେ ଭାରତର କାରିଗର ଆସିବେ ସେମାନେ ଗୋଲାପୀ ବାଲୁକା ପଥର ସ୍ଥାପନ କାର୍ଯ୍ୟ କରିବେ।

    • ସୌନ୍ଦର୍ଯ୍ୟା ମହାନ୍ତିଙ୍କ ରିପୋର୍ଟ
Back to top button