ରାଜକନିକା: ମଣିଷ ଏଠି ପ୍ରତ୍ୟେକ ମୁହୂର୍ତ୍ତରେ କିପରି ମରି ମରି ବଞ୍ଚୁଛି। ଦେଶ ସ୍ୱାଧୀନତାର ୭୫ବର୍ଷ ପରେ ବି ପରାଧୀନ ଭାବରେ ଜୀବନ ଜିଉଁଛନ୍ତି ଲୋକେ । ପ୍ରବାଦ ପୁରୁଷ ବିଜୁ ବାବୁଙ୍କ କର୍ମଭୂମି କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଲକର ତ୍ରଲୋକ୍ୟପୁର ପଞ୍ଚାୟତର ଗଙ୍ଗାଧର ପ୍ରସାଦ ଡିଆ। ଆଜି ବି ଏ ଗାଁ ଅବହେଳିତ ଅବସ୍ଥାରେ ରହିଛି । ଏହି ଗାଁର ଲୋକେ ଆଜି ବି ଡଙ୍ଗା, ଡୁଙ୍ଗିରେ ପାରି ହେଉଥିବାର ଦୃଶ୍ୟ ଦେଖିବାକୁ ମିଳେ। ଯେଉଁଠି ବସବାସ କରନ୍ତି ପ୍ରାୟ ୧୮୦ରୁ ଉର୍ଦ୍ଧ୍ଵ ପରିବାର, ଆଉ ପାଖାପାଖି ଅଢେଇ ହଜାରରୁ ଉର୍ଦ୍ଧ୍ଵ ଲୋକେ । ଏହି ଗାଁକୁ ଯିବାପାଇଁ ହେଲେ ବିପଦପୂର୍ଣ୍ଣ ନଦୀ ପାରି ହେବାକୁ ପଡିବାକୁ ହୋଇଥାଏ, କେତେବେଳେ ନଦୀରେ ବୁଡି ଯିବାର ଭୟ ତ କେତେବେଳେ କୁମ୍ଭୀର ମୁହଁରେ ପ୍ରାଣ ହରାଇବାର ଭୟ ଘାରିଥାଏ।
ମଝିରେ ଗାଁ ଥିବାବେଳେ, ଚାରିପଟେ ବେଢିରହିଛି ଖରସ୍ରୋତା ନଦୀ । ପୋଲଟିଏ ପାଇଁ ଗ୍ରାମବାସୀ ନେତାଙ୍କ ଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ କେତେବା ନେହୁରା ହେବେ, ନେହୁରା ହୋଇ ଥକି ପଡିଲେଣି । ହେଲେ, ଏବେ ବି ପୋଲ ନିର୍ମାଣ ତ ଦୂରର କଥା, ସେ ବାବଦରେ ନେତାଙ୍କ ଠାରୁ ପ୍ରଶାସନ ଯାଏ କେହି ବି ଦିନଟିଏ ପାଇଁ ଗ୍ରାମବାସୀଙ୍କ ସହ ଆଲୋଚନା ମଧ୍ୟ କରିନାହାଁନ୍ତି । କିନ୍ତୁ ଭୋଟ ସମୟରେ ପୁଳା ପୁଳା ପ୍ରତିଶୃତି ଦେଇଥାନ୍ତି ବୋଲି ଅଭିଯୋଗ କରିଛନ୍ତି ଗ୍ରାମବାସୀ ।
ଭୋଟ ପାଖେଇ ଆସିଲେ ମାଳ ମାଳ ନେତା ମାଡିଆସନ୍ତି ମେଞ୍ଚା ମେଞ୍ଚା ପ୍ରତିଶୃତି ଭେଟି ନେଇ । ଗାଁରୁ ନଦୀ ପାରି ହୋଇ ସଦର ମହକୁମାରେ ଥିବା ବ୍ଲକ, ତହସିଲ ଓ ସ୍ଵାସ୍ଥ୍ୟ କେନ୍ଦ୍ର ଏବଂ ଅନ୍ୟାନ୍ୟ ଦପ୍ତରକୁ ଯିବାକୁ ହେଲେ ୧୫ କିଲୋମିଟର ଦୂର ଯିବାକୁପଡେ । ସବୁଠାରୁ ବିଡମ୍ଵନାର ବିଷୟ ଜାତୀୟ ଉଦ୍ୟାନ ଭିତରକନିକାରେ ଥିବା କୁମ୍ଭୀର ପ୍ରଜନନ କେନ୍ଦ୍ର ଥିବାରୁ ଏବଂ ଏହି ନଦୀ ସହ ବୈତରଣୀ ନଦୀର ସଂଯୋଗ ଥିବା କାରଣରୁ ଏହି ନଦୀରେ କୁମ୍ଭୀରମାନେ ଚଳପ୍ରଚଳ କରିଥାନ୍ତି । ଏମିତିକି କୁମ୍ଭୀର ପାଇଁ ପୂର୍ବରୁ ବହୁ ଧନଜୀବନ ହାନି ଘଟିବା ସହ ଗୋରୁଗାଈ, ଛେଳି, ମେଣ୍ଢା ଭଳି ଅନେକ କୁମ୍ଭୀର ପାଟିରେ ଯାଇଛନ୍ତି ।
ରାତି ହେଉ ବା ଦିନ ଯେଉଁ ସମୟରେ କୌଣସି କାର୍ଯ୍ୟରେ ନିକଟ ଆୟତନ ବଜାର ବା ସଦର ରାଜକନିକାକୁ ଗଲେ ଭୟଭୀତ ଅବସ୍ଥାରେ ପାରି ହେବାକୁ ପଡିଥାଏ । ସ୍କୁଲ, କଲେଜ ଛାତ୍ର-ଛାତ୍ରୀମାନେ ମଧ୍ୟ ସେହି ଡୁଙ୍ଗି ବା ଡଙ୍ଗାରେ ମଧ୍ୟ ବିପଦସଙ୍କୁଳ ଭାବେ ପାରି ହୋଇଥାନ୍ତି । ଗାଁରେ ଏକମାତ୍ର ସରକାରୀ ଉଚ୍ଚ ବିଦ୍ୟାଳୟକୁ ଛାଡିଲେ ଆଉ କୌଣସି ପ୍ରଶାସନିକ କାର୍ଯ୍ୟାଳୟ ନାହିଁ । ଏହି ନଦୀରେ ଅନେକ ଥର ମଧ୍ୟ ଡୁଙ୍ଗି ବା ଡ଼ଙ୍ଗା ମଝିନଦୀରେ ଭାରସାମ୍ୟ ହରାଇ ବୁଡିବା ଦ୍ଵାରା ଧନଜୀବନ ହାନି ଘଟିଥିବା କଥା ଗ୍ରାମବାସୀ କୁହନ୍ତି । ସବୁଠାରୁ ବଡ଼ ଦୁଃଖର କଥା ନଦୀପରି ଗାଁ ହୋଇଥିବାରୁ ଏହି ଗାଁକୁ କେହି ଝିଅ ଦେବାକୁ ରାଜି ହେଉନାହାଁନ୍ତି । ପୋଲ ନ ଥିବା କାରଣରୁ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି ଏହି ଗାଁର ଲୋକେ
ସଂଜୟ କୁମାର ଦାଶ
Naxatra News is now on Whatsapp
Join and get latest news update delivered to you via whatsapp
Join Now