ବନ୍ୟାବିପନ୍ନଙ୍କ ଦୁଃଖକୁ ଦ୍ୱିଗୁଣିତ କରିଛି ଲଘୁଚାପ ବର୍ଷା

ତିର୍ତ୍ତୋଲରେ ବନ୍ୟା ବିତ୍ପାତ। ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକ ଅଞ୍ଚଳରେ ବନ୍ୟା ବିତ୍ପାତ ସାଙ୍ଗକୁ ଲଘୁଚାପ ଜନିତ ଲଗାଣ ବର୍ଷା ବନ୍ୟା ବିପନ୍ନଙ୍କ ଦୁଃଖକୁ ଦ୍ୱିଗୁଣିତ କରିଛି। ପାଇକା ନଦୀରେ ଘାଇ ସୃଷ୍ଟି ଯୋଗୁଁ ଗତ ଦୁଇଦିନ ହେଲା ଗାଁକୁ ଗାଁ ପଶୁଛି ବନ୍ୟାପାଣି। ବନ୍ୟାପାଣି ଘରେ ପଶିଥିବାରୁ ଲଘୁଚାପଜନିତ ଲଗାଣବର୍ଷା ବନ୍ୟା ବିପନ୍ନଙ୍କ ଦୁଃଖ ଦ୍ୱିଗୁଣିତ କରିଛି। ମହାନଦୀ-ପାଇକା ଦ୍ୱିପାଞ୍ଚଳବାସୀଙ୍କ ମନରେ ଆତଙ୍କ ଖେଳିଯାଇଛି । ତିର୍ତ୍ତୋଲ ବ୍ଲକର ସାତଟି ପଞ୍ଚାୟତର ୨୦ରୁ ଉର୍ଦ୍ଧ୍ବ ଗ୍ରାମର ଏକ ହଜାର ପରିବାର ପ୍ରଭାବିତ ହୋଇଛନ୍ତି। କୁଜଙ୍ଗ ବ୍ଲକ କାଠକୋଟ ଠାରେ ପାଇକା ନଦୀବନ୍ଧରେ ଘାଇ ହେବା ଫଳରେ ମହାନଦୀ-ପାଇକା ଦ୍ୱିପାଞ୍ଚଳରେ ବନ୍ୟା ବିତ୍ପାତ ଦେଖିବାକୁ ମିଳିଛି। କୁଜଙ୍ଗ ବ୍ଲକର କାଠକୋଟ, ହଂସୁରା ଓ ବଡବାଲିକଣି ପଞ୍ଚାୟତରେ ବନ୍ୟାପାଣି ପଶିଥିବା ବେଳେ ତିର୍ତ୍ତୋଲ ବ୍ଲକର ପୋରଗଦେଇ, କୋଲର, ଗୋପାଳପୁର-ଶଙ୍ଖେସ୍ୱର,ଦାଇଁଲୋ ପଞ୍ଚାୟତର ପାଖାପାଖି କୋଡିଏ ରୁ ଉର୍ଦ୍ଧ ଗ୍ରାମରେ ବନ୍ୟାପାଣି ପଶୁଛି। ଜଳବନ୍ଦୀ ଅବସ୍ଥାରେ ଭୋକ ଉପାସରେ ଗୃହପାଳିତ ପଶୁଙ୍କ ସହ ବନ୍ୟା ବିପନ୍ନ ମାନେ ଜୀବନ କାରୁଥିବା ଅଭିଯୋଗ କରିଛନ୍ତି। ଅନ୍ୟପକ୍ଷରେ ଦିନ ୧୦ଘଟିକା ଠାରୁ ଲଗାଣବର୍ଷା ଆରମ୍ଭ ହୋଇଛି। ତଳେ ବନ୍ୟାପାଣି ଓ ଉପରୁ ଲଗାଣବର୍ଷା ବନ୍ୟା ବିପନ୍ନଙ୍କ ଦୁର୍ଦ୍ଦଶା ବଢାଇଦେଇଛି। ବନ୍ୟାପାଣି ପଶି ବିତ୍ପାତ ସୃଷ୍ଟି ହୋଇଥିବା ବେଳେ ସେମାନଙ୍କ ପାଖରେ ପ୍ରଶାସନ ପହଞ୍ଚିନଥିବା ବେଳେ ପଲିଥିନ, ଶୁଖିଲାଖାଦ୍ୟ,ମହମବତୀ,ଗୋଖାଦ୍ୟ ଆଦି ଅତ୍ୟାବଶ୍ୟକୀୟ ସାମଗ୍ରୀ ଦାବି କରିଛନ୍ତି ବନ୍ୟା ବିପନ୍ନ।