ଆମେରିକୀୟ ମହାକାଶ ସଂସ୍ଥା ନାସା ତରଫରୁ ସୁନିତା ୱିଲିୟମସ୍ ଓ ବଚ୍ ୱିଲମୋର ଗତ ଜୁନ ୬ରେ ବୋଇଙ୍ଗ ଷ୍ଟାରଲାଇନର ଜରିଆରେ ମହାକାଶକୁ ଯାତ୍ରା କରିଥିଲେ । ଆଇଏସଏସ ରେ ୮ ଦିନ ରହିବା ପରେ ସେମାନେ ପୃଥିବୀ ପୃଷ୍ଠକୁ ପ୍ରତ୍ୟାବର୍ତ୍ତନ କରିବା କଥା । ତେବେ ଷ୍ଟାରଲାଇନରରେ ବାରମ୍ବାର ଯାନ୍ତ୍ରୀକ ତୃଟି ପରିଲିକ୍ଷିତ ହେଉଥିବାରୁ ସୁନିତା ଓ ୱିଲମୋରଙ୍କ ଫେରିବା ବର୍ତ୍ତମାନ ଅନିଶ୍ଚିତ ହୋଇପଡ଼ିଛି ।
ଯଦି ଷ୍ଟାରଲାଇନର ଯାନ ସମ୍ପୂର୍ଣ୍ଣ ସୁରକ୍ଷିତ ପ୍ରମାଣିତ ନ ହୁଏ , ତେବେ ଏ ଦୁଇ ମହାକାଶଚାରୀ ୨୦୨୫ ଫେବୃଆରୀ ପର୍ଯ୍ୟନ୍ତ ମହାକାଶରେ ଅଟକିବା ନିଶ୍ଚିତ ବୋଲି ନାସା ପକ୍ଷରୁ କୁହାଯାଇଛି ।
ସୁନିତା ଓ ୱିଲମୋରଙ୍କୁ ଫେରାଇ ଆଣିବାକୁ ନାସା କର୍ତ୍ତୃପକ୍ଷ ଏକାଧିକ ବିକଳ୍ପ ଚିନ୍ତା କରୁଥିଲେ ସୁଦ୍ଧା ଏର୍ଯ୍ୟନ୍ତ ସଫଳ ହୋଇପାରିନାହାନ୍ତି। ଏହି ପରିପ୍ରେକ୍ଷୀରେ ୨୦୨୫ ଫେବୃଆରୀରେ ସ୍ପେସ୍ଏକ୍ସ ସଂସ୍ଥାର ମହାକାଶ ଯାନ ପଠାଇ ଏମାନଙ୍କୁ ଫେରାଇ ଅଣାଯିବ ବୋଲି ନାସା କର୍ତ୍ତୃପକ୍ଷ ଆପାତତଃ ଯୋଜନା ପ୍ରସ୍ତୁତ କରିଛନ୍ତି।
ବର୍ତ୍ତମାନ ସୁନିତା ଓ ୱିଲମୋରଙ୍କୁ ମିଶାଇ ଆଇଏସ୍ଏସ୍ରେ ମୋଟ ୯ ଜଣ ମହାକାଶଚାରୀ ଅବସ୍ଥାନ କରୁଛନ୍ତି। ସେମାନଙ୍କର ସ୍ବାସ୍ଥ୍ୟାବସ୍ଥା ଠିକ୍ ଥିବାବେଳେ ସେମାନଙ୍କ ପାଇଁ ପର୍ଯ୍ୟାପ୍ତ ପରିମାଣର ଖାଦ୍ୟପଦାର୍ଥ ଓ ଅନ୍ୟାନ୍ୟ ଜରୁରୀ ସାମଗ୍ରୀ ସେଠାରେ ମହଜୁଦ ରହିଛି। ସୂଚନାଯୋଗ୍ୟ ମହାକାଶକୁ ଉତ୍କ୍ଷେପଣ ପୂର୍ବରୁ ଷ୍ଟାରଲାଇନରରେ ଏକାଧିକ ଯାନ୍ତ୍ରିକ ତ୍ରୁଟି ପରିଲକ୍ଷିତ ହୋଇଥିଲା। ଫଳରେ ସୁନିତାଙ୍କ ମହାକାଶ ଯାତ୍ରାକୁ ଦୁଇଥର ସ୍ଥଗିତ ରଖିବାକୁ ପଡିଥିଲା। ଶେଷରେ ଜୁନ ୬ରେ ସୁନିତା ଓ ୱିଲମୋରଙ୍କୁ ନେଇ ଷ୍ଟାରଲାଇନର ଗନ୍ତବ୍ୟସ୍ଥଳ ଅଭିମୁଖେ ଯାତ୍ରା କରି ଆଇଏସଏସ ସହ ସଂଯୋଗ ହୋଇଥିଲା। ସେହିଦିନଠାରୁ ଷ୍ଟାରଲାଇନର ଯାନର ପ୍ରପଲସନ୍ ଇଞ୍ଜିନରେ ଦେଖାଦେଇଥିବା ତ୍ରୁଟିକୁ ସୁଧାରିବା କଷ୍ଟସାଧ୍ୟ ହୋଇପଡିଛି। ତେଣୁ ଶହେ ପ୍ରତିଶତ ସୁରକ୍ଷିତ ଉପାୟ ଚୂଡାନ୍ତ ହେବା ପର୍ଯ୍ୟନ୍ତ ଏ ଦୁଇ ମହାକାଶଚାରୀଙ୍କୁ ମହାକାଶରେ ଅବସ୍ଥାନ କରିବାକୁ ପଡିବ ବୋଲି ନାସା ପକ୍ଷରୁ ସ୍ପଷ୍ଟ କରାଯାଇଛି।
Naxatra News is now on Whatsapp
Join and get latest news update delivered to you via whatsapp
Join Now
