ସାମ୍ନାକୁ ଆସିଲା ବଲାଙ୍ଗିର ରାଜ ପରିବାରର ବଡ ଗୁମର, ଅନଙ୍ଗଙ୍କ ସାନବୋହୂ ଶାଶୂଘର ଲୋକଙ୍କ ବିରୋଧରେ ନିର୍ଯାତନା ଅଭିଯୋଗ ଆଣିଲେ

ବଲାଙ୍ଗିର : ସାମ୍ନାକୁ ଆସିଛି ବଲାଙ୍ଗିର ରାଜ ପରିବାରର ବଡ ଗୁମର । ଶାଶୂଘରର ସମସ୍ତଙ୍କ ବିରୋଧରେ ନିର୍ଯାତନା ଅଭିଯୋଗ ଆଣିଛନ୍ତି ଅନଙ୍ଗ ଉଦୟ ସିଂହଦେଓଙ୍କ ସାନବୋହୂ ତଥା ଅର୍କେଶ ନାରାୟଣ ସିଂହଦେଓଙ୍କ ପତ୍ନୀ ଅଦ୍ରିଜା ମଞ୍ଜରୀ ସିଂହଦେଓ । ତାଙ୍କୁ ତାଙ୍କ ସ୍ୱାମୀ ମାଡପିଟ୍ କରିଥିବା ଦର୍ଶାଇ ସେ ଉତରାଖଣ୍ଡର ଡେରାଡୁନ ଥାନାରେ ଲିଖିତ ଅଭିଯୋଗ ଦାୟର୍ କରିଛନ୍ତି । ଏହା ସହିତ ତାଙ୍କୁ ତାଙ୍କ ଶାଶୂ, ଶ୍ୱଶୁର, ଦେଢ଼ଶୁର ଓ ଯାଆ ନିର୍ଯାତନା ଦେଉଥିବା ସେ ଏତଲାରେ ଦର୍ଶାଇଛନ୍ତି । ଏଥିସହ ସାମାଜିକ ଗଣମାଧ୍ୟମରେ ଅଦ୍ରିଜାଙ୍କ ବୟାନ୍ ଭାଇରାଲ୍ ହୋଇଥିବା ଜଣାପଡିଛି ।

ଏଠାରେ ଉଲ୍ଲେଖଯୋଗ୍ୟ, ଅର୍କେଶ ନାରାୟଣ ସିଂହଦେଓ ଗତ ୨୦୧୯ ନିର୍ବାଚନରେ ବଲାଙ୍ଗିର ସଦର ନିର୍ବାଚନ ମଣ୍ଡଳିରୁ ବିଜେଡ଼ି ବିଧାୟକ ପ୍ରାର୍ଥୀ ହୋଇଥିଲା ବେଳେ ତାଙ୍କ ସମର୍ଥନରେ ପତ୍ନୀ ଅଦ୍ରିଜା ପ୍ରଚାର ମଇଦାନକୁ ଓହ୍ଲାଇଥିବା ଦେଖିବାକୁ ମିଳିଥିଲା । ଏଥିସହିତ ସେ ଦୀର୍ଘ ଦିନ ଧରି ସ୍ୱାମୀଙ୍କୁ ରାଜନୀତିରେ ସହଯୋଗ କରି ଆସୁଥିଲେ । ଅନ୍ୟପକ୍ଷରେ ଅର୍କେଶ ଏହି ଅଭିଯୋଗକୁ ଖଣ୍ଡନ କରିଛନ୍ତି । ତାଙ୍କ ବିରୋଧରେ ଆସିଥିବା ଏସବୁ ଅଭିଯୋଗ ମିଥ୍ୟା ଓ ଭିତିହୀନ । ଆଜିକାଲି ଦାମ୍ପତ୍ୟ ଜୀବନରେ ଏ ପ୍ରକାର ଅଭିଯୋଗ କରି ସାଧାରଣରେ ବଦନାମ କରିବା ପାଇଁ ଏକ ପ୍ରକାର ଚାପ ସୃଷ୍ଟି କରୁଛନ୍ତି । ମାମଲା ଡେରାଡୁନ କୋର୍ଟରେ ଚାଲିଛି । ନ୍ୟାୟପାଳିକା ଉପରେ ମୋର ପୂର୍ଣ୍ଣ ବିଶ୍ୱାସ ରହିଛି । ଖୁବଶୀଘ୍ର ସତ କ’ଣ ତାହା ଆପଣମାନେ ଜାଣିପାରିବେ ବୋଲି ସେ କହିଛନ୍ତି ।

ପ୍ରକାଶ ଥାଉକି, ଶ୍ରୀମତୀ ଅଦ୍ରିଜା ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ବିଶ୍ୱନାଥ ପ୍ରତାପ ସିଂହଙ୍କ ନାତୁଣୀ ।