Huda Jariwala Arrest : ମସଜିଦ ହଟାଇବାକୁ ନେଇ ଆପତ୍ତିଜନକ ଟିପ୍ପଣୀ: ୟୁଟ୍ୟୁବର ହୁଦା ଜରିୱାଲା ଗିରଫ

ଉତ୍ତରପ୍ରଦେଶ: ସହାରନପୁର କଲେକ୍ଟ୍ରେଟ ପରିସରରୁ ମସଜିଦ ହଟାଇବା ଘଟଣାକୁ ନେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ଜିଲ୍ଲା ପ୍ରଶାସନ ବିରୋଧରେ ଆପତ୍ତିଜନକ ଓ ଅଶୋଭନୀୟ ଟିପ୍ପଣୀ କରିବା ଅଭିଯୋଗରେ ୟୁଟ୍ୟୁବର ହୁଦା ଜରିୱାଲାଙ୍କୁ ଗିରଫ କରିଛି ପୋଲିସ।

ପୋଲିସ ଅନୁଯାୟୀ, ସୋମବାର ସନ୍ଧ୍ୟାରେ ସର୍କିଟ୍ ହାଉସ୍ ନିକଟରେ ମସଜିଦ ହଟାଇବାକୁ ବିରୋଧ କରି ହେଉଥିବା ପ୍ରଦର୍ଶନ ସମୟରେ ଜରିୱାଲାଙ୍କୁ ଗିରଫ କରାଯାଇଥିଲା। ପୋଲିସ ଅଧୀକ୍ଷକ ବ୍ୟୋମ ବିନ୍ଦଲ ଗିରଫଦାରୀକୁ ନିଶ୍ଚିତ କରିଛନ୍ତି। ସୋମବାର ସକାଳେ ଓକିଲ ଦୁଷ୍ମନ୍ତ ସିଂ ସଦର ବଜାର ଥାନାରେ ଅଭିଯୋଗ କରିଥିଲେ। ଅଭିଯୋଗ ଅନୁସାରେ, କଲେକ୍ଟ୍ରେଟ ପରିସରରୁ ମସଜିଦ ହଟାଇବା ପ୍ରସଙ୍ଗରେ ଜରିୱାଲା ମୁଖ୍ୟମନ୍ତ୍ରୀ ଓ ପ୍ରଶାସନ ବିରୋଧରେ ଆପତ୍ତିଜନକ ଟିପ୍ପଣୀ କରିଥିଲେ। ଏଭଳି ଟିପ୍ପଣୀ ଦ୍ୱାରା ଅଞ୍ଚଳରେ ଶାନ୍ତି ଓ ସାମ୍ପ୍ରଦାୟିକ ସଦ୍ଭାବ ପ୍ରଭାବିତ ହେବାର ଆଶଙ୍କା ଥିବା ଅଭିଯୋଗକାରୀ ଦର୍ଶାଇଛନ୍ତି। ପୋଲିସ କହିଛି ଯେ, ଘଟଣାର ଆଇନଗତ ତଦନ୍ତ ଚାଲିଛି ଏବଂ ତଦନ୍ତ ଆଧାରରେ ପରବର୍ତ୍ତୀ ପଦକ୍ଷେପ ନିଆଯିବ।ହୁଦା ଜରିୱାଲା ନିଜକୁ ୟୁଟ୍ୟୁବର, ସାମ୍ବାଦିକ ଓ ସାମାଜିକ କାର୍ଯ୍ୟକର୍ତ୍ତା ଭାବେ ପରିଚୟ ଦେଉଥିବା ବେଳେ ପୂର୍ବରୁ ସେ ସାମ୍ବାଦିକତା କ୍ଷେତ୍ରରେ କାମ କରିଥିବା ଏବଂ ଆମ୍ ଆଦମୀ ପାର୍ଟିର ପ୍ରବକ୍ତା ଭାବେ ମଧ୍ୟ କାର୍ଯ୍ୟ କରିଥିବା ତଥ୍ୟ ସାମ୍ନାକୁ ଆସିଛି।

ଉଲ୍ଲେଖଯୋଗ୍ୟ, ସେପ୍ଟେମ୍ବର ୫ ତାରିଖରେ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ସହାରନପୁର କଲେକ୍ଟ୍ରେଟ ପରିସରରେ ଥିବା ମସଜିଦକୁ ହଟାଇ ଦିଆଯାଇଥିଲା। ମସଜିଦ ହଟାଇବା ଘଟଣାକୁ ନେଇ ପୂର୍ବରୁ ମଧ୍ୟ ବିବାଦ ରହିଥିଲା। ୨୦୨୫ରେ ବଜରଙ୍ଗ ଦଳର କ୍ଷେତ୍ରୀୟ ସଂଯୋଜକ ବିକାଶ ତ୍ୟାଗୀ ମସଜିଦରେ ଡାକଘର ପରିଚାଳନାକୁ ନେଇ ମାଜିଷ୍ଟ୍ରେଟ୍‌ଙ୍କ ଅଦାଲତରେ ପିଟିସନ ଦାଖଲ କରିଥିଲେ। ଏଥିରେ କଲେକ୍ଟ୍ରେଟ ପରିସରରେ ମସଜିଦର ପରିଚାଳନା ଅବୈଧ ବୋଲି ଦାବି କରାଯାଇଥିଲା। ପରେ ସହାରନପୁର ସିଟି ମାଜିଷ୍ଟ୍ରେଟ୍‌ଙ୍କ ଯାଞ୍ଚ ପରେ ମସଜିଦ ହଟାଇବାକୁ ଆଦେଶ ଜାରି ହୋଇଥିଲା। ଏହି ଆଦେଶ ବିରୋଧରେ ମସଜିଦ ପ୍ରବନ୍ଧନ ସମିତି ଜିଲ୍ଲା ଅଦାଲତରେ ଅପିଲ କରିଥିଲା, ଯାହାକୁ ସେପ୍ଟେମ୍ବର ୨ରେ ଖାରଜ କରାଯାଇଥିଲା।