nabarangpur

ନବରଙ୍ଗପୁର: ଜୀବନ ଯୁଦ୍ଧରେ ହାରିଗଲେ ଦୁତିକା। କାମ ଦେଲାନି ବିଜୁ ସ୍ୱାସ୍ଥ୍ୟ ବୀମାକାର୍ଡ । ମାତ୍ର ୧୫ ହଜାର ଟଙ୍କା ପାଇଁ ଚାଲିଗଲା ବହୁମୂଲ୍ୟ ଜୀବନ । ଟଙ୍କା ଦେଇପାରିଲେ ନାହିଁ ବୋଲି ଚିକିତ୍ସାର ଅଧାରୁ ଫେରେଇ ଦେଲେ ଡାକ୍ତରଖାନା କର୍ତ୍ତୃପକ୍ଷ । ସ୍ୱାସ୍ଥ୍ୟ ବୀମା କାର୍ଡ ଥାଇ ମଧ୍ୟ ଚିକିତ୍ସା ସୁବିଧାରୁ ବଂଚିତ ହୋଇ ଶେଷରେ ଚାଲିଗଲା ଦୁତିକାଙ୍କ ଜୀବନ । ଏହିଭଳି ଏକ ଦୁଃଖଦ ଘଟଣା ଘଟିଛି ନବରଙ୍ଗପୁର ଜିଲ୍ଲା କଣ୍ଟାସାରୁ ଗାଁରେ ।

ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ କଣ୍ଟାସାରୁ ଗାଁର ଜେମା ଯାନୀ ଓ ଚଂଚଳା ଯାନୀଙ୍କ ବଡ଼ଝିଅ ଦୁତିକା ଯାନୀ । ବିବାହର କିଛିଦିନ ପରେ ଡାହାଣ ପାର୍ଶ୍ଵ ଗାଲ ଅସ୍ୱାଭାବିକ ଭାବରେ ବଢିଥିଲା ଦୁତିକାଙ୍କ । ଦୁତିକାର ଅସୁସ୍ଥତାକୁ ଦେଖି ସ୍ୱାମୀ ତାଙ୍କୁ ମାଆ ଘରେ ଛାଡ଼ିଦେଇ ଚାଲିଗଲା। ପରିବାର ଲୋକେ ନବରଙ୍ଗପୁର ମୂଖ୍ୟ ଚିକିତ୍ସାଳୟ ପର୍ଯ୍ୟନ୍ତ ଦୁତିକାକୁ ଚିକିତ୍ସା ପାଇଁ ଆଣିଥିଲେ ।

ସେଠାରେ ଡାକ୍ତର କଟକ ନେବାପାଇଁ କହିବାରୁ ଅର୍ଥ ଅଭାବରୁ ଘରକୁ ନେଇ ଆସିଥିଲେ । ଏନେଇ ନକ୍ଷତ୍ର ନ୍ୟୁଜରେ ଖବର ପ୍ରସାରଣ ପରେ ଜିଲ୍ଲା ସ୍ଵାସ୍ଥ୍ୟବିଭାଗ ଦୁତିକାଙ୍କ ଘଟଣାରେ ତତ୍ପରତା ପ୍ରକାଶ କରିଛନ୍ତି । ବିଜୁସ୍ୱାସ୍ଥ୍ୟ କାର୍ଡ ଜରିଆରେ ଦୁତିକାଙ୍କୁ ବିଶାଖାପାଟଣାର ଏକ ଘରୋଇ ମେଡିକାଲକୁ ପଠାଯାଇଥିଲା। ସେଠାରେ ତାଙ୍କର ବିଭିନ୍ନ ପ୍ରକାର ପରୀକ୍ଷା ନିରୀକ୍ଷା କରିବା ପରେ ୧୫ ହଜାର ଟଙ୍କା ଦେଲେ ଅସ୍ତ୍ରୋପଚାର ହେବ ବୋଲି କହିଥିଲେ । ପରିବାର ଟଙ୍କା ଯୋଗାଡ କରୁଥିବା ବେଳେ ଘରେ ଦୀପିକାଙ୍କ ମୃତ୍ୟୁ ହୋଇଯାଇଛି ।

ବହୁ କଷ୍ଟରେ ୧୫ ହଜାର ଟଙ୍କା ଯୋଗାଡ଼ କରି ଦୁତିକାଙ୍କୁ ବିଶାଖାପାଟଣା ନେବା ପାଇଁ ବାହାରିବା ସମୟରେ ଗାଲ ଫାଟି ଦୁତିକାଙ୍କ ମୃତ୍ୟୁ ହୋଇଯାଇଛି । ବିଜୁ ସ୍ୱାସ୍ଥ୍ୟ କାର୍ଡ ଥାଇବି ଜୀବନ ବଂଚିପାରିଲାନାହିଁ। ଫଳରେ ଏନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।

ନବରଙ୍ଗପୁର ଜିଲ୍ଲାରେ ଦୁତିକା ଭଳି ଅନେକ ଗରିବ ଲୋକ ଉପଯୁକ୍ତ ପରାମର୍ଶ ଏବଂ ଚିକିତ୍ସାରେ ଅବହେଳା ସହ ଅସଚେତନତା ଓ ଆର୍ଥିକ ଅଭାବ କାରଣରୁ ମୃତ୍ୟୁବରଣ କରୁଛନ୍ତି । ତେଣୁ  ଜିଲ୍ଲା ପ୍ରଶାସନ ଏଦିଗରେ ଦ୍ରୁଷ୍ଟି ଦେବାର ଆବଶ୍ୟକତା ରହିଛି।

 ରବି ପଟ୍ଟନାୟକ

ନବରଙ୍ଗପୁର: ଆସନ୍ତାକାଲିଠାରୁ ଆରମ୍ଭ ହେବ ନବରଙ୍ଗପୁର ଜିଲ୍ଲାର ଲୋକ ମହୋତ୍ସବ ମଣ୍ଡେଇ-୨୦୨୨। ମଣ୍ଡେଇ କାର୍ଯ୍ୟକ୍ରମ ପାଇଁ ଜିଲ୍ଲାବାସୀଙ୍କ ମଧ୍ୟରେ ପ୍ରବଳ ଉତ୍ସାହ ଭରି ଦେଇଥିବାବେଳେ ଏଥିପାଇଁ ଦିନରାତି ଏକ କରି ସାଜସଜ୍ଜାରେ ଲାଗି ପଡିଛି ଜିଲ୍ଲା ପ୍ରଶାସନ। ଆସନ୍ତା ପାଞ୍ଚ ଦିନ ଧରି ଲୋକନୃତ୍ୟରେ ଦୁଲୁକିବ ମଣ୍ଡେଇ ରଙ୍ଗମଞ୍ଚ। ଆଉ ଏହାର ଭରପୂର ମଜ୍ଜା ଉଠାଇବାକୁ ଅପେକ୍ଷାରେ ଅଛନ୍ତି ସମସ୍ତେ ।

ନବରଙ୍ଗପୁର ଜିଲ୍ଲାର ଲୋକ ମହୋତ୍ସବ ମଣ୍ଡେଇ-୨୦୨୨। ଚଳିତ ବର୍ଷ ଜିଲ୍ଲା ପ୍ରଶାସନର ନିଷ୍ପତି ପରେ ଆସନ୍ତାକାଲିଠାରୁ ୧୪ ତାରିଖ ଯାଏ ୫ ଦିନ ଧରି ଅନୁଷ୍ଠିତ ହେବ ମଣ୍ଡେଇ।  ଦୀର୍ଘ ଦୁଇ ବର୍ଷ ଧରି କୋଭିଡ କଟକଣା ଯୋଗୁଁ ହୋଇପାରିନଥିଲା ଏହି ମହୋତ୍ସବ ଚଳିତ ବର୍ଷ ହେଉଥିବାରୁ ଲୋକଙ୍କ ଭିତରେ ରହିଛି ପ୍ରବଳ ଉତ୍ସାହ । ମଣ୍ଡେଇ ମହୋତ୍ସବରେ ବିଭିନ୍ନ ସ୍ଥାନର ସାଂସ୍କୃତିକ ନୃତ୍ୟକଳା ଏବଂ ପାରମ୍ପରିକ ନୃତ୍ୟ ଶୋଭା ବର୍ଦ୍ଧନ କରିବ। ମହାରାଷ୍ଟ୍ର,ଆନ୍ଧ୍ରପ୍ରଦେଶ ଏବଂ ପଶ୍ଚିମବଙ୍ଗର ଲୋକନୃତ୍ୟ ମଞ୍ଚରେ ଶୋଭା ପାଇବ । ଏଥିସହ ଓଡ଼ିଶାର ୮ ଟି ଜିଲ୍ଲାର ଲୋକନୃତ୍ୟ ମଧ୍ୟ ମଞ୍ଚସ୍ଥ ହେବାର କାର୍ଯ୍ୟକ୍ରମ ରହିଛି। ମହୋତ୍ସବରେ  ସାଂସ୍କୃତିକ କାର୍ଯ୍ୟକ୍ରମ ସାଙ୍ଗକୁ ପଲ୍ଲୀଶ୍ରୀ ମେଳାର  ମଜା ଉଠାଇବେ ଜିଲ୍ଲାବାସୀ । ତେଣୁ ଆସନ୍ତା ପାଞ୍ଚ ଦିନ ଧରି ଶୀତୁଆ ସନ୍ଧ୍ୟାରେ ମଣ୍ଡେଇ କାର୍ଯ୍ୟକ୍ରମର ମଜ୍ଜା ଉଠାଇବେ ଦର୍ଶକ।

ଚଳିତ ବର୍ଷ ମଣ୍ଡେଇରେ ୩ ଲକ୍ଷ ଲୋକଙ୍କ ସମାଗମ ହେବାର ସମ୍ଭାବନା ଥିବାରୁ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ମଣ୍ଡେଇ ମହୋତ୍ସବର ଅନ୍ୟତମ ମୁଖ୍ୟ ଆକର୍ଷଣ ହେଉଛି ପଲ୍ଲୀଶ୍ରୀ ମେଳା ଏବଂ ଫୁଡ଼ ଷ୍ଟଲ । ଏଥିପାଇଁ ଓରମାସ ପକ୍ଷରୁ ୩୫୦ ଷ୍ଟଲ ନିର୍ମାଣ କରାଯାଇଛି। ମହୋତ୍ସବରେ ଦର୍ଶକମାନେ ଚଟପଟା ଖାଦ୍ୟର ମଜା ନେବା ପାଇଁ ଫୁଡ଼ ଷ୍ଟଲ ମଧ୍ୟ ନିର୍ମାଣ କରାଯାଇଛି। ପ୍ରତିବର୍ଷ ବିଭିନ୍ନ ରାଜ୍ୟରୁ ବ୍ୟବସାୟ ପାଇଁ ମଣ୍ଡେଇ ମହୋତ୍ସବକୁ ଆସୁଥିବା ବ୍ୟବସାୟୀ ଚଳିତ ମଣ୍ଡେଇ ମହୋତ୍ସବରେ ଭଲ ଦି ପଇସା ରୋଜଗାର ହେବ ବୋଲି ଆଶା କରିଛନ୍ତି।

ରବି ପଟ୍ଟନାୟକଙ୍କ ରିପୋର୍ଟ

ନବରଙ୍ଗପୁର: ଆଦିବାସୀ ବହୁଳ ନବରଙ୍ଗପୁର ଜିଲ୍ଲାରେ ସରକାରୀ ଯୋଜନା ହଡପ ଅଭିଯୋଗ। ସରକାର ଚାଷକୁ ପ୍ରୋତ୍ସାହନ ଦେଇ ଚାଷୀଙ୍କୁ ଉପକୃତ କରିବାକୁ କାଳିଆ ଯୋଜନା ଚଳାଇଛନ୍ତି। କିନ୍ତୁ ଏହି ଜିଲ୍ଲାରେ ଚାଷୀ କାଳିଆ ଯୋଜନାର ସୁଫଳ ପାଇ ପାରୁ ନ ଥିବା ବେଳେ କିନ୍ତୁ ସରକାରୀ ତହବିଲ ଖାଲି ହେଉଛି ଚାଷୀଙ୍କ ନାମରେ।

ପୁଣି ସାମ୍ନାକୁ  ଆସିଲା କାଳିଆ ଯୋଜନା ଟଙ୍କା ହଡପ କେଳେଙ୍କାରୀ। ଆଦବାସୀ ଅଧ୍ୟୁଷିତ ନବରଙ୍ଗପୁର ଜିଲ୍ଲାର ପ୍ରକୃତ ଚାଷୀ କାଳିଆ ଯୋଜନାରେ ଲାଭ ନ ପାଇ ହନ୍ତ ସନ୍ତ ହେଉଛନ୍ତି, ହେଲେ  ହିତାଧିକାରୀଙ୍କ ନାଁରେ ଜାଲ ଆକାଉଣ୍ଟ ଖୋଲି  ଟଙ୍କା ବାଟମାରଣା ହେଉଥିବା ଅଭିଯୋଗ ହେଉଛି। ଟଙ୍କା ବାଟମାରଣା  ଚେର ଯେତିକି ଦେଖାଯାଉଛି ତା’ଠାରୁ ଅଧିକ ଲୁଚି ରହିଥିବା ଅଭିଯୋଗ କରୁଛନ୍ତି ଯୋଜନାରୁ ବଞ୍ଚିତ ଚାଷୀ।

ଚାଷୀ କାଳିଆ ଯୋଜନାର ସୁଫଳରୁ ବଞ୍ଚିତ ହୋଇ ଦହଗଞ୍ଜ ହେଉଥିବା ବେଳେ କିନ୍ତୁ ମିଛ ଆକାଉଣ୍ଟ କରି ଅର୍ଥ ଲୁଟ କରୁଛନ୍ତି ସ୍ଥାନୀୟ ଅଧିକାରୀ। ଏହାକୁ ନେଇ ଚାଷୀ ଅଭିଯୋଗ କରିଥିଲେ ମଧ୍ୟ କେହି ସେମାନଙ୍କ କଥା ଶୁଣୁନାହାନ୍ତି କି ବର୍ତ୍ତମାନ ସୁଦ୍ଧା ପ୍ରଶାସନ ତଦନ୍ତ କରିବାର ନାଁ ନେଉନି। ସେପଟେ ପ୍ରଶାସନରର ସ୍ଥାଣୁତାକୁ ନେଇ ଜନ ଅସନ୍ତୋଷ ଦେଖାଦେଇଛି ।

ପୂର୍ବରୁ ଅଲେଖଗୁଡା ଗାଁରେ ମିଛ ଆକାଉଣ୍ଟ ମାଧ୍ୟମର କାଳିଆ ଯୋଜନା ଅର୍ଥ ହରିଲୁଟ ନେଇ ଅଭିଯୋଗ କରିଥିଲେ। ଏନେଇ ଆମ ସହ ବିଭିନ୍ନ ଗଣମାଧ୍ୟମ ଖବର ପ୍ରସାରଣ କରିଥିଲେ। ତା ଉପରେ ଏଯାଏଁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିବା ବେଳେ ଏବେ  କୋଷାଗୁମୁଡା ବ୍ଲକ ଏକରି ପଞ୍ଚାୟତର  ନୂନପାଣି ଗାଁର ଶତାଧିକ ଚାଷୀ ସମାନ ଅଭିଯୋଗ ଆଣିଛନ୍ତି। ଚାଷୀଙ୍କ ଅଜାଣତରେ  ଜାଲ ଆକାଉଣ୍ଟ ଖୋଲାଯାଇ ଲକ୍ଷାଧିକ ଟଙ୍କା ବାଟମାରଣା କରାଯାଇଥିବା ଅଭିଯୋଗ କରିଛନ୍ତି ଚାଷୀ। କିଏ କାଳିଆ ଟଙ୍କା ଖାଉଛି ତାର ତଦନ୍ତ କରିବାକୁ ଚାଷୀ ଦାବି କରୁଛନ୍ତି।

ନବରଙ୍ଗପୁର: ନବରଙ୍ଗପୁରରେ ଦାଦନ ଶ୍ରମିକ ଉଦ୍ଧାର। ଦାଦନ ଖଟିବାକୁ ତାମିଲନାଡୁକୁ ଯାଉଥିବା ସମୟରେ ରାଇଘର ଅଞ୍ଚଳର ୮ ଜଣ ଶ୍ରମିକଙ୍କୁ ଉଦ୍ଧାର କରିଛି  ପାପଡ଼ାହାଣ୍ଡି ପୋଲିସ । ଉଦ୍ଧାର ଦାଦନ ଶ୍ରମିକଙ୍କ ମଧ୍ୟରେ ୪ ଜଣ ଯୁବକ ଓ ୩ ଜଣ ଯୁବତୀ ଙ୍କ ସମେତ ଜଣେ ନାବାଳିକା ରହିଛନ୍ତି ।

ଦାଦନ ଓ ନବରଙ୍ଗପୁର ଜିଲ୍ଲା ଯେମିତି ଅଙ୍ଗାଅଙ୍ଗି ଭାବେ ଜଡିତ। ଲୋକେ ପେଟପାଟଣା ପାଇଁ ଯାଉଛନ୍ତି ବିଭିନ୍ନ ରାଜ୍ୟକୁ ଦାଦନ ଖଟିବାକୁ। ନିକଟରେ ତାମିଲନାଡୁକୁ ରାଇଘର ଅଞ୍ଚଳର ୪ ଯୁବକ, ୩ ଯୁବତୀ ଓ ଜଣେ ନାବାଳିକା ଯାଉଥିଲେ। ଶ୍ରମିକ ମାନେ ଏକ ସରକାରୀ ବସରେ ରାଇଘରରୁ ବିଶାଖାପାଟଣା ଯାଉଥିଲେ। ପାପଡ଼ାହାଣ୍ଡି ଟ୍ରାଫିକ ଛକ ନିକଟରେ ପୁଲିସ ଯାଞ୍ଚ ସମୟରେ ସେମାନଙ୍କୁ ପଚରା ଉଚରା ବେଳେ ସେମାନଙ୍କ ଠାରୁ ସବୁ କଥା ଜାଣି ସେମାନଙ୍କୁ ଉଦ୍ଧାର କରାଯାଇଛି ।

କେଉଁଠିକି କି କାମ କରିବାକୁ ଯାଉଥିବା ପଚାରିବାରୁ ସେମାନେ କହିଥିଲେ କି, ତାମିଲ ନାଡୁର କ୍ରିଷ୍ଣାଗିରୀର ଏକ କତା ଦୌଡି ତିଆରି କାରଖାନାରେ ୪ ଯୁବକଙ୍କୁ କାମ ମିଳିଥିବା ଯୁବତୀମାନେ  ଓ ନାବାଳିକା ସିଲେଇ କାମ କରିବା ପାଇଁ ତାମିଲନାଡୁର ତ୍ରିପୁର୍ ସ୍ଥିତ ଏକ ଲୁଗା କାରଖାନାକୁ ଯାଉଛନ୍ତି । ପୁଲିସ ସମସ୍ତଙ୍କୁ ଉଦ୍ଧାର କରି ସେମାନଙ୍କୁ ଘରକୁ ପଠାଇବା ବ୍ୟବସ୍ଥା କରିଛି।

ତେବେ ରାଜ୍ୟରେ କାମ ଅଭାବରୁ ବାରମ୍ବାର ଏପରି ଦାଦନ ଖଟିବାକୁ ବହୁ ଓଡିଆ ବାହାର ରାଜ୍ୟକୁ ଯାଉଛନ୍ତି। ସେଠାରେ ସେମାନଙ୍କୁ ନାନା ଭାବେ ନିର୍ଯାତନା ହେଉଥିବା ଅଭିଯୋଗ ସହ ଅନେକ ଦୁର୍ଘଟଣା ଓ ରୋଗରେ ମଧ୍ୟ ମୃତ୍ୟୁବରଣ କରୁଛନ୍ତି। ଏହାକୁ ନେଇ ରାଜନୀତି ମଧ୍ୟ ହେଉଛି। କିନ୍ତୁ ଗରିବଙ୍କ ଦୁଃଖ ଦୂର ହେବାର ନାମ ଧରୁନି।

ନବରଙ୍ଗପୁର: ରାଜ୍ୟ ସରକାରଙ୍କ ପକ୍ଷରୁ ବିଦ୍ୟାଳୟ ରୂପାନ୍ତିକରଣ ମାଧ୍ୟମରେ ପୁରାତନ ବିଦ୍ୟାଳୟର ନବକଳେବର କରାଯାଉଛି। ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନ ଯୋଗାଣ ବ୍ୟବସ୍ଥାରେ ସ୍ୱଚ୍ଛତା ଆଣିବାକୁ ପାଣି ପରି ଖର୍ଚ୍ଚ ହେଉଛି ଟଙ୍କା । ହେଲେ ନବରଙ୍ଗପୁର ଜିଲ୍ଲାରେ ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନ ଖାଇବାକୁ ଯିବାକୁ ପଡୁଛି ଦେଢ଼ କିଲୋମିଟର । ଅସ୍ୱାସ୍ଥ୍ୟକର ପରିବେଶ ସହ ଘୁଷୁରୀ ଆଉ କୁକୁଡ଼ା ପଲଙ୍କ ଗହଣରେ ପିଲାମାନେ ଖାଉଥିବା ଅଭିଯୋଗ ହୋଇଛି।

ନବରଙ୍ଗପୁର ପାପଡାହାଣ୍ଡି ବ୍ଲକ ବାର୍ଲି ପଞ୍ଚାୟତ ବଡ଼ବାର୍ଲି ଗାଁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ। ବଡ଼ବାର୍ଲି ଗାଁ ଏକ ଉପାନ୍ତ ଓ ଅପହଞ୍ଚ ଇଲାକା ଭାବେ ପରିଚିତ। ବଡ଼ବାର୍ଲି ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମୋଟ ୧୨୨ ଜଣ ଛାତ୍ରଛାତ୍ରୀ ପାଠ ପଢ଼ୁଥିବା ବେଳେ ୫ ଜଣ ଶିକ୍ଷକ ନିଯୁକ୍ତି ହୋଇଛନ୍ତି। ତେବେ ଗାଁ ନିକଟରେ ଥିବା ପୁରୁଣା ବିଦ୍ୟାଳୟ କୋଠା ଜରାଜୀର୍ଣ୍ଣ ଅବସ୍ଥାରେ ଥିବାବେଳେ ଗତବର୍ଷ ଦେଢ଼ କିଲୋମିଟର ଦୂରରେ ନିର୍ମିତ ନୂତନ ଗୃହକୁ ସ୍ଥାନାନ୍ତର ହୋଇଛି ବିଦ୍ୟାଳୟ। ନୂତନ ବିଦ୍ୟାଳୟ ଭିତରେ ରୋଷେଇଘର ନ ଥିବାରୁ ସ୍ୱୟଂ ସହାୟକ ଗୋଷ୍ଠୀ ପୁରୁଣା ବିଦ୍ୟାଳୟରେ ମଧ୍ୟାହ୍ନ ଭୋଜନ ରୋଷେଇ କରୁଛନ୍ତି । ଆଉ ଛାତ୍ରଛାତ୍ରୀଙ୍କୁ  ଖାଇବା ପାଇଁ ଦେଢ଼ କିଲୋମିଟର ରାସ୍ତା ଯିବାକୁ ପଡୁଛି। କେବଳ ଏତିକି ନୁହେଁ ପୁରୁଣା ବିଦ୍ୟାଳୟରେ ଅତ୍ୟନ୍ତ ଅସ୍ୱାସ୍ଥ୍ୟକର ପରିବେଶରେ ଘୁଷୁରୀ ପଲଙ୍କ ଗହଣରେ ପିଲାମାନେ ମଧ୍ୟାହ୍ନ ଭୋଜନ ଖାଉଥିବା ଅଭିଯୋଗ ହୋଇଛି ।

ଅନ୍ୟପଟେ ପ୍ରଧାନଶିକ୍ଷକ ସବୁବେଳେ ସ୍କୁଲରେ ଅନୁପସ୍ଥିତ ରହୁଥିବାରୁ ଏଭଳି ସମସ୍ୟାର ସମାଧାନ କରିପାରୁନାହାନ୍ତି ଅନ୍ୟ ଶିକ୍ଷକ। ଏନେଇ ଗ୍ରାମବାସୀ ଉପରିସ୍ଥ ଅଧିକାରୀଙ୍କୁ ଜଣାଇଥିଲେ ସୁଦ୍ଧା ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ସେପଟେ ସ୍କୁଲର ସମସ୍ୟାକୁ ନେଇ ବ୍ଲକ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀଙ୍କୁ ପଚାରିବାରୁ ଖୁବଶୀଘ୍ର ଏହାର  ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ।

ତେବେ ବଡ଼ବାର୍ଲି ବିଦ୍ୟାଳୟ ପରିସରରେ ରୋଷେଇ ଗୃହ କେବେ ନିର୍ମାଣ ହେଉଛି ତାକୁ ହିଁ ଅପେକ୍ଷା।

ରବି ପଟ୍ଟନାୟକଙ୍କ ରିପୋର୍ଟ

ନବରଙ୍ଗପୁର: ଅବ୍ୟବସ୍ଥାରେ ସରକାରୀ ଯୋଜନା। କିଛି ଦୁର୍ନୀତିମୂଳକ ବାବୁଙ୍କ ପାଇଁ ସରକାରଙ୍କ ଯୋଜନା ହିତାଧିକାରୀଙ୍କ ନିକଟରେ ପହଞ୍ଚି ପାରୁନାହିଁ। ପଞ୍ଚାୟତ ପିଇଓଙ୍କ ଜାଲ ଦସ୍ତଖତରେ ଗରିବ ହିତାଧିକାରୀଙ୍କ ଚାଉଳ ହଡପ ହେଉଥିବା ଅଭିଯୋଗ ହୋଇଛି ନବରଙ୍ଗପୁର ଜିଲ୍ଲା ଅମଳାଭଟ୍ଟା ପଂଚାୟତରେ।  

ସରକାର ଗରିବ ଲୋକଙ୍କୁ ମାଗଣା ଚାଉଳ ଯୋଗାଇ ଦେଉଛନ୍ତି । ନବରଙ୍ଗପୁର ଜିଲ୍ଲା ଅମଳାଭଟ୍ଟା ପଞ୍ଚାୟତରେ ମଧ୍ୟ ଏହା କାର୍ଯ୍ୟକାରୀ ହେଉଛି। ତେବେ ଗତ ୩ ମାସରେ ପ୍ରାୟ ୧ ହଜାରରୁ ଅଧିକ କୁଇଣ୍ଟାଲ ଚାଉଳ ହିତାଧିକାରୀ ପାଇପାରିନଥିବା ଅଭିଯୋଗ ହୋଇଛି। କିନ୍ତୁ ପଂଚାୟତ ତରଫରୁ ସରକାରୀ ଗୋଦାମରୁ ଗତ ମେ ମାସ ୧୨ ତାରିଖରୁ ଜୁନ ମାସ ୨୩ ତାରିଖ ମଧ୍ୟରେ ୧୦୫୪.୩୭ କୁଇଣ୍ଟାଲ ଚାଉଳ ଉଠାଯାଇଛି। ହେଲେ ତାହା ହିତାଧିକାରୀଙ୍କୁ ଦିଆଯାଇନାହିଁ । ଚାଉଳ ନପାଇ ଲୋକେ ସରପଞ୍ଚ ଏବଂ ପଞ୍ଚାୟତ ପିଇଓଙ୍କ ନିକଟରେ ଅଭିଯୋଗ କରିଥିଲେ । ପରେ ଉଭୟ ସରପଞ୍ଚ ଏବଂ ପିଇଓ ତେନ୍ତୁଳିଖୁଣ୍ଟି ବିଡ଼ିଓଙ୍କ ନିକଟରେ ଏହାକୁ ନେଇ ଲିଖିତ ଅଭିଯୋଗ କରିବା ପରେ ତଦନ୍ତ ପ୍ରକ୍ରିୟା ଆରମ୍ଭ ହୋଇଛି ।

ତଦନ୍ତ କରିବାକୁ ଯାଇଥିବା ବିଡ଼ିଓ ଏବଂ ଅନ୍ୟାନ୍ୟ କର୍ମଚାରୀ ପଂଚାୟତର ଚାଉଳ ଗୋଦାମ ଯାଇ ଯାଞ୍ଚ କରିଥିଲେ। ତେବେ ସେଠାରେ ୧୯୧ କୁଇଣ୍ଟାଲ ଚାଉଳ ଥିବା ଜଣାପଡିଥିବା ବେଳେ ବାକି ଚାଉଳ ନଥିଲା । ଏହାପରେ ଏଥିରେ ସଂପୃକ୍ତ ଥିବା ଯୋଗାଣ ସହାୟକଙ୍କ ବିରୋଧରେ ତଦନ୍ତ ଆରମ୍ଭ କରାଯାଇଛି। ଅମଳାଭଟ୍ଟା ପଂଚାୟତରେ ୧ହଜାରେ ୫୦୧ ଜଣ ଚାଉଳ କାର୍ଡଧାରୀ ଅଛନ୍ତି। ଗତ ମେ, ଜୁନ, ଏବଂ ଜୁଲାଇ ମାସର ଫ୍ରି ଚାଉଳ ବାବଦକୁ ଆସିଥିବା ପ୍ରାୟ ୮୬୬  କୁଇଣ୍ଟାଲ ଚାଉଳ ହଡପ କରିଥିବା ତଦନ୍ତରୁ ଜଣାପଡିଛି । ସେଭଳି ଜୁଲାଇ ମାସର ଟଙ୍କିକିଆ ଚାଉଳ ମଧ୍ୟ ଅନେକ ହିତାଧିକାରୀଙ୍କୁ ମିଳିନାହିଁ।

ଯୋଗାଣ ସହାୟକ ସରକାରୀ ଚାଉଳ ଗୋଦାମରୁ ପଞ୍ଚାୟତକୁ ଆଣିବା ପାଇଁ ପିଇଓଙ୍କ ଜାଲ ଦସ୍ତଖତ କରିବା ସହ ସିଲ ବ୍ୟବହାର କରିଥିବା ଅଭିଯୋଗ କରିଛନ୍ତି ପଞ୍ଚାୟତ ପିଇଓ ହରେକୃଷ୍ଣ ବିଶୋଇ । ତେବେ ଘଟଣା ସମ୍ପର୍କରେ ଆମେ ଜିଲ୍ଲା ଯୋଗାଣ ଅଧିକାରୀଙ୍କୁ ପଚାରିବାରୁ ସେ କହିଛନ୍ତି ଯେ  ବିଡ଼ିଓଙ୍କ ତଦନ୍ତ ପରେ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ଗରିବଙ୍କ ପାଇଁ ସରକାର କରିଥିବା ଯୋଜନା କିଛି ସରକାରୀ ବାବୁଙ୍କ ପାଇଁ ବାଟବଣା ହୋଇଛି। ତେବେ ଦେଖିବାକୁ ବାକି ରହିଲା କେବେ ଏହି ଚାଉଳ ସମସ୍ୟାର ସମାଧାନ ହେଉଛି।

ନବରଙ୍ଗପୁରରୁ ରବି ପଟ୍ଟନାୟକଙ୍କ ରିପୋର୍ଟ