suprem court

  • рмЖрмЗрмПрмПрм╕ рмЕрмзрм┐рмХрм╛рм░рнА рмкрнВрмЬрм╛ рм╕рм┐рмВрмШрм▓рмЩрнНрмХрнБ рм╕рм░рнНрмдрнНрмдрморнВрм│рмХ рмЬрм╛рморм┐рми рмормЮрнНрмЬрнБрм░

    рмирнВрмЖрмжрм┐рм▓рнНрм▓рнА: рмЬрнЗрм▓рм░рнЗ рмерм┐рммрм╛ рмирм┐рм▓рморнНрммрм┐рмд рмЖрмЗрмПрмПрм╕ рмЕрмзрм┐рмХрм╛рм░рнА рмкрнВрмЬрм╛ рм╕рм┐рмВрмШрм▓рмЩрнНтАМрмХрнБ рм╕рнБрмкрнНрм░рм┐рмормХрнЛрм░рнНрмЯ рмормЩрнНрмЧрм│рммрм╛рм░ рмжрм┐рми рмПрмХ рморм╛рм╕рм░ рмЕрмирнНрмдрм░рнАрмг рмЬрм╛рморм┐рми рмкрнНрм░рмжрм╛рми рмХрм░рм┐рмЫрмирнНрмдрм┐ред рмкрнВрмЬрм╛рмЩрнНрмХ рмЭрм┐рмЕ рмЕрм╕рнБрм╕рнНрме рмерм┐рммрм╛рм░рнБ рм╕рнЗ рмЭрм┐рмЕрм░ рмпрмдрнНрми рмирнЗрммрм╛рмХрнБ рмЬрм╛рморм┐рми рмЖрммрнЗрмжрми рмХрм░рм┐рмерм┐рм▓рнЗред

    рмЬрм╖рнНрмЯрм┐рм╕ рм╕рмЮрнНрмЬрнЯ рмХрм┐рм╖рми рмХрнМрм▓ рмУ рмЕрмнрнЯ рмУрмХрм╛рмЩрнНрмХрнБ рмирнЗрмЗ рмЧрмарм┐рмд рмЦрмгрнНрмбрмкрнАрма  рмкрнВрмЬрм╛рмЩрнНрмХрнБ рм╕рм░рнНрмдрморнВрм│рмХ рмПрмХ рморм╛рм╕рм░ рмЕрмирнНрмдрм░рнАрмг рмЬрм╛рморм┐рми  рмкрнНрм░рмжрм╛рми рмХрм░рм┐рмЫрмирнНрмдрм┐ред рмдрм╛рмЩрнНрмХрнБ рмХрнЛрм░рнНрмЯрм░рнЗ рм╢рнБрмгрм╛рмгрм┐ рми рмерм┐рм▓рнЗ рм░рм╛рмЮрнНрмЪрм┐ рмпрм┐рммрм╛рмХрнБ рмормирм╛ рмХрм░рм╛рмпрм╛рмЗрмЫрм┐ред рмкрнВрмЬрм╛ рм╕рм┐рмЩрнНрмШрм▓ рморм╛рморм▓рм╛рм░ рм╢рнБрмгрм╛рмгрм┐ рмлрнЗрммрнГрмЖрм░рнА рнмрм░рнЗ рмХрм░рм┐рммрм╛рмХрнБ рмХрнЛрм░рнНрмЯ рмПрм╣рм╛рмХрнБ рм╕рнВрмЪрм┐рммрмжрнНрмз рмХрм░рм┐рммрм╛ рм╕рм╣ рмЗрмбрм┐рмХрнБ рмдрм╛рмЩрнНрмХ рмЬрм╛рморм┐рми рмЙрмкрм░рнЗ рмдрм┐рмирм┐ рм╕рмкрнНрмдрм╛рм╣ рмнрм┐рмдрм░рнЗ рм░рм┐рмкрнЛрм░рнНрмЯ рм░рмЦрм┐рммрм╛рмХрнБ рмХрм╣рм┐рмЫрмирнНрмдрм┐ред

    рмкрнВрм░рнНрммрм░рнБ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ рмкрнВрм░рнНрммрмдрми рмЭрм╛рм░рмЦрмгрнНрмб рмЦрмгрм┐ рм╕рмЪрм┐рмм рмкрнВрмЬрм╛ рм╕рм┐рмЩрнНрмЧрм▓ рмЬрм╛рморм┐рми рмпрм╛рмЪрм┐рмХрм╛ рмЙрмкрм░рнЗ рмЗрмбрм┐рмХрнБ рмирнЛрмЯрм┐рм╕ рмХрм░рм┐рмерм┐рм▓рнЗред рмкрнВрмЬрм╛рмЩрнНрмХрнБ рмЗрмбрм┐ рмормирм┐ рм▓рмгрнНрмбрм░рм┐рмВ, рмПрмормЬрм┐рмПрмирмЖрм░рмЗрмЬрм┐рмП рмУ рмЕрмирнНрнЯрм╛рмирнНрнЯ рмШрнЛрмЯрм╛рм▓рм╛рм░рнЗ рмдрмжрмирнНрмд рмХрм░рнБрмЫрм┐ред

    рм╕рм┐рмВрмШрм▓ рм╕рнБрмкрнНрм░рм┐рмормХрнЛрм░рнНрмЯрм░рнЗ рмПрмХ рмЬрм╛рморм┐рми рмЖрммрнЗрмжрми рмХрм░рм┐рмерм┐рм▓рнЗ, рмпрнЗрмЙрмБрмерм┐рм░рнЗ рм╕рнЗ рмЙрм▓рнНрм▓рнЗрмЦ рмХрм░рм┐рмерм┐рм▓рнЗ рмХрм┐, рмдрм╛рмЩрнНрмХ рмЭрм┐рмЕ рмЕрм╕рнБрм╕рнНрме рмЕрмЫрм┐ рмУ рмдрм╛рм░ рмжрнЗрмЦрм╛рм╢рнБрмгрм╛ рмкрм╛рмЗрмБ рмдрм╛рмЩрнНрмХрнБ рмЬрм╛рморм┐рми рморм┐рм│рнБред рмдрнЗрмгрнБ рмдрмжрмирнНрмдрмХрм╛рм░рнА рмжрм│рмХрнБ рмкрнВрмЬрм╛рмЩрнНрмХ рмЭрм┐рмЕрм░ рм╕рнНрммрм╛рм╕рнНрмернНрнЯрм╛рммрм╕рнНрмерм╛ рм╕рморнНрмкрм░рнНрмХрм░рнЗ рмпрм╛рмЮрнНрмЪ рмХрм░рм┐ рмдрмернНрнЯ рм░рмЦрм┐рммрм╛рмХрнБ рмХрнБрм╣рм╛рмпрм╛рмЗрмерм┐рм▓рм╛ред

    рнирнжрнирни рморнЗ рнзрнз рмдрм╛рм░рм┐рмЦрм░рнБ рм╕рнЗ рммрм┐рмнрм┐рмирнНрми рмШрнЛрмЯрм╛рм▓рм╛рм░рнЗ рммрмирнНрмжрнА рм░рм╣рм┐рмЖрм╕рнБрмЫрмирнНрмдрм┐ред рмдрм╛рмЩрнНрмХ рммрм┐рм░рнЛрмзрм░рнЗ рнйрнм рмХрнЛрмЯрм┐рм░ рмШрнЛрмЯрм╛рм▓рм╛ рм░рм╣рм┐рмЫрм┐ред

  • рмЬрм╖рнНрмЯрм┐рм╕ рмЪрмирнНрмжрнНрм░рмЪрнВрмб рмнрм╛рмЩрнНрмЧрм┐рмжрнЗрм▓рнЗ рм╕рнБрмкрнНрм░рм┐рмормХрнЛрм░рнНрмЯрм░ рм╕рммрнБ рм░рнЗрмХрм░рнНрмб

    рмирнВрмЖрмжрм┐рм▓рнНрм▓рнА: рмжрнЗрм╢рм░ рмЖрмЧрм╛рморнА рморнБрмЦрнНрнЯ рммрм┐рмЪрм╛рм░рмкрмдрм┐ рмЬрм╖рнНрмЯрм┐рм╕ рмбрм┐ рн▒рм╛рмЗ рмЪрмирнНрмжрнНрм░рмЪрнВрмб рмУ рмЬрм╖рнНрмЯрм┐рм╕ рм╣рм┐рморм╛ рмХрнЛрм╣рм▓рм┐рмЩрнНрмХ рмЦрмгрнНрмбрмкрнАрма рм╢рнБрмХрнНрм░рммрм╛рм░ рм╕рнБрмкрнНрм░рм┐рмормХрнЛрм░рнНрмЯрм░ рм╕рморм╕рнНрмд рм░рнЗрмХрм░рнНрмб рмнрм╛рмЩрнНрмЧрм┐ рмжрнЗрмЗрмЫрмирнНрмдрм┐ред рмкрнАрма рм╢рнБрмХрнНрм░рммрм╛рм░ рм░рм╛рмдрм┐ рмкрнНрм░рм╛рнЯ рнпрмЯрм╛ рмпрм╛рмПрмБ рм╢рнБрмгрм╛рмгрм┐ рмХрм░рм┐рмЫрмирнНрмдрм┐ред рмЧрнЛрмЯрм┐рмП рмжрм┐рмирм░рнЗ рннрнлрмЯрм┐ рморм╛рморм▓рм╛рм░ рм╢рнБрмгрм╛рмгрм┐ рмХрм░рм┐рмЫрмирнНрмдрм┐ рмПрм╣рм┐ рмЦрмгрнНрмбрмкрнАрмаред

    рм╕рм╛рмзрм╛рм░рмгрмдрмГ рм╕рнБрмкрнНрм░рм┐рмо рмХрнЛрм░рнНрмЯ рм╕рмВрмзрнНрнЯрм╛ рмЪрм╛рм░рм┐рмЯрм╛ рмХрм┐ рмкрм╛рмЮрнНрмЪрмЯрм╛ рмпрм╛рмП рмЪрм╛рм▓рм┐рмерм╛рмПред рмХрм┐рмирнНрмдрнБ рмЖрмЧрмХрнБ рммрм┐рмЬрнЯрм╛ рмжрм╢рморнА рмУ рмжрнБрм░рнНрмЧрм╛рмкрнВрмЬрм╛ рмЫрнБрмЯрм┐ рмерм┐рммрм╛рм░рнБ рмЫрнБрмЯрм┐ рмкрнВрм░рнНрммрм░рнБ рмЬрм╖рнНрмЯрм┐рм╕ рмЪрмирнНрмжрнНрм░рмЪрнВрмб рмУ рмЬрм╖рнНрмЯрм┐рм╕ рмХрнЛрм╣рм▓рм┐рмЩрнНрмХ рмЦрмгрнНрмбрмкрнАрма рмХрнЛрм░рнНрмЯрм░ рмжрнЗрм╢ рмжрм┐рми рм╢рнБрмХрнНрм░рммрм╛рм░ рмерм┐рммрм╛рм░рнБ рм░рм╛рмдрм┐ рнп.рнзрнж рмкрм░рнНрмпрнНрнЯрмирнНрмд рм╢рнБрмгрм╛рмгрм┐ рмХрм░рм┐рмЫрмирнНрмдрм┐ред рморнЛрмЯ рнзрнж рмШрмгрнНрмЯрм╛ рмУ рнкрнж рморм┐рмирм┐рмЯ рмзрм░рм┐ рмЦрмгрнНрмбрмкрнАрмВ рм╢рнБрмгрм╛рмгрм┐ рмХрм░рм┐рмЫрмирнНрмдрм┐ред

    рм╢рнБрмгрм╛рмгрм┐ рмкрм░рнЗ рмЬрм╖рнНрмЯрм┐рм╕ рмЪрмирнНрмжрнНрм░рмЪрнВрмб рм╕рморм╕рнНрмд рмХрм░рнНрмормЪрм╛рм░рнАрмЩрнНрмХрнБ рмзрмирнНрнЯрммрм╛рмж рмжрнЗрмЗрмЫрмирнНрмдрм┐ред рмЖрмЧрмХрнБ рмЫрнБрмЯрм┐ рмерм┐рммрм╛рм░рнБ рморм╛рморм▓рм╛ рмЕрмирнНрнЯ рмдрм╛рм░рм┐рмЦрмХрнБ рмШрнБрмЮрнНрмЪрм┐ рмерм╛рмирнНрмдрм╛, рмпрм╛рм╣рм╛ рмкрм╛рмЗрмБ рм▓рнЛрмХрмЩрнНрмХрнБ рмПрмХ рм▓рморнНрммрм╛ рм╕рморнЯ рмкрм░рнНрмпрнНрнЯрмирнНрмд рмЕрмкрнЗрмХрнНрм╖рм╛ рмХрм░рм┐рммрм╛рмХрнБ рм╣рнЗрммред рмХрнЛрм░рнНрмЯрм░рнЗ рмкрмбрм┐ рм░рм╣рм┐рмерм┐рммрм╛ рморм╛рморм▓рм╛рм░ рмдрнНрммрм░рм┐рмд рм╕рморм╛рмзрм╛рми рмжрм┐рмЧрм░рнЗ рморнБрмЦрнНрнЯ рммрм┐рмЪрм╛рм░ рмкрмдрм┐ рмЬрм╖рнНрмЯрм┐рм╕ рнЯрнБ рнЯрнБ рм▓рм▓рм┐рмдрмЩрнНрмХ рмЖрм╣рнНрммрм╛рми рмкрм░рнЗ рмЬрм╖рнНрмЯрм┐рм╕ рмЪрмирнНрмжрнНрм░рмЪрнВрмб рмормзрнНрнЯ рммрм┐рм│рморнНрммрм┐рмд рм╕рморнЯ рмкрм░рнНрмпрнНрнЯрмирнНрмд рм╢рнБрмгрм╛рмгрм┐ рмХрм░рм┐рмЫрмирнНрмдрм┐ред

    рмЬрм╖рнНрмЯрм┐рм╕ рм▓рм▓рм┐рмд рмЬрнБрм▓рм╛рмЗрм░рнЗ рмХрнЛрм░рнНрмЯ рмХрм╛рм░рнНрмпрнНрнЯ рм╕рмХрм╛рм│рнБ рмЖрм░рморнНрмн рмХрм░рм┐рммрм╛рмХрнБ рмпрнБрмХрнНрмдрм┐ рммрм╛рмврм┐рмерм┐рм▓рнЗред рм▓рм▓рм┐рмд рм╕рнЗрмдрнЗрммрнЗрм│рнЗ рмХрм╣рм┐рмерм┐рм▓рнЗ, рмпрмжрм┐ рмкрм┐рм▓рм╛рморм╛рмирнЗ рм╕рнНрмХрнБрм▓ рмпрм┐рммрм╛рмХрнБ рм╕рмХрм╛рм│рнБ рмЙрмарм┐рмкрм╛рм░рм┐рммрнЗ рмдрнЗрммрнЗ рмЖрморнЗ рмХрнЛрм░рнНрмЯрмХрнБ рмХрм╛рм╣рм┐рмБ рм╢рнАрмШрнНрм░ рмЖрм╕рм┐ рмкрм╛рм░рм┐рммрм╛ рмирм╛рм╣рм┐рмБред

  • рмормХрмжрморм╛рммрм╛рмЬрм┐ рмХрнМрмгрм╕рм┐ рм╕рнМрмХ рм╣рнЛрмЗ рми рмкрм╛рм░рнЗ: рм╕рнБрмкрнНрм░рм┐рмо рмХрнЛрм░рнНрмЯ

    рмирнВрмЖрмжрм┐рм▓рнНрм▓рнА: рм░рм╛рмЬрмирнИрмдрм┐рмХ рмжрм│рмЧрнБрмбрм┐рмХ рмжрнНрммрм╛рм░рм╛ рмЖрм░рмХрнНрм╖рм┐рмд рмирм┐рм░рнНрммрм╛рмЪрми рмЪрм┐рм╣рнНрми рммрмжрм│рм╛рмЗрммрм╛рмХрнБ рм╣рнЛрмЗрмерм┐рммрм╛ рмпрм╛рмЪрм┐рмХрм╛рм░рнЗ рм╕рнБрмкрнНрм░рм┐рмо рмХрнЛрм░рнНрмЯ рм╕рнЛрморммрм╛рм░ рм╢рнБрмгрм╛рмгрм┐ рмХрм░рм┐рмЫрмирнНрмдрм┐ред рмХрнЛрм░рнНрмЯ рмпрм╛рмЪрм┐рмХрм╛рм░ рм╢рнБрмгрм╛рмгрм┐ рмХрм░рм┐ рмПрм╣рм╛ рмЙрмкрм░рнЗ рмЬрм░рм┐рморм╛рмирм╛ рмХрм░рм┐рммрм╛ рм╕рм╣ рмПрм╣рм╛рмХрнБ рмЦрм╛рм░рмЬ рмХрм░рм┐рмжрнЗрмЗрмЫрмирнНрмдрм┐ред рмпрм╛рмЪрм┐рмХрм╛ рмХрм░рнНрмдрнНрмдрм╛рмЩрнНрмХрнБ рнирнл рм╣рмЬрм╛рм░ рмЯрмЩрнНрмХрм╛рм░ рмЬрм░рм┐рморм╛рмирм╛ рмХрм░рм┐рмЫрмирнНрмдрм┐ рмХрнЛрм░рнНрмЯред

    рмЬрм╖рнНрмЯрм┐рм╕ рм╕рмЮрнНрмЬрнЯ рмХрм┐рм╢рми рмХрнМрм▓рмЩрнНрмХ рмЦрмгрнНрмбрмкрнАрма рмХрм╣рм┐рмЫрмирнНрмдрм┐, рмормХрмжрморм╛рммрм╛рмЬрм┐ рмХрнМрмгрм╕рм┐ рм╕рнМрмХ рм╣рнЛрмЗ рми рмкрм╛рм░рнЗред рм▓рнЛрмХрм╕рмнрм╛ рмУ рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрмирм░рнЗ рмкрнНрм░рмдрм┐ рмерм░ рмирм┐рм░рнНрмжрнНрмжрм│рнАрнЯ рмкрнНрм░рмдрнНрнЯрм╛рм╢рнАрмЩрнНрмХ рмкрм░рм┐ рм░рм╛рмЬрмирнИрмдрм┐рмХ рмжрм│рмЩрнНрмХрнБ рмЖрм░рмХрнНрм╖рм┐рмд рмирм┐рм░рнНрммрм╛рмЪрми рмЪрм┐рм╣рнНрми рммрмжрм│рм╛рмЗрммрм╛ рмжрм╛рммрм┐рм░рнЗ рмПрмХ рмкрм┐рмЖрмЗрмПрм▓ рмжрм╛рмЦрм▓ рм╣рнЛрмЗрмерм┐рм▓рм╛ред рмУрмХрм┐рм▓ рм╢рнНрм░рмжрнНрмзрм╛ рмдрнНрм░рнАрмкрм╛рмарнАрмЩрнНрмХ рмкрмХрнНрм╖рм░рнБ рмПрм╣рм┐ рмпрм╛рмЪрм┐рмХрм╛рмХрнБ рмжрм╛рмЦрм▓ рмХрм░рм╛рмпрм╛рмЗрмерм┐рм▓рм╛ред

    рмпрм╛рмЪрм┐рмХрм╛рм░рнЗ рмХрнБрм╣рм╛рмпрм╛рмЗрмерм┐рм▓рм╛ рмХрм┐, рм╕рнЗрморм┐рмдрм┐ рмкрнНрм░рмдрм┐рмерм░ рмирм┐рм░рнНрммрм╛рмЪрмирм░рнЗ рмирм┐рм░рнНрмжрнНрмжрм│рнАрнЯ рмкрнНрм░рм╛рм░рнНрмернАрмЩрнНрмХ рмирм┐рм░рнНрммрм╛рмЪрми рмЪрм┐рм╣рнНрми рммрмжрм│рм╛рмпрм╛рмЗрмерм╛рмП, рм╕рнЗрм╣рм┐рмкрм░рм┐ рнзрнпрнмрнзрм░ рмирм┐рм░рнНрммрм╛рмЪрми рмирм┐рнЯрмо рмЕрмирнНрмдрм░рнНрмЧрмд рм░рм╛рмЬрмирнИрмдрм┐рмХ рмжрм│рмЧрнБрмбрм┐рмХрнБ рмЖрм░рмХрнНрм╖рм┐рмд рмирм┐рм░рнНрммрм╛рмЪрми рмЪрм┐рм╣рнНрми рммрмжрм│рм╛рмЗрммрм╛ рмжрм░рмХрм╛рм░ред рмирм┐рм░рнНрммрм╛рмЪрми рмЖрнЯрнЛрмЧ рмирм┐рм░рнНрммрм╛рмЪрми рмЪрм┐рм╣рнНрми рми рммрм╛рмгрнНрмЯрмирнНрмдрнБ, рм░рм┐рмЯрм░рнНрмгрнНрмгрм┐рмВ рмЕрмлрм┐рм╕рм░рмЩрнНрмХ рмжрнНрммрм╛рм░рм╛ рмирм┐рм░рнНрммрм╛рмЪрми рм▓рмврнБрмерм┐рммрм╛ рмЖрм╢рм╛рнЯрнАрмЩрнНрмХрнБ рмЪрм┐рм╣рнНрми рмкрнНрм░рмжрм╛рми рмХрм░рм╛рмпрм╛рмЙред

    рмПрм╣рм╛ рмкрнВрм░рнНрммрм░рнБ рм╕рнБрмкрнНрм░рм┐рмормХрнЛрм░рнНрмЯ рмзрм╛рм░рнНрморм┐рмХ рмирм╛рмо рмУ рмЪрм┐рм╣рнНрми рмерм┐рммрм╛ рм░рм╛рмЬрмирнИрмдрм┐рмХ рмжрм│ рммрм┐рм░рнЛрмзрм░рнЗ рмпрм╛рмЪрм┐рмХрм╛ рмЙрмкрм░рнЗ рм╢рнБрмгрм╛рмгрм┐ рмХрм░рм┐рммрм╛рмХрнБ рмкрнНрм░рм╕рнНрмдрнБрмд рм╣рнЛрмЗрмЫрмирнНрмдрм┐ред рм╕рнБрмкрнНрм░рм┐рмормХрнЛрм░рнНрмЯ рмХрнЗрмирнНрмжрнНрм░ рмУ рмирм┐рм░рнНрммрм╛рмЪрми рмЖрнЯрнЛрмЧрмЩрнНрмХрнБ рмирнЛрмЯрм┐рм╕ рмЬрм╛рм░рм┐ рмХрм░рм┐ рмПрм╣рм╛ рмЙрмкрм░рнЗ рмЬрммрм╛рмм рмдрм▓рмм рмХрм░рм┐рмЫрмирнНрмдрм┐ред рмХрнЛрм░рнНрмЯ рмЪрм╛рм░рм┐ рм╕рмкрнНрмдрм╛рм╣ рмормзрнНрнЯрм░рнЗ рмЬрммрм╛рмм рмжрнЗрммрм╛рмХрнБ рморм╣рм▓рмд рмжрнЗрмЗрмЫрмирнНрмдрм┐ред рмПрм╣рм┐ рморм╛рморм▓рм╛рм░рнЗ рмЕрмХрнНрмЯрнЛрммрм░ рнзрнорм░рнЗ рмкрм░рммрм░рнНрмдрнНрмдрнА рм╢рнБрмгрм╛рмгрм┐ рм╣рнЗрммред

  • рм░рм╛рмЬрнАрмм рмЧрм╛рмирнНрмзрнАрмЩрнНрмХ рм╣рмдрнНрнЯрм╛рмХрм╛рм░рнАрмЩрнНрмХ рморнБрмХрнНрмдрм┐ рмпрм╛рмЪрм┐рмХрм╛: рмХрнЗрмирнНрмжрнНрм░ рмУ рмдрм╛рморм┐рм▓ рм╕рм░рмХрм╛рм░рмХрнБ рмирнЛрмЯрм┐рм╕

    рмирнВрмЖрмжрм┐рм▓рнНрм▓рнА: рм░рм╛рмЬрнАрмм рмЧрм╛рмирнНрмзрнА рм╣рмдрнНрнЯрм╛ рморм╛рморм▓рм╛рм░рнЗ рм╕рнБрмкрнНрм░рм┐рмо рмХрнЛрм░рнНрмЯ рмХрнЗрмирнНрмжрнНрм░ рмУ рмдрм╛рморм┐рм▓рмирм╛рмбрнБ рм╕рм░рмХрм╛рм░рмХрнБ рмирнЛрмЯрм┐рм╕ рмХрм░рм┐рмЫрмирнНрмдрм┐ред рмЖрмЬрнАрммрми рмХрм╛рм░рм╛рмжрмгрнНрмб рмнрнЛрмЧрнБрмерм┐рммрм╛ рмжрнЛрм╖рнА рмирм▓рм┐рмирнА рмУ рм░рммрм┐рмЪрмирнНрмжрнНрм░рмирмЩрнНрмХрнБ рм╕рморнЯ рмкрнВрм░рнНрммрм░рнБ рморнБрмХрнНрмд рмХрм░рм┐рммрм╛ рмпрм╛рмЪрм┐рмХрм╛ рмЙрмкрм░рнЗ рмПрм╣рм┐ рмирнЛрмЯрм┐рм╕ рмХрм░рм┐рмЫрмирнНрмдрм┐ рмХрнЛрм░рнНрмЯред рмдрнЗрммрнЗ рмЕрмирнНрмдрм░рнАрмг рмЬрм╛рморм┐рми рмкрнНрм░рмжрм╛рми рмХрм░рм┐рммрм╛рмХрнБ рмормирм╛ рмХрм░рм┐рмжрнЗрмЗрмЫрмирнНрмдрм┐ рмХрнЛрм░рнНрмЯред рмЕрмЧрм╖рнНрмЯ рнзрнк рмдрм╛рм░рм┐рмЦрм░рнЗ рморм╛рморм▓рм╛рм░ рмкрм░рммрм░рнНрмдрнНрмдрнА рм╢рнБрмгрм╛рмгрм┐ рм╣рнЗрммред рмЬрм╖рнНрмЯрм┐рм╕ рммрм┐ рмЖрм░ рмЧрмнрмЗрмЩрнНрмХ рмЦрмгрнНрмбрмкрнАрма рмЬрм╛рморм┐рмирмХрнБ рмормирм╛ рмХрм░рм┐рмжрнЗрмЗрмЫрмирнНрмдрм┐ред

    рмЙрмнрнЯ рмирм│рм┐рмирнА рмУ рм░рммрм┐рмЪрмирнНрмжрнНрм░рми рм╕рнБрмкрнНрм░рм┐рмо рмХрнЛрм░рнНрмЯрм░рнЗ рмпрм╛рмЪрм┐рмХрм╛ рмжрм╛рнЯрм░ рмХрм░рм┐ рмкрнЗрм░рм╛рм░рм┐рммрм▓рми рмкрм░рм┐ рм╕рморм╛рмирмдрм╛ рмЖрмзрм╛рм░рм░рнЗ рм╕рнЗрморм╛рмирмЩрнНрмХрнБ рморнБрмХрнНрмд рмХрм░рм┐рммрм╛рмХрнБ рмЕрмкрм┐рм▓ рмХрм░рм┐рмерм┐рм▓рнЗред рмПрм╣рм╛ рмЙрмкрм░рнЗ рмХрнЛрм░рнНрмЯрмЩрнНрмХ рмЪрнВрмбрм╛рмирнНрмд рм░рм╛рнЯ рмЖрм╕рм┐рммрм╛ рмпрм╛рмП рм╕рнЗрморм╛рмирнЗ рмЕрмирнНрмдрм░рнАрмг рмЬрм╛рморм┐рми рмкрм╛рмЗрмБ рмЧрнБрм╣рм╛рм░ рмХрм░рм┐рмерм┐рм▓рнЗред рм╕рнБрмкрнНрм░рм┐рмормХрнЛрм░рнНрмЯ рнзрно рморнЗрм░рнЗ рм░рм╛рмЬрнАрмм рмЧрм╛рмирнНрмзрнА рм╣рмдрнНрнЯрм╛ рморм╛рморм▓рм╛рм░рнЗ рм╕рморм╕рнНрмд рмжрнЛрм╖рнАрмЩрнНрмХ рмормзрнНрнЯрм░рнБ рмкрнЗрм░рм╛рм░рнАрммрм▓рмирмХрнБ рморнБрмХрнНрмд рмХрм░рм┐рмерм┐рм▓рнЗред

    рмПрм╣рм╛ рмкрнВрм░рнНрммрм░рнБ рмЙрмнрнЯ рмжрнЛрм╖рнА рморнБрмХрнНрмдрм┐ рмкрм╛рмЗрмБ рморм╛рмбрнНрм░рм╛рм╕ рм╣рм╛рмЗрмХрнЛрм░рнНрмЯрм░рнЗ рмжрнНрммрм╛рм░рм╕рнНрме рм╣рнЛрмЗрмерм┐рм▓рнЗред рмХрм┐рмирнНрмдрнБ рм╣рм╛рмЗрмХрнЛрм░рнНрмЯ рм╕рнЗрморм╛рмирмЩрнНрмХ рмпрм╛рмЪрм┐рмХрм╛рм░ рм╢рнБрмгрм╛рмгрм┐ рмХрм░рм┐рммрм╛рмХрнБ рмормирм╛ рмХрм░рм┐рмжрнЗрмЗрмерм┐рм▓ред рм╣рм╛рмЗрмХрнЛрм░рнНрмЯ рмХрм╣рм┐рмерм┐рм▓рнЗ рмдрм╛рмЩрнНрмХ рмирм┐рмХрмЯрм░рнЗ рм╕рморнНрммрм┐рмзрм╛рмирм░ рмЕрмирнБрмЪрнНрмЫрнЗрмж рнзрнкрни рмЕрмирнНрмдрм░рнНрмЧрмд рммрм┐рм╢рнЗрм╖ рмХрнНрм╖рмормдрм╛ рмирм╛рм╣рм┐рмБ рмУ рмдрнЗрмгрнБ рм╕рнЗ рмПрм╣рм╛ рмЙрмкрм░рнЗ рм╢рнБрмгрм╛рмгрм┐ рмХрм░рм┐ рмкрм╛рм░рм┐рммрнЗ рмирм╛рм╣рм┐рмБред

  • рмЙрмирнНрмирм╛рмм рмжрнБрм╖рнНрмХрм░рнНрмо рморм╛рморм▓рм╛: рм╕рнБрмкрнНрм░рм┐рмо рмХрнЛрм░рнНрмЯрм░рнБ рмкрнАрмбрм┐рмдрм╛рмЩрнНрмХрнБ рмЖрм╢рнНрммрм╕рнНрмдрм┐

    рмирнВрмЖрмжрм┐рм▓рнНрм▓рнА: рмЙрмирнНрмирм╛рмм рмжрнБрм╖рнНрмХрм░рнНрмо рмкрнАрмбрм┐рмдрм╛рмЩрнНрмХрнБ рм╕рнБрмкрнНрм░рм┐рмо рмХрнЛрм░рнНрмЯрм░рнБ рммрмб рмЖрм╢рнНрммрм╕рнНрмдрм┐ред рморм╛рморм▓рм╛рмХрнБ рм╕рнБрмкрнНрм░рм┐рмо рмХрнЛрм░рнНрмЯ рмжрм┐рм▓рнНрм▓рнА рм╕рнНрмерм╛рмирм╛рмирнНрмдрм░ рмХрм░рм┐рммрм╛рмХрнБ рмирм┐рм░рнНрмжрнНрмжрнЗрм╢ рмжрнЗрмЗрмЫрмирнНрмдрм┐ред рм╢рнБрмХрнНрм░рммрм╛рм░ рморм╛рморм▓рм╛рм░ рм╢рнБрмгрм╛рмгрм┐ рмХрм░рм┐ рм╕рнБрмкрнНрм░рм┐рмо рмХрнЛрм░рнНрмЯ┬а рмПрм╣рм╛рмХрнБ рмжрм┐рм▓рнНрм▓рнА рм╕рнНрмерм╛рмирм╛рмирнНрмдрм░ рмХрм░рм┐рмЫрмирнНрмдрм┐ред рморм╛рморм▓рм╛рм░рнЗ рмЕрмнрм┐рмпрнБрмХрнНрмд рмкрмХрнНрм╖рм░ рмУрмХрм┐рм▓ рмпрнБрмХрнНрмдрм┐ рммрм╛рмврм┐рмерм┐рм▓рнЗ рмХрм┐, рмдрм╛рмЩрнНрмХ рморм╣рмХрм┐рм▓рмЩрнНрмХрнБ рмлрм╕рм╛рмЗрммрм╛ рмкрм╛рмЗрмБ рморм┐рмЫ рморм╛рморм▓рм╛ рмжрм╛рнЯрм░ рмХрм░рм╛рмпрм┐рммрм╛ рм╕рм╣ рморм┐рмЫ рмжрм╕рнНрмдрм╛рммрм┐рмЬ рмкрнНрм░рм╕рнНрмдрнБрмд рмХрм░рм╛рмпрм╛рмЗрмЫрм┐ред рм╕рнЗрмкрмЯрнЗ рмкрнАрмбрм┐рмдрм╛ рморм╛рморм▓рм╛рм░ рм╢рнБрмгрм╛рмгрм┐ рмЙрмдрнНрмдрм░ рмкрнНрм░рмжрнЗрм╢рм░рнБ рмжрм┐рм▓рнНрм▓рнА рмЯрнНрм░рм╛рмирнНрм╕рмлрм░ рмХрм░рм┐рммрм╛рмХрнБ рмЕрмирнБрм░рнЛрмз рмХрм░рм┐рмерм┐рм▓рнЗред

    рмЬрнБрм▓рм╛рмЗ рнй рмдрм╛рм░рм┐рмЦрм░рнЗ рмХрнЛрм░рнНрмЯрмЩрнНрмХ рмирм┐рмХрмЯрм░рнЗ рм╣рм╛рмЬрм░ рми рм╣рнЗрммрм╛рм░рнБ рмкрнАрмбрм┐рмдрм╛рмЩрнНрмХ рммрм┐рм░рнЛрмзрм░рнЗ рмПрмХ рмирми рммрнЗрм▓рнЗрммрм▓ рн▒рм╛рм░рнЗрмгрнНрмЯ рмЬрм╛рм░рм┐ рмХрм░рм╛рмпрм╛рмЗрмерм┐рм▓рм╛ред рмПрм╣рм╛рмХрнБ рмЪрнНрнЯрм╛рм▓рнЗрмЮрнНрмЬ рмХрм░рм┐ рм╕рнБрмкрнНрм░рм┐рмо рмХрнЛрм░рнНрмЯрм░рнЗ  рмкрнАрмбрм┐рмдрм╛рмЩрнНрмХ рмкрмХрнНрм╖рм░рнБ рмпрм╛рмЪрм┐рмХрм╛ рмжрм╛рнЯрм░ рм╣рнЛрмЗрмерм┐рм▓рм╛ред рмпрм╛рмЪрм┐рмХрм╛рм░рнЗ рмХрнБрм╣рм╛рмпрм╛рмЗрмерм┐рм▓рм╛ рмХрм┐, рм╕рнЗ рмжрм┐рм▓рнНрм▓рнАрм░рнЗ рмХрнЛрм░рнНрмЯрмЩрнНрмХ рмирм┐рмХрмЯрм░рнЗ рмЙрмкрм╕рнНрмерм┐рмд рмерм┐рм▓рнЗред рмдрмерм╛рмкрм┐ рмдрм╛рмЩрнНрмХ рммрм┐рм░рнЛрмзрм░рнЗ рмирми рммрнЗрм▓рнЗрммрм▓ рн▒рм╛рм░рнЗрмгрнНрмЯ рмЬрм╛рм░рм┐ рмХрм░рм╛рмпрм╛рмЗрмЫрм┐ред рн▒рм╛рм░рнЗрмгрнНрмЯ рмЙрмкрм░рнЗ рм░рнЛрмХ рм▓рмЧрм╛рмЗрммрм╛рмХрнБ рмкрнАрмбрм┐рмдрм╛ рм╕рнБрмкрнНрм░рм┐рмо рмХрнЛрм░рнНрмЯрм░рнЗ рмЕрмкрм┐рм▓ рмХрм░рм┐рмерм┐рм▓рнЗред

    рм╕рнВрмЪрмирм╛рмпрнЛрмЧрнНрнЯ, рнирнжрнзрнн рморм╕рм┐рм╣рм╛рм░рнЗ рмХрнБрм▓рмжрнАрмк рм╕рм┐рмВрм╣ рм╕рнЗрмЩрнНрмЧрм░рмЩрнНрмХ рммрм┐рм░рнЛрмзрм░рнЗ рмЕрмкрм╣рм░рмг рмУ рмжрнБрм╖рнНрмХрм░рнНрмо рмЕрмнрм┐рмпрнЛрмЧ рм╣рнЛрмЗрмерм┐рм▓рм╛ред рмжрнБрм╖рнНрмХрм░рнНрмо рм╕рморнЯрм░рнЗ рмкрнАрмбрм┐рмдрм╛ рмирм╛рммрм╛рм│рм┐рмХрм╛ рмерм┐рм▓рм╛ред рмирм┐рмЬ рммрнЯрм╕рм░ рмкрнНрм░рморм╛рмг рмжрнЗрммрм╛рмХрнБ рм╕рнЗ рм╕рнНрмХрнБрм▓рм░ рмЯрм┐рм╕рм┐ рмХрнЛрм░рнНрмЯрм░рнЗ рмжрм╛рмЦрм▓ рмХрм░рм┐рмерм┐рм▓рнЗред рмХрм┐рмирнНрмдрнБ рмЕрмнрм┐рмпрнБрмХрнНрмд рмкрмХрнНрм╖рм░ рмУрмХрм┐рм▓ рмЕрмнрм┐рмпрнЛрмЧ рмХрм░рм┐рмерм┐рм▓рнЗ рмХрм┐, рмЯрм┐рм╕рм┐рм░рнЗ рм╣рнЗрм░рмлрнЗрм░ рмХрм░рм╛рмпрм╛рмЗрмЫрм┐ред

    рмЕрмирнНрнЯрмкрмЯрнЗ рморм╛рмЦрм┐ рмжрнБрм╖рнНрмХрм░рнНрмо рмХрм╛рмгрнНрмбрм░рнЗ рмЬрмбрм┐рмд рм╣рм░рмкрм╛рм▓ рм╕рм┐рмВрм╣рмЩрнНрмХ рмжрнНрммрм╛рм░рм╛ рмжрнБрм╖рнНрмХрм░рнНрмо рмкрнАрмбрм┐рмдрм╛, рмдрм╛рмЩрнНрмХ рморм╛ рмУ рмжрм╛рмжрм╛рмЩрнНрмХ рммрм┐рм░рнЛрмзрм░рнЗ рм╣рнЗрм░рмлрнЗрм░рмХрнБ рмирнЗрмЗ рморм╛рморм▓рм╛ рмжрм╛рнЯрм░ рм╣рнЛрмЗрмерм┐рм▓рм╛ред рмПрм╣рм╛ рмкрм░рнЗ рмХрнЛрм░рнНрмЯ рмкрнАрмбрм┐рмдрм╛рмЩрнНрмХ рммрм┐рм░рнЛрмзрм░рнЗ рмирми рммрнЗрм▓рнЗрммрнБрм▓ рн▒рм╛рм░рнЗрмгрнНрмЯ рмЬрм╛рм░рм┐ рмХрм░рм┐рмерм┐рм▓рнЗред

  • рморм┐рмЫ рморм╛рморм▓рм╛рм░рнЗ рмлрм╕рм┐рмерм┐рммрм╛ рм▓рнЛрмХрмЩрнНрмХрнБ рмХрнНрм╖рмдрм┐рмкрнВрм░рмг рморм╛рморм▓рм╛рм░рнЗ рм╕рнБрмкрнНрм░рм┐рмо рмХрнЛрм░рнНрмЯрмЩрнНрмХ рмормд

    рмирнВрмЖрмжрм┐рм▓рнНрм▓рнА: рм╕рнБрмкрнНрм░рм┐рмо рмХрнЛрм░рнНрмЯ рмЧрнБрм░рнБрммрм╛рм░ рморм┐рмЫ рморм╛рморм▓рм╛рм░рнЗ рмлрм╕рм┐рмерм┐рммрм╛ рм▓рнЛрмХрмЩрнНрмХрнБ рмХрнНрм╖рмдрм┐рмкрнВрм░рмг рмжрнЗрммрм╛ рмпрм╛рмЪрм┐рмХрм╛ рмЙрмкрм░рнЗ рмирм┐рмЬ рмормд рм╕рнНрмкрм╖рнНрмЯ рмХрм░рм┐рмЫрмирнНрмдрм┐ред рмХрнЛрм░рнНрмЯ рмПрм╣рм┐ рмкрм░рм┐ рммрнНрнЯрммрм╕рнНрмерм╛ рмХрм░рм┐рммрм╛рмХрнБ рмЖрмжрнЗрм╢ рмжрнЗрммрм╛рмХрнБ рмормирм╛ рмХрм░рм┐рмжрнЗрмЗрмЫрмирнНрмдрм┐ред рмХрнЛрм░рнНрмЯ рмХрм╣рм┐рмЫрмирнНрмдрм┐ рмХрм┐,┬а рмПрм╣рм╛ рм╕рм░рмХрм╛рм░рмЩрнНрмХрнБ рмжрнЗрмЦрм┐рммрм╛рм░ рмЕрмЫрм┐ред

    рммрм┐рмЬрнЗрмкрм┐ рмирнЗрмдрм╛ рмХрмкрм┐рм▓ рморм┐рм╢рнНрм░рм╛ рмУ рмУрмХрм┐рм▓ рмЕрм╢рнНрммрм┐рмирнА рмЙрмкрм╛рмзрнНрнЯрм╛рнЯ рм╕рнБрмкрнНрм░рм┐рмормХрнЛрм░рнНрмЯрм░рнЗ рмПрмХ рмпрм╛рмЪрм┐рмХрм╛ рмжрм╛рнЯрм░ рмХрм░рм┐рмерм┐рм▓рнЗред рмПрмерм┐рм░рнЗ рмЙрм▓рнНрм▓рнЗрмЦ рмХрм░рм╛рмпрм╛рмЗрмерм┐рм▓рм╛ рмХрм┐, рморм┐рмЫ рмЕрмнрм┐рмпрнЛрмЧ рморм╛рморм▓рм╛рм░рнЗ рмлрм╕рм╛ рмпрм╛рмЗрмерм┐рммрм╛ рм▓рнЛрмХрмЩрнНрмХрнБ рмХрнНрм╖рмдрм┐рмкрнВрм░рмг рмжрнЗрммрм╛рм░ рммрнНрнЯрммрм╕рнНрмерм╛ рмХрм░рм╛рмпрм┐рммрм╛ рмЙрмЪрм┐рмдред рм╕рнБрмкрнНрм░рм┐рмо рмХрнЛрм░рнНрмЯ рмПрмкрнНрм░рмХрм╛рм░ рмЖрмжрнЗрм╢ рмжрнЗрммрм╛рмХрнБ рмормирм╛ рмХрм░рм┐рмжрнЗрмЗрмЫрмирнНрмдрм┐ред

    рмпрм╛рмЪрм┐рмХрм╛рм░рнЗ рнирнж рммрм░рнНрм╖ рмкрм░рнНрмпрнНрнЯрмирнНрмд рморм┐рмЫ рмжрнБрм╖рнНрмХрм░рнНрмо рморм╛рморм▓рм╛рм░рнЗ рмЬрнЗрм▓рм░рнЗ рмерм┐рммрм╛ рммрм┐рм╖рнНрмгрнБ рмдрм┐рммрм╛рм░рнАрмЩрнНрмХ рмЙрмжрм╛рм╣рм░рмг рммрм┐ рмжрм┐рмЖрмпрм╛рмЗрмерм┐рм▓рм╛ред рмПрмарм╛рм░рнЗ рмЙрм▓рнНрм▓рнЗрмЦ рмпрнЛрмЧрнНрнЯ рмХрм┐, рмЙрмдрнНрмдрм░ рмкрнНрм░рмжрнЗрм╢рм░ рм▓рм▓рм┐рмдрмкрнБрм░ рмирм┐рммрм╛рм╕рнА рммрм┐рм╖рнНрмгрнБ рмдрм┐рммрм╛рм░рнАрмЩрнНрмХрнБ рм╣рм╛рмЗрмХрнЛрм░рнНрмЯ рнирнж рммрм░рнНрм╖ рмкрм░рнЗ рмирм┐рм░рнНрмжрнНрмжрнЛрм╖ рм╕рм╛рммрнНрнЯрм╕рнНрмд рмХрм░рм┐рмерм┐рм▓рнЗред  рммрм┐рм╖рнНрмгрнБрмЩрнНрмХ рмдрм│ рмХрнЛрм░рнНрмЯ рмЖрмЬрнАрммрми рмХрм╛рм░рм╛рмжрмгрнНрмб рм╢рнБрмгрм╛рмЗ рмерм┐рм▓рнЗред

    рммрм┐рм╖рнНрмгрнБрмЩрнНрмХрнБ рмпрнЗрмдрнЗрммрнЗрм│рнЗ рнзрно рммрм░рнНрм╖ рм╣рнЛрмЗрмерм┐рм▓рм╛ рмдрм╛рмЩрнНрмХ рммрм┐рм░рнЛрмзрм░рнЗ рм╣рм░рм┐рмЬрми рмЖрмХрнНрмЯ рмУ рмжрнБрм╖рнНрмХрм░рнНрмо рморм╛рморм▓рм╛рм░рнЗ рмХрнЗрм╢ рмжрм╛рнЯрм░ рмХрм░рм╛рмпрм╛рмЗрмерм┐рм▓рм╛ред

  • рмЕрмЧрм╖рнНрмЯ рнорм░рнЗ рм╣рнЗрмм рм╢рм┐рммрм╕рнЗрмирм╛ рм╢рнБрмгрм╛рмгрм┐

    рморнБрморнНрммрм╛рмЗ: рм╢рм┐рммрм╕рнЗрмирм╛ рмЙрмкрм░рнЗ рм╣рмХ рмЬрм╛рм╣рм┐рм░ рмХрм░рм┐рммрм╛рмХрнБ рмирнЗрмЗ рмЙрмарм┐рмерм┐рммрм╛ рм╕рмВрмХрмЯ рмЙрмкрм░рнЗ рм╕рнБрмкрнНрм░рм┐рмо рмХрнЛрм░рнНрмЯрм░рнЗ рморм╛рморм▓рм╛ рмерм┐рммрм╛ рммрнЗрм│рнЗ рмХрм┐рмирнНрмдрнБ рм╢рнБрмгрм╛рмгрм┐рмХрнБ рм╕рнЛрморммрм╛рм░ рмкрм░рнНрмпрнНрнЯрмирнНрмд рмШрнБрмЮрнНрмЪрм╛рмЗ рмжрнЗрмЗрмЫрмирнНрмдрм┐ рмХрнЛрм░рнНрмЯред рм╕рнЛрморммрм╛рм░ рмжрм┐рми рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рмдрм┐рмирм┐ рмЬрмгрм┐рмЖ рмЦрмгрнНрмбрмкрнАрма, рморм╛рморм▓рм╛рм░ рм╢рнБрмгрм╛рмгрм┐ рнл рмЬрмгрм┐рмЖ рмЦрмгрнНрмбрмкрнАрма рмжрнНрн▒рм╛рм░рм╛ рм╣рнЗрмм рмХрм┐ рмирм╛рм╣рм┐рмБ рмдрм╛ рмЙрмкрм░рнЗ рммрм┐рмЪрм╛рм░ рм╣рнЗрммред рмдрнЗрммрнЗ рмдрм┐рмирм┐ рмЬрмгрм┐рмЖ рмЦрмгрнНрмбрмкрнАрма рмирм┐рм░рнНрммрм╛рмЪрми рмХрморм┐рм╢рмирмЩрнНрмХ рмУрмХрм┐рм▓рмЩрнНрмХрнБ рмХрм╣рм┐рмЫрмирнНрмдрм┐ рмХрм┐, рмжрнБрмЗ рмкрмХрнНрм╖рмХрнБ рмирм┐рм░рнНрммрм╛рмЪрми рмЖрнЯрнЛрмЧрм░рнЗ рм╕рмдрнНрнЯрмкрм╛рма рмжрнЗрммрм╛рм░ рмдрм╛рм░рм┐рмЦ рмЕрмЧрм╖рнНрмЯ рно рм░рм╣рм┐рмЫрм┐ред рмпрмжрм┐ рмХрнМрмгрм╕рм┐ рмкрмХрнНрм╖ рм╕рморнЯ рморм╛рмЧрмирнНрмдрм┐ рмдрнЗрммрнЗ рмЖрнЯрнЛрмЧ рмПрм╣рм╛ рмЙрмкрм░рнЗ рммрм┐рмЪрм╛рм░ рмХрм░рмирнНрмдрм┐ред рмПрм╣рм╛ рммрнНрнЯрмдрнАрмд рмирм┐рм░рнНрммрм╛рмЪрми рмХрморм┐рм╢рмирмЩрнНрмХрнБ рмПрмХрмирм╛рмермЩрнНрмХ рмжрнНрн▒рм╛рм░рм╛ рм╢рм┐рммрм╕рнЗрмирм╛рм░ рморм╛рм▓рм┐рмХрм╛рмирм╛ рмкрм╛рмЗрмБ рм╣рнЛрмЗрмерм┐рммрм╛ рмжрм╛рммрм┐ рмЙрмкрм░рнЗ рмХрнМрмгрм╕рм┐ рмХрм╛рм░рнНрмпрнНрнЯрм╛рмирнБрм╖рнНрмарм╛рми рми рмХрм░рм┐рммрм╛рмХрнБ рморнМрмЦрм┐рмХ рмнрм╛рммрнЗ рмирм┐рм░рнНрмжрнНрмжрнЗрм╢ рмжрнЗрмЗрмЫрмирнНрмдрм┐ред рмПрмерм┐рм╕рм╣ рмЙрмжрнНрмзрммрмЩрнНрмХ рмХрнЗрм╢ рм╕рнБрмкрнНрм░рм┐рмормХрнЛрм░рнНрмЯрм░рнЗ рмкрмбрм┐рмерм┐рммрм╛рм░рнБ рмПрм╣рм╛ рмЙрмкрм░рнЗ рмормзрнНрнЯ рм╕рнНрмермЧрм┐рмдрм╛ рмжрнЗрмЗрмкрм╛рм░рмирнНрмдрм┐ рммрнЛрм▓рм┐ рмХрм╣рм┐рмЫрмирнНрмдрм┐ред

Back to top button