କୋଲକାତା ବିମାନ ବନ୍ଦରରେ ଅଗ୍ନିକାଣ୍ଡ ଘଟଣାର ତଦନ୍ତ ପାଇଁ କମିଟି ଗଠିତ

କୋଲକାତା : କୋଲକାତା ବିମାନ ବନ୍ଦରରେ ବୁଧବାର ରାତିରେ ବଡ ଧରଣର ଅଗ୍ନିକାଣ୍ଡ ଘଟିଥିଲା । ବିମାନ ବନ୍ଦର ପରିଚାଳନା ସୂତ୍ରରୁ କୁହାଯାଇଛି ଯେ, ରାତି ପ୍ରାୟ ୯ଟା ୧୫ ମିନିଟ୍ ସମୟରେ ବିମାନ ବନ୍ଦରର ଟେକ ଇନ୍ ଇଲାକାରେ ‘ଡି -ପୋର୍ଟଲ‘ରେ ନିଆଁ ଲାଗିଥିଲା । ପ୍ରାୟ ଦେଢ଼ ଘଂଟାର ଉଦ୍ୟମ ପରେ ନିଆଁକୁ ଆୟତ କରାଯାଇଥିଲା । ତେବେ ଏଥିରେ କେହି ଆହତ ହୋଇନାହାଁନ୍ତି । ତେବେ ନିଆଁ ଲାଗିବାର କାରଣ ଅଦ୍ୟାବଧି ସ୍ପଷ୍ଟ ହୋଇନାହିଁ । ପ୍ରାଥମିକ ପର୍ଯ୍ୟାୟରେ ସର୍ଟ ସର୍କିଟରୁ ନିଆଁ ଲାଗିଥିବା ସନ୍ଦେହ କରାଯାଉଛି । ଘଟଣାର ତଦନ୍ତ ପାଇଁ ଏକ କମିଟି ଗଠନ କରାଯାଇଛି । ଏହି କମିଟିରେ ବିମାନ ବନ୍ଦର ଅଗ୍ନିଶମ ସୁରକ୍ଷା ଟିମ୍ ସହିତ ପୋଲିସ ଟିମ୍ ସାମିଲ୍ ହୋଇଛି । ଗୁରୁବାର ସକାଳେ ବିମାନ ବନ୍ଦର ପରିଚାଳନାର ଉଚ୍ଚ ଅଧିକାରୀ ଏନେଇ ନିର୍ଦ୍ଦେଶ ଜାରୀ କରିଥିଲେ ।