assembly

  • ବିଧାନସଭାର ଶୀତ ଅଧିବେଶନ

    ଭୁବନେଶ୍ୱର: ଗୁରୁବାର ଷୋଡ଼ଶ ବିଧାନସଭାର ଏକାଦଶ ଅଧିବେଶନ। ଦୀର୍ଘ ୩୩ ଦିନ ଧରି ଚାଲିବାକୁ ଥିବା ଏହି ଅଧିବେଶନ ବେଶ୍ ସରଗରମ ରହିବ। ଅଧିବେଶନର ପ୍ରଥମ ଦିନରେ ୨୦୨୨-୨୩ ଆର୍ଥିକ ବର୍ଷ ପାଇଁ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଅତିରିକ୍ତ ବଜେଟ୍ ଉପସ୍ଥାପନ କରିବେ। ବିଧାନସଭାରେ ମାଳ ମାଳ ପ୍ରସଙ୍ଗକୁ ନେଇ ସରକାରଙ୍କୁ ଘେରିବାକୁ ବିରୋଧୀ ରଣନୀତି କରିଛନ୍ତି। ଚାଷ, ଚାକିରୀ, ମନରେଗା ଦୁର୍ନୀତି, ଅର୍ଚ୍ଚନା ଲିଂକ୍, ଧର୍ମେନ୍ଦ୍ର ସାହୁ ସୁଇସାଇଡ୍, ଏକାଧିକ ସ୍ଥାନରେ ନୂଆ ଜିଲ୍ଲା ଦାବି, ରେଳ ଦୁର୍ଘଟଣା ଆଦି ଅନେକ ପ୍ରସଙ୍ଗ ରହିଛି ବିରୋଧୀଙ୍କ ପାଖରେ। ସେଥିଲାଗି ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ବାସଭବନରେ ବିଜେପି ବିଧାୟକ ଦଳ ବୈଠକ ବସି ପ୍ରାୟ ୧୯ଟି ପ୍ରସଙ୍ଗକୁ ଧରି ନିଜର ରଣନୀତି କରିଥିଲା ବେଳେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ବିଧାନସଭା ପ୍ରକୋଷ୍ଠରେ  ବସିଥିଲା କଂଗ୍ରେସ ବିଧାୟକ ଦଳ ବୈଠକ। ସେପଟେ ଗୁରୁବାର ସାଢ଼େ ଦଶଟାରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବିଧାନସଭାର ୫୪ ନମ୍ୱର ପ୍ରକୋଷ୍ଠରେ ବସିବ ବିଜେଡି ବିଧାୟକ ଦଳ ବୈଠକ। ତେବେ ବିରୋଧୀଙ୍କ ସମସ୍ତ ପ୍ରଶ୍ନର ଉତ୍ତର ଦେବାକୁ ଶାସକ ଦଳ ପ୍ରସ୍ତୁତ ବୋଲି କହିଛନ୍ତି ସରକାରୀ ଦଳ ମୁଖ୍ୟ ସଚେତକ। ବିଧାନସଭାକୁ ସୁରୁଖୁରୁରେ ଚଲାଇବାକୁ ସମସ୍ତେ ଯତ୍ନବାନ ହେବା ଜରୁରୀ।

    ଅଧିବେଶନ ଲାଗି ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରିଛି କମିଶନରେଟ ପୁଲିସ। ରାଲି, ଧାରଣା ଓ ସୁରକ୍ଷାକୁ ନଜରରେ ରଖି ୫ଟି କଣ୍ଟ୍ରୋଲ ରୁମ୍ ରହିବ। ଡିଜି ଓ ସିପି ପ୍ରମୁଖ ବିଧାନସଭା ଗସ୍ତ କରି ସୁରକ୍ଷା ସ୍ଥିତି ସମୀକ୍ଷା ସହ ଯାଞ୍ଚ କରିଛନ୍ତି। ୩୪ ପ୍ଲାଟୁନ ଫୋର୍ସ ମୁତୟନ ସହ ଷ୍ଟ୍ରାଇକିଂ ଫୋର୍ସ, କୁଇକ୍ ରେସପନ୍ସ ଟିମ୍, ଆର୍ମଡ ପୁଲିସ ସହ ସାଦା ପୋଷାକଧାରୀ ମୁତୟନ ହେବେ।

    ପଦ୍ମପୁର ଉପନିର୍ବାଚନ ବେଳେ ବିଧାନସଭା ଅଧିବେଶନ ଆରମ୍ଭ ହେଉଥିବାରୁ ଶାସକ ଓ ବିରୋଧୀ ପାରୁ ପର୍ଯ୍ୟନ୍ତ ନିଜ ନିଜ ପ୍ରସଙ୍ଗକୁ ଅଧିକ ଶାଣିତ କରିବାକୁ ଚେଷ୍ଟା କରିବେ। ଏଥର କୋଭିଡ୍ କଟକଣା ହଟିବା ସହ ବିଧାନସଭା ସ୍ୱାଭାବିକ ଚାଲିବାକୁ ଥିବାରୁ ପ୍ରସଙ୍ଗ ସହ ଅଧିବେଶନ ବେଶ୍ ସରଗରମ ରହିବ।

  • ଆଜି ଫ୍ଲୋର ଟେଷ୍ଟ

    ପାଟଣା: ଆଜି ଫ୍ଲୋର ଟେଷ୍ଟ। ବିହାର ବିଧାନସଭାରେ ଆଜି ବହୁମତ ପରୀକ୍ଷା ଦେବେ ନୀତିଶ- ତେଜସ୍ୱୀ ମହାମେଣ୍ଟ ସରକାର। ତା ପୂର୍ବରୁ ଆଜି ସକାଳୁ ସକାଳୁ ପାଟନାରେ କେନ୍ଦ୍ରୀୟ ଯାଞ୍ଚ ଏଜେନ୍ସିଂ ସିବିଆଇର ରେଡ୍ । ଗଠବନ୍ଧନ ସରକାରରେ ଥିବା ରାଷ୍ଟ୍ରୀୟ ଜନତା ଦଳ ଆରଜେଡିର ବିଧାନ ପରିଷଦ ସଦସ୍ୟ ସୁନୀଲ ସିଂହଙ୍କ ଘରେ ରେଡ୍ କରିଛି । ସୁନୀଲ ସିଂହ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ଅତି ଘନିଷ୍ଠ ବୋଲି କୁହାଯାଉଛି। ରେଲୱେରେ ନିଯୁକ୍ତି ଏବଂ ଜମି ଜାଲିଆତି ମାମଲାରେ ସିବିଆଇ ରେଡ୍ କରୁଛି । ଉଦ୍ଦେଶ୍ୟମୂଳକ ଭାବେ ସିବିଆଇ ରେଡ୍ କରିଛି। ଆରଜେଡି ବିଧାୟକଙ୍କୁ ଜାଣିଶୁଣି ହଇରାଣ ହରକତ ଏବଂ ଡରାଇବା ପାଇଁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି କହିଛନ୍ତି ସୁନୀଲ ସିଂହ। 

  • ମୁଖ୍ୟମନ୍ତ୍ରୀ ପଦ ପାଇଁ କର୍ଣ୍ଣାଟକ କଂଗ୍ରେସରେ ଟଣାଓଟରା

    ବେଙ୍ଗାଲୁର: କର୍ଣ୍ଣାଟକ କଂଗ୍ରେସରେ ବିବାଦ। ଆସନ୍ତା ବର୍ଷ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବା ବେଳେ କଂଗ୍ରେସ ପୁଣି କ୍ଷମତାକୁ ଆସିବାକୁ ଆଶାବାଦୀ। ହେଲେ  ମୁଖ୍ୟମନ୍ତ୍ରୀ ପଦ ପାଇଁ ବରିଷ୍ଠଙ୍କ ମଧ୍ୟରେ ଚାଲିଛି ଟଣା ଓଟରା। ଅନେକ ନିଜକୁ ମୁଖ୍ୟମନ୍ତ୍ରୀ ପଦର ଦାବିଦାର ଭାବେ ଉପସ୍ଥାପନ କରୁଥିବା ବେଳେ ଦଳୀୟ କର୍ମକର୍ତ୍ତାଙ୍କ ମଧ୍ୟରେ ଦେଖାଦେଉଛି ଦ୍ୱନ୍ଦ୍ୱ। 

    ତେବେ ଅନେକଙ୍କ ମଧ୍ୟରେ ମୁଖ୍ୟମନ୍ତ୍ରୀ ପଦ ପାଇଁ ଆଶା ଥିବାକୁ ନେଇ ସେତେବେଳେ ଚର୍ଚ୍ଚା ହୋଇଛି, ଯେତେବେଳେ ଜଣେ ବରିଷ୍ଠ କଂଗ୍ରେସ ନେତା ମଙ୍ଗଳବାର କହିଲେ, ଦଳ ଆଗାମୀ ବିଧାନସଭା ନିର୍ବାଚନରେ ସଫଳତା ହାସଲ କରିବାକୁ ଜଣେ ଡ୍ୟାମେଜ କଣ୍ଟ୍ରୋଲ ଆଡୋଲୋଜିଙ୍କ ଆବଶ୍ୟକତା ରହିଛି। ସେ ଆହୁରି କହିଥିଲେ, କର୍ଣ୍ଣାଟକ କଂଗ୍ରେସରେ ବହୁ ମୁହଁ ରହିଛି, ଯେଉଁମାନେ ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ରହିଛନ୍ତି। ମୁଖ୍ୟତଃ ଦୁଇଟି ପ୍ରସଙ୍ଗକୁ ନେଇ ରାଜ୍ୟ କଂଗ୍ରେସର କର୍ମକର୍ତ୍ତାଙ୍କ ମଧ୍ୟରେ ଦେଖାଦେଇଛି ଦ୍ୱନ୍ଦ୍ୱ।

    ସେହି ବରିଷ୍ଠ ନେତା ଏହା ପରେ କହିଛନ୍ତି, ପୂରା ଗୋଟିଏ ଟର୍ମ ପୂରା କରିବାକୁ କ୍ଷମତା ରଖିଥିବା  ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୟା କେବଳ ନୁହଁନ୍ତି, ଏହି ଦୌଡରେ ତିହାର ଜେଲରୁ ଫେରିବା ପରେ ଡିକେ ଶିବକୁମାର ଯିଏ କଂଗ୍ରେସ ରାଜ୍ୟ ସଭାପତି ଭାବେ କାର୍ଯ୍ୟ କରୁଛନ୍ତି ରହିଛନ୍ତି। ଏହା ବ୍ୟତୀତ ଅନେକ ନେତାଙ୍କ ନାମକୁ ନେଇ ଚର୍ଚ୍ଚା ହେଉଛି।

    ତେବେ ବହୁବାର ଉଭୟ ସିଦ୍ଧରମେୟା ଓ ଶିବକୁମାର ସ୍ପଷ୍ଟି କରର ଦେଇଛନ୍ତି କି ସେମାନଙ୍କ ମଧ୍ୟରେ କୌଣସି ସନ୍ଦେହ ନାହିଁ। ତେବେ ବିଧାୟକ ଜମିର ଅହମଦ ଖାନ ଓ କେ ରାଘବେନ୍ଦ୍ର ହିଟନାଲ ଓ ଅନ୍ୟମାନଙ୍କର ସିଦ୍ଧରମେୟାଙ୍କୁ ମୁଖ୍ୟମନ୍ତ୍ରୀ କରିବାକୁ ସମର୍ଥନ ରହିଛି। ଶିବକୁମାର ପୂର୍ବରୁ କହିଛନ୍ତି, ଜଣେ ବ୍ୟକ୍ତିଙ୍କ ତୁଳନାରେ ପାର୍ଟିର ଗୁରୁତ୍ବ ତାଙ୍କ ପାଇଁ ଅଧିକ।

    ବରିଷ୍ଠ ନେତାଙ୍କ ଅନୁଯାୟୀ, ବରିଷ୍ଠ ଦଳିତ ନେତା ଡ ଜି ପରମେଶ୍ବର ଯିଏ ୮ ବର୍ଷଧରି କର୍ଣ୍ଣାଟକକୁ ସଫଳତାକୁ ଆଗେଇ ନେଇଛନ୍ତି, ଏଚ କେ ପାଟି, ବର୍ତ୍ତମାନର ଜାତୀୟ ସାଧାରଣ ସମ୍ପାଦକ ଓ ମହାରାଷ୍ଟ୍ର ଇନଚାର୍ଯ୍ୟ ମଧ୍ୟ ମୁଖ୍ୟମନ୍ତ୍ରୀ ପଦ ପାଇଁ ହକଦାର ରହିଛନ୍ତି। ତେବେ ଆଗାମୀ ନିର୍ବାଚନରେ ରାଜ୍ୟରେ କଂଗ୍ରେସ ୧୩୦ରୁ ଅଧିକ ସିଟ ହାସଲ କରିବାର ଲକ୍ଷ୍ୟ ରଖିଛି। ହେଲେ ହରିଆଣା କଂଗ୍ରେସରେ ଅଶୋକ ଗେହଲଟ ଓ ସଚିନ ପାଇଲଟଙ୍କ ମଧ୍ୟରେ ଦେଖାଦେଇଥିବା ବିବାଦରୁ ରାଜ୍ୟ କଂଗ୍ରେସକୁ ଶିକ୍ଷା ନେବାର ଅଛି, ଯେମିତି କର୍ଣ୍ଣାଟକରେ ସେପରି କୌଣସି ହାଇଡ୍ରାମା ହେବ ନାହିଁ।

  • ୨୦୨୨-୨୩ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପିତ

    ଭୁବନେଶ୍ୱର: ୨୦୨୨-୨୩ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରିଛନ୍ତି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ। ଚାଷୀଙ୍କ ବିକାଶ ଲାଗି ସରକାରଙ୍କ ପ୍ରତିବଦ୍ଧତାକୁ ବଜେଟରେ ଦର୍ଶାଇଥିଲା ବେଳେ ମହିଳାଙ୍କ ବିକାଶରେ ମିଶନ ଶକ୍ତିର ପ୍ରମୁଖ ଭୂମିକାକୁ ଅଗ୍ରାଧିକାର ଦେଇ ଆଶାନୁରୂପ ବ୍ୟୟବରାଦ ହୋଇଛି। ସାଧାରଣ ବଜେଟରେ ଲୋକଙ୍କୁ ଆଶ୍ୱସ୍ତ କରିବାକୁ ଭରପୁର ପ୍ରୟାସ କରିଛନ୍ତି ସରକାର।

    କାଳିଆ ଓ ବଳରାମ ଯୋଜନାରେ ଚାଷୀଙ୍କୁ ଅଧିକ ସଶକ୍ତ ଓ ସେମାନଙ୍କ ଆର୍ଥିକ ବିକାଶ ଦିଗରେ ସରକାର ପ୍ରତିଶୃତିବଦ୍ଧ। ସେଥିଲାଗି ଚାଷୀଙ୍କ ପାଇଁ ସୁଧ ରିହାତି ଯୋଜନାରେ ୮୯୩ କୋଟି ଟଙ୍କା ବ୍ୟୟବରାଦ ହୋଇଛି ବଜେଟରେ। ବଳରାମ ଯୋଜନାରେ ୫ ଲକ୍ଷ ଭୂମିହୀନ ଚାଷୀଙ୍କୁ ଜଏଣ୍ଟ ଲାଏବିଲିଟି ଗ୍ରୁପ ଜରିଆରେ ଅନ୍ତର୍ଭୁକ୍ତ କରି ସହଜରେ ଋଣ ଦେବାକୁ ଲକ୍ଷ୍ୟ ରଖିଛନ୍ତି ସରକାର। କାଳିଆ ଯୋଜନା ଚାଲୁ ରହିବ। ସେଥିଲାଗି ୧୮୭୪ କୋଟି ଟଙ୍କା ବ୍ୟୟବରାଦ ହୋଇଛି। ଏ ଯାବତ୍ କାଳିଆରେ ୩୮ ଲକ୍ଷ କ୍ଷୁଦ୍ର ଓ ନାମମାତ୍ର ଚାଷୀ ଏବଂ ୧୮ ଲକ୍ଷ ଭୂମିହୀନ ଚାଷୀ ପରିବାର ସହାୟତା ପାଇଛନ୍ତି। ଅଚଳ ଉଠା ଜଳସେଚନ ପ୍ରକଳ୍ପ ପୁନରୁଦ୍ଧାର ଯୋଜନାରେ ୨୦୨୨-୨୩ ଆର୍ଥିକ ବର୍ଷ ପାଇଁ ୧୯୫ କୋଟି ଟଙ୍କା ବ୍ୟୟରେ ହଜାରେ ଉଠା ଜଳସେଚନ ପଏଣ୍ଟର ପୁନରୁଦ୍ଧାର ହେବ।

    ଅତିରିକ୍ତ ୨ ଲକ୍ଷ ୬୩ହଜାର ହେକ୍ଟର ଜମିକୁ ଜଳସେଚନ ପାଇଁ ଆସନ୍ତା ୫ ବର୍ଷ ଭିତରେ ବୃହତ ଉଠା ଜଳସେଚନ ପ୍ରକଳ୍ପ ଲାଗି ୧୦ହଜାର୭୫୯ କୋଟି ଟଙ୍କା ବ୍ୟୟବରାଦ ଲକ୍ଷ୍ୟ ରଖାଯାଇଛି।  ମିଲେଟ୍ ମିଶନ ପାଇଁ ୩୬୨ କୋଟି, ମତ୍ସ୍ୟ ଓ ପଶୁପାଳନ କ୍ଷେତ୍ରରେ ୧୬୫୮ କୋଟି, ୧୨ହଜାର ୫ଶହ ଗଭୀର ନଳକୂଅ ଖନନ ପାଇଁ ୪ଶହ କୋଟି ଟଙ୍କା, ବିଜୁ କୃଷକ ବିକାଶ ଯୋଜନାରେ ୧୫ଶହ ଗୋଷ୍ଠୀ ଉଠା ଜଳସେଚନ ପାଇଁ ୪୨୨ କୋଟି ବ୍ୟୟବରାଦ ହୋଇଛି।

    ୨୦୨୨-୨୩ ଆର୍ଥିକ ବର୍ଷରେ କୋରାପୁଟର ଝଞ୍ଜାବତୀ ପ୍ରକଳ୍ପ କାମ ଆରମ୍ଭ ହେବ। ମହାନଦୀ-ଚିତ୍ରୋତ୍ପଳା ଦ୍ୱୀପ ଜଳସେଚନ ଓ ଦେଓ ପ୍ରକଳ୍ପ ଖୁବ ଶୀଘ୍ର ଜନସାଧାରଣଙ୍କୁ ଉତ୍ସର୍ଗ କରାଯିବ। ସର୍ବୋପରି ଚାଷୀଙ୍କ ସମସ୍ତ ଆବଶ୍ୟକତା ପୂରଣ ସହ ସମସ୍ତ ସେବାକୁ ଫାଇଭ-ଟି ଓ ମୋ ସରକାରରେ ଅନ୍ତର୍ଭୁକ୍ତ କରାଯାଇଛି। ବନ୍ୟା ନିୟନ୍ତ୍ରଣ, ଜଳବାୟୁର ପରିବର୍ତ୍ତନକୁ ତାଳ ଦେଇ କିଭଳି ଚାଷ କାର୍ଯ୍ୟ ଚାଲୁ ରହିବ, ସେ ନେଇ ବ୍ୟୟବରାଦ ହୋଇଛି।

    ନିମ୍ନମୁଖୀ ଅର୍ଥନୈତିକ ଚାପ ସତ୍ତ୍ୱେ ଚଳିତ ଆର୍ଥିକ ବର୍ଷରେ ରାଜ୍ୟ ଅର୍ଥନୀତିର ଅଭିବୃଦ୍ଧି ହାର ୮ରୁ ୮.୫ ପ୍ରତିଶତ ଭିତରେ ରହିବ ବୋଲି ଆକଳନ କରାଯାଇଛି। କୃଷି ବଜେଟ୍ ରେ ମୋଟ୍ ୨୧ହଜାର ୧୬୬ କୋଟି ଟଙ୍କାର ବ୍ୟୟବରାଦ ହୋଇଛି।

    ରଘୁନାଥ ସାହୁଙ୍କ ରିପୋର୍ଟ, ନକ୍ଷତ୍ର ନ୍ୟୁଜ୍…

  • ବିଧାନସଭାରେ ନୂପୁର ନିଆଁ

    ନୁପୁର ନିଆଁକୁ ନେଇ ବିଧାନସଭାରେ ହଙ୍ଗାମା। ବିରୋଧୀ ଦଳ ଭିତରେ ତୁତୁ ମେମେ ଏମିତି ଚାଲିଲା ଯେ, ବାରମ୍ୱାର ଗୃହ କାର୍ଯ୍ୟ ବାଧା ପାଇଥିଲା। ଆଉ ବିରୋଧୀ ବିଜେପି ଓ କଂଗ୍ରେସ ଭିତରେ କଥା କଟାକଟି ଦେଖି ନୀରବ ରହି ଏହି ଦୃଶ୍ୟକୁ ବେଶ୍ ଉପଭୋଗ କରୁଥିଲା ଯେମିତି ଶାସକ ଦଳ।

    ପ୍ରଶ୍ନକାଳ ଯାଏ ସବୁ ସୁରୁଖୁରୁରେ ଚାଲିଥିଲା। ହେଲେ ଶୂନ୍ୟକାଳକୁ ଯେମିତି ହାଇଜାକ୍ କରିନେଇଗଲା ନୁପୁର ନିଆଁ। ବିଜେପିର ପୂର୍ବତନ ମୁଖପାତ୍ର ନୁପୁର ଶର୍ମାଙ୍କୁ ସୁପ୍ରିମକୋର୍ଟ କଡ଼ା ଭର୍ତ୍ସନା କରିବା ପ୍ରସଙ୍ଗକୁ ନେଇ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କେନ୍ଦ୍ର ଉପରେ ବର୍ଷିଥିଲେ। ଏହାକୁ ଏକ ସମ୍ୱେଦନଶୀଳ ପ୍ରସଙ୍ଗ ବୋଲି ଅଭିହିତ କରି ବିଜେପିର ଆଭିମୁଖ୍ୟ କଅଣ ଜାଣିବାକୁ ଚାହିଁଥିଲେ ନରସିଂହ। କାରଣ ବିଜେପିର ମୁଖପାତ୍ର ଭାବରେ ନିଜର ରାଜନୈତିକ ଏଜେଣ୍ଡାକୁ ଚରିତାର୍ଥ କରିବାକୁ ଯାଇ ଦେଶର ନିରାପତ୍ତାକୁ ବିପଦରେ ପକାଇବାକୁ କିଏ ଲାଇସେନ୍ସ ଦେଲା ବୋଲି ପଚାରିଥିଲେ ଅଦାଲତ। ଆଉ ସୁପ୍ରିମ୍ ଭର୍ତ୍ସନାକୁ ଧରି କଂଗ୍ରେସ କେବଳ କେନ୍ଦ୍ରକୁ ଟାର୍ଗେଟ କରିନାହିଁ। ପାଲଟା ରାଜ୍ୟ ସରକାରଙ୍କ ଆଭିମୁଖ୍ୟ ଏ ଦିଗରେ କଅଣ ବୋଲି ପଚାରିଛି।

    ତେବେ କଂଗ୍ରେସକୁ ଉଦୟପୁର ହିଂସାର ନଜିର ଦେଇ କାଉଣ୍ଟର କରିଥିଲେ ବିରୋଧୀ ଦଳ ଉପନେତା ବିଷ୍ଣୁ ସେଠୀ। ଗୃହର ସଦସ୍ୟ ନଥିବା ନୁପୁରଙ୍କୁ ନେଇ କାହିଁକି ଗୃହରେ ଆଲୋଚନା ହେବ ବୋଲି ବିରୋଧ କରିଥିଲେ ବିଷ୍ଣୁ। ବିଜେପିତ ନୁପୁରଙ୍କୁ ନିଲମ୍ୱନ କରିଛି। ଉଦୟପୁର ହିଂସା ପାଇଁ ରାଜସ୍ଥାନର କଂଗ୍ରେସ ସରକାର ଇସ୍ତଫା ଦେଲେ କି। କଶ୍ମୀର ପଣ୍ଡିତ କଥା ଉଠାଇ କଂଗ୍ରେସକୁ ସମାଲୋଚନା କରିଥିଲେ ବିଷ୍ଣୁ।

    ନୁପୁରଙ୍କୁ ନେଇ ଗୃହରେ କଂଗ୍ରେସ ଓ ବିଜେପି ସଭ୍ୟ ମୁହାଁମୁହିଁ ହୋଇଥିଲା ବେଳେ ଶାସକ ଦଳ ନୀରବ ରହି ଦେଖୁଥିଲା ଏମାନଙ୍କ ଲଢେଇ। ଗୃହରେ ସ୍ୱାଭାବିକ ଅବସ୍ଥା ଫେରାଇବାକୁ ପ୍ରୟାସ କରିଥିଲେ ବାଚସ୍ପତି। ବାରମ୍ୱାର ମୁଲତବୀ ପରେ ବି ବିରୋଧୀଙ୍କ ପରସ୍ପର ବିରୋଧୀ ନାରାବାଜିରୁ ଅପରାହ୍ନ ୪ଟା ଯାଏ ଗୃହକୁ ମୁଲତବୀ କରିବାକୁ ବାଧ୍ୟ ହୋଇଥିଲେ ବାଚସ୍ପତି।

    ରଘୁନାଥ ସାହୁଙ୍କ ରିପୋର୍ଟ, ନକ୍ଷତ୍ର ନ୍ୟୁଜ୍..

  • ଅଗ୍ନିପଥ ଯୋଜନା ହଟାଇବାକୁ ମାନ ସରକାରର ଦାବି

    ଚଣ୍ଡିଗଡ: ପଞ୍ଜାବ ବିଧାନସଭାରେ ଅଗ୍ନିପଥ ସ୍କିମ ଉପରେ ରିଜୋଲୁସନ ପାସ କରି ହଟାଇବାକୁ କେନ୍ଦ୍ର ସରକାର ନିକଟରେ ଅପିଲ କରାଯାଇଛି। ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ନେତୃତ୍ବରେ ବିଧାନସଭାରେ ଆଜି କେନ୍ଦ୍ର ସରକାରଙ୍କ ନିକଟରେ ଏହି ସ୍କିମ ଉଠାଇନେବାକୁ ଅପିଲ କରାଯାଇଥିବା ସିଏମଓ ପକ୍ଷରୁ କୁହାଯାଇଛି।

    ଗୁରୁବାର ପଞ୍ଜାବ ବିଧାନସଭା ଗୃହରେ ମୁଖ୍ୟମନ୍ତ୍ରୀ କେନ୍ଦ୍ର ସରକାର ଦ୍ବାରା ବିନା କୌଣସି ଔପଚାରିକ ଘୋଷଣା ଓ ବିଚାର ବିମର୍ଷରେ ସେନାରେ ଅଗ୍ନିପଥ ଯୋଜନାର ଆରମ୍ଭ ଦେଶବ୍ୟାପୀ ଏକ ପ୍ରକ୍ରିୟା ସୃଷ୍ଟି କରିଛି। ଏପରି ଯୋଜନା ଯୁବପିଢିଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି, ଯେଉଁମାନେ ସାରା ଜୀବନ ସେନା ପାଇଁ କାର୍ଯ୍ୟକରିବାକୁ ଚାହୁଁଛନ୍ତି।

    ମାନ ଆହୁରି ଗୃହକୁ ମନେ ପକାଇ ଦେଇଥିଲେ କି, ପଞ୍ଜାବରୁ ଏକ ଲକ୍ଷରୁ ଅଧିକ ସୈନିକ ସେନାରେ ଯୋଗ ଦେଇ ଦେଶ ସେବାରେ ନିୟୋଜିତ ଅଛନ୍ତି ଓ ବହୁ ସଂଖ୍ୟାରେ ଦେଶମାତୃକା ପାଇଁ ଜୀବନ ଦେଇଛନ୍ତି। ପଞ୍ଜାବ ଯୁବକମାନେ ସେମାନଙ୍କ କାର୍ଯ୍ୟଦକ୍ଷତା ପାଇଁ ବିଦିତ। କିନ୍ତୁ ସରକାର ଦ୍ବାରା ଆରମ୍ଭ ହୋଇଥିବା ଅଗ୍ନିପଥ ଯୋଜନା ସେମାନଙ୍କ ସ୍ବପ୍ନକୁ ଧୂଳିସାତ କରିବା ସହ ସେମାନଙ୍କ ମଧ୍ୟରେ ହତୋତ୍ସାହ ଭରି ଦେବ। ତେଣୁ ଏହାକୁ ତୁରନ୍ତ ନିରସ୍ତ୍ର କରିବାକୁ ମାନ ସରକାର ଅପିଲ କରିଛି।

  • ବିକ୍ରମ ହେଲେ ବାଚସ୍ପତି…

    ବିଧାନସଭାର ଗାରିମା ଓ ପଦମର୍ଯ୍ୟାଦା ରଖିବାକୁ ସଂକଳ୍ପବଦ୍ଧ। ସମସ୍ତଙ୍କର ସହଯୋଗ କାମନା କରି ବିଧାନସଭାର ୨୪ ତମ ବାଚସ୍ପତି ଭାବେ ଆସନ ଅଳଙ୍କୃତ କରିଛନ୍ତି ବିକ୍ରମ କେଶରୀ ଆରୁଖ। ସେପଟେ ବାଚସ୍ପତି ଭାବେ ନିରପେକ୍ଷତା ବଜାୟ ରଖିବା ସହ ବିରୋଧୀ ଦଳକୁ ବିଶ୍ୱାସ ଓ ଅଧିକ ସୁଯୋଗ ଦେବାକୁ ଅପିଲ କରିଛନ୍ତି ବିରୋଧୀ ଦଳ।
    ନିର୍ଦ୍ୱନ୍ଦରେ ନିର୍ବାଚିତ ହେଲେ ବିକ୍ରମ କେଶରୀ ଆରୁଖ। ୨୪ତମ ବାଚସ୍ପତି ଭାବେ ବିଧାନସଭାକୁ ନିର୍ବାଚିତ ହୋଇଛନ୍ତି ଅଭିଜ୍ଞ ଆରୁଖ। ଏକମାତ୍ର ପ୍ରାର୍ଥୀ ଭାବେ ପ୍ରାର୍ଥୀପତ୍ର ଦାଖଲ କରିଥିବାରୁ ସେ ହିଁ ବାଚସ୍ପତି ହେବା ଥୟ ବୋଲି ଆଗରୁ ଜଣାଥିଲା।

    ସେଥିଲାଗି ତ ଆଜି ବିଧାନସଭାର ସ୍ୱତନ୍ତ୍ର ଅଧିବେଶନ ବସି ତାଙ୍କୁ ସର୍ବସମ୍ମତ ସମର୍ଥନ କରିବାକୁ ପ୍ରସ୍ତାବ ଆଣିଥିଲେ ଗୃହର ନେତା ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଆଉ ପ୍ରସ୍ତାବକୁ ସମର୍ଥନ କରିଥିଲେ ଶାସକ ଓ ବିରୋଧୀ ଦଳ ନେତା। ଆଉ ବାଚସ୍ପତି ଭାବେ ନିର୍ବାଚିତ ହେଲେ ବୋଲି ଉପ-ବାଚସ୍ପତି ଘୋଷଣା କରିବା ପରେ ବିକ୍ରମଙ୍କୁ ଆସନକୁ ପାଛୋଟି ନେଇଥିଲେ ମୁଖ୍ୟମନ୍ତ୍ରୀଙ୍କ ସମେତ ତୁଙ୍ଗ ନେତା। ଆସନରେ ବସିବା ପରେ ଆସନର ମର୍ଯ୍ୟାଦା, ଗୃହର ଗାରିମା ବଜାୟ ରଖିବାକୁ ସମସ୍ତଙ୍କ ସହଯୋଗ ଲୋଡିଛନ୍ତି ବାଚସ୍ପତି।

    ସେପଟେ ବାଚସ୍ପତି ଭଳି ନିରପେକ୍ଷ ଆସନରେ ବସି କୌଣସି ପକ୍ଷପାତିତାକୁ ପ୍ରଶ୍ରୟ ନ ଦେବା, ବିରୋଧୀଙ୍କୁ ବିଶ୍ୱାସକୁ ନେଇ ଅଧିକ ସୁଯୋଗ ଦେବା ଭଳି ଆଶା ରଖିଥିଲେ ବିରୋଧୀ ଦଳ। ଅନେକ ଅଭିଜ୍ଞତା ଓ ଅନୁଭବର ଆଧାରରେ ଗୃହ ପରିଚାଳନା ସୁରୁଖୁରୁରେ ସମ୍ପନ୍ନ କରିବେ ବୋଲି ଆଶାବାଦୀ ବିରୋଧୀ। ବାଚସ୍ପତି ଭାବେ ନିର୍ବାଚିତ ହେବା ପରେ ଦଳରୁ ଇସ୍ତଫା ଦେବାର ପରମ୍ପରା କେବେଠୁ ଆଉ ନାହିଁ। ଅଭିନନ୍ଦନ ଆଳରେ ଶାସକ ଦଳର ଚିନ୍ତାଧାରାରେ ପରିବର୍ତ୍ତନ ଆଶା ରଖିଛନ୍ତି ବିରୋଧୀ। ସେପଟେ ଗୃହକୁ ପରିଚାଳନା ଦିଗରେ ସମସ୍ତ ସଭ୍ୟ ବାଚସ୍ପତିଙ୍କୁ ସହଯୋଗ କରିବାକୁ ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ।

    ୨୪ ତମ ବାଚସ୍ପତି ଭାବେ ଦାୟିତ୍ୱ ନେଇଛନ୍ତି ବିକ୍ରମ କେଶରୀ ଆରୁଖ। ଗୃହର ଗାରିମା, ଶାସକ ବିରୋଧୀଙ୍କୁ ଗୋଟିଏ ଦୃଷ୍ଟିରେ ଦେଖି ବିଧିବ୍ୟବସ୍ଥା ଭିତରେ ଗୃହର ସୁପରିଚାଳନା କରିବାର ଗୁରୁଭାର ଏବେ ଆରୁଖଙ୍କ ଉପରେ।

    • ଦୁଷ୍ମନ୍ତ ବେହେରାଙ୍କ ସହ ପ୍ରଦୀପ ନାୟକଙ୍କ ରିପୋର୍ଟ
Back to top button