()-ଇତିହାସ ରଚିଲା ଭାରତୀୟ ଅଣ୍ଡର-୧୯ ମହିଳା କ୍ରିକେଟ ଟିମ୍। ପ୍ରଥମ ବିଶ୍ୱକପ୍ ଟି-୨୦ରେ ଚାମ୍ପିଅନ ହେଲା ଭାରତ। ଫାଇନାଲରେ ଇଂଲଣ୍ଡକୁ ୭ ୱିକେଟରେ ହରାଇ ଚାମ୍ପିଅନ ହୋଇଛି ଟିମ୍ ଇଣ୍ଡିଆ। ସେପଟେ ବିଶ୍ୱକପ୍ ଜିତିବା ପରେ ମହିଳା କ୍ରିକେଟରଙ୍କ ଉପରେ ଛୁଟୁଛି ଟଙ୍କା ବର୍ଷା। ପୁରସ୍କାର ରାଶି ଭାବରେ ୫ କୋଟି ଟଙ୍କା ଘୋଷଣା କରିଛନ୍ତି ବିସିସିଆଇ ସଚିବ ଜୟ ଶାହା।
ଅଣ୍ଡର-୧୯ ମହିଳା ଟି-୨୦ ବିଶ୍ୱକପ୍, କମାଲ୍ କଲେ ମହିଳା ଟିମ୍। ଇତିହାସ ରଚିଲା ଭାରତୀୟ ମହିଳା ଟିମ୍। ୧୯ ବର୍ଷ ବୟସରୁ କମ୍ ଟି-୨୦ ବିଶ୍ୱକପ୍ ଜିତି ଇତିହାସ ରଚିଛି ଭାରତୀୟ ମହିଳା ଟିମ୍। ଶେଫାଳି ବର୍ମାଙ୍କ ନେତୃତ୍ୱଧୀନ ଭାରତୀୟ ଦଳ ଫାଇନାଲରେ ଇଂଲଣ୍ଡକୁ ୭ ୱିକେଟରେ ପରାସ୍ତ କରିଛି। ଟିମ ଇଣ୍ଡିଆ ଏହି ବିଶ୍ୱକପର ପ୍ରଥମ ସଂସ୍କରଣ ଜିତି ଇତିହାସ ସୃଷ୍ଟି କରିଛି। ପ୍ରଥମେ ବ୍ୟାଟିଂ କରି ଇଂଲଣ୍ଡ ଭାରତ ସମ୍ମୁଖରେ ୬୯ ରନର ଟାର୍ଗେଟ ଦେଇଥିଲା। ଜବାବରେ ଭାରତ ମାତ୍ର ୧୪ ଓଭର ଖେଳି ୭ ୱିକେଟରେ ପରାସ୍ତ କରିଥିଲା। ଶେଫାଳି ବର୍ମା, ରିଚା ଘୋଷ ଏବଂ ଶ୍ୱେତା ଶେରାୱତଙ୍କ ଭଳି ଷ୍ଟାର ଖେଳାଳିଙ୍କ ସହ ପ୍ୟାକ ହୋଇଥିବା ଟିମ ଇଣ୍ଡିଆ ପାଇଁ ୬୯ ରନ୍ ଅତି ସହଜ ଲକ୍ଷ୍ୟ ଥିଲା। କିନ୍ତୁ ଇଂଲଣ୍ଡ ବୋଲରମାନେ ଚମତ୍କାର ଆରମ୍ଭ କରିଥିଲେ। ଭାରତୀୟ ଇନିଂସର ତୃତୀୟ ଓଭରରେ ଅଧିନାୟିକା ଶେଫାଳି ୧୫ ରନରେ ଆଉଟ୍ ହୋଇଥିଲେ। ପରବର୍ତ୍ତୀ ଓଭରରେ ପାଞ୍ଚ ରନ ସ୍କୋର କରିବା ପରେ ଶ୍ୱେତା ମଧ୍ୟ ଆଉଟ୍ ହୋଇଥିଲେ। ୨୦ ରନ ମଧ୍ୟରେ ଭାରତ ଏହାର ଦୁଇ ଗୁରୁତ୍ୱପୂର୍ଣ୍ଣ ୱିକେଟ ହରାଇଥିଲା। ଏହି ଟୁର୍ଣ୍ଣାମେଣ୍ଟରେ ଶ୍ୱେତା ସର୍ବାଧିକ ରନ ସ୍କୋରର ହୋଇଥିବାବେଳେ ଶେଫାଳି ତୃତୀୟ ସ୍ଥାନରେ ଥିଲେ। ଦୁଇଟି ଦ୍ରୁତ ୱିକେଟ ଖସିଯିବା ପରେ ଭାରତୀୟ ଦଳ ଚାପରେ ରହିଥିଲା, କିନ୍ତୁ ସୌମ୍ୟା ତିୱାରୀ ଏବଂ ଜି. ତ୍ରିଶାଙ୍କ ଯୋଡି ଏକ ଭଲ ଭାଗିଦାରୀ କରିଥିଲା। ଉଭୟ ତୃତୀୟ ୱିକେଟ ପାଇଁ ୪୬ ରନ ଭାଗିଦାରୀ ବାଣ୍ଟିଥିଲେ। ତେବେ ଭାରତର ବିଜୟ ପୂର୍ବରୁ ତ୍ରିଶା ଆଉଟ ହୋଇଥିଲେ। ସେ ୨୯ ବଲରେ ୨୪ ରନ ସଂଗ୍ରହ କରିଥିଲେ। ଶେଷରେ ସୌମ୍ୟା ତିୱାରୀ ମ୍ୟାଚ ଶେଷ କରିଥିଲେ। ସେ ୩୭ ବଲରୁ ଅପରାଜିତ ୨୪ ରନ କରିଥିଲେ।
ସେପଟେ ଭାରତୀୟ ଅଣ୍ଡର-୧୯ ମହିଳା ଦଳ ଟି-୨୦ ବିଶ୍ୱକପ ଜିତିବା ପରେ ଛୁଟିଛି ଅଭିନନ୍ଦନର ସୁଅ। ଅଣ୍ଡର-୧୯ ମହିଳା ଦଳ ୭ ୱିକେଟରେ ଇଂଲଣ୍ଡକୁ ପରାସ୍ତ କରି ବିଜୟ ଲାଭ କରିବା ସହ ମହିଳା କ୍ରିକେଟରେ ନିଜର ପ୍ରଥମ ଆଇସିସି ଟାଇଟଲ ଜିତିଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ଅନେକ ରାଜନୈତିକ ଦଳର ନେତାମାନେ ରବିବାର ଦିନ ଭାରତ ଅଣ୍ଡର-୧୯ ମହିଳା କ୍ରିକେଟ ଦଳର ବିଜୟକୁ ପ୍ରଶଂସା କରିଛନ୍ତି। ମହିଳା ଅଣ୍ଡର-୧୯ କ୍ରିକେଟ ଦଳ ଏବଂ ସହାୟକ କର୍ମଚାରୀଙ୍କ ପାଇଁ ବିସିସିଆଇ ସଚିବ ଜୟ ଶାହା ପାଞ୍ଚ କୋଟି ଟଙ୍କା ପୁରସ୍କାର ରାଶି ଘୋଷଣା କରିଛନ୍ତି। ଭାରତରେ ମହିଳା କ୍ରିକେଟର ଲୋକପ୍ରିୟତା ବୃଦ୍ଧି ପାଉଛି ଏବଂ ବିଶ୍ୱକପ ବିଜୟ ମହିଳା କ୍ରିକେଟ ସ୍ଥିତିକୁ ଆହୁରି ଅଧିକ ବୃଦ୍ଧି କରିଛି। ସମଗ୍ର ଦଳ ଏବଂ ସହାୟକ କର୍ମଚାରୀଙ୍କ ପାଇଁ ପୁରସ୍କାର ରାଶି ଭାବରେ ୫ କୋଟି ଟଙ୍କା ଘୋଷଣା କରି ଖୁସିବ୍ୟକ୍ତ କରିଛନ୍ତି ଜୟ ଶାହା। ଏହା ନିଶ୍ଚିତ ଭାବରେ ଏକ ଉତ୍ତମ ବର୍ଷ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଅଣ୍ଡର-୧୯ ଭାରତୀୟ ମହିଳା କ୍ରିକେଟ ଦଳକୁ ଅଭିନନ୍ଦନ ଜଣାଇଛନ୍ତି। ସେମାନେ ଚମତ୍କାର କ୍ରିକେଟ ଖେଳିଛନ୍ତି ଏବଂ ତାଙ୍କର ଏହି ସଫଳତା ଅନେକ କ୍ରିକେଟ ଖେଳାଳିଙ୍କୁ ପ୍ରେରଣା ଯୋଗାଇବ ବୋଲି କହିଥିଲେ ମୋଦି।
