‘ହେ ସରକାର ଶୁଣ ଗୁହାରୀ ‘

ନବରଙ୍ଗପୁର: ଦୁର୍ଘଟଣାରେ ଚାଲିଗଲା ସ୍ତ୍ରୀର ଜୀବନ । ଦିବ୍ୟାଙ୍ଗ ହୋଇଗଲେ ମହାଦେବ । ଅଧାରୁ ପାଠ ଛାଡିଲେ ପିଲାଏ । ଯେଉଁଠି ଘର ଚଳିବା କଷ୍ଟକର ସେଠୀ ସେମାନେ ପାଠ ବି ପଢିବେ କେମିତି । ଆମେ କହୁଛୁ ନବରଙ୍ଗପୁର ଜିଲ୍ଲା କୋଷାମୁଗୁଡାରେ ରହୁଥିବା ମହାଦେବ ଭତରାଙ୍କ କଥା । ଦୁର୍ଘଟଣାରେ ଦିବ୍ୟାଙ୍ଗ ହେବାପରେ ଶଯ୍ୟାସାୟୀ ହୋଇଛନ୍ତି । ପରିବାର ଚଳିବା କଷ୍ଟସାଧ୍ୟ ହୋଇଛି ଯାହାକୁ ନେଇ ସରକାରୀ ସହାୟତା ପାଇଁ ଅନୁରୋଧ କରିଛନ୍ତି ମହାଦେବ..।

ଗୋଟିଏ ଦୁର୍ଘଟଣା, ଆଉ ଉଜୁଡିଗଲା ସଂସାର। ସ୍ତ୍ରୀ ଛାଡି ଚାଲିଗଲା ଆରପାରିକୁ,ପୁଅ,ଝିଅ ଅଧାରୁ ପାଠ ଛାଡିଲେ । ଦିବ୍ୟାଙ୍ଗ ହୋଇଗଲେ ମହାଦେବ । ନବରଙ୍ଗପୁର ଜିଲ୍ଲା କୋଷଆଗୁମୁଡା ବ୍ଲକ ଉକିଆପାଲି ଗାଁର ମହାଦେବ ଭତରା। ଦୁର୍ଘଟଣାରେ ସ୍ତ୍ରୀ ଚାଲିଗଲେ ହେଲେ ଗୁରୁତର ହୋଇ କୋଷାଗୁମୁଡ଼ା ମେଡିକାଲରେ ଭର୍ତି ହେଲେ ମହାଦେବ । ଜୀବନ ସିନା ବଞ୍ଚିଗଲା ହେଲେ ସେ ଚାଲିବାର ସାମର୍ଥ୍ୟ ହରାଇବସିଲେ । ଭଲ ଦି’ପଇସା ରୋଜଗାର କରି ପରିବାର ପ୍ରତିପୋଷଣ କରୁଥିବା ମହାଦେବ ଏବେ ପଙ୍ଗୁ ଓ ଶଯ୍ୟାସାୟୀ ହୋଇପଡିଛନ୍ତି । ଯେଉଁଠି ପେଟକୁ ଦାନା ଦେବାକୁ ଟଙ୍କା ନାହିଁ ସେଠି ଚିକିତ୍ସା ଆଉ ପିଲାଙ୍କ ପାଠପଢା କଥା ପଚାରେ କିଏ । ଏଭିଳି ଦୁର୍ଦ୍ଦଶାରେ ସମ୍ପକୀୟ, ଗ୍ରାମବାସୀ ଯାହା ସାହାଯ୍ୟ କରୁଛନ୍ତି ତାହା ସମୁଦ୍ରକୁ ଶଙ୍ଖେ । ସ୍ତ୍ରୀର ମୃତ୍ୟୁରେ ବୀମା ମିଳିବାର ଥିଲେ ମଧ୍ୟ ଏଯାଏ ତାହା ମିଳିନାହିଁ। ସରକାରୀ ସହାୟତାକୁ ଅପେକ୍ଷା କରିଛନ୍ତି ମହାଦେବ।

ଦୁର୍ଘଟଣା ଘଟିବାର ପରଦିନ ଦୁର୍ଘଟଣା ଘଟାଇଥିବା ଟିପ୍ପର ମାଲିକର ଆଲୋଚନା ପରେ ମହାଦେବଙ୍କ ପରିବାରକୁ ୪୦ ହଜାର ଟଙ୍କା ଓ ବୀମା ରାଶି ଯୋଗାଇଦେବାକୁ କଥା ହୋଇଥିଲେବି ଆଜି ଯାଏ ତାହା ମିଳିନାହିଁ । କାମ କରିବା ବୟସରେ ଯଦି ଦିବ୍ୟାଙ୍ଗ ହୋଇ ଘରେ ପଡିରହିବା ପରେ ଏବେ ସନ୍ତାନଙ୍କ ଭବିଷ୍ୟତ ଚିନ୍ତା ଘାରିଛି ମହାଦେବଙ୍କୁ । ତେଣୁ ସେ କୌଣସି ସହୃଦୟ ବ୍ୟକ୍ତି କିମ୍ବା ସରକାରୀ ସାହାଯ୍ୟ ପାଇଁ ଅପେକ୍ଷା କରିଛନ୍ତି ।

ମହାଦେବଙ୍କ ଏଭଳି ଦୁର୍ଦ୍ଦିନରେ ତାଙ୍କ ବୀମା ଟଙ୍କା କିଭଳି ଯଥାଶୀଘ୍ର ମିଳିପାରିବ ସେଦିଗରେ ଜିଲ୍ଲା ପ୍ରଶାସନ ଯଦି ଚେଷ୍ଟା କରନ୍ତେ ତାହେଲେ ଗୋଟିଏ ପରିବାର ପୁଣିଥରେ ହସି ଉଠନ୍ତା ବୋଲି ସ୍ଥାନୀୟ ଲୋକେ କୁହନ୍ତି।

ରବି ପଟ୍ଟନାୟକଙ୍କ ରିପୋର୍ଟ