08/04/2023
() ଗୋଟିଏ ଉଦ୍ଦେଶ୍ୟ ଥିଲା। ରାତାରାତି ଠକିବା। ଆଉ କୋଟି କୋଟି ଟଙ୍କା ନେଇ ପାର୍ ହୋଇଯିବା। ଚକାଚକ୍ ଅଫିସ, ବାବୁଙ୍କ ଭଳି ଠାଣିରେ ଏମିତିରେ ବି କେହି ଅବିଶ୍ୱାସ କରିବାର ପ୍ରଶ୍ନ ଉଠୁନଥିଲା। ଆଉ ବହୁ ବଡ଼ବଡ଼ିଆଙ୍କ ସହ ସମ୍ପର୍କ ସାଙ୍ଗକୁ ନାମୀଦାମୀ ସଂସ୍ଥା ସହ କାରବାର କରୁଥିବାର ମିଛ ଭେଳିକିକୁ ବି ସହଜେ କେହି ଧରିପାରିବେନି ବୋଲି ଭ୍ରମରେ ଥିଲେ ଠକ। କିନ୍ତୁ ଠକାମୀ ବେଶୀ ଦିନ ଚାଲିପାରିଲାନି। କମିଶନରେଟ ପୁଲିସରୁ ତଦନ୍ତ ଭାର ଇଓଡବ୍ଲୁ ନେଇ ଏବେ ଖୋଜୁଛି ଏହି ଠକଙ୍କୁ ଆଉ ଏମାନଙ୍କ ନେଟଓ୍ୱର୍କକୁ।
ଜାଲ ବିଛାଇଥିଲେ। ଆଉ ପାଲରେ ପକାଇଦେଇଥିଲେ ନିଶାରାଣୀ ମହାପାତ୍ରଙ୍କୁ। ଲୁମେକ୍ସ ସଂସ୍ଥା ନାଁରେ ଡିଏଲଏଫ ସାଇବର ସିଟିରେ ଅଫିସ ଖୋଲି ଜାଲି ଦସ୍ତାବିଜ୍ ଦେଖାଇ ଆଗ ନିଶାରାଣୀଙ୍କ ଭଳି ନିବେଶକଙ୍କଠୁ ଟଙ୍କା ନେବାରେ ସଫଳ ହୋଇଥିଲେ ଠକ ଦମ୍ପତ୍ତି ରାଜୀବ ଦାସ ଓ ସୋନିଆ ତ୍ରିପାଠୀ। କିଛି ମାସ ଭଲ ରିଟର୍ଣ୍ଣ ଦେଇ ନିଶାରାଣୀଙ୍କ ସ୍ୱାମୀ ପ୍ରଜ୍ଞାପ୍ରକାଶଙ୍କୁ ବି ଜାଲରେ ପକାଇଲେ।। ପ୍ରଜ୍ଞାଙ୍କୁ ବ୍ରାଇଟ ହୋମ୍ସ ଡେକର ସଂସ୍ଥା ନାଁରେ ଚୂନ ଲଗାଇବା ଆରମ୍ଭ କଲେ। ପୋଖରୀପୁଟରେ ଲକଜରି ଭିଲ୍ଲା ଓ ଡୁପ୍ଲେକ୍ସ ଦେବା ନାଁରେ ନେଇଗଲେ କୋଟି କୋଟି ଟଙ୍କା। ଉଭୟ ପତି ପତ୍ନୀଙ୍କ ବିଶ୍ୱାସରେ ବିଷ ଦେଇ କମ୍ପାନୀରେ ତାଲା ଠୁଙ୍କି ଫେରାର୍ ହୋଇଗଲେ ଏହି ଠକ ଦମ୍ପତ୍ତିଙ୍କ ସମେତ ଅନ୍ୟ ତିନି ସହଯୋଗୀ ଉଷାରାଣୀ ପାଣିଗ୍ରାହୀ, ହିମାଂଶୁ ପାଣିଗ୍ରାହୀ ଓ ବିମଳ ପାଢ଼ୀ। କମିଶନରେଟ ପୁଲିସର ଶୀଥିଳତା, କୋର୍ଟଙ୍କ ନିର୍ଦେଶକୁ ଅନୁପାଳନରେ ପୁଲିସର ପଛଘୁଞ୍ଚା, ଅତିରିକ୍ତ ସିପି ଉମାଶଙ୍କର ଦାସଙ୍କ ସହ ରାଜୀବଙ୍କ ସମ୍ପର୍କ, ବିଧାନସଭାରେ ବିରୋଧୀଙ୍କ ଗର୍ଜନ, ମୁଖ୍ୟମନ୍ତ୍ରୀଙ୍କୁ ଚିଠି ଆଉ ଶେଷରେ ଇଓଡବ୍ଲୁ ତଦନ୍ତ ହାତକୁ ନେବା ଏ ସବୁ ଅତୀତ। ଏବେ କଥା ପଡ଼ିଛି, ଇଓଡବ୍ଲୁ କମିଶନରେଟ ପୁଲିସଠୁ ଆବଶ୍ୟକୀୟ ସମସ୍ତ ନଥିପତ୍ର ନେଇସାରିଲାଣି କେବେଠୁ। ଏଡିଜି ଅରୁଣ ବୋଥ୍ରା ପୁଣି ତଦନ୍ତକୁ ନିଜେ ଅନୁଧ୍ୟାନ କରୁଛନ୍ତି। କିନ୍ତୁ ସେପଟେ ଯେଉଁ ତଥ୍ୟ, ପ୍ରମାଣ ଏବେ ସମସ୍ତଙ୍କ ସାମ୍ନାରେ ରହିଛି। ହୁଏତ, ଇଓଡବ୍ଲୁ ଭଳି ଦକ୍ଷ ତଦନ୍ତକାରୀ ସଂସ୍ଥାକୁ ତଦନ୍ତକୁ ଆଗେଇନେବାରେ ବିଳମ୍ୱ ଲାଗିନପାରେ। ଆଉ ଅଭିଯୁକ୍ତଙ୍କ ପାଖରେ ପହଞ୍ଚିବା ବି ସମୟସାପେକ୍ଷ ହୋଇନପାରେ । ଏନେଇ ନିଜର ମତ ପୋଷଣ କରିଛନ୍ତି କଂଗ୍ରେସ ନେତା ସନ୍ତୋଷ ସିଂ ସାଲୁଜା ।
କାରଣ କୋର୍ଟ ଅଫିସର ଫରେନସିକ ଅଡିଟରୁ ମାନିଛନ୍ତି, ଲୁମେକ୍ସ ପୁରା ଫେକ୍। ତଦନ୍ତରେ ଦେଖିବାକୁ ପାଇଥିଲେ ଯେ, କମ୍ପାନୀରେ ତାଲା ପଡ଼ିଥିଲା। ଏପରିକି ଚେୟାର ଟେବୁଲ୍ ବି ପାଇନଥିଲେ। ନିବେଶର ସବୁ ଟଙ୍କା ନିର୍ଦେଶକମଣ୍ଡଳୀ ନିଜ ନିଜ ଭିତରେ ବାଣ୍ଟିକି ଖାଇ ଯାଇଛନ୍ତି। ବିଶେଷକରି ରାଜୀବ, ଉଷା ଓ ବିମଳଙ୍କ ଆକାଉଣ୍ଟକୁ ଟଙ୍କା ଯାଇଛି। କେବଳ ଏତିକି ନୁହେଁ। ଲୁମେକ୍ସ ସଂସ୍ଥା ଯାହା ସହ ବ୍ୟବସାୟିକ ଚୁକ୍ତି କରିଥିଲା ଆଉ ନେଣଦେଣ କରିଛି ବୋଲି ଦର୍ଶାଇଥିଲା, ସେ ସବୁ ବି ଫେକ୍ ବୋଲି ମାନିଛନ୍ତି। କାରଣ ଏହା ଆଇନସଙ୍ଗତ ବୋଲି ପ୍ରମାଣ କରିବାକୁ କୌଣସି ତଥ୍ୟପ୍ରମାଣ କୋର୍ଟ ଅଫିସରଙ୍କ ହାତରେ ଲାଗିନଥିଲା। ଏପରିକି ରାଜୀବ ହାର୍ଡଡିସ୍କ ନେଇ ପାର୍ ହୋଇଯାଇଛନ୍ତି। ବିମଳଙ୍କୁ ତ ବ୍ୟାଙ୍କ ଖୋଜୁଛି। ଅନେକ ବ୍ୟାଙ୍କରୁ ଋଣ ନେଇ ଧରାଛୁଆଁ ଦେଉନାହାନ୍ତି ବୋଲି ଅଭିଯୋଗ ଆସିଛି। ଉଷା ଓ ହିମାଂଶୁଙ୍କ ଅବସ୍ଥା ବି କିଛି ଏମିତି। ବ୍ରହ୍ମପୁରର ନୂଆଗାଁସ୍ଥିତ ଯେଉଁ ରୋୟାଲ ଫାର୍ମାସି ଫ୍ଲାଟରେ ରହୁଥିଲେ, ସେ ଘରକୁ ଆଉ କାହାକୁ ଦେଇସାରିଲେଣି। ଏହି ଫ୍ଲାଟରେ ଏବେ ରହୁଛନ୍ତି ଗଙ୍ଗାଧର ପାଣିଗ୍ରାହୀ। ଯଦିଓ ଘରର ପଞ୍ଜୀକରଣ କ୍ରେତାଙ୍କ ନାଁରେ ଏ ଯାଏ ସରିନି। ଗଙ୍ଗାଧରଙ୍କ କହିବା କଥା, ଏହି ଫ୍ଲାଟକୁ ତାଙ୍କ ନାଁରେ ଏ ଯାଏ ପଞ୍ଜୀକୃତ ହୋଇପାରିନି। କେବଳ ଏଗ୍ରିମେଣ୍ଟ ହୋଇଛି। ପଞ୍ଜାବ ନାସନାଲ ବ୍ୟାଙ୍କ, କର୍ଣ୍ଣାଟକ ବ୍ୟାଙ୍କରୁ ୨୨ ଲକ୍ଷ ଟଙ୍କାର ଋଣ ପାଣିଗ୍ରାହୀ ଦମ୍ପତ୍ତି ନେଇଛନ୍ତି। ଗଙ୍ଗାଧରଙ୍କଠୁ ବି ୩ ଲକ୍ଷ ଟଙ୍କା ଧାର ନେଇଛନ୍ତି। ଘର ପଞ୍ଜୀକରଣ ହେଲେ ଯାଇ ଋଣ ଟଙ୍କା ପରିଶୋଧ କରିବେ ବୋଲି ଗଙ୍ଗାଧର ପାଣିଗ୍ରାହୀ ସମତି ଦେଇ ଅପେକ୍ଷାରେ। ଆଉ ଚଳିତ ମାସରୁ ଗଙ୍ଗାଧରଙ୍କ ଆକାଉଣ୍ଟରୁ ଇଏମଆଇ କଟିବା ଆରମ୍ଭ ହୋଇଛି। ଏ ବିଷୟରେ କହିଛନ୍ତି କୋର୍ଟ ଅଫିସର ସୁରେଶ ପଟ୍ଟନାୟକ।
ଲାଗୁଛି ଯେମିତି ୫କୁ ୫ ଯେମିତି ପେଞ୍ଚ କରି ଅନ୍ୟକୁ ନିଜ ପଞ୍ଝାରେ ଫସାଇବାକୁ ଚେଷ୍ଟା କରିଥିଲେ, ଏବେ ସେମିତି ନିଜେ ଭୋଗୁଛନ୍ତି। କିଏ ଆଇନ ଆଖିରେ ଧୂଳି ଦେଇ ଲୁଚିଛି ତ କିଏ ବ୍ୟାଙ୍କକୁ ଚୂନ ଲଗାଇ ଧରାଛୁଆଁ ଦେଉନି। ନିବେଶକଙ୍କ ବିଶ୍ୱାସରେ ବିଷ ଦେଇଥିବା ଏହି ଠକ ଗୋଷ୍ଠୀ ବି ଜାଣିବା ଦରକାର, ଆଇନର ହାତ ବହୁତ ଲମ୍ୱା। ଅପରାଧ କରି ଯେତେ ଲୁଚିଲେ କି ଫନ୍ଦି କଲେ। କି କୌଣସି ପ୍ରଭାବଶାଳୀର ସମ୍ପର୍କୀୟ କହି ସାଧାରଣରେ ପ୍ରଭାବ ଦେଖାଇବାକୁ ଚେଷ୍ଟା କଲେ ବି ପରିଣତି ଶେଷରେ କଅଣ ହୁଏ, ଏ କଥା ଉଣା ଅଧିକେ ସମସ୍ତଙ୍କୁ ଜଣା।
ବ୍ୟୁରୋ ରିପୋର୍ଟ ନକ୍ଷତ୍ର ନ୍ୟୁଜ୍
Naxatra News is now on Whatsapp
Join and get latest news update delivered to you via whatsapp
Join Now
