fraud

  • LUMEX FRAUD: RAJEEV DASH AND SONIA TRIPATHY (ଅସଲିକୁ ନେଇ ନକଲିର ଖେଳ)

    24/04/2023

    () ସବୁ ତ ଜାଲି। ସଂସ୍ଥା ବି ଜାଲି। ସଂସ୍ଥା ଖୋଲିଥିବା ବ୍ୟକ୍ତିବିଶେଷଙ୍କ କାରନାମା ବି ଜାଲିଆତି ଉପରେ ଗଢ଼ା ଥିଲା। ତା ହେଲେ ସଂସ୍ଥାର ଆୟବ୍ୟୟର ହିସାବ ଆସିବ କେଉଁଠୁ। ଏ କଥା ଆମେ କହୁନୁ। ଖୋଦ୍ ରାଜୀବ ଦାସ ନିୟୋଜିତ କରିଥିବା ଅଡିଟର ଏହାକୁ ସ୍ୱୀକାର କରିଛନ୍ତି। ଯେତେବେଳେ କୋର୍ଟ ଅଫିସର ଲୁମେକ୍ସ କମ୍ପାନୀର ବାଲାନ୍ସ ସିଟ୍ ଓ ବୁକ୍ସ ଅଫ ଆକାଉଣ୍ଟସ ଅଡିଟ ରିପୋର୍ଟ ମାଗିଲେ, ନିଜର କେମିତି ଅସହାୟତା ଦେଖାଇଥିଲେ ଅଡିଟର ।

    ଲୁମେକ୍ସ ସଂସ୍ଥାର ଜାଲିଆତିର ଗୋଟିଏ ପରେ ଗୋଟିଏ ପ୍ରମାଣ ଏବେ ସାମ୍ନାକୁ ଆସିବାରେ ଲାଗିଛି। ରାଜୀବ ଦାସ, ସୋନିଆ ତ୍ରିପାଠୀ ସେମାନଙ୍କ ସହଯୋଗୀଙ୍କ ଜାଲିଆତିର କାରନାମାର ଆଉ ଏକ ଲେଖାଯୋଖା ଦସ୍ତାବିଜ୍ ଏବେ ହାତରେ ଲାଗିଛି ଏମିତିରେ ତ ପୂର୍ବରୁ ଜିଓକେମ୍, ଜିନ୍ଦଲ, ଆଦିତ୍ୟ ବିର୍ଲା ଭଳି ଅନେକ ସଂସ୍ଥା ସହ ମିଛ ବ୍ୟବସାୟିକ କାରବାରର ଗୁମର ଖୋଲିସାରିଛି। ବିଜେଡି ନେତ୍ରୀ ଲୋପାମୁଦ୍ରା ବକ୍ସିପାତ୍ରଙ୍କ ଦସ୍ତଖତକୁ ଜାଲି କରି କମ୍ପାନୀକୁ ଆରଓସିରେ ପଞ୍ଜୀକରଣ ହେଉ ଅବା ଲୁମେକ୍ସ କମ୍ପାନୀର ଗତିବିଧି ପରଖି ଗଲା ବେଳକୁ କମ୍ପାନୀର ଚେୟାର ଟେବୁଲ୍ ବି ନଥିଲା ବୋଲି କୋର୍ଟ ଅଫିସରଙ୍କ ବୟାନ ଏ ସବୁ ଦିଗ ରାଜୀବଙ୍କ ଠକାମୀର ଗୋଟିଏ ଗୋଟିଏ ଜ୍ୱଳନ୍ତ ନଜିର। ଆଉ ଆଜି ଏଥିରେ ଯୋଡ଼ି ହୋଇଛି ଆଉ ଏକ ପ୍ରମାଣ। ଲୁମେକ୍ସ ସଂସ୍ଥା ପୁରା ଜାଲି ଥିଲା ବୋଲି ଏହାକୁ ପରୋକ୍ଷରେ ମାନିଛନ୍ତି ରାଜୀବ ଯାହାଙ୍କୁ ସଂସ୍ଥାର ଅଡିଟ୍ ଦାୟିତ୍ୱ ନ୍ୟସ୍ତ କରିଥିଲେ, ସେ ଅଧିକାରୀ କୋର୍ଟ ଅଫିସର ସୁରେଶ ପଟ୍ଟନାୟକଙ୍କୁ ଲେଖିଥିବା ଏହି ଚିଠି ହିଁ ଏହାର ପ୍ରମାଣ ଦେଉଛି। ଅକ୍ଟୋବର ୧୩, ୨୦୨୧ ଲୁମେକ୍ସ ସଂସ୍ଥା ନିୟୋଜିତ କରିଥିବା ଅଡିଟର ତଥା ଚାଟାର୍ଡ ଆକାଉଣ୍ଟାଣ୍ଟ ରଶ୍ମୀରଞ୍ଜନ ମିଶ୍ରଙ୍କୁ କୋର୍ଟ ଅଫିସର ଏହି ତାରିଖରେ ମାଗିଥିଲେ ସଂସ୍ଥାର ଅଡିଟ୍ ହୋଇଥିବା ବାଲାନ୍ସ ସିଟ୍ ବୁକ୍ସ ଅଫ ଆକାଉଣ୍ଟସର ବିସ୍ତୃତ ବିବରଣୀ କାରଣ ସେତେବେଳକୁ କୋର୍ଟ ଅଫିସର ନିଜର ଫରେନସିକ ଅଡିଟରେ ପାଇସାରିଥିଲେ ଯେ, ଲୁମେକ୍ସ ସଂସ୍ଥାରେ ସେତେବେଳକୁ ତାଲା ଠୁଙ୍କି ରାଜୀବ ସହଯୋଗୀ ପାର୍ ହୋଇସାରିଲେଣି। ଏପରିକି ଡିଏଲଏଫ ସାଇବର ସିଟିରେ ଖୋଲିଥିବା ଲୁମେକ୍ସ ସଂସ୍ଥାରେ ଚେୟାର ଟେବୁଲ୍ ବି ପାଇନଥିଲେ ସୁରେଶ ପଟ୍ଟନାୟକ। ଆଉ କମ୍ପାନୀର ଏଭଳି ଗତିବିଧି ଦେଖି କୋର୍ଟ ଅଫିସର ବି ଆଶ୍ଚର୍ଯ୍ୟ ହୋଇଯାଇଥିଲେ। ଯେତେବେଳେ ଜାଣିଥିଲେ ଯେ, ଅନେକ କମ୍ପାନୀ ସହ ନେଣଦେଣ କେବଳ କାଗଜପତ୍ରରେ ହୋଇଛି କିନ୍ତୁ ଅସଲରେ ନିବେଶକଙ୍କ ଟଙ୍କାକୁ ନିଜ ନିଜ ଭିତରେ ଭାଗ ବଣ୍ଟୁଆରା କରି ଖାଇଯାଇଛନ୍ତି ନିର୍ଦେଶକମଣ୍ଡଳୀ ସବୁ ଫ୍ରଡ୍ ବୋଲି କେବଳ ଆଶଙ୍କା କରିନଥିଲେ। ରିପୋର୍ଟ ବି ଦେଇଥିଲେ ଯେ, କମ୍ପାନୀ ଆଉ ନାହିଁ। ସବୁ ଜାଲି। ସେଥିଲାଗି କମ୍ପାନୀର ଅଡିଟରଙ୍କୁ ଆୟବ୍ୟୟ ହିସାବ ମାଗିଥିଲେ। ଯାହା ଆଇନଗତ କିନ୍ତୁ ମାଗିବାର ୫ଟା ଦିନ ପରେ ଯେଉଁ ଉତ୍ତର ଆସିଲା, ତାହା ସମସ୍ତଙ୍କୁ ତାଜୁବ୍ କରିଦେଇଥିଲାଅକ୍ଟୋବର ୧୮, ୨୦୨୧  ଲୁମେକ୍ସ ସଂସ୍ଥା ନିୟୋଜିତ କରିଥିବା ଚାଟାର୍ଡ ଆକାଉଣ୍ଟାଣ୍ଟ ରଶ୍ମୀରଞ୍ଜନ ମିଶ୍ର ଯେଉଁ ଉତ୍ତର ଫେରାଇଥିଲେ। ଆଉ ନିଜର ଅସହାୟତା ଦେଖାଇଥିଲେ, ତାହା ରାଜୀବଙ୍କ ଠକାମୀର ବଡ଼ ପ୍ରମାଣ ଦେଇଥିଲା। ରଶ୍ମୀ କହିଥିଲେ ଯେ, ଲୁମେକ୍ସ ସଂସ୍ଥାର ବୋର୍ଡ ଅଫ ଡାଇରେକ୍ଟର୍ସ ମିଟିଂର ରିଜୋଲୁସନ ଅନୁସାରେ ତାଙ୍କ ଫାର୍ମକୁ ଅଗଷ୍ଟ ୨୦,୨୦୧୯ରେ ପ୍ରଥମ ସାମ୍ୱିଧାନିକ ଅଡିଟର ଭାବେ ନିୟୋଜିତ କରାଯାଇଥିଲା ବାର୍ଷିକ ସାଧାରଣ ପରିଷଦ ବୈଠକରେ ସେୟାର ହୋଲଡରଙ୍କ ସହ ପ୍ରଥମ ବୈଠକ ନ ସରିବା ଯାଏ ଜୁଲାଇ ୨୨, ୨୦୧୯ରୁ ମାର୍ଚ୍ଚ ୩୧, ୨୦୨୦ ଯାଏ ଏହି ଫାର୍ମ କାମ କରିବ କିନ୍ତୁ ରଶ୍ମୀରଞ୍ଜନ ମିଶ୍ରଙ୍କ ଚାଟାର୍ଡ ଆକାଉଣ୍ଟ ଫାର୍ମକୁ ସିନା ନିୟୋଜିତ କରିଦେଲା ଲୁମେକ୍ସ। ହେଲେ ଏହା ପରଠୁ ସଂପୃକ୍ତ ଚାଟାର୍ଡ ଆକାଉଣ୍ଟ ଫାର୍ମକୁ କୌଣସି ଆକାଉଣ୍ଟ ସମ୍ୱନ୍ଧୀୟ କାଗଜପତ୍ର ଦେଲେନି ରାଜୀବ ସହଯୋଗୀ କେବଳ କାଗଜପତ୍ରରେ ନିୟୋଜିତ କରିଦିଆଗଲା। କିନ୍ତୁ ଯେଉଁ ଉଦ୍ଦେଶ୍ୟରେ ନିଯୁକ୍ତ କରାଗଲା, ସେ ଅବଧି ଭିତରେ କାମ ଦିଆଗଲାନି ଦେଇଥାଆନ୍ତା ବି କେମିତି କମ୍ପାନୀ ସବୁ ଜାଲି ନେଣଦେଣ ସବୁ ନିଜ ନିଜ ଭିତରେ। ଯେଉଁ କମ୍ପାନୀ ନାଁରେ ନେଣଦେଣ ଦେଖାଇଥିଲେ, ସେ ସବୁ କମ୍ପାନୀ ସହ ଲୁମେକ୍ସ ସଂସ୍ଥାର କେବେ ବି ବ୍ୟବସାୟିକ କାରବାର ହୋଇନଥିଲା ତା ହେଲେ ନେଣଦେଣର ହିସାବ ଦେଖାଇବେ କେଉଁଠି ସେଥିଲାଗି କୋର୍ଟ ଅଫିସରଙ୍କୁ ଲେଖିଥିବା ଚିଠିରେ ଚାଟାର୍ଡ ଆକାଉଣ୍ଟାଣ୍ଟ ରଶ୍ମୀରଞ୍ଜନ ମିଶ୍ର ନିଜର ଅସହାୟତାକୁ ଦର୍ଶାଇଛନ୍ତି। ସେଥିଲାଗି କମ୍ପାନୀର ଅଡିଟ୍ ହୋଇଥିବା ବାଲାନ୍ସ ସିଟ୍ ଆକାଉଣ୍ଟସ ବାବଦରେ କୌଣସି ତଥ୍ୟ ଦେବା ସମ୍ଭବ ନୁହେଁ ବୋଲି ହାତ ଟେକିଦେଇଥିଲେ ରଶ୍ମୀରଞ୍ଜନ ସେଥିଲାଗି ତ କୋର୍ଟ ଅଫିସର ପ୍ରମୋଟରଙ୍କ ବିରୁଦ୍ଧରେ ଆକ୍ସନ ନେବାକୁ ରିପୋର୍ଟରେ ଉଲ୍ଲେଖ କରିଥିଲେ। କୋର୍ଟଙ୍କ ନିର୍ଦେଶ ସତ୍ତ୍ୱେ ରାଜୀବ କୌଣସି ନଥିପତ୍ର ଦାଖଲ କରିନଥିଲେ କି କୋର୍ଟ ଅଫିସରଙ୍କୁ ସହଯୋଗ କରିନଥିଲେ ଫରେନସିକ୍ ଅଡିଟରୁ ବି ସବୁ ଜାଲି ବୋଲି ପରେ ଜଣାପଡ଼ିଥିଲା।

    ସେପଟେ ଏତଲା ଦେବାର ୧୭ ମାସ ବିତିଗଲାଣି। କମିଶନରେଟ ପୁଲିସଠୁ ତଦନ୍ତ ଭାର ଇଓଡବ୍ଲୁକୁ ଯାଇ ବି ମାସେ ହୋଇଗଲାଣି ହେଲେ ଅଭିଯୁକ୍ତଙ୍କୁ ଠାବ କରିବା, ସେମାନଙ୍କ ବିରୁଦ୍ଧରେ ଆଇନଗତ ଆକ୍ସନ ନେବାରେ ଆଖିଦୃଶିଆ ପଦକ୍ଷେପ ନାହିଁ ଆକାଉଣ୍ଟ ଅଚଳ, ଅଭିଯୁକ୍ତଙ୍କ ଠିକଣାରେ ଛାପା ମାରିବା ଏସବୁ ଦିଗକୁ ତଦନ୍ତକାରୀ ସଂସ୍ଥା କେତେଦୂର ଆଗେଇନେଲାଣି, ତାକୁ ନେଇ ସବୁ ଅନ୍ଧାରରେ। ଅଭିଯୁକ୍ତଙ୍କ ଲାଗି ପୁଲିସ ଅଡ଼ୁଆ ନା ସହାୟକ ସାଜୁଛି, ଏ ଘଟଣାକୁ ନେଇ ସନ୍ଦେହ ବଢ଼ୁଛି।

    ଲୁମେକ୍ସ ଜୁଲାଇ ୧୯ରେ ଗଠନ ହୋଇଥିଲା। ଡିସେମ୍ୱର ୧୯ରେ ବନ୍ଦ ହୋଇଗଲା। ମାତ୍ର ୬ ମାସ ଭିତରେ କମ୍ପାନୀ ଛିଡ଼ା କରି ଅନେକଙ୍କୁ ଚୂନ ଲଗାଇଥିବା ରାଜୀବ ତାଙ୍କର ସହଯୋଗୀଙ୍କ କାରନାମା ବାବଦରେ ତଦନ୍ତ କରିବାକୁ କମିଶନରେଟ ପୁଲିସ କେମିତି ଟାଳଟୁଳ ନୀତି ଆପଣାଇଥିଲା, ତାହା ଅତୀତ। ଆଉ ଇଓଡବ୍ଲୁ ଭଳି ଦକ୍ଷ ତଦନ୍ତକାରୀ ସଂସ୍ଥା ସେମିତି କିଛି ଫଣ୍ଡା ଆପଣାଉନି ତ। ସାଧାରଣରେ ଏମିତି ସନ୍ଦେହରୁ ଉର୍ଦ୍ଧ୍ୱରେ ରହି ଇଓଡବ୍ଲୁ ତଦନ୍ତରେ ନିଜର ସ୍ୱଛତା ବିଶ୍ୱସନୀୟତା ଅବିଳମ୍ୱେ ଦେଖାଇବ ବୋଲି ନିବେଶକାରୀ ଆଶାବାଦୀ।

    ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍..

  • LUMEX RESOURCES FRAUD POLITICS (କୁଆଡ଼େ ଗଲେ ଠକ ଦମ୍ପତ୍ତି)

    22/03/2023

    () ଲୁମେକ୍ସ ସଂସ୍ଥାର ମହାଠକାମୀକୁ ନେଇ ବିଧାନସଭାରେ ପ୍ରସଙ୍ଗ ଉଠିବା ପରେ ଏବେ ଏହାକୁ ନେଇ ହାଟରେ ବାଟରେ ସବୁଠି ଚର୍ଚ୍ଚା। ଅଭିଯୁକ୍ତ ଦମ୍ପତ୍ତି ରାଜୀବ ଦାସ ଓ ସୋନିଆ ତ୍ରିପାଠୀଙ୍କୁ ବାନ୍ଧିବାକୁ ପୁଲିସର ହାତ ଯାଉନି କାହିଁକି। ହାଇକୋର୍ଟଙ୍କ ନିର୍ଦେଶକୁ ଅନୁପାଳନ କରିବାକୁ କାହିଁକି ପଛାଉଛି ପୁଲିସ। ଗୃହ ଭିତରେ ଏହାକୁ ନେଇ ବିରୋଧୀଙ୍କ ଯେତିକି ଉଦବେଗ, ଗୃହ ବାହାରେ ବି ପୁଲିସର ପାରିଲାପଣିଆକୁ ନେଇ ସେତିକି ପ୍ରଶ୍ନ। ଆଉ ଶାସକ ଦଳର ଦମ୍ଭୋକ୍ତି, ଆଇନ ଅଛି। ଆକ୍ସନ ନିଶ୍ଚିତ।

    ଗୃହ ବିଭାଗର ଖର୍ଚ୍ଚଦାବି ଆଲୋଚନା ବେଳେ ମୁଖ୍ୟମନ୍ତ୍ରୀ କିଛି ଏଭଳି ଢଙ୍ଗରେ ଉତ୍ତର ରଖିଥିଲେ। ରାଜ୍ୟରେ ଆଇନଶୃଙ୍ଖଳା ସ୍ଥିତି ସବଳ ଥିବାରୁ ଓଡ଼ିଶା ଆଜି ଆଗରେ। ଆଇନଶୃଙ୍ଖଳା ଠିକ୍ ନଥିଲେ ପୁଞ୍ଜିନିବେଶ ହୁଅନ୍ତାନି। ପୁଲିସ ବ୍ୟବସ୍ଥାରେ ସ୍ୱଛତା ଓ ଗୁଣାତ୍ମକ ସେବା ଆଣିବାକୁ ଲୋକଙ୍କ ମତାମତ ନିଆଯାଉଛି। ଲୋକ ଭଲ ବୋଲି ଫିଡବ୍ୟାକ୍ ଦେଉଛନ୍ତି। ପୁଲିସ ପ୍ରତି ଲୋକଙ୍କ ବିଶ୍ୱସନୀୟତା ଯେତେ ବୃଦ୍ଧି ପାଇବ, ତାହା ହିଁ ମୁଖ୍ୟମନ୍ତ୍ରୀଙ୍କ ଏହି ଦମ୍ଭୋକ୍ତି ପଛର ବଡ଼ ଆଧାର। ହେଲେ ଲୁମେକ୍ସ ଓ ବ୍ରାଇଟ ହୋମ୍ସ ଡେକର ସଂସ୍ଥା ନାଁରେ ଲୋକଙ୍କୁ କୋଟି କୋଟି ଟଙ୍କାର ଚୂନ ଲଗାଇଥିବା ଅଭିଯୁକ୍ତ ଦମ୍ପତ୍ତି ରାଜୀବ ଦାସ ଓ ସୋନିଆ ତ୍ରିପାଠୀଙ୍କ କ୍ଷେତ୍ରରେ ପୁଲିସର ସ୍ଥାଣୁତା କେଉଁଠି ନା କେଉଁଠି ମୁଖ୍ୟମନ୍ତ୍ରୀଙ୍କ କଥାକୁ ଗୌଣ କରିଦେଉନି ତ। ମାନ୍ୟବର ଉଚ୍ଚ ନ୍ୟାୟାଳୟଙ୍କ ନିର୍ଦେଶକୁ ଅନୁପାଳନ କରିପାରୁନି ପୁଲିସ। ନିଶାରାଣୀଙ୍କୁ ନ୍ୟାୟ ଦେଇପାରୁନି ପୁଲିସ। ବିଧାନସଭାରେ ବିରୋଧୀ ଏହି ମହାଠକେଇ ବାବଦରେ ସ୍ୱର ଉଠାଇଲା ବେଳକୁ ଅଫିସର ଗ୍ୟାଲେରୀରେ ଥିବା ପୁଲିସର ଉଚ୍ଚପଦସ୍ଥ ଅଧିକାରୀଙ୍କ କାନରେ ବି ଏ କଥା ବାଜିଛି। କମିଶନରେଟ ପୁଲିସର ଅତିରିକ୍ତ ସିପି ଉମାଶଙ୍କର ଦାସଙ୍କ ସମ୍ପର୍କୀୟ ହେତୁ ଅଭିଯୁକ୍ତ ବନ୍ଧା ହେଉନି ବୋଲି ଅଭିଯୋଗକାରିଣୀଙ୍କ ଅଭିଯୋଗରେ ସତ୍ୟତା ଥିଲେ, ସାଙ୍ଘାତିକ। ସେପଟେ ଗୃହ ବାହାରେ ବି କଂଗ୍ରେସ ରାଜୀବ ଦାସଙ୍କ ଏଭଳି କାରନାମାକୁ ନେଇ ସରକାରଙ୍କୁ ପ୍ରଶ୍ନବାଣ କରିଛି। ଏହି ମାମଲାରେ ବରିଷ୍ଠ ଆଇପିଏସଙ୍କ ସମ୍ପର୍କୀୟ ବୋଲି ଜାଣିଶୁଣି ଘଣ୍ଟ ଘୋଡ଼ାଉଛନ୍ତି ସରକାର। କିଏ ଅଭିଯୁକ୍ତଙ୍କୁ ସୁରକ୍ଷା ଦେଉଛି, ଜଳଜଳ କରି ଦିଶୁଛି।

    ସେପଟେ ଆଇନରୁ ଉର୍ଦ୍ଧ୍ୱରେ କେହି ନୁହଁନ୍ତି। ଯେତେ ପ୍ରଭାବଶାଳୀର ସମ୍ପର୍କୀୟ ହୋଇଥାଆନ୍ତୁ ନାଁ କାହିଁକି, ଦୋଷୀଙ୍କୁ ମୁଖ୍ୟମନ୍ତ୍ରୀ କେବେ ବରଦାସ୍ତ କରନ୍ତିନି। ଦୋଷୀ ଦଣ୍ଡ ପାଇବ ବୋଲି ଦମ୍ଭ ଦେଖାଇଛି ଶାସକ ଦଳ ନେତା ଧୃବ ସାହୁ

    ସ୍ୱଛତା ଓ ନିର୍ମଳ ଭାବମୂର୍ତ୍ତି ହେଉଛି ମୁଖ୍ୟମନ୍ତ୍ରୀଙ୍କ ସଫଳତାର ମୁଖ୍ୟ ଚାବିକାଠି। ଲୋକଙ୍କ ବିଶ୍ୱାସ ଓ ଆସ୍ଥା କ୍ରମାଗତ ତାଙ୍କ ପ୍ରତି ବଢ଼ିଚାଲିଥିବା କଥା ବି ସତ। କିନ୍ତୁ ସେହି ଚାବିକାଠିକୁ କିଛି ପୁଲିସ ଅଧିକାରୀ ମଳିନ କରିବାକୁ ଚେଷ୍ଟା କରୁନାହାନ୍ତି ତ। ନ୍ୟାୟ ଓ ସେବା ପାଇଁ ଶୃଙ୍ଖଳା ଓ ସଂସ୍କାର ଉପରେ ଗୁରୁତ୍ୱ ଦେଉଥିବା ମୁଖ୍ୟମନ୍ତ୍ରୀଙ୍କ ପଛରେ କେହି ଏମିତି କିଛି ଫନ୍ଦି କରୁଛନ୍ତି କି। ଯାହା ଦ୍ୱାରା ନିବେଶକ ନିଶାରାଣୀ ଅବା ପ୍ରଜ୍ଞାପ୍ରକାଶ ଆଜି ନ୍ୟାୟ ଲାଗି ବାର ଦୁଆର ହେବାକୁ ପଡ଼ିବା ସାର ହେଉଛି।

    ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍..।

  • LUMEX RESOURCES POLICE ACTION(ଲୁମେକ୍ସ ଲୁଟ୍ ପ୍ରସଙ୍ଗ)

    23/03/2023

    () ବହୁ ଚର୍ଚ୍ଚିତ ଲୁମେକ୍ସ ଲୁଟ୍ ପ୍ରସଙ୍ଗକୁ ନେଇ ବିଧାନସଭାରେ ସ୍ୱର ଉଠିବା ପରେ ଆଜି ଭୁବନେଶ୍ୱର ଡିସିପି ଏ ନେଇ ମୁହଁ ଖୋଲିଛନ୍ତି। ହାଇକୋର୍ଟଙ୍କ ନିର୍ଦେଶକୁ ଅନୁପାଳନ କରାଯିବ। ଯେହେତୁ ବଡ଼ ଧରଣର ଆର୍ଥିକ ନେଣଦେଣ, ସେଥିଲାଗି ବିଭିନ୍ନ ଏଜେନ୍ସିର ସହଯୋଗ ସହ ସିନିଅର ଅଫିସରଙ୍କୁ ତଦନ୍ତରେ ନିୟୋଜିତ କରାଯାଇଛି। ଅନେକ ପ୍ରମାଣ ଯୋଗାଡ଼ ହେଉଥିବାରୁ ବିଳମ୍ୱ ହେଉଛି। ସେପଟେ ଅତିରିକ୍ତ ସିପି ଉମାଶଙ୍କର ଦାସଙ୍କୁ ବଦଳି ଓ ଅଭିଯୁକ୍ତ ଦମ୍ପତ୍ତି ରାଜୀବ ଦାସ ଓ ସୋନିଆଙ୍କୁ ଗିରଫ ଲାଗି ପୁଣି ଦାବି କରିଛନ୍ତି ବିରୋଧୀ। ଆଉ ଶାସକ ଦଳ କହିଛି, ଯିଏ ଯେତେ ପ୍ରଭାବଶାଳୀ ହୋଇଥିଲେ ହେଁ, ନବୀନ ସରକାର ଦୋଷୀକୁ ବରଦାସ୍ତ କରନ୍ତିନି।

    ଲୁମେକ୍ସ ଲୁଟର ମାଷ୍ଟରମାଇଣ୍ଡ ରାଜୀବ ଦାସ ଓ ସୋନିଆଙ୍କୁ ଗିରଫ କର। ଅଭିଯୁକ୍ତଙ୍କ ସମ୍ପର୍କୀୟ କମିଶନରେଟ ପୁଲିସର ଅତିରିକ୍ତ ସିପି ଉମାଶଙ୍କର ଦାସଙ୍କୁ ବଦଳି କର। ଉମାଶଙ୍କର କମିଶନରେଟ ପୁଲିସରେ ଥିଲା ଯାଏ ଅଭିଯୁକ୍ତ ଦମ୍ପତ୍ତିଙ୍କୁ ବାନ୍ଧିବାକୁ ପଛଘୁଞ୍ଚା ଦେବ ପୁଲିସ। କିଛି ଏମିତି ଢଙ୍ଗରେ ବିଧାନସଭା ଭିତରେ ଓ ବାହାରେ ବିରୋଧୀ ଦଳ ଏହି ବହୁ ଚର୍ଚ୍ଚିତ ଲୁମେକ୍ସ ମହାଠକାମୀକୁ ନେଇ ବର୍ଷିଛନ୍ତି। ଏମିତି ଅଭିଯୁକ୍ତ ଓ ଅଫିସରଙ୍କୁ କାହା ବଳରେ ଘଣ୍ଟ ଘୋଡ଼ାଯାଉଛି ବୋଲି ପଚାରିଛନ୍ତି ବିରୋଧୀ ଦଳ। ସବୁଠି ଏହି ଠକ ଦମ୍ପତ୍ତିଙ୍କ କାରନାମାକୁ ନେଇ ଚର୍ଚ୍ଚା। ତା ସତ୍ତ୍ୱେ ସରକାର ଚୁପ୍ ବସିବା ସମସ୍ତଙ୍କୁ ସନ୍ଦେହୀ କରିଛି। ମାନ୍ୟବର ଉଚ୍ଚନ୍ୟାୟାଳୟଙ୍କ ନିର୍ଦେଶକୁ ଅନୁପାଳନ ବି ହେଉନି। ହେଲେ ଶାସକ ଦଳ କହିଛି, ଆଇନ ଆଖିରେ ସମସ୍ତେ ସମାନ। ଅପରାଧୀ ଯିଏ ଯେତେ ପ୍ରଭାବଶାଳୀ ହୋଇଥିଲେ ବି, ମୁଖ୍ୟମନ୍ତ୍ରୀ କାହାକୁ ବରଦାସ୍ତ କରନ୍ତିନି।

    ସେପଟେ ଏ ପ୍ରସଙ୍ଗରେ ମୁହଁ ଖୋଲିଛନ୍ତି ଭୁବନେଶ୍ୱର ଡିସିପି।  ୧୫ ଦିନ ଭିତରେ ଅଭିଯୋଗ ଉପରେ ପଦକ୍ଷେପ ନେବାକୁ ଭୁବନେଶ୍ୱର ଡିସିପିଙ୍କୁ ଉଚ୍ଚନ୍ୟାୟାଳୟ ନିର୍ଦେଶ ଦେଇଥିଲେ। ଡିସିପି ପ୍ରତୀକ ସିଂ କହିଛନ୍ତି, ଆମେ ଅଭିଯୋଗକାରିଙ୍କୁ ଡାକିଛୁ। ପ୍ରମାଣ ଯୋଗାଡ଼ ଚାଲିଛି। ବଡ଼ ଧରଣର ଆର୍ଥିକ ନେଣଦେଣ ହେତୁ ଅନେକ ଏଜେନ୍ସିକୁ  ଲଗାଇଛୁ। ସିନିଅର ଅଫିସର ତଦନ୍ତରେ ଲାଗିଛନ୍ତି। ଅଭିଯୁକ୍ତଙ୍କ ସହ ବରିଷ୍ଠ ଆଇପିଏସଙ୍କ ସମ୍ପର୍କୀୟ ଆଧାରରେ ତଦନ୍ତ ହୁଏନି। ସତ ଆଧାରରେ ତଦନ୍ତ ହୁଏ। ତଦନ୍ତରେ ଏକଥା ବି ଆସିଲେ, ପୁଲିସ ପ୍ରଫେସନାଲ ଢଙ୍ଗରେ ତଦନ୍ତ କରିବ। କୌଣସି ଅଭିଯୋଗ ଉପରେ ତଦନ୍ତ ଦିଗହରା ହୁଏନା।

    ପୁଲିସ ଉପରେ ଅଭିଯୋଗକାରିଣୀଙ୍କ ଭରସା ବି ଥିଲା। କିନ୍ତୁ ନ୍ୟାୟାଳୟଙ୍କ ନିର୍ଦେଶକୁ ଅନୁପାଳନ କରିବାରେ ଅହେତୁକ ବିଳମ୍ୱ ହେତୁ ପୁଲିସ ଉପରେ ସେ ଭରସା ତୁଟିବା ସ୍ୱାଭାବିକ କଥା। ଆଉ ବିଭିନ୍ନ ଗଣମାଧ୍ୟମରେ ଏ ନେଇ ଖବର ପ୍ରସାରଣ, ବିଧାନସଭାରେ ପ୍ରସଙ୍ଗ ଉଠିବା ପରେ ପୁଲିସ ବାସ୍ତବରେ କେତେଦୂର ତତ୍ପର ହେଉଛି, ଦେଖିବାର କଥା।

    ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍

  • LUMEX RESOURCES INQUIRY (ଲୁମେକ୍ସ ଅଭିଯୁକ୍ତଙ୍କ ପାଖରେ କାହିଁକି ପହଞ୍ଚିପାରୁନି ବ୍ୟବସ୍ଥା)

    24/03/2023

    () ଲୁମେକ୍ସ ସଂସ୍ଥା ଖୋଲି ନିବେଶକଙ୍କୁ କୋଟି କୋଟି ଟଙ୍କାର ଚୂନ ଲଗାଇଥିବା ଠକ ଦମ୍ପତ୍ତି ରାଜୀବ ଦାସ ଓ ସୋନିଆ ତ୍ରିପାଠୀଙ୍କ ପାଖରେ ପହଞ୍ଚିପାରୁନି ପୁଲିସ। ହଁ ଅବଶ୍ୟ ଅଭିଯୋଗକାରିଙ୍କୁ ଡାକିଛି। ପ୍ରମାଣ ମାଗିଛି। କିନ୍ତୁ ଅଭିଯୁକ୍ତଙ୍କୁ ଠାବ କରିପାରିନି। କୋଟିଏରୁ ବେଶୀ ଟଙ୍କାର ଆର୍ଥିକ ହେରଫେର ମାମଲାରେ ଅର୍ଥନୈତିକ ଅପରାଧ ଶାଖାକୁ ବି ତଦନ୍ତ ହସ୍ତାନ୍ତର କରୁନି। ଏହାକୁ ନେଇ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବେ ବିରୋଧୀ ଦଳ। ସେପଟେ ପୁଲିସର ପାରଦର୍ଶିତା ଅଭାବରୁ ଜଣେ ବରିଷ୍ଠ ଆଇପିଏସଙ୍କ ସମ୍ପର୍କୀୟ ବୋଲି ତଦନ୍ତ ଆଗଉନି କହି ଅଙ୍ଗୁଳି ଉଠୁଥିବା କଥା କହିଛନ୍ତି ଅବସରପ୍ରାପ୍ତ ଡିଜି।

    ଡିସିପି ପ୍ରତୀକ ସିଂ କହିଛନ୍ତି, ଲୁମେକ୍ସ ବଡ଼ ଧରଣର ଆର୍ଥିକ ଅନିୟମିତତା ମାମଲା ଥିବାରୁ ସବୁ ଦିଗକୁ ପୁଲିସ ନିରୀକ୍ଷଣ କରୁଛି। ତଦନ୍ତ କରୁଛି। ସେଥିଲାଗି ସମୟ ଲାଗୁଛି। ଅଭିଯୋଗକାରିଙ୍କୁ ଡାକିଛନ୍ତି। ତଥ୍ୟ ପ୍ରମାଣ ନେଇଛନ୍ତି। ହେଲେ ବଡ଼ ପ୍ରଶ୍ନ, ଅଭିଯୁକ୍ତକୁ କେତେ ଥର ପଚାରିଲାଣି ପୁଲିସ। ଅଭିଯୁକ୍ତର ଅତାପତ୍ତା କେଉଁଠି। କୋର୍ଟ କଅଣ କହିଥିଲେ। ଏତଲା ଦେବାର ୧୭ ମାସ ବିତିଗଲା। ତଥାପି ତଦନ୍ତ ସରୁନି। ଅଭିଯୁକ୍ତଙ୍କ ଆଗୁଆ ଜାମିନ୍ ୨ଥର ଖାରଜ ହେଲାଣି। ଉଚ୍ଚ ନ୍ୟାୟାଳୟଙ୍କ ନିର୍ଦେଶକୁ ବି ୩ ମାସ ବିତିଲାଣି। କୋର୍ଟ ନିର୍ଦେଶ ଦେଇଥିଲେ କି ଅଭିଯୋଗକାରିଣୀଙ୍କୁ ଡିସିପି ଶୁଣିବେ। ଆଉ ଏହା ଉପରେ ବିଚାର କରିବେ। ହେଲେ ବିଚାର ସରୁନି। ଅଭିଯୁକ୍ତ ପୁଲିସକୁ ତଦନ୍ତରେ ସହଯୋଗ କରିଛନ୍ତି କି। ସେପଟେ କୋଟିଏରୁ ବେଶୀ ଟଙ୍କା ହେରଫେର ମାମଲା ଅର୍ଥନୈତିକ ଅପରାଧ ଶାଖାକୁ ଯିବା କଥା। ଏଠି କ୍ରାଇମବ୍ରାଞ୍ଚ ପୁରା ନୀରବ। ନେବାକୁ ଚାହୁଁନି ନା କମିଶନରେଟ ପୁଲିସ ଦେବାକୁ ଚାହୁଁନି। ଏ କି ପ୍ରକାର ପ୍ରହସନ ଚାଲିଛି କହି ବିରୋଧୀ ଅଙ୍ଗୁଳି ଉଠାଇଲେଣି। ଅଭିଯୋଗକାରୀକୁ ଥାନାକୁ ଡକାଯାଉଛି। କିନ୍ତୁ ଅଭିଯୁକ୍ତକୁ ନୁହେଁ। ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବେ ବୋଲି କହିଛନ୍ତି ବାହିନୀପତି। ବିରୋଧୀ ଦଳ ନେତା କହୁଛନ୍ତି, ଆଇନ ଅନୁସାରେ ଯଦି ପଦକ୍ଷେପ ନିଆଯାଉଛି, ତାହେଲେ କାହିଁକି ନିଆଯାଉନି। ଆଉ ଶାସକ ଦଳର କହିବା କଥା, ଯେହେତୁ ବିଧାନସଭାରେ ଏ କଥା ଉଠିଛି। ଆଉ ଡିସିପି ଯେହେତୁ କହିଲେଣି, ତ୍ୱରିତ ଆକ୍ସନ। ସେଥିଲାଗି ଆଇନ ଉପରେ ଆସ୍ଥା ରଖନ୍ତୁ।

    ସେପଟେ ଏଭଳି ସ୍ଥିତିରେ ପୁଲିସ ପାରଦର୍ଶିତା ସହ ତଦନ୍ତ କରିବା ଜରୁରୀ ବୋଲି ମତ ରଖିଛନ୍ତି ଅବସରପ୍ରାପ୍ତ ଡିଜି ସଞ୍ଜୀବ ମାରିକ୍। ତା ନହେଲେ ବରିଷ୍ଠ ଆଇପିଏସଙ୍କ ସମ୍ପର୍କୀୟ ହେତୁ ତଦନ୍ତ ଢିଲା ହୋଇଛି ବୋଲି ସାଧାରଣରେ ସନ୍ଦେହ ଉଠିବ। ଆଉ ବରିଷ୍ଠ ଆଇନଜୀବିଙ୍କ ମତରେ, ଅଭିଯୁକ୍ତ ପାଖରେ ଏ ଯାଏ ପହଞ୍ଚିପାରିଲାନି ପୁଲିସ। ଅଭିଯୋଗକାରିଣୀ ତା ହେଲେ ନ୍ୟାୟ ପାଇବେ କେମିତି। ଏଯାଏ ଅଭିଯୁକ୍ତଠୁ ଠାବ କରିପାରିଲାନି ପୁଲିସ୍। ଅଭିଯୁକ୍ତଙ୍କ ସମ୍ପତ୍ତି ଜବତ ହୋଇଛି କି। ସେମାନେ ଫେରାର୍ କି। ଯଦି ଫେରାର୍, ତେବେ ଠାବ ନେଇ ପୁଲିସ କଅଣ କରିଛି ବୋଲି କହିଛନ୍ତି ବରିଷ୍ଠ ଆଇନଜୀବି ଚିତ୍ତରଞ୍ଜନ ମହାନ୍ତି ।

    କମିଶନରେଟ ପୁଲିସର ଦକ୍ଷତାକୁ ନେଇ କାହାରି ସନ୍ଦେହ ନାହିଁ। କିନ୍ତୁ ଲୁମେକ୍ସ ମହାଠକେଇ ଘଟଣାର ପୁରା ପ୍ରକରଣକୁ ଦେଖିଲେ ସାଧାରଣରେ ସନ୍ଦେହ ଘନୀଭୂତ ହେଲାଣି। ନିବେଶକାରୀ ନିଶାରାଣୀଙ୍କ ଚାରିପଟେ ତଦନ୍ତ ସୀମିତ ରହିଯାଇଛି କି ପୁଲିସର। ନା ଅଭିଯୁକ୍ତକୁ ଠାବ କରିବାକୁ ପୁଲିସର କଳ ଓ ବଳ ପାଉନି। କୋଟିଏରୁ ଉର୍ଦ୍ଧ୍ୱ ଟଙ୍କା ଅନିୟମିତତା ମାମଲାରେ ଇଓଡବ୍ଲୁ ବି କାହିଁକି ଆଖି ବୁଜିଦେଇଛି। ଏମିତି ତମାମ ପ୍ରଶ୍ନଜାଲରେ କମିଶନରେଟ ପୁଲିସର ପାରିଲାପଣିଆ ପଡ଼ିଯାଇଛି କହିଲେ ଭୁଲ ହେବନି।

    ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍

  • LUMEX RESOURCE FRAUD(ନିବେଶକଙ୍କ ଭରସା ଭାଙ୍ଗିବନି ତ ଇଓଡବ୍ଲୁ )

    21/04/2023

    () ଲୁମେକ୍ସ ମହାଠକେଇ ମାମଲାରେ କେତେଦୂର ଗଲାଣି ତଦନ୍ତ। ଇଓଡବ୍ଲୁ ଏ ଯାଏ ଅଭିଯୁକ୍ତଙ୍କ ପାଖରେ ପହଞ୍ଚିସାରିଛି ନା ପହଞ୍ଚିବାକୁ ଏ ଯାଏ ବାଟ ପାଉନି। କାରଣ କମିଶନରେଟ ପୁଲିସଠୁ ଇଓଡବ୍ଲୁ ତଦନ୍ତ ଭାର ନେଇକି ମାସେ ବିତିଗଲାଣି। କିନ୍ତୁ ଅଭିଯୁକ୍ତଙ୍କ ବାବଦରେ କୌଣସି ସୂଚନା ନାହିଁ। ନିବେଶକାରୀ କେଉଁ ଭରସାରେ ନ୍ୟାୟ ପାଇବେ ବୋଲି ଆଶା ରଖିବେ। ଏମିତି ତମାମ ପ୍ରଶ୍ନଜାଲରେ ଆପେ ଆପେ ଛନ୍ଦି ହୋଇଗଲାଣି ଇଓଡବ୍ଲୁ। ଲୁମେକ୍ସ ମହାଠକେଇ ମାମଲାରେ କମିଶନରେଟ ପୁଲିସର ପାରିଲାପଣିଆକୁ ନେଇ ପ୍ରଶ୍ନ ଉଠିବା ପରେ ଏହାର ତଦନ୍ତ ଭାର ଇଓଡବ୍ଲୁକୁ ଦେଇଥିଲେ ମୁଖ୍ୟମନ୍ତ୍ରୀ। ବଡ଼ କଥା ହେଲା, କ୍ରାଇମବ୍ରାଞ୍ଚ ଏଡିଜି ଅରୁଣ ବୋଥ୍ରା ଏହାର ନିଜେ ଅନୁଧ୍ୟାନ କରିବେ ବୋଲି ବିଧିବଦ୍ଧ ବିଜ୍ଞପ୍ତି ବି ପ୍ରକାଶ ପାଇଥିଲା। ହେଲେ ଇଓଡବ୍ଲୁର ଆକ୍ସନ ଏ ଯାଏ ଆଖିଦୃଶିଆ ହୋଇପାରିଲାନି। ୧୭ ମାସ ହେଲା ତଦନ୍ତ ନାଁରେ ନିବେଶକ ନିଶାରାଣୀଙ୍କୁ ଭୂଆଁ ବୁଲାଉଥିବା କମିଶନରେଟ ପୁଲିସର ଶିଥିଳତା ପଛରେ ଅନେକ କାରଣ କୁହାଗଲା। ଅତିରିକ୍ତ ସିପି ଉମାଶଙ୍କର ଦାସ ଅଭିଯୁକ୍ତ ରାଜୀବ ଦାସଙ୍କ ସମ୍ପର୍କୀୟ ହେତୁ ତଦନ୍ତ ଆଗଉନି ବୋଲି ନିଶାରାଣୀ ମୁଖ୍ୟମନ୍ତ୍ରୀ, ଫାଇଭ-ଟି ସଚିବ, ଗୃହ ସଚିବ ଓ ଡିଜିଙ୍କ ଦୃଷ୍ଟି ଆକର୍ଷଣ କରିଥିଲେ। ବିଧାନସଭାରେ ବିରୋଧୀ ଏହାକୁ ନେଇ ସ୍ୱର ଉଠାଇଥିଲେ। ଉମାଶଙ୍କରଙ୍କୁ ବଦଳି, ୧୭ ମାସ ହେଲା ତଦନ୍ତରେ ଅବହେଳା କରିଥିବା ଅଧିକାରୀଙ୍କ ବିରୁଦ୍ଧରେ ଦୃଢ଼ ଆକ୍ସନ ପାଇଁ ବି ବାହିନୀପତି ଚିଠି ଲେଖିଥିଲେ ମୁଖ୍ୟମନ୍ତ୍ରୀଙ୍କୁ। ଏ ସବୁ ପରେ ଇଓଡବ୍ଲୁ ତଦନ୍ତଭାର ହାତକୁ ନେବା ପରେ ଆଶା ଥିଲା ନିବେଶକାରୀ ତ୍ୱରିତ ନ୍ୟାୟ ପାଇବେ। ହେଲେ ସମୟ ଗଡ଼ୁଛି ସିନା। ନା ତଦନ୍ତ ଆଗଉଛି ନା ଅଭିଯୁକ୍ତଙ୍କ ପାଖରେ ପହଞ୍ଚିପାରିଲା ଏ ଯାଏ ଇଓଡବ୍ଲୁ। ଏହାରି ଭିତରେ ଲୁମେକ୍ସ ସହ ଜିଓକେମ୍, ଜିନ୍ଦଲ, ଆଦିତ୍ୟ ବିର୍ଲା ଭଳି ଅନେକ ସଂସ୍ଥା ସହ ବ୍ୟବସାୟିକ କାରବାରର ମିଛ ଓ ଜାଲି ଦସ୍ତାବିଜ୍ ସହ ପ୍ରମାଣ ସାମ୍ନାକୁ ଆସିସାରିଛି। ଡିଏଲଏଫ ସାଇବର ସିଟିରେ ଥିବା ବିଜେଡି ନେତ୍ରୀ ଲୋପାମୁଦ୍ରା ବକ୍ସିପାତ୍ରଙ୍କ ଯେଉଁ ଘରେ ଭଡ଼ା ନେଇ ଲୁମେକ୍ସ ସଂସ୍ଥା ଖୋଲିଥିଲା, ଲୋପାମୁଦ୍ରାଙ୍କ ଦସ୍ତଖତକୁ ଜାଲି କରି ରାଜୀବ ଓ ତାଙ୍କ ସହଯୋଗୀଆରଓସିରେ କମ୍ପାନୀ ପଞ୍ଜୀକରଣ କରିଥିବାର ଗୁମର ବି ଖୋଲିସାରିଲାଣି। କୋର୍ଟ ଅଫିସରଙ୍କ ଫରେନସିକ ଅଡିଟରେ ବି ଏହାର ସ୍ୱୀକାରୋକ୍ତି ଜଳଜଳ କରି ଦିଶୁଛି। ହେଲେ ଇଓଡବ୍ଲୁ ଏ ସବୁ ଦିଗ ପ୍ରତି କାହିଁକି ଆଖି ବୁଜିଦେଉଛି ବୋଲି ଆରୋପ ଆସିଛି। ବାହିନୀପତି କହିଛନ୍ତି, ତଦନ୍ତରେ ଅବହେଳା କରିଥିବା ସମସ୍ତ ଅଧିକାରୀଙ୍କୁ ତଦନ୍ତ ପରିସରଭୁକ୍ତ କରିବା ଜରୁରୀ। ଇଓଡବ୍ଲୁ ତଦନ୍ତ ଭାର ନେବା ପରଠୁ ବି ସେମିତି କୌଣସି ଆଖିଦୃଶିଆ ଆକ୍ସନ ହୋଇନି। ଅତିରିକ୍ତ ସିପି ଉମାଶଙ୍କର ଦାସଙ୍କର ଏ ଯାଏ ବଦଳି ହେଲାନି। ନା ରେଡ୍ ହେଉଛି। ନା ସିଜ୍ ହେଉଛି। ନା ଆକାଉଣ୍ଟକୁ ଅଚଳ କରାହେଉଛି। ହାଇକୋର୍ଟଙ୍କ ନିର୍ଦେଶକୁ କମିଶନରେଟ ପୁଲିସ ଅନୁପାଳନ କରିନଥିଲା ବୋଲି ଆରୋପ ଆସିଥିଲା।  ଆଗୁଆ ଜାମିନ ଦୁଇ ଦୁଇ ଥର ଖାରଜ ହୋଇସାରିଛି। ବିଜେପି ବିଧାୟକ ନାଉରୀ ନାୟକ କହିଛନ୍ତି, ପୁଲିସ ସେମାନଙ୍କୁ ଫେରାର ବୋଲି ଦର୍ଶାଇ ନିଜର କାମ ସାରିଦେଇଥିଲା। କିନ୍ତୁ ଅଭିଯୁକ୍ତଙ୍କ ପାଖରେ ପହଞ୍ଚିବାକୁ କୌଣସି କସରତ କରିନଥିଲା କମିଶନରେଟ ପୁଲିସ। ଇଓଡବ୍ଲୁ ବି ତଦନ୍ତଭାର ନେଇକି ମାସେ ହେଲାଣି। ଯାହା ତ୍ୱରିତ ଆକ୍ସନ ହେବ ବୋଲି ଆଶା କରାଯାଉଥିଲା, ତାହାର କାଣିଚାଏ ବି ଦେଖାଯାଉନି। ଲାଗୁଛି ଯେମିତି ତଦନ୍ତକାରୀ ସଂସ୍ଥା ଧୃତରାଷ୍ଟ୍ର ସାଜିଛି। ଆଉ ଶାସକ ଦଳ ବିଧାୟକ ଧୃବ ସାହୁ କହୁଛନ୍ତି, ଆଇନ ଉପରେ ଭରସା ରଖନ୍ତୁ। ନିଶ୍ଚୟ ଇଓଡବ୍ଲୁ ଠୋସ୍ ନିଷ୍କର୍ସରେ ପହଞ୍ଚିବ ଓ ଅଭିଯୁକ୍ତ ବନ୍ଧା ହେବେ। କିନ୍ତୁ ବରିଷ୍ଠ ଆଇନଜୀବିଙ୍କ ମତରେ, ଯେତେ ବିଳମ୍ୱ ହେଉଛି, ପ୍ରମାଣ ନଷ୍ଟ କରିବାକୁ ଅଭିଯୁକ୍ତ ସମୟ ପାଉଛି। ଏ ସବୁ ଆକଳନ ଭିତରେ ଇଓଡବ୍ଲୁ ଭଳି ଦକ୍ଷ ତଦନ୍ତକାରୀ ସଂସ୍ଥା ଓ ଏହାର ଦକ୍ଷ ଅଫିସର ବୋଥ୍ରା ଓ ତାଙ୍କ ଟିମ୍ ପ୍ରତି ଭରସା ତୁଟୁଛି କି। ତା ନହେଲେ ମାସେ ହେଲା ଏହି ମହାଠକେଇ ମାମଲାରେ ଏ ଯାଏ ଆଖିଦୃଶିଆ କାର୍ଯ୍ୟାନୁଷ୍ଠାନ ନ ଆସିବା ପଛରେ କାରଣ କଅଣ ବୋଲି ସବୁଠି ଚର୍ଚ୍ଚା। କମିଶନରେଟ ପୁଲିସ ଭଳି ନିବେଶକଙ୍କ ଭରସା ଭାଙ୍ଗିବନି ତ ଇଓଡବ୍ଲୁ ବୋଲି ଚର୍ଚ୍ଚା ଆରମ୍ଭ ହୋଇଛି।

    ଭୁବନେଶ୍ୱରରୁ ନବକିଶୋର ସାହୁ ଓ ପ୍ରଦୀପ ନାୟକଙ୍କ ରିପୋର୍ଟ, ନକ୍ଷତ୍ର ନ୍ୟୁଜ୍..।

  • LUMEX RESOURCES LOOT INQUARY( ଲୁମେକ୍ସ ସଂସ୍ଥା ନାଁରେ ଆର୍ଥିକ ହେରଫେର)

    08/04/2023

    () ଗୋଟିଏ ଉଦ୍ଦେଶ୍ୟ ଥିଲା। ରାତାରାତି ଠକିବା। ଆଉ କୋଟି କୋଟି ଟଙ୍କା ନେଇ ପାର୍ ହୋଇଯିବା। ଚକାଚକ୍‌ ଅଫିସ, ବାବୁଙ୍କ ଭଳି ଠାଣିରେ ଏମିତିରେ ବି କେହି ଅବିଶ୍ୱାସ କରିବାର ପ୍ରଶ୍ନ ଉଠୁନଥିଲା। ଆଉ ବହୁ ବଡ଼ବଡ଼ିଆଙ୍କ ସହ ସମ୍ପର୍କ ସାଙ୍ଗକୁ ନାମୀଦାମୀ ସଂସ୍ଥା ସହ କାରବାର କରୁଥିବାର ମିଛ ଭେଳିକିକୁ ବି ସହଜେ କେହି ଧରିପାରିବେନି ବୋଲି ଭ୍ରମରେ ଥିଲେ ଠକ। କିନ୍ତୁ ଠକାମୀ ବେଶୀ ଦିନ ଚାଲିପାରିଲାନି। କମିଶନରେଟ ପୁଲିସରୁ ତଦନ୍ତ ଭାର ଇଓଡବ୍ଲୁ ନେଇ ଏବେ ଖୋଜୁଛି ଏହି ଠକଙ୍କୁ ଆଉ ଏମାନଙ୍କ ନେଟଓ୍ୱର୍କକୁ।

    ଜାଲ ବିଛାଇଥିଲେ ଆଉ ପାଲରେ ପକାଇଦେଇଥିଲେ ନିଶାରାଣୀ ମହାପାତ୍ରଙ୍କୁ ଲୁମେକ୍ସ ସଂସ୍ଥା ନାଁରେ ଡିଏଲଏଫ ସାଇବର ସିଟିରେ ଅଫିସ ଖୋଲି ଜାଲି ଦସ୍ତାବିଜ୍‌ ଦେଖାଇ ଆଗ ନିଶାରାଣୀଙ୍କ ଭଳି ନିବେଶକଙ୍କଠୁ ଟଙ୍କା ନେବାରେ ସଫଳ ହୋଇଥିଲେ ଠକ ଦମ୍ପତ୍ତି ରାଜୀବ ଦାସ ଓ ସୋନିଆ ତ୍ରିପାଠୀ। କିଛି ମାସ ଭଲ ରିଟର୍ଣ୍ଣ ଦେଇ ନିଶାରାଣୀଙ୍କ ସ୍ୱାମୀ ପ୍ରଜ୍ଞାପ୍ରକାଶଙ୍କୁ ବି ଜାଲରେ ପକାଇଲେ।। ପ୍ରଜ୍ଞାଙ୍କୁ ବ୍ରାଇଟ ହୋମ୍ସ ଡେକର ସଂସ୍ଥା ନାଁରେ ଚୂନ ଲଗାଇବା ଆରମ୍ଭ କଲେ ପୋଖରୀପୁଟରେ ଲକଜରି ଭିଲ୍ଲା ଓ ଡୁପ୍ଲେକ୍ସ ଦେବା ନାଁରେ ନେଇଗଲେ କୋଟି କୋଟି ଟଙ୍କା। ଉଭୟ ପତି ପତ୍ନୀଙ୍କ ବିଶ୍ୱାସରେ ବିଷ ଦେଇ କମ୍ପାନୀରେ ତାଲା ଠୁଙ୍କି ଫେରାର୍ ହୋଇଗଲେ ଏହି ଠକ ଦମ୍ପତ୍ତିଙ୍କ ସମେତ ଅନ୍ୟ ତିନି ସହଯୋଗୀ ଉଷାରାଣୀ ପାଣିଗ୍ରାହୀ, ହିମାଂଶୁ ପାଣିଗ୍ରାହୀ ଓ ବିମଳ ପାଢ଼ୀ। କମିଶନରେଟ ପୁଲିସର ଶୀଥିଳତା, କୋର୍ଟଙ୍କ ନିର୍ଦେଶକୁ ଅନୁପାଳନରେ ପୁଲିସର ପଛଘୁଞ୍ଚା, ଅତିରିକ୍ତ ସିପି ଉମାଶଙ୍କର ଦାସଙ୍କ ସହ ରାଜୀବଙ୍କ ସମ୍ପର୍କ, ବିଧାନସଭାରେ ବିରୋଧୀଙ୍କ ଗର୍ଜନ, ମୁଖ୍ୟମନ୍ତ୍ରୀଙ୍କୁ ଚିଠି ଆଉ ଶେଷରେ ଇଓଡବ୍ଲୁ ତଦନ୍ତ ହାତକୁ ନେବା ସବୁ ଅତୀତ ଏବେ କଥା ପଡ଼ିଛି, ଇଓଡବ୍ଲୁ କମିଶନରେଟ ପୁଲିସଠୁ ଆବଶ୍ୟକୀୟ ସମସ୍ତ ନଥିପତ୍ର ନେଇସାରିଲାଣି କେବେଠୁ। ଏଡିଜି ଅରୁଣ ବୋଥ୍ରା ପୁଣି ତଦନ୍ତକୁ ନିଜେ ଅନୁଧ୍ୟାନ କରୁଛନ୍ତି। କିନ୍ତୁ ସେପଟେ ଯେଉଁ ତଥ୍ୟ, ପ୍ରମାଣ ଏବେ ସମସ୍ତଙ୍କ ସାମ୍ନାରେ ରହିଛି ହୁଏତ, ଇଓଡବ୍ଲୁ ଭଳି ଦକ୍ଷ ତଦନ୍ତକାରୀ ସଂସ୍ଥାକୁ ତଦନ୍ତକୁ ଆଗେଇନେବାରେ ବିଳମ୍ୱ ଲାଗିନପାରେ ଆଉ ଅଭିଯୁକ୍ତଙ୍କ ପାଖରେ ପହଞ୍ଚିବା ବି ସମୟସାପେକ୍ଷ ହୋଇନପାରେ ଏନେଇ ନିଜର ମତ ପୋଷଣ କରିଛନ୍ତି କଂଗ୍ରେସ ନେତା ସନ୍ତୋଷ ସିଂ ସାଲୁଜା ।

    କାରଣ କୋର୍ଟ ଅଫିସର ଫରେନସିକ ଅଡିଟରୁ ମାନିଛନ୍ତି, ଲୁମେକ୍ସ ପୁରା ଫେକ୍ ତଦନ୍ତରେ ଦେଖିବାକୁ ପାଇଥିଲେ ଯେ, କମ୍ପାନୀରେ ତାଲା ପଡ଼ିଥିଲା ଏପରିକି ଚେୟାର ଟେବୁଲ୍‌ ବି ପାଇନଥିଲେ ନିବେଶର ସବୁ ଟଙ୍କା ନିର୍ଦେଶକମଣ୍ଡଳୀ ନିଜ ନିଜ ଭିତରେ ବାଣ୍ଟିକି ଖାଇ ଯାଇଛନ୍ତି ବିଶେଷକରି ରାଜୀବ, ଉଷା ବିମଳଙ୍କ ଆକାଉଣ୍ଟକୁ ଟଙ୍କା ଯାଇଛି କେବଳ ଏତିକି ନୁହେଁ। ଲୁମେକ୍ସ ସଂସ୍ଥା ଯାହା ସହ ବ୍ୟବସାୟିକ ଚୁକ୍ତି କରିଥିଲା ଆଉ ନେଣଦେଣ କରିଛି ବୋଲି ଦର୍ଶାଇଥିଲା, ସେ ସବୁ ବି ଫେକ୍ ବୋଲି ମାନିଛନ୍ତି। କାରଣ ଏହା ଆଇନସଙ୍ଗତ ବୋଲି ପ୍ରମାଣ କରିବାକୁ କୌଣସି ତଥ୍ୟପ୍ରମାଣ କୋର୍ଟ ଅଫିସରଙ୍କ ହାତରେ ଲାଗିନଥିଲା। ଏପରିକି ରାଜୀବ ହାର୍ଡଡିସ୍କ ନେଇ ପାର୍ ହୋଇଯାଇଛନ୍ତି ବିମଳଙ୍କୁ ବ୍ୟାଙ୍କ ଖୋଜୁଛି ଅନେକ ବ୍ୟାଙ୍କରୁ ଋଣ ନେଇ ଧରାଛୁଆଁ ଦେଉନାହାନ୍ତି ବୋଲି ଅଭିଯୋଗ ଆସିଛି। ଉଷା ହିମାଂଶୁଙ୍କ ଅବସ୍ଥା ବି କିଛି ଏମିତି ବ୍ରହ୍ମପୁରର ନୂଆଗାଁସ୍ଥିତ ଯେଉଁ ରୋୟାଲ ଫାର୍ମାସି ଫ୍ଲାଟରେ ରହୁଥିଲେ, ସେ ଘରକୁ ଆଉ କାହାକୁ ଦେଇସାରିଲେଣି। ଏହି ଫ୍ଲାଟରେ ଏବେ ରହୁଛନ୍ତି ଗଙ୍ଗାଧର ପାଣିଗ୍ରାହୀ। ଯଦିଓ ଘରର ପଞ୍ଜୀକରଣ କ୍ରେତାଙ୍କ ନାଁରେ ଏ ଯାଏ ସରିନି। ଗଙ୍ଗାଧରଙ୍କ କହିବା କଥା, ଏହି ଫ୍ଲାଟକୁ ତାଙ୍କ ନାଁରେ ଏ ଯାଏ ପଞ୍ଜୀକୃତ ହୋଇପାରିନି। କେବଳ ଏଗ୍ରିମେଣ୍ଟ ହୋଇଛି। ପଞ୍ଜାବ ନାସନାଲ ବ୍ୟାଙ୍କ, କର୍ଣ୍ଣାଟକ ବ୍ୟାଙ୍କରୁ ୨୨ ଲକ୍ଷ ଟଙ୍କାର ଋଣ ପାଣିଗ୍ରାହୀ ଦମ୍ପତ୍ତି ନେଇଛନ୍ତି ଗଙ୍ଗାଧରଙ୍କଠୁ ବି ଲକ୍ଷ ଟଙ୍କା ଧାର ନେଇଛନ୍ତି ଘର ପଞ୍ଜୀକରଣ ହେଲେ ଯାଇ ଋଣ ଟଙ୍କା ପରିଶୋଧ କରିବେ ବୋଲି ଗଙ୍ଗାଧର ପାଣିଗ୍ରାହୀ ସମତି ଦେଇ ଅପେକ୍ଷାରେ। ଆଉ ଚଳିତ ମାସରୁ ଗଙ୍ଗାଧରଙ୍କ ଆକାଉଣ୍ଟରୁ ଇଏମଆଇ କଟିବା ଆରମ୍ଭ ହୋଇଛି। ଏ ବିଷୟରେ କହିଛନ୍ତି କୋର୍ଟ ଅଫିସର ସୁରେଶ ପଟ୍ଟନାୟକ

    ଲାଗୁଛି ଯେମିତି ୫କୁ ଯେମିତି ପେଞ୍ଚ କରି ଅନ୍ୟକୁ ନିଜ ପଞ୍ଝାରେ ଫସାଇବାକୁ ଚେଷ୍ଟା କରିଥିଲେ, ଏବେ ସେମିତି ନିଜେ ଭୋଗୁଛନ୍ତି କିଏ ଆଇନ ଆଖିରେ ଧୂଳି ଦେଇ ଲୁଚିଛି ତ କିଏ ବ୍ୟାଙ୍କକୁ ଚୂନ ଲଗାଇ ଧରାଛୁଆଁ ଦେଉନି। ନିବେଶକଙ୍କ ବିଶ୍ୱାସରେ ବିଷ ଦେଇଥିବା ଏହି ଠକ ଗୋଷ୍ଠୀ ବି ଜାଣିବା ଦରକାର, ଆଇନର ହାତ ବହୁତ ଲମ୍ୱା ଅପରାଧ କରି ଯେତେ ଲୁଚିଲେ କି ଫନ୍ଦି କଲେ। କି କୌଣସି ପ୍ରଭାବଶାଳୀର ସମ୍ପର୍କୀୟ କହି ସାଧାରଣରେ ପ୍ରଭାବ ଦେଖାଇବାକୁ ଚେଷ୍ଟା କଲେ ବି ପରିଣତି ଶେଷରେ କଅଣ ହୁଏ, ଏ କଥା ଉଣା ଅଧିକେ ସମସ୍ତଙ୍କୁ ଜଣା।

    ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍

  • LUMEX RESOURCE FRAUDULENTS (ନିବେଶକଙ୍କୁ ଜାଲି ଦସ୍ତାବିଜ୍ ବଳରେ ଲୁଟ୍)

    11/04/2023

    ()ନିବେଶ ଆସିବ। ଓଡ଼ିଶା ସମୃଦ୍ଧଶାଳୀ ହେବ। ଏ ଦିଗରେ ମୁଖ୍ୟମନ୍ତ୍ରୀ ନିରନ୍ତର ଉଦ୍ୟମ ଜାରି ରଖିଛନ୍ତି। ହେଲେ ଓଡ଼ିଶାରେ ନିବେଶକ ସୁରକ୍ଷିତ ତ। ଅନେକ ସଂସ୍ଥା ଯେଭଳି ଛତୁ ଫୁଟିଲା ଭଳି କମ୍ପାନୀ ଖୋଲି ନିବେଶକଙ୍କୁ ଜାଲି ଦସ୍ତାବିଜ୍ ବଳରେ ଲୁଟ୍ କରି ଚାଲିଛନ୍ତି। ଏହାକୁ ନେଇ ଅଭିଯୋଗ କଲେ ବି ବ୍ୟବସ୍ଥା ତ୍ୱରିତ ନ୍ୟାୟ ଦେବାରେ ବିଫଳ ହେଉଛି। ଲୁମେକ୍ସ ଲୁଟ୍‌ର ଫର୍ଦ୍ଦ ଯେତେ ଖୋଲିଲେ ବି କିଛି ଏମିତି ଗନ୍ଧ ବାରି ହେଉଛି। ରାଜୀବ ଦାସଙ୍କ କାରନାମାକୁ ନେଇ ମାମଲା କମିଶନରେଟ ପୁଲିସ, ଇଓଡବ୍ଲୁରେ ସୀମିତ ରହିନି। ଆଗରୁ ସିବିଆଇ ବି ଚିଟଫଣ୍ଡ କେଳେଙ୍କାରୀରେ ଘଣ୍ଟାଚକଟା କରିସାରିଛି।

    ସବୁ ନକଲି। ଠିକଣା ମିଳୁନି। ଯେଉଁ ଠିକଣା କମ୍ପାନୀ ଖୋଲିଲା ବେଳକୁ ଦିଆଯାଇଥିଲା, ସେ ସବୁ ଭୁଲ୍। ଲୁମେକ୍ସ ସଂସ୍ଥାର ମାଷ୍ଟରମାଇଣ୍ଡ ରାଜୀବ ଦାସଙ୍କ କାରସାଦିର ଚିଠା ଏତେ ଲମ୍ୱା ଯେ, ସରୁନି। ଲୁମେକ୍ସ ସଂସ୍ଥା ଖୋଲି ନିବେଶକଙ୍କୁ ଚୂନ ଲଗାଇଲା ବେଳଠୁ ହିଁ ସବୁ ଫ୍ରଡ୍ କାଗଜପତ୍ର ପ୍ରସ୍ତୁତ କରିସାରିଥିଲେ ରାଜୀବ। ଆଉ ଆରଓସିରେ ପଞ୍ଜୀକରଣ ବେଳେ ତ ଘର ଭଡ଼ା ଦେଇଥିବା ବିଜେଡି ନେତ୍ରୀ ଲୋପାମୁଦ୍ରା ବକ୍ସିପାତ୍ରଙ୍କ ଦସ୍ତଖତକୁ ବି ଜାଲି କରିବାକୁ ପଛାଇନଥିଲେ। ଯେଉଁ ସବୁ ସଂସ୍ଥା ସହ କାରବାର କରୁଥିବାର କହୁଥିଲେ, ସେମାନଙ୍କର ନଜରରେ ନେଣଦେଣ, ଚୁକ୍ତିକୁ ନେଇ ଦସ୍ତାବିଜ୍ ଦେଖାଇବା ପରେ ସବୁ ମାନିଲେଣି, ରାଜୀବ ଓ ଲୁମେକ୍ସ ଉଭୟ ଫ୍ରଡ୍। ଆଇନଗତ ଆକ୍ସନ ପାଇଁ ବି ପ୍ରସ୍ତୁତ ହେଲେଣି। ଜିଓକେମ୍, ଜିନ୍ଦଲରୁ ନେଇ ଆଦିତ୍ୟ ବିର୍ଲା ଯାଏ ବହୁ ବଡ଼ ବଡ଼ କମ୍ପାନୀ ସହ ରାଜୀବଙ୍କର ବ୍ୟବସାୟିକ ନେଣଦେଣର ମିଛ ଏବେ ପଦାରେ। ତେବେ ରାଜୀବ ଖୋଲିଥିବା କମ୍ପାନୀର ଗତିବିଧି ପରଖିବାକୁ ନିୟୋଜିତ କୋର୍ଟ ଅଫିସର ଦର୍ଶାଇଥିଲେ ଯେ, ଅନେକ କମ୍ପାନୀ ସହ ଲୁମେକ୍ସର ନେଣଦେଣ ସନ୍ଦେହଜନକ ଓ ସବୁ ଫ୍ରଡ୍। କୋର୍ଟ ଅଫିସର ଫରେନସିକ୍ ଅଡିଟ୍ କରି ସମ୍ଭାବ୍ୟ ଠକାମୀର ଶୀକାର ହୋଇଥିବା କମ୍ପାନୀ ଗୁଡ଼ିକ ଥିଲା, ଶ୍ରୀ ଅଟୋମୋଟିଭସ୍, ମାର୍କ ଇନଫ୍ରା ଓ ପିଜେ ଇଣ୍ଟରନାସନାଲ। ଆଉ ପିଜେ ମିନେରାଲ୍ସ ଇଣ୍ଟରନାସନାଲ ପ୍ରାଇଭେଟ୍ ଲିମିଟେଡ୍ ସଂସ୍ଥାର ଅଫିସ ଠିକଣା କହୁଛି, ବରମୁଣ୍ଡାର ହାଉସିଂବୋର୍ଡ କଲୋନୀର ଏଚଆଇଜି-୧୨। ଆମ ପ୍ରତିନିଧି ଗଲା ବେଳକୁ ଏଠି ସେମିତି କିଛି ଅଫିସ୍ ହିଁ ନାହିଁ। ଯେମିତି କାନନବିହାରରେ ଥିବା ରେଭାଟଜ ଗ୍ଲୋବାଲ୍ ଅଫିସ। ସେଠି ବି ଅଫିସ୍‌ର ଚିହ୍ନବର୍ଣ୍ଣ ନଥିଲା। ଇଏ ତ ଗଲା ରାଜୀବ ବିଛାଇଥିବା ଜାଲି ନେଟଓ୍ୱର୍କ ଓ ଜାଲିଆତିର ସାମ୍ରାଜ୍ୟ। ଏବେ ନଜର ପକାଇବା ରାଜୀବଙ୍କ ବିରୁଦ୍ଧରେ ମାମଲା କେବଳ କମିଶନରେଟ ପୁଲିସ ଓ ଇଓଡବ୍ଲୁରେ ଅଛି ନା ଆଉ କେଉଁଠି। ଏ ଦସ୍ତାବିଜ୍ ଉପରେ ନଜର ପକାନ୍ତୁ। ରାଜୀବ ଚିଟ୍‌ଫଣ୍ଡ କେଳେଙ୍କାରୀରେ ବି ଥିଲେ। ୨୦୧୭ର ମାମଲା। ସ୍ୱସ୍ତିକ ଇଣ୍ଡିଆ ମଲଟି ପରପୋଜ୍ ଚିଟଫଣ୍ଡ ମାମଲାରେ ସିବିଆଇ ରାଜୀବଙ୍କୁ ଜେରା ବି କରିଛି। ୪୧ (ଏ) ନୋଟିସ ଆଧାରରେ ଅଭିଯୁକ୍ତ ଦର୍ଶାଇ ତାଙ୍କଠୁ ନଥିପତ୍ର ଜବତ କରିଥିଲା ସିବିଆଇ। କେବଳ ଏତିକି ନୁହେଁ। ରାଜୀବ ଆୟକର ବିଭାଗର ସ୍କାନରରେ। ବଡ଼ କଥା ହେଲା, ରାଜୀବ ଏ ସଂକ୍ରାନ୍ତରେ ନକଲ ମାଗିବାରୁ ସିବିଆଇର ତଦନ୍ତକାରୀ ଅଧିକାରୀ ଦେବାକୁ ସଫା ସଫା ମନା କରିଦେଇଥିଲେ। ବିନା ଅଦାଲତଙ୍କ ନିର୍ଦେଶରେ ଏହାକୁ ଦେଇପାରିବିନି ବୋଲି ସ୍ପଷ୍ଟ କରିଦେଇଥିଲେ ତଦନ୍ତକାରୀ ଅଧିକାରୀ। ୨୦୨୦ରେ ରାଜୀବ ସତ୍ୟପାଠ ଜରିଆରେ ଏହା ଦର୍ଶାଇଥିଲେ।.. ମୁଖ୍ୟମନ୍ତ୍ରୀଙ୍କ ନିର୍ମଳ ଭାବମୂର୍ତ୍ତି। ଓଡ଼ିଶାକୁ ନିବେଶ ଆସୁ ବୋଲି ଅହରହ ଉଦ୍ୟମ ଜାରି ରଖିଛନ୍ତି। ନିବେଶ ଆସିଲେ ଓଡ଼ିଶା ସମୃଦ୍ଧଶାଳୀ ହେବ। କିନ୍ତୁ ଅନେକ ଜାଲି କମ୍ପାନୀ ବହୁ ବଡ଼ ବଡ଼ ସଂସ୍ଥା ସହ ବ୍ୟବସାୟିକ କାରବାର କରୁଥିବାର ମିଛ କହି, ଜାଲି ଦସ୍ତାବିଜ୍ ଦେଖାଇ ନିବେଶକଙ୍କୁ ଲୁଟ୍ ରେ ମାତିଛନ୍ତି। ଯଦି ଏମାନଙ୍କ ସ୍ୱାର୍ଥ ସୁରକ୍ଷିତ ହେବନି, ତେବେ ମୁଖ୍ୟମନ୍ତ୍ରୀଙ୍କ ବଡ଼ ଭିଜନ ପ୍ରତି ଏଭଳି ଠକେଇ ବଡ଼ ପ୍ରତିବନ୍ଧକ ସାଜିବନି କି। ସେଥିଲାଗି ତ ବ୍ୟବସ୍ଥାକୁ ଗତିଶୀଳ କରିବା ଜରୁରୀ ହୋଇପଡ଼ିଛି। ସେଥିଲାଗି ତ ରାଜୀବଙ୍କ ସମ୍ପର୍କୀୟ କୁହାଯାଉଥିବା ଅତିରିକ୍ତ ସିପି ଉମାଶଙ୍କର ଦାସଙ୍କ ସମେତ ହାଇକୋର୍ଟଙ୍କ ନିର୍ଦେଶ ସତ୍ତ୍ୱେ ତଦନ୍ତରେ ଅବହେଳା କରିଥିବା ତଦନ୍ତକାରୀ ଅଧିକାରୀଙ୍କୁ ବଦଳି ଲାଗି ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ ତାରାପ୍ରସାଦ ବାହିନୀପତି। ଅଭିଯୁକ୍ତଙ୍କୁ ଗିରଫ ସହ ନିବେଶକଙ୍କୁ ନ୍ୟାୟ ଦେବାକୁ ଦାବି କରିଥିଲେ। ନିବେଶକଙ୍କ ସ୍ୱାର୍ଥ ସୁରକ୍ଷା ଦିଗରେ ତୃଣମୂଳସ୍ତରରୁ ତଦନ୍ତ ଏଜେନ୍ସି ସକ୍ରିୟ ହେବା ଜରୁରୀ। ଠକଙ୍କୁ ଗିରଫ କରିବା ତ ଦୂରର କଥା। ସେମାନଙ୍କ ସମ୍ପତ୍ତି ଜବତ କରିବା, ବ୍ୟାଙ୍କ ଆକାଉଣ୍ଟ ଅଚଳ କରିବା ଭଳି ପଦକ୍ଷେପ ନିଆଯାଉନଥିବାରୁ ଅଭିଯୁକ୍ତ ବେଫିକର। ଆଉ ଅଭିଯୋଗକାରୀ ନିରାଶ। ଯାହାକି ବିଡ଼ମ୍ୱନା।

    ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍

  • AIIMSରେ ଚାକିରି ଦେବା ନାଁରେ ଠକେଇ, ୪ ଗିରଫ

    ଭୁବନେଶ୍ବର: AIIMS ରେ ଚାକିରି ଦେବା ନାଁରେ ଠକେଇ ଅଭିଯୋଗ ରେ 4ଜଣ ଅଭିଯୁକ୍ତଙ୍କୁ ଗିରଫ କଲା ସାଇବର ଥାନା ପୋଲିସ. ଫେସ ବୁକରେ ମିଛ ବିଜ୍ଞାପନ ଦେଇ ଲୋକଙ୍କୁ ଠକୁଥିଲେ ସାଇବର ଲୁଟେରା l 2.5 ଲକ୍ଷ ଟଙ୍କାର ଠକେଇ ଅଭିଯୋଗ ଆଧାରରେ ପୋଲିସ ତଦନ୍ତ କରି ଅଭିଯୁକ୍ତ ମାନଙ୍କୁ ଗିରଫ କରିବାରେ ସଫଳ ହୋଇଛି. ସେମାନଙ୍କ ଠାରୁ ଟଙ୍କା, ଲାପଟପ, ମୋବାଇଲ, ପ୍ରି ଆକ୍ଟିଭେଟେଡ଼ ସିମ ଜବତ କରାଯାଇଛି l

    ଚାକିରି କରାଇଦେବା ନାଁରେ ଠକେଇ।  ନିଜକୁ ଏମ୍ସ ହସ୍ପିଟାଲର HR ମୁଖ୍ୟ  କହି ଲୋକଙ୍କ ଠାରୁ ଲକ୍ଷାଧିକ ଟଙ୍କା ହଡପ ଅଭିଯୋଗ। ମୁଖ୍ୟ ଅଭିଯୁକ୍ତ ବାଦଲ ଦାସ ସହ ୩ ସହଯୋଗୀଙ୍କୁ ବାନ୍ଧିଲା ସାଇବର ଥାନା ପୋଲିସ ସୂଚନା ମୁତାବକ ସୋସିଆଲ ମିଡିଆରେ ବିଜ୍ଞାପନ ଦେଇ ଲୋକଙ୍କୁ ଯୋଗାଯୋଗ କରି ଚାକିରି ପାଇଁ ଡୋନେଶନ ମାଗୁଥିଲେ ଅଭିଯୁକ୍ତ। ମୋଟ ୨ ଲକ୍ଷ ୪୮ ହଜାରରେ ୮ ଜଣ ଆଶାୟୀଙ୍କ ଚାକିରି କରାଇ ଦେବା ପ୍ରତିଶ୍ରୁତି ଦେଇଥିଲା ବାଦଲ। ପରେ ଟଙ୍କା ପାଇ ୮ଟି ଫେକ୍ ନିଯୁକ୍ତି ପତ୍ର ପଠାଇଥିଲାl  ନିଯୁକ୍ତି ପତ୍ର ଉପରେ ସନ୍ଦେହ ହେବାରୁ ଆଶାୟୀ ଯୁବକମାନେ ଏମ୍ସ ଯାଇ ବୁଝିବା ପରେ ସେମାନଙ୍କ ସହ ଠକେଇ ହୋଇଥିବା ଜାଣିବାକୁ ପାଇବା ପରେ  ସାଇବର ଥାନାରେ ଗତ ୨୮ ତାରିଖରେ କରିଥିଲେ ଅଭିଯୋଗ l ପରେ ସାଇବର ଥାନା ପୋଲିସ ତଦନ୍ତ କରି ଅଭିଯୁକ୍ତ ବାଦଲ ଦାସ ଓ ୩ ସହଯୋଗୀଙ୍କୁ ଗିରଫ କରିଥିବା  ବେଳେ ଠକେଇରେ ବ୍ୟବହୃତ ରୋଟେଶନ ଡକ୍ୟୁମେଣ୍ଟରେ ଥିବା କିଛି ସିମ୍ କାର୍ଡ, ବିଜ୍ଞାପନ ପତ୍ରିକା, ମୋବାଇଲ ସମେତ ୮୦ ହଜାର ଟଙ୍କା ଜବତ କରିଛି l

    ଅନ୍ୟପଟେ କିନ୍ତୁ ପ୍ରତିଶୋଧ  ପାଇଁ ଏଭଳି  ଲୁଟ କରିଛି ବୋଲି କହିଛି ମୁଖ୍ୟ ଅଭିଯୁକ୍ତ ବାଦଲ l ଚାକିରି ଦେବା ନାଁ ରେ ବାଦଲକୁ  ନିଜର ଜଣେ ସାଙ୍ଗ 20 ହଜାର  ଟଙ୍କା ଠକିଥିବାରୁ  ପ୍ରତିଶୋଧ  ନେବା ପାଇଁ ପୁରା ପ୍ଲାନ କରି  ଅନୁରୂପ ଢଙ୍ଗରେ ଫସାଇଥିଲେ  ନିଜ ସାଙ୍ଗକୁ ବୋଲି କହିଛି  ବାଦଲ l

    ବାରମ୍ୱାର ଚାକିରି  ଦେବା ଆଳରେ  ହେଉଛି  ଠକେଇ  l ଛୋଟ ଛୋଟ ଭୁଲ  ପାଇଁ ଲୁଟେରାମାନେ ଚଳୁ କରି ନେଉଛନ୍ତି  ଲକ୍ଷାଧିକ  ଟଙ୍କା l

     ସ୍ୱରୂପା ମହାପାତ୍ରଙ୍କ ରିପୋର୍ଟ

  • କଳା ଡାଏରୀ ଓ ୪୨ କୋଟିର ରହସ୍ୟ

    ପଶ୍ଚିମବଙ୍ଗ ଶିକ୍ଷା ବିଭାଗ ମହାଘୋଟାଲାର ତଦନ୍ତରେ ମିଳୁଛି ପୁଳା ପୁଳା ଟଙ୍କା । ଅର୍ପିତା ମୁର୍ଖାର୍ଜୀଙ୍କ ଦ୍ଵିତୀୟ ଘରୁ ଇଡି ପୁଣି ୨୦ କୋଟି ଟଙ୍କା ସହ ୩ କେଜି ସୁନା ଜବତ କରିଛି । ମେସିନ ଲଗାଇ ଇଡି ପକ୍ଷରୁ ଟଙ୍କା ଗଣା ଚାଲିଛି । ଏହାକୁ ମିଶାଇ ଏହି ମହାଘୋଟାଲାରେ ୪୨ କୋଟି ଟଙ୍କା ଜବତ କରାଯାଇଛି । ପୁର୍ବରୁ ଅର୍ପିତାଙ୍କ ଘରୁ ୨୨ କୋଟି ଟଙ୍କା ଜବତ କରାଯାଇଥିଲା । ଯେଉଁଥିରେ ଭାରତୀୟ ମୁଦ୍ରା ସହ ବିଜେଶୀ ମୁଦ୍ରା ମଧ୍ୟ୍ୟ ଥିଲା । ଏହି ସମୟରେ ଅର୍ପିତାଙ୍କ ଘରୁ ୨୦ ରୁ ଅଧିକ ଫୋନ ବିଭିନ୍ନ କମ୍ପାନୀର କାଗଜପତ୍ର ଜବତ କରାଯାଇଛି । ଅର୍ପିତାଙ୍କ ଦ୍ଵିତୀୟ ଘର ବ୍ଲାକ ଟାଉନ ଆର୍ପାଟମେଣ୍ଟରେ ବିପୁଳ ଟଙ୍କା ଲୁଚାଇ ରଖାଯାଇଥିବା ଇଡିକୁ ସୁଚନା ମିଳିଥିଲା । ଏହାକୁ ଆଧାର କରି ଇଡି ପକ୍ଷରୁ ତାଙ୍କ ଘର ରେଡ କରାଯଆଇଥିଲା । ମେସିନ ଲଗାଇ ଟଙ୍କା ଗଣାଯଆଇଥିଲା ।

    ଏହି ଘଟଣାରେ ପଶ୍ଚିମବଙ୍ଗ ମନ୍ତ୍ରୀ ପାର୍ଥ ଚାର୍ଟାର୍ଜୀଙ୍କୁ ଗିରଫ କରାଯାଇଛି । ଇଡି ପକ୍ଷରୁ ତାଙ୍କୁ ଘଣ୍ଟା ଘଣ୍ଟା ଧରି ଜେରା କରାଯାଉଛି । ଖାସ କରି ଏକ କଳା ଡାଏରୀ କୁ ନେଇ ଇଡି ତାଙ୍କୁ ତନାଘନା କରି ପ୍ରଶ୍ନ କରୁଛି । ସେହି ବ୍ଲାକ ଡାଏରୀ ଯାହାକୁ ଇଡି ଚଢାଉ ସମୟରେ ଅର୍ପିତାଙ୍କ ଘରୁ ଜବତ କରିଛି। ଏହି ଡାଏରୀରେ ଅନେକ ଗୁଡିଏ ରହସ୍ୟ ଲୁଛି ରହିଛି ବୋଲି ଇଡି ସନ୍ଦେହ କରୁଛି ଯାହାର ପର୍ଦ୍ଦାଫାଶ ହୋଇପାରିବ ।

    • ସ୍ମରଜିତ ଆର୍ଯ୍ୟଙ୍କ ରିପୋର୍ଟ
  • ଅର୍ପିତା ମୁଖାର୍ଜୀ କିଏ? କଣ ତାଙ୍କର ଓଡିଶା ସମ୍ପର୍କ

    ଶୁସାନ୍ତ ସିଂ ରାଜପୁତଙ୍କ ସହିତ ସଂଲିଷ୍ଟ ରିୟା ଚକ୍ରବର୍ତ୍ତୀ ଙ୍କ ଓଡିଶା ଲିଙ୍କ ହେଉ କିମ୍ଭା ଗଞ୍ଜେଇ ଚୋରା ଚାଲାଣ ସମୟରେ ଓଡିଶାର ଗଞ୍ଜେଇ ର ଚାହିଦା କିଭଳି ବଲିଉଡରେ ରହିଛି ସେ ନେଇ ଗଣମାଧ୍ୟ୍ୟମରେ ଖବର ପ୍ରସାରିତ ହେବା । ଆଉ ବର୍ତ୍ତମାନ ଏବେ ପଶ୍ଚିମବଙ୍ଗ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ସହଯୋଗୀ ଅର୍ପିତା ମୁଖାର୍ଜୀ ଙ୍କ ଓଡିଶା ଲିଙ୍କ ରହିତିବା ସୁଚନା ମିଳିଛି । ଏକାଧିକ ଫିଲ୍ମରେ ଅଭିନୟ କରିଛନ୍ତି ଅର୍ପିତା । ତେବେ ଅର୍ପିତା ମୁଖାର୍ଜୀ କିଏ । କଣ ତାଙ୍କର ଓଡିଶା ସହ ସମ୍ପର୍କ । କେମିତି ହେଲା ଓଡିଶା ସହ ତାଙ୍କର ଲିଙ୍କ ।

    ଆସନ୍ତୁ ଜାଣିବା ତାଙ୍କ ଲିକଙ୍କ ସମ୍ପର୍କରେ । ବେଙ୍ଗଲୀ ଫିଲ୍ମ ଇଣ୍ଡଷ୍ଟ୍ରିରେ ଅଭିନେତ୍ରୀ ଅର୍ପିତା ମୁଖାର୍ଜୀ ଅଧିକାଶଂ ଫିଲ୍ମିରେ ସାଇଡ ରୋଲ ନଜର ଆସିଥିଲେ । ସୁପରଷ୍ଟାର ପ୍ରସନଜିତ୍ ସହ ମଧ୍ୟ୍ୟ କାମ କରିଛନ୍ତି । ଓଡିଆ ଫିଲ୍ମିରେ ମଧ୍ୟ୍ୟ ଅର୍ପିତା ଅଭିନୟ କରିଛନ୍ତି । “ମୁଁ କଣ ଏତେ ଖରାପ” ଫିଲ୍ମରେ ଅଭିନୟ କରିଛନ୍ତି . ତାମିଲ୍ ଫିଲ୍ମରେ ମଧ୍ୟ୍ୟ ଅଭିନୟ କରିଛନ୍ତି । ଉନ୍ନୟନ ସଂଙ୍ଘ କମିଟିର ଅଧକ୍ଷ ଅଛନ୍ତି ପାର୍ଥ ଚାଟାର୍ଜୀ ।

    ପଶ୍ଚିମବଙ୍ଗରେ ବଡ ଦୁର୍ଗାପୁଜା କମିଟି ମଧ୍ୟ୍ୟରୁ ଏହା ଅନ୍ୟତମ ।୨୦୧୯ ଓ ୨୦୨୦ ରେ ଏହି କମିଟି ପାଇଁ ପ୍ରମୋସନ କରିଥିଲେ ଅର୍ପିତା । ପାର୍ଥ ଚାଟାର୍ଜୀ ଅର୍ପିତାଙ୍କ ଘରକୁ ବାରମ୍ଭାର ଯାଉଥିବା ସୁଚନା ମିଳିଛି । କିନ୍ତୁ କଣ ପାଇଁ ଯାଉଥିଲେ । ଯିବା ପଛରେ କଣ ଉଦ୍ଦେଶ୍ୟ ରହିଛି । ତାହା ସଠିକ ଭାବରେ ବର୍ତ୍ତମାନ ସୁଦ୍ଦା ଜଣାପଡିନାହିଁ । କିଛି ନା କିଛି ସମ୍ପର୍କ ରହିଛି । ନଚେତ ତାଙ୍କୁ ନେଇ ଏତେ ଜୋର ଚର୍ଚ୍ଚା ହେବା କଥା ନୁହେଁ ।

    • ସ୍ମରିଜିତ୍ ଆର୍ଯ୍ୟଙ୍କ ରିପୋର୍ଟ
Back to top button