ଭୁବନେଶ୍ବର: ଏମ୍ସରୁ ଗିରଫ ହେଲେ ୧୩ ଦଲାଲ୍। ଏମ୍ସକୁ ରୋଗୀଙ୍କ ଭିଡ଼ ଜମୁଥିଲା ବେଳେ ରୋଗୀ ଓ ସେମାନଙ୍କ ସମ୍ପର୍କୀୟଙ୍କୁ ଶୋଷଣ କରିବାକୁ ଦଲାଲ ସକ୍ରିୟ ଥିଲେ। ଗିରଫ ଦଲାଲଙ୍କ ଭିତରେ କିଛି ସ୍ଥାନୀୟ ଲୋକଙ୍କ ସହ ବଙ୍ଗୀୟ ଯୁବକ ମଧ୍ୟ ରହିଛନ୍ତି।
ଦୂରଦୂରାନ୍ତରୁ ଆସୁଥିବା ରୋଗୀଙ୍କୁ ଗିରଫ ଦଲାଲ କରୁଥିଲେ ଟାର୍ଗେଟ l ସୁବିଧାରେ ଡାକ୍ତରଙ୍କୁ ଭେଟ କରିଦେବା କଥା କହି ଫସାଉଥିଲେ ରୋଗୀଙ୍କୁ l ଶହେ ଟଙ୍କାର ଟିକେଟ ପାଇଁ ନେଉଥିଲେ ୪ ହଜାରରୁ ୫ ହଜାର ପର୍ଯ୍ୟନ୍ତ ଟଙ୍କା l ଆଉ ଆଜି କମିଶନରେଟ ପୋଲିସ କବଜାରେ ଏହି ଦଲାଲମାନେ l ଖଣ୍ଡଗିରି ପୋଲିସ ଚଢ଼ାଉ କରି ୧୩ ଦଲାଲଙ୍କୁ ଗିରଫ କରି କୋର୍ଟ ଚାଲାଣ କରିଛି l ରାଜ୍ୟର କୋଣ ଅନୁକୋଣରୁ ଆରମ୍ଭ କରି ବାହାର ରାଜ୍ୟରୁ ଏବେ ଭୁବନେଶ୍ବର ଏମ୍ସକୁ ରୋଗୀଙ୍କ ସୁଅ ଛୁଟୁଛି । ଯେଉଁମାନେ ବାହାରୁ ଆସି ଅସୁବିଧାରେ ପଡୁଥିଲେ , ସେଭଳି ଲୋକଙ୍କୁ ଟାର୍ଗେଟ କରୁଥିଲେ ଏହି ଦଲାଲ ମାନେl ଏମାନଙ୍କ ଭିତରେ ପଶ୍ଚିମବଙ୍ଗର ଅଛନ୍ତି ୬ ଦଲାଲ । ବାକି ଗିରଫ ଦଲାଲ ଆଖପାଖ ଅଞ୍ଚଳର ବୋଲି ପୋଲିସ କହିଛି।
ଏମ୍ସରେ ବହୁଦିନ ଧରି ଦଲାଲରାଜ ଚାଲିଥିଲା। ଅଭିଯୋଗ ପରେ ମଧ୍ୟ ଏମ୍ସ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଉନଥିଲେ । ବାରମ୍ବାର ସ୍ଥାନୀୟ ଲୋକଙ୍କ ଅଭିଯୋଗ ପରେ ମଧ୍ୟ ଏମ୍ସ ଭିତରେ ଥିବା ଫାଣ୍ଡି ଅଧିକାରୀ ଏହାକୁ ଗୁରୁତ୍ୱ ଦେଉ ନଥିଲେ । ଗିରଫ ଦଲାଲଙ୍କ ସହିତ ଏମ୍ସର କିଛି ଅସାଧୁ କର୍ମଚାରୀ , ସିକ୍ୟୁରିଟି ଗାର୍ଡ ଓ ପୋଲିସ କର୍ମଚାରୀ ସାମିଲ ରହିଥିବା ଅଭିଯୋଗ ହୋଇଛି ।
ଏବେବି ଏମ୍ସରେ ବନ୍ଦ ହୋଇନି ଦଲାଲରାଜ । ପ୍ରତିଦିନ ପ୍ରାୟ ପାଞ୍ଚଶହରୁ ଅଧିକ ରୋଗୀ ଏଠାକୁ ଆସୁଛନ୍ତି । ଆଉ ଏମାନଙ୍କୁ ଠକିବା ପାଇଁ ଏହି ଦଲାଲ ମାନେ ଚାତକ ଭଳି ଚାହିଁ ରହିଥାନ୍ତି । ବର୍ତମାନ ଏମ୍ସ କୁ ଦଲାଲ ମୁକ୍ତ କରିବାପାଇଁ କମିସନରେଟ ପୋଲିସ ସାଧା ପୋଷାକରେ ନଜର ରଖିଛି।
ସ୍ୱରୂପା ମହାପାତ୍ରଙ୍କ ରିପୋର୍ଟ ନକ୍ଷତ୍ର ନ୍ୟୁଜ l
