() ଅଗ୍ନିଶମ ବିଭାଗର ଶତ ଚେଷ୍ଟା ପରେ ବି ଆୟତ୍ତ ହୋଇପାରୁନି ନିଆଁ । ଭିତରେ ଦୋକାନ ପରେ ଦୋକାନ ଜଳୁଥିବା ବେଳେ ସଟର କାଟି ନିଆଁ ଲିଭାଇବା ପାଇଁ ଉଦ୍ୟମ କରାଯାଉଛି । ତେବେ ଭିତରକୁ ଯାଆସ କରିବାକୁ ମାତ୍ର ଗୋଟିଏ ରାସ୍ତା ଥିବାରୁ ନିଆଁ ଲିଭା କାର୍ଯ୍ୟରେ ବାଧା ସୃଷ୍ଟି ହେଉଥିବା ଜଣାପଡିଛି । ପୁରୀ ସମ୍ରାଟ କଂପ୍ଳେକ୍ସ ଅଗ୍ନିକାଣ୍ଡକୁ ପାଖାପାଖି ୨୪ ଘଣ୍ଟା ବିତି ଯାଇଥିଲେ ମଧ୍ୟ ନିଆଁକୁ ସଂପୂର୍ଣ ଭାବେ ଆୟତ୍ତ କରାଯାଇ ପାରିନାହିଁ ।
ଅଣାୟତ ଲକ୍ଷ୍ମୀ ମାର୍କେଟ ନିଆଁ। ବୁଧବାର ରାତି ୮ଟାରୁ ଲାଗିଥିବା ନିଆଁ ଏପର୍ଯ୍ୟନ୍ତ ସଂପୂର୍ଣ୍ଣ ଭାବେ ଆୟତ୍ତ ହୋଇ ପାରିନାହିଁ । ପୁରୀରେ ଅଗ୍ନିଶମ ବିଭାଗ ପକ୍ଷରୁ ଜାରି ରହିଛି ଅପରେସନ। ଅଣଓସରିଆ ରାସ୍ତା ଯୋଗୁଁ ନିଆଁ ଲିଭା କାର୍ଯ୍ୟରେ ବାଧା ସୃଷ୍ଟି ହେଉଛି । ଲକ୍ଷ୍ମୀ ମାର୍କେଟ ଜଳି ପୋଡି ପାଉଁଶ ହେବା ସହ ବ୍ୟାପକ କ୍ଷୟକ୍ଷତି ହୋଇଛି। ଆଖପାଖ ଅଂଚଳରେ ବିଦ୍ୟୁତ ସରବରାହ ମଧ୍ୟ ବନ୍ଦ ରହିଛି। ଭିତର ବନ୍ଦ ରହିଥିବା କୋଠରୀର ସାମଗ୍ରୀରେ ନିଆଁ ଏଯାବତ କୁହୁଳୁଥିବାର ଜଣାପଡୁଛି । ଏବଂ ଉତ୍ତାପର ପରିମାଣ ଏତେ ଅଧିକା ରହିଛି ଦୋକାନର ସଟର କିଛି ମାତ୍ରାରେ ତରଳିବାରେ ଲାଗୁଛି । କିଛି କାଚ ମଧ୍ୟ ନିଆଁ ପ୍ରଭାବରୁ ଫାଟୁଥିବା ଜଣାପଡୁଛି । ଭିତରେ ଦୋକାନ ପରେ ଦୋକାନ ଜଳୁଥିବା ବେଳେ ସଟର କାଟି ନିଆଁ ଲିଭାଇବା ପାଇଁ ଉଦ୍ୟମ କରାଯାଉଛି । ସେପଟେ ଅଗ୍ନିଶମ ବିଭାଗର ଡେପୁଟି ଫାୟାର ଅଫିସର ଏବଂ ପୁରା ଫାୟାର ଟିମ ନିଆଁ ଲିଭାଇବାରେ ଲାଗିପଡିଛନ୍ତି । ଅନ୍ୟପଟେ ଭିତରେ ଗୋଟିଏ ବ୍ୟାଙ୍କର ଶାଖା ରହିଥିବାରୁ ଏବେ ସେଠି କୌଣସି କ୍ଷତି ହୋଇଛି କି ନାହିଁ ସେନେଇ ମଧ୍ୟ ସ୍ପଷ୍ଟ ସୂଚନା ମିଳିପାରି ନାହଁ । ହୋଟେଲ ସମ୍ରାଟ ତଳେ 40ଟି ଦୋକାନ ଘର ଥିବାବେଳେ ୨୮ ଟି ଗେଷ୍ଟ ରୁମ ରହିଥିଲା l ତଳେ ଏକ କପଡା ଦୋକାନରେ ସର୍ଟ ସର୍କିଟ ଯୋଗୁଁ ନିଆଁ ଲାଗିଥିବା ଅନୁମାନ କରାଯାଉଛି l ନିଆଁ ଲାଗିବା ଯୋଗୁଁ ଉପର ଗେଷ୍ଟ ହାଉସ ଧୂଆଁ ହୋଇଯାଇଥିଲା l ଫଳରେ 3ଜଣ ପର୍ଯ୍ୟଟକ ଶ୍ୱାସ ରୁଦ୍ଧ ହୋଇ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି l ଘଟଣାସ୍ଥଳରେ ପୁରୀ ଏସପି ଙ୍କ ସମେତ ଅଗ୍ନିଶମ ଡିଜି ଏବଂ ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ଘଟଣା ସ୍ଥଳରେ ପହଞ୍ଚି ସ୍ଥିତି ତଦାରଖ କରିଛନ୍ତି।
ସେପଟେ ଜିଲ୍ଲାପ୍ରଶାସନ ପକ୍ଷରୁ ସମସ୍ତ ଅଧିକାରୀ ଜିଲ୍ଲାପାଳ, ଉପଜିଲ୍ଲାପାଳ ଓ ଏଡିଏମ ଉପସ୍ଥିତ ରହି ତଦାରଖ କରୁଛନ୍ତି l ଖୁବକମ ସମୟରେ ପ୍ରକୃତ କ୍ଷୟକ୍ଷତିର ରିପୋର୍ଟ ଆସିଯିବ ବୋଲି କହିଛନ୍ତି ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ l
ତେବେ ଅଗ୍ନିକାଣ୍ଡକୁ ପାଖାପାଖି ୨୪ ଘଣ୍ଟା ବିତି ଯାଇଥିଲେ ମଧ୍ୟ ନିଆଁକୁ ସଂପୂର୍ଣ ଭାବେ ଆୟତ୍ତ କରାଯାଇ ନଥିବାରୁ ଅଞ୍ଚଳରେ ଭୟର ବାତାବରଣ ଦେଖିବାକୁ ମିଳିଛି । ନିଆଁ ଲିଭାଇବାକୁ କିଛି ମହିଳା ପୂଜାର୍ଚ୍ଚନା ମଧ୍ୟ କରୁଥିବା ଦେଖବାକୁ ମିଳିଛି ।
ଶିବପ୍ରସାଦ ଦାସଙ୍କ ରିପୋର୍ଟ
