ନିର୍ଦେଶକ ନୀତେଶ ତିୱାରୀଙ୍କ ଫିଲ୍ମ ‘ରାମାୟଣ’ ଏବେ ଚର୍ଚ୍ଚାର ବିଷୟ ହୋଇ ରହିଛି | ଏହି ଫିଲ୍ମରେ ରଣବୀର କପୁରଙ୍କୁ ଦେଖିବାକୁ ମିଳିବ। ସେ ଫିଲ୍ମ ପାଇଁ ପ୍ରସ୍ତୁତି ମଧ୍ୟ ଆରମ୍ଭ କରିସାରିଛନ୍ତି। ରଣବୀର ପ୍ରଭୁ ରାମଙ୍କ ଭୂମିକାରେ ନଜର ଆସିବାକୁ ଥିବାବେଳେ ସାଉଥ ଷ୍ଟାର ସାଇ ପଲ୍ଲବୀ ମାତା ସୀତାଙ୍କ ଭୂମିକାରେ ନଜର ଆସିବେ। କୁହାଯାଉଛି ଯେ ଏହି ଚଳଚ୍ଚିତ୍ରଟି ବହୁତ ଚମତ୍କାର ହେବ। ଏହି ଫିଲ୍ମକୁ ନେଇ ଆଉ ଏକ ବଡ ଖବର ସାମ୍ନାକୁ ଆସିଛି |
କୁହାଯାଉଛି ଯେ, କେଜିଏଫ୍ ଷ୍ଟାର ୟଶ ଏହି ଚଳଚ୍ଚିତ୍ରରେ ରାବଣ ଭୂମିକାରେ ନଜର ଆସିବେ। ଯଦି ରିପୋର୍ଟକୁ ବିଶ୍ୱାସ କରାଯାଏ, ତେବେ ୟଶ ‘ରାମାୟଣ’ ପରେ ବଲିଉଡର ସର୍ବାଧିକ ପାରିଶ୍ରମିକ ପ୍ରାପ୍ତ ଅଭିନେତା ହେବାକୁ ଯାଉଛନ୍ତି। ପାରିଶ୍ରମିକ ଦୃଷ୍ଟିରୁ ସେ ଶାହାରୁଖ ଖାନଙ୍କୁ ମଧ୍ୟ ପଛରେ ପକାଇ ଦେଇଛନ୍ତି।
ଜାତୀୟ ଗଣମାଧ୍ୟମ ନ୍ୟୁଜ୍ ୧୮ର ରିପୋର୍ଟ ଅନୁଯାୟୀ, ‘ରାମାୟଣ’ରେ ରାବଣ ଭୂମିକାରେ ଅଭିନୟ କରିବାକୁ ୟଶ ୨୦୦କୋଟି ଟଙ୍କା ପାରିଶ୍ରମିକ ନେବେ | ପୂର୍ବରୁ ସେ ଫିଲ୍ମ କରିବାକୁ ମନା କରିଥିବା ବେଳେ ଏବେ ପାରିଶ୍ରମିକ ବଢ଼ାଇ ୨୦୦କୋଟିରେ ରାଜି ହୋଇଛନ୍ତି | ଯଦି ୟଶ ପ୍ରକୃତରେ ରାମାୟଣ ପାଇଁ ୨୦୦କୋଟି ଟଙ୍କା ନେଉଥିବେ, ତେବେ ସେ ଏଭଳି କରି ବଲିଉଡର କିଙ୍ଗ ଖାନଙ୍କୁ ପଛରେ ପକାଇଦେବେ। ଶାହାରୁଖ ଖାନ ବଲିଉଡର ସର୍ବାଧିକ ପାରିଶ୍ରମିକ ପ୍ରାପ୍ତ ଅଭିନେତା। ସେ ‘ପଠାନ’ ପାଇଁ ୧୨୦କୋଟି ଟଙ୍କା ପାରିଶ୍ରମିକ କରିଥିଲେ। ବର୍ତ୍ତମାନ ଯଦି ୟଶ ୨୦୦ କୋଟି ଟଙ୍କା ନେଉଛନ୍ତି ତେବେ ସେ ବଲିଉଡର ସର୍ବାଧିକ ପାରିଶ୍ରମିକ ପ୍ରାପ୍ତ ଅଭିନେତା ହେବେ |
