BHUBANESWAR

ଭୁବନେଶ୍ୱର: ମାଟିରେ ମିଶିଲା ଭୁବନେଶ୍ୱରର ଚର୍ଚ୍ଚିତ କିଶୋର ମଟନ ହୋଟେଲ। ବିଏମସି  ଅଧିକାରୀ , ବିଏମସି ଏନଫୋର୍ସମେଣ୍ଟ ଟିମ୍ ଓ ପୋଲିସର ଉପସ୍ଥିତିରେ ଉଚ୍ଛେଦ କରାଯାଛି। ପ୍ରଥମେ ଦୁଇ ଦିନ ତଳେ ଏହା ଉପରେ ଚଢାଉ ହୋଇଥିଲା। ଆଜି ଏହାକୁ ମାଟିରେ ମିଶେଇଛି ବିଏମସି। ହୋଟେଲଟି ସରକାରୀ ଜାଗାରେ ରହିଥିବା ବେଳେ ଜାଗାଟିକୁ ଜବତ ଦଖଲ କରିଥିଲେ କିଶୋର। ସେପଟେ ଏହାକୁ  ନେଇ  ବିଏମସି କମିଶନର ପ୍ରତିକ୍ରିୟା ରଖିଛନ୍ତି। କହିଛନ୍ତି ଏହି ହୋଟେଲକୁ ନେଇ ଜନସାଧାରଣଙ୍କର ବହୁ ଅଭିଯୋଗ ଥିଲା। ଏହି ହୋଟେଲ ଯୋଗୁଁ ଟ୍ରାଫିକ୍ ସମସ୍ୟା ଉପୁଜୁଥିଲା। ତେଣୁ ଏହାକୁ  ଉଚ୍ଛେଦ କରାଯାଇଛି। ଯେଉଁମାନେ ବ୍ୟବସାୟ କରୁଛନ୍ତି ପ୍ରପର ୱେରେ କରନ୍ତୁ ବୋଲି ବିଏମସି ପକ୍ଷରୁ ସୂଚନା ଦିଆଯାଇଛି।

ଭୁବନେଶ୍ବର: ଭୁବନେଶ୍ୱରରେ ସୂର୍ଯ୍ୟକିରଣ ଏୟାର ସୋର  ସରିଲା ଅଭ୍ୟାସ। ଆସନ୍ତାକାଲି ରାଜଧାନୀବାସୀ ବାୟୁସେନାର ଏୟାର ସୋ ଦେଖିବା ଆଗରୁ ଆଜି ଦେଖିଛନ୍ତି ଅଭ୍ୟାସ। ପ୍ରାୟ ୨୦ ମିନିଟ୍ ଧରି ଆକାଶମାର୍ଗରେ ଫୁଲ୍ ଡ୍ରେସ୍ ରିହଲସଲ କରିଛି ବାୟୁସେନା। ଆଉ ଏହାକୁ ଦେଖିବାକୁ କୁଆଖାଇ ନଦୀପଠା ବେଶ୍ ଲୋକାରଣ୍ୟ ହୋଇପଡ଼ିଥିଲା।

ଆଜାଦିର ଅମୃତ ମହୋତ୍ସବ ଅବସରରେ ଭୁବନେଶ୍ୱରରେ ହେବାକୁ ଯାଉଛି ବାୟୁସେନାର ସୂର୍ଯ୍ୟକିରଣ ଏୟାର ସୋ। କୁଆଖାଇ ନଦୀପଠା ବାଲିଯାତ୍ରା ପଡ଼ିଆରେ ଶୁକ୍ରବାର ଏହାକୁ ଉପଭୋଗ କରିବେ ରାଜଧାନୀ ବାସିନ୍ଦା। କିନ୍ତୁ ତା ଆଗରୁ ଆଜି ଫୁଲ୍ ଡ୍ରେସ ରିହଲସଲ ଦେଖି ବେଶ୍ ଆନନ୍ଦ ଉଠାଇଛନ୍ତି ଲୋକେ। ବାୟୁସେନାର ୯ଟି ହକ୍ ବିମାନ ଆକାଶମାର୍ଗରେ ନିଜର ସାହସିକତା ଦେଖାଇଛି। ୨୦ ମିନିଟ୍ ଧରି କଳାକୌଶଳ ଦେଖାଯାଇଛି। ଏହାକୁ ଦେଖିବାକୁ ନାହିଁ ନଥିବା ଭିଡ଼ ପରିଲକ୍ଷିତ ହୋଇଥିଲା ନଦୀପଠାରେ। ସେଥିଲାଗି କମିଶନରେଟ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା। ସୁରକ୍ଷା ଦୃଷ୍ଟିରୁ ୨୦ ପ୍ଲାଟୁନ୍ ଫୋର୍ସ ମୁତୟନ ସହ ଶହେ ଜଣ ବରିଷ୍ଠ ଅଧିକାରୀଙ୍କୁ ଦାୟିତ୍ୱ ବଣ୍ଟନ କରାଯାଇଛି।

ସେପଟେ ଶୁକ୍ରବାର ବାୟୁସେନାର ସୂର୍ଯ୍ୟକିରଣ ସୋ ସକାଳ ୧୦ଟା ୧୬ରୁ ଦେଖିବାକୁ ପାଇବେ ରାଜଧାନୀ ବାସିନ୍ଦା। କେବଳ ରାଜଧାନୀ କାହିଁକି, ଆଖପାଖ ଜିଲ୍ଲାରୁ ବି ଲୋକେ ଛୁଟି ଆସିବେ ଏହାକୁ ଉପଭୋଗ କରିବାକୁ। ଟ୍ରାଫିକ ସମସ୍ୟା ନ ଉପୁଜିବା ଲାଗି ବିଭିନ୍ନ ସ୍ଥାନରେ ବ୍ୟାପକ ପୁଲିସ ମୁତୟନ କରାଯାଇଛି। ଲୋକେ ଆଜିର ଫୁଲ୍ ଡ୍ରେସ୍ ରିହଲସଲ ଦେଖି ବେଶ୍ ଉପଭୋଗ କରିଛନ୍ତି। ନିକଟରୁ ଏଭଳି ସୋ ଦେଖିବାକୁ ମଉକା ମିଳିଥିବାରୁ ଏହାକୁ ହାତଛଡ଼ା କରିବାକୁ ଚାହିଁନାହାନ୍ତି।

ପ୍ରଥମ ପର୍ଯ୍ୟାୟରେ ୯ଟି ବିମାନ ଏକା ସାଙ୍ଗରେ ଉଡ଼ିଥିଲା। ଦ୍ୱିତୀୟ ପର୍ଯ୍ୟାୟରେ ଦୁଇଟି ଲେଖାଏଁ ବିମାନ ୧୬ଶହ କିଲୋମିଟର ପ୍ରତି ଘଣ୍ଟା ବେଗରେ ୨ଶହରୁ ୩ଶହ ଫୁଟ୍ ଉଚ୍ଚରେ ସୋ ଦେଖାଇଛନ୍ତି।

ନବକିଶୋର ସାହୁଙ୍କ ରିପୋର୍ଟ

ଭୁବନେଶ୍ବର: ରାଜଧାନୀରେ ପୁଣି ଜଣେ ଛାତ୍ରଙ୍କ ଆତ୍ମହତ୍ୟା ଅଭିଯୋଗ। ମୃତ ଛାତ୍ର ଜଣଙ୍କ ହେଲେ ପାରିକୁଦ ଅଞ୍ଚଳର ଜ୍ୟୋତି ପ୍ରକାଶ ପଲେଇ। ଇନଫୋଭ୍ୟାଲି ଥାନା ଅଧୀନ ଏକ ଘରୋଇ କଲେଜରେ ପଢ଼ୁଥିବା ଜ୍ୟୋତିଙ୍କ ଝୁଲନ୍ତା ମୃତଦେହ ଉଦ୍ଧାର କରିଛି ପୋଲିସ ।

ପାରିକୁଦ ଅଞ୍ଚଳର ଜ୍ୟୋତିପ୍ରକାଶ ପଲେଇ ଇନଫୋଭ୍ୟାଲି ଥାନା ଅଧୀନରେ ଏକ ଘରୋଇ କଲେଜରେ ଯୁକ୍ତ ୨ ପ୍ରଥମ ବର୍ଷର ଛାତ୍ର ଥିଲେ ପଢୁଥିଲେ। ଗତକାଲି ରାତି ପ୍ରାୟ ସାଢ଼େ ୮ଟା ବେଳେ ଖାଇବା ଲାଗି ଜ୍ୟୋତିଙ୍କ ରୁମରେ ରହୁଥିବା ସାଙ୍ଗ ବାହାରକୁ ଯାଇଥିଲେ। ଏହି ସମୟରେ ଜ୍ୟୋତି ଫ୍ୟାନରେ ରଶି ଲଗେଇ ଝୁଲିଯାଇଥିଲେ।

ତାଙ୍କ ସାଙ୍ଗ ରୁମକୁ ଫେରି ଦେଖିବାକୁ ପାଇଥିଲେ  ଜ୍ୟୋତିଙ୍କୁ ଝୁଲନ୍ତା ଅବସ୍ଥାରେ।

ଏହା ଦେଖି ସାଙ୍ଗ ଭୟଭୀତ ହୋଇଯାଇଥିଲେ ଓ ହଷ୍ଟେଲ ସୁପରିଣ୍ଟେଣ୍ଡେଣ୍ଟକୁ ଖବର ଦେଇଥିଲେ। ସଙ୍ଗେ ସଙ୍ଗେ ପୁଲିସକୁ ସୂଚନା ଦିଆଯାଇଥିଲା।

ତେବେ ଆତ୍ମହତ୍ୟାର କାରଣ ଅସ୍ପଷ୍ଟ ରହିଛି। ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ଲାଗି ପଠାଇବା ସହ ସାଇଣ୍ଟିଫିକ ଟିମ ଜରିଆରେ ଘଟଣାର ଖୋଳତାଡ ଆରମ୍ଭ କରିଛି ।

ଭୁବନେଶ୍ବର: ପୂଜା ପୂର୍ବରୁ ଚୁକ୍ତିଭିତ୍ତିକ କର୍ମଚାରୀଙ୍କୁ ମିଳିପାରେ ଖୁସି ଖବର । ଓଡିଶା ସରକାରୀ ଚୁକ୍ତିଭିତ୍ତିକ କର୍ମଚାରୀ ମହାସଂଘ ଓ ରାଜ୍ୟ ସରକାରଙ୍କ ମଧ୍ୟରେ ହୋଇଥିବା ଆଲୋଚନା ସଫଳ ହୋଇଥିବା ସୂଚନା। ତେଣୁ ଆଗାମୀ ୧୫ ଦିନ ଭିତରେ ସରକାର ଏହାର ସମାଧାନ କରିବା ଆଶା କରାଯାଉଛି।

 ୪୨ ଟି ବିଭାଗର ୭୦ ହଜାର  ସମସ୍ତ ଚୁକ୍ତିଭିତ୍ତିକ କର୍ମଚାରୀ ସେମାନଙ୍କ ସ୍ଥାୟୀ ନିଯୁକ୍ତି ଓ ଅନ୍ୟାନ୍ୟ ଦାବି ନେଇ କରିଥିଲେ ଦାବି। ଫଳରେ ରାଜ୍ୟ ସରକାରଙ୍କ ବିଭିନ୍ନ ବିଭାଗର କାର୍ଯ୍ୟ ପ୍ରଭାବିତ ହୋଇଥିଲା। ଏହାକୁ ନେଇ ଓଡିଶା ସରକାରୀ ଚୁକ୍ତିଭିତ୍ତିକ କର୍ମଚାରୀ ମହାସଂଘ ସହ ସରକାରଙ୍କ ପକ୍ଷରୁ ହୋଇଥିଲା ଆଲୋଚନା। ଆଲୋଚନା ସଫଳ ହୋଇଥିବା ସୂଚନା ମିଳିବା ପରେ ଆନ୍ଦୋଳନକାରୀଙ୍କ ମଧ୍ୟରେ ଦେଖାଦେଇଛି ଖୁସି।

ପୂଜା ପୂର୍ବରୁ ଭଲ ଖବର ମିଳିବା ନେଇ ମହାସଂଘ ଆଶା ରଖିଛି। ଯଦି ପୂର୍ବପରି ସରକାରଙ୍କ ପ୍ରତିଶ୍ରୁତି ପାଣିର ଗାର ସାବ୍ୟସ୍ତ ହୁଏ ତେବେ ପରବର୍ତ୍ତୀ କାର୍ଯ୍ୟପନ୍ଥା ଗ୍ରହଣ କରାଯିବ ବୋଲି ସଂଘ କହିଛି।

ଭୁବନେଶ୍ୱର: ଇନଷ୍ଟିଚ୍ୟୁଟ୍ ଫର୍ ଟେକ୍ନୋଲୋଜି ଆଣ୍ଡ ରିସର୍ଚ୍ଚ (ITRESEARCH) ଏହାର ବାର୍ଷିକ ଦିବସ 2022 ପାଳନ କରିଛି। ଭୁବନେଶ୍ୱର (କେନ୍ଦ୍ରୀୟ) ବିଧାୟକ ଅନନ୍ତ ନାରାୟଣ ଜେନା ଏହି ଉତ୍ସବରେ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ। ଯୁବ ଅନୁସନ୍ଧାନକାରୀ ତଥା ସମାଜର ବିକାଶରେ ଅନୁସନ୍ଧାନ ଏବଂ ବିକାଶର ଭୂମିକା ଉପରେ ସେ ଗୁରୁତ୍ୱାରୋପ କରିଥିଲେ। ବିଭିନ୍ନ ଇଞ୍ଜିନିୟରିଂ ଏବଂ ବିଜ୍ଞାନ ଅନୁସନ୍ଧାନ ପାଇଁ ଓଡିଶା ସରକାର ଯୋଗାଇଥିବା ଭିତ୍ତିଭୂମି ବିଷୟରେ ସେ ସଂକ୍ଷେପରେ ଆଲୋଚନା କରିଥିଲେ।

ବିଧାୟକ ଜେନା ଓଡିଶାର ଯୁବ ଉଦ୍ୟୋଗୀମାନଙ୍କୁ ଅଧିକ ଉଦ୍ୟୋଗ ଆରମ୍ଭ କରିବାକୁ ଆହ୍ୱାନ କରିଛନ୍ତି ଯାହା ରାଜ୍ୟର ଅର୍ଥନୀତିରେ ସହାୟକ ହେବ ଏବଂ ନିଯୁକ୍ତି ସୁଯୋଗ ସୃଷ୍ଟି କରିବ। ପରେ, ସେ ଯଥାକ୍ରମେ ଶ୍ରେଷ୍ଠ କର୍ମଚାରୀ 2022, ଷ୍ଟାର୍ କର୍ମଚାରୀ 2022 ଏବଂ ସର୍ବୋତ୍ତମ ନେତୃତ୍ୱ 2022 ପୁରସ୍କାର ପ୍ରଦାନ କରିଥିଲେ | ଏହି ଅବସରରେ, ITRESEARCH ର ନୂତନ କର୍ମଚାରୀମାନଙ୍କୁ ସ୍ୱାଗତ କରାଯାଇଥିଲା ଏବଂ ସମ୍ମାନିତ କରାଯାଇଥିଲା |

ବିଜନ କୁମାର ବାରିକ, ନିର୍ଦେଶକ, ITRESEARCH, Covid-19 ମହାମାରୀର କଷ୍ଟ ସମୟରେ ସେମାନଙ୍କ ସମର୍ଥନ ବିସ୍ତାର କରିଥିବାରୁ କମ୍ପାନୀ ସଦସ୍ୟମାନଙ୍କୁ କୃତଜ୍ଞତା ଜଣାଇଛନ୍ତି। ଇନଷ୍ଟିଚ୍ୟୁଟ୍ ଅଫ୍ ରିସର୍ଚ୍ଚ ଆଣ୍ଡ ଜର୍ଣ୍ଣାଲ୍ (IRAJ) ସହିତ ମିଳିତ ଭାବରେ ITRESEARCH ଦ୍ୱାରା ନିଆ ଯାଇଥିବା ଅନେକ ପଦକ୍ଷେପ ଉପରେ ସେ ଆଲୋକପାତ କରିଥିଲେ ଏବଂ ପରେ ଓଡିଶାକୁ ବିଜ୍ଞାନ ଅନୁସନ୍ଧାନ ଷୟିକ କ୍ଷେତ୍ରରେ ଏକ ନୂତନ ଉଚ୍ଚତାକୁ ନେବାକୁ ଆହ୍ୱାନ ଦେଇଥିଲେ।

ଭୁବନେଶ୍ବର: ଏୟାରଫିଲ୍ଡ ଅଧୀନ ଜାମୁକୋଳି ଅଞ୍ଚଳରେ ଥିବା ନର୍ସିଙ୍ଗ କଲେଜରୁ ନର୍ସିଙ୍ଗ ଛାତ୍ରୀଙ୍କ ମୃତଦେହ ମିଳିବା ଘଟଣାରେ ପୋଲିସ ହାତରେ ସୁଇସାଇଡ ନୋଟ । ନୋଟରେ କ୍ଷମା ମାଗିବା ସହ କାହାର କୌଣସି ଭୁଲ ନଥିବା ଉଲ୍ଲେଖ କରିଛନ୍ତି ନର୍ସିଙ୍ଗ ଛାତ୍ରୀ କୁନି । ସେପଟେ ବଡିକୁ  ବ୍ୟବଛେଦ ପାଇଁ ପଠାଇଛି ପୋଲିସ । ଅନ୍ୟପଟେ ଗୋଟିଏ ଦିନରେ ରାଜଧାନୀରୁ ଉଦ୍ଧାର ହୋଇଛି ଆଉ ଦୁଇଟି ମୃତଦେହ ।

ଗୋଟିଏ ଦିନରେ ୩ ମୃତଦେହ ଉଦ୍ଧାର କଲା କମିଶନରେଟ ପୋଲିସ ନନ୍ଦନକାନନ ଥାନା ଅନ୍ତର୍ଗତ କଲଝରି ରେଲୱେ ଷ୍ଟେସନ ପାଖରୁ ଜଣେ ଯୁବକଙ୍କ  ମୃତଦେହ ଉଦ୍ଧାର ହୋଇଛି । ଏହା ଆତ୍ମହତ୍ୟା ବୋଲି ପ୍ରାଥମିକ ତଦନ୍ତରୁ ସନ୍ଦେହ କରୁଛି ପୋଲିସ । ସେହିପରି ଭରତପୁର ଥାନା ଅଞ୍ଚଳର କଳିଙ୍ଗନଗର  କେ ସେଭେନ ର ଭଡା ଘରୁ ମିସ୍ତ୍ରୀ କାମ କରୁଥିବା ଜଣେ ୨୭ ବର୍ଷୀୟ ଯୁବକଙ୍କ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରାଯାଇଛି । ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପୋଲିସ ତଦନ୍ତ ଚଳାଇଛନ୍ତି ।

ଏୟାରଫିଲଡ଼ ଥାନା ଅଧୀନରେ ଥିବା ଜାମୁକୋଳି ଅଞ୍ଚଳର ଏକ ଘରୋଇ ନର୍ସିଙ୍ଗ କଲେଜରୁ ଉଦ୍ଧାର ହୋଇଛି ଛାତ୍ରୀଙ୍କ ମୃତଦେହ। ମୃତଛାତ୍ରୀ କୁନି କଅଁର। ଘର ବଲାଙ୍ଗୀର ଜିଲ୍ଲାରେ । 2021 ମସିହାରେ ନର୍ସିଙ୍ଗରେ ନାମ ଲେଖାଇ ଏହି ଘରୋଇ କଲେଜରେ ପଢୁଥିଲେ । କୌଣସି କାରଣକୁ ନେଇ କୁନି  ସବୁବେଳେ  ଚିନ୍ତାଗ୍ରସ୍ତ ରହୁଥିବା ନେଇ  କଲେଜ କର୍ତୃପକ୍ଷ କହିଛନ୍ତି। ସେପଟେ କୁନିର ଏଭଳି ଅବସ୍ଥା ଦେଖି ଭାଂଗିପଡିଛନ୍ତି ପରିବାର ଲୋକେ ।ପୋଲିସ ଉପରେ ଭରଷା କରି ନ୍ୟାୟ ଭିକ୍ଷା କରିଛନ୍ତି ।

କୁନିଙ୍କ ହାତଲେଖା ଏକ ଖାତା ମିଳିଥିବା ବେଳେ ତାଙ୍କ ମୃତ୍ୟୁ ସହ କାହାର ସମ୍ପର୍କ ନାହିଁ ଓ ଏଥିପାଇଁ କାହାକୁ ଦାୟୀ କରି କଷ୍ଟ ଦେବାକୁ ଚାହୁଁ ନ ଥିବା ଖାତାରେ ଉଲ୍ଲେଖ କରିଛନ୍ତି ନର୍ସିଙ୍ଗ ଛାତ୍ରୀ କୁନି । ସେପଟେ ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ଭୁବନେଶ୍ୱର ଡିସିପି। ହାତ ଲେଖା କୁନିଙ୍କର କି ନୁହେଁ ସେ ନେଇ ଯାଞ୍ଚ କରାଯାଉଛି ଓ ମୃତ୍ୟୁ ର କାରଣ ପ୍ରାୟ ସ୍ପଷ୍ଟ ହୋଇଛି।  ଯାହା ରହିଛି ତାହା ଯଥାଶୀଘ୍ର ସ୍ପଷ୍ଟ ହେବ ।

ତେବେ ୨୪ ଘଣ୍ଟା ଭିତରେ ତିନୋଟି ଆତ୍ମହତ୍ୟା ଖବର ସମସ୍ତଙ୍କୁ ବିଚଳିତ କରିଛି। କାହିଁକି  ପଥଭ୍ରଷ୍ଟ ହେଉଛନ୍ତି ଯୁବପିଢି! କାହିଁକି ନେଉଛନ୍ତି ଆତ୍ମହତ୍ୟା ଭଳି ଚରମ ନିଷ୍ପତି..? ଏହାର କାରଣ, ନିରାକରଣ, ପୋଲିସ ର ତଦନ୍ତ ଓ ଏହାକୁ ମୁକାବିଲା ପାଇଁ କମିଶନରେଟ ପୋଲିସ ତରଫରୁ କରାଯାଇଥିବା କର୍ମଶାଳା ଓ  ଏଥିରୁ ଅଧ୍ୟୟନ କରିଥିବା ତଦନ୍ତକାରୀ ଅଫିସର କେତେଦୂର ଉପଯୋଗ କରୁଛନ୍ତି ତାହାରି ଉପରେ ନଜର ।

ସିମ୍ପୁଲ ନାୟକଙ୍କ ରିପୋର୍ଟ

ଭୁବନେଶ୍ବର: ରାଜଧାନୀରେ ଛାତ୍ରୀଙ୍କ ଆତ୍ମହତ୍ୟା। ମୃତକ ଜଣେ ନର୍ସିଂ ଛାତ୍ରୀ ଥିଲେ। ସେ ଏୟାର ଫିଲ୍ଡ ଥାନା ଅଧୀନରେ ରୁଥିଲେ। ପୁଲିସ ଘଟଣାର ତଦନ୍ତ ଚଳାଇଥିବା ବେଳେ କାରଣ ଅସ୍ପଷ୍ଟ ରହିଛି।

ରାଜଧାନୀର ଏୟାର ଫିଲ୍ଡ ଥାନା ଅଧୀନ ଜାମୁକୋଳି ଅଞ୍ଚଳରେ ଛାତ୍ରୀ ଜଣଙ୍କ ରହୁଥିଲେ। ରବିବାର ଦିନ ସେ ଆତ୍ମହତ୍ୟା କରିଦେଇଛନ୍ତି। ଖବର ପାଇ ପୁଲିସ ଘଟଣାସ୍ଥଳକୁ ଯାଇ ମୃତଦେହ ଜବତ କରିବା ସହ ପଚରାଉଚରା କରୁଛି। ତେବେ କିପରି ଓ କାହିଁକି ସେ ଆତ୍ମହତ୍ୟା କରିଛନ୍ତି ତାହା ଜଣାପଡି ନାହିଁ।

ଭୁବନେଶ୍ବର ଶାସ୍ତ୍ରୀନଗର ଶୁଭଶ୍ରୀ ମହାପାତ୍ର ମୃତ୍ୟୁ ଘଟଣାରେ  ବୟଫ୍ରେଣ୍ଡ ଚିତ୍ତରଞ୍ଜନକୁ କମିସନରେଟ୍ ପୋଲିସ ଗିରଫ କରିଛି। ଅଭିଯୁକ୍ତ ବୟଫ୍ରେଣ୍ଡ ନିଜର ଦୋଷ ସ୍ଵୀକାର କରିଛି। ଅଧିକ ଜେରା ପାଇଁ ପୋଲିସ ଚିତ୍ତରଞ୍ଜନକୁ ରିମାଣ୍ଡରେ ଆଣିବ। ତଦନ୍ତ ବେଳେ ବିଭିନ୍ନ ଲୋକଙ୍କ ବୟାନ ରେକର୍ଡ କରାଯାଇଥିବା ଡିସିପି ପ୍ରତୀକ ସିଂହ ଶୁକ୍ରବାର ସାମ୍ବାଦିକ ସମ୍ମିଳନୀରେ କହିଛନ୍ତି।

୨୦୧୪ରେ ଶୁଭଶ୍ରୀଙ୍କ ବାହାଘର ହୋଇଥିଲା । ଚିତ୍ତ ରଞ୍ଜନ ସତ୍ୟ ନଗରରେ ଡ୍ରାଇଭର କାମ କରନ୍ତି। ଅଛନ୍ତି। ୨୦୧୯ରେ ଚିତ୍ତ ଓ ଶୁଭଶ୍ରୀଙ୍କ ମଧ୍ୟରେ ସମ୍ପର୍କ ଗଢି ଉଠିଥିଲା। ସଂପର୍କ ବଢିବା ସହ ଉଭୟ ଲଜ୍‌ରେ ରହୁଥିଲେ ଏବଂ ବାହାରେ ବୁଲାବୁଲି କରୁଥିଲେ।  ଶୁଭଶ୍ରୀଙ୍କ  ପରପୁରୁଷ ସହ ସଂପର୍କକୁ ନେଇ ସ୍ଵାମୀ ସନ୍ଦେହ କରୁଥିଲେ। ତେବେ ଅନ୍ୟ ଜଣେ ପୁରୁଷଙ୍କ ସହ ଶୁଭଶ୍ରୀ ମିଳାମିଶା କରିବାକୁ ନେଇ ଚିତ୍ତ ରାଗି ଏଣୁତେଣୁ କହିଥିଲେ। ତେବେ ଶୁଭଶ୍ରୀଙ୍କ ସହ ଚିତ୍ତରଞ୍ଜନଙ୍କ ପ୍ରବଳ ଝଗଡା ହୋଇଥିଲା। ଝଗଡା ପରେ ଶୁଭଶ୍ରୀ ମାନସିକ ଚାପରେ ଥିଲେ।

ଆତ୍ମହତ୍ୟା ପୂର୍ବରୁ ସେ ଚିତ୍ତରଞ୍ଜନଙ୍କୁ ଶେଷ ଥର କଲ୍ କରିଥିଲେ ଏବଂ ଆତ୍ମହତ୍ୟା କରିବେ ବୋଲି କହିଥିଲେ। ଏହାପରେ ଚିତ୍ତରଞ୍ଜନ ଘରେ ପହଞ୍ଚି ଦେଖିବା ବେଳକୁ ଶୁଭଶ୍ରୀ ବେକରେ ଓଢଣୀ ଦେଇ ଆତ୍ମହତ୍ୟା କରି ସାରିଥିଲେ। ଚିତ୍ତରଞ୍ଜନ କବାଟ ଖୋଲି ଶୁଭଶ୍ରୀଙ୍କ ମୃତଦେହକୁ ତଳକୁ ଓହ୍ଲାଇବା ସହ ବେକରୁ ଓଢ଼ଣୀ ନେଇ ବରୁଣେଇରେ ଫିଙ୍ଗି ଦେଇଥିଲେ । ଶୁଭଶ୍ରୀ ଓ ଚିତଙ୍କ ମଧ୍ୟରେ ଝଗଡା ହୋଇଥିବାବେଳେ କିଛି ମାଡ ମାରିଥିବା ଦାଗ ରହିଛି । ଚିତ୍ ରଞ୍ଜନ ଜେନା ଗିରଫ କରାଯାଇଛି । ୩୦୬ ଓ ୨୦୧ ଦଫାରେ ଗିରଫ ହୋଇଛି ଥିବା ଡିସିପି ସୂଚନା ଦେଇଛନ୍ତି।

ପୁଲିସ ୩୦ କିଲୋମିଟର ଦୂର ବରୁଣେଇ ପାହାଡ଼ ବାଇପାସ ରୁ ଶୁଭଶ୍ରୀଙ୍କ ଓଢ଼ଣୀ ଜବତ କରିଛି। ଗୋଟିଏ ଜରି ଭିତରେ ଦିଆସିଲି ସହ ଓଢଣୀ ଥିଲା। ବୟଫ୍ରେଣ୍ଡ ଚିତ୍ତରଞ୍ଜନ ଜେନାକୁ ପଚରାଉଚରା ବେଳେ ଓଢଣୀ ନେଇ ସୁରାଗ ମିଳିଥିଲା । ଏହାପରେ ଘଟଣାସ୍ଥଳକୁ ନେଇ ପୋଲିସ ତଦନ୍ତ କରିଥିଲା । ଚିତ୍ତରଞ୍ଜନ ନିଜର ଦୋଷ ସ୍ଵୀକାର କରିଛି।ମୃତ୍ୟୁ ପୂର୍ବରୁ ଶୁଭଶ୍ରୀଙ୍କ ଚିତ୍ତରଞ୍ଜନ ସହିତ ଝଗଡ଼ା ହୋଇଥିଲା । ଯେଉଁଥିପାଇଁ ଶୁଭଶ୍ରୀ ମାନସିକ ଚାପରେ ଆତ୍ମହତ୍ୟା କରିଥିବା କୁହାଯାଉଛି।  

ଭୁବନେଶ୍ୱର: ଉଠିଲା ଅଳିଆ। ୨୦ଦିନ ପରେ ଗାଡକଣ ସ୍ଥିତ ଟିଟିଏସରୁ ଉଠିଲା ଅଳିଆ। ଟ୍ରକ ଯୋଗେ ଟିଟିଏସରୁ ଭୁଆଶୁଣି ଡ଼ମ୍ପିଂୟାର୍ଡକୁ ସ୍ଥାନାନ୍ତର କରାଯାଉଛି ଅଳିଆ। ଦୈନିକ ଦୁଇ ଶହ ଟ୍ରକରେ ଉଠିବ ଅଳିଆ। ପର୍ଯ୍ୟାୟ କ୍ରମେ ଟ୍ରକ ସଂଖ୍ୟା ହ୍ରାସ କରାଯିବ। ଏବଂ ୯ ମାସ ମଧ୍ୟରେ ଅଧିକ କ୍ଷମତା ବିଶିଷ୍ଟ ଏମସିସି ପ୍ରତିଷ୍ଠା କରାଯିବ। ଭୁବନେଶ୍ୱରରୁ ଦୈନିକ ନିର୍ଗତ ହେଉଥିବା ଆଳିଆକୁ ଭୁବନେଶ୍ୱର ଭିତରେ ଏମସିସି ଓ ଏମଆରଏଫ ଜରିଆରେ ପୃଥକୀକରଣ ଓ ପ୍ରକ୍ରିୟାକରଣ କରି ପରିଚାଳନା କରାଯିବ। ଦାରୁଠେଙ୍ଗ ପଞ୍ଚାୟତବାସୀଙ୍କ ସହଯୋଗକୁ ଧନ୍ୟବାଦ ଜଣାଇଲେ ଉଭୟ ମେୟର ଓ କମିଶନର। ଡ଼ମ୍ପିଂୟାର୍ଡର ସ୍ଥାୟୀ ସମାଧାନ ପାଇଁ ବିଏମସି ନିର୍ଦ୍ଧାରିତ ସମୟ ମଧ୍ୟରେ କଣ ପଦକ୍ଷେପ ନେଉଛି ତାହାର ନିୟମିତ ବ୍ୟବଧାନରେ ସମୀକ୍ଷା କରିବେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ସଚିବ। ଏଥିସହ ବିଏମସି କମିଶନର ଓ ଦାରୁଠେଙ୍ଗ ସରପଞ୍ଚଙ୍କ ମଧ୍ୟରେ ନିୟମିତ ବ୍ୟବଧାନରେ ବସିବ ସମନ୍ୱୟ ବୈଠକ।

ଭୁବନେଶ୍ୱର: ଭୁବନେଶ୍ବରରେ ଜମି ଓ ଜାଗା କିଣିବାକୁ ସମସ୍ତେ ଆଗଭର। କିଛି କିଣିପାରନ୍ତି ଓ ଅନେକ ଠକିଯିବା ଭୟରେ ପଛଘୁଞ୍ଚା ଦିଅନ୍ତି। କିନ୍ତୁ ଯେଉଁମାନେ  କିଣନ୍ତି, ସେମାନଙ୍କ ଭିତରୁ ଅଧିକାଂଶ ବିଡିଏରୁ ଘର କରିବା ଆଗରୁ ପ୍ଲାନ ମଞ୍ଜୁରୀ ଆଣନ୍ତିନି। ସେଥିଲାଗି ତ ନିଜେ ହଇରାଣ ହୁଅନ୍ତି। ଆଉ ରାଜଧାନୀ ବିକାଶରେ ବି ବାଧା ସାଜନ୍ତି। ଚଳିତ ଲଗାଣ ବର୍ଷା ଓ ବନ୍ୟା ଭୁବନେଶ୍ୱର ତଳି ଅଞ୍ଚଳବାସୀଙ୍କୁ ଯେତିକି ଦୁର୍ଦ୍ଦଶା ଦେଲା, ତାଠୁ ବଳିଗଲା ଆପାର୍ଟମେଣ୍ଟରେ ରହୁଥିବା ବାସିନ୍ଦାଙ୍କ ଦୁର୍ଦ୍ଦଶା।

୩୧ ଅଗଷ୍ଟ ୨୦୧୯। ସ୍ୱାୟତ୍ତ ଶାସନ ଦିବସ ଉପଲକ୍ଷେ ମୁଖ୍ୟମନ୍ତ୍ରୀଙ୍କ ହାତରୁ ଏହି ଦମ୍ପତ୍ତି ପାଇଥିଲେ ଘର ପ୍ଲାନ ମଞ୍ଜୁରୀ ପ୍ରମାଣପତ୍ର। ତା ପୁଣି ଆବେଦନର ୪୮ ଘଣ୍ଟା ଭିତରେ ମଞ୍ଜୁରୀ ଦେଇଥିଲା ବିଡିଏ। ଅନ୍ୟମାନେ ବି ଘର କରିବା ଆଗରୁ ଆଉ ବିଡିଏ କି ବିଏମସିକୁ ବାରମ୍ୱାର ଦୌଡ଼ିବେନି। ଆନୁସଙ୍ଗିକ କାଗଜପତ୍ର ଠିକ୍ ଥିଲେ ଆବେଦନର ୪୮ ଘଣ୍ଟା ଭିତରେ ହାତ ପାହାନ୍ତାରେ ପ୍ଲାନ ଅନୁମୋଦନ ପତ୍ର। ଏହାରି ଭିତରେ ୩ ବର୍ଷ ବିତିଗଲାଣି। ଦେଖିବାକୁ ଗଲେ ଏମିତି କେତେ ଲୋକ ଆଇନସମ୍ମତ ବିଡିଏର ଅନୁମତି ଲୋଡ଼ିଛନ୍ତି। କେତେ ପାଇଛନ୍ତି। ଯଦି ବାସ୍ତବତା ଦେଖିବା, ତେବେ ବିଡିଏରୁ ପ୍ଲାନ୍ ମଞ୍ଜୁରୀ ଆଣିବାକୁ ଲୋକେ ଏତେ ଆଗଭର ହେଉନାହାନ୍ତି। ଆଉ ତାହାର ମୂଳ କାରଣ ହେଲା, ଜାଗା ସିନା କିଣିଛନ୍ତି ଲୋକେ। କିନ୍ତୁ ତାହାର ଲେ-ଆଉଟ୍ ଆପ୍ରୁଭାଲ୍ ନାହିଁ। ବିଲଡର ବଡ଼ ବଡ଼ ଜମିକୁ ପାର୍ଟ-ପ୍ଲଟ୍ କରି ବିକିବା ଆଗରୁ ଅଧିକ ଟଙ୍କା ଖର୍ଚ୍ଚ କରି ବିଡିଏରୁ ଲେ-ଆଉଟ ଆପ୍ରୁଭାଲ ଆଣିବାକୁ ଉଚିତ ମଣୁନାହାନ୍ତି। ତା ସହ ବଡ଼ ପ୍ଲଟ ଭିତରେ ୩୦ ଫୁଟିଆ ରାସ୍ତା ଦେବା, ସେଟବ୍ୟାକ୍ ଛାଡ଼ିବା ଆଦି ସମ୍ଭବ ହେଉନି। ଏମିତି ହେଲେ ବିକିବେ କଅଣ ଓ ଲାଭ ପାଇବେ କଅଣ। ଏହି ମାନସିକତାରେ ବିଲଡର ପଡ଼ିଥିଲା ବେଳେ ଏଥିରେ ଖାପ୍ ନ ଖୁଆଇଲେ କ୍ରେତା ବି ଜମି କିଣିପାରିବନି। ସେଥିଲାଗି ବିଲଡର ହାତରେ କାଟୁଥିବା ନକ୍ସା ଆଧାରରେ ଜାଗା କିଣିବା ଛଡ଼ା କ୍ରେତାଙ୍କର ବି ଚାରା ନାହିଁ। ଆଉ ବିନା ପ୍ଲାନରେ ଘର କରୁଥିବାରୁ ନିଜେ ତ ଅଡ଼ୁଆରେ ପଡ଼ୁଛନ୍ତି। ତା ସହ ସହରରେ କୃତ୍ରିମ ବନ୍ୟା ଲାଗି ବି ଏମାନେ ହିଁ ଦାୟୀ। କାରଣ କିଏ ଡ୍ରେନେଜ୍ ସିଷ୍ଟମକୁ ପୋତି ପକାଇଲାଣି ତ କିଏ ଆଉ କାହାର ବାଉଣ୍ଡରୀକୁ ମାଡ଼ିବସିଲାଣି। ଆଇନଗତ ବିବାଦରେ ଫସୁଛନ୍ତି କ୍ରେତା। କିନ୍ତୁ ବିଲଡର ଛୁ। ଜମି ବିକିବା ପରେ ତା କାମ ସରିଗଲା। ଆଉ ରାଜଧାନୀରେ ଜାଗା, ଘର କିଣିବା ମୋହରେ ପଡ଼ିଥିବା ଲୋକଟି ହଇରାଣ ହରକତ ହେବା ଛଡ଼ା ଚାରା ନାହିଁ। ଚଳିତ ଲଗାଣବର୍ଷା ଓ ବନ୍ୟାରେ ସୁନ୍ଦରପଦାରେ ଆପାର୍ଟମେଣ୍ଟ ବାସିନ୍ଦାଙ୍କ ଦୁର୍ଦ୍ଦଶା ବି କିଛି ଏମିତି ଚିତ୍ରକୁ ବୟାନ କରୁଥିଲା। ଜଟଣୀ-ସୁନ୍ଦରପଦା ରାସ୍ତାରେ ଛତୁ ଫୁଟିଲା ଭଳି ଆପାର୍ଟମେଣ୍ଟ। ଲୋକେ ରହୁଛନ୍ତି ସତ। କିନ୍ତୁ ସ୍ୱଳ୍ପ ବର୍ଷାରେ ବଢ଼ି ଅଞ୍ଚଳରେ ରହୁଥିବା ଭଳି ଦୁର୍ଦ୍ଦଶା ଭୋଗୁଛନ୍ତି। କାରଣ ବିନା ପ୍ଲାନରେ ଅଟ୍ଟାଳିକାରେ ରହିବାର ସ୍ୱପ୍ନରେ ଅନ୍ଧ କ୍ରେତାଙ୍କୁ ଭୂଆଁ ବୁଲାଇବାରେ ବିଲଡର ଯେତିକି ମାହିର୍। ଠିକ୍ ସେମିତି କାଗଜପତ୍ର, ନକ୍ସା ଓ ପ୍ଲାନ୍ ଅନୁମୋଦିତ ପ୍ରମାଣପତ୍ର ଠିକ୍ ଥିବା ଜାଗା ଦେଖିବାକୁ ଓ ପରଖିବାକୁ କ୍ରେତାଙ୍କର ବି ସମୟ ନାହିଁ। ସେଥିଲାଗି ତ ଭୁବନେଶ୍ୱର ଓ ଭୁବନେଶ୍ୱର ଉପଖଣ୍ଡରେ ଜାଗା କିଣିବାର ଲୋଭ ଓ ମୋହରେ ପଡ଼ିଥିବା ଲୋକ ହଇରାଣରେ ପଡ଼ିବା ସାର ହେଉଛି। ରିଅଲ ଇଷ୍ଟେଟ କାରବାରରେ ଜଡିତ କିଛି ଭଲ ଲୋକ ଏବେ ଫ୍ଲଡ୍ ଏରିଆ ଓ ରେଡ୍ ଜୋନରେ କିଣିଲେ କି ଅବସ୍ଥା ହେଉଛି, ତାହାର ଅବତାରଣା କରି ଲୋକଙ୍କୁ ସଚେତନ କରାଉଛନ୍ତି ସୋସିଆଲ ମିଡିଆରେ।

ପ୍ରଦୀପ ନାୟକଙ୍କ ରିପୋର୍ଟ