ହାବସପୁରୀ କଳାକୁ ବଞ୍ଚାଇବା ପାଇଁ ନିଆରା ପ୍ରୟାସ

କଳାହାଣ୍ଡି: କଳାହାଣ୍ଡି ବିଶ୍ବ ବିଦ୍ୟାଳୟର ଛାତ୍ରଛାତ୍ରୀ ପିନ୍ଧିବେ ହାବସପୁରୀ କପଡ଼ାର ୟୁନିଫର୍ମ । ବୁଡି ଯାଉଥିବା ହାବସପୁରୀ କଳାକୁ ବଞ୍ଚାଇବା ପାଇଁ ନିଆରା ପ୍ରୟାସ ଆରମ୍ଭ ହୋଇଛି । ହାବସପୁରୀ ଶାଢୀର ପ୍ରଚାର ପ୍ରସାର ପାଇଁ ସରକାର ଆଗ୍ରହ ଦେଖାଇନଥିବା ବେଳେ, ହାବସପୁର ଶାଢୀ ତିଆରି କରୁଥିବା ବୁଣାକାର ନିଜର ରୋଜଗାର ହରାଇ ବସୁଥିଲେ। ଏହାକୁ ଦୃଷ୍ଟିରେ ରଖି କଳାହାଣ୍ଡି ବିଶ୍ବ ବିଦ୍ୟାଳୟରେ ଅଧ୍ୟୟନ କରୁଥିବା ସମସ୍ତ ଛାତ୍ରଛାତ୍ରୀ ଓ ଅଧ୍ୟାପକ ହାବସପୁରୀ କପଡାର ବ୍ୟବହାର କରିବା ପାଇଁ ନିଷ୍ପତ୍ତି ନେଇଛନ୍ତି। ବୁଣାକାରଙ୍କ ମଧ୍ୟରେ ବେଶ ଉତ୍ସାହ ଦେଖାଦେଇଛି ।

ପଶ୍ଚିମଓଡିଶାରେ ବରପାଲି ଶାଢୀ, ସୋନପୁରୀ ଶାଢୀ, ବାନ୍ଧ ଶାଢୀ, ଓ ସମ୍ବଲପୁରୀ ଶାଢୀ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରି ପାରିଛି । ସେଥି ମଧ୍ୟରୁ କଳାହାଣ୍ଡି ଜିଲ୍ଲାର ହାବସପୁରୀ ଶାଢୀ ମଧ୍ୟ  ଜିଲ୍ଲା , ରାଜ୍ୟ, ଦେଶ ତଥା ଦେଶ ବାହାରେ ନିଜର ସ୍ବତନ୍ତ୍ର ପରିଚୟ ହାସଲ କରିପାରିଛି ସତ, କିନ୍ତୁ ଏବେ ଧିରେ ଧିରେ ଲୋପ ପାଇବାକୁ ବସିଛି। ବର୍ତ୍ତମାନ ବିଭିନ୍ନ ଶାଢ଼ୀ ବଜାରକୁ ଆସିବା ଯୋଗୁଁ ହାତବୁଣା ଶାଢ଼ୀର ଚାହିଦା କମିବାକୁ ଲାଗିଲା । ଜିଲ୍ଲାରେ ଉନବିଂଶ ଶତାବ୍ଦୀରେ  ଲୋକମାନେ ହାବସପୁରୀ ଶାଢ଼ୀ ବୁଣାକାମ ଆରମ୍ଭ କରିଥିଲେ । ପରବର୍ତ୍ତୀ ସମୟରେ ଭୁଲିଆ ସମ୍ପ୍ରଦାୟର ଲୋକେ ଏହାକୁ କୌଳିକ ବୃତ୍ତି ହିସାବରେ ଗ୍ରହଣ କରିଥିଲେ । ବୁଣାକାର ମାନେ ବେପାର କମିଯିବାରୁ ଶାଢ଼ୀବୁଣା ଛାଡି  ଅନ୍ୟ କାମ କରି ପରିବାର ପ୍ରତିପୋଷଣ କଲେ । ଫଳରେ ହାବସପୁରୀ ଶାଢ଼ୀ ଆଉ ବଜାରରେ ଦେଖିବାକୁ ମିଳୁନାହିଁ । ଏହାକୁ ଦୃଷ୍ଟିରେ ରଖି କଳାହାଣ୍ଡି ବିଶ୍ବ ବିଦ୍ୟାଳୟର କୁଳପତି ଡ଼ ସଞ୍ଜୟ ଶତପଥି ଓ ଡିଜାଇନର ସୁଜିତ ମେହେର ଏକ ନିଆରା ପ୍ରୟାସ ଆରମ୍ଭ କରିଛନ୍ତି । ବିଶ୍ବ ବିଦ୍ୟାଳୟରେ ପଢୁଥିବା ସମସ୍ତ ଛାତ୍ରଛାତ୍ରୀ ଓ ଅଧ୍ୟାପକ ହାବସପୁରୀ କପଡାର ଡ୍ରେସ କୋଡ ପରିଧାନ କରିବେ।  ଶହ ଶହ ଛାତ୍ର ଛାତ୍ରୀ ଏଭଳି ପଦକ୍ଷେପକୁ ସ୍ବାଗତ କରିଛନ୍ତି।

ବର୍ତ୍ତମାନ ହାବସପୁରୀ ଶାଢ଼ୀ ହାତ ଗଣତି କିଛି ଗ୍ରାମରେ କମ ମାତ୍ରାରେ ବୁଣାଯାଉଛି ।  ୧୯୫୧ମସିହାରେ ହାବସପୁରୀ ଶାଢ଼ୀ ଦିଲ୍ଲୀର ପ୍ରଦର୍ଶନୀ ପଡ଼ିଆରେ ଭାଗ ନେଇ ବେଶ ଆଦୃତ ହୋଇଥିଲା । ତେବେ କଳାହାଣ୍ଡି ବିଶ୍ଵବିଦ୍ୟାଳୟ ପିଜି ପ୍ରଥମ ବର୍ଷ ଛାତ୍ରଛାତ୍ରୀଙ୍କ ପାଇଁ ନୂଆ ୟୁନିଫର୍ମ ପ୍ରଚଳନ ପାଇଁ ପ୍ରୟାସ ଆରମ୍ଭ  କରିଛନ୍ତି । ବିଶ୍ଵବିଦ୍ୟାଳୟ କୁଳପତି ପ୍ରଫେସର ସଞ୍ଜୟ କୁମାର ଶତପଥୀ ନିଜ  ହାତରେ ନୂଆ ୟୁନିଫର୍ମ ଛାତ୍ରଛାତ୍ରୀଙ୍କ ଉଦ୍ଦେଶ୍ୟରେ ଲୋକାର୍ପଣ କରିଥିଲେ।  ଏହାଦ୍ବାରା କାରିଗର ବହୁଳ ଭାବରେ ଉପକୃତ ହେବେ ବୋଲି କହିଛନ୍ତି ବିଶ୍ୱବିଦ୍ୟାଳୟର କୁଳପତି l

ଓଡ଼ିଶାରେ ବୟନ ଶିଳ୍ପକୁ ସରକାର ଅଣଦେଖା କରୁଥିବାରୁ ହାବସପୁରୀ ଶାଢ଼ୀ ଏବେ ଲୋପ ପାଇବାକୁ ବସିବାକୁ ଥିବା ବେଳେ, କଳାହାଣ୍ଡି ବିଶ୍ବ ବିଦ୍ୟାଳୟର ଏହି ନିଆରା ପ୍ରୟାସ  ବୁଣାକାରଙ୍କ ମନରେ ବେଶ ଉତ୍ସାହ ଦେଖାଦେଇଛି।  

କୈଳାଶ ସାହୁଙ୍କ ରିପୋର୍ଟ

Naxatra News is now on Whatsapp

Join and get latest news update delivered to you via whatsapp

Join Now