ଜି -7 ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଦିନ ହିରୋସିମାଠାରେ ୟୁକ୍ରେନ ରାଷ୍ଟ୍ରପତି ଭ୍ଲାଡିମିର ଜେଲେନସ୍କିଙ୍କୁ ଭେଟିଛନ୍ତି। ଏହି ବୈଠକରେ ମୋଦୀ ଉଲ୍ଲେଖ କରିଛନ୍ତି ଯେ ୟୁକ୍ରେନ ବିବାଦ ସମଗ୍ର ବିଶ୍ୱ ଉପରେ ବିଶେଷ ପ୍ରଭାବ ପକାଇଛି। କିନ୍ତୁ ସେ ଜୋର ଦେଇଛନ୍ତି ଯେ ତାଙ୍କ ପାଇଁ ଏହା ଏକ ରାଜନୈତିକ କିମ୍ବା ଅର୍ଥନୈତିକ ପ୍ରସଙ୍ଗ ନୁହେଁ ବରଂ ମାନବିକତାର ପ୍ରସଙ୍ଗ।
ହିରୋସିମାରେ ସାମ୍ବାଦିକମାନଙ୍କୁ ସୂଚନା ଦେଇ ବୈଦେଶିକ ସଚିବ ବିନୟ ମୋହନ କ୍ୱାଟ୍ରା କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଜେଲେନସ୍କିଙ୍କୁ କହିଛନ୍ତି ଯେ ବାର୍ତ୍ତାଳାପ ଏବଂ କୂଟନୀତି ମାଧ୍ୟମରେ ଏହି ବିବାଦର ସମାଧାନ ପାଇଁ ଭାରତ ସବୁକିଛି କରିବ । ମୋଦୀ କହିଛନ୍ତି, ୟୁକ୍ରେନବାସୀଙ୍କୁ ଭାରତ ମାନବିକ ସହାୟତା ପ୍ରଦାନ ଜାରି ରଖିବ । କ୍ୱାଟ୍ରା ସୂଚନା ଦେଇଛନ୍ତି ଯେ ୟୁକ୍ରେନ ରାଷ୍ଟ୍ରପତି ଜେଲେନସ୍କି ପ୍ରଧାନମନ୍ତ୍ରୀ ମୋଦୀଙ୍କୁ ୟୁକ୍ରେନ ଗସ୍ତ କରିବାକୁ ଆମନ୍ତ୍ରଣ ମଧ୍ୟ କରିଛନ୍ତି।
ବୈଦେଶିକ ସଚିବ ବିନୟ ମୋହନ କ୍ୱାଟ୍ରା କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଏକାଧିକ ସଙ୍କଟକୁ ଦୂର କରିବା ପାଇଁ ମିଳିତ ଭାବେ କାର୍ଯ୍ୟ କରିବା ଉପରେ G7 ଅଧିବେଶନରେ କାର୍ଯ୍ୟାନୁଷ୍ଠାନ ପାଇଁ 10 ପଏଣ୍ଟ ଆହ୍ୱାନ ଦେଇଛନ୍ତି। ଜାପାନର ହିରୋସିମା ଠାରେ ସାମ୍ବାଦିକମାନଙ୍କୁ ସୂଚନା ଦେଇ ଶ୍ରୀ କ୍ୱାଟ୍ରା କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ମିଲେଟ ଗ୍ରହଣ ଏବଂ ସଚେତନତାକୁ ଦୃଢ ଭାବରେ ସମର୍ଥନ କରିଛନ୍ତି।